SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ကိုဗစ်-၁၉ ကြောင့်  တစ်နှစ်လောက်ရပ်နားခဲ့ရတဲ့ တောင်ပြုံးပွဲတော်ကို စစ်ကောင်စီခန့် ကျေးရွာအုပ်ချုပ်ရေးမှူးဦးဝင်းမြင့်နဲ့ အပေါင်းအပါတစ်စုက ပွဲတော် ဖြစ်မြောက်ရေး လုပ်ဆောင်နေကြတယ်လို့ ဒေသခံတွေဆီက သိရပါတယ်။

မတ္တရာမြို့နယ် အတွင်းက တောင်ပြုံးပွဲတော်ကို တိုင်းအစိုးရရဲ့ အစီအစဉ်နဲ့ နယ်ခံ အုပ်ချုပ်ရေးတာဝန်ရှိသူတွေ၊ သံဃာတော်တွေ ဦးဆောင်ပြီး ထိန်းသိမ်းကျင်းပလေ့ရှိတာ ဖြစ်ပါတယ်။

အခု ပွဲတော် ကျင်းပရေး အစီအစဉ်ကို မြို့နယ်သံဃနာယကဆရာတော်တွေဘက်က လက်ခံဖို့ ငြင်းဆန်တယ်လို့လည်း သိရပါတယ်။

တောင်ပြုံးပွဲတော်ကို နှစ်စဉ်  ဝါခေါင်လ ရောက်တိုင်း စည်ကားသိုက်မြိုက်စွာ ကျင်းပလေ့ရှိပြီး နိုင်ငံအနှံ့က နတ်ကိုးကွယ် ယုံကြည်သူ သိန်းချီ လာရောက်လေ့ရှိပါတယ်။

ကိုဗစ်-၁၉ ကူးစက်ရောဂါ ဖြစ်ပွားမှုကြောင့် အန်အယ်လ်ဒီ အစိုးရ လက်ထက်က ပွဲတော် ကျင်းပခွင့်ကို တစ်နှစ် တားမြစ်ပိတ်ပင်ခဲ့တာလည်း ဖြစ်ပါတယ်။

စစ်ကောင်စီက ရာထူးခန့်ထားတဲ့ တောင်ပြုံးကြီးကျေးရွာ အုပ်ချုပ်ရေးမှူးဦးဝင်းမြင့်ဟာ လက်ရှိမှာ ကျေးရွာအတွင်း ဧည့်စာရင်းတိုင်ကြားကိစ္စအတွက် အားတက်သရော ဆောင်ရွက်နေတဲ့အပြင် ပြီးခဲ့တဲ့ မေလပိုင်းကလည်း ကျေးရွာအတွင်း တပ်ဆင်ထားတဲ့ PSI စလောင်းတွေကို ဖြုတ်ပစ်ဖို့ ကျေးရွာအ တွင်း လှည့်လည်ကြေညာ လုပ်ဆောင်ခဲ့ပါတယ်။DVB

မြန်မာစစ်တပ်အာဏာသိမ်းမှုအပေါ် ဩစတြေးလျက အရေးယူဒဏ်ခတ်လိုက်ရင် မြန်မာစစ်တပ်အပေါ် ဩဇာလွှမ်းမိုးမှုဟာ အကန့်အသတ် ရှိသွားမှာဖြစ်လို့ ကမ္ဘာ့မဟာမိတ်နိုင်ငံတွေနဲ့ ဆန့်ကျင်ဘက် ဖြစ်နေပေမယ့် မြန်မာစစ်ခေါင်းဆောင်တွေကို နောက်ထပ်ဒဏ်ခတ်အရေးယူမှုတွေလုပ်ဖို့ မရှိကြောင်း နိုင်ငံခြားရေးဝန်ကြီး Marise Payne က ပြောကြားလိုက်ပါတယ်။

ဒီနေ့အထက်လွှတ်တော် ကြားနာမှုအတွင်း အထက်လွှတ်တော်အမတ် Payne က သြစတြေးလျရဲ့ အနေအထားကို ကာကွယ်ပြောဆိုသွားတာပါ။

သြစတြေးလျအစိုးရဟာ သူ့ကိုယ်ပိုင် အမျိုးသားအကျိုးစီးပွား နဲ့ ဩစတြေးလျရဲ့ ဒေသနဲ့ မြေပြင်အခြေအနေတွေ အပေါ် အခြေခံပြီး ဆုံးဖြတ်ချက်ချခဲ့တာလို့ လွှတ်တော်အမတ် Payne က  ပြောပါတယ်။ 

ဒီအရေးအပေါ် အာဆီယံ ဦးဆောင်တဲ့ ဖြေရှင်းမှုနဲ့ အာဆီယံက ဆောင်ရွက်ထားတဲ့ ကြိုးပမ်းမှုတွေကို ထောက်ပံ့အားပေးဖို့က ဩစတေးလျအကျိုးစီးပွားလို့လည်း  ဆိုပါတယ်။ 

