SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ကရင်အမျိုးသားအစည်းအရုံး (ကေအန်ယူ) ထိန်းချုပ်နယ်မြေတွေအတွင်း စစ်ဘေးဒုက္ခသည်  သုံးသိန်းခွဲကျော် ရှိလာပြီလို့ ကေအန်ယူက  ဩ ဂုတ် ၁၆ ရက်မှာ သတင်းထုတ်ပြန်ပါတယ်။

ကေအန်ယူ ထိန်းချုပ်နယ်မြေ သထုံခရိုင် တပ်မဟာ (၁)၊ တောင်ငူခရိုင် တပ်မဟာ (၂)၊ ညောင်လေးပင်ခရိုင် တပ်မဟာ (၃)၊ မြိတ်−ထားဝယ်ခရိုင် တပ်မဟာ (၄)၊ မူတြော်ခရိုင် တပ်မဟာ (၅)၊ ဒူးပလာယာခရိုင် တပ်မဟာ (၆) နယ်မြေတွေမှာ နေ့စဉ် တိုက်ပွဲဖြစ်ပွားနေတာကြောင့် ဒေသနေပြည်သူတွေ ဘေးလွတ်ရာ ထွက်ပြေးတိမ်းရှောင် နေကြရတာလို့ ဆိုပါတယ်။

သထုံခရိုင် တပ်မဟာ (၁) မှာ ၉၄,၇၆၈ ဦး၊ တောင်ငူခရိုင် တပ်မဟာ (၂) မှာ ၇,၅၃၇ ဦး၊ ညောင်လေးပင်ခရိုင် တပ်မဟာ (၃) မှာ ၆၁,၈၉၈ ဦး၊ မြိတ်-ထားဝယ်ခရိုင် တပ်မဟာ (၄) မှာ ၆,၀၀၀ ဦး၊ မူတြော်ခရိုင် တပ်မဟာ (၅) မှာ ၉၆,၁၈၀ ဦးနဲ့ ဒူးပလာယာခရိုင် တပ်မဟာ (၆) မှာ ၉၀,၂၉၁ ဦး  စုစုပေါင်း ၃၅၆,၆၇၄ ဦးလို့ ဖော်ပြထားပါတယ်။

စာရင်းထပ်ကောက်နေဆဲဖြစ်တာကြောင့် စစ်ဘေးဒုက္ခသည် အရေအတွက် ဒီထက် ပိုများလာနိုင်တယ်လို့လည်း ကေအန်ယူက ထုတ်ပြန်ထားပါတယ်။

ဘေးလွတ်ရာ ထွက်ပြေးတိမ်းရှောင်နေရတဲ့ ပြည်သူတွေအတွက် နေရာထိုင်ခင်း၊ စားဝတ်နေရေး၊ ကျန်းမာရေး၊ လုံခြုံရေး လိုအပ်ချက်တွေကို ‌ေကအန်ယူနဲ့ လက်အောက်ခံ အဖွဲ့အစည်တွေက တာဝန်ယူ စီစဉ်ဆောင်ရွက်ပေးနေတယ်လို့ ဆိုပါတယ်။

လက်ရှိအခြေအနေမှာ ကေအန်ယူနဲ့ လက်အောက်ခံတပ်ဖွဲ့တွေဖြစ်တဲ့ ကရင်အမျိုးသားလွတ်မြောက်ရေး တပ်မတော် (KNLA)၊ ကရင်အမျိုး သားကာကွယ်ရေးတပ်ဖွဲ့ (KNDO) တို့က အာဏာသိမ်း အကြမ်းဖက်စစ်ကောင်စီတပ်တွေနဲ့ ရင်ဆိုင်တိုက်ခိုက်နေရတဲ့ အတွက် နေ့စဉ် စစ်ရေးကုန်ကျစရိတ်၊ စစ်ရေးလိုအပ်ချက်တွေအပြင် စစ်ဘေးရှောင် ပြည်သူတွေရဲ့ လိုအပ်ချက်ကိုပါ တပြိုင်နက်တည်း စီစဉ်ဆောင်ရွက်နေရကြောင်း လည်း ထုတ်ပြန်ထားပါတယ်။

ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) ရဲ့ ဇူလိုင် ၃၁ ရက် စာရင်းအရ စစ်တပ်အာဏာသိမ်းပြီးနောက် စစ်ဘေးဒုက္ခ သည်ပေါင်း ၈၆၀,၀၀၀ ကျော် ရှိလာပြီး အာဏာမသိမ်းခင်က ဒုက္ခသည်တွေ အပါအဝင်ဆိုရင် စုစုပေါင်း ၁ ဒသမ ၂ သန်းအထိ ရှိနေပြီဖြစ်ပါတယ်။DVB

စစ်ကောင်စီထံတွင် ခံဝန်ထိုးပြီး နေထိုင်လျက်ရှိနေသည့် ပါတီဝင်များအနေဖြင့် နိုင်ငံရေးပင်စင်ထုတ်ယူခြင်းဖြစ်ကြောင်း အမျိုးသားဒီမိုကရေစီအဖွဲ့ချုပ်(NLD) ဗဟိုပြန်ကြားရေးကော်မတီဝင် ဦးငြိမ်းသစ်က မဇ္ဈိမသို့ပြောသည်။

စစ်ကောင်စီ၏ ဩဂုတ်လ ၁၇ရက်နေ့ထုတ် ဝါဒဖြန့်သတင်းစာများတွင် ပြီးခဲ့သည့် ဒုတိယအကြိမ်လွှတ်တော်သက်တမ်းအတွင်း နိုင်ငံရေးတာဝန်များထမ်းဆောင်ခဲ့သူ ၄၉၁ဦးကို နိုင်ငံရေးပင်စင် ထုတ်ပေးပြီးဖြစ်ကြောင်း ထုတ်ပြန်ခဲ့သည်။

၎င်းတို့ထဲတွင် ပြည်ထောင်စုအဆင့်ပုဂ္ဂိုလ် ကိုးဦး၊ တိုင်းနှင့်ပြည်နယ်အဆင့်ပုဂ္ဂိုလ် ၅၀ ၊ ပြည်သူ့လွှတ်တော် ကိုယ်စားလှယ် ၁၅၂ဦး၊ အမျိုးသားလွှတ်တော် ကိုယ်စားလှယ် ၈၈ဦး ၊ တိုင်းနှင့်ပြည်နယ် လွှတ်တော်ကိုယ်စားလှယ် ၁၉၂ဦး ပါဝင်ကြောင်း ထုတ်ပြန်ထားသည်ကို တွေ့ရသည်။

ထိုသို့ထုတ်ပြန်ခဲ့သည့် ၄၉၁ဦးအနက် အမျိုးသားဒီမိုကရေစီအဖွဲ့ချုပ်မှ ၂၁၇ဦးပါဝင်သည်ဟု ထုတ်ပြန်ထားသည်ကို တွေ့ရသည်။

