SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ဧရာဝတီတိုင်း၊ ပုသိမ်မြို့၊ အမှတ် ၁၃ ရပ်ကွက် ရုံးပေါင်းစုံထဲ မြို့နယ်ပညာရေးမှူးရုံးဝင်းထဲမှာ ဇွန်လ ၂၉ ရက်နေ့ ဒီကနေ့ညပိုင်း ဗုံးပေါက်ကွဲခဲ့တယ်လို့ သိရပါတယ်။

ည ၇ နာရီ ၁၅ မိနစ်လောက်မှာ ပုသိမ်မြို့နယ်ပညာရေးမှူးရုံးဝင်းထဲ ဗုံးပေါက်ကွဲတဲ့ အသံကြားခဲ့ရတယ်လို့ ဒေသခံတွေက ပြောပါတယ်။

ဒေသခံတဦးက “ခုနလေးတင်ပေါက်တာ ရုံးဝင်းထဲလား အပြင်လား မပြောတက်သေးဘူးဗျ။ ပုသိမ်မှာ မပေါက်တာကြာပြီ၊ ဒီနေ့မှ ပြန်ပေါက်တာ” လို့ ပြောပါတယ်။

ဗုံးပေါက်ကွဲခဲ့တဲ့ မြို့နယ်ပညာရေးမှူးရုံးထဲကို အကြမ်းဖက်စစ်ကောင်စီရဲ့ လက်နက်ကိုင်တပ်တွေ ရောက်ရှိစစ်ဆေးနေတယ်လို့ ဆိုပါတယ်။

ဗုံးပေါက်ကွဲမှုနဲ့ပတ်သက်ပြီး ထိခိုက်ဒဏ်ရာရရှိသူ ရှိ မရှိ ဆိုတာကိုတော့ အတည်ကျမသိရသေးပါဘူး။

ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း မေလပိုင်းကစတင်ကာ ဗုံးပေါက်ကွဲမှုတွေဖြစ်ပေါ်ခဲ့ပြီး ဒီနေ့ထိဆိုရင် ၈ ကြိမ်လောက်ရှိပြီလို့ ဒေသခံတွေက ပြောဆိုပါတယ်။DVB

ဧရာဝတီတိုင်း၊ ကန်ကြီးထောင့်မြို့နယ်မှာ ဇွန်လ ၂၉ ရက်နေ့ ညနေပိုင်းက လုံခြုံရေးတင်းကျပ်ထားတဲ့ ရုံးပေါင်းစုံရှိရာ အမှတ် ၃ ရပ်ကွက်မှာ ဗုံးပေါက်ကွဲခဲ့တယ်လို့ သိရပါတယ်။

ညနေ ၄ နာရီလောက်မှာ ရုံးပေါင်းစုံက သစ်တောရုံးရှေ့မှာပေါက်ကွဲခဲ့တာလို့ ဒေသခံတွေက ပြောပါတယ်။

“ပေါက်တဲ့နေရာက စစ်ကောင်စီတပ်တွေ တပ်စွဲထားတဲ့ နေရာနဲ့ အနီးဆုံးလို့ ပြောရမယ်၊ အသံကတော့ တော်တော်ကျယ်တယ်၊ ထိလား မထိလားတော့ မပြောတတ်သေးဘူး”လို့ ဒေသခံတဦးက DVB ကို ပြောပါတယ်။

ဗုံးပေါက်ကွဲခဲ့တဲ့နေရာဟာ အကြမ်းဖက်စစ်အုပ်စု တပ်စွဲထားတဲ့ ထွေအုပ်ရုံး၊ ရဲစခန်းနဲ့ အားကစားရုံနဲ့ နီးစပ်တဲ့နေရာဖြစ်ပြီး ပေါက်ကွဲချိန်မှာ ဒဏ်ရာရရှိသူ ရှိ၊ မရှိဆိုတာကို မသိရသေးဘူးလို့ ဆိုပါတယ်။

ဗုံးပေါက်ကွဲတဲ့နေရာကို မိနစ်ပိုင်းအကြာမှာ အကြမ်းဖက်စစ်ကောင်စီတပ်တွေ လာရောက်ချိန်မှာ မပေါက်ကွဲသေးတဲ့ဗုံး ၁ လုံး တွေ့ရှိခဲ့တယ်လို့ သိရပါတယ်။

မပေါက်ကွဲသေးတဲ့ ဗုံးကို အကြမ်းဖက်စစ်ကောင်စီတပ်တွေက ကားတာယာကွင်းတွေနဲ့ ဝိုင်းထားပြီး ဖြုတ်ဖို့စောင့်နေချိန် ညနေ ၄ နာရီ ၄၀ လောက်မှာ ထပ်မံပေါက်ကွဲသွားတယ်လို့ ဒေသခံတွေက ပြောဆိုပါတယ်။DVB

