SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မနေ့ ဇွန်လ ၂၂ ရက်က မန္တလေးမြို့တွင်းမှာ ဖြစ်ပွားခဲ့တဲ့ ပစ်ခတ်မှုမှာ တအာင်းလူငယ် ၃ ဦးနဲ့ တရုတ်လူငယ် ၁ ဦးတို့ စီးနင်းလာတဲ့ ကားကို စစ်ကောင်စီက လိုက်လံပစ်ခတ်ခဲ့ရာ ကားဟာ ဓာတ်တိုင်ကို ဝင်တိုက်ခဲ့ပြီး အဲဒီလူငယ် ၄ ဦးကို စစ်ကောင်စီက ဖမ်းဆီးသွားပြီး ကားကို ဗုံးခွဲပစ်လိုက်တယ်လို့ သိရပါတယ်။

အဆိုပါ လူငယ် ၄ ဦးကို ဖမ်းဆီးပြီး သတ်ဖြတ်ခဲ့ပြီးနောက် (၅၆)လမ်းနဲ့ (၁၁၀)လမ်းထောင့်ရှိ ထရန်စဖော်မာကို ဝင်တိုက်ပြီးတော့ သေဆုံးသွားတဲ့ အကြမ်းဖက်သမား ၄ ဦး ဖြစ်တယ်လို့ စစ်ကောင်စီတပ်က လိမ်လည်ပြီး သတင်းထုတ်ပြန်ခဲ့ပါတယ်။

စစ်ကောင်စီ သတ်ဖြတ်ခဲ့တဲ့ ၎င်း ၄ ဦးမှာ နိုင်ထွန်းကြည်၊ နိုင်လိုင်း၊ ချစ်ဆွေဆိုတဲ့ တအာင်းလူငယ် ၃ ဦးနဲ့ အားတီဆိုသူ တရုတ်လူငယ်တစ်ဦးတို့ ဖြစ်ကြပြီး အဲဒီ ၄ ဦးဟာ ရှမ်းပြည်နယ်မြောက်ပိုင်း နမ့်ခမ်းနဲ့ သီပေါမြို့နယ်က လူငယ်တွေ ဖြစ်ကြပါတယ်။အဲဒီ ၄ ဦးဟာ မန္တလေး စဥ့်ကိုင်မှာရှိနေတဲ့ ကြက်ခြံကို သွားရောက်ကြည့်ရှုဖို့ ပြီးခဲ့တဲ့ ဇွန်လ ၁၂ ရက်မှာ နမ့်ခမ်းကနေ ထွက်ခွာသွားခဲ့ကြတာပဲ ဖြစ်ပါတယ်။

မန္တလေးမှာ သူငယ်ချင်းတွေ ရောက်လာလို့ အဲဒီညမှာ မန္တလေးရှိ ဟိုတည်တစ်ခုမှာ တည်းခိုပြီး ကြက်ခြံပြန်လာဖို့ လုပ်နေစဥ် သတ်ခံရတာ ဖြစ်တယ်လို့ သေဆုံးသွားတဲ့ နိုင်လိုင်းရဲ့ အမျိုးသမီးဖြစ်သူ အိုင်လွမ်က ဒီနေ့မှာ ပြောပါတယ်။“မနေ့ မနက်က ၈ နာရီလောက် သူဖုန်းခေါ်လာသေးတယ်။ ကျွန်မလည်း မန္တလေးမှာ သူများဆန္ဒပြနေတယ်။

အပြင်သိပ်မထွက်နဲ့လို့။ သူလည်း ဟုတ်ပြီတဲ့ အခုကြက်ခြံ ပြန်မလို့တဲ့။ ၇ နာရီခွဲကတည်းက သူများက ပစ်နေပြီ။ အစ်ကိုတစ်ယောက်ကလည်း ကြက်ခြံလိုက်ခဲ့မလို့ ခဏစောင့်ခိုင်းသေးတယ်။ သူတို့လည်းသွားရင်း အရပ်ဝတ်နဲ့ သေနတ်ကိုင်ထားတဲ့ရဲကို သွားတွေ့တယ်။ အဲမှာ ပစ်လည်းပစ်နေကြတယ်။

သူတို့ကလည်း နောက်ပြန်ဆုတ်ဖို့လုပ်တော့ ရဲက စစ်သားတွေကို အကြောင်းကြားတာထင်တယ်။ စစ်သားတွေ ချက်ချင်း သူတို့နောက် လိုက်လာတယ်။ သူတို့ကို သေနတ်တွေနဲ့လိုက်ပစ်တော့ ကားက ဓာတ်တိုင်ကို တိုက်မိတာ”ဓာတ်တိုင်တိုက်မိတုန်းက ကားဟာ ရှေ့ဖုံးသာ အနည်းကယ် ပွန်းပဲ့သွားပြီး သူမရဲ့ အမျိုးသား နိုင်လိုင်းအပါအဝင် ၄ ဦးကို စစ်ကောင်စီက ဖမ်းဆီးသွားပြီး ကားကို ဗုံးခွဲပစ်လိုက်တယ်လို့ ပြောပါတယ်။“အဲချိန်ကားတော့ အရှေ့ပိုင်း ပိန်သွားတယ်။

