မကွေးမြို့၊ မဲထီးလမ်းပေါ်က အ.ထ.က ၂ စာသင်ကျောင်းမှာ မတ်လ ၂၄ ရက် ဒီနေ့ ည ၉ နာရီလောက်က ဗုံးတစ်လုံးပေါက်ကွဲခဲ့တယ်လို့ သိရပါတယ်။ဒေသခံတစ်ဦးက ”ကျောင်းဝင်းထဲမှာပေါက်တာ။ ထိခိုက်တာတော့မသိရသေးဘူး။
အခုတော့ ရဲကား၊ စစ်ကားတွေနဲ့ ရှုပ်နေပြီး လမ်းသွားလမ်းလာတွေကိုစစ်ဆေးတာတွေ၊ ပစ်ခတ်တာတွေလုပ်နေတယ်” လို့ ပြောပါတယ်။အဆိုပါ အ.ထ.က ၂ စာသင်ကျောင်းဟာ စစ်ကောင်စီတပ်တွေ တပ်စွဲထားတာတဲ့ နေရာဖြစ်ပါတယ်။DVB
ဒီးမော့ဆိုကနေ ငွေတောင်ကို အင်အားဖြည့်ဖို့ သွားတဲ့ စစ်ကောင်စီရဲ့ တင့်ကားတစ်စီးနဲ့ ခြေလျှင်တပ်သားတွေကို ငွေတောင်ဆည်လမ်းမှာ မိုင်းခွဲတိုက်ခိုက်ခဲ့တယ်လို့ ဒီကနေ့ မေလ ၂၄ ရက် ညပိုင်းမှာ KPDF က ထုတ်ပြန်ထားပါတယ်။
အဆိုပါပျောက်ကျားတိုက်ခိုက်ခံရမှုကြောင့် တင့်ကားအပါအဝင် စစ်ကောင်စီ တပ်ဖွဲ့ဝင်တချို့ ထိခိုက်မှုရှိခဲ့ပြီး ငွေတောင်ဘက်သို့အလျင်အမြန်ဆုတ်ခွာထွက်ပြေးခဲ့ရတယ်လို့ သိရပါတယ်။ စစ်ကောင်စီတပ်တွေသာ အထိနာခဲ့ပြီး KPDF ဘက်ကတော့ အထိအခိုက်အကျအရှုံး လုံးဝ မရှိဘူးလို့ ဆိုပါတယ်။democracy vision
ကချင်ပြည်နယ်၊ မြစ်ကြီးနားရှိ မြေမြင့်ရပ်ကွက်အုပ်ချုပ်ရေးမှူးရုံး မီးလောင်ပြီး မြေမြင့်ရပ်ကွက် ဥက္ကဌ ဦးမောင်ကြည်အိမ်ကို ယခုည အသံမိုင်း ခွဲကာ နေအိမ်ပတ်ပတ်လည်တွင် ဓာတ်ဆီများ လောင်းသွားကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုသည်။khit thit
ချင်းပြည်နယ်၊ မင်းတပ်မြို့နယ် ၊ ထင်ချောင်းကျေးရွာအနီးတွင် အကြမ်းဖက်စစ်ကောင်စီတပ်များနှင့် မင်းတပ် ပြည်သူ့ကာကွယ်ရေးတပ်တို့ ယမန်နေ့က တိုက်ပွဲဖြစ်ပွားခဲ့ပြီး တိုက်ပွဲအတွင်း စစ်ကောင်စီဘက်တော်သား ၁ ဦးကျဆုံးကာ ၃ ဦးဒဏ်ရာရရှိကြောင်း မင်းတပ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်သည်။
တိုက်ပွဲများအတွင်း အကြမ်းဖက်စစ်ကောင်စီက ပစ်ခတ်သော လက်နက်ကြီးများမှ အငွေ့ဖြူများလျှင်မြန်စွာ ပြန့်ထွက်လာသည်ကိုတွေ့ရပြီး ယင်းအငွေ့ဖြူထုကို ဖြတ်မိသော CDF-Mindat ရဲဘော်တို့သည် လျှာများထုံအခြင်း၊ နှာခေါင်းများစပ်ခြင်း၊ ခေတ္တမျက်လုံးကန်းခြင်း၊ မူးဝေခြင်း၊ အကြိမ်ကြိမ်အော့အန်ခြင်း စသည့် ဝေဒနာများခံစားခဲ့ရကြောင်း၊ ယင်းဓာတုလက်နက်မျိုးကို မင်းတပ်-မတူပီလမ်းကြား မိုင် ၄၀ တိုက်ပွဲတွင်လည်း သုံးခဲ့ကြောင်း၊ ထိုတိုက်ပွဲတွင် CDF-Mindat ရဲဘော်များ ဓာတုလက်နက်များရှုရှိုက်မိ၍ ကျန်းမာရေးထိခိုက်မှုများရှိသော်လည်း စကစ ဘက်မှ တစ်ဦးကျဆုံး၍ ၃ ဦးခန့် ဒဏ်ရာရကြောင်း မင်းတပ်ပြည်သူ့အုပ်ချုပ်ရေးအဖွဲ့၏ ထုတ်ပြန်ချက်တွင် ဖော်ပြထားသည်။khit thit
