SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

သာကေတရှိ အုပ်ချုပ်ရေးမှူးရုံးတစ်ခုရှေ့တွင် ယနေ့ညက ဗုံးပေါက်ကွဲမှုမှာ ၎င်းတို့လက်ချက်ဖြစ်ကြောင်း G-20 UBPO က ထုတ်ပြန်သည်။

ရန်ကုန်တိုင်းဒေသကြီး သာကေတမြို့နယ် (၇) အနောက်ရပ်ကွက် မြေနီ (၄) လမ်းထိပ်ရှိ အုပ်ချုပ်ရေးမှူးရုံးရှေ့တွင် ည ၆ နာရီခွဲခန့်က ပေါက်ကွဲမှု ဖြစ်ပွား ခဲ့သည်။”ပေါက်ကွဲမှုက အသံတော်တော်ကျယ်တယ်။

အနားကို ဘယ်သူမှကပ်လို့ မရဘူး” ဟု ရပ်ကွက်နေသူတစ်ဦးက ပြောသည်။ UBPO အဖွဲ့အနေဖြင့် စစ်ကောင်စီနှင့် ဆက်စပ်သည့် အုပ်ချုပ်ရေးမှူးရုံးများ၊ ၎င်းတို့၏စီးပွားရေးလုပ်ငန်းများ၊ စစ်ကောင်စီ၏ လက်ပါးစေများကို တိုက်ခိုက် မည်ဖြစ်ကြောင်း အစောပိုင်းက ကြေညာထားသည်။mizzima

ယနေ့ (စက်တင်ဘာ၂၃) တွင် ပဲခူးမြို့မှ နိုင်ငံရေးတက်ကြွလှုပ်ရှားသူလူငယ်တစ်ဦးကို နေအိမ်တွင် သွားရောက်ပစ်ခတ်ဖမ်းဆီးသည့် စစ်ကောင်စီတပ်ဖွဲ့ဝင်များက ထိုလူငယ်၏ မိခင်ကိုပါ  ခေါ်ဆောင်သွားကြောင်း ဒေသခံအမျိုးသားတစ်ဦးက ပြောသည်။ 

နံနက် ၁၀ နာရီခန့် ဟင်္သာကုန်း ၁၉ ရပ်ကွက်၊ ဇေယျာအောင်မြေလမ်းတွင် နေထိုင်သော အသက် ၂၄ နှစ် အရွယ် ကိုစည်သူကောင်းမြတ်ကို ဖမ်းဆီးရန် ရဲများက အရပ်သုံးကား ၂ စင်းဖြင့် ရောက်လာခဲ့ကြသည်။ ကိုစည်သူကောင်းမြတ်က ထွက်ပြေးရန် ပြင်ဆင်စဉ် ရဲများက ပစ်ခတ်ခဲ့သည်ဟု အဆိုပါ မျက်မြင်သက်သေက ပြောသည်။

“သူ့အမေရှေ့တင် ကောင်လေးကို သေနတ်နဲ့ သုံးချက်ပစ်လိုက်တာ။ ကောင်လေးက ထွက်ပြေးဖို့ အလုပ်မှာ။ ကျွန်တော် တိတိကျကျသိတာ ရင်အုံကို မှန်ထားတယ်” ဟု ထိုအမျိုးသားက ပြောသည်။ 

မိခင်ဖြစ်သူက အိမ်အောက်ထပ်တွင်ရှိနေပြီး လူငယ်က နေအိမ်အပေါ်ထပ်၌ ရှိနေစဉ် ပစ်ခတ်ခံရခြင်း ဖြစ်သည်ဟု ထိုအမျိုးသားက ဆက်ပြောသည်။

ကျန်းမာရေးမကောင်းသည့် အသက် ၅၀ အရွယ် မိခင်ဖြစ်သူကို လက်ထိတ်ခတ်နေချိန်တွင် နေအိမ်အတွင်း ရှာဖွေကြကြောင်း ၎င်းက ဆိုသည်။

“ပစ်ခတ်ပြီးတဲ့အချိန်မှာ သူ့အမေကိုလည်း လက်ထိတ်ခတ်ပြီး ကားပေါ်ဆွဲတင်လိုက်တယ်။ ကောင်လေးကို မသယ်သေးဘူး။ အိမ်ပေါ်မှာ ပစ္စည်းတွေဘာတွေလိုက်ရှာ မွှေနှောက်ရှာဖွေပြီး လိုတဲ့ပစ္စည်းတွေယူ၊ ဆိုင်ကယ်တွေဘာတွေပါ ယူပြီး ကောင်လေးကို ကားပေါ်ဆွဲတင်တယ်” ဟု သူက ပြောသည်။ 

