SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ချင်းပြည်နယ်မြို့တော် ဟားခါးအထွက်တွင် စစ်ကောင်စီတပ်သားများကို ချင်းတိုင်းရင်းသားလက်နက်ကိုင်အဖွဲ့ ၂ ဖွဲ့က ယနေ့ (အောက်တိုဘာ ၁၃) မနက်၌ ကြားဖြတ်တိုက်ခိုက်ခဲ့ရာ စစ်ကောင်စီဘက်မှ ၅ ဦး သေဆုံးကြောင်း ချင်းအမျိုးသားတပ်ဦး (CNF) ပြောရေးဆိုခွင့်ရှိသူ ဆလိုင်းထက်နီထံမှ သိရသည်။ 

ဟားခါးမြို့မှ ထွက်လာသည့် စစ်ကောင်စီတပ်ဖွဲ့ကို ချင်းအမျိုးသားတပ်မတော် (CNA) နှင့် ချင်းဒေသကာကွယ်ရေးအဖွဲ့ (CDF) ပူးပေါင်းအဖွဲ့က ချုံခိုတိုက်ခိုက်ခဲ့ခြင်း ဖြစ်သည်ဟု ထိုနှစ်ဖွဲ့၏ မဟာမိတ်ဖြစ်သော CNF က ပြောသည်။

“ဒီနေ့မနက် ၁၀ နာရီ ၁၁ နာရီကြားမှာ ဟားခါးအခြေစိုက်တပ်က သူတို့ ဟားခါးမြို့အထွက် တန်လွန်းရွာမှာ ထိတွေ့တိုက်ပွဲဖြစ်တာပေါ့။ နောက်ဆုံးရတဲ့ သတင်းအရတော့ စစ်ကောင်စီဘက်ကနေ ၅ ယောက် ကျတယ်။ ကျွန်တော်တို့ဘက်ကတော့ CNA / CDF ဘက်ကတော့ အထိအခိုက်မရှိဘူး” ဟု ဆလိုင်းထက်နီက Myanmar Now ကို ပြောသည်။ 

ထို့ပြင် ဟားခါးမြို့နှင့် မိုင် ၄၀ ကျော်ကွာဝေးသည့် ဖလမ်းမြို့နယ်၊ လုံပီးကျေးရွာအနီးတွင်လည်း ယနေ့မနက်က သေနတ်သံများထွက်ပေါ်ခဲ့ကြောင်း၊ အခြေအနေအသေးစိတ်ကို အတည်ပြုနိုင်ခြင်း မရှိသေးကြောင်း သူက ဆက်ပြောသည်။ 

ဖလမ်းမြို့နယ်အတွင်း တားလ်၊ တလန်ရောန်၊ ရီလ်တီးလ်၊ လုံလန်၊ လုံပီး စသည့် ကျေးရွာမှ ဒေသခံများ တောတောင်များရှိရာတွင် စစ်ဘေးရှောင်နေကြရသည်ဟု ကိုယ်တိုင်တိမ်းရှောင်နေရသည့် တားလ်ကျေးရွာဒေသခံ အမျိုးသားတစ်ဦးက ပြောသည်။ 

“စစ်တပ်က ရွာတော့မရောက်သေးဘူး။ ဒီမနက် သေနတ်သံ၊ ဗုံးသံတွေတော့ စကြားနေရပြီ။ အကုန်ရှောင်နေရတယ်။ ရာသီဥတုက ဒီနေ့တော့ မိုးသိပ်မရွာဘူး။ နီးစပ်ရာ တောထဲကိုပဲ ရှောင်နေရတာ” ဟု ၎င်းက ပြောသည်။

စစ်ကောင်စီတပ်က ဒေသခံပြည်သူများကို ဖမ်းဆီးကာ လူသားဒိုင်းသဖွယ် အသုံးပြုနေသည့်အတွက် ၎င်းတို့ ချီတက်နိုင်ခြေရှိသည့် ဖလမ်း – ရိဒ်၊ ဖလမ်း – ဟားခါး လမ်းကြောင်းတွင် သေရေး၊ ရှင်ရေးကိစ္စရပ်မှအပ ခရီးသွားလာခြင်း မလုပ်ရန် ချင်းအမျိုးသားအဖွဲ့ချုပ် (Chin National Organization – CNO) က အောက်တိုဘာ ၁၃ ရက်စွဲဖြင့် အရေးပေါ်သတိပေးချက် ထုတ်ပြန်ထားသည်။

