SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ချင်းပြည်နယ်တောင်ပိုင်း မင်းတပ်မြို့တွင် အာဏာသိမ်းစစ်ကောင်စီတပ်နှင့် တိုက်ပွဲများ ဆက်လက်ဖြစ်ပွားလျက်ရှိပြီး ယနေ့ (ဇွန် ၈) တွင် ဒေသခံကာကွယ်ရေးတပ်ဖွဲ့ဝင်တစ်ဦး ကျဆုံးခဲ့ကြောင်း သိရသည်။

ယနေ့နံနက်ပိုင်းက မင်းတပ်မြို့နှင့် ၁၀ မိုင်အကွာရှိ ဘုရားစခန်းကျေးရွာနှင့် ယှက်ကျေးရွာတို့တွင် ဖြစ်ပွားခဲ့သော တိုက်ပွဲအတွင်း စစ်ကောင်စီဘက်က လက်နက်ကြီးများ အဓိကအသုံးပြုကာ တိုက်ခိုက်ခဲ့ကြောင်း မင်းတပ်မြို့ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးက ပြောသည်။“ဒီနေ့ တိုက်ပွဲ ၂ နေရာဖြစ်နေတယ်။

လက်နက်ကြီးတွေနဲ့ ပစ်နေတာ။ မနက်က ကျွန်တော်တို့ဘက်က တစ်ဦးကျဆုံးပါတယ်။ ဒီနေ့တော့ လေယာဉ်သံမကြားရဘူး။ လက်နက်ကြီးကတော့ အခုပြောနေရင်းတောင် ထုနေတာ” ဟု ယနေ့ မွန်းလွဲပိုင်းဆက်သွယ်မေးမြန်းချိန်တွင် ၎င်းက Myanmar Now ကို ပြောသည်။မင်းတပ်မြို့ အရှေ့ဘက်နှင့် အရှေ့တောင်ဘက်ခြမ်းတွင် ဖြစ်ပွားခဲ့သော ထိုတိုက်ပွဲများတွင် ဒေသခံကာကွယ်ရေးတပ်ဖွဲ့ဘက်မှ အသက် ၁၈ နှစ်အရွယ် ဆလိုင်းလိန်းယောအွမ်ဆိုသူ လူငယ်သေဆုံးခဲ့ပြီး ထိခိုက်ဒဏ်ရာရသူစာရင်းအတိအကျကို အတည်မပြုနိုင်သေးကြောင်း ပြည်သူ့အုပ်ချုပ်ရေးအဖွဲ့တာဝန်ရှိသူက ဆိုသည်။

ချင်းပြည်နယ်တောင်ပိုင်း မင်းတပ်မြို့ကို စစ်ကောင်စီက မေလလယ်ပိုင်းတွင် စစ်အုပ်ချုပ်ရေးကြေညာခဲ့ပြီး ဒေသခံကာကွယ်ရေးတပ်ဖွဲ့များနှင့် တိုက်ပွဲများအပြင်းအထန်ဖြစ်ပွားခဲ့ကာ မင်းတပ်မြို့ခံများ တောထဲသို့ ထွက်ပြေးတိမ်းရှောင်နေရဆဲဖြစ်သည်။ မင်းတပ်မြို့ကို စစ်ကောင်စီက ပစ်မှတ်ထားတိုက်ခိုက်နေဆဲဖြစ်ကာ ယနေ့တိုက်ပွဲဖြစ်ပွားသည့် နေရာများမှာ ဒေသခံများထွက်ပြေးတိမ်းရှောင်နေသည့် စစ်ဘေးရှောင်စခန်းများနှင့် မိုင်အနည်းငယ်ခန့်သာ ကွာဝေးသည်ဟု သိရသည်။

စစ်ဘေးရှောင်စခန်းများအနီးတွင် စစ်ကောင်စီတပ်က လာရောက်တပ်စွဲနေသဖြင့် စခန်းရှိ ဒေသခံပြည်သူများ ထပ်မံထွက်ပြေးတိမ်းရှောင်နေရကာ သက်ကြီးရွယ်အိုနှင့် ကလေးသူငယ်များသာ ကျန်ရှိတော့ကြောင်း လုဆယ်စစ်ရှောင်စခန်းတာဝန်ခံတစ်ဦးက Myanmar Now ကို ပြောသည်။“အကုန်လုံးက ကမောက်ကမနဲ့ ဟိုပြေးဒီပြေးဖြစ်ကုန်ပြီ။

