SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

အာဏာသိမ်းစစ်ကောင်စီအပေါ် လှည်းနေ၊ လှေအောင်း၊ မြင်းဇောင်းမကျန် ဆန့်ကျင်မည့် ပြည်သူ့တော်လှန်ရေး ယနေ့(စက်တင်ဘာ၇)စပြီဟု အမျိုးသားညီညွတ်ရေးအစိုးရ(NUG) က ကြေညာပြီးနောက် ရန်ကုန်၊ မန္တလေးတို့တွင် လှုပ်လှုပ်ခတ်ခတ်ဖြစ်နေသည်။

ဈေးများ၊ ဆေးဆိုင်များတွင် လူစည်ကားနေသလို လမ်းမများပေါ်တွင် စစ်ကားများ  ယခင်နေ့များကထက် ပိုမို လှည့်လည်သွားလာနေကြောင်း မျက်မြင်တွေ့ရှိသူတို့က ပြောသည်။

ညနေ ၄ နာရီအချိန်အတွင်း ရရှိထားသော သတင်းများအရ နံနက်ပိုင်းတွင် မရမ်းကုန်းမြို့နယ် ဘုရင့်နောင်တံတားအနီး၊ မွန်းလွဲပိုင်းတွင် သင်္ကန်းကျွန်းမြို့နယ် လျှပ်စစ်ရုံးအနီးတို့ တွင် ပေါက်ကွဲမှုများဖြစ်ခဲ့သည်။ ထိခိုက်ဒဏ်ရာရမှု အသေးစိတ်အခြေအနေများကိုမူ မသိရသေးပါ။

ထို့အတူ မန္တလေးမြို့ ပြည်ကြီးတံခွန်မြို့နယ်၊ သင်ပန်းကုန်းရပ်ကွက်ရှိ ရဲကင်းစခန်းတစ်ခုမှာ မွန်းလွဲပိုင်းတွင် လက်ပစ်ဗုံးဖြင့် တိုက်ခိုက်ခံခဲ့ရသဖြင့် ရဲနှစ်ဦး ဒဏ်ရာရသွားခဲ့သည်ဟု သိရသည်။ 

ရန်ကုန်မြို့လယ်ခေါင် ဆူးလေတွင် ပုံမှန်ထက် ယာဉ်အသွားအလာကျပ်တည်းနေပြီး ၂၆လမ်းတွင် နံနက်တစ်ပိုင်းဖွင့်လှစ်လေ့ရှိသည့် ရပ်ကွက်ဈေးတစ်ခု၌ပင် စစ်သားတချို့ ကင်းလှည့်နေသည်။ 

“ပုံမှန်လှည့်လေ့မရှိဘူးလို့တော့ ပြောတယ် ဈေးထဲကလူတွေက။ နောက်တစ်ခုက ဆန်ဆိုင်တွေ၊ ဆီဆိုင်တွေမှာကတော့ အရင်ကထက် လူဝယ်တာ ပိုများတယ်။ ဆိုင်တွေကလည်း အရင်နေ့တွေကထက် (ဝယ်သူ) ပိုများတယ်လို့ ပြောတယ်” ဟု ရန်ကုန် ကျောက်တံတားမြို့နယ်နေ ကိုဟိန်းက ပြောသည်။

အခြေခံစားသောက်ကုန်များ လက်လီလက်ကားရောင်းချသည့် ညောင်ပင်လေးဈေးတွင်လည်း လူစည်ကားနေကြောင်း ထိုနေရာသို့  နံနက်ပိုင်းတွင် ရောက်ခဲ့သည့် ဒေါပုံမြို့နယ်နေ ကိုဘုန်းက ပြောသည်။

“ဘာများဖြစ်မလဲဆိုပြီး စိုးရိမ်စိတ်တွေပေါ်လာတယ်။ အဲဒီတော့ အခြေခံစားသောက်ကုန်တွေကို ပိုပြီးတော့ ဝယ်လာတာကို တွေ့ရတယ်၊ ညောင်ပင်လေးဈေးလိုဟာမျိုး City Mart လိုနေရာမျိုးတွေမှာ ကြိတ်ကြိတ်တိုးဝယ်ယူနေတာလည်းတွေ့ရတယ်။ နောက်တစ်ခုက ဆေးဆိုင်တွေမှာ ခါတိုင်းရက်တွေကလို မဟုတ်ဘဲ (၀ယ်သူများလို့) တန်းစီပြီးဝယ်တဲ့ဟာမျိုးတွေ့ရတယ်”ဟု ၎င်းက ပြောသည်။

