စစ်ကောင်စီ လက်အောက်ခံ ဝန်ကြီးဌာနနှင့် ပူးပေါင်းသည့် ကုမ္ပဏီလုပ်ငန်းရှင်များကို အမည်ပျက်စာရင်းသွင်း၍ အရေးယူမည်ဟု NUG သတိပေး
အကြမ်းဖက်စစ်ကောင်စီလက်အောက်ခံ၀န်ကြီးဌာနနှင့် ပူးပေါင်းဆောင်ရွက်သည့် သယံဇာတနှင့်သတ္တုတူးဖော်မှုဆိုင်ရာလုပ်ငန်းလုပ်ကိုင်သည့် ပြည်တွင်းကုမ္ပဏီလုပ်ငန်းရှင်များကို အမည်ပျက်စာရင်း(Blacklist)ပြုစုကာ အများပြည်သူသို့အသိပေးထုတ်ပြန်၍ အရေးယူမည်ဟု အမျိူးသားညီညွတ်ရေး(NUG)၏ သယံဇာတနှင့်သဘာ၀ပတ်၀န်းကျင်ထိန်းသိမ်းရေး၀န်ကြီးဌာနမှ ယနေ့ ဇွန်လ ၂၉ ရက်တွင် သတိပေးချက်ထုတ်ပြန်လိုက်သည်။
ထို့အပြင် ပြည်တွင်းလုပ်ငန်းရှင်များကိုသာ လုပ်ကိုင်ခွင့်ပြုသည့်ကျောက်မျက်နှင့်ကျောက်စိမ်းတူးဖော်ထုတ်လုပ်သည့် လုပ်ကွက်များ၊သတ္တုအသေးစားနှင့်အလတ်စားလုပ်ကွက်များ မကြာမီသက်တမ်းကုန်ဆုံးတော့မည်ဖြစ်သောကြောင့် စစ်ကောင်စီလက်အောက်ခံ၀န်ကြီးဌာနမှ လုပ်ကွက်ခွင့်ပြုလိုင်စင်များကို အသစ်ပြန်လည်ချထားပေးမည်ဖြစ်ကြောင်းသိရသည်။
ထို့ကြောင့် ကုမ္ပဏီနှင့်လုပ်ငန်းရှင်များအနေဖြင့် စစ်ကောင်စီမှအသစ်ချထားပေးမည့်လုပ်ကွက်ခွင့်ပြုမိန့်နှင့်လိုင်စင်များကို လျှောက်ထားခြင်းမပြုလုပ်ရန်၊ လျှောက်ထားပါက အဆိုပါလိုင်စင်များကို NUG ဘက်မှအာမခံချက်ပေးမည်မဟုတ်ကြောင်းသိရသည်။
ယင်းလိုင်စင်ကိစ္စအား ဦးစီးဆောင်ရွက်သူနှင့်ပါ၀င်ဆောင်ရွက်သူ၀န်ထမ်းများပါ NUG မှ မှတ်တမ်းတင်ထားမည်ဖြစ်၍ အရေးယူဆောင်ရွက်မည်ဖြစ်သည်။အကြမ်းဖက်စစ်ကောင်စီလက်အောက်ခံ သယံဇာတနှင့်သဘာ၀ပတ်၀န်းကျင်ထိန်းသိမ်းရေး၀န်ကြီးဌာနမှ သတ္တု၊ကျောက်မျက်၊ပုလဲသစ်နှင့်အခြားသယံဇာတများ စမ်းသပ်တူးဖော်ထုတ်လုပ်ရောင်းချခြင်းဖြင့် စစ်ကောင်စီအတွက် ပြည်တွင်းပြည်ပ၀င်ငွေရရှိရေးကြိုးပမ်းလုပ်ဆောင်လျက်ရှိကြောင်းထုတ်ပြန်ချက်တွင်ဖော်ပြထားသည်။
ထို့နောက်သတ္တုစမ်းသပ်တိုင်းတာရေးခွင့်ပြုမိန့်များ၊ ကျောက်မျက်ရတနာဆိုင်လိုင်စင်များအားအသစ်ခွင့်ပြုခြင်းနှင့် သက်တမ်းတိုးခြင်းတို့ကိုဆောင်ရွက်နေသည်။
ထို့အပြင်စစ်ကောင်စီအနေဖြင့် မြေငှားရမ်းခ၊ကုန်သွယ်လုပ်ငန်းခွန်အပါအ၀င် သတ္တုနှင့်ကျောက်မျက်လုပ်ငန်းဆိုင်ရာအခွန်အခများ အတင်းအကြပ်တောင်းခံခြင်း၊မြန်မာ့ကျောက်မျက်ရတနာပြပွဲတို့တွင် လေလံတင်ရောင်းချခြင်း၊ One Stop Service စနစ်ဖြင့်ကျောက်စိမ်းအချောထည်များ ပြည်ပသို့တင်ပို့ရောင်းချခြင်း၊ ထုတ်လုပ်ပြီးသစ်လုံးများကို လပ်ပုံတင်လေလံတင်ရောင်းချခြင်း၊ သစ်လုံးများအားသယ်ယူပို့ဆောင်ခြင်း၊ သစ်အချောထည်ပစ္စည်းထုတ်လုပ်ရောင်းချခြင်း၊နိုင်ငံခြားတင်ပို့ခြင်းအစရှိသည့်လုပ်ငန်းများကိုလည်း ခွင့်ပြုကာ ၀င်ငွေရရှိအောင်တရားမ၀င်ဆောင်ရွက်လျက်ရှိတယ်လို့ ထုတ်ပြန်ချက်မှာ ရေးသားထားသည်။mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 