SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ချင်းပြည်နယ်၊ မင်းတပ်မြို့၊ အနောက်မြောက်ဖက်ရှိ ချပ်ရွာအတွင်းသို့ သြဂုတ်လ ၃၁ ရက်နေ့တွင် အကြမ်းဖက်စစ်ကောင်စီတပ်ဖွဲ့ဝင်များ ဝင်ရောက်စီးနင်းပြီး နေအိမ်များအတွင်းရှိ ပစ္စည်းများကို ဖျက်ဆီးသွားကာ၊ ချပ်ရွာ နှစ်ခြင်းဘုရားကျောင်းအတွင်း အရက်သေစာများ သောက်စားသွားကြောင်း ဒေသခံတစ်ဦးထံမှ သိရသည်။

အဆိုပါ စစ်ကောင်စီတပ်သားများ ရွာထဲမဝင်ခင် လက်နက်ကြီးများဖြင့် ၃ ကြိမ်ခန့် ပစ်ခတ်ခဲ့ကြောင်း၊ CDF တပ်ဖွဲ့ဝင်များနှင့် တိုက်ပွဲဖြစ် ကြောင်း၊ တိုက်ပွဲကြောင့် သေဆုံးသွားသည့် စစ်ကောင်စီတပ်သားများကို မိုးကာဖြင့်လိပ်ကာ အိမ်သာကျင်းထဲ ပစ်ချသွားခဲ့ကြောင်း ဒေသခံတစ်ဦးမှ လူမှုကွန်ရက်တွင် ရေးသားထားသည်။အဆိုပါ ချပ်ရွာတွင် ဖြစ်ပွားသော တိုက်ပွဲနှင့် ထိခိုက်ကျဆုံးစာရင်း အသေးစိတ်ကို လတ် တလော အတည်မပြုနိုင်သေးပေ။khit thit

ဧရာဝတီတိုင်းဒေသကြီး၊ ကန်ကြီးထောင့်မြို့တွင် ဒလန်ဟုကျော်ကြားသည့် ကိုမောင်မြင့်ကို ကန်ကြီးထောင့်မြို့ပြပြောက်ကျားအဖွဲ့ (STF-KGD) က လုပ်ကြံခဲ့သည်ဟု STF-KGD က ထုတ်ဖော်ပြောကြားသည်။

“မောင်မြင့် အသတ်ခံရတာက ကျွန်တော်တို့အဖွဲ့ကသတ်တာပါ။ သူတို့ (စစ်ကောင်စီ) ဖမ်းထားတဲ့ပြည်သူတွေက ကျွန်တော်တို့အဖွဲ့နဲ့ လုံးဝ မသက်ဆိုင်တဲ့လူတွေကို ဖမ်းထားတာ၊ ကျွန်တော်တို့က ဘယ်သူတွေဆိုတာလည်း အဖမ်းခံထားရတဲ့သူတွေတစ်ယောက်မှ မသိပါဘူး ။ အဖမ်းခံခဲ့ရတဲ့သူတွေအတွက်လည်း စိတ်မကောင်းပါဘူး”ဟု STF-KGD တာဝန်ရှိသူတစ်ဦးက ပြောသည်။

ကန်ကြီးထောင့်မြို့၊ ဥယဉ်စု ရပ်ကွက်တွင် နေထိုင်သူ မောင်မြင့်သည် သြဂုတ် ၂၉ ရက်က သေနတ်ဖြင့် ပစ်သတ်ခံခဲ့ရသည်။ ယင်းပစ်ခတ်မှုသည် အကြမ်းဖက်စစ်ကောင်စီ ထောက်ခံအားပေးသည့် ဒလန်များအား ပထမဆုံးအကြိမ် သတိပေးခြင်းဖြစ်သည်ဟု ကြေညာချက်ထဲတွင် ဖော်ပြထားသည်။

STF-KGD သည် NUG အစိုးရ၏ မူဝါဒလမ်းစဉ်များအတိုင်း ဆက်လက်လုပ်ဆောင်သွားမည်ဖြစ်ပြီး မြစ်ဝကျွန်းပေါ် ပြောက်ကျားစစ်ဆင်ရေး တပ်ပေါင်းစုနှင့်လည်း ပူးပေါင်းဆောင်ရွက်လျက်ရှိကြောင်း သိရသည်။mizzima

