SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

အမျိုးသားညီညွတ်ရေးအစိုးရ (NUG ) လမ်းညွှန်မှု အောက်ရှိ ပြည်သူ့ကာကွယ်ရေးတပ်-ဒီးမော့ဆို(DMO-PDF) တပ်ရင်း(B ) က မွမ်းမံသင် တန်း အောင်မြင်စွာ ကျင်းပ ပြုလုပ်နိုင်ခဲ့ကြောင်း ယနေ့ နိုဝင်ဘာ ၁၉ ရက်တွင် ထုတ်ပြန်သည်။ပြည်သူ့အာဏာကို မတရားသိမ်းယူ၊ ဖမ်းဆီး၊ သတ်ဖြတ်ခဲ့သော အကြမ်းဖက် စစ်ကောင်စီတပ်ဖွဲ့ကို အစွမ်းကုန် ကြိုးစား တိုက်ထုတ်သွားမည်ဟုလည်း ထုတ်ပြန်ချက်တွင် ပါရှိသည်။

သင်တန်းဆင်းပွဲတွင် သင်တန်းသားများက တော်လှန်ရေး အလံကို အလေးပြုပြီး အဓိဋ္ဌာန် လေးချက်ကို သစ္စာဆိုကာ တက်ရောက်လာသော ဗဟိုကော်မတီအဖွဲ့ဝင်က တပ်ဖွဲ့အတွက် မိန့်ခွန်း စကားပြောသည်။ ဒီးမော့ဆို PDF အနေဖြင့် ဖက်ဒရယ်ဒီမိုကရေစီ ပန်းတိုင် ရောက်အောင် ကြိုးစားသွားမည်ဟု သစ္စာ ပြုကြသည် mizzima

အင်တာပိုခေါ် နိုင်ငံတကာမှုခင်းရဲတပ်ဖွဲ့၏ ၈၉ ကြိမ်မြောက် ညီလာခံတွင် မြန်မာစစ်ကောင်စီအား ဖိတ်ကြားထားခြင်းကို ပြန်သုံးသပ်ရန် အ မျိုး သားညီညွတ်ရေးအစိုးရ (NUG) က တောင်းဆိုသည်။

နိုဝင်ဘာ ၂၃ မှ ၂၅ အထိ တူရကီနိုင်ငံက လက်ခံကျင်းပမည့် အင်တာပိုညီလာခံတွင် လူ့အခွင့်အရေး ချိုးဖောက်မှုများနှင့် စွပ်စွဲခံထားရသည့် အာဏာသိမ်းစစ်ကောင်စီ၏ ရဲတပ်ဖွဲ့အကြီးအကဲ ဒုတိယ ဗိုလ်ချုပ်ကြီးသန်းလှိုင် ဦးဆောင်တက်ရောက်မည်ဖြစ်သည်။

ဒေါ်အောင်ဆန်းစုကြည် ဦးဆောင်သော ရွေးကောက်ခံအရပ်သားအစိုးရကို ဖြုတ်ချပြီး စစ်တပ်က အာဏာသိမ်းယူပြီးနောက် စစ်ကောင်စီ၏ ရဲတပ်ဖွဲ့အကြီးအကဲနှင့် ပြည်ထဲရေး ဒုတိယဝန်ကြီးဖြစ်လာသူ ဒုတိယဗိုလ်ချုပ်ကြီးသန်းလှိုင်မှာ အင်တာပိုညီလာခံကို အွန်လိုင်းမှတဆင့် တက်ရောက်မည်ဖြစ် ကြောင်း မြန်မာနိုင်ငံရဲတပ်ဖွဲ့ သတင်းရင်းမြစ်တစ်ခုက Myanmar Now ကို အတည်ပြုသည်။

အင်တာပို၏ အဓိက ဦးတည်လုပ်ငန်းစဉ်သုံးခုတွင် အကြမ်းဖက်မှု တိုက်ဖျက်ရေးလည်းပါဝင်ရာ အာဏာသိမ်းစစ်ကောင်စီက အကြမ်းဖက်အဖွဲ့အစည်းတစ်ခုဖြစ်နေခြင်းကို အင်တာပိုအနေဖြင့် သတိထားသင့်သည်ဟု NUG ၏ ဒုတိယနိုင်ငံခြားရေးဝန်ကြီး ဦးမိုးဇော်ဦးက ပြောသည်။

“အင်တာပိုရဲ့ အခြေခံဥပေဒပုဒ်မ ၂၊ ပုဒ်မခွဲ (၁) မှာ အပြည်ပြည်ဆိုင်ရာ လူ့အခွင့်အရေး ကြေညာစာ တမ်းပါ သဘောထားတွေကို အခြေခံတယ်လို့ ပြောထားတဲ့အတွက် စစ်ကောင်စီကိုယ်စားလှယ်ကို လက်ခံခြင်းက လူ့အခွင့်အရေးရှုထောင့်က ကြည့်ရင် ဘယ်လိုဖြစ်နေမလဲဆိုတာ ပြန်သုံးသပ်သင့် ပါတယ်” ဟု ၎င်းက Myanmar Now ကို ပြောသည်။

“အင်တာပိုက နိုင်ငံရေးအားဖြင့် ဘက်မလိုက်ဘူးလို့ ဆိုထားတဲ့အတွက် စစ်ကောင်စီကို လက်ခံခြင်းက နိုင်ငံရေးအရ မှန်ကန်မှုရှိရဲ့လားဆိုတာ ပြန်စဉ်းစားသင့်ပါတယ်” ဟုလည်း ဦးမိုးဇော်ဦးက ထပ်လောင်း ပြောကြားသည်။