ယခုရက်ပိုင်းအတွင်း အာဏာသိမ်းစစ်ကောင်စီတပ်က လက်နက်ကိုင်ခုခံမှုအားကောင်းသည့် ချင်းပြည်နယ်ကို ထိုးစစ်ဆင်ရန် စစ်ကြောင်းနှစ်ကြောင်းခွဲပြီး လက်နက်လူအင်အား အလုံးအရင်းဖြည့်တင်းနေသည်။ 

စစ်ကိုင်းတိုင်း၊ ကလေးမြို့မှတစ်ဆင့် ချင်းပြည်နယ်မြောက်ပိုင်း ဖလမ်းမြို့သို့ ပြီးခဲ့သည့်ရက်ပိုင်းက သံချပ်ကာယာဉ်အပါအဝင် စစ်ကား ၄၀ စီး ပါဝင်သည့် စစ်ကြောင်း ရောက်ရှိတပ်စွဲနေသည်။ 

ယမန်နေ့က မကွေးတိုင်း၊ ပခုက္ကူမှ တက်လာသည့် သံချပ်ကာ ၂ စီးနှင့် စစ်ကား ၈၀ ကျော်ပါဝင်သည့် စစ်ကြောင်းသည် ယနေ့မနက်က ချင်းပြည်နယ်တောင်ပိုင်း မင်းတပ်မြို့သို့ ရောက်ရှိနေသည်။ 

“ဒီတစ်ခါကတော့ ကျွန်တော်တို့ကို အပြုတ်တိုက်ဖို့ဆိုတာ သတင်းတွေကြားတယ်။ ပြည်သူလူထုထိခိုက်မှုကတော့ အနည်းနဲ့အများ ရှိလာနိုင်တယ်။ ဒါကတော့ ကျွန်တော်တို့စိုးရိမ်တယ်။ တိုက်ပွဲကတော့ အကြီးအကျယ်ဖြစ်ဖို့ များပါတယ်။ အဲ့ဒီအတွက် ပြင်ဆင်မှုတွေလုပ်နေတာ ဖြစ်တယ်။ ပြည်သူတွေအနေနဲ့ သွားရေး၊ လာရေး၊ ခရီးသွားလာမှုအတွက် ပိုပြီးတော့ သတိထားကြဖို့ ပြောချင်ပါတယ်” ဟု ဆလိုင်းထက်နီက ဆိုသည်။ 

စစ်ကောင်စီက ထိုးစစ်အရှိန်မြှင့်ရန် စီစဉ်နေသည့် ချင်းပြည်နယ်တွင် ဟားခါးမြို့မှအပ ကျန်မြို့နယ်များတွင် စက်တင်ဘာ ၂၃ မှစတင်ကာ အင်တာနက်ဖြတ်တောက်ထားသဖြင့် ထိုဒေသမှ အခြေအနေများ ပြင်ပသို့ အချိန်နှင့်တပြေးညီ ရောက်ရန် ခက်ခဲသွားသည်။myanmar now

မော်လမြိုင်မြို့ ၊ သွေးသောက်ရပ်ကွက်ရှိ (၆ )မိုင် စစ်ဆေးရေးဂိတ်သည် ယနေ့(အောက်တိုဘာလ ၁၃ရက်) ညနေ ၆နာရီ ဝန်းကျင်က လက် ပစ်ဗုံးဖြင့် ပစ်ခတ်ခံရပြီး ပေါက်ကွဲမှု ဖြစ်ပွားခဲ့ကြောင်း ဒေသခံများထံက သိရသည်။

“မော်လမြိုင် သွေးသောက် (၆)မိုင် စစ်ဆေးဂိတ်မှာပါဗျ။ လက်ပစ်ဗုံးနဲ့ ဖောက်ခွဲခဲ့တာပါ။ လူနာတင်ယာဉ် သုံးစီးတောင်သွားတာဆိုတော့ အ ထိအခိုက်များမယ်တော့ ထင်တယ်ဗျ” ဟု MPDF-V မှအဖွဲ့တာဝန်ရှိသူက မဇ္ဈိမကိုပြောသည်။

