SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ရန်ကုန်မြို့ တာမွေကျားကွက်သစ်လမ်းတွင် ဇူလိုက် ၃၀ရက် ညနေပိုင်းက လူငယ်တွေစုပေါင်းပြုလုပ်တဲ့ သပိတ်စစ်ကြောင်းကို အကြမ်းဖက်စစ်ကောင်စီမှ အရပ်ဝတ်များဖြင့် ဖြိုခွင်းပြီးနောက် ဖမ်းဆီးခံရသူ လေးဦးအထိရှိသည်ဟု မျက်မြင်တွေ့ခဲ့ရသူများက ပြောသည်။

“ကျွန်တော်မြင်တာတော့ လေးဦးလောက်ရှိတယ်။ ကောင်လေးတွေကို ရိုက်နှက်ပြီး ခေါ်သွားတာ။ ကောင်လေး သုံးယောက်၊ ကောင်မလေးတစ်ယောက်ပါ”ဟု မြင်တွေ့ခဲ့သူတစ်ဦးက ဆိုသည်။

အဆိုပါဖြစ်စဉ်ကို မြင်တွေ့ခဲ့ရသူတစ်ဦးမှလည်း ” လူငယ်တွေကျားကွက်သစ်လမ်းတည့်တည့်လာတုန်း အရပ်ဝတ်နဲ့သေနတ်တိုနဲ့တစ်ယောက်က အကျီအဖြူနဲ့ကောင်လေးတယောက်ကို သူ့လက်နဲ့အတင်းဖမ်းထားပြီးသေနတ်ဖောက်လိုက်ပါတယ်။ ဘယ်သူထိသွားလဲတော့မသိပါဘူး။ ကျန်တယ့်လူတွေတော့ပြေးသွားပါတယ်။

ပြီးတော့အ့ဖမ်းမိတယ့်လူတွေကိုသတ်ပစ်ပစ်မယ်အော်ပြောနေတာ”ဟု ၎င်းမြင်တွေ့ခဲ့ရသည်ကို ပြန်လည်ပြောပြသည်။ဖြစ်စဉ်အစပိုင်းတွင် အရပ်ဝတ်ဖြင့် လက်နက်ကိုင် ၄ဦး ကိုမြင်ရပြီး ယူနီဖောင်းဝတ်ထားသည့် လူများလည်းချက်ချင်းရောက်လာသည်ဟု သိရသည်။ဖမ်းဆီးမှုများပြုလုပ်ပြီးနောက် အနီးအနားရှိ လူများကိုလည်း ဖုန်းများ ယူ၍ စစ်ဆေးခဲ့ကြသည်ဟု သိရသည်။mizzima

မန္တလေးတိုင်း၊ မြင်းခြံမြို့မှာ အောက်ဆီဂျင် လိုအပ်သူတွေကို  ဧရာဝတီသွေးလှူရှင်အသင်းက ဇူလိုင် ၃၀ ရက် ညနေက အေးမြသီတာစျေး အနောက်ဘက် သုဓမ္မာ ဘုန်းကြီးကျောင်းဝင်းအတွင်းမှာ လူတစ်ယောက် ၁၀ လီတာ၊ ၁၅ လီတာ အိုးတစ်လုံးကျ အခမဲ့ဖြည့်လှူဒါန်းနေတယ်လို့ သိရပါတယ်။

     အောက်ဆီဂျင်  ရသလောက်  အသင်းကနေ ပြန်လည်လှုဒါန်းပေးမှာဖြစ်ပြီး  ပြည်သူတွေ လိုအပ်ချက်ပြည့်မီစေဖို့ နေ့စဥ် ပေးဝေနိုင်ရေး ကြိုးစားနေတယ်လို့ အသင်းတာဝန်ရှိသူတစ်ဦးက ပြောပါတယ်။

   မြင်းခြံ ပြည်သူများ အောက်ဆီဂျင် အခက်အခဲ မရှိစေဖို့ ဒေသ ပရဟိတအသင်းတွေလည်း တက်စွမ်းသလောက်ကြိုးစားနေရာမှာ အဖြူရောင်လက်များအသင်းကလည်း လက်ရှိ အောက်ဆီဂျင် ရရှိရေး စွမ်းဆောင်ပေးနေသလို မကြာခင် အောက်ဆီဂျင် စက်ရုံ တည်ဆောက်နိုင်တော့မယ်လို့ သိရပါတယ်။DVB

