SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ကလေးမြို့အပြင်ဘက်ရှိ ပြည်သူ့ကာကွယ်ရေးတပ်ဖွဲ့ PDF ( Kalay) စခန်းချရာနေရာကို ယမန်နေ့ (ဇွန် ၂၈) တွင် စစ်တပ်က ဝင်ရောက်စီးနင်းခဲ့ရာ လက်နက်အင်အား မမျှ၍ ဆုတ်ခွာခဲ့ရသည်ဟု ယင်းအဖွဲ့ ပြောရေးဆိုခွင့်ရှိသူက ပြောသည်။ 

နံနက် ၅ နာရီခန့်တွင် စစ်တပ်က လူအင်အား၊ လက်နက်အင်အားအလုံးအရင်းဖြင့် ရောက်လာသည်ဟု သူက ပြောသည်။

“တိုက်ပွဲတော့ မဖြစ်ဘူး။ လက်နက်မမျှတော့ ကျွန်တော်တို့မှာ ခါးချိုး (လုပ်သေနတ်)ပဲ ရှိတော့ ပြန်ဆုတ်လာတာ။ ကျွန်တော်တို့ပြေးတဲ့ဘက်ကို လက်နက်ကြီးတွေနဲ့ ထုတယ်။ သေနတ်တွေနဲ့ ရမ်းပစ်တယ်” ဟု သူက ဆက်ပြောသည်။

“ဆက်ပြီးတော်လှန်နေဦးမှာပါ။ လက်မလျှော့ပါဘူး”

ယင်းစီးနင်းမှုတွင် PDF (Kalay) အဖွဲ့ဝင်များ ထိခိုက်သေဆုံးမှု မရှိသော်လည်း စခန်းအနီး အရပ်သားပြည်သူတစ်ဦး ခြေထောက်ထိမှန်ဒဏ်ရာရခဲ့သည်ဟု ဆိုသည်။

ဇွန် ၂၆ နေ့လယ်တွင် ဂန့်ဂေါမြို့နယ်မှ ကလေးမြို့သို့ ဆင်းလာသည့် ကားစီးရေ ၂၀ ကျော်ပါသည့် စစ်ယာဉ်တန်းကို နတ်ချောင်းရွာအကျော် ပန်းမွန်ချောင်းအနီးတွင် မိုင်းဆွဲတိုက်ခိုက်ခဲ့ပြီး စစ်တပ်ဘက်မှ အထိနာကြောင်း ၎င်းအဖွဲ့က ထုတ်ပြန်ထားသည်။ 

ထို့အတူ ဇွန် ၂၇ နေ့လယ်၌ အဆိုပါလမ်းကြောင်းအတိုင်း ထပ်ဆင်းလာသည့် စစ်ကား ၄ စီးကို သံဖိုရွာအနီး ခြုံခိုတိုက်ခိုက်ခဲ့ရာ စစ်တပ်ဘက်မှ ၉ ဦးထက်မနည်း သေဆုံးခဲ့သည်ဟု PDF ဘက်မှ ဆိုသည်။

စစ်ကောင်စီကမူ ထိုအချက်ကို ငြင်းထားသည်။

ထိုစစ်ယာဉ်တန်းအား လက်နက်ကိုင်များက တူမီးသေနတ်များ၊ လက်နက်ငယ်များဖြင့် ၁၀ မိနစ်ခန့် နှောက်ယှက်ပစ်ခတ်ပြီး အနောက်ဘက်သို့ ထွက်ပြေးသွားကြောင်း၊ စစ်ကား ၃ စီး ချုံခိုတိုက်ခိုက်ခံရပြီး စစ်သား ၉ ဦး သေဆုံးသည် ဟူသော သတင်းမှာ မှားနေကြောင်း စစ်ကောင်စီအာဘော်သတင်းစာတွင် ဖော်ပြထားသည်။ 

သို့သော် နယ်မြေလုံခြုံရေးဆောင်ရွက်နေသော လုံခြုံရေးတပ်ဖွဲ့ဝင်များကို အကြမ်းဖက်သူများက ချောင်းမြောင်းပစ်ခတ်တိုက်ခိုက်ကြောင်း စစ်ကောင်စီဘက်မှ သတင်းထုတ်ပြန်နေသည်။ 

မကြာသေးမီက ကလေးမြို့တွင် စစ်ကားအစီးရေ ဆယ်ချီပြီး အင်အားဖြည့်တင်းခဲ့ကြောင်း ဒေသခံများက ပြောသည်။

