SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ဧရာဝတီတိုင်း၊ ကျုံမငေးမြို့နယ်မှာ စက်တင်ဘာ ၃ ရက်နေ့ ညပိုင်းက အမျိုးသား ၂ ဦးကို PDF ဆိုပြီး စွပ်စွဲကာ စစ်ကောင်စီက ဖမ်းဆီးသွားတယ်လို့ သိရပါတယ်။

ကွမ်းသီးချောင်းလေးကျေးရွာမှာနေထိုင်တဲ့ ကိုလှထွန်းနဲ့ ကိုကျော်ဇေယျာတို့ ၂ ဦးကို စစ်ကောင်စီက မနေ့ညပိုင်းမှာ လာရောက်ဖမ်းဆီးသွားတာလို့ ဒေသခံတွေက ပြောပါတယ်။

ဒေသခံတဦးက “ခုရက်ထဲ ညပိုင်း ရွာတွေကို ဝင်စစ်တာပိုများလာတယ်။ မနေ့ညကလည်း အဲ့ရွာက တောင်ယာလုပ်တဲ့သူ ၂ ဦး ပါသွားတယ် ကြားတယ်။ ဘယ်သူတွေဆိုတာတော့ သေချာမသိရသေးဘူး” လို့ ပြောပါတယ်။

စစ်ကောင်စီလက်အောက်ခံ ရဲတပ်ဖွဲ့ရဲ့ ကြေးနန်းစာထဲမှာတော့ PDF လို့ စွပ်စွဲဖမ်းဆီးခံရသူ ၂ ဦးကို လက်လုပ်သေနတ်၊ ဖောက်ခွဲရေးပစ္စည်းတွေနဲ့ ဖမ်းမိခဲ့တယ်လို့ ဆိုပါတယ်။

ဧရာဝတီတိုင်းမှာ အကြမ်းဖက်စစ်ကောင်စီက PDF လူငယ်တွေ ရှိနိုင်တဲ့နေရာတွေကို စက်တင်လာလဆန်းပိုင်းက စတင်ပြီး အင်အား အလုံးအရင်းနဲ့ ဝင်ရောက်ရှာဖွေဖမ်းဆီးတာတွေ ပြုလုပ်နေတာလည်း ဖြစ်ပါတယ်။

ဧရာဝတီတိုင်း၊ လပွတ္တာမြို့မှာလည်း PDF တပ်ဖွဲ့ဝင်တွေ ရှိနိုင်မယ့်နေရာတွေကို အကြမ်းဖက်စစ်ကောင်စီက ပိတ်ဆို့ရှာဖွေတာတွေ ပြုလုပ်နေတယ်လို့ သိရပါတယ်။

လပွတ္တာမြို့မှာ စက်တင်ဘာလ ၁ ရက်နေ့က စတင်ပြီး ညစဥ်ဆိုသလို မြို့ပေါ်ရပ်ကွက်တွေကို လိုက်လံပြီး ဧည့်စာရင်းစစ်တာတွေ၊ ကင်းပုန်းဝပ်တာတွေပြုလုပ်ကာ PDF တွေကို ဖမ်းဆီးနိုင်ဖို့ ပြုလုပ်လာတယ်လို့ ဒေသခံတွေက ပြောပါတယ်။

“ဒီလစကတည်းက ပိုကြမ်းလာတာ အရင်ကဆို စစ်တာရှိတယ်၊ ဒါပေမဲ့ ကြိုသိတယ်။ ခုက ဘာမှ မသိရတာ။ စစ်တာကတော့ လူစာရင်းပေါ့၊ အိမ်မှာရှိတဲ့သူထဲ လူစိမ်းပါလား ပါရင် ဧည့်စာရင်းတိုင်ထားလား အဲ့တာမျိုးတွေပေါ့” လို့ ပြောပါတယ်။

နေအိမ်တွေမှာ လိုက်စစ်ဆေးလို့ လူစိမ်းရှိပြီး ဧည့်စာရင်းမတိုင်ထားပါက ရဲစခန်းမှာ လိုက်ဖြေရှင်းရတာမျိုးရှိပြီး စစ်ဆေးတာတွေ မဖြေနိုင်ပါက ပြန်မလွှတ်ပေးတာမျိုးတွေလည်း ရှိနေတယ်လို့ ဆိုပါတယ်။

လပွတ္တာမြို့မှာ စက်တင်ဘာ ၁ ရက်နေ့က စတင်ကာ မြို့ပေါ်ရပ်ကွက်တွေကို အကြမ်းဖက်စစ်ကောင်စီက ရှောင်တခင် ဝင်ရောက်စစ်ဆေးတာတွေပြုလုပ်ခဲ့ပြီး ဧည့်စာရင်းမတိုင်ထားသူတွေထဲက လူငယ် ၃ ဦးကို ဖမ်းဆီးခဲ့တယ်လို့ သိရပါတယ်။DVB

