စစ်အာဏာ သိမ်းပြီးနောက် ကိုမင်းခန့်သစ္စာသည် သူ့ယုံကြည်ချက်အတိုင်း လျှောက်လှမ်းနိုင်ရန် မိသားစုထံ ခွင့်ပြုချက် တောင်းယူခဲ့သည်။ တိုက်ပွဲဝင်သည့်အလား ဇွဲရှိစွာဖြင့် သူတောင်းယူခဲ့သည်မှာ ကျောင်းသားတပ်ဦးအလံကိုင်ပြီး လူထု သပိတ်စစ်ကြောင်းများကို ဦးဆောင်ခွင့်ရနိုင်ရန်ပင်။ “အဲ့နေ့က ဆန္ဒပြပွဲကိုသူသွားမယ်တဲ့။ မကွေးနည်းပညာ တက္ကသိုလ်ကျောင်းသားဆိုတော့ မကွေးမြို့ကိုသွားမယ်တဲ့။ ကျွန်မတို့ကလည်းစိုးရိမ်တာပေါ့။
သူတစ်ခုခုဖြစ်မှာစိုးလို့ ပေးမသွားဘူး။ မနက်အစောကြီး ၄ နာရီလောက်ကတည်းက သူသွားမှဖြစ်မယ်တဲ့။ သူကတပ်ဦးအလံကိုင်မှာတဲ့ အမေတို့ခွင့်ပြုပေးပါတဲ့။ ကျွန်မတို့ကလည်း ၈၈ အရေးအခင်းတုန်းက ဘယ်လိုဖြစ်တယ်။ ညာလိုဖြစ်တယ်။ ကြားဖူးနားဝတွေပြောပြပြီးသူ့ကိုတားတယ်။ ရိုက်မယ် နှက်မယ် ခြောက်ပြီးလည်းပြောတယ်။ ဒါပေမဲ့သူ့ကိုခွင့်ပြုပေးပါတဲ့။ နောက်ဆုံးတော့ မနက် ၇ နာရီလောက်ရောက်တော့ ကျွန်မတို့က သူ့ကိုခွင့်ပြုပေးလိုက်ရတယ်” ဟု အသက် ၃၈ နှစ်အရွယ် ကိုမင်းခန့်သစ္စာ၏ မိခင်ဖြစ်သူ ဒေါ်မိုးသူက ပြောသည်။
သူသည် စစ်အာဏာ မသိမ်းခင်ကပင် စစ်အာဏာရှင်စနစ်နှင့် စစ်အုပ်စု စိတ်ကြိုက်ရေးဆွဲထားသည့် ၂၀၀၈ ဖွဲ့စည်းပုံ အခြေခံဥပဒေ ဖျက် သိမ်းရေး လှုပ် ရှားခဲ့သည့် သမဂ္ဂကျောင်းသားတစ်ဦးပင်ဖြစ်သည်။ ထို့အတွက်လည်း စစ်အာဏာသိမ်းပြီးနောက် လူထုလှုပ်ရှားမှုများတွင် သူက တက်ကြွစွာ ပါဝင်ဆောင်ရွက်လိုသည်။ မိသားစုက ပိတ်ပင်တားဆီးခဲ့သော်လည်း နောက်ဆုံးတွင် သူ၏ ပြင်းပျသည့် စိတ်ဆန္ဒကို လိုက် လျောခဲ့ရသည်။
ထို့ကြောင့် သူ၏ မွေးရပ်မြေ အောင်လံမြို့မှ အမိတက္ကသိုလ်ရှိရာ မကွေးမြို့သို့ ဖေဖော်ဝါရီလ ၈ ရက်တွင် သွားရောက်ခဲ့သည်။ ထိုနေ့တွင် စစ်အာဏာရှင်ဆန့်ကျင်ရေး ဆန္ဒပြပွဲ ပြုလုပ်ရန် ကိုမင်းခန့်သစ္စာနှင့် သူငယ်ချင်းများက စီစဉ်ထားခြင်းဖြစ်သည်။ အသက် ၁၈ နှစ် အရွယ် စက်မှုအင်ဂျင်နီယာဌာန ပထမနှစ် ကျောင်းသား ကိုမင်းခန့်သစ္စာသည် စစ်အာဏာရှင်အား ဆန္ဒပြသည့် လူထုသပိတ်များ ပစ်ခတ်ဖြိုခွင်းခံရချိန် မေ လတွင် လက်နက်ကိုင်တော်လှန်ရန် ဆုံးဖြတ်ချက်ချခဲ့သည်။