အမျိုးသားဒီမိုကရေစီအဖွဲ့ချုပ်တွင် စစ်ကောင်စီ၏ ဖမ်းဆီးမှုများ၊ မိသားစုဝင်များကို ခြိမ်းခြောက်မှုများနှင့် ရှောင်တိမ်းရန် အခက်အခဲရှိသူများသည် ခံဝန်ထိုးနေထိုင်လျက်ရှိနေပြီး ၎င်းတို့အနေဖြင့် ထုတ်ယူခြင်း ဖြစ်ကြောင်း ဦးငြိမ်းသစ်က ဆိုသည်။

“သူတို့အတင်းအကျပ် ဖမ်းဆီးပြီးတော့ ခံဝန်ထိုးခိုင်းထားတဲ့ လူအချို့ပေါ့ဗျာ၊ အဲဒါတွေကိုတော့ နိုင်ငံရေးပင်စင် ထုတ်ပေးနိုင်ပါတယ်၊ မတရားဖမ်းဆီးမှု တွေခံရတဲ့ ပုဂ္ဂိုလ်တွေ ခြိမ်းခြောက်မှုခံရတဲ့ ပုဂ္ဂိုလ်တွေက ခံဝန်ထိုးထားပြီး ထုတ်ယူတဲ့သဘောပါပဲ။ “ ဟု ပြန်ကြားရေးကော်မတီဝင် ဦးငြိမ်းသစ်က မဇ္ဈိမသို့ပြောသည်။

နိုင်ငံရေးပင်စင်ဆိုသည်မှာ တာဝန်ထမ်းဆောင်သည့် ရာထူးအလိုက် လစာကို လုပ်သက်နှင့်မြှောက်ပြီး တစ်လုံးတည်းပေးအပ်သော ပင်စင်အမျိုးအစားဖြစ်သည်။

၂၀၂၀ ရွေးကောက်ပွဲအတွင်းက ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးနှင့် ပြည်နယ် လွှတ်တော်၊ တိုင်းရင်းသားလူမျိုးမဲဆန္ဒနယ် ကိုယ်စားလှယ်နေရာများအတွက် ရွေးကောက်ခံကိုယ်စားလှယ် ၁,၁၁၇ ဦး ရှိခဲ့သည်။ ၎င်းတို့အထဲတွင် အမျိုးသားဒီမိုကရေစီအဖွဲ့ချုပ်(NLD)မှ စုစုပေါင်းရွေးကောက်ခံကိုယ်စားလှယ် ၉၂၀ ဦးဖြင့် အပြတ်အသတ် အနိုင်ရရှိခဲ့ပြီး အစိုးရဖွဲ့နိုင်ခဲ့သည်။

သို့သော်လည်း မြန်မာနိုင်ငံတွင် စစ်တပ်ကအာဏာသိမ်းမှုကျူးလွန်ပြီးနောက်တွင် NLD မှ လွှတ်တော် ကိုယ်စားလှယ်အများအပြားသည် စစ်ကောင်စီ၏ ပစ်မှတ်ထားခံခဲ့ရပြီး ဖမ်းဆီးခံရမှုများ၊ နေအိမ်ချိပ်ပိတ် ခံရမှုများ၊ ပုဒ်မအမျိုးမျိုးဖြင့် အရေးယူခံရမှုများနှင့် စစ်ကြောရေးစခန်းများအတွင်း သတ်ဖြတ်ခံရမှုများ ကြုံတွေ့နေရသည်။

၂၀၂၂ ခုနှစ် မတ်လအတွင်းက အမျိုးသားဒီမိုကရေစီအဖွဲ့ချုပ်မှ ထုတ်ပြန်ခဲ့သည့်စာရင်းများအရ ပါတီဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ဒုတိယဥက္ကဋ္ဌများဖြစ်သည့် နိုင်ငံတော် သမ္မတ ဦးဝင်းမြင့်၊ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်အပါ အဝင် ပါတီဝင် ၆၄၅ဦးမှာ ဖမ်းဆီးထိန်းသိမ်းခံထားရဆဲဖြစ်ပြီး ၎င်းတို့အထဲတွင် လွှတ်တော်ကိုယ်စားလှယ် ၁၀၀ ကျော် ပါဝင်ကြောင်း သိရသည်။ ဖမ်းဆီးထိန်းသိမ်းခံထားရသူများအနက်မှ ၁၆ ဦးကျော်သည် စစ်ကြောရေးဒဏ်၊ ဆေးဝါးကုသမှု မလုံလောက်သည့် ပြဿနာများကြောင့် သေဆုံးခဲ့ရသည်ဟု ထုတ်ပြန်ထားသည်။

ဖမ်းဆီးခံရခြင်းမရှိသည့် လွှတ်တော်ကိုယ်စားလှယ်များအနက် အများအပြားသည် ပြည်သူလူထုနှင့်အတူ နွေဦးတော်လှန်ရေးတွင် ပါဝင်ဆောင် ရွက်နေကြပြီး စစ်ကောင်စီထံတွင် ခံဝန်ထိုးသူများသည် ၁၀၀ကျော်ခန့်သာရှိနိုင်ပြီး NLDမှ နိုင်ငံရေးပင်စင် ထုတ်ယူသည့်သူ ၂၀၀ကျော်ရှိနေသည့်အပေါ်တွင် ဦးငြိမ်းသစ်က ငြင်းဆိုသည်။

“၂၀၀ကျော်ထိကတော့မဖြစ်နိုင်ပါဘူး၊ ၁၀၀ဝန်းကျင်လောက်ဆိုရင် ဖြစ်ကောင်း ဖြစ်နိုင်ပါလိမ့်မယ်။ “ ဟု ၎င်းကဆိုသည်။

အာဏာသိမ်းပြီးနောက်တွင် လွှတ်တော်ကိုယ်စားလှယ်များနှင့် နိုင်ငံရေးတက်ကြွလှုပ်ရှားသူများသာမက ဆန္ဒပြပွဲများတွင်ပါဝင်သူများ၊ ဒီမိုကရေစီအရေးလှုပ်ရှားသူများ၏ လူမှုကွန်ရက်စာမျက်နှာများတွင် မှတ်ချက်ပေးသူများနှင့် နိုင်ငံရေးနှင့်ပတ်သက်သည်များ ရေးသားသူများကိုပင် စစ်ကောင်စီက အငြိုးထား ဖမ်းဆီးနှိပ်စက်လျက်ရှိနေသည်။

ထို့ကြောင့် ပြည်ပနိုင်ငံများအပါအဝင် နယ်စပ်ဒေသများသို့ ထွက်ပြေးတိမ်းရှောင်မှုများပြုလုပ်နေရပြီး လူဦးရေ သိန်းနှင့်ချီရှိနေကြောင်း ၎င်းတို့ကို ထောက်ပံ့ရေး အကူညီပေးနေသည့်အဖွဲ့များထံမှ သိရှိရသည်။ mizzima