မကွေးမြို့မှာ ဇွန်လ ၂၉ ရက်နေ့က ထွေအုပ်ဝန်ထမ်း ၄ ယောက်အပါအဝင် ကိုဗစ်-၁၉ အတည်ပြုလူနာ ၁၇ ​ယောက် တွေ့ရှိခဲ့တယ်လို့ ပရဟိတအဖွဲ့တွေကနေ သိရပါတယ်။

ပိုးတွေ့လူနာတွေကတော့ စစ်ကောင်စီရဲ့ အထွေထွေအုပ်ချုပ်ရေးဦးစီးဌာနက ဝန်ထမ်း ၄ ယောက်၊ ရန်မျိုးအောင်ရပ်ကွက်က ၁၀ ယောက်၊ ကန်သာရပ်ကွက်က ၂ ယောက်နဲ့ အောင်စေတနာရပ်ကွက်က ၁ ယောက်မှာ ကိုဗစ်-၁၉ ရောဂါပိုးတွေ့ရှိခဲ့တယ်လို့ ပရဟိတအဖွဲ့ဝင် တယောက်က DVB ကို ပြောပါတယ်။

မကွေးတိုင်းဒေသကြီး အားကစားကွင်းမှာ ကိုဗစ်သံသယရှိတဲ့သူတွေကို RDT နဲ့ စစ်ဆေးခဲ့တာဖြစ်ပြီး ပိုးတွေ့လူနာနဲ့ ဆက်စပ်တဲ့မိသားစုဝင်တွေကိုတော့ ကိုဗစ်ရောဂါပိုး ရှိ၊ မရှိ ခေါ်ယူစစ်ဆေးတာတွေ မလုပ်သေးဘူးလို့ လူနာရဲ့မိသားစုဝင်တစ်ယောက်က ပြောပါတယ်။

ဒီကနေ့ ပိုးတွေ့လူနာ ၁၇ ယောက်အပါအဝင်၊ ဇွန်လ ၂၈ ရက်နေ့မှာ တွေ့ရှိခဲ့တဲ့ အတည်ပြုလူနာ ၁၃ ယောက်ကိုတော့ ပြည်သူ့အစိုးရလက်ထက်က ကိုဗစ်-၁၉ ရောဂါကုသရေး အထူးကြပ်မတ်ဆောင်အဖြစ် အသုံးပြုခဲ့တဲ့ ၅ ထပ်ဆောင် ဆေးရုံကြီးကို ပို့ဆောင်လိုက်ပြီလို့ သိရပါတယ်။DVB

ရန်ကုန်တိုင်းဒေသကြီး သင်္ကန်းကျွန်း မြို့နယ် ဂဖူးကွေ့ ဈေးတွင် အဂ်ါနေ့ မနက် ၇နာရီကျော်က ရပ်ကွက်အုပ်ချုပ်ရေးမှူးတစ်ဦး သေနတ်ဖြင့်အပစ်ခံရ၍ သေဆုံးသွားကြောင်း မျက်မြင်တွေ့ရှိသူများအပြောအရ သိရသည်။

သေဆုံးသွားသည့် အမျိုးသားမှာ င/ကရပ်ကွက် နဝရတ်လမ်းသွယ်တွင် နေထိုင်သူ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဝင် ဦးစိန်လှိုင်ဝင်း (ခ) ကျားကြီးဖြစ်ပြီး ဂဖူးကွေ့ဈေးတွင် ငါးရောင်းသူ ဖြစ်သည်ဟု သိရသည်။

” သူကကြံ့ခိုင်ရေးကရပ်ကျေးဥက္ကဌပါ။ ဆန္ဒပြ သူတွေကိုဖမ်းတဲ့ထဲသူပါတယ်လို့ ပြောတာကြားရတယ်။ သူတို့ မိသားစုအကုန်ငါးရောင်းတာ။ တပ်မတော် ထောက်ခံပွဲတွေဘာတွေမိသားစုလိုက်သွားကြတယ်” ဟု အိမ်နီးချင်းတစ်ဦးက မဇ္ဈိမသို့ပြောသည်။

” သေနတ်နဲ့အပစ်ခံရပြီး နေရာမှာတင် ဆုံးသွားတာပါ။ ရုတ်ရုတ်သဲသဲဖြစ်သွားတော့လေ ဘယ်သူက ဘယ်လိုဖြစ်တယ်တောင် သေချာမသိလိုက်ရဘူး”ဟု သူက ဆက်ပြောသည်။mizzima