Monthly Archives: Nov 2021

ဖုန်းနံပါတ် ၆၅ လုံး၏ ပိုင်ရှင်အမည်များ၊ နေ ရပ်လိပ်စာများ ပေးပို့ရန်နှင့် ဘဏ်အကောင့်ဖွင့်လှစ်ထားပါက ငွေသွင်း၊ ငွေထုတ် ယာယီတားမြစ်ရန် စစ်ကောင်စီညွှန်ကြား

စစ်ကောင်စီ လက်အောက်ခံ ဗဟိုဘဏ်၏ ပေါက်ကြားလာသည့် လျှို့ဝှက်ညွှန်ကြားစာတွင် ပူးတွဲစာပါ ဖုန်းနံပါတ်များဖြင့် ဘဏ်များနှင့် မိုဘိုင်းငွေကြေးဝန်ဆောင်မှုလုပ်ငန်းများတွင် အကောင့်များ ဖွင့်လှစ်ထားပါက ပိုင်ရှင်များ၏ အမည်၊ အဘအမည်၊ နိုင်ငံသားစိစစ်ရေးကတ်အမှတ်၊ နေရပ်လိပ်စာ၊ ဘဏ်ငွေစာရင်း ရှင်းတမ်းများကို ပို့ပေးရန် ဖော်ပြထားသည်။

နိုဝင်ဘာ ၂၄ရက် ရက်စွဲဖြင့် ထုတ်ပြန်ထားသည့် ထိုညွှန်ကြားစာတွင် ဖုန်းနံပါတ် ၆၅ လုံးကိုဖော်ပြထားပြီး ငွေသွင်း၊ငွေထုတ်များ ယာယီတားမြစ်ရန်နှင့် တောင်းခံထားသည့် အချက်အလက်များအား သုံးရက်အတွင်း ဆောလျင်စွာပို့ပေးရန် ရေးသားထားသည်။ “လျှို့ဝှက်အဆင့် အတန်းသတ်မှတ်၍” ဟူသော စာစုကို မှင်အနက်ဖြင့် ထင်ရှားစွာရေးထားထားသည့် စစ်ကောင်စီ ငွေကြေးခဝါချမှုတိုက်ဖျက်ရေးအဖွဲ့က ထုတ်ပြန်သော ထိုညွှန်ကြားစာကို မြန်မာနိုင်ငံတော်ဗဟိုဘဏ်မှတစ်ဆင့် ဘဏ်များ အားလုံးနှင့် မိုဘိုင်းငွေရေးကြေးရေး ဝန်ဆောင်မှုပေးသူများကို ရည်ညွှန်းပြီး ပေးပို့ထားခြင်းဖြစ်သည်။

ထိုညွှန်ကြားစာတွင် ကျပ် ငါးသိန်းနှင့် ကျပ်ဆယ်သိန်းကြား လှူဒါန်းထားသည့် ဖုန်းနံပါတ် နှစ်လုံး၊ ကျပ်တစ်သိန်းနှင့် ကျပ်ငါးသိန်းကြား လှူဒါန်းထားသည့် ဖုန်းနံပါတ် ၂၇ လုံး၊ ကျပ်ငါးသောင်းနှင့် ကျပ်တစ်သိန်းကြား လှူဒါန်းထားသည့် ဖုန်းနံပါတ် ၃၆ လုံး ကိုလည်း ယှဉ်တွဲဖော်ပြထား သည်။ ညွှန်ကြားစာတွင် ဗဟိုဘဏ် ဒုဥက္ကဌ ကိုယ်စား ညွန်ကြားရေးမှူး ဦးအောင်ကျော်သန်းကလက်မှတ် ရေးထိုး ထားသည်ကို တွေ့မြင်ရသည်။ mizzima

အမျိုးသမီးများအပေါ် အကြမ်းဖက်မှု ပ ပျောက်ရေးလှုပ်ရှားမှု ဖဲကြိုးဖြူ ကမ်ပိန်းတွင် မြောက်ပိုင်းတိုင်း စစ်ဌာနချုပ် ပြည်သူ့ကာ ကွယ်ရေးတပ်ဖွဲ့များ ပါဝင်လှုပ်ရှား