မြန်မာအာဏာသိမ်း ခေါင်းဆောင်တွေဟာ သူတို့ရဲ့ခေါင်းဆောင်မှုအခန်းကဏ္ဍနဲ့ တာဝန်ဝတ္တရားတွေကို ပျက်ကွက်နေတယ်လို့ မြန်မာနိုင်ငံရဲ့ ကက်သလစ်ခရစ်ယာန် ဂိုဏ်းချုပ် ဆရာတော်ကြီး ကာဒီနယ်ချားလ်စ်မောင်ဘိုက  တနင်္ဂနွေနေ့ စိန့်မေရီဘုရားကျောင်း ဝတ်ပြုဆုတောင်းနေ့မှာ ပြောကြားလိုက်ပါတယ်။

အသက်တွေ ဥစ္စာပစ္စည်းတွေ ပျက်စီးဆုံးရှုံးကြရတဲ့ ၁၈ လတာ ကိုဗစ်-၁၉ ရောဂါ ကပ်ဘေး၊ ၇ လတာ ပြည်တွင်းပဋိပက္ခတွေ၊ စိတ်ပျက်မှုတွေ၊ သေဆုံးမှုတွေ၊ စိတ်ပျက်ဝမ်းနည်းရမှုတွေဟာ မြန်မာပြည်သူတွေရဲ့ တိုးတိုးတိတ်တိတ် မျက်ရည်ကျရတဲ့ ညတာတွေကိုရှည်စေတဲ့ သဘာဝဘေးနဲ့ လူလုပ်ကပ်ဘေးတွေကြောင့်ဖြစ်တယ်လို့ ကာဒီနယ်ချားလ်စ်ဘိုက မိန့်ကြားပါတယ်။ 

ဖေဖော်ဝါရီ ၁ ရက်က စစ်တပ်အာဏာသိမ်း ပြီးနောက် မြန်မာနိုင်ငံမှာကြုံတွေ့နေရတဲ့ ပြည်သူတွေရဲ့  ဒုက္ခတွေကို ကာဒီနယ်ချားလ်စ်ဘိုက ရည်ညွှန်းပြောကြားခဲ့တာပါ။

ဒါပေမဲ့ ပြည်သူလူထုဟာ ပုဂ္ဂိုလ်ရေးဆိုင်ရာ အကျင့်စာရိတ္တနဲ့ ရက်ရောမှုတွရှိကြလို့ ကြီးမြတ်ကြပါတယ်လို့လည်း  ကာဒီနယ်က ပြောကြားပါတယ်။

ပြီးခဲ့တဲ့ ၇ လတာကာလအတွင်း လူတွေသေဆုံးမှုနဲ့ စိတ်ပျက်ရမှုတွေဟာ  အသိဉာဏ်ကို ရည်ညွှန်းတဲ့ ဦးခေါင်းရဲ့  ဥပဒေနဲ့စည်းမျဉ်းတွေအပေါ် အခြေခံပြီး ချစ်ခြင်းမေတ္တာကို ကိုယ်စားပြုတဲ့ ပြည်သူတွေရဲ့ နှလုံးသားနဲ့ ဆန့်ကျင်ဘက်ဖြစ်နေတယ်လို့လည်း ဆိုပါတယ်။ 

ကာဒီနယ်ဘိုက သူ့ရဲ့ပရိသတ်ကို ဟောပြောရာမှာ သနားကြင်နာတတ်သောနှလုံးသားကို ကိုယ့်ဘ၀တွေထဲကို ခေါ်ဆောင်လာခြင်းအားဖြင့် မိမိကိုယ်ကို ပြန်လည်တည်ဆောက်ကြဖို့ တိုက်တွန်းခဲ့ပါတယ်။ 

စစ်လက်နက်တွေကို ၀ယ်ယူနေတဲ့ စစ်အုပ်စုအဖွဲ့ကလွဲလို့ ကမ္ဘာတဝန်း အချင်းချင်း ချစ်ခြင်းမေတ္တာနဲ့လက်တွဲထားပြီး အာဏာခိုင်မြဲအောင် စည်းလုံးကြဖို့လည်း မိန့်ကြားသွားပါတယ်။DVB

အာဏာသိမ်းစစ်ကောင်စီ ရေတပ်ဟာ ရန်ကုန်မြစ်ဝနဲ့ မိုင် ၃၀ အကွာမှာ ၃ ရက်ကြာစစ်ရေးလေ့ကျင့်ဖို့ ပြင်ဆင်နေပြီး စက်တင်ဘာ ၁ ရက်နေ့မှာ စစ်ရေးလေ့ကျင့်ခန်း ဗျူဟာ ၁ အနေနဲ့ ဖရီးဂိတ်စစ်သင်္ဘော ၂ စီးအပါအဝင် စစ်ရေယာဉ် ၆ စီးထွက်ခွာမယ်လို့ ဒီဗွီဘီက  DVB စုံစမ်းသိရပါတယ်။