စစ်ကောင်စီတပ် ပစ်မှတ်ထားနှိပ်ကွပ်ခံနေသည့် ကလေးမြို့သည် ကိုရိုနာဗိုင်းရပ်စ်ကူးစက်မှု အပြင်းအထန်ခံနေရသည့်မြို့လည်း ဖြစ်သည်။

ဤအခြေအနေတွင်ပင် ဒေသခံအများအပြားက နေ့စဉ် လမ်းပေါ်ထွက်ပြီး အာဏာသိမ်းစစ်ကောင်စီကို ဆန့်ကျင်ကန့်ကွက်နေကြသည်။

စစ်ကောင်စီ၏ ဖိနှိပ်မှုကို ပြန်ခုခံတိုက်ခဲ့သည့် မြို့နယ်များအနက် ကလေးမြို့သည် အစောဆုံးဖြစ်ပြီး စစ်ကိုင်း၊ ချင်းပြည်နယ်၊ မကွေး၊ ကယား (ကရင်နီ) ဒေသများသည် စစ်အာဏာရှင်ကို အပြင်းအထန်တော်လှန်နေသည်။

ကချင်ပြည်နယ်နှင့် ဆက်စပ်နေသော စစ်ကိုင်းတိုင်းမြို့နယ်တချို့တွင် ကချင်လွတ်လပ်ရေးတပ်မတော် (KIA) နှင့် PDF များ ပူးတွဲတိုက်ခိုက်နေသည်ဟု ဒေသခံများက ဆိုသည်။ myanmar now

မန္တလေးတိုင်း၊ တောင်သာမြို့နယ်အထွေထွေအုပ်ချုပ်ရေးရုံး စာရေးတစ်ဦး ယနေ့ (ဇွန် ၂၉) နံနက်က မင်္ဂလာဆောင်တစ်ခုမှ အပြန်တွင် ပစ်သတ်ခံရသည်။

အသက် ၄၀ ကျော်အရွယ် ဦးလူမော်သည် ယနေ့ နံနက် ၁၀ နာရီခွဲခန့်တွင် ဇီးပင်ကန်ရွာတွင် ပြုလုပ်သော မင်္ဂလာဆောင်တစ်ခုမှ အပြန်လမ်း၌ သေနတ်ဖြင့် သုံးချက်ဆင့် ပစ်ခတ်ခံရခြင်း ဖြစ်သည်။ 

ဦးလူမော်သည် တောင်သာမြို့တွင် စစ်အာဏာရှင်ဆန့်ကျင်သူများသတင်းကို စစ်တပ်ထံ ပေးနေသည့် နာမည်ကြီးဒလန်တစ်ဦးဖြစ်သည်ဟု မြို့ပေါ်နှင့် ရုံးတောကျေးရွာအုပ်စုဒေသခံများက ပြောသည်။

တပ်ထောက်ခံသည့် ပျူစောထီးအဖွဲ့တွင် ပါဝင်နေသည့် ဦးလူမော်ကို ၎င်းတို့လုပ်ကြံခြင်းဖြစ်သည်ဟု တောင်သာမြို့လူငယ်ပြောက်ကျားအဖွဲ့က ပြောသည်။ 

“သူ့ကြောင့် ထွက်ပြေးနေရတဲ့သူက လူ ၃၀ ထက်မနည်းတော့ဘူး။ နောက်ထပ် အပြစ်မဲ့ပြည်သူတွေ ထပ်ပြီး ထိခိုက်မှုမရှိအောင် ရှင်းလိုက်တာပါ။ သူက ပျူစောထီးအဖွဲ့ထဲမှာလည်း ခေါင်းကြီးပိုင်းမှာ ဆောင်ရွက်နေတယ်။ ထွေအုပ်စာရေးလည်းဖြစ်တယ်။ သတင်းရလို့ သွားရှင်းလိုက်တာ” ဟု ထိုအဖွဲ့တွင် ပါဝင်သူတစ်ဦးက Myanmar Now ကို ပြောသည်။

ဒေသခံတို့၏ ပြောဆိုချက်နှင့် ပတ်သက်ပြီး စစ်ကောင်စီပြန်ကြားရေးအရာရှိတို့ကို မေးမြန်းလိုသော်လည်း ဆက်သွယ်၍ မရသေးပေ။

