SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ဒေသခံပြည်သူများ မရှိတော့သော ထန်တလန်မြို့ပေါ်ရှိ နေအိမ်များအတွင်း ဖောက်ထွင်းကာ ပစ္စည်းများခိုးယူနေသော စစ်ကောင်စီမှ တပ် သား ၁ ဦးအား ယနေ့ နံနက်ပိုင်းတွင် ထန်တလန် CDF မှ ပစ်သတ်လိုက်အပြီး အကြမ်းဖက်စစ်ကောင်စီတပ်သည် မြို့ပေါ်ရှိ နေအိမ်များအပေါ် လက်နက်ကြီးများဖြင့် မွန်းလွဲပိုင်းအထိ တရစပ်ပစ်ခတ်သဖြင့် နေအိမ် အလုံးရေ ၆၀ ကျော် မီးလောင်နေကြောင်း သိရှိရသည်။

နေအိမ်များအား ဖောက်ထွင်းကာ ပစ္စည်းများခိုးယူနေသော စစ်ကောင်စီတပ်သားအား ထန်တလန် CDF မှ ပစ်သတ်လိုက်ကြောင်း၊ သေနတ် ၁ လက်ရရှိလိုက်ကြောင်း၊ စစ်ကောင်စီတပ်မှ ယင်းကိစ္စအား အငြှိုးထားပြီး မြို့ပေါ်သို့ လက်နက်ကြီးများဖြင့် တရစပ် ပစ်ခတ်နေကြောင်း ထန်တလန် CDF ကို ကိုးကားပြီး ဒေသသတင်းရင်းမြစ် Chin News Journal တွင် ရေးသားဖော်ပြသည်။

ထန်တလန်မြို့ပေါ်ရှိ အကြမ်းဖက်စစ်ကောင်စီတပ်ဖွဲ့ဝင်များသည် ယနေ့နံနက် ၉ နာရီ ၅၀ မိနစ်မှ စတင်ကာ မွန်းလွဲ ၂ နာရီခွဲခန့်အချိန်ထိ လက် နက်ကြီးများဖြင့် ပစ်ခတ်နေကြောင်းလည်း ဒေသသတင်းရင်းမြစ်များထံမှ သိရသည်။လက်ရှိ ထန်တလန်မြို့ပေါ်တွင် အကြမ်းဖက်စစ်ကောင် စီ တပ်ဖွဲ့ဝင် ၂၀၀ ခန့် ရှိနိုင်ကြောင်း ချင်းကာကွယ်ရေးတပ်ဖွဲ့များထံမှ သိရှိရသည်။

စက်တင်ဘာလ ၂၇ ရက် နံနက်ပိုင်းတွင်လည်း ထန်တလန်မြို့ပေါ်ရှိ စစ်ကောင်စီတပ်နှင့် ထန်တလန် CDF ကြား ပစ်ခတ်မှု ဖြစ်ပွားခဲ့ပြီး စစ်ကောင်စီတပ်သား ၅ ဦး သေဆုံးခဲ့ကာ စစ်ကောင်စီတပ်က ထန်တလန်မြို့တွင်းသို့ လက်နက်ကြီးများဖြင့် ပစ်ခတ်မှုကြောင့် ပြည်သူ အနည်းဆုံး ၁ ဦးသေဆုံးကာ နေအိမ် ၂၀ လုံးခန့် မီးလောင်ပျက်စီးခဲ့တာကြောင့် ထန်တလန်မြို့ခံများမှ ဘေးလွတ်ရာသို့ တိမ်းရှောင်ထွက်ပြေးခဲ့ကြရသည်။

စစ်ကောင်စီတပ်များအနေဖြင့် ထန်တလန်မြို့တွင်းရှိ ပြည်သူပိုင်အိမ်၊ ဆိုင်ပစ္စည်းများ ဖျက်ဆီးခိုးယူသည်ကို တွေ့ရှိပါက တွေ့သည့်နေရာတွင် ပစ်သတ်မည်ဖြစ်ကြောင်း CDF-Thantlang လွန်ခဲ့သည့် လအတွင်း သတိပေးချက် ထုတ်ပြန်ထားသည်။khit thit