ယင်းဖြစ်စဉ်ကို မွန်ပြည်နယ် နွေဦးတော်လှန်ရေးတပ်ဦး (MPDF-V)၊ မော်လမြိုင် မြေအောက်ကာကွယ်ရေး တပ်ဖွဲ့ (MUDF)နှင့် ပြည်သူ့ကာ ကွယ်ရေးအဖွဲ့ မော်လမြိုင် (PDO-MLM)တို့က ပူးပေါင်းဆောင်ရွက်ခဲ့ခြင်း ဖြစ်ပြီး ထိခိုက်သူဦးရေကို စုံစမ်းနေဆဲဖြစ်ကြောင်း MPDF-V အဖွဲ့ တာဝန်ရှိသူကပြောသည်။mizzima

မွန်ပြည်နယ်၊ ချောင်းဆုံမြို့နယ်၊ ချောင်းဆုံအနောက်ပိုင်းရပ်ကွက် အုပ်ချုပ်ရေးမှူး ဦးဝင်းအောင်ကို ယမန်နေ့ (အောက်တိုဘာ ၁၂) ညနေ၌ ပစ်သတ်ခဲ့သည်ဟု ဒေသခံ ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်။

ညနေ ၄ နာရီခွဲအချိန်တွင် ဦးဝင်းအောင်၏ နေအိမ်သို့ ထောက်ခံစာနှင့် ဧည့်စာရင်း အကြောင်းပြကာ သွားရောက်ပစ်ခတ်ခဲ့ကြောင်း၊ ဘယ်ဘက်ရင်အုံ ကျည်ထိမှန်ခဲ့ပြီး နေရာမှာပင် လဲကျသွားကြောင်း ၎င်းတပ်ဖွဲ့ဝင်က Myanmar Now ကို ပြောသည်။

“မိန်းကလေးဟန်ဆောင်ပြီးတော့ သွားတာ။ ထောက်ခံစာသွားလုပ်ပြီးတော့ ဧည့်စာရင်းတိုင်တာပေါ့။ တစ်ယောက်က ဆိုင်ကယ်မောင်းတာ၊ တစ်ယောက်က အထဲဝင်သွားတာ” ဟု ၎င်းက ပြောသည်။

အဆိုပါ စာရွက်စာတမ်းကိစ္စများကို ၎င်းအုပ်ချုပ်ရေးမှူးနေအိမ်တွင်သာ ပြုလုပ်ပေးခြင်းဖြစ်သည်ဟု သိရသည်။ 

အဆိုပါရပ်ကွက်အနီး နေထိုင်သည့် ချောင်းဆုံဒေသခံတစ်ဦးကလည်း ဦးဝင်းအောင် ပစ်သတ်ခံရသည့်သတင်းကို ယနေ့ (အောက်တိုဘာ ၁၃) မနက်က ချောင်းဆုံပြည်သူ့ဆေးရုံကြီးသို့ ရောက်ရှိနေစဉ် ကြားသိခဲ့ရကြောင်း ပြောသည်။

“မနက်က သူတို့ ဆေးရုံမှာ ပြောနေတာ အသက် ၆၁ နှစ်တဲ့။ ရင်ဘတ်မှာ (သေနတ်ဒဏ်ရာ) တစ်ချက်ပဲ” ဟု ၎င်းက ဆိုသည်။

အုပ်ချုပ်ရေးမှူးနှင့် ယခင်က အချင်းများဖူးသည့် အမျိုးသမီးတစ်ဦးကို စစ်ကောင်စီတပ်ဖွဲ့ဝင်များက ထိုညမှာပင် သွားရောက်ဖမ်းဆီးခဲ့ကြောင်း၊ ထိုအမျိုးသမီး နေအိမ်တွင် မရှိသဖြင့် ၎င်း၏ အစ်မ မအိမိုးဆိုသူကို ဓားစာခံအဖြစ် ဖမ်းဆီးသွားသည်ဟု ကြားသိရကြောင်း ၎င်းက ဆက်ပြောသည်။