ကနေဒါ၊ ဥရောပသမဂ္ဂ၊ ဗြိတိန်နှင့် အမေရိကန်နိုင်ငံတို့က ဒဏ်ခတ်အရေးယူထားသည့် စစ်ခေါင်း ဆောင်များတွင် အာဏာသိမ်းမှု ဆန့်ကျင်ဆန္ဒပြသူများကို အကြမ်းဖက်ဖြိုခွင်းခြင်းနှင့် လူပေါင်း ၁၀၀၀ ကျော်ကို ဖမ်းဆီးသတ်ဖြတ်ခြင်းများတွင် အဓိက ဦးစီးဆောင်ရွက်သူဖြစ်သည့် ရဲတပ်ဖွဲ့အကြီးအကဲ ဒုတိယဗိုလ်ချုပ်ကြီးသန်းလှိုင်လည်း ပါဝင်သည်။

ဒုဗိုလ်ချုပ်ကြီးသန်းလှိုင်နှင့် ပတ်သက်၍ “ငြိမ်းချမ်းစွာဆန္ဒပြသူများကို ရဲတပ်ဖွဲ့က အကြမ်းဖက်ဖြိုခွင်း ရေးအတွက် ဆုံးဖြတ်ချက်ရာတွင် တိုက်ရိုက်တာဝန်ရှိသူဖြစ်ကာ မြန်မာနိုင်ငံရှိ အရေးကြီးလူ့အခွင့် အရေး ချိုးဖောက်မှုများတွင် တာဝန်ရှိသည်” ဟု ဥရောပသမဂ္ဂ၏ ဒဏ်ခတ်အရေးယူမှုဆိုင်ရာ ထုတ်ပြန်ချက်တွင် ဖော်ပြထားသည်။​

“တည်ငြိမ်ရေး၊ လုံခြုံရေးနှင့် ငြိမ်းချမ်းရေးကို ခြိမ်းခြောက်နေသည့် ဆောင်ရွက်ချက်များ အပါအဝင် မြန်မာနိုင်ငံ၏ တရားဥပဒေစိုးမိုးရေးနှင့် ဒီမိုကရေစီလျော့ပါးစေမှုများတွင် မူဝါဒပေးခြင်း၊ လက်တွေ့ လုပ်ဆောင်ခြင်းများတွင် သန်းလှိုင်ပါဝင်ပတ်သက်သည်” ဟု ဥရောပသမဂ္ဂက ဆိုသည်။

နိုင်ငံတကာဥပဒေချိုးဖောက်မှုများ ရှိနေသည်ဟု အရပ်ဘက်အဖွဲ့အစည်းများက စွပ်စွဲထားသည့် ချင်းပြည်နယ်နှင့် စစ်ကိုင်းတိုင်းကို စစ်ကောင်စီက အနော်ရထာစစ်ဆင်ရေးအမည်ဖြင့် အကြီးအကျယ် ထိုးစစ်ဆင်ရာတွင် အဓိကစီစဉ်ကွပ်ကဲနေသူမှာ ဒုတိယဗိုလ်ချုပ်ကြီးသန်းလှိုင်ဖြစ်သည်။

အင်တာပိုမှာ ဥရောပသမဂ္ဂအဖွဲ့ဝင် နိုင်ငံများတွင် လုပ်ငန်းလည်ပတ်ပြီး အထွေထွေအတွင်းရေးမှူးချုပ် ရုံးမှာလည်း ပြင်သစ်နိုင်ငံ၌ တည်ရှိကာ လက်ရှိအထွေထွေအတွင်းရေးမှူးချုပ်ဖြစ်သူ Jurgen Stock မှာ ဂျာမန်လူမျိုးဖြစ်သည်။

အင်တာပိုညီလာခံတွင် စစ်ကောင်စီကိုယ်စားပြုသူတက်ရောက်မည့်အရေးနှင့် ပတ်သက်၍ အမျိုးသား ညီညွတ်ရေးအစိုးရနှင့် တိုင်ပင်ဆွေး နွေးခဲ့ခြင်း ရှိမရှိ အင်တာပို အထွေထွေအတွင်းရေးမှူးကို Myanmar Now က ဆက်သွယ်မေးမြန်းရာတွင် တုံ့ပြန်ပြောဆိုခြင်း မရှိပေ။

အင်တာပိုညီလာခံကို လက်ခံကျင်းပမည့် တူရကီနိုင်ငံ၏ အင်တာပိုဌာနမှ ရဲအရာရှိတစ်ဦးက သန်းလှိုင် ပါဝင်တက်ရောက်မည့်အ‌ပေါ် အတည် ပြုခြင်း၊ ငြင်းဆန်ခြင်း မပြုဘဲ ဆက်သွယ်မေးမြန်းသည့်အချက် များမှာ ကိုယ်ရေးကိုယ်တာနှင့်ဆိုင်သော အချက်အလက်ဖြစ်သည်ဟုသာ တုံ့ပြန်သည်။

အင်တာပိုအနေဖြင့် မြန်မာစစ်တပ်ကို အသိအမှတ်ပြုခြင်း ရှိမရှိ ဆက်လက်မေးမြန်းရာတွင် “မြန်မာက အဖွဲ့ဝင် နိုင်ငံတစ်ခုပဲ။ ဒါပေမဲ့ နိုင်ငံရေးအရတော့ ကျွန်တော်မသိဘူး” ဟု အဆိုပါရဲအရာရှိက တုံ့ပြန်သည်။

ဖွဲ့စည်းပုံအရ မြန်မာရဲတပ်ဖွဲ့အကြီးအကဲ ဒုဗိုလ်ချုပ်ကြီးသန်းလှိုင်မှာ မြန်မာနိုင်ငံ၏ အင်တာပိုဌာန အကြီးအကဲလည်းဖြစ်သည်။ အင်တာပိုအ နေဖြင့် မြန်မာစစ်ကောင်စီကို အသိအမှတ်ပြုခြင်းနှင့် ညီလာခံတွင် မြန်မာစစ်ကောင်စီကိုယ်စားပြုသူ တက်ရောက်ခွင့်ပြုသည်ဆိုသော အ ထောက်အထား ကိုမူ မတွေ့ရှိရပေ။