ထို့အပြင် အာဏာသိမ်းပြီးနောက် မြို့ထဲလမ်းမများပေါ်၌ အင်အားအနည်းငယ်သုံး၍ နေရာအတော်များများတွင် လုံခြုံရေးယူလေ့ရှိသည့် စစ်ကောင်စီတပ်ဖွဲ့ဝင်များကို ယနေ့နံနက် မတွေ့ရဘဲ ရဲစခန်းကဲ့သို့ နေရာမျိုးတွင်သာ တစ်စုတစ်စည်းတည်းတွေ့ရကြောင်း ကိုဘုန်းက ဆက်ပြောသည်။

“ကားတွေနဲ့ ပုံစံမျိုးစုံ ပိုပြီးပတ်နေတာ တွေ့ရတယ်။ ပြည်သူတွေကလည်း အဲဒါတွေကို စိုးရိမ်နေတာပေါ့ ဘာများဖြစ်မလဲဆိုပြီးတော့”ဟု ၎င်းက ပြောသည်။

ရန်ကုန်ရှိ Capital၊ Metro ကုန်တိုက်ကြီးများတွင် ဆန်၊ ဆီ၊ ကုန်ခြောက်နှင့် ရေရှည်အထားခံသည့် စားသောက်ကုန်များဝယ်ယူသူ အများအပြားတွေ့ရကြောင်း ယနေ့မွန်းလွဲပိုင်းတွင် မျက်မြင်တွေ့ခဲ့သူတစ်ဦးက ပြောသည်။

“လူတွေက ဈေးထွက်ဝယ်ကြလို့ ထင်တယ်။ ရန်ကုန်က လမ်းတွေမှာ ကားပိတ်တာက ကိုဗစ်မဖြစ်ခင် ဟိုအရင်အချိန်တုန်းကလောက်နီးပါးကို ဖြစ်လာတာ”ဟု ၎င်းက ပြောသည်။

ညောင်တန်းအိမ်ယာတွင် နေထိုင်သူတစ်ဦး၏ အဆိုအရ ပုဇွန်တောင်ဈေးအတွင်း ဈေးဝယ်သူ ပုံမှန်ထက် များပြားနေကြောင်း၊ ဆေးဆိုင်တွင် နာရီနှင့်ချီ၍ တန်းစီစောင့်ဆိုင်းဝယ်ယူခဲ့ရကြောင်း သိရသည်။

“အခုမနက် ဆေးဆိုင်မှာ ဆေးသွားဝယ်တာ ၂ နာရီလောက် တန်းစီစောင့်လိုက်ရတယ်။ ဈေးထဲမှာလည်း လူတွေကို အများကြီး။ ဆိုင်တိုင်းလိုလိုကို ဈေးဝယ်သူတွေရှိတယ်။ အချင်းချင်းပြောနေကြတာ ရိက္ခာတွေ ဆေးတွေ စုထားကြဆိုပြီး။ အခြား အသွားအလာစစ်ဆေးတာတွေတော့ မရှိသေးဘူး”ဟု ၎င်းက ပြောသည်။

အောက်ပုဇွန်တောင်လမ်းမပေါ်ရှိ ပုဇွန်တောင်မြို့နယ် အထွေထွေအုပ်ချုပ်ရေးဦးစီးဌာနရုံးအနီးတွင် သဲအိတ်အကာအရံများဖြင့် တပ်စွဲထားပြီး လုံခြုံရေးယူထားသည့် စစ်သားများထဲတွင် အရာရှိအဆင့်အချို့ ပါဝင်သည်ကို တွေ့ရကြောင်း အနီးအနားတွင် နေထိုင်သူတစ်ဦးက ပြောသည်။