ရှမ်းပြည်နယ်မြောက်ပိုင်း၊ နောင်ချိုမြို့၊ ဘူတာရပ်ကွက်၊ မန္တလေး-လားရှိုး ပြည်ထောင်စုလမ်းမကြီးဘေးမှာ ဖွင့်လှစ်ထားတဲ့ မိသားစုကုန်စုံဆိုင်ရှေ့မှာ ဩဂုတ် ၁၆ ရက် နေ့လယ်ပိုင်းက ပေါက်ကွဲမှုဖြစ်ခဲ့ပြီး ဆိုင်ဝန်ထမ်း ၄ ယောက် ထိခိုက်ဒဏ်ရာ ရရှိခဲ့တယ်လို့ ​ဒေသခံတွေက ပြောပါတယ်။

မြို့ခံတယောက်က “မိသားစုကုန်စုံဆိုင်ရှေ့မှာ ဗုံးပေါက်ကွဲမှုဖြစ်ပြီး ဆိုင်ဝန်ထမ်း ၄ ဦး ဗုံးစထိတယ်။ အရင်ကလည်း နောင်ချိုမှာ ဗုံးပေါက်ကွဲမှု တကြိမ်ရှိခဲ့တယ်” လို့ ပြောပါတယ်။

ဗုံးပေါက်ကွဲမှုကြောင်‌ေ ထိခိုက်ဒဏ်ရာရခဲ့တဲ့ ဆိုင်ဝန်ထမ်း ၄ ယောက်ဟာ အခုလက်ရှိ နောင်ချိုဆေးရုံမှာ ဆေးဝါးကုသနေတယ်လို့ ဆိုပါတယ်။

ဒီပေါက်ကွဲမှုနဲ့ပတ်သက်ပြီး ဘယ်အဖွဲ့အစည်းက ဆောင်ရွက်တယ်ဆိုတာကိုတော့ ထုတ်ပြန်တာ မရှိသေးပါဘူး။

ပြီးခဲ့တဲ့ရက်က စစ်ကောင်စီလက်အောက်ခံ နောင်ချိုမြို့နယ် အထွေထွေအုပ်ချုပ်ရေးရုံးက မြို့နယ်အတွင်းမှာရှိတဲ့ ပရဟိတ လူမှုရေးအသင်းတွေကို ခေါ်ကာ ပြည်သူ့ကာကွယ်ရေးတပ် (PDF) တွေနဲ့ အဆက်အသွယ်မလုပ်ဖို့ ခြိမ်းခြောက်ပြောဆိုတာတွေ ရှိခဲ့တယ်လို့ မြို့ခံတွေက ဆိုပါတယ်။

နောင်ချိုမြို့နယ်မှာ အာဏာသိမ်းစစ်ကောင်စီက အခု သြဂုတ်လအတွင်း ​CDM ဝန်ထမ်း၊ ပရဟိတအဖွဲ့ဝင်၊ မြို့မိမြို့ဖ၊ လုပ်ငန်းရှင်တချို့နဲ့ လူ ငယ်လူရွယ် စုစုပေါင်း အယောက် ၂ဝ နီးပါးကို PDF နဲ့ ဆက်သွယ်တယ် စွပ်စွဲပြီး အဓမ္မဖမ်းဆီးခဲ့တယ်လို့လည်း ဒေသခံတွေက ပြောပါတယ်။

မန္တလေးတိုင်းနဲ့ ရှမ်းပြည်နယ်မြောက်ပိုင်း နယ်စပ် နောင်ချိုမြို့မှာ ဒီမိုကရေစီလိုလားကြတဲ့ အဖိနှိပ်ခံပြည်သူတွေ ရှိသလို စစ်ကောင်စီရဲ့ အ ခြေစိုက်တပ်ရင်း ၅ ရင်းမကရှိကာ စစ်တပ်ထောက်ခံသူတွေနဲ့ စစ်မှုထမ်းဟောင်းတွေ များပြားလှတဲ့မြို့တမြို့ ဖြစ်ပါတယ်။DVB

စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်၊ ကင်းကျေးရွာကို စစ်ကောင်စီတပ် က ရဟတ်ယာဉ် ၄စီးဖြင့် ဩဂုတ်လ ၁၇ ရက်နေ့ မွန်းလွဲ ၁ နာရီတွင် ပစ် ခတ်တိုက်ခိုက်မှုများ ပြုလုပ်သဖြင့် ပြည်သူ ၁၀၀ ဦးဝန်းကျင် ပိတ်မိနေကြောင်း ဒေသခံများထံမှ သိရှိရသည်။

ကင်းကျေးရွာကို ရဟတ်ယာဉ်ပေါ်မှနေ၍ ပစ်ခတ်ပြီး အခြားရဟတ်ယာဉ်များက လည်း စစ်အင်အား ၁၀၀နီးပါးခန့်ချကာ ကင်းရွာမှ ပြည်သူများကို ပစ်ခတ် ပိတ်ဆို့ သတ်ဖြတ် ဖမ်းဆီးများလုပ်ဆောင်နေကြောင်း၊ တိုက်ပွဲ ဖြစ်ပွားခြင်းမရှိဘဲ စစ်တပ်က လာရောက်ပစ်ခတ်ခြင်းဖြစ်ကြောင်း သိရှိရသည်။

“ရုတ်တရက်ကြီး ထင်မှတ်မထားဘဲ အခုလို ပစ်ခတ် ဖမ်းဆီးတာ ခံလိုက်ရတ ယ်။ ဘာတွေဖြစ်လို့ ဖြစ်မယ်ဆိုတာကတော့ အတိကျမပြောနိုင်သေးဘူး ။ ပိတ်မိတာတော့အတော်များတယ်။ မြေပြင်မှာက ဘယ်တိုက်ပွဲမှ မဖြစ်ဘူး။သင်တော်ရွာဆိပ်ကမ်းမှာ သူတို့မော်တော် အောက်ကိုစုန်ဆင်းဖို့ရာ‌ရှိတယ်။ အဲဒါကို လုံခြုံရေးယူပေးရင်း အခုလိုမထင်မှတ်ဘဲ ဝင်စီးတာ။ သူတို့ ဖမ်းတာက PDF မမိဘူး။ ပြည်သူတွေကို ဖမ်းနေတာ။ ပိုဆိုးတာက ကျွန်တော်တို့ရွာမှာ အသုဘချနေတဲ့အချိန် ဖမ်းတာဆိုတော့ ပိုဆိုးတာပေါ့” ဟု ဒေသခံတစ်ဦးက ပြောသည်။

ကင်းရွာသည် ကနီမြို့နယ် ချင်းတွင်မြစ်ကမ်းဘေးရှိ ကျေးရွာတစ်ခုဖြစ်ပြီး ဇူ လိုင်လအတွင်း စစ်ကောင်စီ၏ မီးရှို့ဖျက်ဆီးမှု ခံခဲ့ရသော ကျေး ရွာဖြစ်သည်။ khit thit