အဖွဲ့ဝင်နိုင်ငံပေါင်း ၁၉၄ နိုင်ငံရှိသည့် အင်တာပိုသည် နိုင်ငံတကာ ရဲလုပ်ငန်းစဉ်များကို ပူးပေါင်း ဆောင် ရွက်သည့် အဖွဲ့အစည်းဖြစ်ပြီး အင်တာပို၏လုပ်ငန်းစဉ်များတွင် ကမ္ဘာလုံးဆိုင်ရာ စုံစမ်းစစ်ဆေးရေး ကိစ္စရပ်များအတွက် အချက်အလက်မျှဝေခြင်း၊ နည်းပညာနှင့် လုပ်ငန်းပိုင်းဆိုင်ရာ အထောက်အကူ ပေးခြင်းများ ပါဝင်သည်။

အင်တာပိုအဖွဲ့ဝင်ဖြစ်သည့်အတွက် မြန်မာစစ်တပ်အနေဖြင့် မှုခင်းဆေးပညာဆိုင်ရာ အချက်အလက်၊ ခရီးသွားလာခြင်း၊ အကြမ်းဖက်သမားများနှင့်ဆိုင်သည့် စာရွာစာတမ်းများ အပါအဝင် ကမ္ဘာတဝန်းရှိ အင်တာပို၏ အချက်အလင်စင်တာ ၁၄ ခုကို ဝင်ရောက်ခွင့်ရမည်ဖြစ်သည်။ myanmar now

မကွေးတိုင်း၊ ဆောမြို့နယ်၊ ကျင်းလိန်ကျေးရွာအနီးတိုက်တွင် အကြမ်းဖက်စစ်ကောင်စီက တိုက်ခိုက်ရေးရဟတ်ယာဉ် Mi35p အမျိုးအစား တိုက်ခိုက်ရေးရဟတ်ယာဉ် ၂ စီးဖြင့် ဝေဟင်က တိုက်ခိုက်နေသလို မြေပြင်မှလည်း ထိုးစစ်ဆင်တိုက်ခိုက်နေပြီး ဒေသခံကာကွယ်ရေးတပ်ဖွဲ့များဖြစ်သော YDF၊ PDF-‌ဆော၊ CDF-မင်းတပ်၊ CDF-ကန်ပက်လက်တို့နှင့် ယနေ့တွင် တိုက်ပွဲ အပြင်းအထန်ဖြစ်ပွားနေကြောင်း သိရှီရသည်။

“စစ်ကောင်စီဘက်က တိုက်ခိုက်ရေးရဟတ်ယာဉ် ၂ စီး သုံးပြီး ဒီနေ့ နေ့လယ် ၁၂ ခွဲလောက်ကနေ ကျင်းလိန်ကျေးရွာတဝိုက်မှာ အပေါ်ကနေ ရမ်းပစ်နေတာပေါ့။မြေပြင်က ထိုးနေတဲ့ စစ်တပ်က ခလရ ၁၄၀ လို့ သိရတယ်၊ နှစ်ဖက်အကျအဆုံးတော့ လက်ရှိ မသိရသေးဘူး၊ တိုက်ပွဲက တော့ တော်တော်ကြီးတယ်” ဟု ဒေသကာကွယ်ရေးတပ်ဖွဲ့ဝင်တစ်ဦးက ရန်ကုန်ခေတ်သစ်သို့ ပြောဆိုသည်။

အကြမ်းဖက်စစ်ကောင်စီသည် အနော်ရထာစစ်ဆင်ရေးအမည်ဖြင့် ချင်း ပြည်နယ်၊ စစ်ကိုင်းတိုင်းနှင့် မကွေးတိုင်းရှိ ဒေသခံကာကွယ်ရေးတပ် ဖွဲ့များကို အင်အားအလုံးအရင်းဖြင့် ထိုးစစ်ဆင်တိုက်ခိုက်လျှက်ရှိပြီး လက်ရှိအချိန်တွင် စစ်ကိုင်းတိုင်း၊ မကွေးတိုင်းနှင့် ချင်းပြည်နယ် ထိစပ်ဒေသများဖြစ်သည့် ဂန့်ဂေါ၊ ထီးလင်း၊ ယော၊ ဆော ဒေသများတွင် တိုက်ပွဲများ ပြင်းထန်လျက်ရှိနေသည်။ khit thit

ကရင်နီ (ကယား) ပြည်နယ်၊ ဒီးမော့ဆိုမြို့နယ်၊  ဒေါခလိုက်လင်းကျေးရွာရှိ နေအိမ် ၃ လုံးကို စစ်ကောင်စီတပ်က နိုဝင်ဘာ ၁၈ ရက် မနေ့ညနေ က မီးရှို့ဖျက်ဆီးသွားပါတယ်။

ဒီးမော့ဆိုမြို့နယ်မှာ ၅ မိုင်နဲ့  ၆ မိုင် ကျေးရွာတလျှောက်  မနေ့ မွန်းလွဲပိုင်းက  စစ်ကောင်စီလက်နက်ကိုင်တပ်တွေနဲ့ ကရင်နီပူးပေါင်းတပ်တို့ အကြား တိုက်ပွဲဖြစ်ပွားခဲ့ပါတယ်။

စစ်အင်အားဖြည့်တင်းနေတဲ့ စစ်ကောင်စီ ယာဉ်တန်းကို ကရင်နီပူးပေါင်းတပ်က တိုက်ခိုက်ခဲ့ပြီးနောက် ညနေပိုင်းမှာ ဒေါခလိုက်လင်းကျေးရွာက ဒေသခံနေအိမ် ၃ လုံး မီးရှို့ဖျက်ဆီး ခံရတာဖြစ်ပါတယ်။