ကမ္ဘာတဝန်း နိုဝင်ဘာလ ၂၅ ရက်မှ ဒီဇင်ဘာလ ၁၀ ရက်အထိ နှစ်စဉ် ကျင်းပနေသော အမျိုးသမီးများအပေါ် အကြမ်းဖက်မှု ပပျောက်ရေး ဖဲကြိုးဖြူ ကမ်ပိန်းလှုပ်ရှားမှုတွင် မြောက်ပိုင်းတိုင်း စစ်ဌာနချုပ် ပြည်သူ့ကာကွယ်ရေး တပ်ဖွဲ့များ ပါဝင် လှုပ်ရှားခဲ့ကြောင်း သိရသည်။ khit thit

NUG မှတဆင့် မြန်မာပြည်သူများထံ အကူအ ညီများပေးရေး နိုင်ငံတကာအသိုင်းအဝိုင်းကို SAC-M တိုက်တွန်း

မြန်မာနိုင်ငံတွင် ပြည်သူတချို့ ဆာလောင်ငတ်မွတ်မှုနှင့် ရင်ဆိုင်နေရသည့် အခြေအနေများ ရှိနေစဉ် နိုင်ငံတကာ အသိုင်းအဝိုင်းအနေဖြင့် အမျိုးသားညီညွတ်ရေးအစိုးရ (NUG) နှင့် ချိတ်ဆက်ပြီး မြန်မာပြည်သူများကို အကူအညီများ ထောက်ပံ့ပေးအပ်ရန်လိုကြောင်း မြန်မာနိုင်ငံဆိုင်ရာ အထူးအကြံပေးကောင်စီ (SAC-M) က တိုက်တွန်းခဲ့သည်။

NUG ကို မြန်မာနိုင်ငံ၏ တရားဝင်အစိုးရအဖြစ် တရားဝင် အသိအမှတ်ပြုရန် နိုင်ငံတကာအသိုင်းအဝိုင်းဘက်က တုံ့ဆိုင်းကြန့်ကြာနေခြင်း၏ ရလဒ်တစ်ခုအဖြစ် နိုင်ငံတကာအစည်းအဝေးများတွင် မြန်မာ ကိုယ်စားပြုမှု မရှိဘဲ ဖြစ်နေခဲ့ကြောင်း SAC-M က ထုတ်ပြန်ချက်တစ်စောင် ထုတ်ပြန်ပြောဆိုသည်။မြန်မာပြည်သူများကို ထောက်ပံ့ကူညီရန် လုပ်ဆောင်နေသည့် နိုင်ငံတကာ ကျွမ်းကျင်ပညာရှင်များဖြင့် ဖွဲ့ထားသည့် လွတ်လပ်သော အဖွဲ့တစ်ခုဖြစ်သည့် SAC-M က ပြောကြားရာတွင် မြန်မာနိုင်ငံ၏ စစ်မှန်သော ကိုယ်စားလှယ်များနှင့် တရားဝင် ချိတ်ဆက်ပတ်သက်မှု မရှိခြင်းက အာဏာသိမ်းစစ်အုပ်စုကြောင့် ဖြစ်စေခဲ့သည့် အကျပ်အတည်းများအပေါ် အရေးတကြီး တုံ့ပြန်ရန် လိုအပ်သည့် နိုင်ငံ တကာ တုံ့ပြန်မှုများကို တန့်အီစေလျက် ရှိကြောင်း SAC-M က ပြောသည်။

“မြန်မာနိုင်ငံအတွက် ထိရောက်ပြီး သင့်တော်တဲ့ နိုင်ငံတကာ အကူအညီတွေ အရေးတကြီး လိုအပ်နေပါတယ်၊ အာဏာသိမ်းစစ်တပ်ဟာ မြန် မာနိုင်ငံမှာ ဆင်းရဲ၊ ဒုက္ခတွေကို ဖြစ်စေတဲ့ အကြောင်းရင်း ဖြစ်ပါတယ်၊ အဲဒါက ဖြေရှင်းချက် အဖြေတစ်ခု မဟုတ်ပါဘူး” ဟု SAC-M က ပြော သည်။”နိုင်ငံတကာ အသိုင်းအဝိုင်းအနေနဲ့ NUG ကို တရားဝင် အသိအမှတ်ပြုရပါလိမ့်မယ်၊ ပြီးတော့ အရေးတကြီးဖြစ်ပြီး တချိန်တည်းဖြစ်ပေါ်နေတဲ့ နိုင်ငံရေး၊ လုံခြုံရေး၊ လူသားချင်းစာနာမှု၊ လူ့အခွင့်အရေးနဲ့ စီးပွားရေးအကျပ်အတည်းတွေအပေါ် ရှေ့နောက်ညီညွတ်တဲ့ နိုင်ငံတကာ တုံ့ပြန်မှုတစ်ခုကို ဖြစ်စေဖို့ NUG နဲ့ လက်တွဲ ချိတ်ဆက်လုပ်ဆောင်ရပါလိမ့်မယ်” ဟု SAC-M က ပြောခဲ့သည်။နိုင်ငံတကာ အသိုင်းအဝိုင်းအ နေဖြင့် NUG နှင့်အကြား တရားဝင် လုပ်ဆောင်နိုင်သလို ၊ လုပ်လည်းလုပ်ဆောင်သင့်ကြောင်းနှင့် နယ်စပ်များကနေ ဖြတ်ပြီး နိုင်ငံထဲ အကူအ ညီများ ရောက်ရှိစေပြီး လိုအပ်နေသူများထံ ပေးပို့နိုင်ရန် လုပ်ဆောင်ရမည်ဖြစ်ကြောင်း SAC-M ၏ အဖွဲ့ဝင်တစ်ဦးဖြစ်သည့် ခရစ် ဆီဒိုတီက ပြောခဲ့သည်။