ထို့ပြင် အမျိုးသား၂ ဦးလည်း အဖမ်းခံရကြောင်း သိရသည်။

စက်တင်ဘာလအတွင်းက ချောင်းဆုံဒေသခံများဖြစ်သည့် အသက် ၄၇ နှစ်အရွယ် ဦးဝင်းဌေး၊ အသက် ၂၀ ကျော်အရွယ် တက္ကသိုလ်ကျောင်းသား ၃ ဦးနှင့် အခြားအမျိုးသားတစ်ဦးတို့ကို စစ်တပ်က ဖမ်းဆီးခဲ့ကြောင်း၊ ထိုသို့ ဖမ်းဆီးနိုင်ရန် အုပ်ချုပ်ရေးမှူးဦးဝင်းအောင်က အကူအညီပေးခဲ့သည်ဟု သိရကြောင်း အထက်ပါ PDF အဖွဲ့ဝင်က ပြောသည်။  

ထို့ပြင် ချောင်းဆုံမြို့ပေါ်တွင် စစ်အာဏာသိမ်းဆန့်ကျင်ရေးဆန္ဒပြမှုကို စစ်ကောင်စီတပ်က မကြာခဏဖြိုခွင်းခြင်းမှာ ဦးဝင်းအောင်၏ ပူးပေါင်းဆောင်ရွက်မှုကြောင့် ဖြစ်သည်ဟု ဒေသခံများက မကျေမနပ်ပြောဆိုကြကြောင်း သူက ဆိုသည်။ 

ဦးဝင်းအောင်သည် ချောင်းဆုံမြို့နယ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဝင်တစ်ဦးဖြစ်ပြီး အာဏာသိမ်းစစ်ကောင်စီက သူ့ကို အုပ်ချုပ်ရေးမှူးတာဝန်ပေးခဲ့သည်။

ဦးဝင်းအောင်က ဒေသခံတို့ ဖမ်းဆီးခံရစေရန် စစ်တပ်ကို သတင်းပေးသည်ဟူသော ပြောဆိုချက်နှင့် ပတ်သက်ပြီး ကျန်ရစ်သူ မိသားစုကို ဆက်သွယ်မေးမြန်းနိုင်ခြင်း မရှိသေးပါ။

အုပ်ချုပ်ရေးမှူးများ၊ သတင်းပေးများ၊ စစ်ကောင်စီဘက်တော်သားများကို ဒေသခံ PDF များက ပစ်မှတ်ထားတိုက်ခိုက်နေသည်။ စစ်ကောင်စီလက်အောက်မှ နုတ်ထွက်ရန်လည်း သတိပေးနေသည်။ 

ပြီးခဲ့သည့် ရက်ပိုင်းအတွင်း တော်ပကောက်ကျေးရွာ စစ်တပ်သတင်းပေးတစ်ဦး ပစ်ခတ်ခံရပြီး တိုးချဲ့ရပ်ကွက်အုပ်ချုပ်ရေးမှူး၏ နေအိမ်တွင်လည်း ဗုံးပေါက်ကွဲခဲ့သည်။

မေလအတွင်း မွန်ပြည်နယ်၊ ဘီးလင်းမြို့နယ်၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ဥက္ကဋ္ဌ ဦးမြင့်ဆွေ ပစ်သတ်ခံခဲ့ရသည်။ myanmar now

စစ်ကိုင်းတိုင်း၊ မြောင်မြို့နယ်အတွင်းရှိ ငမြောင်တောင်ရွာဘက်သို့ ကာကွယ်ရေးတပ်များရှာဖွေရန်ဆိုကာ စစ်ကောင်စီတပ်များရောက်လာပြီး တဲအိမ် ၁၀ လုံးအား မီးရှိုဖျက်ဆီးသွားကြောင်း ဒေသခံကာကွယ်ရေးတပ်ကပြောသည်။

မြောင်မြို့၏အနောက်မြောက်ဘက် ၁၀ မိုင်ခန့်အကွာတွင်တည်ရှိသော ငမြောင်တောင်သို့ ယနေ့ နံနက် ၁၁ ခန့်တွင် စစ်ကောင်စီတပ်က ကားလေးစီးဖြင့်ရွာသို့ရောက်လာခဲ့ရာတွင် ၎င်းတို့လာရာလမ်းတစ်လျောက်တောလမ်းတွင် တဲအိမ်များအား မီးရှို့ဖျက်ဆီးမှု ပြုလုပ်ခြင်းဖြစ်သည်။