မြန်မာနိုင်ငံ၏ ပြီးခဲ့သည့် အထွေထွေရွေးကောက်ပွဲရလဒ်များကို ပယ်ဖျက်ခဲ့မှုအတွက် အာဏာသိမ်းစစ်ခေါင်းဆောင်များကို ဂျပန်က ဇူလိုင် ၃၀ ရက်တွင် အပြင်းအထန် ဝေဖန်သွားခဲ့သည်။

“ဖြစ်ပေါ်ခဲ့တဲ့ အခြေအနေက ပိုလို့တောင် နှစ်သက်ဖွယ် မကောင်းခဲ့ပါဘူး၊ ဘာလို့လဲဆိုတော့ ဒီလုပ်ရပ်က ဂျပန်နိုင်ငံဘက်က တောင်းဆိုထားခဲ့တဲ့ မြန်မာမှာ ဒီမိုကရေစီလမ်းကြောင်းဆီ အမြန်ဆုံး ပြန်သွားရေးကို အကောင်အထည်ဖော်မှုနဲ့ လုံးလုံးလျားလျား ဆန့်ကျင်နေပါတယ်” ဟု ဂျပန် နိုင်ငံခြားရေးဝန်ကြီး တိုရှီမစ်ဆု မိုတဲဂီက တိုကျိုတွင် ပြုလုပ်သည့် သတင်းစာရှင်းလင်းပွဲတစ်ခုတွင် ပြောခဲ့ကြောင်း Kyodo News က ဖော်ပြခဲ့သည်။

ပြီးခဲ့သည့် နိုဝင်ဘာလက ကျင်းပခဲ့သည့် အထွေထွေရွေးကောက်ပွဲတွင် အမျိုးသားဒီမိုကရေစီအဖွဲ့ချုပ် (NLD) ပါတီက အပြတ်အသတ် အနိုင်ရရှိခဲ့သော်လည်း ယင်းနောက် စစ်တပ်က အာဏာသိမ်းကာ ဖြိုခွင်းနှိမ်နင်းမှုများကို လုပ်ဆောင်ထားခဲ့သည်။

ဇူလိုင် ၂၆ ရက်က မြန်မာအာဏာသိမ်းစစ်ကောင်စီခန့် ရွေးကောက်ပွဲ ကော်မရှင်က ပြီးခဲ့သည့် ရွေးကောက်ပွဲ ရလဒ်များကို ပယ်ဖျက်ကြောင်းနှင့် ထိုရွေးကောက်ပွဲတွင် မဲစာရင်းမှားယွင်းမှုနှင့် မဲမသမာမှုများ ရှိခဲ့ကြောင်း ပြောဆိုခဲ့သည်။

သို့သော် ဂျပန်နိုင်ငံခြား‌ရေးဝန်ကြီးက “ ပြီးခဲ့တဲ့ မြန်မာရွေးကောက်ပွဲဟာ ပြည်တွင်းနဲ့ နိုင်ငံတကာ ‌ရွေးကောက်ပွဲ လေ့လာစောင့်ကြည့်သူတွေရဲ့ စောင့်ကြည့်မှုနဲ့အတူ လွတ်လပ်မျှတတဲ့ နည်းလမ်းအောက်မှာ လုပ်ခဲ့တာဖြစ်ပါတယ်” ဟု ပြောခဲ့သည်။

“အရှေ့တောင်အာရှ နိုင်ငံမှာ မတူညီတဲ့ နိုင်ငံရေး အမြင်သဘောထားတွေ ရှိသူတွေအကြား ညှိနှိုင်းဆွေးနွေးမှုတွေကို အားပေးဖို့ အရေးကြီးတယ်လို့ ကျွန်တော် ထင်ပါတယ်” ဟု မိုတဲဂီက ပြောသွားခဲ့သည်။

