SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ရခိုင်ပြည်သူပြည်သားတွေ ကိုဗစ်-၁၉ ရောဂါနဲ့ ပတ်သက်လို့  သတင်းတွေကို မှန်မှန်ကန်ကန်သိရှိနိုင်ဖို့နဲ့ အကူအညီတောင်းခံနိုင်ဖို့အတွက် အရပ်ဘက်လူမှုအဖွဲ့အစည်းတွေက ရခိုင်ပြည် Covid Call Center တခုကို ဖွင့်လှစ်ကူညီနေပါတယ်။ 

ကိုဗစ်-၁၉ တတိယလှိုင်း၊ အသွင်ပြောင်းဗိုင်းရပ်စ်ပိုး မြန်မာနိုင်ငံက ဒေသအသီးသီးလိုပဲ ရခိုင်ပြည်နယ်တခုလုံးကို ကူးစက်ပြန့်ပွားနေချိန်မှာ ဒီ  Call Center ကို ဖွင့်လှစ်ခဲ့တာဖြစ်ပါတယ်။ 

ရခိုင်သားတိုင်းနားလည်ဖို့အတွက်  ဖုန်းနံပါတ်က 09-779 778 880 ကို ၂၄ နာရီပတ်လုံး ရခိုင်ဘာသာစကားနဲ့ ဆက်သွယ်မေးမြန်းနိုင်ပါတယ်။ 

ဒီဖုန်းနံပါတ်ကို ဆက်ပြီး ခေါ်ဆိုတဲ့အခါ အနီးပတ်ဝန်းကျင်က ဆရာဝန်တွေ၊ အရေးပေါ် လူနာတင်တင်ကားတွေ၊ အောက်စီဂျင်ရရှိနိုင်တဲ့နေရာတွေ၊ အောက်စီဂျင် မရနိုင်ခင် အချိန်မှာလုပ်ကိုင်ရဖို့နည်းလမ်းတွေ၊ ရောဂါနဲ့ ပတ်သက်တဲ့ အချက်အလက်တွေ၊ ကာကွယ်ဖို့ နည်းလမ်းတွေကို သိရှိ၊ ရရှိနိုင်မှာဖြစ်ပါတယ်။ 

လိုင်းခွဲတွေထဲမှာ အော်ပရေတာတွေနဲ့ တိုက်ရိုက်ဆက်သွယ်ဖို့ အတွက် နံပါတ် (၀)ကို နှိပ်ရန်၊ ရောဂါလက္ခဏာနဲ့ ကူးစက်တတ်တဲ့နည်းလမ်းတွေကို သိချင်ရင် နံပါတ် (၁)ကို နှိပ်ရန်၊ ရောဂါကာကွယ်ရေးနည်းလမ်းတွေကို သိဖို့အတွက်နံပါတ် (၂)ကို နှိပ်ရန်၊ အောက်စီဂျင် ကျပါက ပြန်တက်လာအောင်လုပ်ဆောင်နိုင်တဲ့ နည်းလမ်းတွေအတွက် နံပါတ်(၃) ကိုနှိပ်ရန်၊ ကျန်းမာရေးဝန်ထမ်းတွေနဲ့ တိုင်ပင်ပြောဆိုဖို့ နံပါတ် (၄)ကို နှိပ်ရန်၊ အရေးပေါ်ကားတွေကို ခေါ်ဖို့ နံပါတ် (၅)ကိုနှိပ်ပါ၊ အောက်စီဂျင် ရရှိနိုင်မယ့်နေရာတွေကို သိချင်ပါကနံပါတ် (၆)ကို နှိပ်ရန်၊ အရေးပေါ် အစားအသောက် အခက်အခဲရှိရင် ခေါ်နိုင်မယ့် ဖုန်းနံပါတ်တွေ သိဖို့အတွက် နံပါတ် (၇)ကို နှိပ်ပါ၊ လှူဒါန်းလိုပါက ဆက်သွယ်နိုင်မယ့် ဖုန်းနံပါတ်တွေကို သိဖို့အတွက် နံပါတ် (၈) ကို နှိပ်ရန်တို့ဖြစ်ပါတယ်။ 

ဒီစင်တာကို “Blue Ocean Operating Management”၊ “We ❤ Rakhine” နဲ့ “Sittwe Oxygen Plant (S.O.P)” တို့ ပူးပေါင်းဆောင်ရွက်ကြတာဖြစ်ပါတယ်။