“မီးလောင်တဲ့အိမ်ခြေကို တွက်ကြည့်ရင် တဲကုန်း နှစ်ခုလောက် မီးရှို့သွားတယ်။ တဲကုန်းတစ်ခုကို အနည်းဆုံး တဲအိမ် လေး လုံး၊ ငါးလုံးဝန်းကျင်ရှိမယ်” ဟု မြောင် PDF ပြန်ကြားရေးတာဝန်ခံမှ ပြောသည်။အိမ်ခြေ ၂၅၀ ခန့်ရှိပြီး လူဦးရေ ၁၅၀၀ နီးပါးရှိသော ရွာတွင်းသို့ မဝင်မီ RPG နှစ်ကြိမ်နှင့် လက်နက်ငယ်ပစ်ခတ်မှုများ ရမ်းသမ်းလုပ်ခဲ့သေးသည်ဟု သိရသည်။

ထို့အပြင် ရွာအတွင်းရှိဘုန်းကြီးကျောင်းမှ ကားနှစ်စီးအား သိမ်းယူသွားခဲ့သေးသည်။အာဏာသိမ်းတပ်များရောက်လာချိန်တွင် ရွာသားအားလုံးနီးပါး ဘေးလွတ်ရာဆီ တိမ်းရှောင်ထွက်ပြေးနေခဲ့ရကာ မီးလောင်နေသော တဲအိမ်များကိုပင် မီးငြှိမ်းသတ်ခွင့် မရဘဲ အားလုံးပြာကျသွားခဲ့ရသည်။ယမန်နေ့က စစ်ကောင်စီတပ်များတပ်စွဲထားခဲ့သော အိမ်ခြေ ၁၀၀၀ ခန့်ရှိ ဇရပ်ကုန်းရွာတွင်လည်း အဆောက်အဦး ငါးလုံးမီးရှို့ဖျက်ခံခဲ့ရသည်။

ယနေ့ မွန်းတည့်ချိန်ခန့်တွင် အကြမ်းဖက်တပ်များထွက်ခွာသွားပြီး ချောင်းဦးမြို့ ကျောက်ဆစ်ကန်ဘက်သို့သွားကြောင်း သိရသော်လည်း ရွာ သားများ အိမ်မပြန်ရဲဘဲဖြစ်နေသေးသည်။

“ပြန်ထွက်သွားပြီလို့ကြားတယ်။ ဒါပေမယ့် ဒေသခံတွေအနေနဲ့ စစ်ကောင်တွေတပ်ထွက်သွားတဲ့လမ်းတစ်လျှောက်မှာ ကင်းပုန်းတွေချထားတာ၊ချန်ထားတာမျိုးသတင်းတွေ ထွက်နေလို့ ရွာထဲကိုလောလောဆယ် မဝင်ရဲကြသေးဘူး” ဟု မြောင် PDF ပြန်ကြားရေးတာဝန်ခံမှ ပြော သည်။ ငမြောင်တောင်ရွာနှင့်အနီးပတ်ဝန်းကျင်ရွာများတွင် စစ်ကောင်စီတပ်ဘေးကိုလွတ်ရန် ထွက်ပြေးတိမ်းရှောင်ရသည့် စစ်ရှောင်ဦးရေ ၇၀၀၀ ခန့်ရှိနေပြီ ဖြစ်သည်။mizzima

ပြင်သစ်နဲ့ အမေရိကန် ရေနံနဲ့ သဘာဝဓာတ်ငွေ့ကုမ္ပဏီတွေအနေနဲ့ အကြမ်းဖက်စစ် အုပ်စုဆီ ငွေကြေးလွှဲပြောင်းမှုတွေ ဆက်မလုပ်ကြဖို့ ဖိအားပေးတောင်းဆိုရေးမှာ ပြည်သူတွေအနေနဲ့ လက်မှတ်ရေးထိုးပါဝင်နိုင်ဖို့ ဖိတ်ခေါ်ထားပါတယ်။

ရေနံနဲ့ သဘာဝဓာတ်ငွေ့လုပ်ငန်းတွေကနေ အကြမ်းဖက်စစ်ကောင်စီဟာ နှစ်စဉ်အမေရိ ကန်ဒေါ်လာ သန်းထောင်ချီရရှိနေပြီး အဓိကဝင်ငွေရလမ်းတခုဖြစ်နေတာမို့ ဒါကို ပိတ်ဆို့ အရေးယူနိုင်ဖို့ ဖိအားပေးသွားဖို့ လိုအပ်နေတာ ဖြစ်ပါတယ်။

