SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း မင်းကင်းမြို့မှာ အခြေခံပညာရေးကျောင်းတွေကို နိုဝင်ဘာလ (၁) ရက်နေ့ကတည်းက ဖွင့်လှစ်ခဲ့ပေမယ့် နိုဝင်ဘာလ ၃ နေ့အထိ ကျောင်းတက်သူအနည်းငယ်သာ ရှိတယ်လို့ သိရပါတယ်။

မင်းကင်းမြို့ အမှတ် (၁) နဲ့ အမှတ် (၂) အခြေခံ ပညာအထက်တန်းကျောင်းတို့ ဖွင့်လှစ်ထားပေမယ့် အမှတ် (၂) ကျောင်းမှာ တက်ရောက်သူမရှိပဲ အမှတ်(၁) ကျောင်းမှာ ကျောင်းသားကျောင်းသူ ၅၀၊ ၆၀ ဝန်းကျင်သာ ကျောင်းလာတက်ပြီး ရဲနှင့်စစ်သား လုံခြုံရေး တင်ကြပ်ထားတယ်လို့ ဆိုပါတယ်။

“အမှတ် (၂) ကျောင်းကတော့ မနေ့က လာအပ်တဲ့သူမရှိဘူးလို့ သိရတယ်။ ဒီနေ့တော့ အမှတ်(၁) ကျောင်းမှာ ၅၀-၆၀ ဝန်းကျင်လောက်တော့ရှိတယ်။ အခုဟာက ကျောင်းအပ် လက်ခံတာလို့ ပြောတယ်။ ရဲနဲ့စစ်သားတွေကတော့ လုံခြုံရေးယူထားတာ များတယ်။” လို့ မင်းကင်းမြို့နေပြည်သူတစ်ဦးက ပြောပါတယ်။

မင်းကင်းမြို့ဝန်းကျင်နဲ့ ကျေးရွာတချို့က အခြေခံပညာကျောင်းများမှာလည်း လာရောက် အပ်နှံသူ အနည်းငယ်သာရှိတယ်လို့လည်း သိရပါတယ်။

မြန်မာနိုင်ငံရှိ အခြေခံပညာကျောင်းတော်တော်များများကို နိုဝင်ဘာလ ၁ ရက်နေ့ ဖွင့်လှစ်ဖို့ စစ်ကောင်စီက ညွှန်ကြားထားပေမယ့် ကိုဗစ်ကူးဆက်မှု၊ မလုံခြုံမှုတို့ကြောင့် ပြည်သူတွေအနေနဲ့ စိုးရိမ်ပူပန်တာတွေ ရှိနေကြပါတယ်။DVB

ရန်ကုန်တိုင်း၊ လှည်းကူးမြို့နယ်၊ ညောင်နှစ်ပင်စက်မှုဇုန်အတွင်းက C9 လိုင်းရှိ သပြေခြံတစ်ခြံကို PDF များရှိနေသည်ဟုဆိုကာ စစ်ကောင်စီတပ်ဖွဲ့က အင်အားသုံး ဝင်ရောက်ရှာဖွေစီးနင်းခဲ့ပြီး ခြံပိုင်ရှင်နှင့် ခြံအလုပ်သမားနှစ်ဦးကို ဖမ်းဆီးခေါ်ဆောင်သွားကြောင်း သိရသည်။

ယမန်နေ့ နိုဝင်ဘာလ ၂ရက် နံနက် ၆နာရီခန့်က စစ်ကား ၁၅စီးခန့်ဖြင့် ဝင်ရောက်ရှာဖွေခဲ့ခြင်းဖြစ်ပြီး လက်နက်များတွေ့သည်ဟုဆိုကာ ဖမ်းဆီးသွားခြင်းဖြစ်သည်ဟု သတင်းရင်းမြစ်ကပြောသည်။

“မနက်အစောပိုင်း သူတို့စဝင်လာကတည်းက လမ်းအပြည့်ဝင်လာတယ်။ ကားထိုးရပ်ပြီး ခြံစည်းရိုးကိုပါ ခုန်ကျော်ပြီး အကုန်တက်ရှာတာ၊ အိမ်ပေါ်မှာ ခြံပိုင်ရှင် မနှင်းယုလှိုင်နဲ့ သူ့အလုပ်သမားတို့ကို လက်ပြန်ကြိုးတုပ်ပြီးဖမ်းထားတာ” ဟု အထက်ပါ သတင်းရင်းမြစ်က ဆိုထား သည်။

