SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ဧရာ၀တီတိုင်း၊ ပန်းတနော်မြို့တွင် ကမ္ဘာ့ရတနာဘဏ်က CDM ၀န်ထမ်းများထံ ချေးငွေပြန်ဆပ်ရန် ‌ငွေချေးသူတစ်ဦးချင်းထံသို့ အကြောင်း ကြားစာ ပေးပို့ထားကြောင်း ချေးငွေယူထားသူ တချို့ထံမှ သိရသည်။

“တချို့လဲ အသိတွေထဲကနေ စုပေါင်းပြီး ဝိုင်းပြီးဆပ်ပေးကြတယ်။ တချို့က မဆပ်နိုင်ကြဘူး။ အခုလိုအခြေအနေမျိုးမှာ ပြန်ဆပ်ဖို့က မဖြစ်နိုင်ဘူး။ ရပေါက်ရလမ်းက ဘာမှရှိတာမှမဟုတ်တာ။ အခုပြန်ဆပ်ဖို့ ခြိမ်းခြောက်ခံရတာရှိတယ်”ဟုမြို့ခံတစ်ဦးကပြောသည်။ ယခင်ကလည်း ချေးငွေအတွက် အတိုး‌ဆပ်ရန်နှင့် အတိုးအရင်းပေါင်း ပြန်ဆပ်နိုင်ပါက ဆပ်ရန် ဆက်သွယ်အကြောင်းခဲ့ဖူးသည်ဟု ၎င်းကဆိုသည်။

ကမ္ဘာ့ရတနာဘဏ်မှ ၂၀၂၀ခုနှစ် စက်တင်ဘာ ၃ရက် ရက်စွဲဖြင့် စတင်ငွေထုတ်ချေးပေးခဲ့ခြင်း ဖြစ်ကြောင်း၊ ဘဏ်မှလိုအပ်ချက်အရ တောင်းခံပါက ချက်ချင်းပြန်လည်ပေးဆပ်ရမည်ဟု ငွေပေးငွေယူစာချုပ်ပေါ်တွင် ၀န်ခံကတိ လက်မှတ်ရေးထိုးထားကြပြီးဖြစ်‌ကြောင်း၊ လစဉ်ပေးသွင်းရန် ကျန်ရှိသည့်‌ ငွေများအား ၂၀၂၁ ခုနှစ် နှစ်စမှစ၍ ချေးငွေပြန်မဆပ်ကြတော့ကြောင်းနှင့် ၃၀. ၉. ၂၀၂၁ ရက်တွင် နောက်ဆုံးထား၍ ငွေအကျေပြန်လည်ပေးသွင်းရန် ဘဏ်က အကြောင်းကြားထား ခြင်းဖြစ်သည်။

ပေးသွင်းရန်ပျက်ကွက်ပါက ဘဏ်လုပ်ထုံးလုပ်နည်းများနှင့်အညီ တရားစွဲဆိုသွားရန် ဆက်လက်လုပ်ဆောင်သွားမည့်အပြင် တရားစွဲဆိုရာတွင်လည်း ကုန်ကျစရိတ်ကို ငွေချေးသူများကသာ အကုန်အကျခံ တာဝန်ယူရမည်ဟု အသိပေး အကြောင်းကြားစာတွင် ဖော်ပြထားကြောင်း သိရသည်။mizzima

မွန်ပြည်သစ်ပါတီ NMSP  ထိန်းချုပ်နယ်စပ်ဖြစ်တဲ့ မွန်ပြည်နယ်၊ ရေးမြို့နယ်၊ ကျုံလောင်းကျေးရွာအနီးမှာ အာဏာသိမ်း စစ်ကောင်စီတပ် အင်းအား ၅၀ လောက်  ရောက်ရှိလာတယ်လို့  ဒေသခံတွေကထံက သိရပါတယ်။ 

စစ်ကောင်စီတပ် အင်အား ၅၀ လောက်ဟာ ကျုံလောင်းကျေးရွားအနီးကို စက်တင်ဘာ ၃ ရက်နေ့ မနက်ပိုင်းက ရောက်ရှိလာပြီး တပ်စွဲထားတာ ဖြစ်ပါတယ်။ စစ်ကောင်စီတပ်တွေ ရောက်ရှိလာတဲ့အတွက်ကြောင့် နှစ်ဖက်တိုက်ပွဲ ဖြစ်ပွားလာမှာကို ဒေသခံတွေ စိုးရိမ်နေကြပါတယ်။