ကရင်ပြည်နယ်၊ ကြာအင်းဆိပ်ကြီး (နို့တကော) မြို့နယ်အတွင်း ယမန်နေ့ စက်တင်ဘာလ ၃ ရက် မွန်းလွဲ ၁ နာရီ ၅၀ မိနစ်ခန့်တွင် နို့တာဃော်ကျေးရွာနှင့် လောသောမော်ကျေးရွာအကြားတွင် အကြမ်းဖက်စစ်ကောင်စီမှ ခမရ ၅၄၉ တပ်နှင့် ကရင်လွတ်မြောက်ရေးတပ်မတော် KNLA တပ်မဟာ ၆ တပ်ရင်း ၁၇ တပ်ခွဲ ၁ နှင့် တိုက်ပွဲဖြစ်ပွားခဲ့ပြီး စစ်ကောင်စီဘက်မှ ၃ ဦး ထိခိုက်ဒဏ်ရာရသွားကြောင်း ဒူးပလာယာခရိုင်မှ သတင်းထုတ်ပြန်သည်။

“မနေ့က ၁ နာရီခွဲကျော်လောက်မှ စဖြစ်တာ၊ စစ်ကောင်စီတပ်တွေ ရောက်လာတော့ KNLA ဘက်က အရင်ပစ်တာလို့ ပြောတယ်၊ နို့တာဃော် (နောင်တခို) ဘုန်းကြီးကျောင်းအရှေ့က ရော်ဘာခြံမှာ ဖြစ်ကြတာ၊ ဖြစ်ပြီးတော့ စစ်ကောင်စီတပ်တွေက နောင်တခို ဘုန်းကြီးကျောင်းမှာ ညအိပ်တာ၊ အင်အားက ၆၀ လောက်ရှိမယ်၊ စစ်ကောင်စီ ဗိုလ်ကြီးက ဧရာဝတီတိုင်း ကျုံပျော်က လို့ သိရတယ်” ဟု ဒေသခံတစ်ဦးမှ ရန်ကုန်ခေတ်သစ်သို့ အတည်ပြု ပြောဆိုသည်။

နောင်တခိုဘုန်းကြီးကျောင်းတွင် တပ်စွဲခဲ့သော စစ်ကောင်စီတပ်များသည် ယမန်နေ့ညပိုင်းတွင် ဒေသခံရွာသားများ၏ မော်တော်ယာဉ်များကို အသုံးပြုပြီး သူတို့ သွားလာချင်တဲ့နေရာများကို လိုက်လံပို့ဆောင်ခိုင်းသည်ဟု သတင်းရရှိသည်။

“နောင်တခိုမှာက အိမ်ခြေတစ်ရာလောက်ရှိတယ်၊ သူတို့ ပစ်ခတ်တဲ့ အနီးတဝိုက်က အိမ် ၄၀ လောက်က လူတွေကတော့ ရှောင်ကြတာပေါ့၊ အကုန်ကြောက်နေကြတာလေ” ဟု နောင်တခိုကျေးရွာသားတစ်ဦးမှ ရန်ကုန်ခေတ်သစ်သို့ ပြောဆိုသည်။

စစ်ကောင်စီတပ်ဖွဲ့များသည် ယနေ့နံနက် ၇ နာရီခွဲခန့်တွင် နို့တာဃော် (နောင်တခို) ကျေးရွာမှ ထွက်ခွာသွားပြီး နို့မိုဝါးကျေးရွာအနီးတွင် စခန်းချနေကြောင်း ဒူးပလာယာခိုင်မှ သတင်းထုတ်ပြန်ထားသည်။khit thit

မွန်ပြည်နယ်၊ သထုံမြို့၊ သိမ်ကုန်းရပ်ကွက်မှာ စစ်ကောင်စီတပ်ဖွဲ့ဝင်တွေ လာရောက် ဖမ်းဆီးသွားတဲ့ အမျိုးသမီး ၂ ဦးကို ဖမ်းဆီးပြီး ၁၄ ရက်ကြာတဲ့အထိ အဆက်အသွယ်မရသေးတဲ့အတွက်ကြောင့် စိုးရိမ်နေရတယ်လို့ မိသားစုဝင်တွေက DVB ကို ပြောပါတယ်။

ဖမ်းဆီးခံ အသက် ၃၀ အရွယ် မစုမြတ်နွယ်နဲ့ အသက် ၂၈ နှစ် အရွယ် မခေမာလွင်တို့ကို ပြီးခဲ့တဲ့ သြဂုတ် ၂၂ ရက်နေ့က သူတို့ ငှားရမ်းနေထိုင်နေတဲ့ နေအိမ်မှာ စစ်ကောင်စီတပ်ဖွဲ့တွေက လာရောက် ဖမ်းဆီးသွားခဲ့တာ ဖြစ်ပါတယ်။

သူတို့နှစ်ဦး ဖမ်းဆီးခံရပြီးနောက် အကျဉ်းထောင်၊ ရဲစခန်း အပါအဝင် စစ်ကြောရေးစခန်းတွေမှာ လိုက်လံစုံစမ်းနေပေမယ့် လက်ရှိအချိန်ထိ သတင်းအစအန မရသေးဘူးလို့ မခေမာလွင်ရဲ့ ညီမဖြစ်သူက DVB ကို ပြောပါတယ်။