စခန်းနားနီးလာတော့ ပြေးနေကြတာ။ တချို့က စခန်းကနေ ထွက်သွားတယ်။ ဘယ်ထွက်သွားကြမှန်း မသိဘူး။ ဟိုပျံ့ဒီပျံ့ဖြစ်ကုန်ပြီ။ တချို့လည်း တောထဲမှာ ပြေးတယ်။ အခု စခန်းမှာ ဘယ်ပြေးလို့ပြေးရမှန်း မသိတဲ့လူတွေပဲ ကျန်တော့တယ်” ဟု ၎င်းက ပြောသည်။

မင်းတပ်မြို့နယ်အတွင်း အာဏာသိမ်းစစ်ကောင်စီ၏ အကြမ်းဖက်တိုက်ခိုက်မှုကြောင့် ပြည်သူ ၈၃၀၀ ကျော်သည် စစ်ဘေးရှောင်စခန်း ၁၈ ခုတွင် ခိုလှုံနေရပြီး စစ်ကောင်စီက ရိက္ခာထောက်ပံ့ရေးလမ်းကြောင်းများ ပိတ်ဆို့ထားသဖြင့် အစားအသောက်၊ ဆေးဝါးနှင့် ရေများ လိုအပ်နေသည်ဟု စစ်ရှောင်စခန်းတာဝန်ရှိများက ဆိုသည်။

မင်းတပ်မြို့တွင် ဧပြီလ ၂၄ ရက်က ဆန္ဒပြရင်းအဖမ်းခံရသူ လူငယ် ၇ ဦးကို စစ်ကောင်စီက ပြန်လွှတ်မပေးသည့်ကိစ္စကို အကြောင်းပြု၍ ဒေသခံများက ရိုးရာလက်လုပ်တူမီးသေနတ်များကို အားကိုးကာ ခုခံတော်လှန်ခဲ့ခြင်းဖြစ်သည်။

မေ ၁၃ ရက်မှ ဇွန် ၆ ရက်အထိ မင်းတပ်မြို့နယ်အတွင်း ရွှေအောင်သ၊ မယ်လယ်ကုန်း၊ ယှက်၊ ချောင်းဆုံနှင့် ဘုရားစခန်းကျေးရွာများတွင် အာဏာသိမ်းစစ်ကောင်စီတပ်များနှင့် ဖြစ်ပွားသည့် တိုက်ပွဲများအတွင်း ဒေသခံကာကွယ်ရေးတပ်ဖွဲ့ဝင် ၂၁ ဦး သေဆုံးခဲ့သည်ဟု မင်းတပ်မြို့ပြည်သူ့အုပ်ချုပ်ရေးအဖွဲ့က ယမန်နေ့ တွင် သတင်းထုတ်ပြန်ထားသည်။myanmar now

ဗုံးခွဲမှုသံသယနဲ့ စွပ်စွဲဖမ်းဆီးခံထားရတဲ့ ရန်ကုန် အင်းစိန်ထောင်တွင်းက လူငယ်တွေကို ပြန်လွှတ်ပေးမယ်ဆိုပြီး မိသားစုဝင်တွေဆီကနေ အကြမ်းဖက်စစ်အုပ်စုက ပိုက်ဆံတောင်းယူတာတွေရှိနေတယ်လို့ ဖမ်းဆီးခံရသူတွေရဲ့ ဆွေမျိုးတွေထံက သိရပါတယ်။