မကွေးတိုင်း၊ တောင်တွင်းကြီးမြို့မှာ မေလ ၂၄ ရက် ဒီနေ့ည ၇ နာရီလောက်က ဗုံးတစ်လုံးထပ်မံပေါက်ကွဲခဲ့ပါတယ်။
ဒေသခံတစ်ဦးက “တောင်တွင်းကြီးရဲစခန်းက ဝန်ထမ်းတွေနေတဲ့ လိုင်းခန်းမှာ ပေါက်ကွဲခဲ့တာပါ။ ဒေသအခေါ်တော့ အရှေ့ရဲစခန်းပေါ့။ ထိခိုက်ဒဏ်ရာရတာနဲ့ အပျက်အစီးတော့ မသိရသေးဘူး။ ဗုံးပေါက်ပြီးကတည်းက စစ်သားတွေက သေနတ်နဲ့ မြင်မြင်သမျှ လိုက်ပစ်နေတယ်။ ကျနော်တို့လည်း အပြင်မထွက်ရဲဘူး” လို့ အတည်ပြုပြောပါတယ်။
မေလ ၂၃ ရက်ညကလည်း တောင်တွင်းကြီး မြန်မာ့စီးပွားရေးဘဏ်ခွဲရှေ့ ဗုံးပေါက်ကွဲမှုဖြစ်လို့ လုံခြုံရေးကို ပိုမိုချထားတဲ့ကြားက ဒီနေ့ ဒုတိယအကြိမ် ထပ်မံပေါက်ကွဲခဲ့တာဖြစ်ပါတယ်။
မနေ့ကဗုံးပေါက်ပြီးနောက် ဒီနေ့မှာ လုံခြုံရေးအင်အား တိုးမြှင့်ချထားသလို မြို့နယ်လမ်းဆုံ မီးပွိုင့်မှာ CCTV တွေကိုလည်း စစ်ကောင်စီက တပ်ဆင်နေတာတွေ့တယ်လို့ မြို့ခံတစ်ဦးက ပြောပါတယ်။DVB
ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်၊ (၄၄)ရပ်ကွက်၊ ဖူဆယ် ဘောလုံးကွင်းတွင် ယမန်နေ့ညနေ ၆ နာရီ အကြမ်းဖက်စစ်ကောင်စီတပ်များက ဝင်ရောက်ပစ်ခတ်၍ ကိုဆန်းထွန်းအောင်ရွှေလှိုင်(ခ) နရါးလေး ကျည်ဆန်ထိမှန်၍ ကျဆုံးသွားကြောင်း Dagon University Old Star အသင်းက တရားဝင်သတင်းထုတ်ပြန်သည်။
“ကျနော်တို့ DUOS အသင်းကို စတင်တည်ထောင်ခဲ့တဲ့ ခေါင်းဆောင်တွေထဲက တစ်ယောက် ဆန်းထွန်းအောင်ရွှေလှိုင်(ခ) နဂါးလေး မနေ့က မြောက်ဒဂုံ ပစ်ခတ်မှု ဖြစ်စဉ်မှာ အသက်ပေးခဲ့လိုက်ရပါပြီ။ လူမှားပစ်ခံလိုက်ရတဲ့အတွက် ကျနော်တို့ရဲ့ညီအကိုတစ်ယောက် ဆုံးရှုံးခဲ့ရပါပြီ။” လို့ Dagon University Old Star အသင်းက သတင်းထုတ်ပြန်ထားသည်။
ယမန်နေ့ညနေပိုင်း ရန်ကုန် မြောက်ဒဂုံရှိ ပုဂ္ဂလိကပိုင် ဖူဆယ်ဘောလုံးကစားကွင်းအတွင်းသို့ အကြမ်းဖက်စစ်ကောင်စီတပ်များက ရောက်ရှိလာပြီး ဝင်ရောက်ပစ်ခတ်ကြောင်း ၊ ၎င်းတို့ကို ဗုံးဖြင့် ပစ်ပြေးသူကို လိုက်ဖမ်းသည်ဆိုကာ ဖူဆယ်ကစားကွင်းထဲသို့ အကြမ်းပတမ်း ဝင်ရောက်ပြီး သေနတ်ဖြင့် ၁၀ ချက် ပစ်ခတ်ခဲ့ကြောင်း၊ ယင်းသို့ ပစ်ခတ်မှုတွင် ကိုဆန်းထွန်းအောင်ရွှေလှိုင် ကျည်ထိမှန်ပြီး ဆေးရုံတွင် ကျဆုံးသွားခြင်းဖြစ်ကြောင်း၊ အကြမ်းဖက်စစ်တပ်က ယင်းနေ့တွင် လူငယ် ၂၅ ဦးထက်မနည်းကို ဖမ်းဆီးသွားခဲ့ပြီး ၁ ဦးကို ဆက်လက်ဖမ်းဆီးကာ ကျန်သူများကို ပြန်လွှတ်ပေးခဲ့ကြောင်း သိရှိရသည်။khit thit
