စဉ့်ကိုင်နယ်တွင် ဆိုင်ကယ်စီးလူငယ် ၂ ဦးကိုစစ်ကောင်စီတပ် သေနတ်ဖြင့်ပစ် ၁ ဦးသေ
လူငယ်နှစ်ဦး ဆိုင်ကယ်စီးနင်းလာစဉ် စစ်ကောင်စီတပ်က ရပ်ခိုင်းရာမရပ်ပေးသဖြင့် သေနတ်ဖြင့်ပစ်၍ တစ်ဦးပွဲချင်းပြီး သေဆုံးသွားမှု စဉ့်ကိုင်မြို့နယ် ဖလုံဖိုကျေးရွာတွင် အောက်တိုဘာ ၂၁ ရက်နေ့ညက ဖြစ်ပွားခဲ့သည်။ဖလံဖိုရွာ အစိုးရဆေးပေးခန်းတွင် တပ်စွဲထားသော စစ်ကောင်စီတပ်များက ၎င်းတို့တပ်စွဲထားသည့် လမ်းကြားအတွင်း လမ်းမှားဝင်လာသူ ကြက်ခြံလုပ်သားလူငယ်နှစ်ဦးကိုပစ်ရာ အသက် ၃၀ ဝန်းကျင် ကိုရဲထွန်း သေဆုံးသွားပြီး ကျန်တစ်ယောက်မှာ ထွက်ပြေးလွတ်မြောက်သွားကြောင်း သိရသည်။
”ကြက်ခြံသူဋ္ဌေးက ကလေးတွေကို ကြက်စာသွားယူခိုင်းတာ၊ ကြက်ကားက နောက်ကျတော့ အပြန်နောက်ကျသွားတာကနေ သူတို့တပ်စွဲထားတဲ့နေရာ မှားဝင်မိရော၊ အဲ့ဒါနဲ့ စစ်သားတွေက ရပ်ခိုင်းတာ ကြောက်ပြီး မောင်းပြေးတာ၊ ဆိုင်ကယ်အမြန်မောင်းတော့ နောက်မှာ ထိုင်တဲ့ တစ်ယောက်က ပြုတ် ကျကျန်ခဲ့တာကို စစ်သားတွေက လှမ်းပစ်လိုက်တာ နောက်စေ့ပွင့်သွားတယ်” ဟု ဖလံဖိုရွာခံတစ်ဦးက ပြောသည်။
ကိုရဲထွန်း၏ အလောင်းကို စစ်ကောင်စီတပ်က ရဲစခန်းသို့သယ်သွားကာ အောက်တိုဘာ ၂၂ရက်နေ့ မနက်ပိုင်းတွင် စဉ့်ကိုင် အထွေထွေဆေးရုံကို ပို့လိုက်ပြီး မိသားစုထံ အကြောင်းကြားသည်။mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 