ပဲခူးတိုင်း၊ ပြည်ခရိုင် ၊ ရွှေတောင်မြို့ရှိ စည်ပင်သာယာရေးရုံးကို ဗုံးဖောက်ခွဲခဲ့ကြောင်း ရွှေတောင် ပြောက်ကျား စစ်သည်တော်များ အဖွဲ့က ပြောသည်။ မင်းဘူးတန်းလမ်း၊ ကြာနီကန်ရပ်ကွက်တွင်ရှိသည့် စည်ပင်သာယာရေးရုံးကို အောက်တိုဘာ ၂၈ ရက် နံနက် ၃ နာရီ မိနစ် ၂၀ တွင် ဖောက်ခွဲခဲ့ခြင်း ဖြစ်သည်။

“ရည်ရွယ်ချက်ကတော့ စစ်ကောင်စီတပ်တွေရဲ့ ငွေဝင်ပေါက် တစ်ခုဖြစ်နေလို့။ ပြီးတော့ မြို့နယ်ရဲ့ စစ်ကောင်စီ ဒေါက်တိုင်တွေကို နောက်ဆုံး သတိပေးခြင်းမျိုးပါ ”ဟု ရွှေတောင် ပြောက်ကျား စစ်သည်တော်များအဖွဲ့ တာဝန်ရှိသူတစ်ဦးက ပြောသည်။

စည်ပင်ဝန်းအတွင်း ကားပါကင်နေရာတွင် ပေါက်ကွဲခဲ့ခြင်း ဖြစ်ပြီး ပျက်စီးမှု အနည်းငယ်သာ ရှိခဲ့သည်ဟုလည်း ၎င်းက ဆိုသည်။ ပြီးခဲ့သည့် လအတွင်းကလည်း လျှပ်စစ်ရုံးကို သတိပေး ဗုံးဖောက်ခွဲခဲ့ကြောင်း ၎င်းက ပြောသည်။mizzima

ကချင်၊ ချင်း၊ ရခိုင်နဲ့ ရှမ်းပြည်နယ်တွေက လူဦးရေပေါင်း ၃၇၀,၀၀၀ ကျော်အတွက်  ဥရောပသမဂ္ဂ(အီးယူ)က ကုလသမဂ္ဂ ကမ္ဘာ့စားနပ်ရိက္ခာအစီအစဉ်(WFP)ကနေတဆင့် ယူရိုငွေ ၄ သန်း လှူဒါန်းခဲ့ပြီး  အသက်ကယ်စားနပ်ရိက္ခာနဲ့ အာဟာရ အ‌ထောက်အပံ့ တွေ ပေးအပ်နိုင်ခဲ့တယ်လို့ ထုတ်ပြန်ပါတယ်။

ဥရောပသမဂ္ဂ လူသားချင်းစာနာထောက်ထားမှုဆိုင်ရာ အကူအညီပေးရေးအဖွဲ့(ECHO)က တဆင့် ပံ့ပိုးကူညီတဲ့ အဲဒီရန်ပုံငွေတွေဟာ ပဋိပက္ခဒဏ်၊ နိုင်ငံရေး မငြိမ်သက်မှုတွေနဲ့ အတူ ကိုဗစ်-၁၉ ကပ်ရောဂါရဲ့ လူမှုစီးပွားဆိုင်ရာ အကျိုးသက်ရောက်မှုစတဲ့ ရိုက်ခတ်မှုတွေနဲ့ ရင်ဆိုင်နေရတဲ့ မြန်မာနိုင်ငံရဲ့ အခက်အခဲဆုံးအချိန်မှာ ရောက်ရှိလာခဲ့တာလို့ ဆိုပါတယ်။

“မြန်မာနိုင်ငံရဲ့ စားနပ်ရိက္ခာအခြေအနေဟာ ပြီးခဲ့တဲ့နှစ်ကစပြီး တော်တော်လေး ဆိုးဝါး လာပါတယ်။ လူသားချင်းစာနာထောက်ထားမှုဆိုင်ရာလုပ်ငန်းတွေကို အကောင်အထည် ဖော်ဆောင်ရွက်နေတဲ့ အဖွဲ့အစည်းတွေအတွက် ထိခိုက်လွယ်သူတွေဆီ သွားရောက်ကူ ညီခွင့်ရရှိမှုအပိုင်းမှာ အခက်အခဲတွေပိုမိုများပြားလာနေပေမယ့် အခု EU ရဲ့  ပံ့ပိုးမှုကြောင့် WFP အနေနဲ့ မြန်မာနိုင်ငံအတွင်းမှာ စားနပ်ရိက္ခာအကူအညီလိုအပ်နေတဲ့သူတွေကို ကူညီ ရာမှာ ပိုမိုအားကောင်းလာစေသလို ကူညီဖို့ အသင့်ဖြစ်နိုင်စွမ်းကိုလည်း မြှင့်တင်ပေး နိုင်ပါလိမ့်မယ်။”လို့ မြန်မာနိုင်ငံအခြေစိုက် အီးယူလူသားချင်းစာနာထောက်ထားမှုဆိုင်ရာ လုပ်ငန်းများဆိုင်ရာ အကြီးအကဲ လူစီဗာနာက ပြောပါတယ်။