အမေရိကန်ဒေါ်လာ အပါအဝင် နိုင်ငံခြားငွေကြေးများ ဈေးမြင့်တက်ကာ ကျပ်ငွေတန်ဖိုး ဆက်တိုက် ကျဆင်းလာသဖြင့် လက်နက်ခဲယမ်းဈေး နှစ်ဆတက်သွားသဖြင့် အာဏာသိမ်းစစ်ကောင်စီကို လက်နက်ကိုင် ခုခံတော်လှန်သူများ အခက်တွေ့နေသည်။

နိုင်ငံအနှံ့ရှိ ဒေသခံ ပြည်သူ့ကာကွယ်ရေးတပ်ဖွဲ့ (PDF) များအနေဖြင့် နီးစပ်ဒေသများမှတစ်ဆင့် လက်နက်ခဲယမ်း ဝယ်ယူစုဆောင်းနေရခြင်းဖြစ်ကာ လတ်တလောတွင် လက်နက်သာမက ကျည်ဆန်ဈေးပါ တက်နေကြောင်း ကရင်ပြည်နယ်တွင် လှုပ်ရှားနေသည့် တော်လှန်ရေးအဖွဲ့တစ်ခုထံမှ သိရသည်။

ကျပ်ငွေတန်ဖိုး ကျဆင်းနေသဖြင့် AK အမျိုးအစား ရိုင်ဖယ်ကျည်ဆန် တစ်တစ်တောင့်လျှင် ကျပ် ၅၀၀၀ ဝန်းကျင်မှ ၉၀၀၀ နီးပါးအထိ ပေးဝယ်နေရကြောင်း ကရင်နယ်ပြည်အတွင်း လှုပ်ရှားနေသည့် PDF လက်အောက်ခံ နဂါးဖြူစစ်ကြောင်းမှ တာဝန်ခံတစ်ဦးဖြစ်သူ ကိုသိန်းငှက်ဆိုသူက ပြောသည်။

တိုက်ပွဲတွင် ကျည်ချွေတာရန် တာဝန်ရှိသူက တင်းကျပ်ထားသည်ဟုလည်း ဆိုသည်။

“(ကျည်) သုံးတောင့်မှာ တစ်ချက် ထိကိုထိရမယ်ဆိုပြီး ကျွန်တော်တို့ စစ်ကြောင်းမှူးက သေသေချာချာ မှာကြားထားတယ်။ ပြည်သူတွေရဲ့ငွေနဲ့ ပစ်ရတာဖြစ်တဲ့အတွက် မလိုအပ်ရင် လုံးဝမပစ်ဖို့၊ သုံးချက်ဆိုရင် တစ်ချက် ထိကိုထိရမယ်” 

ယခုလ ၁၅ ရက်က ကရင်ပြည်နယ် ကော့ကရိတ်မြို့ရှိ ရဲစခန်း၊ ထွေအုပ်ရုံးနှင့် ဘဏ်တို့ကို တော်လှန်ရေးအဖွဲ့များ ပူးပေါင်းတိုက်ခိုက်စဉ် နဂါးဖြူစစ်ကြောင်းလည်း ပါဝင်ခဲ့သည်။ အဆိုပါတိုက်ပွဲတွင် စစ်ကောင်စီဘက်မှ ရဲမှူးအပါအဝင် ၇ ဦးသေဆုံးခဲ့သည်။ 

အမေရိကန်ဒေါ်လာငွေ လဲလှယ်နှုန်းကို စစ်ကောင်စီက ကျပ် ၁၈၅၀ မှ ၂၁၀၀ အထိ ယခုလအတွင်း ပြင်ဆင်သတ်မှတ်ခဲ့ရာ မူလကတည်းက တရိပ်ရိပ်တက်နေသော ဒေါ်လာဈေးမှာ ကျပ် ၃၀၀၀ ဝန်းကျင်အထိ ထိုးတက်သွားသည်။ 

ငွေဈေး မတည်ငြိမ်သဖြင့် လက်နက်အရောင်းအဝယ် အားလုံးနီးပါး ရပ်နားထားရသည်ဟု ကယားပြည်နယ်မှ တော်လှန်ရေးအဖွဲ့ဝင်တစ်ဦးထံမှ သိရသည်။

ထိုင်းနယ်စပ်ဖြစ်သော ကယားနှင့် ကရင်ပြည်နယ်၌သာမက အိန္ဒိယနယ်စပ် ချင်းပြည်နယ်ရှိ လက်နက်ကိုင်အဖွဲ့များလည်း လက်နက်ခဲယမ်းဝယ်ယူရေး အခက်အခဲကြုံတွေ့နေရသည်။

AK 47 အမျိုးအစား သေနတ်တစ်လက်လျှင် ကျပ်သိန်း ၉၀ မှ ၁၈၀ အထိ ထိုးတက်သွားသည်ဟု ပြည်နယ်တောင်ပိုင်းတွင် လှုပ်ရှားနေသည့် ချင်းဒေသကာကွယ်ရေးအဖွဲ့ (CDF) တာဝန်ရှိသူတစ်ဦးက ပြောသည်။

“တော်တော်အခက်အခဲဖြစ်နေတယ်။ လက်နက်ဝယ်ယူမှုအပိုင်းတွေ ရပ်ဆိုင်းထားရတယ်” ဟု ချင်းပြည်နယ်တောင်ပိုင်း မတူပီမြို့နယ်မှ CDF ပြောရေးဆိုခွင့်ရှိသူက ပြောသည်။

တော်လှန်ရေးအဖွဲ့များ လက်နက်လိုအပ်ချက် ကြီးမားနေချိန်တွင် စစ်ကောင်စီလက်အောက်ခံစစ်သားများ လက်နက်နှင့်အတူ အာဏာဖီဆန်ကာ ပူးပေါင်းလာမည်ဆိုပါက ဆုကြေးငွေ ထိုက်ထိုက်တန်တန် ချီးမြှင့်မည်ဟု အမျိုးသားညီညွတ်ရေးအစိုးရ (NUG) က ယခုလအတွင်း ထုတ်ပြန်ထားသည်။​

ကျပ်တန်ဖိုးကျသဖြင့် M16 အမျိုးအစား ရိုင်ဖယ်တစ်လက်ဈေးနှုန်းမှာ ကျပ်သိန်း ၅၀ ခန့်မှ သိန်း ၁၂၀ အထိရှိလာကြောင်း၊ နိုင်ငံအလယ်ပိုင်း မကွေးတိုင်းအတွင်း လှုပ်ရှားနေသည့် တော်လှန်ရေးအဖွဲ့အချို့က ဆိုသည်။

“သေနတ် ၅ လက် ဝယ်မယ်ဆိုပြီး ရလာတဲ့ငွေက နှစ်လက်သုံးလက်လောက်ပဲ ရတော့တာမျိုးပါ။ ဈေးတက်လာတာက လက်နက်ခဲယမ်း ရရှိမှုအတွက် အများကြီးထိခိုက်ပါတယ်” ဟု PRA-Magway ဆိုသော PDF အဖွဲ့၏ စစ်ရေးတာဝန်ခံက ပြောသည်။ 

