SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ဝါရင့်လူရွှင်တော်ကြီးလည်းဖြစ် ရုပ်ရှင်သရုပ်ဆောင်တစ်ယောက်လည်းဖြစ်တဲ့ ဦးမေတ္တာဟာ ဒီကနေ့ ဩဂုတ် ၂ ရက်နေ့မှာ ကွယ်လွန်သွားပြီဖြစ်ကြောင်း မိသားစုဝင်တွေကပြောပါတယ်။

ဦးမေတ္တာရဲ့ သားဖြစ်သူ မေတ္တာမြင့်မြတ်ဟိန်း က “ကျနော့်အဖေ နေ့လည် ၁၂နာရီမှာ ဆုံးသွားပါတယ်ခင်ဗျာ” လို့ သူ့ရဲ့ Facebook မှာ ရေးသားခဲ့ပါတယ်။အလားတူ ရုပ်ရှင်သရုပ်ဆောင်တချို့နဲ့ ခင်မင်ရင်းနှီးသူတွေကလည်း ဦးမေတ္တာကွယ်လွန်တာနဲ့ပက်သက်လို့ လူမှုကွန်ယက်ပေါ်မှာ “ဝမ်းနည်းကြောင်း” ရေးသား နေကြပါတယ်။

ဘာရောဂါနဲ့ကွယ်လွန်ခဲ့တယ်ဆိုတာတွေနဲ့ တခြားအခြေအနေတွေကိုတော့ မသိရသေးပါဘူး။မေတ္တာဟာ ၁၉၅၄ခုနှစ် နိုဝင်ဘာလ ၈ ရက်မှာ ရန်ကုန်မြို့၌ မွေးဖွားသူဖြစ်ပြီး သေဆုံးချိန်တွင် အသက် (၆၇)နှစ်ဖြစ်ကာ သူရဲ့နာမည်အရင်းက ဦးခင်မောင်မြင့်ပါ။

လူရွှင်တော်၊ ဟာသ သရုပ်ဆောင် မေတ္တာဟာ အငြိမ့်၊ ပြဇာတ်တွေမှာ လူရွှင်တော်အဖြစ် ပါဝင်ဖျော်ဖြေခဲ့ပြီး ပြဇာတ်အတွက် ဇာတ်ညွှန်းတွေလည်း ရေးဖွဲ့ခဲ့သူ တယောက်ပါ။ ရုပ်ရှင်ဇာတ်လမ်းပေါင်းများစွာမှာ ပါဝင်သရုပ်ဆောင်ခဲ့ပြီး ယနေ့ထိတိုင် ပရိတ်တွေရဲ့ ချစ်ခင် အားပေးမှုကို ရရှိခဲ့သူလည်း ဖြစ်ပါတယ်။mizzima

ရခိုင်ပြည်နယ်တွင်းက အမှုအခင်းတွေကိုတိုင်ကြားနိုင်ကြောင်း ULA/AA က ဩဂုတ် ၁ ရက်မှာ ထုတ်ပြန်ကြေညာပါတယ်။မတရားခံရမှု၊ အကြမ်းဖက်မှု၊ ခိုးမှု၊ မြေယာပြဿနာ အစရှိတဲ့အမှုအခင်းတွေအပြင် တရားဉပဒေအဆုံးအဖြတ်ခံယူရမယ့် အမှုအခင်းတွေအားလုံးကို ရခိုင်အမျိုးသားအဖွဲ့ချုပ်၊ တရားရေးဌာနကိုတိုင်ကြားနိုင်တယ်လို့ ကြေညာလိုက်တာပါ။

တိုင်ကြားနိုင်တဲ့ email, telegram, vk အကောင့်တွေကိုလည်းဖော်ပြထားပြီး တိုင်တန်းသူဟာ အမည်၊ မှတ်ပုံတင်၊ နေရပ်လိပ်စာအပြည့်အစုံနဲ့ ဖုန်းနံပတ်ကိုလည်း အတိအကျဖော်ပြရမယ်လို့ ဆိုပါတယ်။