လူကတော့ သူတို့ဖမ်းသွားတယ်။ ပြီးတော့ သူတို့ဓာတ်တိုင်နဲ့တိုက်ပြီး ဗုံးပေါက်ပြီးတော့ သေတယ်လို့ သတင်းထုတ်လိုက်တယ်။ တကယ်က အဲလိုမဟုတ်ဘူး။ စစ်သားတွေက ကားကိုဝိုင်းပြီးတော့ ဗုံးခွဲလိုက်တာ။ သူတို့ ကျွန်မအမျိုးသားကို ဖမ်းသွားကတည်းက အဆက်အသွယ် မရတော့ဘူး။ လိုက်မယ်ပြောတဲ့ အစ်ကိုလည်း သူတို့နဲ့ အဆက်အသွယ် မရတော့ဘူး” လို့ နိုင်လိုင်းရဲ့ အမျိုးသမီးက ဆက်ပြောပါတယ်။

လက်ရှိအချိန်ထိလည်း သေဆုံးသွားတဲ့ ၎င်းတို့ ၄ ဦးရဲ့အလောင်းကို မရသေးသလို အလောင်းကို ပြန်ရလိုတယ်လို့ မိသားစုဝင်တွေက တောင်းဆိုနေကြပါတယ်။“မနေ့ နေလယ်ရောက်တော့ အမေဆီဖုန်းဆက်လာတယ်။ သူတို့အလောင်းပုံလည်း ပို့လာတယ်။ ဒီမှာ လိုင်းက မကောင်းတော့ ကားပုံပဲ မြင်ရတယ်။ ကားကတော့ သူတို့ကား ဟုတ်တယ်။

အဲချိန်ကျမှ သူတို့​သေသွားမှန်း သိရတာ” လို့ အိုင်လွမ်က ​ဆိုပါတယ်။အိုင်လွမ်နဲ့ သေဆုံးသွားတဲ့ နိုင်လိုင်းဟာ ဇွန်လ ၆ ရက်မှာ မဂ်လာဆောင်ခဲ့ကြသူတွေ ဖြစ်ပါတယ်။သေဆုံးတဲ့အထဲက ချစ်ဆွေဟာ အရင်က တအာင်းလူငယ် မော်ဒယ်တစ်ဦးဖြစ်ခဲ့ဖူးသူ ဖြစ်ပါတယ်။“PDF လို့ စွပ်စွဲတယ်။ ဘာမှပတ်သက်မှု မရှိဘူး။

သူတို့က ကြက်ခြံမှာပဲ နေကြတာ။ မန္တလေးက သူတို့သူငယ်ချင်း ရောက်လို့သွားတာ။ ကားထဲမှာ ဘာမှလည်း မပါဘူး” လို့ အိုင်လွမ်က ပြောပြပါတယ်။စစ်ကောင်စီက ၎င်းတို့ ၄ ဦးကို အကြမ်းဖက်တွေအဖြစ် စွပ်စွဲပြီး သတင်းထုတ်ပြန်ထားပါတယ်။khit thit

ကရင်ပြည်နယ်၊ မြဝတီမြို့နယ် ရပ်ကွက် ၂၊ မြို့ပတ်လမ်း ရာအိမ်မှူးဖြစ်သော အသက်(၅၀) ခန့်အရွယ် ဦးသန်းဌေးမှာ ယနေ့(ဇွန် ၂၃) နံနက် ၆ နာရီခွဲခန့်က ၎င်း၏ နေအိမ်ရှေ့တွင် သေနတ်ဖြင့် ပစ်သတ်ခံရသည်။

နေအိမ်ရှေ့ ဆွမ်းလောင်းရန် ထိုင်နေစဉ် ကားတစ်စီးရောက်လာပြီး ပစ်သွားကြောင်း ဒေသခံတစ်ဦးထံမှ သိရသည်။

“ရင်ဘတ်ကို အပစ်ခံရတာ” ဟု ၎င်းက Myanmar Now ကို ပြောသည်။

ဦးသန်းဌေးကို ဆေးရုံအဆင့်ဆင့်သို့ ပို့ဆောင်ကုသစဉ် အာရှလမ်းဟု ဒေသခံတို့ ခေါ်ကြသော မြဝတီ-ကော့ကရိတ်လမ်း၌ သေဆုံးသွားခြင်းဖြစ်ကြောင်း သူက ဆက်ပြောသည်။