ရေနံနှင့်သဘာဝဓာတ်ငွေ့ကုမ္ပဏီတွေဖြစ်တဲ့ TotalEnergies  နဲ့ Chevron  တို့နဲ့အတူ အ မေရိကန်သမ္မတက တားဆီးပေးရေးအတွက်ပါ တောင်းဆိုမှုမှာတော့ မင်းအောင်လှိုင်နဲ့ သူရဲ့ အကြမ်းဖက်စစ်အုပ်စုထံကို ငွေကြေးလွှဲပြောင်းမှုဆက်မလုပ်ဖို့နဲ့ ဒီငွေတွေနဲ့ စစ်အုပ်စုကို လူသတ်လက်နက်တွေတပ်ဆင်ပေးနေတာတွေရပ်တန့်ဖို့ ပြည်သူလူထုအားလုံး တောင်းဆိုဖိအားပေးကြဖို့အတွက် လက်မှတ်ထိုးကြဖို့ အားလုံးကို ဖိတ်ခေါ်ထားတာ ဖြစ် ပါတယ်။

လက်မှတ်ရေးထိုးပါဝင်နိုင်မယ့် လင့်ခ် ၃ ခုကိုတော့ အောက်မှာ ဖော်ပြထားပါတယ်။

ပြင်သစ် TotalEnergies  ကုမ္ပဏီရဲ့ ငွေတွေနဲ့ စစ်အုပ်စုကို လူသတ်လက်နက်တွေ တပ် ဆင်ပေးနေတာတွေရပ်တန့်ဖို့ ပြည်သူလူထုအားလုံးတောင်းဆိုဖိအားပေးကြဖို့အတွက် ဒီ Petition မှာ လက်မှတ်ထိုးကြဖို့အားလုံးကို ဖိတ်ခေါ်ပါတယ်။https://actionnetwork.org/petitions/total-stop-being-an-accessory-to-min-aung-hlaing-the-myanmar-militarys-murder-campaign?fbclid=IwAR1froV5i7rBA3lSxURNXjQapkAUNO1Ll4Pp5fOtO9R8LSkR9c7Mb9lkkDY

အမေရိကန် ရေနံနှင့်သဘာဝဓာတ်​ငွေ့ကုမ္ပဏီတစ်ခုဖြစ်တဲ့ Chevron  ကိုစစ်အုပ်စုထံ ပိုက်ဆံဆက်မပေးဖို့ ဖိအားပေးတောင်းဆိုရန် လက်မှတ်ထိုးပါ။https://actionnetwork.org/petitions/demand-chevron-stop-bankrolling-the-myanmar-military?fbclid=IwAR2BBNWNMvyrw7N2oFR-5EiPIPG-6lt4sZV3AXqcuJKTy6yeQ9Oc8E7MVfc

မြန်မာစစ်အုပ်စုထံသို့ ရေနံနှင့်ဓာတ်ငွေ့ကုမ္ပဏီများ ငွေကြေးလွှဲပြောင်းမှု အမေရိကန် သမ္မတက တားဆီးပေးရေး တောင်းဆိုရန် လက်မှတ်ထိုးပါ။ https://actionnetwork.org/petitions/president-biden-stop-oil-companies-from-bankrolling-the-myanmar-military?fbclid=IwAR1n28gNhK4mlKTN5-VFshmZeuMb0CjDHRr5vlqFVvjkJ0OhC4JnH1PeIIY DVB

စစ်ကိုင်းတိုင်း၊ တမူးမြို့ရှိ မြို့မဈေးသည် ဇွန်လ ၃ ရက်က စ၍ ပိတ်ထားခဲ့ရာမှ ယမန်နေ့ (အောက်တိုဘာလ ၁၂ရက်)က ပြန်လည်ဖွင့်လှစ်ခဲ့ကြောင်း မြို့ခံများထံမှ သိရသည်။