ဒေါခလိုက်လင်းကျေးရွာဟာ  ၆ မိုင်ကျေးရွာအကျော် လွိုင်ကော်ကနေ ဒီးမော့ဆိုသွားတဲ့ လမ်းမကြီးဘေးမှာ တည်ရှိတာဖြစ်ပါတယ်။

မနေ့ နေ့ခင်းပိုင်းက ဖြစ်ပွားခဲ့တဲ့ တိုက်ပွဲအတွင်း စစ်ကောင်စီဘက်က တယောက် သေဆုံးခဲ့ကာ   တပ်သားတချို့ ထိခိုက်ဒဏ်ရာရတာရှိတယ်လို့ KNDF က ထုတ်ပြန်ပါတယ်။ 

တိုက်ပွဲဖြစ်ပြီးနောက် လမ်းမကြီးဘက်ကို သွားလာနေတဲ့ ပြည်သူ နှစ်ယောက်ကို  စစ်ကောင်စီတပ်က အကြောင်းမဲ့ ပစ်သတ်ခဲ့တယ်လို့လည်း  KNDF သတင်းနဲ့ ပြန်ကြားရေးဌာန တာဝန်ရှိသူ တဦးက ပြောပါတယ်။

“ပစ်ခတ်မှု ပြီးတဲ့အချိန်မှာ သူတို့တွေက လာသမျှ ယာဉ်တွေပေါ့လေ။ ဆိုင်ကယ်ပဲဖြစ်ဖြစ်၊ ကားဖြစ်ဖြစ် ရပ်ပြီးတော့မှ စစ်ဆေးတာရှိတယ်။ အရပ်သား နှစ်ဦးကိုတော့ သူတို့ ပစ်သတ်လိုက်တယ်ပြောတာပဲ။ ပစ်သတ်တာက လမ်းမကြီးပေါ်ဖြစ်ဖို့များတယ်။ ဘယ်နေရာပစ်လဲဆိုတာ ကျနော်တို့ အတိအကျတော့ မသိရဘူး။ ဒါပေမဲ့ ကျနော်တို့ သတင်းရတာက ဒီတိုက်ပွဲဖြစ်ပြီးတဲ့အချိန်မှာ စကစက အရပ်သားနှစ်ဦးကို ပစ်သတ်လိုက်တယ်။ ”

ပစ်သတ်ခံရလို့ သေဆုံးသွားသူ နှစ်ယောက်ဟာ ဘယ်သူဘယ်ဝါလဲဆိုတာကိုတော့ အသေးစိတ် မသိရသေးပါဘူး။

စစ်ကောင်စီတပ်တွေဟာ  ဒီးမော့ဆိုမြို့နယ်မှာ  တပ်အင်အားတွေ ဖြည့်တင်းနေသလို ဖရူဆိုနဲ့ ဘော်လခဲမြို့နယ်တွေ ဘက်မာလည်း  စစ်အင်အားဖြည့်တင်းဖို့ ကြိုးစားနေပါတယ်

ဒါအပြင် ကယန်းတိုင်းရင်းသားတွေနေထိုင်တဲ့ ဖယ်ခုံမြိုနယ်၊ အနောက်ကယန်းဒေသဘက်ကိုလည်း စစ်ကောင်စီတပ်အင်အား ၃၀၀ ကျော်နဲ့ ထိုးစစ်ဆင်နေတဲ့အတွက် ကျေးရွာတချို့မှာ ရွာသားတွေ ထွက်ပြေးတိမ်းရှောင်နေကြရပါတယ်။

အလားတူ မိုးဗြဲမြို့မှာလည်း  ပစ်ခတ်တိုက်ခိုက်မှုတွေ ထပ်ဖြစ်မှာကို ဒေသခံပြည်သူတွေလည်း စိုးရိမ်ထိတ်လန့်နေကြပါတယ်။ DVB

စစ်ကောင်စီ၊ ပညာရေးဝန်ကြီးဌာနအောက်ရှိ တက္ကသိုလ် ၃၈ ခုမှ ဝိဇ္ဇာ၊ သိပ္ပံ အဝေးသင်တန်းများကို နိုဝင်ဘာ ၁ မှ ၉ အတွင်း ကျောင်းအပ်လက်ခံမည်ဟု မူလက ကြေညာထားသော်လည်း တစ်လခန့် နောက်ဆုတ်လိုက်ရသည်။

ကျောင်းအပ်နှံရန် ကျန်ရှိနေသည့် ကျောင်းသားများအတွက်ဟုဆိုကာ ကျောင်းအပ်ကာလကို ဒီဇင်ဘာ ၅ အထိ ထပ်တိုးလိုက်ကြောင်း စစ်ကောင်စီက နိုဝင်ဘာ၇ တွင် မြန်မာ့အလင်းသတင်းစာမှတစ်ဆင့် ကြေညာသည်။

Myanmar Now ၏ ဆက်သွယ်မေးမြန်းမှုများအရ အာဏာသိမ်း စစ်တပ်၏ အုပ်ချုပ်မှုကို လက်မခံ၊ တော်လှန်သည့် လှုပ်ရှားမှုအဖြစ် ကျောင်းမတက်ဘဲ သပိတ်မှောက်ကြသည်ဖြစ်၍ ကျောင်းအပ်နှံသူ နည်းပါးသဖြင့် ထိုသို့ ရက်ထပ်တိုးခြင်းဖြစ်ကြောင်း သိရသည်။ အရေအတွက်ကိုမူ အတည်မပြုနိုင်သေးပေ။

ရွေးကောက်ပွဲရလဒ်ကို ငြင်းဆန်၊ ငြိမ်းချမ်းစွာ ဆန္ဒပြသည်ကိုပင် ပစ်ခတ်နှိမ်နင်းသည့် စစ်ကောင်စီကို ဘက်ပေါင်းစုံမှ နိုင်ငံအနှံ့တော်လှန်နေချိန်တွင် ၎င်းတို့ဖွင့်သည့် ကျောင်းသို့ သွား၍ တက်ရောက်ရန် လိပ်ပြာမလုံဟု ရန်ကုန်အရှေ့ပိုင်းတက္ကသိုလ် တတိယနှစ် မြန်မာစာ အဝေးသင်ကျောင်သားတစ်ဦးက ပြောသည်။

