SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မြန်မာနိုင်ငံတွင် ကိုဗစ်-၁၉ ရောဂါကူးစက်မှုနှင့် သေဆုံးမှုများ များပြားနေစဉ်ကာလအတွင်း အရေးပေါ် “ကိုဗစ် အပစ်ရပ်စဲမှု” အတွက် တွန်းအားပေးလုပ်ဆောင်ကြရန် မြန်မာနိုင်ငံ လူ့အခွင့်အရေး အခြေအနေဆိုင်ရာ ကုလသမဂ္ဂ အထူးကိုယ်စားလှယ် တွန် အန်ဒရူးစ်က ကုလလုံခြုံရေး ကောင်စီနှင့် အဖွဲ့ဝင်နိုင်ငံများကို ဇူလိုင် ၂၇ ရက်တွင် တိုက်တွန်းခဲ့သည်။

နိုင်ငံတွင် ကပ်ရောဂါ ကူးစက်ဖြစ်ပွားမှုနှင့် သေဆုံးမှုများ တိုးလာနေချိန်တွင်တောင်မှ အာဏာသိမ်းစစ်ကောင်စီသည် ကျန်းမာရေး စောင့် ရှောက်မှု အမှုထမ်းများကို တိုးမြှင့် တိုက်ခိုက်လျက် ‌ရှိစဉ် ကုလကျွမ်းကျင်သူက အထက်ပါအတိုင်း တိုက်တွန်းလိုက်ခြင်း ဖြစ်သည်။

နိုင်ငံကို ဆက်လက် မွှေနှောက်နေသည့် ကိုဗစ်-၁၉ ကပ်ရောဂါကို တိုက်ဖျက်ရန်အတွက် အ‌ရေးတကြီး လိုအပ်နေသည့် ကျန်းမာ‌ရေး စောင့်ရှောက်မှု ကျွမ်းကျင်အတတ်ပညာရှင်များအပေါ် တိုက်ခိုက်မှုများအပါအဝင် စစ်ကောင်စီ၏ တိုက်ခိုက်မှုမှန်သမျှ ချက်ချင်း ရပ်စဲစေရေး တောင်းဆိုမည့် ဆုံးဖြတ်ချက်များ အတည်ပြုခြင်း အပါအဝင် အဖွဲ့ဝင်နိုင်ငံများအနေဖြင့် လုပ်နိုင်သမျှ နည်းလမ်းအားလုံးကို အသုံးပြုသွားကြရန် လိုအပ်ကြောင်း ကုလ အထူးကိုယ်စားလှယ်က အလေးပေး ပြောကြားသွားခဲ့သည်။

“မြန်မာနိုင်ငံမှာ လူအများအပြားဟာ အကူအညီမဲ့ အချည်းနှီး သေဆုံးထားခဲ့ကြရပြီး ကုလ အဖွဲ့ကြီးရဲ့ အရေးတယူလုပ်ဆောင်မှု မရှိဘူးဆိုရင် နောက်ထပ် လူအများအပြား ထပ်မံ သေဆုံးရပါလိမ့်မယ်” ဟု အန်ဒရူးစ်က သတိပေးသွားခဲ့သည်။

“ဒါကြောင့်မို့ ကိုဗစ်-၁၉ အကျပ်အတည်းကြားမှာ အာဏာသိမ်းစစ်အုပ်စုရဲ့ တိုက်ခိုက်မှုတွေ၊ နှောင့်ယှက်ဒုက္ခပေးမှုတွေ၊ ဖမ်းဆီးထိန်းသိမ်းမှုတွေ ချက်ချင်း ရပ်တန့်စေရေးအတွက် ကုလအနေနဲ့ အရေးယူဆောင်ရွက်ရပါလိမ့်မယ်” ဟု ၎င်းက ပြောသွားခဲ့သည်။mizzima

မကွေးမြို့နယ်ထဲမှာ ဇူလိုင် ၂၇ ရက် မနက်ပိုင်းက ကျေးလက်မြေပရဟိတအဖွဲ့က ဦးဆောင်ပြီးတော့ စားဝတ်နေရေးအခက်ခဲဖြစ်နေတဲ့ ပြည်သူတွေကို အခြေခံစားသောက်ကုန်တွေ ထောက်ပံပေးခဲ့ပါတယ်။

မကွေးမြို့နယ် ကြာကန်ကျေးရွာက စားဝတ်နေရေး အခက်တွေ့နေတဲ့ ပြည်သူတွေကို ပြည်တွင်းပြည်ပ အလှူရှင်တွေနဲ့ချိတ်ဆက်ပြီးတော့ ဒီနေ့ မနက်ပိုင်းမှာ ဆန် ၄ ပြည် ၊ ဆီ ၅၀ သားနဲ့ ကြက်ဥ ၅ လုံးစီထောက်ပံ့ပေးခဲ့တာလို့ ကျေးလက်မြေပရဟိတအဖွဲ့ ဦးဆောင်သူ ကိုဇော်မင်းထိုက်က ပြောပါတယ်။