အထက်ပါ သပြေခြံအတွင်းသို့ ဝင်ရောက်စီးနင်း​ခြင်းမပြုမီ ကြာအင်းကျေးရွာအပိုင် တကူတုန်းကျေးရွာရှိ နေအိမ်တစ်အိမ်ကိုလည်း စစ်ကောင်စီတပ်ဖွဲ့ဝင်များက ဝင်ရောက်ရှာဖွေခဲ့သေးသည်။

အဆိုပါ နေရာ၌ ဖမ်းဆီးခံရသူ မရှိကြောင်း ရွာခံအချို့က အတည်ပြု‌ပြောသည်။mizzima

ချင်းပြည်နယ် ထန်တလန်မြို့ မီးဘေးသင့်ပြည်သူတွေအတွက် စစ်တွေမြို့အပါအဝင် မြို့တချို့မှာ ရခိုင်လူငယ်တွေ ဦးဆောင်ပြီး အောက်တို ဘာ ၃၁ ရက်နေ့က စတင်ပြီး အလှူငွေတွေကောက်ခံကာ လှူဒါန်းသွားဖို့ လုပ်ဆောင်နေကြတယ်လို့ ရခိုင်လူငယ်တွေက ပြောပါတယ်။

အခုလို လှူဒါန်းနိုင်ဖို့ လုပ်ဆောင်ရတာဟာ လက်ရှိ ထန်တလန်မြို့ဒေသခံတွေရဲ့ ခံစားနေရတဲ့ ဒုက္ခတွေကို ကိုယ်ချင်းစာသလို ပြီးခဲ့တဲ့နှစ်တွေကလည်း ရခိုင်မှာ အခုလိုအကြမ်းဖက်ဖျက်ဆီးခံခဲ့ရတာတွေရှိခဲ့တာကြောင့် ပိုပြီးတော့ ကိုယ်ချင်းစာတဲ့အတွက် တတ်နိုင်တဲ့ ဘက်ကနေ ကူညီထောက်ပံ့နိုင်ဖို့ ရည်ရွယ်တာလို့ ရခိုင်လူငယ် ၁ ဦးဖြစ်တဲ့ ကိုသက်ဇင်က ပြောပါတယ်။

“ကျနော်တို့ အဓိကလုပ်တဲ့ ရည်ရွယ်ချက်ကတော့ ထန်တလန်မြို့မှာ မီးလောင်ကျွမ်းမှုတွေဖြစ်ခဲ့တယ်။ ဒီထန်တလန်မြို့ဟာဆိုရင် တောင်ပေါ် ဒေသလည်းဖြစ်တယ်၊ နောက်ပြီးတော့ လမ်းပန်းဆက်သွယ်ရေးလည်း ခက်ခဲတဲ့နေရာဖြစ်တဲ့အတွက် သူတို့ရဲ့ အခက်အခဲတွေကို ကျနော်တို့နားလည်တယ်၊ ဘာကြောင့်နားလည်လည်းဆိုရင် ရခိုင်ဘက်မှာလည်း ဒီလိုမျိုး မီးလောင်ကျွမ်းမှုတွေ၊ ရွာလုံးကျွတ်မီးလောင်ကျွမ်းမှုတွေ ကြုံ တွေ့ခဲ့ရဖူးတယ်။ အဲဒါကြောင့်လည်း ကျနော်တို့ ဒီလိုအခက်အခဲတွေ၊ ခံစားချက်တွေကို ကိုယ်တိုင်သိရှိခဲ့ရတယ်ဆိုတော့ အခုအချိန်မှာ သူတို့ တွေကို ကိုယ်ချင်းစာတဲ့အနေနဲ့ ကိုယ်တတ်နိုင်တဲ့ဘက်က ကူညီဆောင်ရွက်ပေးတဲ့ သဘောမျိုးပါ” လို့ ပြောပါတယ်။