ဤသို့ဖြင့် သူသည် အောင်လံမြို့ ပြည်သူ့ကာကွယ်ရေးတပ်ဖွဲ့ဝင်အဖြစ် စစ်အာ ဏာရှင်စနစ်အား လက်နက်ကိုင်လမ်းစဉ်ဖြင့် တိုက်ခိုက်သူ တစ်ဦး ဖြစ်လာခဲ့သည်။ တိုင်းပြည်အတွက် လက်နက်ကိုင် တော်လှန်ရေး လုပ်ငန်းများ ဆောင်ရွက်နေစဉ်မှာပင် ဒလန်၏ သတင်းပေးမှုဖြင့် ကိုမင်းခန့်သစ္စာတို့၏ တော်လှန်ရေးစခန်းသည် အကြမ်းဖက်စစ်ကောင်စီတပ်၏ ဝင်ရောက်စီးနင်းမှုကို ခံခဲ့ရသည်။ ထိုနေ့က နိုဝင်ဘာလ ၂၀ ရက် နံနက် ၃ နာရီခွဲအချိန်ဖြစ်သည်။ သူသည် ယင်းနေ့တွင်ပင် နိုင်ငံနှင့်လူမျိုး၏ အနာဂတ်အတွက် အသက်ကို ပေးလှူသည့် အာဇာနည်တစ်ဦးဖြစ်ခဲ့သည်။
“အမျိုးသားတော်လှန်ရေးအတွက် မောင်မင်းခန့်သစ္စာ၏ ပေးဆပ်မှုအပေါ် ကျန်ရစ်သူမိသားစုဝင်များ၏ ဆုံးရှုံးမှုများကို မျှဝေခံစားရပါကြောင်း၊ မိမိတို့သည် မောင်မင်းခန့်သစ္စာ မျှော်မှန်းခဲ့သည့် စစ်အာဏာရှင်ဖြုတ်ချရေး ဖယ်ဒရယ် ပြည်ထောင်စု တည်ဆောက်ရေးအတွက် ဆက်လက်တိုက်ပွဲဝင်မည်ဖြစ်ကြောင်း တော်လှန်ရေးအတွက် မောင်မင်းခန့်သစ္စာ၏ ပေးဆပ်ခဲ့မှုများ စွမ်းဆောင်ခဲ့မှုများကို ဦးညွှတ်ဂုဏ်ပြုလျက် မှတ်တမ်းတင်အပ်ပါသည်” ဟု အောင်လံမြို့ ပြည်သူ့ကာကွယ်ရေးတပ်ဖွဲ့ က ထုတ်ပြန်ထားသည်။ လူမှုကွန်ရက်တွင် သတင်းများ အဆို ပါအကြောင်းအရာ ပျံ့နှံ့ လာသောအခါ ထိုနေ့ချက်ချင်းပင် မိသားစုက အောင်လံမြို့ ပြည်သူ့ဆေးရုံတွင် သူ၏ ရုပ်အလောင်းရှိ/မရှိ စုံစမ်းကြသည်။
မိဘများက သားဖြစ်သူ ကိုမင်းခန့်သစ္စာ၏ ရုပ်အလောင်းကို ကြည့်ခွင့်ရရန် ကြိုးစားကြရတော့သည်။ “မနက် ၁၀ နာရီလောက်ကတည်းက ဆေးရုံကိုရောက်တယ်။ ရဲတွေရှိနေတယ်။ ရင်ခွဲရုံထဲကိုလည်း အန်တီတို့ကို ဝင်ခွင့်မပေးဘူး။ ညနေ ၃ နာရီလောက်ကျတော့ ရဲတွေလစ်တုန်း ရင်ခွဲရုံထဲဝင်ကြည့်တော့ သားရဲ့ ရုပ်အလောင်းကိုတွေ့ခွင့်ရခဲ့တာပါ” ဟု