SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မန္တလေးမြို့တော်စည်ပင်သာယာရေးကော်မတီပိုင် မော်တော်ယာဉ်ဌာနတွင် ယနေ့ (ဇူလိုင်) နံနက်ပိုင်းက ဗုံးခွဲတိုက်ခိုက်ခံရမှုကြောင့် ဆီသယ်ယာဉ် (ဆီဘောက်ဆာ) တစ်စီး မီးလောင်ပျက်စီးခဲ့သည်ဟု တာဝန်ရှိသူက အတည်ပြုသည်။

“ရိုးရိုး မီးမတော်တဆလောင်တာတော့ မဟုတ်ဘူး။ လက်လုပ်ဗုံးကွဲတာလို့ ယူဆရပါတယ်။ တာဝန်ရှိသူတွေ စစ်ဆေးနေတုန်းပါ။ ဒီမှာက ဝန်ထမ်းကလည်း ၆၀၀၀ ကျော်လောက်ရှိတယ်။ အဝင်အထွက်ကလည်း ရှုပ်တော့ ဘယ်သူက ဘယ်လိုလုပ်တာလဲဆိုတာတော့ ပြောရခက်ပါတယ်” ဟု စည်ပင်သာယာရေးကော်မတီမှ အရာရှိကြီးတစ်ဦးက ပြောသည်။ 

မန္တလေးမြို့၊ ချမ်းမြသာစည်မြို့နယ်၊ ၆၂ လမ်း၊ ၁၀၅ လမ်းနှင့် ၁၀၆ လမ်းကြားရှိ စည်ပင်သာယာရေးကော်မတီ၏ မော်တော်ယာဉ်ဌာနအတွင်း ယနေ့ နံနက် ၆ နာရီခန့်က ဆီဘောက်ဆာကားတစ်စီး မီးလောင်ပြီး ပေါက်ကွဲသံများဆူညံနေခဲ့ကြောင်း ထိုပတ်ဝန်းကျင်တွင် နေထိုင်သူတစ်ဦးက ဆိုသည်။ 

“ပေါက်ကွဲသံတွေ အကျယ်ကြီးတွေ အရင်ကြားရတာ။ ချက်ချင်းပဲ မီးခိုးတွေ အများကြီးထွက်လာတာ။ နောက်မှ သိရတာက ဆီဘောက်ဆာကားမှာ ဗုံးထောင်ထားပြီး ကွဲတာလို့သိရတာ။ အသံတွေကတော့ အကျယ်ကြီးတွေ၊ ဆီဘောက်ဆာဖြစ်တဲ့အတွက် အဲ့ဒါကွဲပြီး ထွက်တာထင်တယ်” ဟု လမ်း ၆၀ အနီး ရပ်ကွက်နေ အမျိုးသားတစ်ဦးက ပြောသည်။

လူမှုကွန်ရက်တွင် တွေ့ရှိရသည့် ဗီဒီယိုတစ်ခုတွင် ဆီဘောက်ဆာကာ မီးလောင်ခဲ့ပြီး အဆိုပါအဆောက်အအုံအတွင်းရှိ အခြားယာဉ်များ လောင်ကျွမ်းခြင်းမရှိသည်ကို တွေ့ရသည်။ 

မီးလောင်ပေါက်ကွဲရာသို့ မီးသတ်တပ်ဖွဲ့က အင်အားအများအပြားဖြင့် လာရောက်ငြှိမ်းသတ်ခဲ့ပြီး ဆီဘောက်ဆာကားနှင့် အဆောက်အအုံပျက်စီးသွားသည်ကိုလည်း တွေ့ရှိရသည်။ 

မန္တလေးမြို့ရှိ စည်ပင်သာယာရေးကော်မတီရုံးအပါအဝင် မော်တော်ယာဉ်ဌာနသည် စစ်ကောင်စီ၏ အုပ်ချုပ်ရေးမှူးရုံးများနည်းတူ လုံခြုံရေးအကာအရံ ထူထပ်သည့် နေရာများဖြစ်သည်။ 

အာဏာသိမ်းမှုဆန့်ကျင်သူများကို စစ်ကောင်စီက အကြမ်းဖက်ဖြိုခွင်းခဲ့သောကြောင့် ရာနှင့်ချီသော အရပ်သားပြည်သူများ သေဆုံးခဲ့ရပြီး နိုင်ငံတဝန်းတွင် ဒေသခံပြည်သူ့ကာကွယ်ရေးတပ်ဖွဲ့များ ဖွဲ့စည်းကာ စစ်ကောင်စီကို ခုခံတော်လှန်လျက်ရှိသည်။