စစ်အာဏာရှင် ဦးသန်း‌ရွှေလက်ထက် စက်မှုဝန်ကြီးဖြစ်ခဲ့သူ ဦးအောင်သောင်း၏ ဇာတိ တောင်သာမြို့နယ်တွင် စစ်သတင်းပေး(ဒလန်) ဟု နာမည်ထွက်သူ ၄ ဦး ပစ်ခတ်လုပ်ကြံခံရသည်။

ယင်းအနက် တောင်သာမြို့၊ အရှေ့စျေးရှိ ယွန်းယွန်းလျှပ်စစ်ပစ္စည်းဆိုင်ပိုင်ရှင် အသက် ၃၈ နှစ်အရွယ် မနှင်းနှင်းဝေမှာ အသက်မသေခဲ့ဘဲ ဒဏ်ရာအများအပြားရရှိသွားသည်။ ရရှိသောဒဏ်ရာများကြောင့် ၎င်းခန္ဓာကိုယ်အောက်ပိုင်း သေသွားခဲ့ကြောင်း တောင်သာလူငယ်ပြောက်ကျားအဖွဲ့နှင့်‌ ဒေသခံများက ပြောသော်လည်း Myanmar Now က သီးခြားအတည်ပြုနိုင်ခြင်း မရှိသေးပေ။ 

မနှင်းနှင်းဝေ ပစ်ခတ်ခံရမှုကြောင့် တောင်သာမြို့အနောက်ဘက် ရွာငါးရွာကို စစ်တပ်က ဝင်ရောက်စီးနင်းကာ လူအများအပြားကို ဖမ်းဆီးခဲ့ပြီး တစ်ဦးမှာ စစ်ကြောရေးတွင် ၂၄နာရီမပြည့်မီပင် သေဆုံးခဲ့သည်။

ဖေဖော်ဝါရီလတွင် စစ်တပ်က အာဏာသိမ်းပြီး ငြိမ်းချမ်းစွာဆန္ဒပြသူများကို ကျည်အစစ်ဖြင့် သတ်ဖြတ်ခြင်း၊ ဖမ်းဆီး၍ ညှဉ်းပန်းသတ်ဖြတ်ခြင်းများ ပြုလုပ်ခဲ့သည်။

ထို့နောက် မတ်လကုန်ပိုင်းမှစ၍ မြန်မာပြည်အထက်ပိုင်း စစ်ကိုင်း၊ ချင်း၊ မကွေးနှင့် ကယား (ကရင်နီ) ဒေသများတွင် အမဲလိုက်သည့် လက်လုပ်တူမီးသေနတ်ဖြင့် ဒေသခံတို့က ပြန်လည်ခုခံတိုက်ခိုက်ကြပြီး မြို့ပြပြောက်ကျားတပ်ဖွဲ့များ (PDF) ပေါ်ပေါက်လာခဲ့သည်။

စစ်တပ်နှင့် ပတ်သက်နေသူများ၊ ဒလန်များ၊ အုပ်ချုပ်ရေးမှူးများ၊ ရာအိမ်မှူးများအပါအဝင် စစ်ကောင်စီနှင့် ပေါင်းကာ ငွေညှစ်သော ယာဉ်ထိန်းရဲပင် သတ်ဖြတ်ခံနေရပြီး ဒေသခံပြည်သူ့ကာကွယ်ရေးတပ်ဖွဲ့ (PDF) များက ရှင်းလင်းနေသည်။

စစ်တပ်ဘက်ကမူ အကြမ်းဖက်သမားများက လုပ်ကြံသတ်ဖြတ်နေသည်ဟု ထုတ်ပြန်နေသည်။

နိုင်ငံရေးအကျဉ်းသားများကူညီစောင့်ရှောက်ရေးအဖွဲ့ (AAPP) ၏ ထုတ်ပြန်ချက်အရ ဇွန် ၂၈ အထိ အာဏာသိမ်းစစ်ကောင်စီ၏ အကြမ်းဖက်မှုကြောင့် သေဆုံးသူ ၈၈၃ ဦး ရှိပြီး ဖမ်းဆီးခံခဲ့ရသူ ၆၃၉၉ ဦး ရှိသည်။

ယခုရက်ပိုင်းအတွင်း ရန်ကုန်မြို့တွင် ဒလန်ဟု နာမည်ကြီးသူ ၂ ဦး၊ ရေစကြိုတွင် တစ်ဦး ပစ်သတ်ခံထားရသောကြောင့် စစ်တပ်က အများပြည်သူနေထိုင်ရာ နေရာတွင် ဝင်ရောက်ပစ်ခတ်မှုများ ရှိခဲ့သည်။ 