ဒဏ်ရာရထားသော ထိုလူငယ်ကို ပဲခူးဆေးရုံကြီးသို့ ပို့ဆောင်ထားသည်ဟု သိရှိရပြီး ၎င်းမိခင်ကို မည်သည့်နေရာတွင် ထိန်းသိမ်းထားမှန်း မသိရှိရကြောင်း ဒေသခံများက ပြောသည်။

ယင်းကိစ္စနှင့် ပတ်သက်၍ Myanmar Now အနေဖြင့် ပဲခူးမြို့ရဲစခန်းများကို ဆက်သွယ်မေးမြန်းရန် ကြိုးပမ်းခဲ့သော်လည်း တုံ့ပြန်ချက် မရရှိသေးပေ။

အာဏာသိမ်းစစ်ကောင်စီ၏ မတရားဖမ်းဆီးမှု၊ သတ်ဖြတ်မှုများကို မှတ်တမ်းတင်နေသည့် နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ၏ စက်တင်ဘာ ၂၂ အထိ အချက်အလက်များအရ အရပ်သားပြည်သူ ၁၁၂၀ ဦးထက်မနည်း သေဆုံးခဲ့ပြီး ၆၆၉၈ ဦး ဆက်လက်ထိန်းသိမ်းခံထားရဆဲ ဖြစ်သည်ဟု ထုတ်ပြန်ထားသည်။

ရန်ကုန်နှင့် အခြားမြို့ကြီးများတွင် စစ်အာဏာရှင်ဆန့်ကျင်ရေး တက်ကြွလှုပ်ရှားသူ လူငယ်များကို ပစ်မှတ်ထားဖမ်းဆီးနေဆဲဖြစ်သည်။ myanmar now

ရန်ကုန်တိုင်းဒေသကြီး၊ လှိုင်သာယာမြို့နယ် ပုသိမ်လမ်းမပေါ်ရှိ အောက်ထိပ်မှတ်တိုင်အနီးတွင် စစ်ကောင်စီယာဉ်တန်းကို လှိုင်သာယာ မြို့ပြပြောက်ကျားတပ်ဖွဲ့ (CGF) မှ အဝေးထိန်း ဗုံးနှစ်လုံးဖြင့် ဖောက်ခွဲတိုက်ခိုက်ခဲ့ကြောင်း CGF၏ ပြောခွင့်ရသူက ပြောသည်။

Double Cab ယာဉ်သုံးစီးနှင့် စစ်ကောင်စီတပ်သားတင်ယာဉ်ကြီး တစ်စီး စုစုပေါင်း ယာဉ် လေးစီးပါ စစ်ကြောင်းအား စက်တင်ဘာ ၂၃ ရက် ညနေ ၅ နာရီ ၁၅ မိနစ်အချိန်တွင် CGFက တိုက်ခိုက်လိုက်ခြင်းဖြစ်သည်။“သတင်းရတာ အရမ်းကပ်သွားတော့ လက်ကျန် သုံးလုံးနဲ့ ပုသိမ်လမ်းမှာပဲ စောင့်ပြီး ဒက်ဗယ်ကပ်ယာဉ်တန်းကို ဖောက်ခွဲတာပေါ့။

ဒီနေ့က မိုးအရမ်းရွာတော့ သုံးလုံးမှာ နှစ်လုံးပဲကွဲသွားတယ်။ ယာဉ်တစ်စီးတော့ထိသွားတယ်” ဟု CGF ပြောခွင့်ရသူ ဆိုသည်။ဗုံးနှစ်လုံးပေါက်ကွဲမှုအပြီး စစ်ကောင်စီက လမ်းနှစ်ဘက်ပိတ်ကာ ရှာဖွေ စစ်‌ဆေးမှုများ ပြုလုပ်လာသည့်အတွက် အမြန်ဆုတ်ခွာခဲ့ရပြီး ထိခိုက်မှုအခြေအနေကို မသိရကြောင်း ၎င်းကဆိုသည်။

မြို့ပြပြောက်ကျားတပ်ဖွဲ့များ အလုပ်ပိုတွင်ကျယ်လာစေရန် ပြည်သူများအနေနှင့် မှိုင်း ဟုယူဆရသည့် ပစ္စည်းများ၊ ပေါက်ကွဲသံများ၊ သေနတ်သံများကြားရပါက လုံခြုံသည့် နေရာတွင်သာနေပေးကြရန် နှင့် ဝိုင်းပြီးမစပ်စုကြရန်အတွက် မေတ္တာရပ်ခံကြောင်းလည်း CGF ကထုတ်ပြန်ထားသည်။mizzima