တော်လှန်ရေးအဖွဲ့များအနေဖြင့် လက်နက်ဈေးနှုန်းကြီးမြင့်ခြင်း၊ ရန်ပုံငွေမလုံလောက်ခြင်းတို့ကြောင့် ရသည့်ကုန်ကြမ်းဖြင့် လက်လုပ်သေ နတ်များကို အားထားနေရသည်ဟု ဆိုသည်။

မကွေးတိုင်း ပွင့်ဖြူမြို့နယ်မှ PDF တာဝန်ခံကလည်း “အခက်အခဲတွေရှိလည်း ကျွန်တော်တို့ကတော့ မောင်းပြန်လောက်ထိ မရောက်ရင် တောင် တစ်တောင့်ထိုးကျည်တို့၊ ဆွဲမိုင်းတို့ ရရာလက်လုပ် လက်နက်တွေနဲ့ နိုင်သလောက် ဆက်လုပ်သွားမယ်” ဟု ပြောသည်။

ချင်းပြည်နယ်တွင်လည်း တူမီးသေနတ်ကို အဆင့်မြှင့်ထားသည့် လက်လုပ်သေနတ်များ၊ လက်လုပ် ၆၀ မမ စိန်ပြောင်းများ၊ ရှော့တိုက်ဒုံးများ တီထွင်အသုံးနေရကြောင်း မင်းတပ် CDF ပြောရေးဆိုခွင့်ရှိသူက ပြောသည်။

“လုံးဝချွေတာရမယ်ဆိုတဲ့ နည်းအတိုင်း သွားနေကြရတာ။ အခွင့်မသာရင် မပစ်ဖို့ အဲ့လိုလျှော့ချထားရတာ ရှိတယ်။ စုဆောင်းထားတဲ့ လက် နက်ခဲယမ်းတွေကို ပေါ့ပေါ့ဆဆမသုံးဖို့ အဲ့လို ထိန်းချုပ်ထားရတယ်” myanmar now

ရန်ကုန်တိုင်း၊ ရွှေပြည်သာစက်မူဇုန်ရှိ PMG စက်ရုံ၊ ပုလင်းခွံသန့်စင်ဌာနက အလုပ်သမားတွေဟာ ရက်မှန်ကြေး ပြန်လည်ရရှိရေး သပိတ် မှောက်လှုပ်ရှားတာကို ဒီနေ့ရပ်ပြီး လုပ်ငန်းခွင် ပြန်လည်ဝင်ရောက်နေကြပါတယ်။

သပိတ်မှောက်လုပ်သားတွေကို ရန်ကုန်တိုင်းဒေသကြီးအလုပ်သမားရုံး တာဝန်ရှိသူတွေ မနေ့က တွေ့ဆုံညှိနှိုင်းမှုပြုလုပ်ပြီး ဒီနေ့အလုပ်ပြန်ဝင်ဖို့ သဘောတူညီခဲ့တာလို့ အလုပ်သမားအရေး ကူညီပေးနေတဲ့ သွေးစည်းညီညွတ်သောသမဂ္ဂများအဖွဲ့ချုပ် (STUM) မှ ကိုဇင်ဝေအောင်က ပြောပါတယ်။

အဲဒီတွေ့ဆုံညှိနိူင်းမှုမှာ အလုပ်သမားတွေက မူလတောင်းဆိုချက်ဖြစ်တဲ့ လုပ်ခလစာရဲ့ ၁၀ ရာခိုင်နှုန်းကို ရက်မှန်ကြေးပေးဖို့ဆိုတဲ့အစား ၂ ရာခိုင်နှုန်း လျှော့ပေးခဲ့ပြီး ၈ ရာခိုင်နှုန်းပေးဖို့ တင်ပြခဲ့ကြောင်း၊ အဲဒီလိုမှမဟုတ်ရင် သပိတ်မှောက်အလုပ်သမားတွေကို ဥပဒေပါ နစ်နာကြေးပေးပြီး အလုပ်ထုတ်ဖို့ ညှိနှိုင်းခဲ့တယ်လို့ ဆိုပါတယ်။

“ဘယ်နည်းလမ်းကို ရွေးမယ်ဆိုတာ စက်ရုံဘက်က မနက်ဖြန် (သြဂုတ် ၁၈) မှာ အဖြေပေးမယ် ပြောတယ်။ အဲဒီအဖြေကိုစောင့်ရင်း ဒီနေ့ အလုပ်ပြန်လုပ်ကြဖို့ သဘောတူပြီး ဒီနေ့ လုပ်ငန်းခွင် ပြန်ဝင်တာဗျ” လို့ ကိုဇင်ဝေအောင်က ပြောပါတယ်။

အဲဒီစက်ရုံမှာ အလုပ်သမား ၇၀ ကျော်ရှိပြီး နောက်ဆုံးအချိန်အထိ အလုပ်သမား ၃၇ ဦးက သပိတ်မှောက် တောင်းဆိုခဲ့ကြတာ ဖြစ်ပါတယ်။

အဲဒီအလုပ်သမားတွေဟာ သြဂုတ် ၈  ရက်ကစပြီး လုပ်ငန်းခွင်ထဲ အလုပ်မလုပ်ဘဲ ညသပိတ်မှောက်တဲ့ လှုပ်ရှားမှု စတင်ခဲ့တာပါ။

သပိတ်လှုပ်ရှားမူ ၆ ရက်မြောက်နေ့မှာ နောက်သပိတ်အရှိန်မြှင့်ဖို့ စီစဥ်နေစဥ် အလုပ်သမားရုံးနဲ့ စက်ရုံဘက်က ညှိနိူင်းမှုတွေ လုပ်လာခဲ့တာလို့ သိရပါတယ်။

PMG (Peace Myanmar Group) လုပ်ငန်းစုဟာ မြန်မာနိုင်ငံမှာ ၁၉၉၃ ခုနှစ်ကတည်းက စတင်လည်ပတ်ခဲ့တာဖြစ်ပြီး အဖျော်ယမကာနဲ့ ရေသန့်လုပ်ငန်းအပြင် ဖြန့်ချိရေးလုပ်ငန်းတွေမှာ အထင်ကရ နာမည်ရရှိထားတဲ့ ကုမ္ပဏီလုပ်ငန်းစုတခု ဖြစ်ပါတယ်။ DVB

မြန်မာနိုင်ငံဆိုင်ရာ ကုလသမဂ္ဂ အထူးသံတမန်သစ်သည် စစ်ကောင်စီ ထိပ်တန်းတာဝန်ရှိသူများနှင့် ဗုဒ္ဓဟူးနေ့တွင် စတင်တွေ့ဆုံပြီ ဖြစ်သော် လည်း ဖြုတ်ချခံ ခေါင်းဆောင် ဒေါ်အောင်ဆန်းစုကြည်နှင့် တွေ့ဆုံမည်လားဆိုသည့် မေးခွန်းကို တုံ့ပြန်ခြင်း မရှိပေ။ 