တာဝန်ရှိသူတဦးဖြစ်တဲ့ ခိုင်ကောင်းစံက “အဓိကကတော့ ကိုဗစ် တတိယလှိုင်းမှာဆိုရင် မြို့နယ်တိုင်းလိုလိုမှာ သေဆုံးမှုတွေ ပိုများလာတယ်။ နောက်ပြီးတော့ အစိုးရကိုယ်တိုင်က ဒီလို Call Center တွေ လုပ်နိုင်ခြေမရှိဘူးပေါ့။ အခုအစိုးရဆိုရင်တော့ ပိုပြီးတော့ ဆိုးတာပေ့ါ။ စီမံခန့်ခွဲမှုတွေ ယိုယွင်းနေတဲ့အချိန်မှာတော့ ကျနော်တို့ အရပ်ဘက်အဖွဲ့အစည်းတွေနဲ့ ပူးပေါင်းထားတဲ့ ဒီအဖွဲ့တွေကတော့ Call Center လုပ်ဖို့ လိုအပ်တာပေါ့နော်။”လို့ပြောပါတယ်။

လတ်တလောမှာ အချက်တော်တော်များများကို ဆောင်ရွက်နိုင်ပေမဲ့ ရိက္ခာထောက်ပံ့မှုကိုတော့ အနည်းအကျဉ်းပဲ ထောက်ပံ့နိုင်သေးတယ်လို့ဆိုပါတယ်။  

လွန်ခဲ့တဲ့သီတင်း နှစ်ပတ်ခန့်က ရခိုင်ပြည်နယ်တွင်းက မြိုနယ် ၁၇ မြို့နယ်စလုံးမှာ ကူးစက်မှု၊ သေဆုံးမှု နှုန်းထားတွေ မြင့်မားခဲ့ပြီး အများအားဖြင့် စစ်တွေ၊ မင်းပြား၊ ကျောက်ဖြူ၊ သံတွဲ၊ ဂွ၊ တောင်ကုတ်စတဲ့မြိုနယ်တွေမှာ ပိုမိုသိသာကြောင်းနဲ့ လက်ရှိမှာတော့ သေဆုံးနှုန်းတွေ၊ ကူးစက်နှုန်းတွေကတော့ တော်တော်လေး ကျဆင်းလာတယ်လို့ဆိုပါတယ်။ 

“ကျလာတဲ့အကြောင်းရင်းကတော့ အထူးသဖြင့်ကတော့ အစိုးရရဲ့ စီမံမှုကြောင့် မဟုတ်ဘဲနဲ့ ကျွန်တော်တို့ ရခိုင်အမျိုးသားအဖွဲ့ချုပ် ULA ရဲ့ ထုတ်ပြန်ချက်တွေပေါ့နော်။ သူက Stay At Home နေဖို့ ၁၄ ရက် နှစ်ကြိမ်လုပ်ခဲ့တယ်၊ အခု မနေ့တနေ့ကမှ တကြိမ် ထပ်တိုးတာပေါ့၊ တပတ်ပဲ ထပ်တိုးတာပေါ့။ အဲဒီအပေါ်မှာ ပြည်သူလူထုတွေ လိုက်နာမှုက အားကောင်းလာတယ်။ ကိုဗစ်လူနာတွေရော၊ ပိုးတွေ့လူနာတွေရော၊ ဖျားနာတဲ့လူတွေ တော်တော်ကျသွားတာကို တွေ့ရတယ်ပေ့ါလေ သေဆုံးနှုန်းက အစ” လို့ပြောပါတယ်။DVB

တော်လှန်ရေးအတွက် Raffle Ticket  ဝယ်ယူတဲ့ ပြည်သူတွေကို တုံ့ပြန်ပေးအပ်သွားမယ့် ဆုတွေထဲမှာ ၈၈ ကျောင်းသားခေါင်းဆောင် မင်းကိုနိုင်ရဲ့ လက်ရာ ပန်းချီကား တချပ်လည်း ပါဝင်ပါတယ်။

ဒီပန်းချီကားကိုတော့ “နွေဦး” လို့ အမည်ပေးထားပြီး မင်းကိုနိုင်ရဲ့ လက်မှတ်နဲ့အတူ Grand Prize တွေထဲက တခုအဖြစ် ပေးအပ်သွားမယ်လို့ ဆိုပါတယ်။