မြန်မာနိုင်ငံတွင် စစ်တပ် အာဏာသိမ်းမှုအပေါ် နိုင်ငံတကာက ပြစ်တင်ရှုတ်ချမှုများ လုပ်ဆောင်ထားခဲ့သလို ဂျပန်ကလည်း မြန်မာအတွက် တရားဝင် ဖွံ့ဖြိုး‌ရေးအကူအညီသစ် ပေးအပ်မှုကို ရပ်ဆိုင်ထားခဲ့သည်။

ဂျပန်အနေဖြင့် လာမည့် သြဂုတ် ၆ ရက်တွင် မြန်မာအပါအဝင် မဲခေါင်မြစ်တစ်လျှောက်ရှိ အရှေ့တောင်အာရှ ငါးနိုင်ငံနှင့်အကြား နိုင်ငံခြားရေးဝန်ကြီးများအဆင့် အစည်းအ‌ဝေးတစ်ခုကို ကျင်းပသွားရန် ရှိနေသည်။

“အဲဒီအစည်းအဝေးကျရင် ကိုရိုနာဗိုင်းရပ်စ် တုံ့ပြန်‌ရေးကိစ္စအပြင် မြန်မာနိုင်ငံက အခြေအနေတွေ ကိစ္စ၊ တောင်တရုတ်ပင်လယ်အ‌ရေး၊ မြောက်ကိုရီးယား အရေးတို့လိုမျိုး ဒေသတွင်း ကိစ္စရပ်တွေနဲ့ပတ်သက်လို့ ဂျပန်နိုင်ငံရဲ့ သဘောထားကို ထုတ်ဖော်သွားပါမယ်” ဟု မိုတဲဂီက ပြောခဲ့သည်။mizzima

မြန်မာနိုင်ငံမှာ မတရားစစ်အာဏာသိမ်းကာလ ၆ လကြာမြင့်လာချိန်မှာ နိုင်ငံတဝန်း ကိုဗစ်-၁၉ ကူးစက်မှုနဲ့အတူ  ကလေးသူငယ်တွေရဲ့ ပညာရေး၊ ကျန်းမာရေး စောင့်ရှောက်ပေးနိုင်မှု အခြေအနေတွေဟာ ပိုမိုဆိုးဝါးလာနေတယ်လို့ Save the Children အဖွဲ့က သတိပေးထားပါတယ်။

       မြန်မာနိုင်ငံမှာ ကိုဗစ်-၁၉ ရောဂါကူးစက်ခံရမှုနဲ့ သေဆုံးတဲ့ ကိန်းဂဏန်းအချက် အလက်တွေကို တိတိကျကျ မသိရသေးပဲနဲ့တောင် အကြမ်းဖက်စစ်ကောင်စီရဲ့ နေ့စဉ် ထုတ်ပြန်ချက်တွေအရ  ပိုးတွေ့နှုန်းဟာ ၃၇ ရာခိုင်နှုန်းကျော်နဲ့ ကမ္ဘာနိုင်ငံတွေထဲ အမြင့် ဆုံးအခြေအနေမှာ ရှိနေခဲ့တာ ဖြစ်တယ်လို့ ဆိုပါတယ်။

ဒါ့အပြင် ကလေးသူငယ်တွေများစွာရဲ့ အုပ်ထိန်းသူတွေလည်း ကိုဗစ်-၁၉  ရောဂါ ကူးစက်ခံရပြီး သေဆုံးမှုတွေကြောင့် ဆုံးရှုံးနေကြရတယ်လို့ ဆိုပါတယ်။

ကမ္ဘာတဝန်းမှာတော့ ကလေးသူငယ်ဦးရေ ၁ သန်းကျော်ဟာ ကိုဗစ်-၁၉ ရောဂါကြောင့် မိဘတဉီး ဆုံးရှုံးခဲ့ရပြီး စုစုပေါင်းဦးရေ ၁ သန်းခွဲကတော့ မိဘတဦး၊ ဒါမှမဟုတ် သူတို့ကို ပြုစုစောင့်ရှောက်တဲ့ အဘိုးအဘွားတဦး၊ ဆွေမျိုးသားချင်းတဦး ဆုံးရှုံးခဲ့ကြရတယ်လို့ ဒီလထဲမှာ ထုတ်ဝေတဲ့ The Lancet ဆေးပညာဂျာနယ်မှာ ဖော်ပြပါတယ်။