လတ်တလော စောင့်ကြည့်လေ့လာချက်တွေအရ မြန်မာနိုင်ငံက မြို့ပြနဲ့ နယ်စပ်ဒေသ ၂ ခု လုံးက ထိခိုက်လွယ်တဲ့ မိသားစုဝင်တွေဟာ အခုလက်ရှိဖြစ်ပွားနေတဲ့ ဘေးဒဏ်အမျိုး မျိုးကို ပိုမိုထိခိုက်ခံစားနေရပြီး အများစုဟာ ဝမ်းရေးကိစ္စအတွက်ကိုတောင် အစား လျှော့စားတာ၊ ငွေချေးငှားရတာ၊ မိမိတို့ပိုင်ဆိုင်မှုတွေကို ရောင်းချရတာတွေထိ လုပ် ဆောင်နေကြရတယ်လို့ ဆိုပါတယ်။

ကုလသမဂ္ဂ ကမ္ဘာ့စားနပ်ရိက္ခာအစီအစဉ်( WFP)ရဲ့ မြန်မာနိုင်ငံဆိုင်ရာ ဌာနေ ကိုယ်စားလှယ် စတီဖင်အန်ဒါဆန်က “စားသောက်ကုန်ဈေးနှုန်းတွေ မြင့်တက်လာတာနဲ့ ဝင်ငွေအခွင့်အလမ်းတွေ လျော့နည်းလာတာတွေကြောင့် အခုဆိုရင် မြန်မာနိုင်ငံ တဝန်းမှာ စားနပ်ရိက္ခာအခက်အခဲတွေဟာ တခါမှမကြုံဖူးတဲ့အခြေအနေကို ရောက်ရှိနေပြီး မိသားစုထမင်းဝိုင်းအတွက် နေ့စဉ်အစားအစာရရှိဖို့ကိုတောင် တော်တော်လေး ရုန်းကန်နေကြရပါတယ်။ ထိခိုက်လွယ်သူတွေ အလွန်လိုအပ်နေတဲ့ စားနပ်ရိက္ခာ အကူအညီတွေကို ထောက်ပံ့ပေးနိုင်ဖို့ အချိန်မီ လူသားချင်းစာနာထောက်ထားမှုအကူအညီတွေ ပံ့ပိုးပေးတဲ့ ဥရောပသမဂ္ဂကို ကျနော်တို့အနေနဲ့ အထူးပဲ ကျေးဇူးတင်ရှိပါတယ်”လို့ ပြောပါ တယ်။

မြန်မာနိုင်ငံမှာ အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၉ လနီးပါး ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေခဲ့တာ ဖြစ်ပါတယ်။

ဒါ့အပြင် အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူ တွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာ ကွယ်ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

စားသောက်ကုန်ဈေးနှုန်းတွေ မြင့်တက်လာနေတာရယ်၊ စက်ရုံအလုပ်ရုံတွေ ဆောက် လုပ်ရေးလုပ်ငန်းတွေနဲ့ ဝန်ဆောင်မှုလုပ်ငန်းတွေ ရပ်ဆိုင်းရတဲ့နောက်မှာ အလုပ်လက်မဲ့ တွေ တိုးပွားလာနေတာရယ်၊ ကိုဗစ် ရောဂါကူးစက်မူတွေကြောင့် စီးပွားရေးကျဆင်းမှု ပိုမို ဆိုးရွားလာနေပြီးတော့ လူမှုဘဝ အကျပ်အတည်းတွေ ပိုဆိုးလာနေတာ ဖြစ်ပါတယ်။