“အဝေးသင်ပညာရေးက လုံးဝပြည့်စုံတဲ့ပညာရေးတစ်ခုမဖြစ်သေးဘူးဆိုတဲ့ အခြေအနေမှာဘဲ အာဏာရှင်လက်အောက်ကို ရောက်သွားတဲ့နောက်မှာရော ပိုပြီးကောင်းတဲ့ပညာရေးစနစ် ရမယ်လို့ မျှော်လင့်လား။ မျှော်လင့်စရာလည်းမရှိဘူးလို့ ယူဆတဲ့အတွက် ဒီအာဏာရှင်စနစ်မပြုတ်ကျမချင်း ဒီကျောင်းတွေမတက်ကြပါနဲ့။ ကျောင်းတွေမအပ်ကြပါနဲ့” ဟု ၎င်းက ပြောသည်။

စစ်ကောင်စီ၏ အဝေးသင်တက္ကသိုလ် ပြန်ဖွင့်ရန် ကြိုးပမ်းမှုမှာ လူငယ်များ၏ ပညာသင်ယူခွင့်အတွက် ရည်ရွယ်ခြင်းမဟုတ်ဘဲ အုပ်ချုပ်ရေးယန္တရားပုံမှန်လည်ပတ်နေသည်ဟု ပြသရန်၊ စစ်ကျွန်ပညာရေးကို အသက်သွင်းရန်သာ ဖြစ်သည်ဟု လုံခြုံရေးအရ အမည်မဖော်လိုသည့် အထက်ပါ ကျောင်းသားကပင် သုံးသပ်သည်။

စစ်ကောင်စီသည် အာဏာဖီဆန်ရေးလှုပ်ရှားမှု (CDM) အားကောင်းသည့် ကျန်းမာရေး၊ ပညာရေးနှင့် ဘဏ်လုပ်ငန်းများကို ပုံမှန်ပြန်လည်ပတ်နေပြီဆိုသော ပြယုဂ်ကို စစ်ကောင်စီက တစိုက်မတ်မတ် အကောင်အထည်ဖော်နေခြင်းသာဖြစ်ကြောင်း မော်လမြိုင်တက္ကသိုလ်ကျောင်းသားများသမဂ္ဂ ဥက္ကဌ ကိုမင်းသံစဉ်ဦးကလည်း ပြောသည်။

ထို့အတူ စစ်ကောင်စီက ၎င်းတို့ကို နိုင်ငံအနှံ့ ပြန့်ကျဲစွာ တော်လှန်နေသည့် ကျောင်းသားများကို ပြန်လည်စုစည်းရန်၊ CDM တွင် ပါဝင်ပြီး နုတ်ထွက်သွားကြသည့် ဝန်ကြီးဌာနမှ ဝန်ထမ်းများနေရာကို အလျင်အမြန် ပြန်လည်အစားထိုးနိုင်ရန် ရည်ရွယ်ပုံရကြောင်း ၎င်းက သုံးသပ်သည်။

စစ်ကောင်စီက အာဏာသိမ်းပြီး လေးလအကြာ မေ ၅ ရက်ကတည်းက တက္ကသိုလ်နှင့် ကောလိပ်များမှ သင်တန်းအချို့ကို ပြန်လည်ဖွင့်ပြခဲ့သည့်နည်းတူ အဝေးသင်တက္ကသိုလ်ကိုလည်း ထိုနည်းလည်းကောင်း လုပ်ဆောင်ခြင်းပင်ဖြစ်ကြောင်း ကျောက်ဆည်တက္ကသိုလ် ကြားကာလ ယာယီတက္ကသိုလ်အုပ်ချုပ်ရေးကောင်စီ အဖွဲ့ဝင်တစ်ဦးက ဆိုသည်။

တက်ရောက်သူ ဦးရေ နည်းပါးစွာဖြင့် မေလအတွင်း စဖွင့်သည့် တက္ကသိုလ်နှင့် ကောလိပ်များကဲ့သို့ ယခု ထပ်မံစီစဉ်သည့် အဝေးသင်တက္ကသိုလ် ကျောင်းသား၊ ကျောင်းသူများကလည်း စစ်ကျွန်ပညာရေးကို သပိတ်မှောက်ရန် လိုကြောင်း ၎င်းက ဆက်ပြောသည်။

စစ်အုပ်စုသည် မတရားသဖြင့် အာဏာသိမ်းယူထားသည့်အပြင် ဆန့်ကျင်သည့် ကျောင်းသား၊ ကျောင်းသူများကို သတ်ဖြတ်ခြင်း၊ ဖမ်းဆီထောင်ချနေသဖြင့် စစ်ကောင်စီက ဖွင့်မည့် စာသင်ကျောင်းများသို့ သွားတက်ခြင်းသည် ရှက်ဖွယ်လုပ်ရပ်ပင်ဖြစ်သည်ဟု ထိုသူက မှတ်ချက်ပြုသည်။

“ကိုယ့်ကျောင်းသားတွေကို ပစ်ခဲ့တဲ့ ဒီကောင်တွေ(စစ်ကောင်စီတပ်ဖွဲ့)ရှိနေတဲ့ တက္ကသိုလ်နဲ့ ပြီးတော့ အခုလက်ရှိထောင်ထဲမှာ ကျောက်ဆည်တက္ကသိုလ်ကျောင်းသားတွေရှိနေသေးတယ်။ မတရားသော ပုဒ်မတွေနဲ့ ထောင်ချခံရတဲ့ကျောင်းသားတွေရှိရဲ့သားနဲ့ ကျောင်းသွားတက်မယ်ဆိုရင် ဒါကိုတော့ ပြင်းပြင်းထန်ထန်ကန့်ကွက်တယ်” ဟု ၎င်းက ဆိုသည်။

