SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ချင်းပြည်နယ်၊ မင်းတပ်မြို့၊ ယှက်ရွာအနီးတွင် ယမန်နေ့ (ဇွန် ၂၃) ၌ မိုင်းပေါက်ကွဲပြီး အသက် ၁၃ နှစ်အရွယ် ကလေးတစ်ဦး သေဆုံးခဲ့သည်။

ညနေပိုင်း ရွာအပြင် တောင်ယာခင်းသို့ ၎င်းကလေးငယ်သွားရောက်စဉ် မိုင်းထိခြင်းဖြစ်ပြီး လက်တစ်ဖက်ပြတ်တောက်၍ ခြေထောက်၊ ခါးအောက်ပိုင်းထိခိုက်ဒဏ်ရာဖြင့် သေဆုံးနေခြင်းဖြစ်ကြောင်း မင်းတပ်မြို့ပြည်သူ့အုပ်ချုပ်ရေးအဖွဲ့ ထံမှ သိရသည်။ 

ထိုရွာသည် ဇွန်လဆန်း၌ စစ်တပ်နှင့် ချင်းဒေသပြည်သူ့ကာကွယ်ရေးတပ်ဖွဲ့ (CDF) တို့ တိုက်ပွဲ အပြင်းအထန်ဖြစ်ပွားခဲ့သည့်ရွာ ဖြစ်သည်။ 

မည်သို့သော မိုင်းအမျိုးအစားပေါက်ကွဲခြင်းဖြစ်မှန်း မသိရသေးသော်လည်း မင်းတပ်မြို့ပြည်သူ့အုပ်ချုပ်ရေးအဖွဲ့ ပြန်ကြားရေးတာဝန်ခံတစ်ဦးကမူ စစ်တပ်က မိုင်းထောင်ထားခြင်းဖြစ်နိုင်ကြောင်း ပြောသည်။

“(CDF) မိုင်းက အဝေးထိန်းနဲ့ပဲ လုပ်တဲ့အတွက်ကြောင့် ဒီမိုင်းတွေက တော်ရုံတန်ရုံပေါက်ဖို့ မဖြစ်နိုင်ဘူး။ ဆော့မိတယ်ဆိုလည်း ပေါက်ဖို့မလွယ်ဘူး။ အခုပေါက်ခဲ့တဲ့မိုင်းကတော့ စစ်ကောင်စီမိုင်းဖြစ်မယ်” ဟု ၎င်းက ဆိုသည်။

စစ်တပ် အာဏာသိမ်းပြီးနောက် စစ်တပ်၏ ဖိနှိပ်မှုများကို တွန်းလှန်ရန် ဒေသခံများဖြင့် ပြည်သူ့အုပ်ချုပ်ရေးအဖွဲ့များ ဖွဲ့စည်းလိုက်ကြရာ မင်းတပ်တွင်လည်း ဖွဲ့စည်းထားသည်။

စစ်တပ်နှင့် CDF တို့ တိုက်ပွဲများဖြစ်ပွားခဲ့ရာ ကျေးရွာများတလျှောက် မိုင်းအန္တရာယ်ကြောင့် ဒေသခံများ စိုးရိမ်ပူပန်နေကြသည်။

“ရွှေအောင်သာကနေ ဝမ္မသူး၊ ဝုန်းခုန်ဘက် ၊ ထင်ချောင်းဘက်တောက်လျှောက်၊ မင်းတပ်ကနေ ယှက်ဘက်ကို လာတဲ့ တစ်ကြောမှာ မိုင်းတွေရှိမယ်လို့ ယူဆတယ်။ ကျွန်တော်တို့ဘက်က မိုင်းတွေထောင်ခဲ့တာမရှိဘူး။ ထောင်ခဲ့တယ်ဆိုလည်း တပ်ဆုတ်လာတာနဲ့တပြိုင်နက် မိုင်းတွေကို ပြန်ဖြုတ်ခဲ့တယ်” ဟု ၎င်းအဖွဲ့ ပြန်ကြားရေးတာဝန်ခံက ဆိုသည်။

မေလကုန်ခန့်တွင် မင်းတပ်နှင့် ၁၀ မိုင်ကျော် ကွာဝေးသည့် ပူကွန်းကျေးရွာ၌ မိုင်းပေါက်ကွဲပြီး ဒေသခံနှစ်ဦး သေဆုံးခဲ့သည်ဟု ၎င်းထံမှ သိရသည်။

တောင်ယာအနီး စစ်တပ်က မိုင်းထောင်သည်ဟူသော ပြောဆိုချက်နှင့် ပတ်သက်ပြီး စစ်ကောင်စီပြန်ကြားရေးတာဝန်ရှိသူတို့ကို ဆက်သွယ်မေးမြန်း၍ မရသေးပေ။

ကလေးတစ်ဦးသေဆုံးသော ထိုပေါက်ကွဲမှုအကြောင်းကိုလည်း စစ်ကောင်စီက သတင်းထုတ်ပြန်ခြင်း မရှိသေးပေ။