ထို့အတူ ဗိုလ်ချုပ်လမ်းမပေါ်ရှိ ပုဇွန်တောင်မြို့နယ်ရဲစခန်းတွင် စက်သေနတ်ပါ တပ်ဆင်၍ ပစ်ခတ်ရန် အသင့်အနေထားပြင်ထားသည်ကို တွေ့ရကြောင်း လမ်း ၅၀ ပတ်ဝန်းကျင်တွင် နေထိုင်သည့် အမျိုးသားတစ်ဦးထံမှ သိရသည်။

“သဲအိတ်တွေဘာတွေ အရင်ကထက် ပိုများလာတယ်။ ခံတပ်ပြင်ထားသလိုမျိုး။ စခန်းအပေါ်ထပ်မှာ စက်သေနတ်နဲ့ ချိန်ထားတာတွေ့တယ်။ အရင်ရက်တွေက မတွေ့ဘူး”ဟု ၎င်းက ဆိုသည်။

စစ်အုပ်ချုပ်ရေးကြေညာထားသည့် တောင်ဒဂုံမြို့နယ်ရှိ လမ်းမများပေါ်တွင် ယနေ့ မနက် ၉ နာရီမတိုင်မီကတည်းက စစ်ကား ၄ စီးခန့်ပါဝင်သည့် စစ်ယာဉ်တန်းများသွားလာနေသည်ကို တွေ့ရ ကြောင်း ထိုမြို့နယ်တွင် နေထိုင်သူတစ်ဦးက ပြောသည်။

တောင်ဒဂုံကဲ့သို့ပင် စစ်အုပ်ချုပ်ရေးကြေညာထားသည့် ရွှေပြည်သာမြို့နယ်ခန်းမအတွင်း တပ်စွဲထားသည့် စစ်သည်အရေအတွက်မှာ ယခင်ကထက် ပိုများလာသလို လူစည်ကားရာ လမ်းဆုံလမ်းခွများ၊ လမ်းမများတွင် စစ်ဆေးမှုများရှိနေသည်ဟု ဒေသခံ အမျိုးသားတစ်ဦးထံမှ သိရသည်။

“အင်အားပြန်ဖြည့်ထားတာ တွေ့ရတယ်။ အရင်ကဆို မြို့နယ်ခန်းမထဲမှာ နှစ်စီးလောက်ရှိတာ။ အခုဆို လေးစီးလောက်ရှိတယ်”ဟု ၎င်းက ပြောသည်။

တောင်ဒဂုံ၊ ရွှေပြည်သာတို့နှင့်အတူ စစ်အုပ်ချုပ်ရေးကြေညာခံထားရသည့် လှိုင်သာယာမြို့နယ်သို့ အဝင်အထွက်ပြုရာတွင် အဓိကကျသည့် ဘုရင့်နောင်တံတားအနီးတွင် နံနက် ၁၀ နာရီဝန်းကျင်က ပစ်ခတ်မှုအချို့ရှိခဲ့ကြောင်း ဒေသခံနှစ်ဦးက ပြောသော်လည်း ဖြစ်စဉ်အသေးစိတ်ကို မသိရသေးပါ။

ဘုရင့်နောင်တံတားနှင့် သိပ်မဝေးလွန်းသော နေရာတွင်ဖြစ်သည့် သမိုင်း၊ မုဒိတာအိမ်ယာတွင် နေထိုင်သည့် အမျိုးသမီးတစ်ဦးကလည်း နံနက် ၁၀ နာရီခန့်က ပေါက်ကွဲမှုတစ်ခုဖြစ်ပြီးနောက် တံတားကို ခေတ္တပိတ်ခဲ့သည်ဟု ကြားသိရကြောင်း ပြောသည်။

ထိုသို့ ဖြစ်ပြီးချိန်တွင် လှိုင်သာယာရှိ နေရာအချို့တွင် စစ်ကောင်စီက စစ်ဆေးမှုများလုပ်ဆောင်နေသော်လည်း အပြင်ထွက်၍ ပစ္စည်းဝယ်သူများနေပြီး အိမ်ဆောက်ပစ္စည်းဆိုင်များပါမကျန် ရောင်းကောင်းနေကြောင်း (၇) ရပ်ကွက်တွင် ဆိုင်ဖွင့်ထားသူတစ်ဦးက ပြောသည်။

