SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ရှမ်းပြည်နယ်မြောက်ပိုင်း၊ တအာင်း(ပလောင်)ကိုယ်ပိုင်အုပ်ချုပ်ခွင့်ရ ဒေသမှာ ပြည်ထောင်စု လွှတ်တော်ကိုယ်စားပြုကော်မတီ  (CRPH)ရဲ့ လမ်းညွှန်ချက်နဲ့ ကြားကာလပြည်သူ့လုံခြုံရေးနှင့် ကာကွယ်ရေးအဖွဲ့ကို ခုလဆန်းပိုင်းမှာ ဖွဲ့စည်းထားပါတယ်။

အဲဒီကနေ့တဆင့်  ဇွန်လ ၁၁ ရက် ဒီနေ့မှာတော့ နမ့်ဆန်၊ မန်တုံ၊ နမ့်ခမ်း၊ မူဆယ်၊ ကွတ်ခိုင်၊ နမ္မတူ၊ ကျောက်မဲမြို့နယ် မြို့နယ် ၇ မြို့နယ်မှာ အဖွဲ့၀င် ၇၄ ယောက်နဲ့  ကြားကာလပြည်သူ့လုံခြုံရေးနှင့် ကာကွယ်ရေးအဖွဲ့ တိုးချဲ့ဖွဲ့စည်းခဲ့တယ်လို့ ထုတ်ပြန်ကြေညာထားပါတယ်။

တအာင်း(ပလောင်)ဒေသအတွင်း အကြမ်းဖက်စစ်ကောင်စီရဲ့ ယန္တရားတွေကို လည်ပတ်အောင် ကူညီပေးနေတဲ့ ၀န်းထမ်းတွေ အနေနဲ့ CDM ပါ၀င်ကြဖို့နဲ့ ပြည်သူဘက်က မားမားမတ်မတ်ရပ်တည်ဖို့လည်း တိုက်တွန်းထားပါတယ်။

တအာင်း(ပလောင်)ဒေသ ကြားကာလပြည်သူ့လုံခြုံရေးနှင့် ကာကွယ်ရေးအဖွဲ့အနေနဲ့ အကြမ်းဖက်စစ်ကောင်စီပြုတ်ကျရေး  အကြမ်းမဖက်နည်းလမ်းနဲ့ ဆက်လည်း ဆန့်ကျင်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။DVB

ရှမ်းပြည်နယ်‌တောင်ပိုင်း၊ ကျေးသီးမြို့နယ်အတွင်းက လွယ်ဟွန်းတောင်ကျောမှာ ရှမ်းပြည်တိုးတက်ရေးပါတီ SSPP/SSA နဲ့ ရှမ်းပြည်ပြန်လည်ထူထောင်ရေးကောင်စီ RCSS/SSA တပ်တွေအကြားတိုက်ပွဲတွေကြောင့် စစ်ဘေးရှောင် ဒုက္ခသည်တွေ ထပ်တိုးလာနေပါတယ်။ 

 ရှမ်းလက်နက်ကိုင်အချင်းချင်း ဇွန် ၁ ရက်က စတင်လို့ တိုက်ပွဲဖြစ်ပွားနေရာမှာ ဒီရက်ပိုင်းအတွင်း တိုက်ပွဲပိုမိုပြင်းထန်နေတာကြောင့် စစ်ရေးလမ်းကြောင်းပေါ်ကျရောက်နေတဲ့ ကျေးရွာတွေက ပြည်သူတွေဟာ ကျေးသီးမြို့ပေါ်က ယာယီ စစ်ဘေးရှောင်စခန်းတွေကို ထပ်မံတိမ်းရှောင်လာနေ ကြတာပါ။

