SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

အာဏာသိမ်း စစ်ကောင်စီတပ်တွေနဲ့ တိုင်းရင်းသားလက်နက်ကိုင်အဖွဲ့တွေကြား တိုက်ပွဲတွေကြောင့် ချင်းပြည်နယ်မှာ  ဒေသခံ လူပေါင်း ၁၈,၀၀၀ လောက်ဟာ နေရပ်စွန့် ခွာထွက်ပြေးတိမ်းရှောင်နေကြရတယ်လို့ ကုလသမဂ္ဂ လူသားချင်း စာနာထောက်ထားမှု ဆိုင်ရာ ညှိနှိုင်းဆောင်ရွက်ရေးရုံး (UNOCHA)က ထုတ်ပြန်ပါတယ်။

စစ်ဘေးရှောင်ဒေသခံတွေဟာ ချင်းပြည်နယ် မင်းတပ်၊ ကန်ပက်လက်၊ ဟားခါး၊ မတူပီ၊ ထန်တလန်မြို့တွေနဲ့ မကွေးတိုင်း ဆောမြို့က ယာယီစခန်း ၇၄ ခုမှာ နေထိုင်နေကြရကြောင်းနဲ့ သူတို့ဟာ ချင်းပြည်နယ်မှာ မေ ၁၂ ရက်ကတည်းကနဲ့ မကွေးတိုင်းမှာ ဇွန် ၆ ရက်နေ့ကတည်းက နေရပ်ရွှေ့ပြောင်းနေထိုင်ခဲ့ကြရတာလို့ ဆို ပါတယ်။

ဒါ့အပြင် အကြမ်းဖက်မှုတွေကြောင့် မေ ၁၂ ရက်ကတည်းက လူထောင်ပေါင်းများစွာလည်း တောတောင်တွေထဲကို ထွက်ပြေးသွားကြပြီ ဖြစ်ပါတယ်။

ချင်းပြည်နယ် တချို့နေရာတွေက လုံခြုံရေးအခြေအနေတွေဟာ စိုးရိမ်စရာ ဖြစ်နေပြီး ကန်ပက်လက်၊ မင်းတပ်၊ မတူပီနဲ့ ထန်တလန်မြို့နယ်တွေအပြင် နယ်နမိတ်ချင်း ဆက်စပ်နေတဲ့ မကွေးတိုင်းက မြို့နယ်တချို့မှာလည်း အကြမ်းဖက်စစ်ကောင် စီတပ်တွေနဲ့ ချင်းပြည်နယ်ပြည်သူ့ကာကွယ်ရေးတပ်ဖွဲ့(CDF)ကြားက တိုက်ပွဲတွေပုံမှန် ဖြစ်နေတယ်လို့လည်း UNOCHA က ဆိုပါတယ်။

ဒေသခံမိတ်ဖက်တွေအဆိုအရ တိုက်ပွဲတွေကြောင့် ဇွန် ၁၁ ရက်နေ့မှာ ထန်တလန် မြို့က ခန့်မှန်းခြေလူပေါင်း ၈၂၀ လောက်ဟာ အနီးအနားက တောတောင်တွေဆီကို ထွက်ပြေးတိမ်းရှောင်သွားပြီး သူတို့ဆီ အကူအညီတွေ အမြန်ဆုံးရောက်ရှိဖို့ လိုအပ် နေတာပါ။

လတ်တလောမှာတော့ လူသားချင်းစာနာမှု ဆောင်ရွက်သူမိတ်ဖက်တွေအနေနဲ့ ထွက်ပြေးသွားသူတွေ၊ အကြမ်းဖက်ဒဏ်ခံစားရသူတွေရဲ့ လိုအပ်ချက်တွေကို ဖြည့်ဆည်း ပေးဖို့ ကြိုးပမ်းနေပေမယ့်  သွားလာမှုဆိုင်ရာစိန်ခေါ်မှုတွေက အကူအညီ‌ပေးရေးအတွက် အနှောင့်အယှက်‌ဖြစ်နေဆဲ ဖြစ်တယ်လို့ ထုတ်ပြန်ချက်မှာ ဖော်ပြပါတယ်။

ဒါ့အပြင် ပြီးခဲ့တဲ့ ၂၀၁၉ ခုနှစ်၊ ဇန်နဝါရီလကနေ ၂၀၂၀ ပြည့်နှစ်၊ နိုဝင်ဘာလအတွင်း စစ်တပ်နဲ့ ရက္ခိုင့်တပ်တော် တိုက်ပွဲတွေကြောင့် အိုးအိမ်စွန့်ခွာပြေးရသူလူဦးရေ ၉,၈၅၀ ဟာ ချင်းပြည်နယ်ပလက်ဝမြို့က ယာယီစခန်း ၂၇ ခုမှာ အခုချိန်အထိ နေထိုင်နေရဆဲ ဖြစ်တယ်လို့လည်း ဖော်ပြထားပါတယ်။DVB