မြန်မာနိုင်ငံမှာတော့ ပြီးခဲ့တဲ့ ဖေဖော်ဝါရီ ၁ ရက် စစ်အာဏာသိမ်းမှုနောက်ပိုင်း ကျန်းမာရေးစနစ်ဟာ သိသိသာသာ ပြိုလဲသွားခဲ့ပြီဖြစ်ကာ နိုင်ငံတွင်း အကြမ်းဖက်မှုတွေ၊ ဆင်းရဲမွဲတေမှုနဲ့ ရောဂါတွေကြောင့် ကာကွယ်ဆေးတွေလည်း ကျယ်ကျယ်ပြန့်ပြန့် မရရှိနိုင်သေးပါဘူး။

မိသားစုဝင်တိုင်းဟာ ကိုဗစ်-၁၉ ကူးစက်ခံရမှုကြောင့် ခွဲခွာကြရတာ၊ ဆေးဝါးကုသမှု၊ အရေးပေါ် အောက်ဆီဂျင်နဲ့ တခြားသော ဆေးဘက်ဆိုင်ရာ ထောက်ပံ့ကူညီမှုတွေ ရရှိနိုင်ဖို့ ရုန်းကန်နေကြရပြီး ဈေးကွက်ထဲမှာလည်း မထိန်းချုပ်နိုင်တဲ့ထိ ဆေးဝါးဈေးနှုန်းတွေ ထိုးတက်နေတာ ဖြစ်ပါတယ်။

ဒါ့အပြင် ကုလသမဂ္ဂရဲ့ ထုတ်ပြန်ချက်အရ မြန်မာနိုင်ငံမှာ စစ်အာဏာသိမ်းပြီးချိန် ကတည်းက ကလေးသူငယ် ၇၅ ယောက် သတ်ဖြတ်ခံခဲ့ရပြီး အမှန်တကယ်တမ်းမှာ ဒီပမာဏထက်လည်း ပိုနေနိုင်တယ်လို့ ဆိုပါတယ်။

သေဆုံးခဲ့တဲ့ ကလေးသူငယ်တွေရဲ့ သုံးပုံတပုံကတော့ အသက် ၁၆ နှစ်အောက် အရွယ်တွေဖြစ်ကြပြီး အငယ်ဆုံးကတော့ အသက် ၁၈ လ အရွယ် မိန်းကလေးငယ်ဖြစ်တယ် လို့ ဆိုပါတယ်။

       လတ်တလောမှာတော့ ကိုဗစ်-၁၉ ကူးစက်ပျံ့နှံ့မှုတွေ ရှိနေတယ်လို့ သတင်းတွေ ထွက်နေတဲ့ ရန်ကုန်အင်းစိန်အကျဉ်းထောင်ထဲမှာ ဖမ်းဆီးထိန်းသိမ်းခံထားရတဲ့ ကလေးသူငယ်ဦးရေ အနည်းဆုံး ၁၀၄ ယောက် ရှိနေတယ်လို့ ဆိုပါတယ်။

ဒါ့အပြင် နိုင်ငံရဲ့ စီးပွားရေးအခြေအနေတွေဟာလည်း ပိုမိုဆိုးဝါးလာနေပြီး ကမ္ဘာ့ဘဏ်ကတော့ အခုနှစ်ထဲမှာ မြန်မာပြည်တွင်း အသားတင်ထုတ်လုပ်မှု ပမာဏ ဂျီဒီပီဟာ ၁၈ ရာခိုင်နှုန်းထိ ကျဆင်းလာနိုင်ကြောင်း ခန့်မှန်းထားပြီး အပြည်ပြည်ဆိုင်ရာ အလုပ် သမားအဖွဲ့(အိုင်အယ်လ်အို)ကတော့ အခုနှစ်စကတည်းက လူဦးရေ ၂ ဒသမ ၂ သန်းဟာ အလုပ်လက်မဲ့တွေ ဖြစ်ခဲ့ကြရတယ်လို့ ဆိုပါတယ်။DVB