လက်ရှိ ကျေးသီးမြို့ပေါ်ကိုရောက်ရှိလာတဲ့ စစ်ဘေးရှောင်ဦးရေဟာ ၁၈၀၀ ကျော်သွားပြီဖြစ်ပါတယ်။ သူတို့တွေဟာ ဘုန်းကြီးကျောင်းတွေမှာ ယာယီခိုလှုံနေကြပါတယ်။ သူတို့အတွက် လာရောက်ကူညီတဲ့ အရပ်ဘက်လူမှုအဖွဲ့အစည်းတွေရှိပေမဲ့  နေ့စဉ်စားသောက်ဖို့ ဟင်းသီးဟင်ရွက်တွေလိုအပ်နေတယ်လို့ ကူညီပေးသူတွေက ပြောပါတယ်။

နှစ်ဖက်ပစ်ခတ်တိုက်ခိုက်မှုကြောင့် လူနေအိမ်တချို့ လက်နက်ကျည်ထိမှန်ပျက်စီးတာရှိပါတယ်။ ဒါ့အပြင် စိုက်ပျိုးထားတဲ့ စိုက်ခင်းတွေလည်း စစ်‌ကြောင်းယာဉ်တန်းတွေကြောင့် ဆုံးရှုံးတာတွေလည်း ရှိနေတယ်လို့ ဆိုပါတယ်။

လက်ရှိ ရှမ်းလက်နက်ကိုင် နှစ်ဖွဲ့ အချင်းချင်းတိုက်ပွဲဖြစ်နေတာကို ရပ်တန့်ဖို့ ပြည်တွင်းပြည်ပမှာရှိတဲ့ရှမ်းလူမှုအဖွဲ့အစည်းတွေက တောင်းဆိုထားတာရှိပေမဲ့လည်း တိုက်ပွဲတွေက ပြင်းထန်နေဆဲဖြစ်ပါတယ်။DVB

ရှမ်းပြည်နယ်မြောက်ပိုင်းရှိ နမ့်ဆန်၊ မန်တုံ၊ နမ့်ခမ်း၊ မူဆယ်၊ ကွတ်ခိုင်၊ နမ္မတူ၊ ကျောက်မဲမြို့များတွင် CRPH ၏ လမ်းညွှန်ချက်များနှင့်အညီ ကြားကာလပြည်သူ့လုံခြုံရေးနှင့် ကာကွယ်ရေးအဖွဲ့ ဖွဲ့စည်းထားပြီး အဆိုပါဒေသများအတွင်းမှ non-CDM ဝန်ထမ်းများအနေဖြင့် သက်ဆိုင်ရာ နေရပ်ဇာတိသို့ ပြန်ကြရန်နှင့် လုံခြုံရေးကိစ္စ တစုံတရာဖြစ်လာပါက ကြားကာလပြည်သူ့အုပ်ချုပ်ရေးအဖွဲ့မှ တာဝန်ယူမည်မဟုတ်ကြောင်း ထုတ်ပြန်ထားသည်။khit thit

မွန်ပြည်နယ်၊ မော်လမြိုင်မြို့မှာ   ပုဒ်မ ၅၀၅ (က) နဲ့ တရားစွဲဆို ဖမ်းဆီးခံထားရတဲ့ တက္ကသိုလ် ကျောင်းသား၊ ကျောင်းသူ ၈ ယောက်ကို  ဇွန်လ ၁၁ ရက်နေ့မှာ ရုံးထုတ်စစ်ဆေးခဲ့တယ်လို့ မိသားစုဝင်တွေက ပြောပါတယ်။

ဖမ်းဆီးခံ ကျောင်းသားတွေကို ကျိုက်မရောမြို့နယ်တရားရုံးမှာ ဒုတိယအကြိမ်မြောက် ရုံးထုတ်စစ်ဆေးတာဖြစ်ပြီး  သူတို့ အားလုံးကို အာဏာသိမ်း စစ်ကောင်စီက ကျိုက်မရော အကျဉ်းထောင်မှာ ဖမ်းဆီးချုပ်နှောင်ထားတာပါ။