သူတို့နှစ်ဦးဟာ ပြီးခဲ့တဲ့ ဖေဖော်ဝါရီ ၁၉ ရက်နေ့က ရန်ကုန် စမ်းချောင်းမြို့နယ် ဆန္ဒပြပွဲမှာ ဖမ်းဆီးခံခဲ့ရပြီးနောက် ပုဒ်မ ၅၀၅(က) နဲ့ တရားစွဲဆိုခံခဲ့ရတာ ဖြစ်ပါတယ်။

အဲဒီနောက်မှာတော့ မတ်လ ၂၆ ရက်နေ့က မစုမြတ်နွယ်နဲ့ မခေမာလွင်တို့ အပါအဝင် ဖမ်းဆီးခံထားရသူ အချို့ကို အင်းစိန်ထောင်ကနေ ခံဝန်ဖြင့် ပြန်လွှတ်ပေးခဲ့ပါတယ်။

ခံဝန်နဲ့ ပြန်လွတ်ပြီးနောက် သူတို့ ၂ ဦးဟာ သထုံမြို့၊ သိမ်ကုန်းရပ်ကွက် အလှပြင်ဆိုင်တစ်ခုမှာ အလုပ်လာလုပ်ရင်း ဒုတိယအကြိမ် ထပ်မံဖမ်းဆီးခံလိုက်ရတာ ဖြစ်ပါတယ်။DVB

ဧရာ၀တီတိုင်း၊ ဝါးခယ်မမြို့နယ် ကွမ်းသီးချောင်းလေးကျေးရွာမှ အမျိုးသားနှစ်ဦးအား တူမီး‌ သေနတ် ပြုလုပ်သည်ဟုဆိုကာ စစ်ကောင်စီတပ်နှင့်ရဲများက ဖမ်းဆီးမှု ယမန်နေ့ စက်တင်ဘာ ၃ ရက် တွင်ဖြစ်ပွားခဲ့သည်။

ယမန်နေ့ ညနေ ၃ နာရီအချိန်တွင် စစ်ကောင်စီစစ်သားငါးဦးနှင့် ရဲသုံးဦးတို့က အသက် ၄၀ အရွယ်ကိုဇေယျာနှင့် အသက် ၇၀ အရွယ် ဦးလှထွန်း တို့ကို ဖမ်းဆီးသွားခဲ့ခြင်း ဖြစ်သည်။

“ကိုဇေယျာက လက်သမားလုပ်တတ်တယ်။ အရင်ကလည်း ချင်းပြည်နယ်ဘက်မှာ အလုပ်လုပ်ဖူးတော့ တောကောင်ပစ်တဲ့သေနတ်တွေ ဘာတွေလုပ်တတ်တယ်။ အဲဒါနဲ့ သေနတ်လုပ်တယ်စွပ်စွဲပြီးဖမ်းတာ၊ သူတို့ကိုလာဖမ်းကြတုန်းက ကိုဇေယျာကိုတော့ လက်ကိုကြိုးနဲ့တုပ်တယ်။လက်ထိပ်လည်းခတ်တယ်။ ပြီးတော့ရိုက်နှက်ပြီး ဖမ်းသွားကြတာ၊ နောက်တစ်ဦးကိုလည်းတစ်ခါတည်းဖမ်းသွားတာ၊မြို့နယ်ရဲစခန်းကိုဖမ်းသွားတယ်လို့ကြားရပါတယ်” ဟုဒေသခံတစ်ဦးက ကိုပြောသည်။

၎င်းတို့နှစ်ဦးသည် ကျေးရွာမှ စစ်ထွက်သတင်းပေးဒလန်တစ်ဦးဖြစ်သူ ကိုအောင်ငြိမ်း၏ သတင်းပေးမှုကြောင့် အဖမ်းခံရခြင်းဖြစ်ကြောင်း ဒေသခံများကပြောသည်။ “ကိုအောင်ငြိမ်းက စစ်ထွက်လဲဖြစ်သလို၊ အာဏာသိမ်းပြီး တစ်ပတ်လောက်အကြာက စစ်သားတွေကို ထမင်းခေါ်ကြွေးတာမျိုး၊ နောက်ရွာသားတွေထဲက NLD ပါတီကို ထောက်ခံတဲ့သူတွေကို စစ်တပ်ကိုသတင်းပေးတာမျိုးတွေလုပ်တယ်။ ခုတောင်အချို့က ပြေးနေရတာမျိုးတွေရှိတယ်” ဟုဒေသခံတစ်ဦးက ပြောသည်။

ကွမ်းသီးချောင်းလေးကျေးရွာသည် ဧရာဝတီတိုင်းအတွင်းတည်ရှိပြီး ဝါးခယ်မမြို့နှင့် ရေလမ်းခရီး ၁ နာရီခွဲခန့်သွားရပြီး အိမ်ခြေ ၃၅၀ ခန့်ရှိသည်။Mizzima