“မနက်ပိုင်းလောက်ပဲဖွင့်တာပါ။ အဓိက စားကုန်သောက်ကုန်လောက်ပဲရောင်းတာ၊ လူ‌တော့ သိပ်မစည်ပါဘူး” ဟု တမူးမြို့ခံတစ်ဦးမှ ပြော သည်။ တမူး‌ဈေးပိတ်ထားချိန်က ဈေးသည်အချို့သည် အိန္ဒိယနိုင်ငံ မိုးရေးမြို့ဘက်သို့ တရားမဝင်သွားရောက်ပြီး စားသောက်ကုန်များကို ရောင်းချကြရ၍ ဈေးသည်တချို့မှာ အခက်အခဲများနှင့် ကြုံတွေ့ခဲ့ရသည်ဟု သိရသည်။

အိန္ဒိယ မြန်မာနယ်စပ်ရှိ နန်းဖာလုံဈေးသည်လည်း COVID-19 ကပ်ရောဂါစတင်ဖြစ်ပွားသည့် ကာလကတည်းက ဈေးပိတ်ထားရာ ယခုထက်တိုင်ပိတ်ထားသည်ဟု သိရသည်။ mizzima

မကွေးတိုင်း၊ မြို့သစ်မြို့နယ်၊ လင်းလည်ကျေးရွာအုပ်စု၊ ခြင်ကိုက်ကုန်းရွာကို အကြမ်းဖက်စစ်ကောင်စီတပ်ဖွဲ့တွေက အောက်တိုဘာ ၁၂ ရက် ည ၂ နာရီဝန်းကျင်က ဝင်ရောက်စီးနင်းရှာဖွေပြီး ပစ်ခတ်ခဲ့လို့ ဒေသခံပြည်သူတချို့ ထိခိုက်ဒဏ်ရာရှိခဲ့တယ်လို့ သိရပါတယ်။

တိမ်းရှောင်ထွက်ပြေးသွားတဲ့ ဒေသခံတဦးက “ညကြီးအချိန်မတော် ရောက်လာကြတာ။ ဘာကြောင့် ရောက်လာကြတာလဲ မပြောတတ်ဘူး။ ရွာက ဒလန်က မမှန်မကန်သတင်းပေးတာပဲ နေမှာပါ။ ရွာနာတာပေါ့။ လူငယ်နဲ့ လူလတ်ပိုင်းတချို့ကတော့ အဖမ်းခံရမှာစိုးလို့ ထွက်ပြေးကြတာကို လိုက်ပစ်ကြတယ်” လို့ ပြောပါတယ်။

အကြမ်းဖက်စစ်ကောင်စီတပ်ရဲ့ ပစ်ခတ်မှုကြောင့် ကျေးရွာဒေသခံ အမျိုးသား ၁ ဦးနဲ့ အမျိုးသမီး ၂ ဦး ကျည်ထိမှန်ပြီး အသက်အန္တရာယ်မစိုးရိမ်ရဘူးလို့ ပြောပါတယ်။

“ရွာက အိမ် ၅ လုံးလောက်ကိုလည်း ဖျက်ဆီးတယ်။ အိမ်တွေပေါ် ဇွတ်အတင်းတက်ပြီး ပိုက်ဆံနဲ့ ရွှေတွေကို ယူသွားတယ်။ နွားနဲ့ ဝက်တွေကိုလည်း ဆွဲသွားပြီး ရွာကပြည်သူ ၁၀ ယောက်လောက်ကိုလည်း ဖမ်းထားတယ်” လို့ နီးစပ်သူတဦးက ပြောပါတယ်။

ခြင်ကိုက်ကုန်းကျေးရွာဟာ တောင်တွင်းကြီး-မြို့သစ်ကားလမ်းပေါ်ကနေ ဆားတဲကျေးရွာကို ဖြတ်သန်းသွားရောက်ရတာဖြစ်ပြီး ဆားတဲကျေး ရွာက ပြည်သူ ၅ ဦးထက်မနည်းကိုလည်း ဖမ်းဆီးသွားတယ်လို့ ဆိုပါတယ်။

အကြမ်းဖက်စစ်ကောင်စီတပ်တွေဟာ ခြင်ကိုက်ကုန်းကျေးရွာ ဘုန်းကြီးကျောင်းမှာတပ်စွဲနေပြီး ကျေးရွာကဒေသခံတွေ ဖမ်းဆီးနှိပ်စက်နေတယ်လို့ နီးစပ်သူတွေဆီက သိရပါတယ်။DVB