“မြဝတီဆေးရုံက ပတ်တီးတွေဘာတွေ ပတ်ပေးထားတယ်။ ပတ်ပြီးတော့ မော်လမြိုင်ကို ခေါ်သွားတယ်။ အာရှလမ်းမှာ ဆုံးသွားတယ်”ဟု ၎င်းက ဆိုသည်။

ပစ်ခတ်မှုအပြီး ရပ်ကွက်အတွင်းသို့ စစ်ကောင်စီတပ်ဖွဲ့များရောက်လာကာ လမ်းကို ပိတ်ဆို့ရှာဖွေစဉ် လက်ကိုင်ဖုန်းများကို စစ်ဆေးကြောင်း၊ ထိုသို့ပိတ်ဆို့စစ်ဆေးစဉ် ဖမ်းဆီးခံရသူ လူငယ်အမျိုးသား ၄ ဦး အနည်းဆုံးရှိကြောင်း သိရသည်။

“ဖြတ်သွားဖြတ်လာ ကလေးတွေပေါ့။ သူတို့ကို ပြန်လွှတ်လိုက်ပြီလို့လည်း ကြားတယ်”ဟု အထက်ပါ ဒေသခံက ပြောသည်။

ပစ်ခတ်လုပ်ကြံခံရသူ ဦးသန်းဌေးသည် ဒလန်ဟု ဆိုနိုင်ကြောင်း ၎င်းက ဆက်ပြောသည်။

“သူက ဟိုးအရင်ကတည်းက ရပ်ကွက်ထဲမှာ ဆန္ဒပြတဲ့သူတွေကို သတင်းပေးထားတာတွေ အများကြီးရှိတယ်။ ကလေးတွေနေတဲ့အိမ်တွေကို လိုက်ပြပြီး ဖမ်းဆီးခိုင်းတာတွေရှိတယ်” ဟု အဆိုပါ ဒေသခံက ပြောသည်။ 

“သူ့ကို လူမုန်းများနေပြီ သတိပေးတာတွေရှိတော့ သူက သူ့ကိုယ်သူ စစ်ကောင်စီကခန့်တဲ့ ရာအိမ်မှုးဆိုပြီး ပြန်ဖြဲတာတွေရှိတယ်”

ဦးသန်းဌေးမှာ အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက်ကတည်းက အဆိုပါရပ်ကွက်တွင် ရာအိမ်မှူးအဖြစ် တာဝန်ယူခဲ့သူဖြစ်သည်။

အဆိုပါဖြစ်စဉ်နှင့် ပတ်သက်၍ စစ်ကောင်စီဘက်ကို မှတ်ချက်တစ်စုံတစ်ရာ တောင်းခံနိုင်ခြင်း မရှိသေးပေ။

အာဏာသိမ်းပြီးနောက် ငါးလနီးပါးရှိလာချိန်တွင် ငြိမ်းချမ်းစွာဆန္ဒပြနေသည့် ပြည်သူများကို စစ်တပ်နှင့် ရဲက ရက်စက်စွာပစ်ခတ်၊ ဖြိုခွင်း၊ ဖမ်းဆီးမှုများ ဆိုးရွားစွာပေါ်ပေါက်နေသည်။ ဤအခြေအနေတွင် စစ်ကောင်စီလက်ထက် ရပ်ကွက်၊ ကျေးရွာ အုပ်ချုပ်ရေးမှူးများသည်လည်း နိုင်ငံအနှံ့ လုပ်ကြံသတ်ဖြတ်ခံလာရသည်။

ဦးသန်းဌေးသေဆုံးမှုမှာ အာဏာသိမ်းပြီးချိန်မှစ၍ မြဝတီမြို့တွင် ပထမဆုံးအကြိမ် ရပ်ကွက်အုပ်ချုပ်ရေးအဆင့် တာဝန်ရှိသူတစ်ဦး လုပ်ကြံခံရခြင်းဖြစ်သည်။

ကရင်ပြည်နယ်အခြေစိုက် KIC သတင်းဌာန၏ ယနေ့သတင်းတစ်ပုဒ်တွင် သေနတ်သမားများက ဦးသန်းဌေးကို ၂ ချက် ပစ်ခတ်ခဲ့ကြောင်း၊ လမ်းတွင် ကွယ်လွန်သဖြင့် သူ၏ ရုပ်အလောင်းကို နေအိမ်သို့ ပြန်လည်သယ်ဆောင်သွားကြောင်း ဖော်ပြထားသည်၊myanmar now