ဒဏ်ခတ်ပိတ်ဆို့မှုတွေက အမျိုးသားအကျိုးစီးပွားအတွက် သင့်တော်တဲ့အကြောင်းကိစ္စဖြစ်ရင် ဆန်ရှင်လုပ်ဖို့ ဆုံးဖြတ်ချက်ချမှာပါလို့လည်းပြောပါတယ်။  Payne ရဲ့ပြောဆိုချက်တွေကို တခြားအမတ်တွေက အလုံးစုံ သဘောမတူကြပါဘူး။ 

ဂရင်းပါတီမှ အထက်လွှတ်တော်အမတ် Janet Rice က အဓိကကျတဲ့ နိုင်ငံတကာ မဟာမိတ်တွေရဲ့ ဦးဆောင်မှုကိုလိုက်နာဖို့ ပျက်ကွက်တဲ့အပေါ် အစိုးရကို ဝေဖန်ခဲ့ပါတယ်။ အရပ်ဖက်လူ့ အဖွဲ့အစည်းများရဲ့ တောင်းဆိုချက်တွေကို ဖယ်ထုတ်ထားခြင်းအတွက် အလွန်အမင်း စိတ်ပျက်စရာကောင်းတယ်လို့လဲ ပြောဆိုပါတယ်။

လူ့အခွင့်အရေးကော်မရှင်ဟောင်း ခရစ္စ ဆီတိုဒီကတော့ စီးပွားရေးပိတ်ဆို့မှုတွေကို အကောင်အထည်ဖော်ဖို့ အစိုးရကို တိုက်တွန်းခဲ့ပြီး အရေးယူရတော့မယ့်အချိန်ရောက်ပြီ ပြန်သုံးသပ်ဖို့ မလိုတော့ဘူး လို့ ပြောထားပါတယ်။

ယူအက်စ်၊ ယူကေ၊  ကနေဒါနဲ့ ဥရောပသမဂ္ဂတို့က စစ်ခေါင်းဆောင်တွေနဲ့ တခြား အရေးပါတဲ့ ပုဂ္ဂိုလ်တွေကို အရေးယူထားခဲ့ပြီး၊ ပြီးခဲ့တဲ့လက အရပ်ဘက်လူ့အဖွဲ့အစည်း ၄၀၀ နီးပါးကလည်း ဩစတြေးလျ အစိုးရရဲ့ ရှက်စရာကောင်းတဲ့ လျစ်လျူရှုမှု ကို ပြစ်တင်ရှုံ့ချထားပါတယ်။ 

ဩစတြေးလျအစိုးရအနေနဲ့ကတော့ စစ်တပ်ကနေ အကူအညီတွေ ဖယ်ရှားခြင်း၊ ကာကွယ်ရေးဆိုင်ရာ ပူးပေါင်းဆောင်ရွက်မှုတွေ ရပ်ဆိုင်းခြင်းနဲ့ အာဆီယံရဲ့ လူသားချင်းစာနာမှု အကူအညီပေးရေး အေဂျင်စီကို ဒေါ်လာ ၅ သန်း ထောက်ပံ့ခဲ့ပါတယ်။DVB

မြန်မာသမ္မတရုံးရဲ့ ဝဘ်ဆိုက်ကို ဖောက်ထွင်းပြီး ဝဘ်ဆိုက်ရဲ့ရှေ့စာမျက်နှာမှာ download လုပ်လို့ ရတဲ့ မြန်မာစာလုံး font package ထဲမှာ backdoor trojan ဗိုင်းရပ်စ်ကို ဆိုက်ဘာသူလျှို ဟက်ကာအုပ်စုတစုက ထည့်သွင်းထားတယ်လို့ ယူဆရကြောင်း The record သတင်းမှာ ဖော်ပြပါတယ်။

ဒီဆိုက်ဘာကျူးကျော်မှုကို ဇွန် ၂ ရက်နေ့မှာ  စလိုဗက် လုံခြုံရေးကုမ္ပဏီ ESET ကနေ တွေ့ရှိခဲ့တာပါ။

ဒီတိုက်ခိုက်မှုမှာသုံးထားတဲ့ malware အမျိုးအစားဟာ Mustang Panda, RedEcho သို့မဟုတ် Bronze President ကဲ့သို့သော  codenames တွေအောက်မှာ သိထားကြတဲ့ တရုတ်အစိုးရ-ကြီးကြပ်မှုနဲ့ ဟက်ကာအဖွဲ့က မြန်မာပစ်မှတ်တွေကို သတင်းအချက်အလက်တွေ ခိုးယူဖို့ လုပ်ဆောင်ခဲ့ရာမှာ သုံးဖူးတဲ့ malware မျိုးနဲ့ဆင်တူတယ်လို့ သုတေသီတွေက ပြောပါတယ်။

