SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ကချင်ပြည်နယ်၊ ဖားကန့်မြို့နယ်တွင် အကြမ်းဖက်စစ်ကောင်စီတပ်က ရဟတ်ယာဉ် သုံးစီးဖြင့် ယနေ့ စက်တင်ဘာ ၁၁ ရက် ညနေ ၃ နာရီခန့်က လက်နက်များဟု ယူဆ၍ရနိုင်သည့် ပစ္စည်းတချို့လာချသွားကြောင်း ဒေသခံများက မဇ္ဈိမသို့ သတင်းပေးပို့ထားသည်။

” စစ်ရဟတ်ယာဉ် စုစုပေါင်း ၃စီး ပျံနေတာ။ တစ်စီးက အပေါ်ကနေ ကင်းစောင့်ပေးနေတာလား မသိဘူး။ တစ်စီးအရင်ဆင်းလာပြီး လက်နက်လာချသွားတယ်။ ပထမတစ်စီးက ပစ္စည်းချတာ ၁၅မိနစ်ကြာတယ်။ နောက်တစ်စီးက ၈ မိနစ်ကြာတယ်။ အရင်ရက်ကလည်း အဲလိုပဲ။ လက်နက်‌ တွေလာချတာထင်တယ်။

ဒီမှာတော့ အင်တာနက်လည်း မရဘူး။ စစ်ရေးတင်းမာလာမှာလားဆိုပြီး အားလုံး စိုးရိမ်နေကြတယ်” ဟုဒေသခံတစ်ဦးက ပြောသည်။ စက်တင်ဘာ ၉ ရက်ကလည်း ဖားကန့်မြို့ပေါ်တွင် စစ်ရဟတ်ယာဉ်များပျံဝဲခဲ့ပြီး တပ်မ( ၃၃ )စခန်းချရာ ဖားကန့်မြို့ပေါ်ရှိ ဗျူဟာကုန်းပေါ် လေယာဉ်ဆင်းသက်မှု ရှိခဲ့ကြောင်း ဒေသခံများထံက သိရသည်။

ဖားကန့်မြို့နယ်သည် စစ်ကောင်စီတပ်များနှင့် KIA တို့ မကြာခဏထိတွေ့ တိုက်ပွဲဖြစ်လေ့ရှိသည့် ဒေသဖြစ်ပြီး ဩဂုတ် ၂၀ ရက်ကစ၍ အင်တာနက်ဖြတ်တောက်ခံထားရသည့် မြို့နယ်တစ်ခုဖြစ်သည်။mizzima

ကရင်အမျိုးသားအစည်းအရုံး ကေအန်ယူ မြိတ်ထားဝယ်ခရိုင်၊ ထားဝယ်မြို့နယ် ဥက္ကဋ္ဌ ပဒိုစောဆီးကို  စစ်ကောင်စီတပ်က စက်တင်ဘ ၉ ရက်နေ့မှာ ဖမ်းဆီးခဲ့တယ်လို့ ကေအန်ယူ မြိတ်ထားဝယ်ခရိုင် အတွင်းရေးမှူး ပဒိုစောအယ်နာက ပြောပါတယ်။ 

ထားဝယ်ခရိုင်မြိုနယ် ဥက္ကဋ္ဌ ပဒိုစောဆီးဟာ ထားဝယ်ခီးဒေသကနေ သူ့ရဲ့မြို့နယ်ဆအပြန် ပကာရီ ကျေးရွာမှာ ဖမ်းဆီးခံရတာလို့ ဆိုပါတယ်။ 

သူ့ကားမှာ လက်နက် ၃ လှည့်ပါတယ်လို့ဆိုကာ အမှတ် ၈ စစ်ကွပ်ကဲရေးဌာနချုပ်လက်အောက်ခံ ခမရ ၄၀၂ က ဖမ်းဆီးသွားခဲ့တာလို့ ဆိုပါတယ်။ 

လက်ရှိမှာတော့ သူ့ကို ထားဝယ်မှာ ထိန်းသိမ်းထားတယ်လို့ ယူဆရပြီး သူပြန်လည်လွတ်မြောက်လာဖို့ ကေအန်ယူခေါင်းဆောင်တွေက ဆက်သွယ်ညှိနှိုင်းနေဆဲဖြစ်တယ်လို့လည်း ပဒိုစောအယ်နာက ပြောပါတယ်။ DVB

မန္တလေးမြို့ ချမ်းမြသာစည်မြို့နယ် စစ်ကိုင်း – မန္တလေး လမ်းပေါ်၊ ကန်တော်ကြီးအနီးမှာ စက်တင်ဘာ ၁၁ ရက် ညနေ ၅ နာရီခွဲ အချိန်လောက်က ပစ်ခတ်မှုဖြစ်ခဲ့ပါတယ်။