ဖမ်းဆီးခံလူငယ်တစ်ဦးရဲ့ မိသားစုဝင်က“ သူ့ကို ဗုံးခွဲတယ်ဆိုပြီး ခေါင်းစဉ်တပ်ဖမ်းသွားတာပါ။ အထဲမှာ မသေရုံတမယ် ရိုက်နှက်ခံထားရတယ်လို့ အစ်ကိုတို့ ကြားရတယ်။ ကိုယ်မလုပ်တဲ့ အရာတစ်ခုအတွက် နှိပ်စက်ခံနေရတာ လုံးဝမတရားဘူး။ လွှတ်ပေးမယ် ပိုက်ဆံပေးဆိုလို့ ပိုက်ဆံတွေလည်း တော်တော်ကုန်နေပြီ။ ခုဆို သိန်း  ၈၀ နီးပါးတောင်ရှိနေပြီး ခုထိ လွှတ်မပေးသလို ဘာသတင်းမှလည်းမကြားရဘူး” လို့ ပြောပါတယ်။

ထောင်ထဲမှာ ရိုက်နှက်စစ်ကြောမေးမြန်းခံနေရတာနဲ့ ပတ်သက်လို့လည်း မိသားစုဝင်တွေက စိုးရိမ်ပူပန်နေကြပါတယ်။

ရန်ကုန်မြို့တွင်းဖြစ်ပွားခဲ့တဲ့ ဗုံးပေါက်ကွဲမှုတွေနဲ့ ပတ်သက်လို့ အကြမ်းဖက်စစ်အုပ်စုက   တွေ့ရာကြုံရာ အနီးအနားကလူတွေကို တရားခံအဖြစ်ဖမ်းဆီးပြီး မေးမြန်းဖို့ဆိုပြီး ခေါ်သွားတာတွေလည်း အများအပြားရှိနေပါတယ်။

ဖမ်းဆီးခံ တချို့လူငယ်တွေကိုလည်း ပုဒ်မအမျိုးမျိုးတပ်ပြီး စစ်ကောင်စီမီဒီယာတွေကနေ မဟုတ် မမှန်လုပ်ကြံသတင်းတွေနဲ့  ဝါဒဖြန့်နေတာတွေလည်း ရှိနေပါတယ်။DVB

မန္တလေးတိုင်း၊ မိုးကုတ်မြို့ကို ဇွန်လ ၇ ရက် ညနေ ၄ နာရီက ပြင်ဦးလွင်လမ်းကနေ ပြန်လာတဲ့ လူငယ် ၆ ယောက်နဲ့ကားသမားတို့ကို  မိုင်းလုံလမ်းခွဲ စစ်ဆေးရေးဂိတ်မှာ အကြမ်းဖက်စစ်အုပ်စုက ဖမ်းဆီးသွားပါတယ်။

ကားသမားကိုတော့ ပြန်လွှတ်ပေးပြီး ခရီးသွားလူငယ် ၆  ယောက်ကိုတော့ အကြမ်းဖက်စစ်အုပ်စုက ဆက်လက်ဖမ်း​ဆီးထားတယ်လို့ ဖမ်းဆီးခံရသူတွေနဲ့ နီးစပ်တဲ့ မြို့ခံ တစ်ဦးက ပြောပါတယ်။ 

ဖမ်းဆီးခံထားရတဲ့ လူငယ်တွေက မိုးကုတ်မြို့မှာနေထိုင်သူတွေဖြစ်ပြီး ဖမ်းဆီးခံရတာကို ကားသမားလွတ်လာချိန် မိသားစုဝင်တွေကို ပြန်ပြောမှသိခဲ့ရပြီး ဖမ်းဆီးခံရတဲ့အကြောင်းရင်းကို မသိဘူးလို့ ဆိုပါတယ်။

ဖမ်းဆီးခံ လူငယ်တွေကို မိသားစုဝင်တွေက အဆက်သွယ်မရသလို ဘယ်ကိုဖမ်းသွားတယ်ဆိုတာလည်း မသိရသေးပါဘူး။

မိုးကုတ်မြို့အဝင်နေရာတွေမှာ အကြမ်းဖက်စစ်တပ်နဲ့ရဲတွေက  နေရာ ၄ နေရာလောက်မှာ  ဖြတ်သန်းသွားလာတဲ့ ပြည်သူတွေကို  မှတ်ပုံတင် စစ်ဆေးနေပါတယ်။DVB