လက်ရှိအခြေအနေနဲ့ ပတ်သက်ပြီး မွန်ပြည်သစ်ပါတီ တာဝန်ရှိသူတွေကို ဒီဗွီဘီက ဆက်သွယ် မေးမြန်းနေပေမယ့် အဆက်အသွယ် ရရှိခြင်း မရှိသေးပါဘူး။

အာဏာသိမ်း စစ်ကောင်စီဟာ အခုနောက်ပိုင်းမှာ တိုင်းရင်းသား နယ်မြေတွေထဲကို စစ်အင်အားတိုးချဲ့လာလို့  မြို့ပေါ်ရပ်ကွက်တွေမှာ လုံခြုံရေး တိုးမြှင့်လာတာ ဖြစ်ပါတယ်။

မွန်ပြည်သစ်ပါတီဟာ စစ်တပ်အာဏာသိမ်းပြီးနောက် ဧပြီ ၃၀ ရက်နေ့မှာ စစ်ကောင်စီက ဖွဲ့စည်းထားတဲ့ အမျိုးသားစည်းလုံးညီညွတ်ရေနဲ့ ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ NSPC နဲ့ သွားရောက်တွေ့ဆုံထားပါတယ်။DVB

အုပ်ချုပ်ရေးမြို့တော် နေပြည်တော်ဧရိယာအတွင်း ဩဂုတ် ၃၀ ရက်က အာဏာသိမ်းစစ်ကောင်စီတပ်၏ ယာဉ်တန်းကို တိုက်ခိုက်ခဲ့ကြောင်း အမျိုးသားညီညွတ်ရေးအစိုးရ (NUG) ၏ ကာကွယ်ရေးဝန်ကြီးဌာနက အတည်ပြုသည်။

နေပြည်တော် ပျဉ်းမနားမြို့နယ်တွင် အထူးဒေသ လက်နက်ကိုင်တပ်ဖွဲ့နှင့် ပူးတွဲစစ်ရေးလှုပ်ရှားမှု ပြုလုပ်နေစဉ် စစ်ကောင်စီယာဉ်များနှင့် တိုက်ပွဲဖြစ်ပွားခဲ့ပြီး စစ်ကောင်စီတပ်ဖွဲ့ဝင် ၁၁ ဦးသေဆုံးခဲ့သည်ဟု ပြည်သူ့ကာကွယ်ရေးတပ်မတော် (နေပြည်တော်) က စက်တင်ဘာ ၁ ရက်တွင် သတင်းထုတ်ပြန်ခဲ့သည်။

ပြည်သူ့ကာကွယ်ရေးတပ်မတော် (နေပြည်တော်) ၏ ထုတ်ပြန်ချက်နှင့် ပတ်သက်၍ NUG ကာကွယ်ရေးဝန်ကြီးဌာနအတွင်းဝန်က “ဒီထဲမှာ ဖော်ပြထားတဲ့ဖြစ်စဉ်က တကယ်ဖြစ်ခဲ့တဲ့ ပုံစံအတိုင်းပါပဲခင်ဗျ” ဟု Myanmar Now ကို ယနေ့ (စက်တင်ဘာ ၃) အတည်ပြုပြောကြားသည်။

ပျဉ်းမနားမြို့နယ် ပြည်ထောင်ကိုးအုပ်စု ကျေးရွာအုပ်စုအတွင်း ဩဂုတ်လ ၃၀ ရက်နေ့ ညနေပိုင်းက စစ်ကောင်စီယာဉ်တစ်စီးနှင့် ထိတွေ့မှုဖြစ်ပွားပြီးနောက် ည ၇ နာရီတွင် အလုံးအရင်းနှင့် ချီတက်လာသော စစ်ကောင်စီယာဉ်တန်းကို တိုက်ခိုက်ခဲ့ခြင်းဖြစ်ကြောင်း ပြည်သူ့ကာကွယ်ရေးတပ်မတော် (နေပြည်တော်) ၏ ထုတ်ပြန်ချက်တွင် ဖော်ပြထားသည်။ 