မိခင်ဖြစ်သူဒေါ်မိုးသူက ဝမ်းနည်းကြေကွဲစွာ ပြောသည်။သူ၏ ရုပ်အလောင်းတွင် ညာဘက်လက်မောင်း၊ ဘယ်ဘက်ပေါင်၊ ညှပ်ရိုးနှင့် ဝမ်းဗိုက်နေရာများတွင် သေနတ်ဒဏ်ရာ ခြောက်ချက်ကျော် ရှိနေသည်။ ယင်းနေ့ ညနေတွင်ပင် စစ်ကောင်စီဘက်က သူ၏ ရုပ်အလောင်းကို သင်္ဂြိုဟ်လိုက်ပြီး မိသားစုဝင် ဆယ်ဦးကို လိုက်ပါခွင့်ပြုခဲ့သည်။
ယမန်နေ့ နိုဝင်ဘာလ ၂၀ ရက် ညနေပိုင်းတွင် အောင်လံမြို့၊ အလယ်စုသုသာန် မီးသင်္ဂြိုဟ်စက်တွင် အာဇာနည် မင်းခန့်သစ္စာ၏ ရုပ်အလောင်းကို မီးသင်္ဂြိုဟ်လိုက်ပြီးနောက် မိသားစုများက သူ၏အရိုးပြာနှင့် မှတ်တိုင်တစ်ခုစိုက်ထူနိုင်ရန် ပြင်ဆင်နေကြသည်။ မိဘများက ကိုမင်းခန့်သစ္စာ ကောင်းရာဘုံဘ၀ ရောက်ရန် ကောင်းမှုကုသိုလ်များ ပြုလုပ်သွားမည်ဟု ဆိုသည်။ သို့သော် သူက ယင်းကုသိုလ်ကောင်းမှုများကို အလိုမရှိဘဲ နိုင်ငံ ဒီမိုကရေစီရရှိရန်သာ ဆန္ဒပြင်းပြခဲ့သည်။ သူ၏ ရဲဘော်ရဲဘက် တစ်ဦးထံ ကိုမင်းခန့်သစ္စာက စစ်အာဏာရှင် တိုက်ထုတ်ရင်း ကျဆုံးသွားခဲ့ပါက အမျှမဝေရန် စကားဆိုခဲ့သည်။
“သူက ကျွန်တော်တို့ထက် အသက်ငယ်တယ်ဆိုပေမဲ့ စိတ်ဓာတ်တော့ သိပ်မာတယ်။ သူနဲ့နောက်ဆုံးတွေ့ရတုန်းက ပြောခဲ့တာရှိတယ်။ တိုက်ပွဲမှာကျသွားရင်တောင် ငါသာဓုမခေါ်နိုင်ဘူး။ စစ်အာဏာရှင် ကျဆုံးတဲ့အထိ ငါဆက်တိုက်နေမယ်” ဟု သမဂ္ဂရဲဘော်သူငယ်ချင်းတစ်ဦးက မင်းခန့်သစ္စာ၏ စိတ်ဓာတ်မာကျောပုံကို ပြောပြသည်။ လက်နက်ကိုင်တော်လှန်ရေးတိုက်ပွဲဝင်ခဲ့သူ ကိုမင်းခန့်သစ္စာသည် အမှန်တကယ်တော့ စာ ပေ၊ ကဗျာဝါသနာပါကာ ဟစ်ဟော့ အမျိုးအစား သီချင်းတွေကို နှစ်သက်၊ သဘောကျသူ မန်ယူ ဘောလုံးပွဲကို မလွတ်တန်း အားပေးသူဖြစ် သည်။