“ဒီရန်ပုံငွေပွဲမှာ ပူးပေါင်းပါ၀င်ပေးကြသူများ၊ အလှူရှင်များအားလုံးဟာလည်း လုပ်နိုင်ကြတာထက်ပိုပြီး ကြိုးစား​နေကြတာပါ။ ထို့အတူပဲ ကိုမင်းကိုနိုင်က သူ့နှလုံးသားနဲ့ ခံစားရေးဆွဲထားတဲ့ “နွေဦး”ပန်းချီကားလေးကို သူ ပါဝင်အားစိုက်ထားတဲ့ လုပ်အားအဖြစ် ဒီရန်ပုံငွေပွဲမှာ တုံ့ပြန်လက်ဆောင်ပေးမှာပါ။ ကိုမင်းကိုနိုင်က ဒီပန်းချီကားလေးရရှိမယ့်သူကို သူနဲ့ ရေစက်ဆုံတဲ့သူပါလို့ ဆိုထားတာကြောင့် ကိုမင်းကိုနိုင်နဲ့ ​ရေစက်ဆုံဖို့ ဒီပန်းချီကား​လေး ရနိုင်မယ့်အခွင့်အရေးကို ကြိုးစားရ​အောင် 5 Million Challenge ရဲ့ Raffle Ticket ဝယ်ယူပြီး တုံ့ပြန်လက်ဆောင် Grand Prize လေးကို ကံစမ်းနိုင်ပါပြီ”

“ယုံကြည်ရာ ခြေတစ်လှမ်း၊ တော်လှန်ရေးအတွက် ငါးသန်း”လို့ အမည်ပေးထားတဲ့ ဒီ Challenge Campaign မှာ အမေရိကန်ဒေါ်လာ ၅ သန်းကို သြဂုတ်လအတွင်း ပြည့်မီအောင် ကမ္ဘာအနှံ့မှာ ရှိတဲ့ CRPH – OFP Fundraisers တွေက အလှူငွေ ကောက်ခံပေးသွားမှာဖြစ်ကာ ရရှိလာတဲ့ အလှူငွေတွေကို အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ဦးစီးပြီး မြန်မာနိုင်ငံအနှံ့အပြားမှာရှိတဲ့ နွေဦးတော်လှန်ရေးမှာ တထောင့်တနေရာက ပါဝင်နေကြတဲ့ ပြည်သူနဲ့ လူငယ်တွေရဲ့ စားဝတ်နေရေးနဲ့ တခြားသော လိုအပ်ချက်တွေကို ကူညီထောက်ပံ့နိုင်ဖို့ ပြန်လည် ခွဲဝေပေးအပ်သွားမယ်လို့ ဆိုပါတယ်။

ဒီ Challenge Campaign ဟာ အောင်လံလွှင့်ချီနွေဦးထီနဲ့ လုံးဝသက်ဆိုင်ခြင်းမရှိဘဲ ဒီအစီအစဉ်မှာ ပါဝင်လှူဒါန်းကြမယ့် ပြည်သူတွေကို ပြန်လည်တုံ့ပြန်တဲ့အနေနဲ့လည်း Raffle Ticket တွေကို သြဂုတ် လကုန်ပိုင်းကာလမှာ မဲနှိုက်ပေးပြီး တော်လှန်ရေး အမှတ်တရ ပန်းချီကားနဲ့ တခြားပစ္စည်းလေးတွေကို မဲဖောက်ပေးသွားမယ်လို့ ဆိုပါတယ်။

Raffle Ticket တစ်စောင်ကို အခြေခံအားဖြင့် အမေရိကန် ဒေါ်လာ ၁၀ ဒေါ်လာ သတ်မှတ်ထားပြီး Ticket နှုန်းထားတွေဟာ မိမိတို့နေထိုင်ရာနိုင်ငံအလိုက် အသုံးပြုတဲ့ ငွေကြေးနဲ့ ငွေကြေးလဲလှယ်နှုန်းပေါ်မူတည်ပြီး အပြောင်းအလဲ ရှိနိုင်ပါတယ်။

စစ်ကောင်စီရဲ့ မတရားဖိနှိပ်မှုအောက်မှာ နေထိုင်နေရသည့်တိုင်အောင် အုပ်တချပ် သဲတပွင့် ပါဝင်လှူဒါန်းလိုသူ မြန်မာနိုင်ငံထဲက ပြည်သူတွေအတွက် Raffle Ticket ကို တော့ အထူးစျေးနှုန်း မြန်မာငွေတသောင်းကျပ် သတ်မှတ်ပေးထားတာ ဖြစ်ပါတယ်။