စာသင်ကျောင်းများ အတင်းအကျပ်ပြန်ဖွင့်သည့် စစ်ကောင်စီ၏ ခြေလှမ်းမှာ အခြေခံပညာကျောင်းများ၊ တက္ကသိုလ်ကျောင်းများတွင် တပ်စွဲရန်သာဖြစ်ပြီး ပညာအရည်အသွေး အာမခံချက်လုံးဝမရှိကြောင်း၊ ကျောင်းအပ်ခြင်းသည် စစ်ကောင်စီနှင့် ပူးပေါင်းခြင်းသာဖြစ်ကြောင်း ဘားအံတက္ကသိုလ် တက္ကသိုလ်ကောင်စီက နိုဝင်ဘာ ၁၅ တွင် သတင်းထုတ်ပြန်ထားသည်။

သို့သော် စစ်အာဏာသိမ်းပြီးနောက် လက်နက်ကိုင်တိုက်ပွဲသံများ တိတ်သွားသည့် ရခိုင်ပြည်နယ်ရှိ တက္ကသိုလ်များတွင်မူ ယခင်နှစ်များထက် ကျောင်းအပ်သူများပြီး ကနဦးသတ်မှတ်သည့် ကျောင်းအပ်ရက်တွင် အပ်နှံမှုပြီးစီးကြောင်း ဒေသအခြေပြု Western News သတင်းဌာနက နိုဝင်ဘာ ၈ တွင် ဖော်ပြထားသည်။

ကျောက်ဆည်တက္ကသိုလ် ကြားကာလ ယာယီတက္ကသိုလ်အုပ်ချုပ်ရေးကောင်စီအဖွဲ့ဝင်တစ်ဦး၏ အဆိုအရ စစ်ကောင်စီက ဖွင့်လှစ်သည့် ကျောင်းများ၊ တက္ကသိုလ်များ၏ စာမေးပွဲရလဒ်များကို အမျိုးသားညီညွတ်ရေးအစိုးရ (NUG) ကလည်း လက်ခံနိုင်လိမ့်မည် မဟုတ်ဟု သိရသည်။

ဖက်ဒရယ်ပညာရေးစနစ်အကောင်အထည်ဖော်ရန် ကြိုးပမ်းနေသည်ဆိုသော NUG ပညာရေးဝန်ကြီးဌာနထံသို့မူ ဆက်သွယ်မေးမြန်းနိုင်ခြင်းမရှိသေးပါ။ အွန်လိုင်းသင်တန်းများ၊ ဘာသာရပ်အလိုက်သင်တန်းများ ပို့ချနိုင်ရန် ယာယီတက္ကသိုလ်အုပ်ချုပ်ရေးကောင်စီများက ပြင်ဆင်နေသည်ဟု NUG က ထုတ်ပြောထားသည်။ 

ထိုအခြေအနေများနှင့် စပ်လျဉ်း၍ စစ်ကောင်စီ၏ အဆင့်မြင့်ပညာဦးစီးဌာန ညွှန်ကြားရေးမှူးချုပ် ဒေါက်တာသိန်းဝင်းကို ဆက်သွယ်မေးမြန်းသော်လည်း ဖုန်းလက်ခံဖြေကြားခြင်းမရှိပေ။

စစ်ကောင်စီသည် အခြေခံပညာကျောင်းများကိုလည်း နိုဝင်ဘာ ၁ တွင် ပြန်လည်ဖွင့်လှစ်ခဲ့ပြီး စနေနေ့ပါ ကျောင်းဖွင့်သင်ကြားလျက်ရှိသည်။

သို့သော် ရခိုင်ပြည်နယ်မှအပ နိုင်ငံအနှံ့ အခြေခံပညာကျောင်း၊ တက္ကသိုလ်၊ ကောလိပ်အသီးသီးတွင် ကျောင်းအပ်နှံသူနှင့် ဆရာ၊ ဆရာမဦးရေ နည်းပါးစွာရှိနေသည်ဟု သတင်းများက ဆိုသည်။ အရေအတွက်နှင့် အခြေအနေအသေးစိတ်ကိုမူ အတည်ပြုနိုင်ခြင်း မရှိသေးပေ။ myanmar now

အမျိုးသားဒီမိုကရေစီအဖွဲ့ချုပ်(အန်အယ်လ်ဒီ) လွှတ်တော်အမတ်လည်းဖြစ် ဟစ်ဟော့ပ် အဆိုတော်လည်းဖြစ်တဲ့  ဦးဖြိုးဇေယျာသော်ကို  နိုဝင်ဘာ ၁၈ ရက်  နေ့လယ်ပိုင်းမှာ  ဖမ်းဆီးရမိတယ်လို့ စစ်ကောင်စီက ဒီကနေ့ သတင်းထုတ်ပါတယ်။

ဒလန်သတင်းပေးချက်အရ မနေ့က ဒဂုံဆိပ်ကမ်းမြို့နယ်၊ ရတနာလမ်း၊ ရတနာနှင်းဆီအိမ်ရာ၊ တိုက်အမှတ် (၃/B) ၊ အခန်းအမှတ် (B-0907) မှာ လက်နက်တွေနဲ့ အတူဖမ်းဆီးရမိတာလို့ စစ်ကောင်စီက ထုတ်ပြန်ပါတယ်။ 

ဦးဖြိုးဇေယျာသော်နဲ့အတူ ပစ္စတို ၂ လက်၊ ၉ မမ ကျည် ၃၈ တောင့်၊ M-16 သေနတ် ၁ လက်၊ ၅ ဒသမ ၅၆ ကျည် ၇၄ တောင့်နဲံအတူ ဖမ်းဆီးရမိတာလို့လည်း ဆိုပါတယ်။ 