မြို့ကြီးများနှင့် ဒေသအချို့တွင် စစ်ကောင်စီသတင်းပေးများနှင့် အုပ်ချုပ်ရေးမှူးများ လုပ်ကြံသတ်ဖြတ်ခံရမှုများပေါ်ပေါက်ခဲ့သည့်နည်းတူ စစ်ကောင်စီ၏ အုပ်ချုပ်ရေးယန္တရားအတွင်းရှိ အခြေခံအဆောက်အအုံများ ဗုံးခွဲတိုက်ခိုက်ခံရခြင်းများလည်း ရှိသည်။ myanmar now

မန္တလေးတိုင်းဒေသကြီး၊ ကျောက်ဆည်မြို့မှာရှိတဲ့ လျှပ်စစ်ရုံးကို ဇူလိုင် ၁၄ ညနေ ၃ နာရီမှာ  ဗုံးခွဲခဲ့တယ်လို့ ကျောက်ဆည်ခရိုင်ပြည်သူ့ကာကွယ်ရေးတပ်ဖွဲ့ KDDF ကကြေညာပါတယ်။

စစ်အာဏာသိမ်းပြီးနောက်  ပြည်သူတွေဟာ ကိုဗစ်-၁၉ ရောဂါနဲ့ပါ  စီးပွားရေးကျပ်တည်းနေချိန် ကျောက်ဆည်လျှပ်စစ်ရုံးEPC အဖွဲ့သားတွေက မီတာခတွေကို ဆက်ကြေးကောက်သလို ခြိမ်းခြောက်ကောက်ခံနေတာကြောင့်  ကျောက်ဆည်လျှပ်စစ်ရုံးကို ဗုံးခွဲအသိပေးလိုက်တာလို့ ဆိုပါတယ်။ 

“ရွာတွေက လူတွေကို ပိုဖိအားပေးပြီး လိုက်ကောက်နေတယ်။ ရွာကလူတွေက သူတို့တစ်အိမ်ထဲ မီးဖြတ်ခံရရင် အန်အယ်လ်ဒီအိမ်ဆိုပြီး  ဒုက္ခပေးခံရမှာကြောက်လို့ မရှိရှိတာ ချေးငှားပြီး ပေးနေရတယ်။ EPC ရုံးကို ပထမအကြိမ် သတိပေးစာထုတ်ပြန်ခဲ့ပြီးပြီး။ ဒါဟာ ဒုတိယအကြိမ် ဗုံးခွဲအသိပေးတာ။ ဆက်လုပ်နေ ဦးမယ်ဆိုရင် ပြည်သူ့ဆန္ဒအတိုင်း စီရင်သွားရမှာပဲ” လို့ KDDF ခေါင်းဆောင်တစ်ဦးက ပြောပါတယ်။ 

ကျောက်ဆည်မြို့ပေါ်က လူငယ်တစ်ဦးကလည်း ” မီတာခကို သုံးလေးလစာ ပေါင်းကောက်တယ်။ မီတာလာကောက်ရင်လည်း အနည်းဆုံး ၂ ယောက်လောက် အမြဲလာတယ်။ မပေးရင် တရားစွဲမယ်လို့ ပြောတယ်။ တချို့အိမ်တွေဆို လက်နက်နဲ့ပါ ခြိမ်းခြောက်တယ်။ ကျနော်တို့က မပေးနိုင်လို့ လာတာနဲ့ တံခါးစွဲပိတ်ပြီး နေရတယ်” လို့ ပြောပါတယ်။

ကျောက်ဆည်ဒေသကရွာသားတစ်ဦးကလည်း ” ကျနော်တို့ဆို မီတာခမပေးလို့မရဘူး။ အိမ်က မိသားစုတွေက ကိုဗစ်ဖြစ်နေလို့ အောက်ဆီဂျင်တပ်ထားရတာ။ သူတို့မီးဖြတ်သွားရင် အကုန်ဒုက္ခရောက်မှာ” လို့ ပြောပါတယ်။

ကိုဗစ်ပထမလှိုင်းနဲ့ ဒုတိယလှိုင်းကာလ ပြည်သူတွေ စားဝတ်နေရေး ကျပ်တည်းနေချိန် အခြေခံ လူတန်းစာတွေအတွက် စားနပ်ရိက္ခာနဲ့ ငွေကြေးတွေ ထောက်ပံ့ခဲ့သလို  မီတာခ အပါအဝင်  အခွန်အခတွေ လျော့ပေါ့ပေးတာ ၊ ကင်းလွတ်ခွင့်ပေးတာတွေ ပြုလုပ်ခဲ့ပါတယ်။

အခု စစ်တပ်အာဏာသိမ်းပြီးနောက်  ကိုဗစ် တတိယလှိုင်းနဲ့ ပြည်သူတွေ အကြီးအကျယ် ဒုက္ခအခက်အခဲနဲ့ ကြုံတွေ့နေရချိန်မှာ စစ်ကောင်စီက မီတာခနဲ့ အခွန်တွေ အတင်းအကျပ် လိုက်ကောက်ခံနေတာ ဖြစ်ပါတယ်။ DVB