“လူတွေကတော့ အိမ်ဆောက်ပစ္စည်းတွေ တအားဝယ်ကြတယ်။ ပလိန်းသွပ်တို့ ဘာတို့ တအားဝယ်ကြတယ်။ သူတို့အိမ်တွေ ကာဖို့အတွက်လေ။ ကျနော်ကဆိုင်ဖွင့်ထားတာ သွပ်ပြားတွေ တအားဝယ်ကြတယ်။ လေးခွတွေဝယ်တယ်၊ ဓားတွေဝယ်တယ်”ဟု ၎င်းက ပြောသည်။

ယနေ့ ညနေ ၄နာရီမတိုင်မီ သတင်းများအရ သင်္ဃန်းကျွန်းမြို့နယ်လျှပ်စစ်ရုံးရှေ့တွင် ပေါက်ကွဲမှုတစ်ခုဖြစ်ခဲ့ကြောင်း သိရသော်လည်း ထိခိုက်ဒဏ်ရာရသူ ရှိမရှိနှင့် ပျက်စီးဆုံးရှုံးမှုအခြေအနေတို့ကိုမူ အတိအကျ မသိရသေးပေ။ ထိုနေရာအနီးတွင် စစ်ကောင်စီတပ်က လုံခြုံရေးချထားကာ ရှာဖွေစစ်ဆေးနေကြောင်း မျက်မြင်တွေ့ရှိသူတစ်ဦးက အတည်ပြုသည်။

ရန်ကုန်မြို့၏ ကုန်ဈေးနှုန်းအတက်အကျကို ဖန်တီးနိုင်စွမ်းရှိသည့် ဘုရင့်နောင်ပွဲရုံတန်းနှင့် ကုန်စည်ဒိုင်တို့တွင် ကုန်စည်ဝင်ထွက်မှု၊ ကုန်ဈေးနှုန်းနှင့် အရောင်းဝယ် ပုံမှန်သာဖြစ်ကြောင်း ဘုရင့်နောင်ကုန်စည်ဒိုင် ဥက္ကဌ ဦးခင်ဟန်က ပြောသည်။ 

ပွဲရုံပေါင်း ၁,၃၀၀ ကျော်ရှိသည့် ထိုပွဲရုံဝင်းအတွင်း နိုင်ငံအနှံ့မှ စိုက်ပျိုးထွက်ကုန်၊ ငါးပိငါးခြောက်နှင့် စားဖိုဆောင်သုံးစားသောက်ကုန်များ ရောင်းဝယ်နေခြင်းဖြစ်သည်။

NUG၏ ရုတ်တရက်ကြေညာမှုကြောင့် ဈေးကွက်အတွင်း သိသာသည့် သက်ရောက်မှုများ ပေါ်ပေါက်ခြင်းမရှိဟု ဦးခင်ဟန်က ယနေ့မွန်းလွဲပိုင်းတွင် ပြောထားသည်။

“ပုံမှန်ပါပဲ။ အမှန်ကတော့ ဒီဟာကလည်း D-Day မဟုတ်ပါဘူး။ သူတို့လည်း အရေးပေါ်အခြေအနေကြေညာနေတာပါ။ အဲဒီလိုပဲ ယူဆရတာပဲ” ဟု ၎င်းက ဆိုသည်။

ရွှေဈေးကွက်အတွင်း လက်တွေ့အရောင်းအဝယ်မဖြစ်သော်လည်း ယနေ့ဈေးနှုန်းမှာ စံချိန်တင်သွားခဲ့ပြီး တစ်ကျပ်သားလျှင် ကျပ်၁၈ သိန်းအထိ ဖြစ်ခဲ့ကြောင်း မြန်မာနိုင်ငံရွှေလုပ်ငန်းရှင်များအသင်း ဥက္ကဌ ဦးကျော်ဝင်းထံမှ သိရသည်။

“လူတွေကလည်း ကောလာဟလတွေ ဟိုဟာပြောလိုက် ဒီဟာပြောလိုက်တွေက ရှိသေးတယ်။ ဒါတွေ နည်းနည်းကျော်လွန်သွားတဲ့အခါ ပြန်အေးဖို့ရှိပါတယ်” ဟု ၎င်းက သုံးသပ်သည်။