ချင်းပြည်နယ် ထန်တလန်မြို့မှာ အောက်တိုဘာ ၂၉ ရက်နေ့က အကြမ်းဖက်စစ်ကောင်စီတပ်ဖွဲ့ဝင်တွေရဲ့ ပစ်ခတ်မီးရှို့မှုတွေကြောင့် ဘုရားကျောင်း ၂ ကျောင်းနဲ့ လူနေအိမ်အဆောင်အအုံ့ စုစုပေါင်း ၁၆၀ ကျော် မီးလောင်ပျက်စီးဆုံးရှုံးသွားတယ်လို့ သိရပါတယ်။

khit thit

ထားဝယ်ခရိုင်၊ လောင်းလုံးမြို့နယ်၊ အောက်ရေဖြူ ကျေးရွာအုပ်စု၊ ကဒက်ငယ်ထိန် ကျေးရွာတွင် ခင်ပွန်းဖြစ်သူအား လာရောက် ဖမ်းဆီးရာ မတွေ့၍ ၎င်း၏ ဇနီးနှင့် နှစ်နှစ်အရွယ်ကလေး အပြင် ဦးလေးဖြစ်သူကိုပါ စစ်ကောင်စီ တပ်က ဖမ်းဆီးသွားသည်ဟု ဒေသခံများက ပြောသည်။

ယနေ့ နိုဝင်ဘာလ ၃ ရက် နံနက် ၄ နာရီ မိနစ် ၃၀ ဝန်းကျင်တွင် ကိုလုလုဇော်အား စစ်ကောင်စီက လာရောက် ဖမ်းဆီးရာ ကာယကံရှင်ကို မတွေ့သောကြောင့် ဇနီးဖြစ်သူ မဂျူလိုင်ဝင်း (ခေါ်) မမီးချစ်၊ နှစ်နှစ်အရွယ် ကလေးဖြစ်သူနှင့် ကိုလုလုဇော်နှင့် ဦးလေးတော်စပ်သူ ဦးဇော်ဝင်းတို့ကို ဖမ်းဆီးသွားခြင်း ဖြစ်သည်။

”ကားလေးစီးနဲ့ အင်အား ၂၀ လောက် အိမ်ကို လာဝိုင်းတယ်။ ကိုလုလုဇော်က မနေ့ညက အိမ်မှာ မအိပ်ဖြစ်တော့ လွတ်သွားတာ။ သူတို့ဘက်က အစွမ်းအစရှိရင် ကာယကံရှင်ကို ရအောင်ဖမ်းပေါ့။ အခုက သူတို့ဖမ်းချင်တဲ့သူ မတွေ့ရင် မိသားစုကိုဖမ်း၊ အိမ်မီးရှို့တာတွေကိုတော့ အပြင်းအထန် ရှုတ်ချပါတယ်” ဟု အောက်ရေဖြူရွာ ဒေသခံတစ်ဦးက ပြောသည်။

အဖမ်းခံရသူများသည် လက်ရှိတွင် လောင်းလုံးမြို့နယ် ရဲစခန်း၌ ရှိနေသည်ဟု ဒေသခံက ပြောသည်။ ကိုလုလုဇော်သည် အာဏာရှင်ဆန့်ကျင်ရေး သပိတ်လှုပ်ရှားမှုများတွင် ယခင်က ပူးပေါင်းပါဝင်ခဲ့မှုများ ရှိခဲ့သော်လည်း လက်ရှိတွင် ကျေးရွာအတွင်း သာမန်နေထိုင်သူ တစ်ဦးသာဖြစ်ကြောင်း၊ ယခုလုပ်ရပ်သည် ပုဂ္ဂိုလ်ရေးအရ မကျေနပ်၍ သတင်းပေး ဖမ်းခိုင်းခြင်းသာ ဖြစ်နိုင်ကြောင်း ထားဝယ်ခရိုင် သပိတ်ကော်မတီက ဆိုသည်။အောက်ရေဖြူ ကျေးရွာအုပ်စုအတွင်း သပိတ်လှုပ်ရှားသူများ အဖမ်းခံနေရပြီး ပြန်မလွတ်သေးသူ ငါးယောက် ကျန်သေးကြောင်းလည်း ၎င်းဒေသခံက ပြောသည်။