ဇီးပင်ကန်ကျေးရွာတွင်လည်း ဒလန်ဟု နာမည်ကြီးသူ အသတ်ခံရသောကြောင့် ရွာအတွင်း စစ်ကောင်စီတပ် ရောက်လာ၍ ဖမ်းဆီးအကြမ်းဖက်မည်ကို ဒေသခံများက စိုးရိမ်နေကြသည်။  myanmar now

ရှမ်းပြည်နယ်တောင်ပိုင်း၊ကျေးသီးမြို့နယ်၌ ဝပြည် သွေးစည်းညီညွတ်ရေး တပ်မတော် (UWSA)မှ အင်အားထောင်ချီဖြည့်တင်းထားသည့်အတွက် ယခုရက်ပိုင်းအတွင်း တိုက်ပွဲများပြန်လည်ပြင်းထန်လာနိုင်ချေရှိသဖြင့် တိုက်ပွဲအနီးအနားရှိ စစ်ဘေးရှောင်များ မြို့‌ပေါ်သို့ အမြန်‌ပြောင်းရွှေ့ရန်လိုအပ်ကြောင်း စစ်ရှောင်ကူညီကယ်ဆယ်ရေးတာ၀န်ခံအချို့မှ သတိပေးထားကြောင်းသိရသည်။

“အခုကတစ်ပတ်လောက်ရှိပြီ တိုက်ပွဲငြိမ်နေတာ ၊ ဒါပေမယ့်ဟိုနေ့တွေကပဲ UWSA ကအင်အားထောင်ချီဖြည့်ထားတယ်။ဒီတစ်ရက်နှစ်ရက်အတွင်းတိုက်ပွဲပြန်စဖို့များတယ်။ဒီတစ်ခေါက်တော်တော်ပြင်းထန်‌လောက်တယ်။RCSS ဘက်ကလဲနောက်မဆုတ်ဘူးလို့ပြောတာကြားတယ်။အဲ့ဒီတော့အခုစစ်ရှောင်တွေခိုလှုံနေတဲ့ရွာတွေကတိုက်ပွဲဖြစ်တဲ့နေရာနီးနေတော့ဒီတခေါက်တိုက်ပွဲပြင်းရင်အခြေအနေဆိုးဖို့ရှိတယ်။စစ်ရှောင်တွေတက်နိုင်သလောက်မြို့ပေါ်ပြောင်းစေချင်တယ်။မြို့ထဲဘုန်းကြီးကျောင်းတွေဆီနေတာပိုအဆင်ပြေမယ်။အဲ့ဒါမှကျွန်တော်တို့ဘက်ကသွားကူညီထောက်ပံ့ဖို့အဆင်ပြေမှာ”ဟုစစ်ဘေးရှောင်ကူညီကယ်ဆယ်ရေးတာ၀န်ခံတစ်ဦးက မဇ္ဈိမကိုပြောသည်။

လက်ရှိအခြေအနေအရ ရှမ်းပြည်တိုးတက်ရေးပါတီ (SSPP/SSA) နှင့်မဟာမိတ်တပ်ဖွဲ့ဖြစ်သည့် ‘၀’ပြည်သွေးစည်းညီညွတ်ရေးတပ်မတော် (UWSA)မှ ပြီးခဲ့သည့်ရက်က စစ်အင်အား ၂၀၀၀ ၀န်းကျင်နှင့်စစ်ကား ၁၀၇ စီး၊လက်နက်ခဲယမ်းအပြည့်အစုံဖြင့် ကျေးသီးမြို့၊ကျူမခေါင်ရွာဘက်ရှိ SSPP နယ်မြေအတွင်း အင်အားထပ်မံဖြည့်တင်းထားကြောင်း ဒေသခံအချို့၏ပြောပြချက်အရသိရသည်။

ကျေးသီးနှင့်မိုင်း‌နောင်အကြား ဇွန်လ ၁ ရက်မှစ၍ ပြီးခဲ့သည့်ရက်သတ္တပတ်ထိဖြစ်ပွားခဲ့သည့် တိုက်ပွဲကြောင့်ထောင်နှင့်ချီရှိသည့်ဒေသခံတိုင်းရင်းသားများသည် ဘေးလွတ်ရာကျေးရွာနှင့်ဘုန်းကြီးကျောင်းများသို့ထွက်ပြေးတိမ်းရှောင်ခဲ့ခြင်းဖြစ်သည်။ ‌တစ်နယ်လုံးရှိစစ်ဘေးရှောင်တိုင်းရင်းသားပြည်သူဦးရေမှာ ၂၀၀၀ ဦး‌ရေအထက်ထိရှိလာသည်။