ဒီကနေ့ ဩဂုတ်လ ၂၁ ညနေ ၅ နာရီလောက်အထိ နိုင်ငံပေါင်း ၂၀ ကျော်ကနေ  Raffle Ticket လက်မှတ်ပေါင်း ၃၆၅၆၀၀ ကျော်  ဝယ်ယူအားပေးထားကြပါတယ်။DVB

မကွေးတိုင်း ၊ ဂန့်ဂေါမြို့နယ်၊  မြောက်ခရမ်းကျေးရွာမှ  အိမ်ဆောက်ပစ္စည်းဆိုင်ပိုင်ရှင်တစ်ဦးကို  PDF များနှင့် အဆက်အစပ်ရှိသည်ဟု စွပ်စွဲကာ စစ်တပ်က လာရောက်ဖမ်းဆီးခဲ့ပြီး ၎င်းပိုင် ကျပ်သိန်း ၁၅၀ ကို ယူဆောင်သွားသည်ဟု မျက်မြင်တွေ့ရှိသည့် ဒေသခံများက ပြောသည်။

ဩဂုတ် ၁၉ ၊ ညနေ ၅ နာရီခန့်တွင် မြောက်ခရမ်းကျေးရွာရှိ “နုမြင့်မိုရ်” အိမ်ဆောက်ပစ္စည်းဆိုင်သို့ စစ်တပ်က အင်အား ၅၀ ခန့်ဖြင့် ရောက် လာပြီး နေအိမ်ကို မွှေနှောက်ရှာဖွေကာ အသက် ၄၀ ကျော်အရွယ် ဆိုင်ပိုင်ရှင်ဖြစ်သူ ဦးမင်းလွင်ကို ဖမ်းဆီးသွားခြင်းဖြစ်ကြောင်း  မျက် မြင်သက်သေ အမျိုးသား တစ်ဦးက ပြောသည်။

“သူတို့အိမ်မှာက မိသားစု ၄ ဦး ရှိနေတာ၊ ဦးမင်းလွင်ကို လက်နောက်ပြန်လက်ထိပ်ခတ်တယ်။ သူ့သားကိုလည်း သေနတ်နဲ့ ချိန်ထားပြီး နေအိမ်ကိုရှာတယ်။ သူတို့ စွပ်စွဲတဲ့လက်နက်တွေတော့ မတွေ့ဘူး။ ပိုက်ဆံတွေကိုတော့ အထက်ကို အပ်ရမယ်ဆိုပြီး ယူသွားတယ်”ဟု ထိုအမျိုးသားက ပြောသည်။

ထို့နောက် ဦးမင်းလွင်၏သားအကြီးဖြစ်သူကို  သေနတ်ဖြင့်ထောက်ကာ ရွာအတွင်းရှိ ဦးလှရွှေ ဆိုသူ၏ နေအိမ်သို့ လိုက်ပို့ခိုင်းခဲ့ကြောင်း၊ ဦးလှရွှေမိသားစု နေအိမ်တွင် ရှိမနေကြောင်း  သိရသည်။ 

ဦးလှရွှေနှင့် မိသားစုကိုလည်း PDF ထောက်ပံ့သူများဟု စွပ်စွဲကာ လာရောက်ဖမ်းဆီးခြင်း ဖြစ်ကြောင်း ရွာခံများက ဆိုသည်။

အမျိုးသားဒီမိုကရေစီအဖွဲ့ချုပ် (NLD) ကို ထောက်ခံသူ  ဦးမင်းလွင်နှင့် ၎င်း၏မိသားစုဝင်များ ချောက်ချခံရသည်ဟု ထင်မြင်ကြောင်း အထက်ပ ါ အမျိုးသားက ပြောသည်။

“သူတို့( ဦးမင်းလွင်မိသားစု)က ချမ်းသာတော့ ချောက်ချခံရတာလို့ပဲ ထင်တယ်၊ သူတို့ နိုင်ငံရေးလုပ်တယ်လို့လည်း မကြားဖူးပါဘူး။ ဒါပေမယ့် သူတို့က NLD ထောက်ခံတာ”ဟု သူက ဆက်ပြောသည်။

ဒေသခံနောက်တစ်ဦးကလည်း အလားတူ ပြောကြားသည်။

မြောက်ခရမ်းကျေးရွာတွင် အိမ်ခြေ ၁၂၀၀ နီးပါးရှိပြီး ရွာ၏ထက်ဝက်ခန့်သည် ပြည်ခိုင်ဖြိုးပါတီ (USDP) နှင့် စစ်တပ် ကို ထောက်ခံကြသည်ဟု ဒေသခံနောက်တစ်ဦးက ပြောသည်။