နေပြည်တော်ဧရိယာအတွင်း ထိုသို့တိုက်ခိုက်ခံရခြင်း မရှိကြောင်း စစ်ကောင်စီ၏ ဒုတိယပြန်ကြားရေးဝန်ကြီး ဗိုလ်ချုပ်ဇော်မင်းထွန်းက ယမန်နေ့တွင် People Media မှတဆင့် ငြင်းဆိုထားသည်။ 

“နေပြည်တော်နဲ့ အနီးတစ်ဝိုက်မှာ ထိတွေ့မှုဖြစ်စဉ်၊ တိုက်ပွဲဖြစ်စဉ်တွေ ဖြစ်ပွားမှုမရှိပါဘူး။ ဗုံးကွဲမှုဖြစ်စဉ်လည်း မရှိပါဘူး။ မိုင်းကွဲမှုဖြစ်စဉ်လည်း မရှိပါဘူး။ အွန်လိုင်းပေါ်ကနေတင်ပြီးတော့ ကျန်တဲ့ နယ်မြေတွေကလည်း ဟာ…နေပြည်တော်မှာတောင် ဖြစ်နေပြီဆိုတဲ့ ပုံစံမျိုးဖြစ်အောင် ဖန်တီးတာပါ” ဟု ၎င်းက ပြောသည်။ 

စစ်ကောင်စီပြောခွင့်ရပုဂ္ဂိုလ်က ထိုသို့ငြင်းဆိုထားသော်လည်း နေပြည်တော်ဧရိယာအတွင်း ပေါင်းလောင်းမြစ်အရှေ့ဘက်ကမ်းရှိ ကယားပြည်နယ်နှင့် ဆက်စပ်နေသော တောင်ပေါ်ဒေသတွင် စစ်ကောင်စီယာဉ်တန်းတိုက်ခိုက်ခံခဲ့ရသည်မှာ မှန်ကန်ကြောင်း Myanmar Now က ဆက်သွယ်မေးမြန်းခဲ့သည့် ပျဉ်းမနားမြို့နယ် ဒေသခံ သုံးဦးက အတည်ပြုသည်။ 

“ပျဉ်းမနားရဲ့ အရှေ့တောင်ဘက်ပေါ့။ ဆင်ဖြူတောင်ရဲ့ တောင်ဘက်လောက်မှာဖြစ်တာ။ အခုဖြစ်စဉ်ဖြစ်တဲ့ လွန်းထိုးကြီးလွန်းထိုးလေးက (လွန်းထိုးတက်ရသည်အထိ မတ်စောက်သောကြောင့် ဒေသခံများပေးထားသည့် လမ်းနာမည်) ကတ္တရာလမ်းပဲ။ လမ်းကကျဉ်းတယ်။ ပျဉ်းမနားမြို့နယ်ရဲ့ တောင်ပေါ် ကျေးရွာအုပ်စု ၇ ထဲက ပြည်ထောင်ကိုးတို့ ဘို့မတို့သွားတဲ့လမ်း။ လူသွားလူလာနည်းတယ်။ လူပြတ်တယ်” ဟု ပျဉ်းမနားမြို့ခံတစ်ဦးက ပြောသည်။

ထို့ပြင် စစ်ကောင်စီယာဉ်တန်းတိုက်ခိုက်ခံသည့် ပေါင်းလောင်းမြစ်အရှေ့ဘက်ခြမ်း ကျေးရွာအုပ်စုတစ်ခုတွင် နေထိုင်သူ ဒေသခံတစ်ဦးက ဖြစ်စဉ်ကို အတည်ပြုထားသည်။

“ဖြစ်စဉ်က မှန်တယ်။ ထောက်ပို့ယာဉ်အထက်ကိုသွားတာ မိုင်းဆွဲခံရတာ။ ပြီးတော့ ညနေပိုင်းမှာ အကူတက်လာတဲ့ယာဉ်တန်းနဲ့ ထပ်ဖြစ်ကြတယ်။ အောင်ဘိတ်သိတ်ရွာနဲ့ လက်ဘက်တောင်ရွာကြားမှာ ဖြစ်တာ။ အသံတွေကြားရတယ်။ လက်ဘက်တောင်ရွာက တချို့ဆို သူတို့ကို တိုင်လာပတ်မှာစိုးလို့ အဲ့ညက မအိပ်ရကြဘူး” ဟု အဆိုပါဒေသခံက ပြောသည်။ 