ကနဦး ဗုံးသံ အရင်ကြားရတာဖြစ်ပြီး မကြာခင်မှာ စစ်ကောင်စီတပ်တွေက အဆက်မပြတ်ပစ်ခတ်ခဲ့တာဖြစ်ကာ အနီးပတ်ဝန်းကျင်ရှိ ပြည်သူတွေလည်း စိုးရိမ်နေကြတယ်လို့ ဆိုပါတယ်။

အနီးပတ်ဝန်းကျင်ရှိ ပြည်သူတစ်ဦးက “ဗုံးသံက မြေပါတုန်တယ်။ ဗုံးသံကြားပြီး သေနတ်ပစ်သံတွေ ဆက်တိုက်ကြားရတာပဲ။ ထိခိုက်ဒဏ်ရာတော့ မြေပြင်အခြေအနေမသိရသေးဘူး။ ဘယ်သူမှ မထွက်ရဲဘူး” လို့ ပြောပါတယ်။

စစ်ကိုင်း – မန္တလေး လမ်းပေါ်၊ ကန်တော်ကြီးအနီးမှာ အမြဲလိုလို စစ်ကောင်စီတပ်သားတွေ စောင့်နေတာရှိပြီး “မိုက်တဲ့ကောင် ထွက်ခဲ့” ဆိုတဲ့ အော်သံတွေပါ ကြားရတယ်လို့ ဆိုကြပါတယ်။

ပစ်ခတ်မှုဟာ ဘယ်လိုကနေ စတင်ဖြစ်တယ်ဆိုတာတော့ မသိရသေးပါဘူး။DVB

ကရင်ပြည်နယ်၊ ဖာပွန်ခရိုင်မှာ စက်တင်ဘာလ ၁၁ ရက်က  စစ်ကောင်စီတပ်မှ ထောင်ထားတဲ့ မြေမြှုပ်မိုင်းတစ်လုံးကို ရွာသားတစ်ယောက်က နင်းမိဒဏ်ရာရပြီး ခြေတောက်တစ်ဖက် ဆုံးရှုံးသွားရပါတယ်။

ဖာပွန်ခရိုင် အနောက်ဘက်ရှိ မတ်ထောရွာမှာ နေထိုင်တဲ့ရွာသားတွေဟာ  ဒီကနေ့မနက် ၉  နာရီလောက်က  တောင်ယာအလုပ်သွားရင်း စစ်ကောင်စီလက်အောက်ခံ ခလရ ၄၀၇ စစ်တပ်က ထောင်ထားတဲ့မြေမြှုပ်မိုင်းကို ရွာသား စောကျူးပီးအသက်(၂၆)နှစ်က တက်နင်းမိရာ ဘယ်ခြေထောက်ပြတ်သွားသလို ညာဘက်လက်မှာလည်း အနည်းငယ်ဒဏ်ရာရရှိသွားပါတယ်။  

ပြင်းထန်ဒဏ်ရာရသွားတဲ့ စောကျူးပီးကို  ဖာပွန်ခရိုင်အတွင်းရှိ ကေအန်ယူ ဆေးရုံသို့ ပို့ဆောင် ကုသပေးနေပါတယ်။

သထုံခရိုင်၊ ဖာပွန်ခရိုင်နဲ့ တခြားခရိုင်တွေမှာ စစ်ကောင်စီတပ်တွေက အန်စီအေအပစ်ရပ်သဘောတူစာချုပ်ကို ချိုးဖောက်ပြီး နယ်မြေကျူးကျော်ဝင်ရောက်လာတာကြောင့် KNU/ KNLA တပ်တွေက ပြန်လည်ခုခံတိုက်ခိုက်နေရပါတယ်။

ကရင်ပြည်နယ်အတွင်း ငြိမ်းချမ်းရေးယူထားတဲ့ ကာလမှာတောင် စစ်ကောင်စီတပ်တွေက ကေအန်ယူနယ်မြေထဲ ဝင်ရောက်အခြေချလာတဲ့အတွက် နယ်မြေလုံခြုံမရှိဖြစ်နေရတယ်လို့ ဒေသခံ ရွာသားတွေကပြောပါတယ်။

ဒါ့အပြင် စစ်ရေးနဲ့ မသက်ဆိုင်တဲ့ ရွာသားတွေကို  ဖမ်းဆီးတာ၊ ရိုက်နှက်တာ၊ သတ်ဖြတ်တာတွေ မလုပ်ကြဖို့ကိုလည်း  ဖာပွန်ခရိုင်မှာနေထိုင်တဲ့ ဒေသခံတွေက တောင်းဆိုပါတယ်။DVB