အဖွဲ့အနေနဲ့ မကွေးမြို့နယ်ထဲမှာသာမက မကွေးတိုင်းအတွင်းက အခက်ခဲကြုံတဲ့နေရာတွေကို အလှူရှင်တွေနဲ့ ချိတ်ဆက်ပြီးတော့ စစ်အာဏာသိမ်းပြီးကတည်းက အခြေခံစားသောက်ကုန်တွေနဲ့ ငွေကြေးတွေ ထောက်ပံ့ပေးခဲ့တာဖြစ်ပါတယ်။

ကျေးလက်မြေပရဟိတအဖွဲ့ဟာ မကွေးမြို့နယ်ထဲက နွေရာသီ သောက်သုံးရေ အရရှိရေးအတွက်လည်း အလှူရှင်တွေနဲ့ချိတ်ဆက်ပြီးတော့ ရေတွင်းတူဖော်ပေးတာတွေ ၊သောက်သုံးရေ လှူဒါန်းတာတွေကို စဥ်ဆက်မပြတ် လုပ်ဆောင်ပေးခဲ့တယ်လို့ သိရပါတယ်။DVB

သွင်းကုန် လိုင်စင်လျှောက်ထားတာ ယာယီဖြေလျှော့ပေးထားတဲ့ အောက်ဆီဂျင် အပါအဝင် ကိုဗစ်-၁၉ ရောဂါ ကာကွယ်ကုသထိန်းချုပ်ရေးဆိုင်ရာ  ဆေးဝါးနဲ့ ဆေးပစ္စည်းကိရိယာစာရင်းကို  စစ်ကောင်စီ စီးပွားကူးသန်းဝန်ကြီးဌာနက ဇူလိုင် ၂၆ ရက်မှာ  ထုတ်ပြန်ထားပါတယ်။

ကိုဗစ်-၁၉ ရောဂါ ကာကွယ်ကုသထိန်းချုပ်ရေးဆိုင်ရာ  ဆေးဝါးနဲ့ ဆေးပစ္စည်းကိရိယာတွေထဲက  သွင်းကုန်လိုင်စင် လျှောက်ထားဖို့လိုတဲ့ ကုန်စည်လိုင်းအားလုံးနဲ့ အောက်ဆီဂျင်အရည်တို့ကို ပြီးခဲ့တဲ့ ဇူလိုင် ၁၂ ရက်က စတင်ပြီး သွင်းကုန်လိုင်စင်လျှောက်ထားစရာမလိုပဲ (၃)  လ ယာယီ ဖြေလျှော့ပြီး တင်သွင်းခွင့်ပြုတာလို့ ဆိုပါတယ်။

ဖြေလျှော့ပေးတဲ့ သွင်းကုန်တွေထဲမှာ ကိုဗစ်-၁၉ ရောဂါကာကွယ်ရေးဆိုင်ရာ အားဖြင့်ဆေးဝါးတွေ၊ ဗီတာမင်နဲ့ ပရိုဗီတာမင်ဆေးဝါးတွေ၊ ကင်ဆာနဲ့ HIV ဆေးဝါးတွေ၊  ကျန်းမာရေးသုံး undenatured အီသိုင်းအယ်လ်ကိုဟော ၇၅ ရာခိုင်နှုန်း၊  အောက်ဆီဂျင်၊ ဟိုက်ဒရိုဂျင်နဲ့ တခြားရှားပါးဓာတ်ငွေ့၊ ဖော်မစ်အက်စစ် စတာတွေပါဝင်ပါတယ်။

လက်ရှိ မြန်မာနိုင်ငံမှာ တစ်ကျော့ပြန်ဖြစ်ပွားနေတဲ့ ကိုဗစ်တတိယလှိုင်းကြောင့် ရောဂါ ကူးစက်ပြန့် ပွားမှုနဲ့ လူသေဆုံးမှုနှုန်း အင်မတန် မြင့်တက်နေပြီ အောက်ဆီဂျင်အပါအဝင် ကိုဗစ်-၁၉ ရောဂါ ကာကွယ်ကုသ ထိန်းချုပ်ရေးဆိုင်ရာ ဆေးဝါးနဲ့ ဆေးပစ္စည်းကိရိယာတွေဟာလည်း ဝယ်ယူရခက်ခဲ့တဲ့အထိ ပြည်တွင်းမှာ လိုအပ်ချက် မြင့်တက်နေပါတယ်။

ဒါ့အပြင် ဝယ်လိုအားနဲ့ရောင်းလိုအား မမျှတတာကြောင့် စျေးနှုန်းတွေကလည်း တည်ငြိမ်မှုမရှိ အဆမတန်မြင့်တက်နေပါတယ်။

