အစိုးရပိုင်ကုမ္ပဏီဝန်ထမ်းတချို့ ပြန်ထွက်ဖို့ တရုတ်အစိုးရသတိပေး
မြန်မာနိုင်ငံမှာ ရောက်နေတဲ့ တရုတ်အစိုးရပိုင်ကုမ္ပဏီတွေရဲ့ ဝန်ထမ်းတွေထဲက မရှိမဖြစ်လိုအပ်တာမဟုတ်တဲ့ ဝန်ထမ်းတွေ ပြန်ထွက်ခွာကြဖို့ တရုတ်အစိုးရက ပြောထားတယ်လို့ အဲဒီကုမ္ပဏီတွေအတွင်းက သတင်းရင်းမြစ်တွေကို ကိုးကားပြီး South China Morning Post သတင်းစာမှာ ရေးထားတဲ့အကြောင်း ရိုက်တာသတင်းတစ်ပုဒ်မှာ ဖော်ပြထားပါတယ်။
ရန်ကုန်၊ လှိုင်သာယာမြို့နယ်မှာ ပြီးခဲ့တဲ့ရက်ပိုင်းက တရုတ်ပိုင်စက်ရုံတွေ မီးရှို့ခံရပြီး တရုတ်ဝန်ထမ်းတချို့ ထိခိုက်ဒဏ်ရာရခဲ့ပြီးတဲ့နောက် အခုသတင်းထွက်လာတာပါ။
ဂျပန်အခြေစိုက် Fast Retailing ကုမ္ပဏီကလည်း သူတို့ပစ္စည်းတွေ ထုတ်ပေးနေတဲ့ မြန်မာနိုင်ငံက စက်ရုံနှစ်ခု မီးလောင်ခဲ့တယ်လို့ ဒီကနေ့ပြောပါတယ်။
Uniqlo အမှတ်တံဆိပ် အဝတ်အထည်တွေ ရောင်းချတဲ့ Fast Retailing ကုမ္ပဏီရဲ့ ကိုယ်စားလှယ်တစ်ဦးက သူတို့အဝတ်အထည်တွေ ချုပ်ပေးနေတဲ့ စက်ရုံနှစ်ခု တနင်္ဂနွေနေ့က မီးလောင်ခဲ့တယ်ဆိုတာ အတည်ပြုပါတယ်။ မီးလောင်တဲ့အချိန်က စက်ရုံတွေ လည်ပတ်နေချိန်မဟုတ်တဲ့အတွက် ထိခိုက်ဒဏ်ရာရသူတော့ မရှိခဲ့ပါဘူး။
“မြန်မာနိုင်ငံက အခြေအနေအပေါ် မိမိတို့ အထူးပဲစိုးရိမ်ပါတယ်။ ဒါနဲ့ပတ်သက်ပြီး ကုလသမဂ္ဂအေဂျင်စီတွေ၊ ပရဟိတအဖွဲ့တွေ၊ တခြား နိုင်ငံတကာကုမ္ပဏီတွေအပါအဝင် နိုင်ငံတကာက သက်ဆိုင်သူအားလုံးနဲ့ စပြီး ပြောဆိုဆွေးနွေးနေပါတယ်။” လို့ Fast Retailing ကုမ္ပဏီရဲ့ ထုတ်ပြန်ချက်တခုမှာ ပြောထားပါတယ်။
မြန်မာနိုင်ငံမှာ စစ်တပ်က အာဏာသိမ်းယူပြီး ဆန္ဒပြသူတွေကို အကြမ်းဖက် နှိမ်နင်းနေတဲ့အပေါ် ဖိအားပေးဖို့အတွက် မြန်မာနိုင်ငံမှာ ရှိနေတဲ့ နိုင်ငံတကာကုမ္ပဏီတွေ လုပ်ငန်းဆက်မလုပ်ဖို့ တိုက်တွန်းနေကြပါတယ်။
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 