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက နေပြည်တော်ဧရိယာအတွင်း တိုက်ခိုက်ခံရသည်ကို ငြင်းဆိုထားသည့်အပြင် အခြားနယ်မြေများ၌လည်း ဗုံးခွဲတိုက်ခိုက်မှု၊ ချောင်းမြောင်းပစ်ခတ်မှု နည်းပါးလာသည်ဟု ဆိုထားသည်။

သို့သော် အမြို့မြို့အနယ်နယ်တွင် နေ့စဉ်နှင့်အမျှ ဖြစ်ပေါ်နေသော ဗုံးခွဲတိုက်ခိုက်ခံရမှုများ၊ အခြား ပြည်နယ်နှင့် တိုင်းဒေသများတွင် တိုင်းရင်း သားလက်နက်ကိုင်အဖွဲ့အစည်းများအပါအဝင် ဒေသခံ ပြည်သူ့ကာကွယ်ရေးတပ်ဖွဲ့များနှင့် တိုက်ပွဲများအတွင်း ၎င်းတို့ဘက်မှ ထိခိုက်သေဆုံးမှုအခြေအနေများနှင့် ပတ်သက်၍ စစ်ကောင်စီက တစ်စွန်းတစ်စမျှ သတင်းထုတ်ပြန်ခြင်း မရှိပေ။ myanmar now

စစ်ကိုင်းတိုင်း၊ ဒီပဲယင်းမြို့နယ်၊ မူးခတွင်းကျေးရွာက အကြောင်းမဲ့ဖမ်းဆီးခံခဲ့ရတဲ့ ရွာသား ၇ ဦးကို စစ်တပ်ကပြန်လည်လွှတ်ပေးလိုက်ပြီလို့ ဒေသခံရွာသားတွေက ပြောပါတယ်။

အဆိုပါရွာသားတွေကို ဩဂုတ်လ ၈ ရက်နေ့က စစ်ကောင်စီ စစ်တပ်က ရွာကို စီးနင်းပြီးဖမ်းဆီးသွားခဲ့တာဖြစ်ပြီး ၁၄ နှစ်အရွယ် ကလေးတစ်ဦးလည်း ဖမ်းဆီးခံရတဲ့ အထဲပါသွားတာဖြစ်ပါတယ်။  

ဒေသခံရွာသားတစ်ဦးက “သူတို့ ဒီနေ့မနက်ပဲ ပြန်လွှတ်ပေးလိုက်တယ်ဗျ။ အသက် ၁၄ နှစ်လောက်ရှိတဲ့ ကလေး တစ်ယောက်အပါအဝင် အသက်အရွယ်စုံ ၇ ယောက်ပေါ့‌ဗျာ။ ကျနော်တို့ရွာကို စစ်တပ်ဝင်တုန်းက ဖမ်းသွားတာ။ စစ်တပ်ဝင်တဲ့အချိန်တုန်းကတော့ ဘယ်သူ့ပါတယ်၊ ဘယ်နှယောက်ဖမ်းတယ် ဆိုတာ အတိအကျမသိကြဘူးလေ၊ ပြေးကြရလွှားကြရတာဆိုတော့။ အခုမှပဲ ဘယ်သူ ဘယ်ဝါ တွေ ဖမ်းတယ်ဆိုတာသိရတာ။ သူတို့အားလုံး  ကျန်းမာရေးကတော့ ကောင်းပါတယ်”လို့ပြောပါတယ်။

ဒီပဲယင်းမြို့နယ်မှာ ၈ လေးလုံးနှစ်ပတ်လည်နေ့ကစပြီး ကျေးရွာ ၁၀ ရွာလောက်ကို  စစ်တပ်က စီးနင်းဝင်ရောက်ခဲ့တာဖြစ်ပြီး ဩဂုတ်လ ၂၁ ရက်နေ့မှာတော့ ဒီပဲယင်းအရှေ့ပိုင်းကျေးရွာတွေ အားလုံးကို မီးရှို့ဖျက်ဆီး ပစ္စည်းယူ ဒေသခံတွေကို ဖမ်းဆီးခဲ့တာဖြစ်ပါတယ်။DVB