သူ၏ အိမ်မက်မှာ ဇာတိမြေ အောင်လံမြို့တွင် စာကြည့်တိုက်တစ်ခု တည်ဆောက်ပေးရန်ပင်ဖြစ်ေကြာင်းကိုမင်းခန့်သစ္စာ၏ ချစ်သူက ဆို သည်။ “သူကလေ သဘောလည်း အရမ်းကောင်းတာ၊ လူတိုင်းနဲ့လည်း ပေါင်းတတ်တယ် ။ သူ့မှာဆို အပေါင်းအသင်းက နှစ်မြို့လုံး(အောင်လံ၊မကွေး)နီးနီးပဲ ။ တော်တော်လည်း လိမ္မာတယ်။ မှတ်မှတ်ရရ ခါတိုင်းဆို သူ့ဖုန်းအားသွင်းဖို့ မလွယ်လို့ စကားမပြောရဘူး ။ သူမသေခင်ညက စကားတွေခါတိုင်းနဲ့ မတူအများကြီးပြောနေခဲ့တာ၊ အဲ့နေ့ညကလည်း တစ်ခြားသူတွေနိုးပြီး ပြေးကုန်ပြီ ။ သူကအိပ်နေတာ မနိုးဘူးတဲ့။ သူလို့လူမျိုးက တကယ်ရှားတာ၊ မိဘအပေါ်ကော ၊ချစ်သူအပေါ်ကော ၊တိုင်းပြည်အပေါ်ကော တော်တော်လေးကို တာဝန်ကျေခဲ့ပါတယ်။ သူ့အ တွက် ဂုဏ်ယူနေမှာပါ” ဟု သူ့ချစ်သူ မိန်းခလေးကပြောသည်။
၎င်းကျဆုံးရသည့်အပေါ် မိတ်ဆွေများနှင့် ရဲဘော်ရဲဘက်များက ဝမ်းနည်းတသဖြစ်ရကြောင်း လူမှုကွန်ရက်တွင် သူ၏ ပုံနှင့်တစ်ကွ ရေးသားဖော်ပြကြပြီး တချို့က ကဗျာရေးစပ်ကာ ဂုဏ်ပြုကြသည်။သူ၏ မိတ်ဆွေ နောင်သူရိန်ကလည်း မင်းခန့်သစ္စာ ခေါင်းစဉ်ဖြင့် ကဗျာတစ်ပုဒ် ရေးဖွဲ့ခဲ့သည်။
” မင်းခန့်သစ္စာ”
တပ်ဦးကနေ ဒေါင်းအလံကိုင် တက်လာတယ်
ရဲဘော်တို့ လာစုရုံးလေ
အဆုံးသတ်တိုက်ပွဲ နွှဲဆင်မလေ
တော်လှန်တေးတွေ ဆိုမယ်
နွေဦးလမ်းမထက်က ကျောင်းသားတယောက်ရဲ့
မပြောင်းလဲတဲ့ရာဇဝင်လိုပါပဲ၊
စစ်ဖိနပ်စီး ကျောပိုးအိတ်လွယ်
အာဏာရှင်ကို တော်လှန်မယ်
ချစ်ခြင်းမေတ္တာကို ဆန့်ထွက်လာတဲ့
ဆံပင်တွေထဲ သိုဝှက်ထားမယ်
စစ်ကြီးပြီးရင် ကျောင်းတက်မယ်ပေါ့လေ
ရဲဘော်ညီလေး သို့မဟုတ် သွေးတစက် အသားတစ နောက်ဆုံးအထိ ကမ္ဘာကို သစ္စာရှိသူ
မျက်ရည်စိုရွှဲ ဆောင်းမနက်ခင်းမှာ
သူရဲကောင်းဟာ ရာဇဝင်ကို သွေးနဲ့ရေးတယ်။
ကမ္ဘာသစ်ကို တွေ့မသွားရှာဘူး
လမ်းတစ်လျှောက်မှာတော့ မင်းပုံရိပ်တွေရှိတယ်
တောင်တန်းတွေဆီ ရောက်လာတဲ့နှင်းတွေဟာ
မင်းအကြောင်းကို ပြောပြနေလိမ့်မယ် ။
ရဲဘော်ညီလေးရေ မင်းက ကဗျာတွေ ကြိုက်တယ် ဟစ်ဟော့ ကြိုက်တယ် မန်ယူ ကြိုက်တယ် ရမ် ကြိုက်တယ် အတူတူပြန်ဆုံကြမယ် ဆိုတဲ့ ကတိကို မတည်လည်း ငါတို့ ခွင့်လွှတ်တယ်” mizzima
Like this:
Like Loading...
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 