ထို့အပြင် အခင်းဖြစ်တဲ့ နေရာ၊ အချိန်၊ နေ့ရက်နဲ့ အဖြစ်အပျက်တိကျစွာဖော်ပြထားတဲ့ တိုင်ကြားစာကို ကျူးလွန်ခံရသူဖြစ်စေ၊ ဆွေမျိုး၊ မိသားစုဝင်တစ်ဦးကဖြစ်စေ၊ မျက်မြင်သက်သေကဖြစ်စေ တိုင်ကြားနိုင်ကြောင်း ULA/AA ကဆိုပါတယ်။

တိုင်ကြားမှု၊ စုံစမ်းစစ်ဆေးမှု အရေးယူဆောင်ရွက်မှု ဖြစ်စဉ်ပြီးမြောက်သည်အထိ တိုင်တန်းသူရဲ့ ကိုယ်ရေးအချက်အလက်တွေကို မည်သူတစ်ဦး တစ်ယောက်မျှမသိအောင် ထိန်းသိမ်းကာကွယ်ပေးမယ်လို့လည်း ထုတ်ပြန်ပါတယ်။

ရခိုင်အမျိုးသားအဖွဲ့ချုပ် (ULA/AA) အနေနဲ့ ထုတ်ပြန်ချက်မတိုင်ခင်ကတည်းက တချို့ကျေးရွာတွေမှာ မှုခင်းတိုင်ကြားချက်တွေရရှိဖူးသလို ဖြေရှင်းပေးခဲ့တာမျိုးလည်းရှိတယ်လို့ ဒေသတွင်းသတင်းအရင်းအမြစ်တွေကပြောပါတယ်။mizzima

ထိုင်းနိုင်ငံ ဘန်ကောက်မြို့  မြန်မာရွှေ့ပြောင်းလုပ်သား အသက် ၂၀ အရွယ် နန်းဒေါဝ်ဟာ ပြီးခဲ့တဲ့ ဇူလိုင်လ ၁ ရက်နေ့က ထွက်ရှိသွားတဲ့ ထိုင်းထီ ပထမဆုပေါက်ဂဏန်း ၇၁၃၅၁၇  တစ်စောင်ပေါက်ခဲ့ပြီး ဆုငွေ ဘတ် ၆ သန်းရရမှာဖြစ်ပေမယ့် ၁ သန်းပဲ ရခဲ့တယ်လို့ Amarin  ထိုင်း တီဗွီသတင်းမှာ ဖော်ပြပါတယ်။

သူမနဲ့ လုပ်ဖော်ကိုင်ဘက် ၁၆ ဦးဟာ ပြီးခဲ့တဲ့ ဇွန်လ နောက်ဆုံးပတ်က အလုပ်ရှင်ရဲ့ မွေးနေ့ပွဲကိုသွားခဲ့ကြောင်း၊ အဲဒီနေ့မှာ အလုပ်ရှင်က သူတို့ကို သင်္ဘောသီးထောင်းကျွေးတဲ့အပြင် ထီလက်မှတ် ၁ စောင်စီပါ လက်ဆောင်ပေးခဲ့ပြီး ပေါက်ရင်တစ်ဝက်စီနော်လို့ ပြောခဲ့တယ်လို့  ထီ ပေါက် သူက သတင်းထောက်ကို ပြောပြပါတယ်။

ဇူလိုင် ၁ ရက်နေ့ ထီပေါက်စဉ်ထွက်တော့ နန်းဒေါဝ်ရတဲ့ လက်မှတ်က ပထမဆုပေါက်လို့ အားလုံးဝမ်းသာနေကြကြောင်း၊ အလုပ်ရှင်သိသွားတဲ့အခါ ကတိအတိုင်းတစ်ဝက်စီပေးရမယ်လို့ ပြောတဲ့အပြင် အခွန်ဆောင်ခ ဘတ် ၆ သိန်း ၊ ကျန်လုပ်ဖော်ကိုင်ဘက် ၁၆  ဦးကို ၁ ဦးလျှင် ၅ သောင်းစီနဲ့ ထီစာချုပ်လု ပ်ပေးသူအတွက် အတွက် ၂ သိန်းပေးရမယ်လို့ ဆိုပါတယ်။ 