အကြမ်းဖက်စစ်ကောင်စီကို အမြစ်ပြတ်ချေမှုန်းနိုင်ရေး အားသွန်ခွန်စိုက် ဆောင်ရွက်နေသော် လည်း ပြည်သူများကို အကုန်ချပြ၍ မရသဖြင့် ပြည်သူများအားမလို အားမရဖြစ်နေကြောင်း အမျိုးသားညီညွတ်ရေးအစိုးရ NUG ၏ ပြည်ထောင်စုဝန်ကြီးချုပ် မန်းဝင်းခိုင်သန်းက ပြောဆိုသည်။

ယနေ့ ကျင်းပသော အမျိုးသားညီညွတ်ရေးအစိုးရအဖွဲ့ အစည်းအဝေး (၁၀/၂၀၂၁)တွင် ၎င်းက အထက်ပါအတိုင်းပြောဆိုလိုက်ခြင်းဖြစ်သည်။ပြည်ထောင်စု ဝန်ကြီးချုပ်က မနက်ဖြန်ဆိုလျှင် အမျိုးသားညီညွတ်ရေး အစိုးရအဖွဲ့ရဲ့သက်တမ်းဟာ ၂ လပြည့်ပြီဖြစ်ကြောင်း၊ ၂ လ အတွင်း အစိုးရအဖွဲ့ဝင် ဝန်ကြီးများ ကြိုးစားဆောင်ရွက်နေကြသော်လည်း ပြည်သူများ နေ့စဉ်ခံစားနေရတဲ့ဒုက္ခများက ကြီးမားလွန်း၍ အစိုးရအဖွဲ့အနေဖြင့် လုပ်ဆောင်ချက်များကို ယခုထက်ပို၍ မြန်မြန်ဆန်ဆန် ရလဒ်များထွက်အောင်လုပ်ဆောင်စေချင်ကြောင်း၊ တချို့ကိစ္စများတွင် NUG အနေဖြင့် အကြမ်းဖက်စစ်ကောင်စီကို အမြစ်ပြတ်ချေမှုန်းနိုင်ရေးအတွက် အားသွန်ခွန်စိုက်ဆောင်ရွက်နေတာတွေရှိသော်လည်း ပြည်သူများကို အကုန်ချပြ၍ မရသေးတာတွေရှိနေ တာကြောင့် ပြည်သူများဘက်ကကြည့်လျှင် အားမလိုအားမရဖြစ်နေတာများကိုလည်းတွေ့ရကြောင်း ပြောဆိုသည်။

အမျိုးသားညီညွတ်ရေးအစိုးရအနေနဲ့ပြည်သူများအတွက် စာနာထောက်ထားမှုအကူအညီများ ကူညီထောက်ပံ့ ခြင်းကိုပင် ဖျက်လိုဖျက်ဆီးလုပ်နေသော အကြမ်းဖက်စစ်ကောင်စီရဲ့လုပ်ရပ်များဟာ ဆိုးဝါးလွန်းလှကြောင်းကို ဇွန်လ ၁၀ ရက်နေ့က ဖြစ်ပွားခဲ့သော မိုးဗြဲမြို့နယ်ဖြစ်စဉ်တွင် တွေ့နိုင်ကြောင်း၊ ဒီလိုကိစ္စရပ်တွေ အတွက်သက်ဆိုင်ရာဝန်ကြီးဌာနအနေဖြင့်လည်း နိုင်ငံတကာကပါ သိအောင် ဆောင်ရွက်ပေးဖို့တိုက်တွန်း ကြောင်း ပြောဆိုသွားသည်။

ဒုတိယ သမ္မတ ဒူဝါလရှီလကမူ G 7 အစည်းအဝေးက ထွက်ပေါ်လာချက်တွေဟာ အကျိုးရှိပေသော်လည်း ပိုမိုထိရောက်မှုရှိရန် လိုကြောင်း။ နိုင်ငံတကာ ထိတွေ့ဆက်ဆံမှုတွေအပိုင်းမှာ ပိုမို အားကောင်းလာတာ ကိုတွေ့ရကြောင်း၊ တော်လှန်ရေးအတွက် ပြည်သူတွေက ညီညီညွတ်ညွတ်ကြိုးစားနေကြသလို အစိုးရအဖွဲ့အနေနဲ့ လည်း ညီညွတ်တဲ့အစိုးရဖြစ်ဖို့ပိုမို အားစိုက်ဖို့လိုကြောင်းပြောဆိုကြောင်း NUG က ထုတ်ပြန်ထားသည်။khit thit