ရန်ကုန်တိုင်းဒေသကြီး၊ စမ်းချောင်းမြို့နယ်၊ ဝေဠုဝန်ရပ်ကွက် ၊ ဗဟိုလမ်းမပေါ်တွင် ယနေ့ နေ့လယ်ပိုင်းက တာယာမီးရှို့ပြီး ဆန္ဒပြကြရာတွင် လူငယ်တချို့ကို အကြမ်းဖက်စစ်ကောင်စီတပ်များက လာရောက် ဖမ်းဆီးသွားကြောင်း အဆိုပါ ရပ်ကွက်မှ ဒေသခံတချို့က ပြောသည်။

“လူငယ်လေးတွေ ဗဟိုလမ်းမ အလယ်မှာ မီးရှို့တာ။ အဲဒါ သိပ်မကြာပါဘူး။ ရဲတွေ ၊ စစ်သားတွေ ရောက်လာပြီး လမ်းတွေပိတ် တွေ့သမျှ လူငယ်တချို့ကို ဖမ်းသွားတယ်။ ပြီးတော့ အဲဒီမီးရှို့ထားတဲ့ တာယာတွေ ပြန်ရှင်းခိုင်းတယ်။ အခုတော့ လမ်းပြန်ပွင့်သွားပါပြီ” ဟု အဆိုပါရပ်ကွက်အနီးတွင် ကားပြုပြင်ရေး ဆိုင်တစ်ခုမှ ဒေသခံတစ်ဦးကပြောသည်။

ဒေသခံတချို့၏ အဆိုအရ ဖမ်းဆီးခံရသော လူငယ်များသည် တာယာမီးရှို့သော လူငယ်များမဟုတ်ဘဲ ရပ်ကွက်အတွင်းမှ လူငယ်များသာ ဖြစ်သည်ဟုဆိုသည်။ “ရှို့တဲ့လူငယ်တွေက ရှို့ပြီး ထွက်သွားတာ။ အခု သူတို့ ဖမ်းသွားတာက ရပ်ကွက်ထဲက လူငယ်တွေ ။ တာယာမီးရှို့တာနဲ့လည်း မသက်ဆိုင်ဘူး” ဟု ဒေသခံတစ်ဦးက ဆိုသည်။

စမ်းချောင်းမြို့နယ်တွင်လည်း စစ်ကောင်စီတပ်များသည် အင်အားအများအပြားဖြင့် ကင်းပတ်ခြင်း၊ မြေနီကုန်း ဗားကရာတို့တွင် စစ်ကားများ ရပ်၍ စောင့်ကြည့်ခြင်းများ လုပ်ဆောင်နေသည်ဟု သိရှိရသည်။khit thit

ကရင်ပြည်နယ်၊ မြဝတီမြို့ အမှတ် (၂) ရပ်ကွက် သဲပုံဂိတ်အနီးမှာ ရာအိမ်မှူး ဦးသန်းဌေး  ဇွန်လ ၂၃ ရက် မနက် ၆ နာရီကျော်လောက်က  သေနတ်နဲ့ ပစ်သတ်ခံခဲ့ရပါတယ်။ 

ရာအိမ်မှူး ဦးသန်းဌေးဟာ  သံဃာတွေကို ဆွမ်းလောင်းဖို့  အိမ်ရှေ့မှာ ထိုင်နေချိန် ကားအမည်းရောင်နဲ့လာတဲ့ အမည်မသိ သေနတ်သမားက သေနတ်နဲ့ ၂  ချက်ပစ်ပြီး ကားမောင်းထွက်သွားပါတယ်။ 

ဦးသန်းဌေးမိသားနဲ့ တခြားအိမ်နီးချင်းတွေက မြဝတီပြည်သူ့ဆေးရုံကို ပို့ဆောင်ခဲ့ပါတယ်။ ဦးသန်းဌေးရဲ့ ပြင်းထန်ဒဏ်ရာကြောင့် အရေးပေါ် မော်လမြိုင်ဆေးရုံကို  ပို့ဆောင်ချိန် လမ်းခရီးမှာ သေဆုံးသွားတဲ့အတွက် မြဝတီပြည်သူ့ဆေးရုံကို ပြန်သယ်လာပြီး ရုပ်လောင်းကို ရဲနဲ့ ကျန်းမာရေးဌာနက စစ်ဆေးအတည်ပြုချက်ယူမှာဖြစ်တယ်။ 

ဘာကြောင့် ပစ်ခတ်ခံရတယ်ဆိုတာ မသိသေးပေမဲ့ စစ်အာဏာသိမ်းနောက်ပိုင်း မြဝတီမြို့ အမှတ်(၂)ရပ်ကွက် သဲပုံဂိတ်မှာ လူငယ်တွေဆန္ဒပြဖို့ လူစုနေချိန်မှာ ရာအိမ်မှူး ဦးသန်းဌေးက ရဲတပ်ဖွဲ့ကို သတင်းပေးဖမ်းဆီးတဲ့ အဖြစ်မျိုးရှိခဲ့ကြောင်း နယ်ခံတစ်ဦးက ဆိုပါတယ်။DVB