သူမကလည်း သဘောတူခဲ့ကြောင်း၊ အဆိုပါ ကတိကဝတ်အရ သူမရရှိရမယ့်ငွေဟာ ၂ သန်း ၂ သိန်းဖြစ်ပေမယ့် ဇူလိုင်လ ၄ ရက်နေ့မှာ အလုပ်ရှင်က ဘတ် ၁ သန်းသာပေးပြီး ကျန်ငွေတွေကို ဘဏ်ကနေ တလ ၅သောင်း စီလွှဲပေးမယ်လို့ ပြောခဲ့ပါတယ်။

အဲဒီနောက် အလုပ်ရှင်ရဲ့ အပြုအမူသဘောထားပြောင်းလဲလာပြီး သူမနဲ့  အတူနေရည်းစား ကိုလည်း အလုပ်ကိုမတရားခိုင်းစေခဲ့ကြောင်း၊ မခံနိုင်တဲ့အဆုံး နှစ်ယောက်လုံး အလုပ်ထွက်ခဲ့ တယ်လို့ ဆိုပါတယ်။

အလုပ်ထွက်ပြီး ဇူလိုင်လ ၂၉ ရက်နေ့မှာတော့ ထူးထူးခြားခြား သူတို့နေတဲ့တိုက်ခန်းဘက်ကို ရဲတွေရောက်လာပြီး အလုပ်သမားကတ်တွေ စစ်ခဲ့ကြောင်း၊ သူမရည်းစားမှာ အလုပ်သမားကတ် သက်တမ်းကုန်နေလို့ အဖမ်းခံရပြီး ရဲက တစုံတယောက်စီ ဗွီဒီယိုကောလ်ခေါ်ကာ ဒီတယောက်ဟုတ်တယ်နော်လို့ မေးခဲ့တယ်လို့ ဆိုပါတယ်။ 

သူတို့နေတဲ့တိုက်ခန်းမှာ ယခင်က အစစ်အဆေးမရှိခဲ့ကြောင်း၊ အလုပ်ရှင်နဲ့ ပြဿနာဖြစ်ပြီးမှ ခုလိုအဖမ်းခံရတာဖြစ်လို့ အလုပ်ရှင်ကတိုင်ကြားတယ်လို့ သံသယရှိကြောင်း၊  ရည်းစားမှာ လက်ရှိ မိင်းဘူရီတရားရုံးအချုပ်ခန်းမှာ အဖမ်းခံထားရပြီး အမှုရင်ဆိုင်ဖို့ အလုပ်ရှင်ထံ ကျန်တဲ့ ငွေပေးဖို့ တောင်းခဲ့ပေမယ့် မရဘူးလို့ ဆိုပါတယ်။

ဒီကိစ္စနဲ့ ပတ်သက်ပြီး Amarin သတင်းဌာနက အလုပ်ရှင်ကို သွားမေးရာမှာ အလုပ်သမားထီပေါက်တဲ့ကိစ္စမဟုတ်မှန်ကြောင်း ငြင်းဆိုပြီး အဆိုပါအလုပ်သမား ၂ ယောက်မှာ နေ့စားငှါးရမ်းခြင်းသာဖြစ်တဲ့အတွက် သူတို့ကိစ္စတာဝန်မယူနိုင်ဘူးလို့ ဆိုပါတယ်။  သတင်းထောက်ကိုလည်း နယ်မြေကျူးကျော်မှုနဲ့ အမှုဖွင့်မယ်လို့ ခြိမ်းခြောက်ခဲ့တယ်လို့ ဆိုပါ တယ်။