ပဋိပက္ခ ဖြစ်ပွားနေရာ မြန်မာနိုင်ငံသို့ အင်္ဂါနေ့တွင် စတင်သည့် နိုလင်း ဟေဇာ၏ ခရီးစဉ်သည် “ယိုယွင်းဆိုးဝါးနေသော အခြေအနေများနှင့် လက်ငင်းစိုးရိမ်ပူပန်မှုများအပြင် ၎င်း၏ လုပ်ပိုင်ခွင့်အာဏာရ အခြားသော ဦးစားပေး နယ်ပယ်များကို ပစ်မှတ်ထားသွားမည်”ဟု ကုလသမဂ္ဂက ပြောထားသည်။ 

ရဲနှင့် အရပ်ဝတ် လုံခြုံရေးတာဝန်ရှိသူများ ခြံရံထားသည့် နိုလင်း ဟေဇာသည် ဟိုတယ်မှ ထွက်ကာ မော်တော်ယာဉ်တန်းဆီ သွားရောက်ချိန်၌ ဗုဒ္ဓဟူးနေ့တွင် ဒေါ်အောင်ဆန်းစုကြည်နှင့် တွေ့ဆုံဖြစ်မည်လားဆိုသည့် အေအက်ဖ်ပီ၏ မေးမြန်းမှုကို တုံ့ပြန်ခြင်း မရှိခဲ့ပေ။ 

အသက် ၇၇ နှစ်ရှိပြီဖြစ်သည့် ဒေါ်အောင်ဆန်းစုကြည်သည် စစ်တပ်၏ အာဏာသိမ်းကတည်းက ဖမ်းဆီးခံထားရခြင်းဖြစ်ကာ တနင်္လာနေ့တွင် သီးသန့်စစ်ကောင်စီ တရားရုံး၌ ၎င်းအား နောက်ထပ် ထောင်ဒဏ် ချမှတ်ခဲ့ခြင်းကြောင့် ၎င်းအနေဖြင့် စုစုပေါင်း ထောင်ဒဏ် ၁၇ နှစ် ချမှတ်ခံထားရသည်။ 

နိုလင်း ဟေဇာသည် ဗုဒ္ဓဟူးနေ့ နှောင်းပိုင်းတွင် စစ်ကောင်စီခန့် နိုင်ငံခြားရေးဝန်ကြီးနှင့် စစ်ကောင်စီ ခေါင်းဆောင် မင်းအောင်လှိုင်တို့နှင့် တွေ့ ဆုံမည်ဖြစ်ကြောင်း သတင်းစာရှင်းလင်းပွဲ၌ ပြောခွင့်ရသူ ဇော်မင်းထွန်းက ပြောသည်။ 

“တွေ့ဆုံမှုကနေ ရလဒ်ကောင်းတွေ ပေါ်ထွက်လာဖို့ ကျွန်တော်တို့ မျှော်လင့်တယ်”ဟု ၎င်းက ပြောသည်။ 

မြန်မာနိုင်ငံသည် ၂၀၂၁ ဖေဖော်ဝါရီလ၌ စစ်တပ်က အာဏာသိမ်းလိုက်ပြီးနောက် ဝရုန်းသုန်းကား အခြေအနေဆိုက်နေပြီး ပြင်းထန်သည့် ခုခံမှုများနှင့် ပြည်တွင်းတော်လှန်စစ်များ ဖြစ်ပွားပေါ်ပေါက်သည်။ 

စစ်တပ်၏ သဘောထားကွဲသူများအပေါ် ဖြိုခွင်းမှုများ၌ လူပေါင်း ၂,၂၀၀ ကျော် အသတ်ခံရပြီး ၁၅,၀၀၀ ကျော် ဖမ်းဆီးခံရကြောင်း ပြည်တွင်းစောင့်ကြည့်ရေးအဖွဲ့တစ်ရပ်အရ သိရသည်။ 

ပဋိပက္ခ ဖြေရှင်းရေးအတွက် ကုလသမဂ္ဂနှင့် အာဆီယံတို့၏ သံတမန်ရေး ကြိုးပမ်းမှုများမှာလည်း အတိုက်အခံများနှင့် ညှိနှိုင်းဆွေးနွေးရန် စစ် ဗိုလ်ချုပ်များ၏ ငြင်းဆန်နေမှုကြောင့် အနည်းငယ်သာ တိုးတက်မှု ရှိသည်။ 

ပြီးခဲ့သည့်လက နိုင်ငံရေးတက်ကြွလှုပ်ရှားသူ လေးဦးအား အကြမ်းဖက်မှု တိုက်ဖျက်ရေး ဥပဒေဖြင့် သေဒဏ်စီရင်လိုက်ခြင်းကြောင့် စစ်ကောင် စီအား နိုင်ငံတကာ ပြစ်တင်ဝေဖန်မှုများ ထပ်မံ ဖြစ်ပွားပေါ်ပေါက်လာခဲ့သည်။  mizzima

စစ်ကိုင်းတိုင်းအတွင်း တနေရာမှာ အကြမ်းဖက်စစ်ကောင်စီတပ်နဲ့ ထိတွေ့တိုက်ပွဲဖြစ်ပွားခဲ့ပြီး စစ်ကိုင်းခရိုင် တပ်ရင်း ၃​ ရဲ့ တပ်ခွဲမှူးအပါအဝင် PDF ရဲဘော် ၂ ယောက် ကျဆုံးခဲ့တယ်လို့ ထုတ်ပြန်ပါတယ်။

ပြီးခဲ့တဲ့ ဩဂုတ် ၁၅ ရက်က စစ်ကိုင်းတိုင်းအတွင်း တနေရာမှာ တိုက်ပွဲဖြစ်ပွားခဲ့တာဖြစ်ပြီး စစ်ကိုင်းခရိုင်တပ်ရင်း ၃ မှာ တပ်ခွဲမှူးတာဝန် ထမ်းဆောင်နေတဲ့ စစ်ကိုင်းသမဝါယမတက္ကသိုလ်ကျောင်းသား ရဲဘော်မင်းဒင်နဲ့ ရဲဘော်မြတ်မင်းတို့ ကျဆုံးသွားခဲ့တာဖြစ်ပြီး အကြမ်းဖက်စစ်ကောင် စီဘက်က အထိအခိုက် အကျအဆုံး စာရင်းကိုတော့ စုံစမ်းဆဲဖြစ်တယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူ ထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ် ဆင်နွှဲနေကြပြီး နိုင်ငံတဝန်းမှာတော့ ဒေသခံ ပြည်သူ့ကာ ကွယ်ရေးတပ်တွေ၊ တိုင်းရင်းသား လက်နက်ကိုင် တပ်တွေနဲ့ အကြမ်းဖက်စစ်ကောင်စီတပ်တွေကြား တိုက်ပွဲတွေလည်း တိုင်းဒေသကြီးနဲ့ ပြည် နယ်တွေ အနှံ့အပြား ဖြစ်ပွားနေပါတယ်။