ရန်ကုန်မြို့တွင် ဖွင့်လှစ်ထားသည့် ပုဂ္ဂလိကဘဏ်များမှာမူ သုံးစွဲသူများထံ ကြိုတင်အသိပေး ကြေညာထားသည့် ပုံမှန်အချိန်ဇယားများအတိုင်း ဖွင့်လှစ်ထားသည်ကို တွေ့ရသည်။

သို့သော် ဖုန်းလိုင်း၊ အင်တာနက်လိုင်းများ ဖြတ်မည်ဆိုသည့် သတင်းများ ကျယ်ကျယ်ပြန့်ပြန့် ထွက်နေသဖြင့် Wave Money ကဲ့သို့သော ဒီဂျစ်တယ်စနစ်ဖြင့် ငွေထုတ်၊ ငွေလွှဲကိစ္စများကို အသုံးပြုသူအရေအတွက် ယနေ့ နံနက်တွင် နှစ်ဆခန့်မြင့်တက်လာကြောင်း သာကေတမြို့နယ်အတွင်းရှိ ရပ်ကွက်တစ်ခုတွင် စတိုးဆိုင်ဖွင့်လှစ်ထားသူတစ်ဦးက ပြောသည်။

စစ်ကောင်စီ၏ ဗဟိုဘဏ်က အမေရိကန် ၁ ဒေါ်လာလျှင် ၁၇၂၅ ကျပ် ဝန်းကျင်ဈေးဖွင့်ထားသည့် ဒေါ်လာဈေးမှာမူ ပြင်ပဈေးကွက်တွင် ၁၈၃၅ ကျပ်နှင့်အထိ ဖြစ်နေကြောင်း စုံစမ်းသိရသည်။

မန္တလေးမြို့အခြေအနေ

ကုန်ပစ္စည်းများ လက်လီ၊ လက်ကားရောင်းချရာ မန္တလေးမြို့ ဈေးချိုတော်နှင့် ယင်းနေရာအနီး အသွားအလာများနေသည်မှအပ ဈေးဆိုင်များတွင် အရောင်းအဝယ်ပုံမှန်သာဖြစ်ကြောင်း မွန်းလွဲပိုင်းတွင် သွားရောက်ကြည့်ရှုခဲ့သူတစ်ဦးက ပြောသည်။

သို့သော် ပြည်ကြီးတံခွန်မြို့နယ်၊ သင်ပန်းကုန်းရပ်ကွက်ရှိ ရဲကင်းစခန်းတစ်ခုကို လက်ပစ်ဗုံးဖြင့် တိုက်ခိုက်ခံရပြီး ရဲနှစ်ဦး ဒဏ်ရာရသည်ဟု ၎င်းက ပြောသည်။

အခြားနေရာ သုံးခုထက်မနည်းတွင် ပစ်ခတ်၊ ပေါက်ကွဲမှုများဖြစ်သည်ဆိုသော်လည်း ညနေ ၅နာရီအထိ သီးခြားအတည်ပြုနိုင်ခြင်း းမရှိသေးပါ။

စစ်ကောင်စီတပ်ဖွဲ့ဝင်များ အခြေချတပ်စွဲလေ့ရှိသည့် နေရာများတွင် အင်အားတိုးထားသည်ကို တွေ့ရကြောင်း အထက်ပါ မျက်မြင်တွေ့ရှိသူက ပြောသည်။

“အခြေချတပ်စွဲထားတဲ့ နေရာတွေက အစောင့်တွေ ခါတိုင်းနေ့တွေနဲ့မတူဘဲ ပိုပြီး သတိကြီးကြီးနဲ့ နေနေတာမျိုးတွေ့ရတယ်။ အင်အားအနည်းငယ်စီတိုးထားတာမျိုးလည်း ရှိတယ်။ ခါတိုင်း ၃ ယောက်ရှိတဲ့နေရာ တချို့မှာ ၅ ယောက်လောက် တွေ့ရတယ်။ သေနတ်တွေကို ခါတိုင်းဖြစ်သလို ကိုင်ထား၊ လွယ်ထားကြပေမဲ့ ဒီနေ့မှာ အသင့်အနေအထားကိုင်ထားတာမျိုး တွေ့ရတယ်”ဟု ၎င်းက ပြောသည်။