သတင်းဌာနက သူတို့စားသောက်ခဲ့တဲ့ သင်္ဘောသီးထောင်းဆိုင်ကို သွားမေးရာမှာတော့ ဇွန်လ ၂၆ ရက်နေ့က အလုပ်ရှင်နဲ့ အလုပ်သမားတစ်စု လာစားသောက်ပြီး ထီရောင်းသမား ရောက်လာလို့ အလုပ်ရှင်က သူတို့ကိုတစ်စောင်စီဝယ်ပေးခဲ့ကြောင်း ပြောပါတယ်။

သတင်းဌာနက ထိုင်းရှေ့နေ နိသီထွဏ်းဆိုသူကို မေးမြန်းရာမှာ ရွှေ့ပြောင်းအလုပ်သမားဟာ အထောက်အထားမရှိသော်လည်း ထီပေါက်ပါက ဆုငွေရပိုင်ခွင့်ရှိကြောင်း၊  အထောက် အ ထားမရှိတဲ့အမှုက နောက်ထပ်သပ်သပ်ရင်ဆိုင်ရမှာလို့ ဆိုပါတယ်။  အခုအမှုမှာ အလုပ်သမား ဘက်က မကျေနပ်လို့ တိုင်ချက်ဖွင့်ပါက အလုပ်ရှင်ဟာ လိမ်လည်မှုနဲ့ရော တရားမဝင်အလုပ်သမား ငှါးရမ်းမှုနဲ့ပါ အရေးယူခံရနိုင်တယ်လို့ ပြောသွားပါတယ်။DVB

စစ်ကိုင်းတိုင်းဒေသကြီး ယင်းမာပင်ခရိုင်အတွင်း စစ်ကောင်စီတပ်ဖွဲ့ဝင်တွေရဲ့ တိုက်ခိုက်မှုကြောင့် တောတောင်တွေထဲ ထွက်ပြေးခိုလှုံနေကြရတဲ့ ကနီမြို့နယ် စစ်ဘေးရှောင်တွေအတွက် လိုအပ်တဲ့အကူအညီတွေ ပေးအပ်နိုင်ရေး ကြိုးပမ်းဆောင်ရွက်နေတယ်လို့ စစ်ကိုင်းတိုင်းဒေသကြီးလွှတ်တော်ဥက္ကဋ္ဌ ဦးမြင့်ထွေးက ပြောပါတယ်။

ဒီနေ့ဩဂုတ်လ ၂ ရက်နေ့ မနက်ပိုင်းက ကျင်းပပြုလုပ်တဲ့ စစ်ကိုင်းတိုင်းဒေသကြီးလွှတ်တော် ဒုတိယပုံမှန်အစည်းအဝေး ကျင်းပပြီးနောက် တိုင်းဒေသကြီးလွှတ်တော်ဥက္ကဋ္ဌ ဦးမြင့်ထွေးက ထည့်သွင်းပြောကြားခဲ့တာ ဖြစ်ပါတယ်။“ဒီအလှူရှင်တွေအားလုံးနဲ့ လျှို့ဝှက်စွာ ချိတ်ဆက်ဆောင်ရွက်ပြီးတော့ ကနီပြည်သူတွေကို လှူဒါန်းနိုင်ဖို့အတွက် တဆင့်ဆောင်ရွက်နေတာ ရှိနေပါပြီ” လို့ စစ်ကိုင်းဒေသကြီး လွှတ်တော်ဥက္ကဋ္ဌ ဦးမြင့်ထွေးက ပြောပါတယ်။

စစ်ကိုင်းဒေသကြီး ယင်းမာပင်ခရိုင် ကနီဒေသဟာလည်း စစ်အာဏာရှင် တိုက်ထုတ်ရေးမှာ တက်တက်ကြွကြွ ပါဝင်ခဲ့တဲ့ ဒေသတစ်ခုဖြစ်သလို စစ်ကောင်စီတပ်ဖွဲ့ဝင်တွေရဲ့ သတ်ဖြတ်မှုကြောင့် ဒေသခံပြည်သူတွေ အစုလိုက် အပြုံလိုက် သတ်ဖြတ်ခံခဲ့ရတဲ့ အခြေအနေလည်း ဖြစ်ပါတယ်။