အဲဒီစစ်ရေးလေ့ကျင့်မှုမှာ ပင်လယ်ပြင်အတွင်း အမြောက်တွေ  ပစ်ခတ်လေ့ကျင့်မယ့် အစီအစဉ်တွေ ပါဝင်ပြီး  စစ်ရေးလေ့ကျင််မှုလုပ်မယ့် စစ်ကောင်စီတပ်ဖွဲ့ဝင်တွေကို ဩဂုတ် ၃၁ ရက်မှာ အမှတ် ၁ ဗျူးဟာမှူးကိုယ်တိုင်လာရောက်တွေ့ဆုံပြောဆိုခဲ့တယ်လို့ ခိုင်လုံတဲ့ တပ်တွင်းသတင်းရင်းမြစ်တွေထံက သိရပါတယ်။

အဲဒီလို တွေ့ဆုံရာမှာ လူမှုကွန်ရက်ကသတင်းတွေကို မယုံဖို့နဲ့ နိုင်ငံတော်စီမံအုပ်ချုပ်ရေးကောင်စီကို တရားဝင်အစိုးရအဖြစ် အသိအမှတ်ပြုနေပြီဖြစ်တယ်လို့ ဗျူဟာမှူးက ပြောဆိုခဲ့သလို တပ်ကထွက်ပြေးတဲ့သူတွေက တစ်ယောက်နှစ်ယောက်ပဲ ရှိတာဖြစ်ပြီး တပ်ကထွက်ပြီး ဒုက္ခရောက်နေလို့ ပြန်လာချင်နေကြတယ်လို့ ပြောဆိုခဲ့တယ်လို့လည်းဆိုပါတယ်။ 

လက်ရှိမှာ လုံခြုံရေး  ဂရုစိုက်ဖို့နဲ့ အရေးအကြောင်းကြုံပါက ကိုယ်နဲ့နီးစပ်ရာ ကုန်းကို ထိထိရောက်ရောက်စိုးမိုးတုံ့ပြန်နိုင်ဖို့လည်း ဗျူဟာမှူးက ပြောဆိုသွားတယ်လို့ သိရပါတယ်။ 

လက်ရှိ စစ်တပ်ကနေအာဏာဖီဆန်မှုလုပ်ဆောင်ထားတဲ့ တပ်မတော်အရာရှိစစ်သည်နဲ့ ရဲတပ်ဖွဲ့ဝင် ၂၅၀၀ နီးပါးရှိပြီး ရေတပ်ကနေ CDM လုပ်ထားတဲ့ တပ်မတော်အရာရှိစစ်သည် ရာဂဏန်းနီးပါးရှိတယ်လို့ သူတို့ ကို CDM ကုတ်နံပါတ် ထုတ်ပေးနေတဲ့ ပြည်သူ့ရင်ခွင်အဖွဲ့က ကိုလင်းထက်အောင်က ပြောပါတယ်။DVB

ပဲခူးတိုင်းဒေသကြီး၊ ညောင်လေးပင်ခရိုင်၊ မုန်းမြို့နယ်ရှိ ရေလဲကျေးရွာက ဒေသခံခြောက်ဦးကို အာဏာသိမ်း စစ်ကောင်စီတပ်ဖွဲ့ဝင်များက ဩဂုတ်လ ၃၁ ရက် နံနက်ပိုင်းတွင် ဖမ်းဆီးခေါ်ဆောင်သွားကြောင်း ကရင်အမျိုးသားအစည်းအရုံးက ထုတ်ပြန်သည်။

သင်းအုပ်ဆရာ ဆရာမိုးဇက်အပါအဝင် စောကပရူစေး၊ စောဌေးလွင်၊ ကိုမင်းမင်း၊ ဦးမြင့်ရွှေနှင့် စောကပရူထူး စုစုပေါင်း ခြောက်ဦးကို စစ်ကောင်စီလက်အောက်ခံ ခမရ (၃၉၄) တပ်ရင်းမှ ဗိုလ်ကြီးအဆင့်ရှိသူ ဇေယျာလင်းက ဦးဆောင်ပြီး ဖမ်းဆီးခေါ်ဆောင်သွားခြင်းဖြစ်ကြောင်း ထုတ်ပြန်ချက်တွင်ပါရှိသည်။