အဆိုပါစစ်ဘေးရှောင်များရှိသည့်ကျေးရွာအချို့မှာ တိုက်ပွဲဖြစ်သည့်နေရာနှင့်နီးကပ်နေသဖြင့် စစ်ဘေးရှောင်များအားရိက္ခာနှင့်ဆေးဝါးပိုင်းဆိုင်ရာအကူအညီများထောက်ပံ့ရန် အခက်အခဲဖြစ်နေကြောင်း စစ်ရှောင်ကူညီကယ်ဆယ်ရေးအဖွဲ့မှ လူငယ်တစ်ဦးကပြောသည်။ “အခု စစ်ရှောင်တွေရှိတဲ့တချို့နေရာကတိုက်ပွဲနဲ့နီးတဲ့ကျေးရွာတွေကိုလမ်းပိတ်တာရော၊တိုက်ပွဲရှိတဲ့နေရာကိုကျော်ပြီးဖြတ်မှရောက်မယ့်နေရာတွေရောကျွန်တော်တို့ဘက်ကအစားအသောက်ဆေးဝါးတွေအကူညီပေးဖို့ခက်နေတယ်။ အဲ့ဒီဘက်တွေဆို ရိက္ခာဆေးဝါးအရမ်းလိုအပ်နေတယ်လို့ကြားတယ်”ဟု၎င်းကပြောသည်။

ရှမ်းပြည်နယ်တိုင်းရင်းသားလက်နက်ကိုင်အဖွဲ့ များဖြစ်သည့် ရှမ်းပြည်တိုးတက်ရေးပါတီ (SSPP/SSA)နှင့် ရှမ်းပြည်ပြန်လည်ထူထောင်ရေးကောင်စီ (RCSS/SSA)တပ် တို့သည် ကျေးသီးနှင့်မိုင်းနောင်မြို့တွင်ပြီးခဲ့သည့်ရက်သတ္တပတ်အထိတောက်လျှောက်တိုက်ပွဲပြင်းထန်ခဲ့‌သည်။ SSPPအနေဖြင့်၎င်း၏မဟာမိတ်တပ်ဖွဲ့များဖြစ်သည့် UWSA၊ TNLA တပ်ပေါင်းစုဖြင့်‌ RCSS ကို တိုက်ခိုက်နေသောကြောင့် RCSS အဖွဲ့အနေဖြင့် အဆိုပါအဖွဲ့သုံးဖွဲ့နှင့်ယှဥ်ပြီး အပြန်အလှန်တိုက်ခိုက်နေရခြင်းဖြစ်သည်။

ယခုတိုက်ပွဲမစခင်ကာလတွင်လည်း RCSS တပ်ဖွဲ့၏နယ်စပ်သို့ SSPP မှ ကားသုံးစီးဖြင့်သယ်ဆောင်လာသည့် တန်ဖိုးဘီလီယံချီ တရားမဝင်မူးယစ်ဆေးဝါးပစ္စည်းများအား RCSS ဘက်မှ မီးရှို့ဖျက်ဆီးခဲ့သောကြောင့် SSPP ဘက်မှ စစ်ကြေညာသည့်ပုံစံဖြင့် ကျိန်းဝါးထားခဲ့ကြောင်း‌ ကျေးသီးမြို့ဒေသခံအချို့ထံ၏အဆိုအရသိရသည်။

RCSSတွင် မူးယစ်တိုက်ဖျက်ရေး မူဝါဒအချက်တစ်ချက်ရှိသည့်အတွက် ရှမ်းပြည်နယ်မြောက်ပိုင်းနှင့်ရှမ်းတောင်တို့တွင်မူးယစ်ဆေးရောင်းဝယ်ဖောက်ကားသူများ၊ သုံးစွဲသူများကို လိုက်လံရှာဖွေဖမ်းဆီး၍ အပြစ်ပေးခြင်းများပြုလုပ်ခြင်းဖြစ်သည်။ ထို့ကြောင့် RCSS အား SSPP နှင့် TNLA မှ ထိုးစစ်ဆင်တိုက်ခိုက်ခဲ့ခြင်း‌ကြောင့်တိုက်ပွဲများ မကြာခဏဖြစ်ပေါ်နေခြင်းဖြစ်ကြောင်းဒေသခံများမှ ယူဆသုံးသပ်လျက်ရှိသည်။mizzima