ဗန်းမော်မြို့တွင် ပြည်သူ ၅ ဦး ဖမ်းဆီးခံရ
ကချင်ပြည်နယ် ဗန်းမော်မြို့ရှိ ရပ်ကွက်တွေမှာ နိုဝင်ဘာ ၂၃ ရက်နေ့ ည ၈ နာရီကျော်မှ ၁၁ နာရီကျော်လောက်အထိ စစ်ကောင်စီဝင်တွေနဲ့ ရဲတွေက ရှာဖွေစစ်ဆေးမှုတွေ ပြုလုပ်ခဲ့ပြီး ဒေသခံ ၅ ဦးလောက်ကို ဖမ်းဆီးသွားတယ်လို့ ဒေသခံတွေဆီက သိရပါတယ်။
“မနေ့ည ၁၀ နာရီလောက်က သေနတ်သံအချို့ ကြားလိုက်ရတယ်။ ကျမတို့ရပ်ကွက်ထဲက တစ်ယောက် ပါသွားတယ်လို့ သိရတယ်။ ဒီလိုသူ များ ရပ်ကွက် နေအိမ်တွေထဲ ကျူးကျော်ဝင်ရောက်ပြီး မဆိုင်တဲ့သူတွေကို အဓမ္မ စွပ်စွဲဖမ်းဆီးနေကြတာ။ အရမ်းမုန်းတယ်” လို့ ဟန်းတဲရပ် ကွက်နေ အမျိုးသမီးတစ်ဦးက ပြောပါတယ်။
“သူတို့ရှာဖွေတဲ့လူတွေကို မတွေ့တော့ မိသားစုဝင်တွေကို ဖမ်းသွားကြတာ၊ အပြစ်မဲ့ပြည်သူတွေကို သက်သက်စိတ်ဒုက္ခတွေ ပေးနေကြတာ” လို့ ပေါက်ကုန်းရပ်ကွက်နေ အမျိုးသားတစ်ဦးက ပြောပါတယ်။
ဗန်းမော်မြို့ရှိ ရပ်ကွက်အချို့ဖြစ်သော ပေါက်ကုန်း၊ တပ်ကလေး၊ ကန်တော်၊ ဟန်းတဲ၊ ကမ်းနားလမ်း မြို့မရပ်ကွက်ဘက်တို့မှ မြို့ခံ ၅ ဦးကို ဖမ်းဆီးသွားတယ်လို့ သိရပါတယ်။
နိုဝင်ဘာ ၂၄ ရက်နေ့မှာလည်း မနက်ပိုင်း ၈ နာရီကျော်ကစပြီး မီးပွိုင့်အချို့မှာ ဖြတ်သန်း သွားလာသူများ ဆိုင်ကယ်နဲ့ကား တူးဘောက်တွေဖွင့်ကာ အမျိုးမျိုးစစ်ဆေးမေးမြန်းမှုတွေ ပြုလုပ်နေတယ်လို့လည်း သိရှိရပါတယ်။ DVB
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 