ကနီမြို့နယ်အတွင်းမှာ စစ်ကောင်စီတပ်ဖွဲ့ဝင်တွေရဲ့ တိုက်ခိုက်မှုကြောင့် ကျေးရွာပေါင်း ၃၇ ရွာက သောင်းနဲ့ချီတဲ့ ဒေသခံပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေရပြီး မိုးရာသီကာလည်းဖြစ်တဲ့အတွက် အမိုးအကာ၊ ဆေးဝါးနဲ့ စားရိက္ခာတွေလည်း အရေးပေါ်လိုအပ်နေတယ်လို့ ဒေသခံလွှတ်တော်အမတ်တွေက ပြောပါတယ်။

လက်ရှိမှာတော့ စစ်ဘေးရှောင်တွေအတွက် ဧပြီလထဲမှာတစ်ကြိမ်နဲ့ ဇွန်လအတွင်းမှာ တစ်ကြိမ် NUG အစိုးရက ပမာဏအနည်းငယ် ကူညီထောက်ပံ့မှုတွေ လုပ်ဆောင်ခဲ့တယ်လို့ ယင်းမာပင်မြို့နယ် လွှတ်တော်ကိုယ်စားလှယ် ဒေါ်ခင်နှင်းရီက ပြောပါတယ်။

ဒီနေ့ကျင်းပတဲ့ စစ်ကိုင်းတိုင်းဒေသကြီးလွှတ်တော်မှာ နွေဦးတော်လှန်ရေးကာလ စစ်ကောင်စီရဲ့ အကြမ်းဖက်မှုကြောင့် ကျဆုံးခဲ့ရတဲ့ ပြည်သူတွေအတွက် ဝမ်းနည်းဂုဏ်ပြုကြောင်း အဆိုကို ယင်းမာပင်မြို့နယ် လွှတ်တော်ကိုယ်စားလှယ် ဒေါ်ခင်နှင်းရီ က တင်သွင်းခဲ့ပြီး လွှတ်တော်ကိုယ်စားလှယ် ခြောက်ဦးက ထောက်ခံဆွေးနွေးခဲ့ကာကန့်ကွက်သူမရှိတဲ့အတွက် အဆိုကို မှတ်တမ်းတင်ကြောင်း တိုင်းလွှတ်တော်က ကြေညာခဲ့ပါတယ်။mizzima

မြန်မာနိုင်ငံဆိုင်ရာ အာဆီယံရဲ့ အထူးကိုယ်စားလှယ်အဖြစ်ထားရှိဖို့ မူလအဆိုပြုထားတဲ့ ၃ ဦးအနက် ထိုင်းနိုင်ငံ ဒုနိုင်ငံခြားရေးဝန်ကြီးဟောင်း ဝိရဆာကစ်ဒီဖူထရာကူလ်ကို  သဘောတူထားပြီးဖြစ်ဟာ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြောပါတယ်။ 

စစ်တပ်က နိုင်ငံတော်အာဏာကို တရားသိမ်းယူခဲ့တဲ့ ၆  လပြည့် အထိမ်းအမှတ် အာဏာသိမ်း စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ဩဂုတ် ၁ ရက် မနက်က နိုင်ငံပိုင် ရုပ်သံလိုင်းတွေကနေ  ထုတ်လွှင့်ပြောကြားခဲ့တဲ့မိန့်ခွန်းမှာ ပြောသွားတာပါ။ 