ဖမ်းဆီးခံရတဲ့ ကျောင်းသား၊ ကျောင်းသူတွေကို  ပြီးခဲ့တဲ့ မေလ ၁၁ ရက်နေ့က  မော်လမြိုင်မြို့၊ ဇေယျာမြိုင်ရပ်ကွက်အတွင်းရှိ နေအိမ်တအိမ်မှာ ရဲနဲ့စစ်တပ်က အင်အား အလုံးအရင်းနဲ့ ဝင်ရောက် စီးနင်းဖမ်းဆီးခဲ့တာ ဖြစ်ပါတယ်။

ဖမ်းဆီးခံရတဲ့ ကျောင်းသား၊ ကျောင်းသူတွေထဲမှာ မော်လမြိုင်တက္ကသိုလ်က ‌၂ ဦး၊ အစိုးရ စက်မှုလက်မှုသိပ္ပံ (မော်လမြိုင်) က ၅ ဦး၊ မော်လမြိုင် တက္ကသိုလ် အဝေးသင်ကျောင်းသား ၁ ဦးပါဝင် ပါတယ်။DVB

ကရင်ပြည်နယ်၊ဘားအံမြို့နယ်တွင် စစ်အာဏာရှင်တော်လှန်ရေး အတွက် သပိတ်မှောက် ဆန္ဒပြကြသည့် လူငယ် ၃၆ ဦးကို ယနေ့ နံနက်တွင် ဘားအံမြို့နယ်တရားရုံးက ပုဒ်မ ၅၀၅ (ခ) ဖြင့် ထောင်ဒဏ် ၂ နှစ်ချမှတ်လိုက်ကြောင်း ဘားအံနည်းပညာတက္ကသိုလ် ကျောင်းသားများ သမဂ္ဂထံမှ သိရှိရသည်။

ထောင်ဒဏ်ပြစ်ဒဏ်ချမှတ်ခံရသည့် လူငယ် ၃၆ ဦးတွင် ဘားအံနည်းပညာတက္ကသိုလ်မှ နောက်ဆုံး နှစ်ကျောင်းသား ၊ လျှပ်စစ်စွမ်းအားဌာနမှ ကိုကျော်ဇင်နိုင်ပါဝင်ကြောင်း သိရှိရသည်။

ဘားအံမြို့နယ်၊ ပိတောက်လမ်း၊ ကမ်းနားတွင် ဖေဖော်ဝါရီလ ၂၈ ရက်နေ့က စစ်အာဏာရှင်တော်လှန်ရေး သပိတ်မှောက် ချီတက်ကြစဉ် လူငယ် ၃၆ ဦးကို ဖမ်းဆီးခဲ့ခြင်းဖြစ်ပြီး ယနေ့တွင် ထောင်ဒဏ် အပြစ်ပေးလိုက်ခြင်းဖြစ်သည်။

ဘားအံမြို့မှ ကျောင်းသူတစ်ဦးက “ဘာလက်နက်မှတောင်မပါပဲ ရိုးရိုးဆန္ဒပြကြတဲ့ လူငယ်တွေကိုလုပ်ရက်လိုက်တာ ။ ချိန်းလိုက်တဲ့ရုံးချိန်းတွေ တက်လိုက်ရတဲ့တရားခွင်တွေအမိန့် တစ်ခါချဖို့အရေး။ တစ်ခြားမြို့နယ်တွေမှာတောင် ရိုးရိုးဆန္ဒပြတဲ့လူငယ်တွေကို ခံဝန်ကတိနဲ့ပြန်လွှတ်ပေးကြတယ် ။ဘားအံကတော်တော်ရက်စက်တယ် “ဟု ပြောဆိုကြောင်း ဘားအံနည်းပညာတက္ကသိုလ် ကျောင်းသားများ သမဂ္ဂ၏ ထုတ်ပြန်ချက်တွင် ဖော်ပြထားသည်။

အကြမ်းဖက်စစ်ကောင်စီသည် ငြိမ်းချမ်းစွာ ဆန္ဒပြကြသည့် ပြည်သူများကို ပုဒ်မ အမျိုးမျိုးတပ်၍ မတရားဖမ်းဆီးထောင်ချမှုများ လုပ်ဆောင်လျက်ရှိသည်။khit thit