နိုဝင်ဘာလ ၁ ရက် ညပိုင်းကလည်း စစ်ကောင်စီတပ်သားများက ထားဝယ်ခရိုင် သပိတ်ကော်မတီဝင်များ ဖြစ်ကြသော ကိုမင်းလွင်ဦးနှင့် ကိုဝေယံစိုးတို့၏ နေအိမ်များကိုအကြမ်းဖက် ဝင်ရောက်စီးနင်းခဲ့သည်။ကိုမင်းလွင်ဦး၏ မိခင်ဖြစ်သူကို မတရား ဖမ်းဆီးခေါ်ဆောင်သွားခဲ့ပြီး ကိုဝေယံစိုး၏ မိသားစုနေအိမ်ကို မီးရှို့ဖျက်ဆီးခဲ့ကြသေးသည်။

ယမန်နေ့ နိုဝင်ဘာလ ၂ ရက်တွင်လည်း အကြမ်းဖက် စစ်ကောင်စီတပ်သားများက လောင်းလုံးမြို့ပေါ်ရှိ နေအိမ်အချို့အား အကြမ်းဖက် ဝင်ရောက်စီးနင်းပြီး ပြည်သူ ၁၀ ဦးကို ဖမ်းဆီးသွားခဲ့ကြောင်း ထားဝယ်ခရိုင် သပိတ်ကော်မတီက သတင်းထုတ်ပြန်သည်။mizzima

ဩစတြေးလျကုမ္ပဏီတခုကနေ စစ်ကောင်စီကို စစ်သုံးရေဒီယိုဆက်သွယ်ရေးကိရိယာတွေ ရောင်းချနေမှုကို ပိတ်ဆို့အရေးယူနိုင်ဖို့ တောင်းဆိုကြမယ့် လှုပ်ရှားမှုမှာ အားလုံးလက်မှတ်ရေးထိုး ပါဝင်ကြဖို့ နှိုးဆော်ထားပါတယ်။

Barrett Communication ဆိုတဲ့ စစ်သုံး ရေဒီယိုရောင်းချတဲ့ ဩစတြေးလျကုမ္ပဏီက စစ်တပ်ကို ခုလိုရောင်းချမှုကို Justice For Myanmar အဖွဲ့က ထောက်ပြခဲ့ပေမယ့် ကုမ္ပဏီဘက်ကတော့ စီးပွားရေးသွင်းကုန်ဆိုပြီး ငြင်းဆိုထားတယ်လို့ ဆိုပါတယ်။

လက်ရှိအချိန်ထိ ဩစတြေးလျ အစိုးရကလည်း စီးပွားရေးဦးပိုင်နဲ့ အကြမ်းဖက် စစ်ခေါင်းဆောင် မင်းအောင်လှိုင်တို့ကို ပိတ်ဆို့အရေးယူမှုတွေ မလုပ်သေးတာမို့ လက်မှတ်ရေးထိုး တောင်းဆိုကြဖို့ လိုအပ်နေတာ ဖြစ်ပါတယ်။

ဒီလှုပ်ရှားမှုမှာတော့ လက်မှတ်အရေအတွက် အနည်းဆုံး တသောင်း လိုအပ်ပြီး လာမယ့် နိုဝင်ဘာ ၁၇ ရက်နေ့အထိ ဖော်ပြပါလင့်ခ်မှာ လက် မှတ်ရေးထိုး ပါဝင်နိုင်မယ်လို့ ဆိုပါတယ်။

ဒါ့အပြင် မြို့ရွာတွေကို မီးရှို့ဖျက်ဆီးပြီး ပြည်သူတွေကို အကြမ်းဖက်သတ်ဖြတ်နေတဲ့ စစ်ကောင်စီကို ပံ့ပိုးပေးနေတဲ့ Blood Money သွေးစွန်းငွေတွေ၊ ငွေကြေး‌ထောက်ပံ့မှုတွေ ရပ်တန့်စေရေး ရည်ရွယ်တဲ့ ကမ္ဘာလုံးဆိုင်ရာ သွေးစွန်းငွေဖြတ်တောက်ရေး ဆိုရှယ်မီဒီယာ ကမ်ပိန်းကိုလည်း ပြီးခဲ့တဲ့ ရက်ပိုင်းက ပြုလုပ်ခဲ့ကြပါတယ်။