NUG အစိုးရ ကာကွယ်ရေးဝန်ကြီးဌာနက နောက်ဆုံးထုတ်ပြန်ချက်မှာတော့ ပြည်သူ့ခုခံတွန်းလှန်စစ် ၁ နှစ်တာ ကာလအတွင်း အကြမ်းဖက်စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော်ထိ ရှိခဲ့တယ်လို့ ဆိုပါတယ်။

ဒါ့အပြင် တနိုင်ငံလုံးအတိုင်းအတာနဲ့ PDF နဲ့ ညီနောင်မဟာမိတ်တပ်ရင်း ၂၅၇ ရင်းရှိပြီး ဒီထဲက တပ်ရင်း ၁၀၁ ရင်းကို ဝန်ကြီးဌာနက စိစစ်အတည်ပြုပြီး ကျန်တဲ့ တပ်ရင်းတွေကိုလည်း ဆက်လက်စစ်ဆေး အတည်ပြုနေတယ်လို့ NUG ကာကွယ်ရေးဝန်ကြီးက အမျိုးသားညီညွတ် ရေးအစိုးရဖွဲ့စည်းတာ တနှစ်ပြည့် အစီရင်ခံစာမှာ ပြောထားပါတယ်။

မြို့နယ်တွေကို အခြေခံဖွဲ့စည်းတဲ့ ပြည်သူ့ကာကွယ်ရေးအဖွဲ့တွေဟာလည်း မြို့နယ်ပေါင်း ၂၅၀ ကျော်မှာ စနစ်တကျဖွဲ့စည်းပြီးဖြစ်ကာ မြို့ပြပြောက်ကျား၊ ကျေးလက်ပြောက်ကျား အဖွဲ့ပေါင်း ၄၀၀ ကျော်ကို ဝန်ကြီးဌာနက စာရင်းပြုစုရရှိထားပြီး ဒီထဲက ၆၀ ရာခိုင်နှုန်းကျော်ဟာ ကာကွယ်ရေးဝန်ကြီးဌာနနဲ့ ချိတ်ဆက်ဆောင်ရွက်နေတယ်လို့ ဆိုပါတယ်။

လတ်တလောမှာတော့ စစ်ကောင်စီရဲ့ အဆိုးဆုံး အကြမ်းဖက်တာ ခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်း လမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။ DVB

အာဏာသိမ်းပြီးနောက် မကြာခဏ ပေါက်ကွဲမှု၊ တိုက်ခိုက်မှုများဖြစ်ပေါ်နေသည့် ရန်ကုန်မြို့မှ စစ်တပ်ပိုင် ကျောက်စိမ်းများကို နေပြည်တော်သို့ ရွှေ့ပြောင်းထားရှိရန် ဗိုလ်ချုပ်မှူးကြီးမင်းအောင်လှိုင်၏ တိုက်ရိုက် ညွှန်ကြားမှုအောက်ရှိ ဦးပိုင်ကုမ္ပဏီက စီစဉ်ခဲ့သည်။

စစ်တပ်ပိုင် ကျောက်စိမ်းများကို ရန်ကုန်၊ မရမ်းကုန်းမြို့နယ် ၇ မိုင်မှ နေပြည်တော်သို့ ပြောင်းရွှေ့ထားရန် ယခုနှစ်ဆန်းပိုင်းက မြန်မာ့စီးပွားရေးဦးပိုင်ကုမ္ပဏီ၏ အစည်းအဝေးတစ်ခုတွင် ညွှန်ကြားခဲ့ခြင်း ဖြစ်သည်။ 

အဆိုပါကျောက်စိမ်းများကို ဦးပိုင်လက်အောက်ခံ စစ်တပ်ပိုင်ကုမ္ပဏီတစ်ခုဖြစ်သည့် မြန်မာအင်ပီးရီးရယ် ဂျိတ်ကျောက်မျက်ကုမ္ပဏီက တာ ဝန်ယူရောင်းချနေခြင်းဖြစ်သည်။

ရန်ကုန်ရှိ စစ်တပ်ပိုင် ကျောက်စိမ်းများအပြင် နိုင်ငံအထက်ပိုင်းမှ ကျောက်စိမ်းများ သယ်ဆောင်ရာတွင်လည်း လုပ်ခြုံရေးတပ်ဖွဲ့၏ ခွင့်ပြု ချက်ဖြင့်သာ လုပ်ဆောင်ရန်လည်း ဦးပိုင်ကုမ္ပဏီအစည်းအဝေးတွင် ထည့်သွင်းဆွေးနွေးသည်ကို တွေ့ရသည်။

လုံခြုံရေး အထူးတင်းကျပ်ထားသည့် နေပြည်တော်တွင် တော်လှန်ရေးအင်အားစုများ ထိုးဖောက်ရန် ခက်ခဲသဖြင့် ကျောက်မျက်ရတနာများကို ရွှေပြောင်းထားခိုင်းခြင်းဖြစ်နိုင်ကြောင်း ကျောက်မျက်လုပ်ငန်းရှင်တစ်ဦးက ပြောသည်။

“စိတ်ချရတဲ့နေရာတစ်ခုကို ရွှေ့မှာပဲလေ။ နေပြည်တော်က ပွင့်ပွင့်လင်းလင်းပြောရရင် ပိုလုံခြုံတယ်လို့ ယူဆတာပဲ” ဟု ၎င်းက ဆိုသည်။

ကျောက်များရွှေ့ပြောင်းသယ်ဆောင်လာသည်ကို သတိမပြုမိသော်လည်း အာဏာသိမ်းပြီးနောက် နေပြည်တော်တွင် ပြုလုပ်သည့် ကျောက်မျက်ပြပွဲတိုင်းတွင် ဦးပိုင်နှင့် အကျိုးတူကုမ္ပဏီများ၏ ကျောက်များသာ အများဆုံးဖြစ်ကြောင်းလည်း အဆိုပါ ကျောက်မျက်လုပ်ငန်းရှင်က ဆိုသည်။

ထို့ပြင် ဦးပိုင်ကုမ္ပဏီသည် ကျောက်မျက်ထုတ်လုပ်ခွင့် လိုင်စင်အများဆုံးရရှိထားပြီး နှစ်ပေါင်းသုံးဆယ် ရောင်းမကုန်နိုင်သည့် ကျောက်များသိုလှောင်ထားကြောင်း ဦးပိုင်လက်အောက်ခံ ကျောက်မျက်ကုမ္ပဏီ ဒါရိုက်တာအချို့ ပြောလေ့ရှိကြောင်းလည်း ၎င်းက ပြောသည်။