ဦးဖြိုးဇေယျာသော်ကို စစ်ကောင်စီက ဖမ်းဆီးသွားခဲ့တယ်လို့ ရန်ကုန်တိုင်းစစ်ဒေသနဲ့ နီးစပ်သူတွေက အတည်ပြုပြောပါတယ်။  

ဦးဖြိုးဇေယျာသော်ဟာ မနေ့က သူတက်ရမယ့်အစည်းအဝေးတွေ မတက်ခဲ့ဘဲ နေ့လယ်ပိုင်းကတည်းက  အဆက်သွယ်ပြတ်သွားတယ်လို့ သူနဲ့နီးစပ်သူတဦးက ဆိုပါတယ်။ 

မနေ့က ဒဂုံဆိပ်ကမ်းမြို့နယ်၊ ရတနာနှင်းဆီအိမ်ရာကို လက်နက်ကိုင်စစ်သားတွေ အပြည့်တင်လာတဲ့   စစ်ကားအသေး အစီး ၂၀ ၊ စစ်ကားကြီး ၉ စီးနဲ့ ရဲကားတွေအပါအဝင် ကားအစီး ၃၀ ကျော်လောက်နဲ့   ညနေ ၃ နာရီလောက်မှာ ဝင်စီးခဲ့ပြီး  ၄ နာရီခွဲလောက်မှာ ပြန်ထွက်သွားကာ ခေါင်းစွပ်ပြီးဖမ်းခေါ်သွားတဲ့သူရှိတယ်လို့  အနီးနားမှာ နေထိုင်တဲ့ ဒေသခံ တဦးက ပြောပါတယ်။ 

ရန်ကုန်မှာလတ်တလော ဖြစ်ပွားနေတဲ့ ပစ်ခတ်တိုက်ခိုက်မှုတွေအားလုံးကို  ဦးဖြိုးဇေယျာသော်က ခိုင်းစေခဲ့တာဆိုပြီး စစ်ကောင်စီက အမြဲလိုလို   စွပ်စွဲထုတ်ပြန်လေ့ရှိတာဖြစ်ပါတယ်။ 

အဆိုပါစွပ်စွဲချက်တွေနဲ့ ပတ်သက်ပြီး ဦးဖြိုးဇေယျာသော်ဘက်ကတော့ ပြန်လည်တုံ့ပြန်နိုင်ခွင့် မရသေးပါဘူး။

ဦးဖြိုးဇေယျာသော်ကို ပရိသတ်တွေက နိုင်ငံရေးအကျဉ်းသားဟောင်း လူငယ်ဟစ်ပ်ဟော့ပ် အဆိုတော်တယောက်အနေနဲ့ သိထားကြတာ ဖြစ်ပြီး သူဟာ ပြီးခဲ့တဲ့ ၂၀၁၂ ခုနှစ် ကြားဖြတ်ရွေးကောက်ပွဲမှာ အမျိုးသားဒီမိုကရေစီအဖွဲ့ချုပ်(အန်အယ်လ်ဒီ)ပါတီကို ကိုယ် စားပြုပြီး နေပြည် တော် ပုဗ္ဗသီရီမြို့နယ်မှ ဝင်ရောက်ယှဉ်ပြိုင် အနိုင်ရကာ ပြည်သူ့ လွှတ် တော်အမတ် ဖြစ်လာခဲ့တာပါ။

အဲဒီနောက် ၂၀၁၅ ခုနှစ် ရွေးကောက်ပွဲမှာလည်း နေပြည်တော်ရှိ အစိုးရဝန်ထမ်းတွေ အများဆုံးနေထိုင်ရာ ဇဗ္ဗူသီရိမြို့နယ်မှ အန်အယ်လ်ဒီပါတီ ကိုယ်စားပြုအနေနဲ့ ထပ်မံ ဝင်ရောက်ယှဉ်ပြိုင်ခဲ့ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးတိုးတက်ရေးပါတီမှ လေတပ် ဦးစီးချုပ်ဟောင်းနဲ့ ဆက်သွယ်ရေးဝန်ကြီးဟောင်း ဦးမြတ်ဟိန်းကို အနိုင်ရခဲ့တာ ဖြစ်ပါတယ်။ DVB

ထားဝယ်ခရိုင်၊ သရက်ချောင်းမြို့နယ် စော်ဖျားရွာရှိ ရော်ဘာခြံ တစ်ခြံအတွင်း ပျူစောထီးအဖွဲ့ဝင်တစ်ဦးကို သေနတ်ဖြင့် ပစ်သတ်ခဲ့ကြောင်း ထားဝယ်ပြည်သူ့ကာကွယ်ရေး အဖွဲ့ (DDF) က ထုတ်ပြန်ထားသည်။

အဆိုပါ ပျူစောထီး အဖွဲ့ဝင်ဆိုသူ၏ အမည်မှာ ဦးသိန်းမဲ ဖြစ်ပြီး နိုဝင်ဘာ ၁၈ ရက် နံနက် ၁၀ နာရီခန့်တွင် ၎င်း၏ ရော်ဘာခြံ အတွင်း အပစ်ခံရခြင်း ဖြစ်သည်ဟု ဒေသခံရွာသားတစ်ဦးက ပြောသည်။ “ရော်ဘာခြံထဲမှာ ရော်ဘာချက် အလုပ်သွားတဲ့ အချိန်မှာ မှောက်လျက် သေဆုံးနေတာကို တွေ့တယ်”ဟု ၎င်းက ပြောသည်။ ဦးသိန်းမဲသည် ကျေးရွာ အတွင်း ဆိုးသွမ်း‌နေသူ ဖြစ်၍ ယခုကဲ့သို့ လုပ်ဆောင်ခြင်း ဖြစ်သည်ဟု ထားဝယ် ပြည်သူ့ကာကွယ်ရေးတပ်ဖွဲ့ -Dawei Defense Force (DDF) က ထုတ်ပြန်ထားသည်။ mizzima