ဒီလှုပ်ရှားမှုမှာ စစ်အုပ်စုကို ငွေကြေးအထောက်အပံ့ပေးနေတဲ့ Total၊ Chevron အပါအဝင် နိုင်ငံတကာကုမ္ပဏီကြီးတွေကို ဖိအားပေးတောင်းဆိုမှုတွေ ထပ်မံပြုလုပ်ဖို့၊ ဖက်ဆစ်စစ်တပ် အမြစ်ဖြတ်ဖို့ တဦးချင်းစီပါဝင်ဖို့ စည်းရုံးဖိတ်ခေါ်ထားပါတယ်။

ဒါ့အပြင် သွေးစွန်းငွေဖြတ်တောက်ရေး လှုပ်ရှားမှုတွေအနေနဲ့ ‘မြန်မာပြည်ကို ကယ်တင်ရေး စစ်ကောင်စီကို ငွေမပေး’ စာတန်းပါ ကြွေးကြော် သံတွေနဲ့ မြန်မာပြည်ထဲက မြို့တချို့မှာလည်း သပိတ်မှောက် ဆန္ဒပြမှုတွေ ရှိနေပါတယ်။DVB

ရန်ကုန်တိုင်း၊ သန်လျင်မြို့နယ်တွင် ယနေ့ ယာဉ်ထိန်းရဲ ၃ ဦးကို သန်လျင်ပြည်သူ့ကာကွယ်ရေးတပ်ဖွဲ့က ပစ်သတ်လိုက်ကြောင်း ဒေသခံများ၏ ပြောဆိုချက်နှင့် သန်လျင်ပြည်သူ့ကာကွယ်ရေးတပ်ဖွဲ့၏ ထုတ်ပြန်ချက်အရ သိရှိရသည်။

နိုဝင်ဘာလ ၃ ရက်နေ့ မွန်းလွဲ ၁ နာရီ ၃၀ မိနစ်အချိန် သန်လျင်မြို့နယ်၊ သီလဝါစက်မှုဇုံ၊ အောင်သပြေလမ်းဆုံတွင် ဖြတ်သွားဖြတ်လာ ပြည်သူများ၏ မော် တော်ယာဥ်များ ဆီဘောက်ဆာကားများ နှင့် ဆိုင်ကယ်များများထံမှ အနိုင်ကျင့် ယာဥ်များသိမ်းယူခြင်း ၊ ငွေများတောင်းယူခြင်းများပြုလုပ်နေကြောင်း တိုင်ကြားလာသဖြင့် သန်လျင်ပြည်သူ့ကာကွယ်ရေးတပ်ဖွဲ့က စုံစမ်းစစ်ဆေးကာ အမှန်တကယ်ငွေကြေးတောင်းယူ အနိုင်ကျင့်နေ၍ ပစ်ခတ်သတ်ဖြတ်လိုက်ကြောင်း သန်လျင်ပြည်သူ့ကာကွယ်ရေးတပ်ဖွဲ့က ပြောသည်။

“ယာဉ်ထိန်းရဲ ၃ ဦးအသတ်ခံရတယ်။ အခုအဲဒီဘက်မှာ ရဲရော စစ်သားရော အင်အားများတယ်။ လမ်းတွေလည်း ပိတ်ထားတယ်။ စစ်နေပြီ” ဟု သန်လျင်ဒေသခံတစ်ဦးက ပြောဆိုသည်။khit thit

ရှမ်းပြည်တောင်ပိုင်း၊ ဖယ်ခုံမြို့နယ်၊ လွယ်ဝှဲကျေးရွာကို နိုဝင်ဘာ ၃ ရက် ဒီကနေ့ မနက် ၁၁ နာရီလောက်စပြီး စစ်ကောင်စီတပ်က မီးရှို့နေတယ်နေတယ်လို့ ဒေသခံတွေက ပြောပါတယ်။

လွယ်ဝှဲကျေးရွာဘက်ကို စစ်ကောင်စီတပ်က အင်အားအများအပြားနဲ့ ထိုးစစ်ဆင်လာမှုကြောင့် မနေ့ နိုဝင်ဘာ ၂ ရက်နေ့က ကရင်နီ တပ်မ‌ တော်(KA)၊ KNDF ၊ PDF (ဖယ်ခုံ)၊ PDF (မိုးဗြဲ) ပူးပေါင်းတပ်တို့နဲ့ တိုက်ပွဲဖြစ်ပွားခဲ့ပါတယ်။