“အာဆီယံရဲ့ အထူးကိုယ်စားလှယ်အဖြစ်ထားရှိဖို့ မူလအဆိုပြုထားတဲ့ ၃ ဦးအနက် ထိုင်းနိုင်ငံ ဒုနိုင်ငံခြားရေးဝန်ကြီးဟောင်း ဝီရဆဒ်ဖွတ်တကွန်းလ်ကို  သဘောတူထားပြီးသားပါ။ သို့သော် အကြောင်းအမျိုးမျိုးနဲ့ အဆိုပြုမှုအသစ်တွေ ထပ်တိုးလာခဲ့လို့ ရှေ့မတိုးနိုင်ဘူးဖြစ်နေတာပါ။”လို့ စစ်ခေါင်းဆောင်က ပြောပါတယ်။

အာဆီယံအထူးကိုယ်စားလှယ် မြန်မာနိုင်ငံလာရောက်ပြီး တွေ့ဆုံဆွေးနွေးရေး အပါအဝင် အာဆီယံနဲ့ ပူးပေါင်းဆောင်ရွက်ရေးကို အာဆီယံ မူဘောင်အတွင်းက ဆောင်ရွက်ဖို့ အသင့်ရှိကြောင်းလည်း ဗိုလ်ချုပ်မှူးကြီးမင်းအောင်လှိုင်က ပြောပါတယ်။ 

မြန်မာနိုင်ငံဆိုင်ရာ အာဆီယံ အထူးကိုယ်စားလှယ်အဖြစ် အမည်စာရင်းထွက်နေသူ  ၄ ဦးကတော့  ဘရူနိုင်းနိုင်ငံရဲ့ ဒုနိုင်ငံခြားရေးဝန်ကြီး အာဝန်ယူဆော့်က၊ ထိုင်းဒုနိုင်ငံခြားရေးဝန်ကြီးဟောင်း ဝီရဆဒ်ဖွတ်တကွန်းလ်၊ အင်ဒိုနီးရှားနိုင်ငံခြားရေးဝန်ကြီးဟောင်း ဟတ်ဆန်ဝီရဂျူဒီနဲ့ မလေးရှား ဝါရင့် သံတမန်ဟောင်း ရာဇာလီအစ္စမေးလ်တို့ ဖြစ်ပါတယ်။ 

ဒီအထဲက အာဆီယံအထူးကိုယ်စားလှယ် ၁ ဦးကို နောက်ဆုံးအတည်ပြုရွေးချယ်ဖို့ အာဆီယံ နိုင်ငံခြားရေးဝန်ကြီးတွေ ဒီကနေ့ အပြီးသတ်  ဆွေးနွေးဖို့ ဆုံးဖြတ်ချက်ချမယ်လို့  အာဆီယံအလှည့်ကျဘရူနိုင်ငံရဲ့ ဒုနိုင်ငံခြားရေး ဝန်ကြီး အာဝန်ယူဆော့်က ပြောပါတယ်။  မြန်မာနိုင်ငံရဲ့ အခြေအနေနဲ့ ပတ်သက်ပြီး ဦးစီးဦးဆောင် လုပ်ကိုင်ဆောင်ရွက်ဖို့ အထူးကိုယ်စားလှယ်မရှိဘဲ  အလွန်ခက်ခဲလိမ့်မယ်လို့လည်း ပြောပါတယ်။

အာဝန်ဟာ အထူးကိုယ်စားလှယ်ဖြစ်ဖို့ အားသာနေတယ်လို့ နိုင်ငံခြားသံတမန် အရင်းအမြစ် ၄ ခုက ပြောပေမဲ့  ပြီးခဲ့တဲ့ ကြာသပတေးနေ့က  အာဆီယံအကြီးတန်းအရာရှိတွေရဲ့ အစည်းအဝေးမှာတော့ သဘောတူညီချက်မရခဲ့ဘူးလို့ ဘန်ကောက်ပို့စ်သတင်းမှာ ရေးပါတယ်။  ဒီကိစ္စ မြန်မာစစ်အစိုးရရဲ့  အတည်ပြုချက် ရယူရဦးမယ်လိုလည်းဆိုပါတယ်။