ကချင်ပြည်နယ်၊ ရွှေကူမြို့အဝင် ကျောက်တလုံးကျေးရွာအနီးတဝိုက်မှာ ဇွန်လ ၈ ရက် နေ့လယ် ၁၂ နာရီဝန်းကျင်က အကြမ်းဖက်စစ်ကောင်စီ စစ်သားတွေ လိုက်ပါလာတဲ့ ‘ပဒိုင်း’သင်္ဘော ပစ်ခတ်တိုက်ခိုက်ခံရပါတယ်။

ကချင်ပြည်နယ်ထဲအဝင်မှာ အခုလို ပစ်ခတ်ခံရတာလို့ အဆိုပါဖြစ်စဉ်နဲ့ပတ်သက်ပြီး ဒေသခံတစ်ဦးကပြောပါတယ်။

“နှစ်ဘက် အပြန်အလှန်ပစ်နေကြတာ။ လက်နက်ကြီးတွေရော ပါတယ်။ ဒေသခံ တော်တော်များများကတော့ ကြောက်လန့်ပြီး ပြေးနေကြတယ်” လို့ ပြောပါတယ်။

ရွှေကူမြို့နယ်ကိုဖြတ်ပြီး ကချင်ပြည်နယ်ထဲကို ဝင်လာတဲ့ အကြမ်းဖက်စစ်ကောင်စီရဲ့ သင်္ဘောတွေဟာ အမြဲတမ်းလိုလို ပစ်ခတ်တိုက်ခိုက်ခံနေရတာ ဖြစ်ပါတယ်။

အခုပစ်ခတ်ခံခဲ့ရတဲ့ သင်္ဘောဟာ စစ်ကိုင်းတိုင်း၊ ကသာမြို့နယ်ထဲက မိုးတားကျေးရွာ မြစ်ကမ်းဘေးမှာ ရေချိုးနေတဲ့ ပြည်သူတွေကို အကြောင်းမဲ့ သေနတ်နဲ့ ပစ်ခတ်သွားတဲ့ သင်္ဘာဖြစ်ပါတယ်။DVB

စစ်ကိုင်းတိုင်း၊ ဒီပဲယင်းမြို့နယ်၊ ယဉ်ကျေးရွာမှာ  ဇွန် ၈ ရက် နေ့လယ် ၁၂ နာရီဝန်းကျင်က အကြမ်းဖက်စစ်တပ်နဲ့ ဒေသခံပြည်သူ့ကာကွယ်ရေးတပ်ဖွဲ့တွေ အပြန်အလှန်ပစ်ခတ်မှု ဖြစ်ပွားနေတယ်လို့ ဒီပဲယင်း PDF က ပြောပါတယ်။

အကြမ်းဖက်စစ်တပ်ဖွဲ့ဝင် ၇၀ လောက်က မနက် ၇ နာရီဝန်းကျင်ကစပြီး ကျေးရွာအတွင်းကို ဝင်ရောက်ရှာဖွေမှုတွေပြုလုပ်ခဲ့ရာက တိုက်ပွဲဖြစ်ပွားတာဖြစ်ပြီး  အခုနေ့လယ်အထိ နှစ်ဘက် အပြန်အလှန်ပစ်ခတ်နေတယ်လို့ သိရပါတယ်။

စစ်ကောင်စီတပ်ဖွဲ့ အင်အား ၅၀ လောက်လိုက်ပါတဲ့ ကား ၃ စီးပါ ယာဉ်တန်းဟာ ယဉ်ကျေးရွာအနီး လမ်းမပေါ်မှာ မိုင်းခွဲခံရပြီး စစ်ကောင်စီတပ်ဖွဲ့ဝင်  ၃ ဦး သေဆုံးခဲ့တယ်လို့ ဒေသခံတွေက ပြောပါတယ်။

အပြန်အလှန်ပစ်ခတ်မှု ဖြစ်ပွားခဲ့ပေမယ့် ပြည်သူ့ကာကွယ်ရေးတပ်ဘက်က အကျအဆုံးမရှိဘူးလို့ ဆိုပါတယ်။DVB