အဲဒီတိုက်ပွဲအတွင်း စစ်ကောင်စစ်တပ်ဘက်က ၅ ဦး သေဆုံးပြီး ကရင်နီပူးပေါင်းတပ်ဘက်က ၄ ဦး ထိခိုက်ဒဏ်ရာရရှိခဲ့ကြောင်း KNDF က သတင်းထုတ်ပြန်ထားပါတယ်။

ဒီတိုက်ပွဲကြောင့် လွယ်ဝှဲကျေးရွာ ဒေသခံအားလုံး ဘေးလွတ်ရာကို ထွက်ပြေးတိမ်းရှောင်နေခဲ့ရပြီးနောက် အဲဒီရွာကို စစ်ကောင်စီတပ်က တပ်စွဲထားခဲ့တာဖြစ်ပါတယ်။

ဒီကနေ့ မနက် ၁၁ နာရီလောက်မှာတော့ အဆိုပါရွာမှာ မီးခိုးတွေထွက်ပြီး မီးလောင်နေတာကို အဝေးကနေသာ မြင်နေရပြီး အနီးကပ်မသွားရဲကြဘူးလို့ ဒေသခံတွေက ဒီဗွီဘီကို ပြောပါတယ်။

အဆိုပါဒေသမှာ ၂ လအတွင်း တတိယအကြိမ်မြောက်ဖြစ်ပွားတဲ့ စစ်ပွဲကြောင့် ဖယ်ခုံမြို့ ခေါင်းအိကျေးရွာအုပ်စုအတွင်းရှိ လွယ်ဟွဲရွာ၊  လွယ်လုံရွာ၊ စက်တော်ရွာနဲ့   ခေါင်းအိရွာတို့မှ  ပြည်သူ ၁၀၀၀ ကျော် ဘေးလွတ်ရာကို ထွက်ပြေးတိမ်းရှောင်နေကြရပြီး အရေးပေါ်အကူအညီတွေ လိုအပ်နေတယ်လို့ Kayan Rescue Committee -KRC က ထုတ်ပြန်ထားပါတယ်။

ကရင်နီ (ကယားပြည်နယ်မှာ)  ကရင်နီပြည်နယ်မှာ စစ်အာဏာသိမ်းပြီးနောက်  KA၊ KNDF နဲ့ စစ်ကောင်စီတို့ တိုက်ပွဲပေါင်း ၉၉ ကြိမ်ဖြစ်ပွားခဲ့ကြောင်း တိုးတက်သော ကရင်နီပြည်သူ့အင်အားစု PKPF က နိုဝင်ဘာလ ၂ရက်နေ့မှာ ထုတ်ပြန်ထားပါတယ်။

ဒီတိုက်ပွဲကြောင့် အရပ်သား ပြည်သူ ၉၉ ဦး သေဆုံးပြီး၊ စစ်ကောင်စီဘက်က ၃၉၉ သေဆုံးသွားသလို KNDF/KA အဖွဲ့က သေဆုံးသူ ၃၀ ဦးရှိကြောင်း ဖော်ပြပါတယ်။

ဒါ့အပြင်  နေအိမ် ၃၇၆ လုံး ပျက်စီးခဲ့ရပြီး လူပေါင်း၁၅၉ ဦး ဖမ်းဆီးခံထားရကြောင်း PKPF က နိုဝင်ဘာ ၂ ရက်နေ့မှာ ထုတ်ပြန်ထားပါတယ်။DVB

ယမန်နေ့ (နိုဝင်ဘာ ၁) ညနေပိုင်းက လျှပ်စစ်မီတာခများ ပေးဆောင်ရန်နှင့် မဆောင်ပါက မီးဖြတ်မည်ဖြစ်ကြောင်း အသံချဲ့စက်ဖြင့် အုပ်ချုပ်ရေးရုံးမှ ကြေညာနေသည့် မန္တလေးတိုင်း၊ ကျောက်ဆည်မြို့၊ သင်ပျိုကျေးရွာအုပ်ချုပ်ရေးမှူး သေနတ်ဖြင့် ၃ ချက် ပစ်ခတ်ခံရပြီး နေရာမှာပင် သေဆုံးခဲ့သည်။