စစ်ကောင်စီရဲ့ကျန်းမာရေးဝန်ကြီးဌာနက ဇူလိုင် ၂၆ ရက် ထုတ်ပြန်တဲ့စာရင်းတွေအရ  မြန်မာနိုင်ငံမှာ ဒီနေ့အထိ ကိုဗစ်-၁၉ ဓာတ်ခွဲ အတည်ပြု လူနာ စုစုပေါင်း ၂၇၄, ၁၅၅ နဲ့ သေဆုံးသူ ၇,၅၀၇ ရှိတယ်လို့သိရပါတယ်။

ဒါပေမဲ့ ပရဟိတအဖွဲ့တွေနဲ့ လေ့လာစောင့်ကြည့်နေသူတွေကတော့ ဒီစာရင်းတွေဟာ မြေပြင် အမှန် တကယ် ရောဂါဖြစ်ပွားသေဆုံးသူတွေရဲ့ အခြေအနေတွေနဲ့ အဆမတန် ကွဲလွဲနေတယ်လို့ ထောက်ပြဝေဖန်ကြပါတယ်။DVB

စစ်ကိုင်းတိုင်း၊ ကလေးမြို့က ကိုဗစ်-၁၉ လူနာတွေအတွက် We Pledge CDM အဖွဲ့က အရေးပေါ် အောက်ဆီဂျင်စက် ၂ လုံး လှူဒါန်းခဲ့တယ်လို့ သိရပါတယ်။

 ဒီလှူဒါန်းမှုကိုတော့ အလှူရှင်တွေရဲ့ ဝိုင်းဝန်းလှူဒါန်းမှုတွေနဲ့ အောက်ဆီဂျင်အရေးပေါ် လိုအပ်‌နေတဲ့ ကလေးမြို့၊ တိုင်းရင်းဆေးရုံက Community COVID-19 Treatment Center ကို ဇူလိုင် ၂၄ ရက်နေ့က လှူဒါန်းနိုင်ခဲ့တာလို့ ဆိုပါတယ်။

ဒါ့အပြင် လိုအပ်တဲ့နေရာတွေ ဆက်လှူနိုင်ဖို့ စက်တွေ ထပ်မှာထားပြီး ရောက်တာနဲ့ ဆက်လှူသွားမှာဖြစ်ကာ စက်တင်မကပဲ အခြားလိုအပ်တဲ့ စက်နဲ့တွဲဖက်သုံးစွဲရတဲ့ ပစ္စည်းတွေကိုလည်း အဆင်ပြေပြေ လွယ်လွယ်ကူကူဖြစ်အောင် လှူပေးသွားမယ်လို့ ဆိုပါတယ်။

ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ မြန်မာနိုင်ငံမှာ လူနာတွေ အနေနဲ့ လိုအပ်ချက်ဖြစ်နေတဲ့ အောက်ဆီဂျင်မလုံလောက်မှုကြောင့် အသက်မဆုံးရှုံးသင့် ပဲ ဆုံးရှုံးရတာတွေ၊ စစ်ကောင်စီရဲ့ ဖိနှိပ်မှုတွေနဲ့ ပြည်သူတွေအပေါ် ကျန်းမာရေး စောင့် ရှောက်မှုတွေနဲ့ ပတ်သက်ပြီး တာဝန်ယူဖြေရှင်းမှု မရှိတဲ့ အခြေအနေတွေနဲ့အတူ ဆေးရုံ တွေမှာ ဆရာဝန်လုံလောက်မှု မရှိတာတွေကြောင့် လူနာတွေ တက်ရောက်ကုသနိုင်ဖို့ အခက်အခဲတွေလည်း ပိုမိုများပြားလာနေတာပါ။

မြန်မာနိုင်ငံမှာ တရက်တည်း ကိုဗစ်-၁၉ ရောဂါကူးစက်ခံရသူပေါင်း ၄,၀၀၀ ကျော်နဲ့ သေဆုံးသူ ၄၀၀ နီးပါးရှိခဲ့တယ်လို့ စစ်ကောင်စီ ကျန်းမာရေးနဲ့ အားကစားဝန်ကြီးဌာနက ဇူလိုင် ၂၆ ရက်ညမှာ ထုတ်ပြန်ပါတယ်။

နာရေး အကူအညီပေးနေတဲ့ ပရဟိတအဖွဲ့တွေရဲ့ အဆိုအရ ရန်ကုန်မြို့က  သု သာန် ၄ ခုမှာ  ဇူလိုင် ၂၆ ရက်နေ့အတွက် မီးသင်္ဂြိုဟ်ခဲ့တဲ့ ရုပ်အလောင်း ၄၅၀ ကျော်ရှိခဲ့တယ်လို့ ပြောပါတယ်။DVB