ဖမ်းဆီးထားသည့် တရားသူကြီးကို စစ်ကောင်စီက ပြန်လွှတ်ပြီး နေရာပြောင်းရွှေ့
တရားရေးတွင် စစ်ကောင်စီဝင်စွက်နေသည်ဟု ပြောသဖြင့် ဖမ်းဆီးခံခဲ့ရသည့် မန္တလေးခရိုင်၊ ချမ်းမြသာစည်မြို့နယ်တရားသူကြီး ဦးကိုကိုသည် ပြန်လည်လွတ်မြောက်လာပြီးနောက် ညောင်လေးပင်မြို့သို့ ပြောင်းရွှေ့တာဝန်ပေးခံထားရသည်ဟု ရှေ့နေအသိုင်းအဝိုင်းထံမှ စုံစမ်းသိရှိရသည်။
“သူ(တရားသူကြီးဦးကိုကို) အဖမ်းခံရပြီး ရမန်ကာလအတွင်း ပြစ်မှုမထင်ရှားဘူးဆိုပြီး ပြန်လွှတ်ပေးလိုက်တာ။ ပြီးတော့ တိုင်းတရားရုံးမှာပဲ ဌာနတွင်းစစ်ဆေးမှုလုပ်ပြီး တခြားနေရာကို ပြောင်းလိုက်တယ်” ဟု မန္တလေးမြို့အခြေစိုက် ရှေ့နေကွန်ရက်အဖွဲ့မှ ဝါရင့်ရှေ့နေတစ်ဦးက Myanmar Now ကို ပြောသည်။
ဦးကိုကိုမှာ မတ် ၂၅ ရက်က ဖမ်းဆီးခံရပြီး နိုင်ငံ့ဝန်ထမ်းအချင်းချင်း စိတ်ဝမ်းကွဲရအောင်ပြောဆိုမှု၊ နိုင်ငံတော်အကြည်ညိုပျက်စေမှုဆိုင်ရာ ရာဇသတ်ကြီးဥပဒေ ပုဒ်မ ၅၀၅ (က) ဖြင့် ချမ်းမြသာစည်မြို့နယ်ရဲတပ်ဖွဲ့မှုးက တရားလိုပြုလုပ်ကာ ယင်းမြို့နယ်တရားရုံး၌ပင် အမှုဖွင့်ခံခဲ့ရသည်။ မန္တလေးမြို့၊ အမှတ် (၁၁)ရဲစခန်းအချုပ်တွင် ထိန်းသိမ်းခံရပြီးနောက် ပထမရမန်(ချုပ်မိန့် ၁၄ရက်) မပြည့်မီ ဧပြီလအစောပိုင်းတွင် ဦးကိုကို ပြန်လည်လွတ်မြောက်လာပြီး မေလအတွင်း ညောင်လေးပင်သို့ ပြောင်းရွှေ့တာဝန်ပေးခံခဲ့ရသည်ဟု ရှေ့နေအသိုင်းအဝိုင်းက ဆိုသည်။
“တကယ်တမ်းတော့ မြို့နယ်တရားသူကြီးအဆင့်က ပြန်တမ်းဝင်အရာရှိတစ်ဦးဖြစ်တဲ့အတွက် ဌာနခွင့်ပြုချက်မပါဘဲ အခုလို ကြက်ငှက်ဖမ်းသလို ဖမ်းလို့မရပါဘူး။ ဒါကြောင့်လည်း ဌာနတွင်းစစ်ဆေးပြီး အရေးယူတဲ့အနေနဲ့ အခြားမြို့နယ်တစ်ခုကို Transfer (ပြောင်းရွှေ့) ချပေးလိုက်ပုံရပါတယ်” ဟု မန္တလေးမြို့ခံ အမျိုးသမီးရှေ့နေတစ်ဦးက Myanmar Now ကို ပြောသည်။
ဦးကိုကိုသည် ချမ်းမြသာစည်မြို့နယ်တရားရုံးတွင် ၂၀၁၈ ခုနှစ်က တွဲဖက်တရားသူကြီးတာဝန်ယူရပြီး နောက်တစ်နှစ်အကြာတွင် မြို့နယ်တရားသူကြီးအဖြစ် ရာထူးတိုးခဲ့သည်။
၎င်းသည် အမျိုးသားဒီမိုကရေစီအဖွဲ့ချုပ်(NLD)အစိုးရလက်ထက် ၂၀၂၀ ခုနှစ်တွင် သက်ပြည့်ပင်စင်ယူသွားသော မန္တလေးတိုင်းတရားလွှတ်တော် တရားသူကြီးချုပ်ဟောင်း ဦးစိုးသိမ်း၏ သမက်လည်းဖြစ်သည်။ အဖမ်းမခံရခင် ရက်ပိုင်းအတွင်း ဦးကိုကိုက ၎င်း၏ Facebook တွင် အာဏာသိမ်းစစ်ကောင်စီကို ဆန့်ကျင်ရေး အာဏာဖီဆန်ရေးလှုပ်ရှားမှု (CDM) ပြုလုပ်သူများကို ရှုံ့ချသည့်အကြောင်းအရာများ ရေးသားခဲ့၍ ဝေဖန်ခံခဲ့ရဖူးသည်။
ပြန်လည်လွတ်မြောက်၍ နေရာရွှေ့ခံခြင်းနှင့် စပ်လျဉ်း၍ ဦးကိုကိုထံ မေးမြန်းနိုင်ခြင်းမရှိသေးသလို ရဲတပ်ဖွဲ့ထံမှလည်း မှတ်ချက်တစ်စုံတစ်ရာ မရသေးပေ။ဖေဖော်ဝါရီ ၁တွင် စစ်တပ်က အာဏာသိမ်းပြီးနောက် ဖမ်းဆီးခံရသူဦးရေ လေးထောင်ကျော်ရှိပြီဖြစ်ကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP)က ထုတ်ပြန်ထားသည်။myanmar now
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 