Dragon Kyaukse Defense Force (DKDF) ခေါ် ဒေသခံ ပြည်သူ့ကာကွယ်ရေးတပ်ဖွဲ့ (PDF) က အသက် ၅၀ ဝန်းကျင် ဦးသိန်းဌေးကို ၎င်းတို့ သွားရောက်သတ်ဖြတ်ခြင်းဖြစ်သည်ဟု နာရီပိုင်းအတွင်း သတင်းထုတ်ပြန်ခဲ့သည်။

ဦးသိန်းဌေးသည် ဒလန်ဖြစ်သည့်အပြင်၊ စစ်ကောင်စီတပ်ကို တက်တက်ကြွကြွ အကျိုးဆောင်ပေးခဲ့သူဖြစ်သည်၊ အုပ်ချုပ်ရေးမှူးရုံးတွင် ထိုသို့ ကြေညာနေစဉ် ရုံးအတွင်း ဝင်ပစ်ခြင်းဖြစ်သည်ဟု ထိုအဖွဲ့၏ တာဝန်ရှိသူတစ်ဦးက ဆိုသည်။ 

“သူက စစ်ကောင်စီသတင်းပေးဗျ။ သူ့ကြောင့် ပြေးရတဲ့လူတွေများတယ်။ ပြီးတော့ သူက သွေးစွန်းငွေတွေ အတင်းအဓမ္မကောက်တယ်၊ စစ် တပ်ကို မျက်နှာလုပ်တယ်။ မပေးရင် မီးဖြတ်မယ်တို့ ဘာတို့ ပြောတယ်။ ဒါကြောင့်မို့ ကျွန်တော်တို့ စုံစမ်းကြည့်တော့ ဟုတ်လည်းဟုတ်နေတာနဲ့ ရှင်းလိုက်ရတာပါ”ဟု ၎င်းက ဆိုသည်။

သင်ပျိုကျေးရွာဒေသခံ အမျိုးသားတစ်ဦးကလည်း အလားတူပြောဆိုသည်။

“အဲ့ဒီလူက ဆိုးတယ်။ သူနဲ့အဆင်မပြေတဲ့လူဆို PDF နဲ့ ဆက်သွယ်တယ်ဆိုပြီး စစ်သားတွေကို ပြော၊ စစ်တပ်က လာပြီး ဖမ်းဆီးနှိပ်စက်တာတွေ လုပ်တာ ခဏခဏဖြစ်နေတယ်။ အပြောကလည်း ဆိုးတယ်၊ ရွာအပေါ် တော်တော်ဆိုးတယ်”ဟု ထိုအမျိုးသားက ဆိုသည်။ 

ထိုစွပ်စွဲပြောဆိုချက်နှင့် ပတ်သက်ပြီး Myanmar Now က ဦးသိန်းဌေး၏ မိသားစုဝင်များ၊​ မိတ်ဆွေများထံမှ တုံ့ပြန်ချက်ရယူနိုင်ခြင်း မရှိသေးပေ။  

ကျောက်ဆည်မြို့နယ်ဝန်းကျင်တွင် အခြေစိုက်သည့် ဒေသပြောက်ကျားတပ်ဖွဲ့များက ကျေးရွာအုပ်ချုပ်ရေးမှူးများ ဆက်လက်တာဝန်ယူနေပါက ရှင်းလင်းသွားမည်ဖြစ်ကြောင်း သတိပေးချက်များ အသီးသီးထုတ်ပြန်ထားသည်။

PDF များကို အကြမ်းဖက်သမားများဟု သတ်မှတ်ထားသော အာဏာသိမ်းစစ်ကောင်စီက အုပ်ချုပ်ရေးမှူးများကို အကာအကွယ်ပေးနိုင်ခြင်း မရှိပေ။

PDF အဖွဲ့များ၏ သတိပေးမှုများကြောင့် မကြာသေးမီက ရန်ကုန်တိုင်း သုံးခွမြို့နယ်၊ ခရမ်းမြို့နယ်၊ မကွေးတိုင်း ရေစကြိုမြို့နယ်၊ စစ်ကိုင်း တိုင်း ချောင်းဦးမြို့နယ်၊ ထီးချိုင့်မြို့နယ်များတွင် စစ်ကောင်စီခန့် အုပ်ချုပ်ရေးမှူးအများအပြား နုတ်ထွက်ခဲ့ကြသည်။ 