khit thit

ပဲခူးမြို့မှာ နိုဝင်ဘာ ၁၉ ရက် ဒီကနေ့မနက်အစောပိုင်းက ပေါက်ကွဲမှုတချို့ ဖြစ်ပွားခဲ့ပြီးတဲ့နောက် ပဲခူးမြို့နဲ့ ရန်ကုန်မြို့ကြားမှာရှိတဲ့ ဝင်းဘော်ဒက်ဂိတ်မှာ စစ်ကောင်စီတပ်တွေက လုံခြုံရေး စစ်ဆေးမှုတွေ တင်းတင်းကျပ်ကျပ်ပြုလုပ်နေတယ်လို့  ခရီးသွားတွေက ပြောပါတယ်။

ဇရပ်ကွင်းလမ်းဆုံနားက ဝင်းဘော်ဒက်စစ်ဆေးရေးဂိတ်မှာ ခရီးသည်တွေကို လမ်းဆင်းလျှောက်ခိုင်းပြီး ကားတွေပေါ်အထိ သေနတ်တွေနဲ့ ထောက်ကာ လိုက်စစ်နေတာလို့ ဒီကနေမနက်ပိုင်းက ပဲခူးကနေ ရန်ကုန်ကိုသွားတဲ့ ခရီးသည်တစ်ဦးက ဒီဗွီဘီကိုပြောပါတယ်။

ဘာကြောင့်စစ်ဆေးနေလဲ ဆိုတာမသိသလို တစ်ယောက်ချင်းကို လမ်းဆင်းလျှောက်ခိုင်းပြီး အသွားရော အပြန်ရော စစ်ဆေးနေတာလို့ ဆိုပါတယ်။

ဒီကနေ့မနက် ပဲခူးမြို့ ပေါက်ကွဲမှုတွေကြောင့် စစ်ကောင်စီလက်ပါးစေတချို့ ထိခိုက်တာတွေရှိခဲ့တယ်လို့   ပဲခူးမြို့ခံတွေကပြောပါတယ်။ 

အဲဒီပေါက်ကွဲမှုတွေဟာ စစ်ကောင်စီနဲ့ လက်ပါးစေတွေကို ရည်ရွယ်တိုက်ခိုက်ခဲ့တာဖြစ်တယ်လို့ ပဲခူးအခြေစိုက် ပြည်သူ့ကာကွယ်ရေးတပ်ဖွဲ့ ၅ ဖွဲ့ ပေါင်းထားတဲ့ မဟာမိတ်အဖွဲ့ကလည်း ကြေညာပါတယ်။

ပဲခူးမြို့က ကျောက်တွင်းကုန်းလမ်းဆုံနဲ့ အထက ၇ ကျောင်းရှေ့နားတွေမှာ ဖောက်ခွဲမှုတွေ လုပ်ဆောင်ခဲ့တာဖြစ်တယ်လို့ မဟာမိတ်အဖွဲ့က ဆိုပါတယ်။

ပဲခူးမြို့တွင်းမှာလည်း ဒီကနေ့ မနက်ပိုင်းက စစ်ဆေးနေသလို ရွှေမော်ဓောဘုရား တောင်ဘက်မုဒ်မှာလည်း ဆိုင်ကယ်တွေ၊ ကားတွေကို စစ်ဆေးနေတယ်လို့ ပဲခူးမြို့ခံတစ်ဦးက ပြောပါတယ်။ 

ရန်ကုန်မြို့အထွက် Zero မိုင်တိုင်  ဂိတ်တလျှောက်မှာလည်း စစ်ကောင်စီ လက်နက်ကိုင်တပ်တွေက လုံခြံရေးတင်းကျပ် စစ်ဆေးနေတယ်လို့  ကိုယ်တိုင်ကြုံလာတဲ့ ခရီးသွား ယာဉ်မောင်းတယောက်က  ပြောပါတယ်။

“ကားတိုင်းပေါ်က လူတွေအားလုံးဆင်းခိုင်းပြီး တစ်ဦးချင်းစစ်ဆေးနေတယ်။ ကားအတွင်းပိုင်းတွေကိုလည်း စစ်ဆေးတယ်”လို့  မနက် ၁၀ နာရီခွဲလောက်က ကြုံတွေ့ခဲ့ရတဲ့ ခရီးသွားတစ်ယောက်က ပြောပါတယ်

ရန်ကုန်မြို့မှာ ပြည်သူ့ကာကွယ်ရေးတပ်ဖွဲ့ဝင် ၅၀ လောက်ကို  ဖမ်းဆီးရမိတယ်လို့ မနေ့က စစ်ကောင်စီက ကြေညာခဲ့ပြီး အန်အယ်လ်ဒီ လွှတ်တော်အမတ် ဦးဖြိုးဇေယျာသော်ကိုလည်း ဖမ်းမိသွားတယ်လို့ သတင်းတွေ ထွက်ပေါ်နေပါတယ်။ DVB

NLD လွှတ်တော်ကိုယ်စားလှယ် ဦးဖြိုးဇေယျာသော်ကို ဖမ်းဆီးရမိကြောင်း အကြမ်းဖက်စစ်ကောင်စီဘက်က ယနေ့ သတင်းထုတ်ပြန်သည်။ ဦးဖြိုးဇေယျာသော်ကို ဒဂုံမြို့သစ်ဆိပ်ကမ်းမြို့နယ်၊ ရတနာနှင်းဆီအိမ်ရာတွင် ဖမ်းဆီးရမိခြင်းဖြစ်သည်ဟု အကြမ်းဖက်စစ်ကောင်စီ၏ သ တင်းထုတ်ပြန်ချက်တွင် ဖော်ပြထားသည်။ khit thit