စစ်တပ်အာဏာသိမ်းပြီးနောက် မင်းတပ်အပါအဝင် ချင်းပြည်နယ်ရှိ မြို့များတွင် စစ်တပ်ကို ပြန်ခုခံနေသောကြောင့် တိုက်ပွဲများဖြစ်ပွားခဲ့သည်။ 

တိုက်ပွဲများပြင်းထန်ခဲ့သော မင်းတပ်မြို့တွင် စစ်အုပ်ချုပ်ရေး ကြေညာထားသည်။ 

ရခိုင်ပြည်နယ်တွင်လည်း နှစ်နှစ်တာစစ်ပွဲကာလအတွင်း မြေမြှုပ်မိုင်းပေါက်ကွဲမှုကြောင့် အရပ်သားအများအပြား ထိခိုက်ဒဏ်ရာရခဲ့ပြီး တိုက်ပွဲများရပ်တန့်သွားသော်လည်း ဒေသအတွင်း မိုင်းအန္တရာယ်၊ မပေါက်ကွဲသေးသော လက်နက်မျိုးစုံ၏ အန္တရာယ်များ ရှိနေဆဲဖြစ်သည်။ 

မြန်မာနိုင်ငံတွင် ၂၀၁၀ မှ ၂၀၁၉ ထိ ၉ နှစ်တာကာလအတွင်း မြေမြှုပ်မိုင်းကြောင့် သေဆုံးသူနှင့် ထိခိုက်ဒဏ်ရာရသူ ၁၉၀၀ ခန့်ရှိကြောင်း ဆွစ်ဇာလန်အခြေစိုက် မြေမြှုပ်မိုင်းလေ့လာစောင့်ကြည့်ရေးအဖွဲ့ (Landmine and Cluster Munition Monitor) က ၂၀၂၀ ဒီဇင်ဘာလမှ ထုတ်ပြန်သည့် အစီရင်ခံစာတွင် ဖော်ပြထားသည်။ 

အဆိုပါ အစီရင်ခံစာအရ ၂၀၁၉ တွင် မြေမြှုပ်မိုင်းကြောင့် သေဆုံးသူ ၈၉ ဦးနှင့် ဒဏ်ရာရရှိသူ ၂၆၉ ဦး ရှိခဲ့ပြီး ရှမ်း၊ ကချင်နှင့် ရခိုင်ပြည်နယ်တို့မှ အများဆုံးဖြစ်သည်။ myanmar now

ယနေ့ (ဇွန် ၂၅) တွင် မန္တလေးမြို့၊ မဟာအောင်မြေမြို့နယ်တွင် တပ်ပေါင်းစုဆန္ဒပြစစ်ကြောင်း စတင်ချီတက်ရန် ပြင်ဆင်နေစဉ် စစ်ကောင်စီတပ်က ဝင်ရောက်ဖမ်းဆီးခဲ့ရာ စုရပ်အနီး လူငယ် ၇ ဦး အဖမ်းခံရသည်။ 

ဆန္ဒပြရာတွင် ပါဝင်မည့်သူတစ်ဦး ကြိုတင်အထိန်းသိမ်းခံရပြီးနောက် စတင်စုဝေးမည့်နေရာ သတင်းပေါက်ကြားသွားခြင်းဖြစ်နိုင်ကြောင်း၊ မွန်းလွဲ ၂ နာရီခန့်က မဟာအောင်မြေမြို့နယ်၊ ၈၄ လမ်း နှင့် ၃၈ လမ်းအနီး လက်ဖက်ရည်ဆိုင်တစ်ဆိုင်အနီးတွင် လူငယ် ၆ ဦး ပါသွားကြောင်း ထိုလှုပ်ရှားမှုတွင် ပါဝင်သူတစ်ဦးက ပြောသည်။

“တစ်ယောက်ကို ဖမ်းမိသွားရာက စုရပ်ပေါက်သွားတာ။ ဖမ်းခံရသူတွေက (အများစုက) မိန်းကလေးတွေလို့ ကြားတယ်။ ဘယ်သူတွေပါသွားတယ်ဆိုတာ ကျွန်တော်တို့ Confirm လုပ်နေတုန်းပါ ”ဟု ၎င်းက ဆက်ပြောသည်။

လူမှုကူညီရေးကားများ အသုံးပြုပြီး အရပ်သားအသွင်ယူထားသည့် စစ်ကောင်စီတပ်ဖွဲ့ဝင်များက ဝင်ဖမ်းခြင်းဖြစ်သည်ဟု ဆိုသည်။