Mustang Panda ဟာ အီးမေးလ်အခြေပြုတိုက်ခိုက်မှုတွေကို သေချာပုံဖော် လုပ်ဆောင်တတ်တဲ့ ရာဇဝင်ရှိထားပြီး အခုဟက်ကာအဖွဲ့ကတော့ မြန်မာသမ္မတဝဘ်ဆိုက်မှာ download လုပ်ဖို့ ကမ်းလှမ်းထားတဲ့  မြန်မာစာလုံး font package ထဲမှာထည့်ဖို့ ပြင်ဆင်မွမ်းမံထားပုံရတယ် လို့ဆိုပါတယ်။

ဟက်ကာအဖွဲ့ရဲ့ ဖောက်ထွင်းပြီး ဗိုင်းရပ်စ်ထည့်သွင်းပုံတွေကို ESET အဖွဲ့က တွစ်တာမှာ မနေ့က ရေးထားပါတယ်။

မှတ်တမ်းထဲမှာ NUG အစည်းအဝေး အစီရင်ခံစာ ဇစ်ဖိုင်၊ အာဆီယံ – ဂျပန်ထိပ်သီးဆွေးနွေးရန်အချက်များ ၊  MMRS ဂျီနီဗာ ၊ ၁၁ရက် ၃ လ ၂၀၂၁ ဆိုတဲ့ဖိုင်နဲ့ MOHS-3-covid အမည်ရှိဖိုင်တွဲတွေကို Hidden files တွေထဲမှာ တွေ့ရပါတယ်။

တွေ့ရှိရတဲ့အချက်အလက်တွေအရ Mustang Panda ရဲ့ ပါဝင်ပတ်သက်မှုကို ESET အနေနဲ့ တရားဝင် အတည်ပြုရဦးမှာဖြစ်ပေမယ့်  အာခိုက် မှတ်တမ်းတွေအရ ဒါဟာ အဆင့်မြင့်ပြီး ခိုးကြောင်ခိုးဝှက် လုပ်ထားတဲ့ ဆိုက်ဘာသူလျှိုလုပ်ခြင်းရဲ့ လက္ခဏာတွေကို ပြနေတယ် လို့ဆိုပါတယ်။

မနေ့ကအဖြစ်အပျက်ကတော့ အဖွဲ့အစည်းတခုကနေ သူတို့မကြာခဏ အသုံးပြုလေ့ရှိတဲ့ တစ်ခု သို့မဟုတ် တစ်ခုထက်ပိုတဲ့ malware တွေနဲ့ နည်းဗျူဟာကျကျ မြန်မာသမ္မတရုံးဝဘ်ဆိုက်ကို ဒုတိယအကြိမ်တိုက်ခိုက်ခြင်းဖြစ်တယ် လို့ ESET ကနေ ထုတ်ပြန်ထားပါတယ်။ DVB

ဖလူးဒေသတိုက်ပွဲကြောင့် လေးကေ့ကော်မြို့သစ်ကို တိမ်းရှောင်လာရတဲ့ စစ်ဘေးရှောင်တိုင်းရင်းသား ပြည်သူတွေအတွက်  ဆန်နဲ့ အခြေခံစားသောက်ကုန်တွေ လိုအပ်တယ်လို့ ကရင်အမျိုးသားအစည်းအရုံး ၊ ဒူပလာယာခရိုင်က ထုတ်ပြန်ပါတယ်။

ကရင်ပြည်နယ် မြဝတီမြို့နယ် ဖလူးကျေးရွာမှာ ဇွန်လ ၁ ရက်နေ့က ဒီကေဘီအေခွဲထွက်အဖွဲ့နဲ့ အာဏာသိမ်းအကြမ်းဖက်စစ်အုပ်စုတို့ တိုက်ပွဲဖြစ်ပွားပြီးနောက် ဒေသခံပြည်သူ ၁၀၀၀ နီးပါး စစ်ရှောင်နေခဲ့ရတာပါ။

အဲဒီတိုက်ပွဲကြောင့် စစ်ဘေးရှောင်  ပြည်သူ ၆၀၀ နီးပါး ထိုင်းဘက်ကို ထွက်ပြေးတိမ်ရှောင်ခဲ့ရပြီး ပြည်သူ ၃၀၀ ကျော်က လေးကေ့ကော်မြို့သစ်ကို ရောက်ရှိလာခဲ့ကြတာဖြစ်ပါတယ်။

အခုအခါ စစ်ဘေးရှောင်  ပြည်သူတွေအတွက် ဆန်အပါအဝင် အစားအသောက်အကူအညီတွေ လိုအပ်နေတာ ဖြစ်ပါတယ်။

ပြီးခဲ့တဲ့ရက်က တိုက်ပွဲပြင်းထန်ခဲ့တဲ့ ဖလူးဒေသဟာ ဒီကနေ့မှာ‌တော့ ပစ်ခတ်မှုတွေ မရှိဘဲ အခြေအနေ ငြိမ်သက်နေတယ်လို့ ဆိုပါတယ်။DVB