ဒါ့အပြင် မြန်မာနိုင်ငံစီးပွားရေးအခြေအနေဟာ ပြီးခဲ့တဲ့  ၂၀၂၀ ပြည့်နှစ်ကတည်းက ကို ဗစ်-၁၉ ကပ် ဘေးကြောင့် ဆိုးဆိုးရွားရွား ထိခိုက်ခံစားခဲ့ရပြီးသား ဖြစ်နေတယ်လို့ WFP ကပြောပါတယ်။

ကုလသမဂ္ဂ ကမ္ဘာ့စားနပ်ရိက္ခာအစီအစဉ်( WFP)က ထုတ်ပြန်ခဲ့တဲ့ မြန်မာ့စား နပ်ရိက္ခာ သုံးသပ်ချက်စာတမ်းမှာတော့ မြန်မာနိုင်ငံတွင်းမှာ လူ ဦးရေ ၃ သန်းခွဲ လောက်ဟာ အငတ်ဘေးနဲ့ ရင်ဆိုင်ရနိုင်တယ်လို့ သတိပေးပြောဆိုထားခဲ့ပါတယ်။DVB

အမျိုးသား ဒီမိုကရေစီအဖွဲ့ချုပ် (NLD) ၏ သဘာပတိ အဖွဲ့ဝင် ဦးဝင်းထိန်ကို နိုင်ငံတော်ကိုအကြည်ညိုပျက်အောင်ပြုလုပ်မှု ပြစ်မှုဆိုင်ရာ ဥပဒေ ပုဒ်မ ၁၂၄-က ဖြင့် နေပြည်တော် ဒက္ခိဏခရိုင် တရားရုံး အထူးခုံရုံးက ယနေ့ အောက်တိုဘာ ၂၉ ရက်တွင် ထောင် နှစ် ၂၀ အမိန့် ချလိုက်ကြောင်း ၎င်း၏ ရှေ့နေက မဇ္ဈိမကို ပြောသည်။

ဦးဝင်းထိန်ကို ယနေ့ အိုးဘိုထောင်သို့ ပို့မည်ဟုလည်း ၎င်းနှင့် နီးစပ်သည့် အသိုင်းအဝိုင်းက ပြောသည်။ ၎င်း၏ ရှေ့နေကမူ “ရဲတပ်ဖွဲ့ဝင်တွေက အနှစ် ၂၀ ဆိုတော့ ဒီနားက ရမည်းသင်းထောင်လည်း ပို့လို့မရတော့ ဘယ်ကို ပို့ဖို့ စီစဉ်နေလဲတော့ ကျွန်တော်လည်း အတိအကျ မသိရဘူးခင် ဗျာ” ဟု ပြောသည်။

ဦးဝင်းထိန်သည် လက်ရှိတွင် နေပြည်တော် အကျဉ်းထောင်တွင် ရှိနေသည်။ အသက် ၈၀ အရွယ် ဦးဝင်းထိန်၏ လက်ရှိ ကျန်းမာရေး အခြေအ နေနှင့် ပတ်သက်၍ “ကျန်းမာရေး ကောင်းပါတယ်။ ဒါပေမဲ့ အသက် ၈၀ တန်းနဲ့ ယှဉ်တဲ့ ကျန်းမာရေးတော့ ရှိတာပေါ့” ၎င်း၏ ရှေ့နေက ပြောသည်။

ဦးဝင်းထိန်သည် နှလုံးရောဂါကြောင့် အောက်ဆီဂျင်စက်ဖြင့် အိပ်ရသည်မှာ အချိန်ကြာမြင့်ပြီ ဖြစ်သည့်အပြင် အသက်အရွယ် ရလာသဖြင့် ၎င်း၏ ကျန်းမာရေးကို စိုးရိမ်ကြောင်း ၎င်းနှင့် နီးစပ်သူများက ပြောသည်။