ပဲခူးတိုင်း၊ ရေတာရှည်မြို့နယ်တွင်လည်း အောက်တိုဘာ ၃၁ နောက်ဆုံးထားနုတ်ထွက်ရန် ကျည်ဆန် ၃ တောင့်ပုံဖြင့် သတိပေးစာကို လူမှုကွန်ရက်တွင် တင်ခဲ့ပြီးနောက်တွင် ထိုမြို့နယ်မှ အုပ်ချုပ်ရေးမှူး ၄၀ ကျော်က ကျန်းမာရေးအကြောင်းပြ၍ ထွက်စာတင်လိုက်ကြသည်။ 

အာဏာသိမ်းစစ်ကောင်စီက ရပ်ကျေးအုပ်ချုပ်ရေးမှူးထွက်စာတင်မှုများကို သတင်းအမှောင်ချထားသည်။ PDF များကိုလည်း အကြမ်း ဖက်သမားများအဖြစ် သတ်မှတ်ထားသည်။myanmar now

စဉ့်ကိုင်ဒေသ ကာကွယ်ရေးတပ်ဖွဲ့နှင့် ပတ်သက်သည် ဆိုသော စွပ်စွဲချက်ဖြင့် စစ်ကောင်စီက ဖမ်းဆီးသွားသော စဉ့်ကိုင်မြို့နှင့် ပုလိပ်မြို့မှ ဒေသခံ ခြောက်ဦးသည် မိသားစုနှင့် အဆက်အသွယ် ပြတ်နေသည်ဟု ဒေသခံများက ပြောသည်။

ပုလိပ်မြို့၊ ဘူတာကွက်သစ် ရပ်ကွက်ရှိ အသက် ၅၀ ဝန်းကျင် ဒေါ်အေးဝင်းနှင့် ဒေါ်ချောစုတို့ကို စစ်ကောင်စီတပ်က အောက်တိုဘာ ၂၉ ရက် မနက် ၁၀ နာရီဝန်းကျင်တွင် ဖမ်းဆီးခဲ့သည်။

စဉ့်ကိုင်မြို့ ရှိ “ဝင်း”ကွမ်းယာဆိုင် ပိုင်ရှင် ဦးဖိုးဝနှင့် ကွမ်းယာ လာဝယ်သော လူငယ် သုံးဦးကိုလည်း အောက်တိုဘာ ၂၉ ရက် နေ့လယ် ၁ နာရီတွင် စစ်တပ်က ဖမ်းဆီးသွားသည်။ဖမ်းဆီးခံထားရသော စဉ့်ကိုင်မြို့မှ အမျိုးသား လေးဦးကို အောက်တိုဘာ ၂၈ ရက်က အသတ်ခံခဲ့ရသည့် ပုလိပ်မြို့နယ် ဝန်ထမ်းကွက်သစ် အုပ်ချုပ်ရေးမှူး ကိစ္စနှင့် ပတ်သက်ပြီး စစ်တပ်က ဝန်ခံခိုင်းကာ အကြမ်းဖက် ပုဒ်မ တစ်ခု စွဲတပ်ထားကြောင်း သတင်းရင်းမြစ်က ပြောသည်။

ဖမ်းဆီးခံရသူများကို စဉ့်ကိုင်ရဲစခန်းမှ ပုလိပ်ရဲစခန်း၊ ထိုမှတစ်ဆင့် ထုံးဘိုရွာသို့ ခေါ်ဆောင်သွားကာ လက်ရှိတွင် မည်သည့်နေရာ၌ ရှိနေမှန်း မသိရဘဲ မိသားစုများနှင့် အဆက်သွယ် ပြတ်နေကြောင်းသိရသည်။

စဉ့်ကိုင်မြို့နယ် ဒေသကာကွယ်ရေးတပ်ဖွဲ့ (LPDF) က ယခု ဖမ်းဆီးခံရသော အမျိုးသမီးများသည် မိမိတို့နှင့် မပတ်သက်ဖူးကြောင်း၊ အမျိုး သား များသည်လည်း တပ်ဖွဲ့ဝင် မဟုတ်ကြောင်း၊ ဒလန်အမှု အတွက် PDF များကို ဖမ်းမမိ၍ ပြည်သူများကို မတရား ဖမ်းသွားခြင်း ဖြစ် ကြောင်း ပြောသည်။mizzima