အာဆီယံအထူးကိုယ်စားလှယ်ခန့်ဖို့ကိစ္စနဲ့ ပတ်သက်ပြီး အာဆီယံအဖွဲ့အကြား လအတန်ကြာ ညှိနှိုင်းဆွေးနွေးခဲ့ရာမှာ အားလုံး ဘုံသဘောတူတဲ့ ကိုယ်စားလှယ်ရှာမရတဲ့အတွက်  အာဆီယံနိုင်ငံခြားရေးဝန်ကြီးတွေမှာ  ဖိအားတွေရှိနေတာ ဖြစ်ပါတယ်။

ကုလသမဂ္ဂ၊ အမေရိကန်၊ တရုတ်နဲ့ တခြားနိုင်ငံတွေကလည်း  မြန်မာနိုင်ငံ ပြန်လည်တည်ငြိမ်အေးချမ်းမှုရလာဖို့ အာဆီယံအဖွဲ့ဟာ ဦးဆောင်ပြီး သံတန်မန်နည်းအရလုပ်ဆောင်တာ အကောင်းဆုံးဖြစ်တယ်လို့ သတ်မှတ်ထားပါတယ်။

အမျိုးသားညီညွတ်ရေးအစိုးရ (အန်ယူဂျီ) ပြောရေးဆိုခွင့်ရှိသူ ပြည်ထောင်စုဝန်ကြီး ဒေါက်တာဆာဆာကတော့ အာဆီယံအထူးကိုယ်စားလှယ်ဟာ မြန်မာပြည်သူတွေကို ရှေ့မှာထားပြီး ပြည်သူတွေကို ဗဟိုပြုလုပ်ဆောင်ရမယ်၊ မြန်မာပြည်သူတွေခံစားနေရတဲ့ ဒုက္ခတွေကို လျော့နည်းသက်သာ စေဖို့ ကူညီအထောက်အပံဖြစ်စေတယ်ဆိုရင် ကြိုဆိုပါတယ်လို့  ပြောပါတယ်။

အထူးကိုယ်စားလှယ်ခန့်ဖို့ကိစ္စဟာ ပြီးခဲ့တဲ့ ဧပြီလ ဂျာကာတာမှာကျင်းပခဲ့တဲ့  အာဆီယံခေါင်းဆောင်များ အစည်းအဝေးမှာ ချမှတ်ခဲ့တဲ့ ဘုံသဘောတူညီချက် ၅ ချက်မှာ ပါတဲ့ အချက်တချက် ဖြစ်ပါတယ်။ 

ဘုံသဘောတူညီချက် ၅ ချက်ကတော့ အကြမ်းဖက်မှုတွေ ချက်ချင်းရပ်ပြီး သက်ဆိုင်တဲ့ဘက်အားလုံး အစွမ်းကုန်သည်းခံထိန်းသိမ်းဖို့၊ မြန်မာနိုင်ငံသားတွေရဲ့ အကျိုးကိုရှေ့ရှုပြီး ငြိမ်းချမ်းစွာအဖြေရှာနိုင်ရေး သက်ဆိုင်သူအားလုံးက အပြုသဘောတွေ့ဆုံ ဆွေးနွေးကြဖို့၊ အာဆီယံ ဥက္ကဋ္ဌရဲ့ အထူးကိုယ်စားလှယ်က အာဆီယံအတွင်းရေးမှူးချုပ်ရဲ့ အကူအညီနဲ့တွေ့ဆုံ ဆွေးနွေးရေးကိစ္စတွေမှာ ညှိနှိုင်းဆောင်ရွက်ပေးနိုင်ဖို့၊ အာဆီယံအဖွဲ့ရဲ့ လူမှုကူညီရေးစင်တာ AHA စင်တာကတဆင့် လူသားချင်းစာနာထောက်ထားမှု အကူအညီပေးအပ်နိုင်ဖို့နဲ့  အာဆီယံအထူးကိုယ်စားလှယ်နဲ့ ကိုယ်စားလှယ်အဖွဲ့တွေကို မြန်မာနိုင်ငံက သက်ဆိုင်သူအားလုံးနဲ့ တွေ့ဆုံနိုင်ခွင့်ရရှိဖို့ ပါဝင်ပါတယ်။