မွန်ပြည်နယ် ကျိုက္ကော်အထက်ပိုင်းရှိ ထုံးဘိုကြီး ထုံးဘိုလေး ရွာလမ်းဝတွင် ယနေ့ စက်တင်ဘာလ ၂၃ ရက်နေ့ နံနက်ပိုင်းတွင် KNU တပ်မဟာ ၁ လက်အောက်ခံ အဖွဲ့နှင့် အကြမ်းဖက် စစ်ကောင်စီ တပ်ဖွဲ့ဝင်များ ပစ်ခတ်မှုဖြစ်ပွားပြီးနောက် စစ်ကောင်စီ တပ်ဖွဲ့ဝင်များက ပြည်သူပိုင် အ ဆောက်အအုံကို လက်ပစ်ဗုံးဖြင့် ပစ်ခတ် ဖျက်ဆီးခဲ့ကြောင်း ဒေသခံပြည်သူများ ပြောဆိုချက်အရသိရသည်။

” ဒီနေ့ နံနက်ပိုင်းက KNU တပ် မဟာ၁ လက်အောက်ခံ အဖွဲ့နဲ့ စစ်ကောင်စီ တပ်ဖွဲ့ဝင်တွေ တိုက်ပွဲငယ်ပုံစံမျိုး ပစ်ခတ်မှု ဖြစ်ပွားခဲ့တယ်။ စစ်ကောင်စီတပ်ဖွဲ့ဝင်တွေက နေ့လည် ၂နာရီလောက်မှာ ထုံးဘိုကြီး ထုံးဘိုလေး ရွာလမ်းဝတွင် ဒေသခံတစ်ဦးစီးနင်းလာတဲ့ ဆိုင်ကယ်ကို ပစ်ခတ်လို့ ပြည်သူတစ်ဦး သေနတ်ထိမှန်ဒါဏ်ရာရတယ်။

ပြီးတော့ ရွာလမ်းဝမှာရှိတဲ့ ဆိုင်တစ်ဆိုင်ကို သေနတ်နဲ့ ပစ်ခတ်တယ်။ လက်ပစ်ဗုံးနဲ့ ပစ်ခတ် ဖျက်ဆီးခဲ့တယ်” ဟု ဒေသခံပြည်သူတစ်ဦးကပြောဆိုသည်။khit thit

မုံရွာမြို့၊ မြဝတီရပ်ကွက်၊ ကျောက္ကာလမ်းမှာရှိတဲ့ စစ်တပ်ပိုင်  Mytel ရုံးရှေ့မှာ အစောင့်ကျနေတဲ့ ရဲတပ်သားတစ်ဦးကို စက်တင်ဘာ ၂၃ ရက် ဒီညနေ ၄ နာရီဝန်းကျင်က ပစ်သတ်ခဲ့ပြီး အဆိုပါရဲတပ်သားကိုင်ဆောင်တဲ့  သေနတ်တစ်လက်ကိုပါ သိမ်းယူနိုင်ခဲ့တယ်လို့ သံမဏိနှင့်အဖွဲ့သားများ (MPDF) အဖွဲ့ထံက သိရပါတယ်။

ဒေသခံတဦးက ”အပစ်ခံရတဲ့ရဲသားကတော့ အဲ့နေရာမှာပဲဆုံးသွားတယ်။ အခုတော့ စစ်ကားတွေနဲ့ စစ်သားတွေခြေရှုပ်နေတာပေါ့။ ရပ်ကွက်ရုံးရှေ့မှာတော့ စစ်ကားတွေနဲ့စစ်သားတွေအများကြီးပဲ”လို့ ပြောပါတယ်။

မုံရွာမြို့က Mytel ရုံးတည်ရှိတဲ့နေရာဟာ မြဝတီရဲစခန်း အနီးမှာဖြစ်ပြီး ပြီးခဲ့သည့် စက်တင်ဘာ ၁၅ ရက်ကလည်း အဆိုပါ MyTel ရုံး ဗုံးပစ်ခံရလို့ ရုံးရှေ့ဘက်ခြမ်းပျက်စီးသွားပါတယ်။

ရဲတပ်သား ပစ်ခတ်ခံရတာနဲ့ပတ်သက်လို့ မုံရွာမြို့၊ မြဝတီရဲစခန်းကို ဆက်သွယ်မေးမြန်းတဲ့အခါ ဖုန်းလက်ခံပြောဆိုခြင်းမရှိပါဘူး။DVB