အဆိုပါ ဖမ်းဆီးခံရသူများကို အာဏာသိမ်းစစ်ကောင်စီက စစ်ဆေးမေးမြန်းပြီးနောက် သင်းအုပ်ဆရာဖြစ်သူ စောမိုးဇက်ကို အသက်ကြီးသောကြောင့် ပြန်လွှတ်ပေးလိုက်သော်လည်း ကျန်းငါးဦးကို စစ်ဆေးမေးမြန်းပြီး ပြန်လွတ်ပေးမည်ဟုဆိုကာ နတ်သံကွင်းကျေးရွာဘက်သို့ ခေါ်ဆောင်သွားကြောင်း သိရသည်။mizzima

ရခိုင်ပြည်နယ်၊ မောင်တောမြို့နယ်၊ ဦးရှည့်ကျ(မွတ်ဆလင်) ကျေးရွာအုပ်ချုပ်ရေးမှူးတစ်ဦးကို စစ်တပ်က ဖမ်းဆီးခဲ့ပြီးနောက် ယနေ့ သြဂုတ် ၃၁ ရက်နေ့ နံနက်ပိုင်းတွင် ရုပ်အလောင်းအား မောင်တောပြည်သူ့ဆေးရုံကြီးသို့ လာရောက်ပို့ဆောင်သွားကြောင်း ကျေးရွာ အုပ်ချုပ်ရေးမှူးများကပြောသည်။

ဦးရှည့်ကျကျေးရွာအုပ်ချုပ်ရေးမှူး ဦးရော်ဘီအာလောင် အသက် ၃၂ နှစ်မှာ သြဂုတ်လ ၂၉ ရက် ညနေပိုင်းအချိန်က မောင်တောခရိုင် အုပ်ချုပ်ရေးမှူးရုံးသို့သွားစဉ် စရဖ၏ ဖမ်းဆီးခံခဲ့ရခြင်းဖြစ်သည်။အမည်မဖော်လိုသည့် ကျေးရွာအုပ်ချုပ်ရေမှူးတစ်ဦးက “ဒီနေ့ မနက်မှာ မောင်တောဆေးရုံကို အလောင်းလာပို့သွားတာ။ ဦးရှည့်ကျကျေးရွာအုပ်ချုပ်ရေးမှူးရဲ့ ရုပ်အလောင်းပါပဲ ”ဟုပြောသည်။

ယင်းအပြင်ကြက်ရိုးပြင်ကျေးရွာအုပ်ချုပ်ရေးအပါအဝင် ၃ ဦးတို့မှာလည်း လွန်ခဲ့သည့်ရက်ပိုင်းအတွင်းက စစ်တပ်၏ ဖမ်းဆီးခြင်းကိုခံခဲ့ရပြီး ယခုအချိန်ထိ လွတ်မြောက်လာခြင်း မရှိသေးကြောင်း အဆိုပါ ကျေးရွာအုပ်ချုပ်ရေးမှူးက ဆက်ပြောသည်။

ဆေးရုံသို့လာပို့သွားသည့် ရုပ်အလောင်းမှာ မွတ်ဆလင်အုပ်ချုပ်ရေးမှူးတစ်ဦးဖြစ်ပြီး ပြင်ပဒဏ်ရာများအပြင် နှလုံးတွင်အဆီ ဖုံးကာပုတ်နေသည်ကို စစ်ဆေးတွေ့ရှိရကြောင်း မောင်တောပြည်သူ့ဆေးရုံမှ ဆေးရုံအုပ် ဒေါက်တာနုကေသီစံက Western News ကိုပြောသည်။“ပြင်ပဒဏ်ရာနည်းနည်းပါတယ်။ အပြင်းအထန်တော့မဟုတ်ဘူး။ ဆေးပညာအရဆိုရင်တော့ နှလုံအဆီဖုံးပြီးတော့ နှလုံးသွေး ကြောတွေနည်းနည်းပိတ်နေတယ်။

ပြီးတော့ နှလုံးပုတ်နေတာလည်း တွေ့ရတယ်။ ဒီနေ့ နံနက်ပိုင်းက လာပို့သွားတာ။ မွတ်ဆလင်အုပ်ချုပ်ရေးမှူးတယောက်ရဲ့အလောင်းပါပဲ။ အလောင်းကတော့ လောလောဆယ် ဆေးရုံမှာရှိနေသေးတယ်” ဟု ပြောသည်။

အဆိုပါ ကိစ္စနှင့်ပတ်သတ်၍ မောင်တောခရိုင်အုပ်ချုပ်ရေးမှူး ဦးနေဦးအားဆက်သွယ်ရာ အစည်းအဝေးတက်နေကြောင်း သူ၏ကိုယ်ရေးအရာရှိက ပြောသည်။khit thit