ပုဒ်မ ၁၂၄-က သည် နှုတ်ဖြင့်သော်လည်းကောင်း စာဖြင့်သော်လည်း ကောင်း အမှတ်အသား (သို့) ထင်ရှားသော အမှတ်အသား အဖြစ်သော် လည်းကောင်း၊ ထို့အပြင် တခြားသော နည်းဖြင့် နိုင်ငံတော်နှင့် နိုင်ငံ တော်အစိုးရ အဖွဲ့ဝင်များအပေါ် မုန်းတီးလာအောင်၊ မလေးမစား ဖြစ်အောင်နှင့် ယင်းသို့ ဖြစ်စေရန် လှုံဆော်ခြင်း၊ လှုံဆော်ရန် အားထုတ်ခြင်းတို့ကို ပြုလုပ်ပါက ပြစ်မှု ထင်ရှားကြောင်း ပေါ်ပေါက်ပါက စွဲဆိုသည့် ပုဒ်မ ဖြစ်ကြောင်း ရာဇသတ်ကြီး ဥပဒေ ပြဋ္ဌာန်းချက် အရ သိရသည်။ အဆိုပါ ပုဒ်မသည် အမြင့်ဆုံး ထောင်ဒဏ် တစ်သက်တစ်ကျွန်းထိ ချ မှတ်နိုင်ကြောင်း သိရသည်။mizzima

မန္တလေးတိုင်း ပလိပ်မြို့နယ်တွင် အုပ်ချုပ်ရေးမှူး သေဆုံးမှုကို လာရောက်စစ်ဆေးသည့် စစ်ကောင်စီဘက်လက်နက်ကိုင်များကို မိုင်းခွဲတိုက် ခိုက်ခဲ့ရာ တစ်ဦးသေဆုံးပြီး အရပ်သားတစ်ဦးအပါအ၀င် ရှစ်ဦးဒဏ်ရာရရှိသွားခဲ့သည်ဟု စဥ့်ကိုင်မြို့နယ် ပြည်သူ့ကာကွယ်ရေးတပ်ဖွဲ့(LPDF Sintgaing)က ယနေ့ ထုတ်ပြန်သည်။

ပလိပ်မြို့ ဝန်ထမ်းကွက်သစ်ရပ်ကွက်အုပ်ချုပ်ရေးမှူး ဦးအောင်မြင့်ကို LPDF Sintgaing နှင့် အမည်မဖော်သောမြို့ပြပြောက်ကျားပူးပေါင်းတပ်ဖွဲ့ (မန္တလေး)တို့ ပူးပေါင်းလုပ်ကြံမှုဖြစ်ပြီးနောက် အခင်းဖြစ်ရာသို့လာရောက်သော ရဲများကို ခြံဝင်းအတွင်းအဆင်သင့်ထောင်ထားသောမိုင်းဖြင့်ဖောက်ခွဲတိုက်ခိုက်ခဲ့ခြင်းဖြစ်သည်ဟု ဆိုသည်။ ယမန်နေ့ အောက်တိုဘာ ၂၈ ရက် မနက် ၇နာရီ မိနစ် ၂၀ ချိန်တွင် စစ်ကောင်စီခန့်အုပ်ကြီးကို ကာကွယ်ရေးတပ်က သေနတ်ဖြင့်ပစ်သတ်ခဲ့သည်။

ထို့နောက် တစ်နာရီကျော်ကျော်တွင် စစ်တပ်နှင့် ရဲအင်အား ကားငါးစီးဖြင့်ရောက်လာခဲ့သည်။ စစ်သားများက ခြံပြင်တွင်စောင့်နေကြပြီး ရဲများက အလောင်းဝင်စစ်ချိန်တွင် အိမ်အဝင်လမ်းအောက်ထောင်ထားသောမိုင်းက ပေါက်ကွဲခဲ့သည်ဟု ကာကွယ်ရေးတပ်ဘက်ကပြောသည်။ ရဲတစ်ယောက်ဆေးရုံအရောက်တွင် သေဆုံးသွားပြီး ရဲခုနှစ်ယောက်နှင့် အုပ်ချုပ်ရေးရေးမှူးတူတော်စပ်သူတစ်ဦး ဒဏ်ရာများရသွားခဲ့သည်ဟု ဒေသခံများက ပြောသည်။

မျက်မြင်တွေ့ရှိရသူအရပ်သားတစ်ဦးကပြောသည်မှာ ဒဏ်ရာရသူများမှာ စိုးရိမ်ရသည်ဟု ပါရှိသည်။စစ်ကောင်စီတပ်ဖွဲ့ဝင်များက အုပ်ချုပ်ရေးမှူး၏ အလောင်းကိုယူဆောင်သွားပြီး စဥ့်ကိုင်ဆေးရုံမှတစ်ဆင့် ယင်းနေ့ မနက်ပိုင်း၌ပင် သင်္ဂြိုဟ်လိုက်သည်။အသက် ၅၀အရွယ်၀န်းကျင်ရှိသည့် ဦးအောင်မြင့်သည် စစ်တပ်အရာရှိဟောင်းတစ်ဦး၏ ယောက္ခမ တော်စပ်ကြောင်း ဒေသခံများက ပြောသည်။mizzima

စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စွပ်စွဲထားတဲ့ ရွှေချောင်းနဲ့ ဒေါ်လာတွေရယူထားတယ်ဆိုတဲ့  အဂတိမှုနဲ့ ပတ်သက်ပြီး တရားလိုပြသက်သေအဖြစ် နိုဝင်ဘာ ၅ ရက်နေ့ရုံးချိန်းမှာ ရန်ကုန်တိုင်းဝန်ကြီးချုပ် ဦးဖြိုးမင်းသိန်းရဲ့ဇနီး ဒေါ်ခင်မိမိကြွယ်က တရားလို ပြသက်သေအဖြစ် ထွက်ဆိုသွားဖို့ရှိနေပါတယ်။

ဒေါ်အောင်ဆန်းစုကြည်ကိုစွဲဆိုထားတဲ့ အဂတိအမှုလေးမှုထဲက နံပတ် ၂ အမှုဖြစ်တဲ့ ရွှေချောင်းနဲ့ဒေါ်လာတွေရယူထားတယ်ဆိုတဲ့ အမှုအတွက် ရန်ကုန်တိုင်းဝန်ကြီးချုပ် ဦးဖြိုးမင်းသိန်းက အောက်တိုဘာ ၁ ရက်နေ့ရုံးချိန်းမှာ စစ်ကောင်စွဲရဲ့ စွဲချက်မှန်ကန်ကြောင်း ထွက်ဆိုထားပါတယ်။

အောက်တိုဘာ ၂၉ ရက်နေ့က နိုင်ငံတော်အတိုင်ပင်ခံကိုစွဲဆိုထားတဲ့ အဂတိအမှု ၄ မှုထဲက ၂ မှုကို နေပြည်တော် ဇမ္ဗူသီရိတရားရုံးမှာ ဆက် လက်စစ်ဆေးခဲ့ပြီး နောက်ရုံးချိန်းကိုတော့ နိုဝင်ဘာ ၅ရက်နေ့မှာ ပြန်လည်ချိန်းဆိုခဲ့ပါတယ်။

အောက်တိုဘာ ၂၉ ရက်နေ့မှာ အမှုနံပတ် ၃နဲ့ ၄ ကိုစစ်ဆေးခဲ့ပြီး နေပြည်တော် စည်ပင်ဌာနမှူးဟောင်း ဦးစိုးနိုင်ကို အဓိကစစ်မေးခြင်းဆောင် ရွက်ခဲ့ပါတယ်။

ဦးစိုးနိုင်နဲ့ နိုင်ငံ့ခေါင်းဆောင်တွေရဲ့ရှေ့နေတွေ အပြန်အလှန်စစ်မေးခြင်းကိုတော့ နောက်ရုံးချိန်း နိုဝင်ဘာ ၅ ရက်နေ့မှာ ဆက်လက်ဆောင်ရွက်သွားမှာဖြစ်ပါတယ်။

အမှုနံပတ် ၃ နဲ့ ၄ ကို စစ်ဆေးနေရတဲ့အတွက် အမှုနံပတ် ၂ နဲ့ ၅ကိုတော့ ဒီနေ့မှာ စစ်ဆေးနိုင်ခြင်းမရှိခဲ့ပါဘူး။ နိုဝင်ဘာ ၅ ရက်နေ့မှာတော့ အမှုအားလုံးကို ဆက်လက်စစ်ဆေးသွားမှာ ဖြစ်ပါတယ်။

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက အဂတိမှု ၄ မှုအပါအဝင် စုစုပေါင်းအမှု ၁၁ မှုနဲ့တရားစွဲဆိုထားတာဖြစ်ပါတယ်။DVB

ကိုဗစ်-၁၉ ရောဂါ ကာကွယ်ရေးအတွက် ပိုးသတ်လုပ်ငန်း လုပ်ကိုင်မှာဖြစ်တာကြောင့် တရုတ်နိုင်ငံ၊ ယူနန်ပြည်နယ်၊  ကျယ်ဂေါင်မှာ နေထိုင်သူတွေ ပြောင်းရွှေ့ကြဖို့ ယူနန်အာဏာပိုင်တွေက အကြောင်းကြားလာတယ်လို့  ကူမင်းမြို့ရှိ မြန်မာ ကောင်စစ်ဝန်ချုပ်ရုံးက အောက်တိုဘာ ၂၉ ရက်မှာ ထုတ်ပြန်ပါတယ်။ 