နိုင်ငံတော်သမ္မတဦးဝင်းမြင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ နေပြည်တော်မြို့တော်ဝန် ဒေါက်တာမျိုးအောင်တို့ကို ယနေ့ နေပြည်တော်တွင် ရုံးထုတ်စစ်ဆေးကြောင်း အကြမ်းဖက်စစ်ကောင်စီ၏ ယနေ့ည ၈ နာရီ ဝါဒဖြန့် ရုပ်မြင်သံကြား သတင်းတွင် ကြေညာပြသသည်။khit thit
မန္တလေးအခြေစိုက် Voice of Myanmar အယ်ဒီတာချုပ် ဦးနေမျိုးလင်းနှင့် သတင်းထောက် ကိုရှိုင်းအောင်တို့ကို ယနေ့ မိသားစုကို တွေ့ခွင့်မပေးဘဲ အွန်လိုင်းမှ တစ်ဆင့် ချမ်းမြသာစည်မြို့နယ် တရားရုံးတွင် ရုံးထုတ် စစ်ဆေးခဲ့ကြောင်း VOM မိသားစုဝင်တစ်ဦးက ပြောသည်။
“ရုံးထုတ်လို့ကြားပြီး သွားတယ်။ မတွေ့ရဘူး။ အွန်လိုင်းကနေ ရုံးထုတ်တယ်ပြောတယ်။ နောက်လ ရုံးချိန်းက ဇွန် ၇ ရက် ပြန်ချိန်းထားတယ်။ ဖမ်းသွားပြီးကတည်းက အခုအချိန်အထိ မတွေ့ရသေးဘူး” ဟု မိသားစုဝင်တစ်ဦးက ပြောသည်။
ရန်ကုန်အခြေစိုက် Frontier Myanmar သတင်းဌာန၏ အမှုဆောင်အယ်ဒီတာ Danny Fenster ရန်ကုန်အပြည်ပြည်ဆိုင်ရာ လေဆိပ်တွင် ယနေ့ နံနက် ဖမ်းဆီးခံရကြောင်း၊ ၎င်းသည် မလေးရှားနိုင်ငံကွာလာလမ်ပူသို့ ထွက်ခွာရန် လေဆိပ်ရောက်ရှိနေစဉ် ဖမ်းဆီးခံရခြင်းဖြစ်ကြောင်း၊ လက်ရှိတွင် အင်းစိန်ထောင်သို့ လွှဲပြောင်းလိုက်ပြီဟု နားလည်ကြောင်း၊ ၎င်းကို မည်သည့် အတွက်ကြောင့် ဖမ်းဆီးသည်ကို မသိရှိရသေးကြောင်း၊ အဆက်အသွယ်လည်း မရရှိသေးကြောင်း၊ သူ့ကို ချက်ချင်းပြန်လွှတ်ပေးရန်၊ သူ ဘေးကင်းလုံခြုံရေးနှင့် လိုအပ်သော ထောက်ပံ့မှုများ ဦးစားပေး ဆောင်ရွက်သွားမည်ဖြစ်ကြောင်း Frontier Myanmar က ယနေ့ ညနေပိုင်းတွင် ကြေညာချက် ထုတ်ပြန်ထားသည်။khit thit
ရှမ်းပြည်နယ်တောင်ပိုင်း၊ ပင်လောင်းမြို့နယ်၊ ဆောင်းပြောင်းရွာရှိ အကြမ်းဖက်စစ်ကောင်စီ လက်အောက်ခံ ရဲစခန်း မေလ ၂၄ ရက် ယနေ့ညနေ ၄ နာရီခွဲခန့်တွင် မီးလောင်ပျက်စီးသွားပြီး စခန်းအတွင်းမှ ရဲတပ်သားများထွက်ပြေးသွားကြောင်း ဒေသခံများမှ ပြောသည်။မီးလောင်ရသည့်အကြောင်းအရင်း အသေးစိတ် မသိရှိရသေးပေ။khit thit
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 