ဒေါင်းစစ်သည်သပိတ်စစ်ကြောင်း၊ ဗမာနိုင်ငံလုံးဆိုင်ရာကျောင်းသားသမဂ္ဂများသပိတ်စစ်ကြောင်း၊ ပညာရေးသပိတ်စစ်ကြောင်း၊ အလုပ်သမားလယ်သမားစစ်ကြောင်း ၊ မန္တလေးတက္ကသိုလ်သပိတ်စစ်ကြောင်း၊ ဘုရားကြီးသပိတ်စစ်ကြောင်း၊ အထက(၇)ကျောင်းသားများသပိတ်စစ်ကြောင်း၊ စိန်ပန်းသပိတ်စစ်ကြောင်းတို့ ပူးပေါင်းကာ တပ်ပေါင်းစုဆန္ဒပြစစ်ကြောင်းအဖြစ် ပူးပေါင်းဆန္ဒပြနေကြခြင်း ဖြစ်သည်။ 

မကြာခဏ ဖြိုခွင်းခံရလေ့ရှိသော်လည်း နေ့စဉ် ဆန္ဒပြရန် ကြိုးပမ်းနေသည့် ထိုအင်အားစုသည် ဧပြီနှင့် မေလအတွင်း ကားဖြင့်တိုက်၍ အကြမ်းဖက်ဖမ်းဆီးခြင်းနှင့် ရင်ဆိုင်ခဲ့ရသည်။

ဇွန် ၁၄ နံနက်ပိုင်းကလည်း ယင်းတပ်ပေါင်းစုဆန္ဒပြစစ်ကြောင်းကို မန္တလေးတက္ကသိုလ်အနီးတွင် စစ်ကောင်စီက ကားဖြင့်တိုက်၍ ဖြိုခွင်းခဲ့ရာ တက္ကသိုလ်ဆရာတစ်ဦးအပါအဝင် ၆ ဦး အဖမ်းခံခဲ့ရသည်။

ဇွန် ၂၂ က မန္တလေးမြို့တွင် ပြည်သူ့ကာကွယ်ရေးတပ်ဖွဲ့ (MPDF) နှင့် စစ်ကောင်စီတပ်များ အပြန်အလှန်ပစ်ခတ်မှုဖြစ်ပွားထားသော်လည်း မန္တလေးမြို့ခံများက စစ်ကောင်စီကို အံတုကာ ဆက်လက်ဆန္ဒပြလျက်ရှိသည်။myanmar now

ရန်ကုန်တိုင်းဒေသကြီး ၊ ကျောက်တန်းမြို့၊ အနောက်ပိုင်းရပ်ကွက်က စစ်အုပ်စုခန့် အုပ်ချုပ်ရေးမှူး ဦးသန်းဇော်ကို သေနတ်ကိုင် လူနှစ်ဦးက ဒီကနေ့ ဇွန်လ ၂၅ ရက် ညနေ ၄ နာရီအချိန်က ပစ်သတ်သွားခဲ့တယ်လို့ သိရပါတယ်။

အနောက်ပိုင်း ရပ်ကွက်အုပ်ချုပ်ရေးမှူးရုံးမှာ ရှိနေစဉ် အသက် ၄၀ကျော်အရွယ် ဦးသန်းဇော်အပါအဝင် လူသုံးဦးကို သေနတ်ကိုင် လူနှစ်ဦးက ပစ်သတ်ခဲ့တာဖြစ်တယ်လို့ ဒေသခံတစ်ဦးက အတည်ပြုပြောဆိုပါတယ်။

ဦးသန်းဇော်ကတော့ နေရာမှာတင် ပွဲချင်းပြီး သေဆုံးပြီး ကျန်နှစ်ဦးကတော့ ပြင်းထန်ဒဏ်ရာ ရရှိခဲ့တယ်လို့ သိရပါတယ်။ “အခု သေနတ်နဲ့ ပစ်သတ်ခံရလို့ သေတဲ့ အုပ်ချုပ်ရေးမှူးက လွန်ခဲ့တဲ့ နှစ်လလောက်ကလည်း ဓားနဲ့ထိုးခံရသေးတယ်၊ သုံးယောက်ပစ်ခံရတာ ကို နှစ်ယောက်သေတယ်လို့လဲ ပြောနေကြတယ်” လို့ ဒေသခံက ပြောပါတယ်။

လူထုက ရွေးကောက်တင်မြှောက်ထားတဲ့ အုပ်ချုပ်ရေးမှူးတွေကို ဖြုတ်ချပြီး စစ်အုပ်စုကအစားထိုးအသစ်ခန့်အပ်ထားသူတွေကို ဒလန်အဖြစ် သတ်မှတ်ကာ လုပ်ကြံသတ်ဖြတ်မှုတွေ နိုင်ငံအနှံ့မှာ မကြာခန ဖြစ်ပေါ်နေတာပါ။လုပ်ကြံသတ်ဖြတ်ခံရတဲ့ အုပ်ချုပ်ရေးမှူးတွေအတွက် အာဏာသိမ်းစစ်အုပ်စုက တစ်ဦးကိုကျပ်ငါးသိန်းစီ သတ်မှတ်ကာ မိသာစုတွေကို ပေးနေတယ်လို့ သိရပါတယ်။mizzima