ရွှေလီမြို့အနေနဲ့ ကျယ်ဂေါင်အုပ်ချုပ် ဧရိယာအတွင်း ပိုးသတ်လုပ်ငန်း ဆောင်ရွက်နေကြောင်း၊ နေရာအနှံ့ ပိုးသတ်နိုင်ဖို့ ကျယ်ဂေါင်အုပ်ချုပ် ဧရိယာအတွင်း နေထိုင်ကြတဲ့ တရုတ်နိုင်ငံသားတွေ၊ နိုင်ငံခြားသား (မြန်မာနိုင်ငံသား) တွေအနေနဲ့ ကျယ်ဂေါင် ဧရိယာမှ ပြောင်းရွှေ့ရမှာဖြစ်ပြီး လက်ရှိ တာဝန်ထမ်းဆောင်နေတဲ့ ဝန်ထမ်းတွေကလွဲလို့ တခြားလူများ ကျယ်ဂေါင် ဧရိယာအတွင်း ဝင်ရောက်ခွင့်မပြုကြောင်း ထုတ်ပြန်ချက်မှာ ဖော်ပြထားပါတယ်။ 

ရွှေလီမြို့အနေနဲ့တော့ ကျယ်ဂေါင်မြိုရဲ့ ကပ်ရောဂါထိန်းချုပ်နိုင်မှု အခြေအနေပေါ်မူတည်ပြီး ကျယ်ဂေါင်မြို့မှာ နေထိုင်ခဲ့တဲ့ မြန်မာနိုင်ငံသားတွေရဲ့ ပစ္စည်းတွေကို ပြန်ယူဖို့ စီစဉ်ပေးမယ်လို့ ဆိုပါတယ်။

လက်ရှိ တရုတ်ဘက်မှာ နေထိုင်တဲ့ မြန်မာနိုင်ငံသားတွေအနေနဲ့ ပစ္စည်းတွေ အရေးတကြီး ပြန်ယူလိုပါက ဒေသခံဝန်ထမ်းတွေရဲ့ ဦးဆောင်မှုနဲ့ ယူဆောင်ပြီး နေ့ချင်းအမြန် တရုတ်နိုင်ငံအတွင်းမှ ပြန်လည်ထွက်ခွာဖို့ အကြံပြုထားပါတယ်။

အခုလို လုပ်ဆောင်တာဟာ ကျယ်ဂေါင်မြို့ ဖွံ့ဖြိုးတိုးတက်ရေး အဆင့်မြှင့်တင်နိုင်ဖို့အတွက် အသေးစိတ် စီမံကိန်းတွေကို သေချာလေ့လာဆောင်ရွက်နေတာလို့ ဆိုပါတယ်။

ကျယ်ဂေါင်မြို့ကနေ ရွှေလီမြို့ကို ပြောင်းရွှေ့ခံရတဲ့ မြန်မာနိုင်ငံသားတွေဟာ အခက်အခဲတွေကြုံနေကြရပြီး ကူမင်းမြို့ရှိ စစ်ကောင်စီရဲ့ ကောင်စစ်ဝန်ချုပ်ရုံးကို အသနားခံစာ တင်ပြထားကြတယ်လို့ တရုတ်ဘက်ရောက် မြန်မာလုပ်ငန်းရှင် ၁ ဦးက ပြောပါတယ်။

“ဒီဘက်က မြန်မာနိုင်ငံသားတွေက လက်မှတ်ထိုး တောင်းဆိုတယ်။ အကူအညီတောင်းခံတာပေါ့။ အသနားခံစာ။ အဲဒီကို သူက ဒီဘက်က ရွှေလီရုံးကို သူက ပြောပေးတာ။ ပြောပေးတဲ့ အချိန်မှာ ရွှေလီဘက်ကနေပြီးတော့ သူတို့ရဲ့ သဘောထားကို ထုတ်ပြန်တာ။ အဲဒါကို ကောင်စစ်ဝန်ရုံးက ပြန်ပြောပြတဲ့ သဘော” လို့ ပြောပါတယ်။  