“အမြင်ကပ်လို့ စွပ်စွဲပြီးတိုင်တယ်လို့ ထင်တယ်။ ရွာက အစိမ်းတွေ (USDP ပါတီ၀င်တွေ) လည်း ပေါတယ်” ဟု ၎င်းက ဆိုသည်။

 “ဒါကြီးက ဓားပြတိုက်တာပါပဲ။ စွပ်စွဲဖမ်းဆီးပြီး သူတပါးချွေးနှဲစာငွေတွေကို မတရား ရယူသွားတာ။ ဒီတစ်ခါလုပ်လို့ရသွားလို့ရှိရင် နောက်လည်း မတရားမှုတွေ ဆက်လာနေဦးမှာပဲ” 

ဦးမင်းလွင်နှင့် အဆက်အသွယ်မရသေးဟု မိသားစုက ဆိုသည်။

“အဖေ့ကို အမြန်ဆုံးပြန်လာလွှတ်ပေးစေချင်ပါတယ်။ ပိုက်ဆံတွေကလည်း ကျွန်တော်တို့ချွေးနှဲစာ ပိုက်ဆံတွေပါ။ သူတို့ (စစ်တပ်) စွပ်စွဲတာတွေလည်း တစ်ခုမှ မဟုတ်ပါဘူး”ဟု သားဖြစ်သူက ပြောသည်။ 

ပြီးခဲ့သည့် ဩဂုတ် ၉ တွင်လည်း  အဆိုပါမြောက်ခရမ်းကျေးရွာမှ ကိုဗစ်နိုင်တင်းရောဂါဖြစ်ပွားနေသည့် NLD ရပ်ကျေးအလုပ်မှုဆောင်  ဦးတင်မောင်လွင်ကို စစ်တပ်က ဖမ်းဆီးသွားပြီး ယခုထက်ထိ မိသားစုက အဆက်အသွယ် မရရှိသေးပေ။ myanmar now

မန္တ​လေးတိုင်း မိုးကုတ်မြို့က မင်္ဂလာကန်ပေါင်မှာ သြဂုတ် ၂၀ ရက်က ငါးဖမ်းနေတဲ့ လူ ၄ ဦး နဲ့ နီလာစျေးကြီးမှာ စျေးဝယ်လာတဲ့ လူ ၃ ဦးကို အကြမ်းဖက်စစ်အုပ်စုက လာရောက်ဖမ်းဆီးသွားတယ်လို့ ဒေသခံတွေဆီက သိရပါတယ်။

ဒေသခံ တစ်ဦးက “ငါးဖမ်းနေတဲ့လူ ၄ ယောက်ကို လာဖမ်းသွားတယ်။ ဘာလို့ဖမ်းလဲ ဆိုတာကို မသိရဘူး။ စစ်အုပ်စုက ကန်ဘောင်နားမှာ အင်အားအများကြီးနဲ့ နေရာယူထားတာ ကြာပြီ” လို့ ပြောပါတယ်။

နီလာစျေးကြီးထဲမှာတော့ စျေးလာဝယ်တဲ့သူတွေထဲက တချို့ကို လက်နက်ကိုင်ထားတဲ့ သူတွေက လာဖမ်းသွားရာမှာ အမျိုးသမီး နှစ်ဦး ပါတယ်လို့ မျက်မြင်တွေ့သူတစ်ဦးက ပြောပါတယ်။

“အမျိုးသမီး နှစ်ဦးပါတယ်။ ပုံစံတွေက တောဘက်ကလာတဲ့ ပုံစံတွေနဲ့ စျေးလာဝယ်တာ။ မိုးကာအပြာတွေ ခြုံထားတဲ့ လူတွေက လာဖမ်းသွားတယ်။ မိုးကာအောက်ထဲမှာ လက်နက်တွေ ပါတယ်။”

အကြမ်းဖက်စစ်အုပ်စုက စစ်သားတွေဟာ ​မိုးကုတ်မြို့ထဲကို ပတ်နေတာကြာပြီဖြစ်ပြီး အခု ၇ ဦးကို  ဘာကြောင့် ဖမ်းဆီးတာလဲဆိုတာကိုတော့ မသိကြသေးဘူးလို့ ဒေသခံ​တွေက ဆိုပါတယ်။DVB