အဆိုပါ သဘောတူညီချက် တွေနဲ့ ပတ်သက်ပြီး အခုအချိန်အထိ တစ်ချက်မှာ အကောင်အထည်ဖော် လုပ်ဆောင်နိုင်တာ မရှိသေးပါဘူး။DVB

စစ်ကောင်စီက မတရားဖမ်းဆီးခြင်းခံထားရတဲ့ ပင်းတယမီးအိမ်ရှင် ဒေါက်တာသန်းမင်းထွဋ်ကို ဒီကနေ့ ဩဂုတ်လ ၂ရက် မနက် ၄နာရီခန့်မှာ ပုသိမ်အကျဉ်းထောင်ကနေ ပြန်လွတ်လာပြီလို့ သိရပါတယ်။

လာရောက်ကြိုဆိုသူတွေနဲ့ လူစုလူဝေးဖြစ်မှာစိုးတာကြောင့် ညအချိန်ကတည်းက ကားတစ်စင်း ခေါ်ယူထားပြီး မနက်အစောပိုင်းမှာ လွှတ်ပေးခဲ့တာလို့ အကျဉ်းဦးစီးဌာန တာဝန်ရှိသူတစ်ဦးကပြောပါတယ်။အကျဉ်းထောင်က လွှတ်ပေးပြီးနောက် ပုသိမ်နယ်မြေရဲစခန်းက အမှုဖွင့်တရားစွဲဆိုထားတာကို သွားရောက်ပိတ်သိမ်းခဲ့ပြီး နေ့လည် ၁၁နာရီခန့်မှာ ပုသိမ်မြို့က နေအိမ်ကို ရောက်ရှိပြီး ပစ္စည်းတွေ သိမ်းဆည်းနေခဲ့တယ်လို့ ဒေါက်တာသန်းမင်းထွဋ်ရဲ့ မိသားစုနဲ့ နီးစပ်သူတွေက ပြောပါတယ်။

ပင်းတယမီးအိမ်ရှင်ဒေါက်တာသန်းမင်းထွဋ်ကို စစ်ကောင်စီက နေပြည်တော်ကို ပို့ဆောင်မယ်လို့ သတင်းတွေ ထွက်ပေါ်နေပေမဲ့ အတည်ပြုနိုင်ခြင်းမရှိသေးသလို ဆရာကြီးအနီးမှာလည်း စစ်ကောင်စီလက်အောက်ခံတွေက အရပ်ဝတ်တွေနဲ့ စောင့်ကြည့်မှုတွေ လုပ်ဆောင်နေတယ်လို့ သိရပါတယ်။

ပုသိမ်အကျဉ်းထောင်ကနေ ဒေါက်တာသန်းမင်းထွဋ်တစ်ဦးသာ လွတ်လာတာဖြစ်ပြီး သူနဲ့အတူ CDM လုပ်ထားတဲ့ ပြည်သူ့ဝန် ထမ်းတွေနဲ့ NLD အစိုးရလက်ထပ် ရပ်ကျေးအုပ်ချုပ်ရေးမှူးအချို့ကို အမှုရုပ်သိမ်းလွှတ်ပေးမယ်လို့ စာရင်းထွက်ပေါ်ထားပေမယ့် လွှတ်ပေးခြင်းတော့ မရှိသေးပါဘူး။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ ထုတ်ပြန်ချက်အရ အာဏာသိမ်းခဲ့တဲ့ ဖေဖော်ဝါရီလ ၁ ရက်ကနေ ဇူလိုင်လ ၃၁ ရက်အထိ သေဆုံးသူ ၉၄၀ ဦးရှိပြီး ဖမ်းဆီးချုပ်နှောင်ခံထားရသူ ၅၄၄၄ ဦးအထိ ရှိနေပါတယ်။mizzima