ကပ်ရောဂါထိန်းချုပ်နိုင်မှုအခြေအနေပေါ်မူတည်ပြီး ကျယ်ဂေါင်မှာ နေထိုင်ခဲ့တဲ့ မြန်မာနိုင်ငံသားတွေကို မူလနေထိုင်ရာနေရာမှာ ပစ္စည်းတွေပြန်လည်သယ်ဆောင်လာနိုင်ဖို့ စီစဉ် ဆောင်ရွက်ပေးမယ်လို့လည်း ကောင်စစ်ရုံးထုတ်ပြန်ချက်အရ သိရပါတယ်။ 

ကိုဗစ်-၁၉ တတိယလှိုင်းကာလ ပြီးခဲ့တဲ့ဩဂုတ်လမှာ  တရုတ်နိုင်ငံ ယူနန်ပြည်နယ်အတွင်း ပိုးတွေ့လူနာ ပြည်တွင်း ကူးစက်ခံရသူ ၆၃ ဦး၊ ပြည်ပမှ ကူးစက်လာသူ ၃၁၇ ဦး၊ စုပေါင်း ၃၈၀ ဦးရှိခဲ့ပြီး အခုလမှာတော့ ရောဂါကူးစက်ခံရသူတွေ သိသိသာသာ နည်းပါးသွားပြီ ဖြစ်ပါတယ်။DVB

နိုင်ငံတွင် လုံခြုံရေးနှင့် ဥပဒေစိုးမိုးရေး ပျက်ပြားနေမှုသည် ပြည်တွင်းပြည်ပ မီဒီယာများနှင့် အွန်လိုင်းမီဒီယာများကြောင့် ဖြစ်ပြီး မီဒီယာများကို ချေမှုန်း ထိန်းချုပ်ရန် ပြည်ထဲရေးဝန်ကြီးဌာနနှင့် ပြန်ကြားရေးဝန်ကြီးဌာနကို မင်းအောင်လှိုင်က ညွှန်ကြားထားကြောင်း သိရှိရသည်။

စက်တင်ဘာလ ၂၈ ရက်နေ့ ကျင်းပပြုလုပ်ခဲ့သည့် စစ်ကောင်စီ၏ လုံခြုံရေး၊ တည်ငြိမ်အေးချမ်းရေးနှင့် တရားဥပဒေစိုးမိုးရေး ကော်မတီအစည်းအဝေး အမှတ် ၅ / ၂၀၂၁ တွင် မင်းအာင်လှိုင်က ပြောဆိုညွှန်ကြားခြင်းဖြစ်ကြောင်း ၊ အဆိုပါ ညွှန်ကြားချက်ကို ယခုအခါ ပြည်နယ်၊ တိုင်း စစ်ကောင်စီများနှင့် ဝန်ကြီးဌာနများအားလုံးကိုစာအမှတ် ၅၁၁ (၁၈၃) /၁၂ / ဖြင့် သိရှိလိုက်နာရန် ညွှန်ကြားလာခြင်းဖြစ်ကြောင်း သိရှိရသည်။

နိုင်ငံတွင် လုံခြုံရေးနှင့်တရားဥပဒေစိုးမိုးရေး ပျက်ပြားနေမှုသည် ပြည်တွင်းပြည်ပ မီဒီယာများနှင့် အွန်လိုင်းမီဒီယာများကြောင့် ဖြစ်ကြောင်း၊ ပြည်ထဲရေးဝန်ကြီးဌာနနှင့်ပြန်ကြားရေးဝန်ကြီးဌာနအနေဖြင့် မီဒီယာများကို ထိန်းချုပ် ချေမှုန်းနိုင်ရေး ဆောင်ရွက်သွားရန် လိုအပ်ကြောင်း၊ ထို့ ပြင် သတင်းထောက်များ၏ အသက်အရွယ်နှင့်ပတ်သက်၍ စဉ်းစားသုံးသပ်သွားရန်လည်း မင်းအောင်လှိုင်က ဆိုသည်။ အကြမ်းဖက်စစ်ကောင်စီသည် ဖေဖော်ဝါရီလ ၁ ရက်နေ့ အာဏာသိမ်းချိန်မှစတင်ပြီး သတင်းမီဒီယာ ၉ ခုကို လုပ်ငန်း လုပ်ကိုင်ခွင့် လိုင်စင်များ ရုပ်သိမ်းထားခဲ့ပြီးဖြစ်သည်။khit thit