စစ်ကောင်စီအပေါ် ကြေညာလိုက်ပြီဖြစ်သည့် စစ်ပွဲတွင် ပြည်သူများ ပူးပေါင်းကူညီကြရန်၊ စစ်ကောင်စီတပ်ဖွဲ့ဝင်များနှင့် ဝေးဝေးနေကြရန်၊ ပြည်သူအချင်းချင်း ကူညီစောင့်ရှောက်ကြရန် စသည့် အချက်များပါဝင်သည့် ကြေညာချက်တစ်စောင်ကို မန္တလေးပြည်သူ့ကာကွယ်ရေးအဖွဲ့ (MDY-PDF) ကလည်း ယနေ့ ထုတ်ပြန်သည်။

NUG ၏ ယာယီသမ္မတဖြစ်သူ ဒူဝါလရှီးကလည်း ပြည်သူ့တော်လှန်ရေးစပြီဟု အများပြည်သူသို့ ကြေညာခဲ့သည့် ယနေ့ နံနက်မိန့်ခွန်းတွင် အင်အားစုအသီးသီးက ပူးပေါင်းပါဝင်ကူညီကြရန် တိုက်တွန်းထားသည်။

“ပြည်သူ့အုံကြွမှုကို ကျေးလက်နှင့် မြို့ပြ တစ်ပြိုင်တည်းလုပ်ဆောင်ကြရမည်။ စည်းလုံးညီညွတ်မှု၊ တီထွင်ဆန်းသစ်မှု၊ ဉာဏ်ရည်ထက်မြက်မှု၊ စိတ်ဓာတ်ပြင်းထန်ကြံ့ခိုင်မှုအပေါ်မူတည်၍ တော်လှန်ရေးကာလတိုတောင်းမည်”ဟု ၎င်းက ပြောသည်။

လက်နက်ကိုင်တော်လှန်ရေးနေ့ စတင်သတ်မှတ်တဲ့နေ့သည် D Day မဟုတ်သေးကြောင်း အာဏာဖီဆန်ရေးလှုပ်ရှားမှုတွင် ထင်ရှားသည့် ဗိုလ်ကြီးညီသုတက သူ၏ Facebook စာမျက်နှာတွင် ရေးထားသည်။

“ယခင်က တိုက်နေတာကို အရှိန်မြှင့်ရုံပါပဲ။ အဆင်သင့်မဖြစ်သေးတဲ့ PDF ၊ ပြင်ဆင်ဆဲ PDF တွေအနေနဲ့ အလောတကြီးတိုက်စစ်စဖို့ မလိုအပ်သေးပါဘူး။   …  D Day ဆိုတာက အဆင်သင့်ဖွဲ့စည်းထားတဲ့ တပ်ပေါင်းစုကြီးက ရည်မှန်းချက်နေရာကို တပြိုင်နက်တည်း ထိုးစစ်ဆင်တဲ့ရက်ကို ဆိုလိုတာပါ”

NUG၏ ကြေညာမှု၊ နိုင်ငံအတွင်း လက်ရှိဖြစ်ပေါ်နေသည့် အခြေအနေများနှင့် စပ်လျဉ်း၍ စစ်ကောင်စီ၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းထံ Myanmar Nowက ဖုန်းဖြင့် ဆက်သွယ်မေးမြန်းခဲ့သော်လည်း လက်ခံဖြေကြားခြင်းမရှိပေ။

စစ်ကောင်စီက ထိန်းချုပ်ထားသည့် MRTVတွင်မူ NUG၏ ခြေလှမ်းသည် နိုင်ငံတကာ၏ အာရုံစိုက်မှု ပိုရရန်သာဖြစ်ကြောင်း ၎င်းက ဖြေကြားထားသည်။

“ဘာကြောင့်ဒါတွေဖြစ်လာလဲဆိုတော့ ဒီလ ၁၄ ရက်နေ့မှာ ကမ္ဘာ့ကုလသမဂ္ဂအထွေထွေညီလာခံ ကျင်းပမှာဖြစ်တဲ့အတွက် ဒါ သူတို့လုပ်ရပ်တစ်ခု ပြနိုင်အောင်လို့ပေါ့ဗျာ၊ လုပ်ငန်းတစ်ခုလုပ်ဆောင်နိုင်အောင် လုပ်ဆောင်တာဖြစ်တယ်”ဟု ၎င်းက ပြောသည်။myanmar now