ကျောက်မျက်ရတနာ တူးဖော်ထုတ်လုပ်ခြင်းကို စစ်တပ်က အဓိကထိန်းချုပ်ထားပြီး အာဏာသိမ်းပြီးနောက် ကျောက်စိမ်းလုပ်ငန်းတွင် အ ကျင့်ပျက်ခြစားမှု ပိုများလာကြောင်း၊ မင်းအောင်လှိုင်မိသားစုနှင့် စစ်တပ်က ဘဏ္ဍာတိုက်ကြီးသဖွယ်ဖြစ်လာကြောင်း သယံဇာတအရေး လှုပ်ရှားသည့် ဗြိတိန်အခြေစိုက် Global Witness အဖွဲ့က ထုတ်ပြန်ထားသည်။

“ကျောက်စိမ်းကဏ္ဍမှာ သူ့မိသားစုပါဝင်ပတ်သက်နေမှုတွေက တချို့သူတွေအတွက် အံ့ဩစရာဖြစ်ချင်ဖြစ်နေပေမဲ့ အခွင့်ထူးခံ စစ်ဗိုလ်ချုပ်တွေရဲ့ အာဏာနဲ့ လွှမ်းမိုးမှုအတွက် ဒီလိုအကျိုးအမြတ်များလှတဲ့ လုပ်ငန်းက အထောက်အကူဖြစ်ခဲ့ပါတယ်” ဟု Global Witness အဖွဲ့၏ မြန်မာနိုင်ငံဆိုင်ရာမူဝါဒအကြံပေး ကီးလ်ဒိုင်ရက်ဇ်က ပြောဆိုသည်။

အာဏာသိမ်းခေါင်းဆောင်သည် စစ်တပ်ပိုင် လုပ်ငန်းကြီးနှစ်ခုဖြစ်သည့် ဦးပိုင်နှင့် မြန်မာ့စီးပွားရေးကော်ပိုရေးရှင်းတို့အပေါ် အကြွင်းမဲ့ အာ ဏာရရှိထားသလို ရှယ်ယာအများဆုံး ပိုင်ဆိုင်သူဖြစ်ကြောင်း စစ်တပ်၏ အကျိုးစီးပွားနှင့် လူ့အခွင့်အရေးချိုးဖောက်မှုများကို ဖော်ထုတ်နေသည့် Justice For Myanmar အဖွဲ့၏ အစီရင်ခံစာတစ်ခုတွင် ဖော်ပြဖူးသည်။ myanmar now

ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံ သာစည်နယ်စပ်ရှိ သာစည်မြို့နယ် ငှက်ပျောတောကျေးရွာနေ ရွာသား ၁၀ ဦးမှာ စစ်ကောင်စီတပ်၏ မတရားဖမ်းဆီးခံရပြီး ပျူစောထီးခေါင်းဆောင်တောင်းသော ငွေများကို မိသားစုဝင်များဘက်က ခက်ခက်ခဲခဲပေးခဲ့သော်လည်း ၎င်းရွာသားတို့ ထောင်ဒဏ် ခြောက်နှစ်စီ ကျခံလိုက်ရကြောင်း သိရသည်။

အဆိုပါ ရွာသားများမှာ ပြီးခဲ့သည့် မေလပိုင်းက စစ်ကောင်စီတပ်မှ မတရား ဖမ်းဆီးသွားခဲ့ခြင်းဖြစ်ပြီး မြင်းကျဒိုးကျေးရွာမှ ပျူစောထီးခေါင်းဆောင်ဖြစ်သူ ဦးဝင်းမြင့် က တစ်ဦးလျှင် ငါးသိန်းကျပ်ပေးပါက ပြန်လွှတ်ပေးရန် ဆောင်ရွက်ပေးမည်ဟု ပြောဆိုညှိနှိုင်းသဖြင့် မိသားစုဝင်များက ၁၀ဦးစာ သိန်း ၅၀ ပေးခဲ့ရကြောင်း ရွာခံများထံက သိရသည်။

သို့သော် ၎င်းရွာသား ၁၀ဦးမှာ ပြန်လည်လွတ်မြောက်လာခြင်းမရှိသည့်အပြင် ယခု သြဂုတ်လအတွင်းတွင် ထောင်ဒဏ် ခြောက်နှစ်စီ ချမှတ်ခံလိုက်ရကာ ယခုလက်ရှိတွင် တောင်ကြီးခရိုင်ရှိ တောင်လေးလုံးအကျဉ်းထောင်တွင် အကျဉ်းကျခံနေရကြောင်း စုံစမ်းသိရှိရသည်။

မတရားဖမ်းဆီးခံ ရွာသားများမှာ ငှက်ပျောတောရွာအနီး စစ်ကောင်စီနှင့်ပျူစောထီးပူးပေါင်းတပ်များ စစ်ကြောင်းထိုးစဉ် ရွာထဲသို့ ဝင်ရောက်ဖမ်းဆီးခြင်းခံရသော သာမန်အရပ်သားပြည်သူများဖြစ်ကာ ဖမ်းဆီးခံရစဉ်က ၁၃ ဦးဖမ်းခံခဲ့ရကြောင်း၊ အသက်မပြည့်သူ သုံးဦးမှာ ပြန်လည်လွတ်မြောက်လာကြောင်း ရွာခံများထံက သိရသည်။

”ပဲရင်းတောင်ရွာက အသက်မပြည့်တဲ့ သုံးယောက်က ပြန်လွတ်လာပါတယ်၊ ၁၈ နှစ်မပြည့်ကြသေးပါဘူး၊ ပြန်လွတ်လာတဲ့သူတွေထဲက နှစ်ယောက်က သိန်း၅၀ကျော်စီကုန်တယ်၊ ကျန်တဲ့ တစ်ယောက်ကတော့ သူတို့ဘက်က မပြောဖို့ပိတ်ထားလို့ မသိရဘူး ။ အကျဉ်းကျခံရတဲ့ သူတွေကတော့ အရွယ်ကောင်းတွေပါ၊ တော်လှန်ရေး မလုပ်ကြဘူး၊ ရွာမှာရိုးရိုးနေကြတဲ့သူတွေပါ၊ သူတို့ကို လွတ်အောင်ညှိပေးမယ်လို့ပြောတဲ့ ပျူခေါင်းဆောင် ဦးဝင်းမြင့်ဆီ ငါးသိန်းစီပေးရတယ်လို့ ပြောကြပေမယ့် တကယ်တော့ ၁၃သိန်းစီပေးထားရတာ။”ဟု ဖမ်းဆီးခံရသူများနှင့် နီးစပ်သူတစ်ဦးက မဇ္ဈိမကို ပြောသည်။

ပြီးခဲ့သည့် ဇွန်လ ၁၂ ရက်က ပျူစောထီးခေါင်းဆောင် ဝင်းမြင့်နှင့် တပည့်နှစ်ယောက် စီးလာသောကားအား ရွာငံမြို့နယ်ရှိ မိန်းမရဲတောင်အနီး လမ်းမကြီးပေါ်တွင် ပစ်ခတ်ခံရကာ ဝင်းမြင့်၏ လက်ရုံးတပည့်နှစ်ဦးမှာ နေရာတွင်ပင် ပွဲချင်းပြီး သေဆုံးသွားကြောင်း ဒေသခံများထံက သိရသည်။ mizzima