မြန်မာနိုင်ငံတဝန်းတွင် အာဏာသိမ်းစစ်တပ်က လမ်းများကို ဝင်ထွက်မှု ပိတ်ပင်ခြင်း၊ လူအစုအဖွဲ့များ၏ အစားအသောက်နှင့် ဆေးဘက်ပစ္စည်းများကို ဖြတ်တောက်ခြင်း၊ အစားအစာသိုလှောင်မှုများကို မီးရှို့ခြင်းနှင့် ကျွဲနွားတိရစ္ဆာန်များကို သတ်ဖြတ်ခြင်းတို့ လုပ်ဆောင်ထားခဲ့ကြောင်း SAC-M က ပြောခဲ့သည်။

စစ်တပ်၏ ထပ်တလဲလဲ ထိုးစစ်ဆင်မှုများကြောင့် နိုင်ငံအနောက်မြောက်ပိုင်းနှင့် အရှေ့ပိုင်းရှိ တောင်သူများ အဓိက အစားအစာရင်းမြစ်ဖြစ်သည့် ဆန်စပါးသီးနှံများ နှစ်စဉ် စိုက်ပျိုးရိတ်သိမ်းမှုအပေါ် အဟန့်အတားဖြစ်ထားစေခဲ့ကြောင်း SAC-M က ပြောခဲ့သည်။NUG ကို အသိအ မှတ်ပြုရန်နှင့် ချိတ်ဆက်ပတ်သက်လုပ်ကိုင်ရန် ပျက်ကွက်ခြင်းက မြန်မာပြည်သူများ၏ ဒီမိုကရေစီ လှုပ်ရှားမှုကို ထိခိုက်လျော့ပါးစေမည့် အန္တရာယ်ရှိကြောင်း SAC-M ၏ မူလအဖွဲ့ဝင်တစ်ဦးဖြစ်သည့် မာဇူကီ ဒါရုစ်မန်က ပြောသွားခဲ့သည်။ mizzima

တန့်ဆည်တွင် ကင်းလှည့် စစ်ယာဉ်တန်းကို တိုက်ခိုက်ရာ သုံးဦးသေဟုဆို

စစ်ကိုင်းတိုင်း၊ တန့်ဆည်မြို့ပေါ်တွင် ကင်းလှည့်နေသည့် စစ်ကောင်စီ မော်တော်ယာဉ်တစ်စီးနှင့် ဆိုင်ကယ်နှစ်စီးကို ယနေ့ (နိုဝင်ဘာ ၂၆) နံနက် ၈ နာရီခန့်တွင် ဗုံးဖြင့်တိုက်ခိုက်ရာ စစ်သား သုံးဦးသေဆုံး၊ တစ်ဦး ပြင်းထန်စွာ ဒဏ်ရာရ သွားသည်ဟု ဒေသကာကွယ်ရေးအဖွဲ့ (PDF) တာဝန်ရှိသူက ပြောသည်။

ကင်းလှည့်ယာဉ်တန်းကို တန့်ဆည်တရားရုံးအနီးတွင် တိုက်ခိုက်ခဲ့ခြင်းဖြစ်ကြောင်း၊ ပေါက်ကွဲမှုအတွင်း ဆိုင်ကယ်နှစ်စီး ထိမှန်ခဲ့ကြောင်း ထိုသူက ဆိုသည်။

“စစ်သားသုံးယောက်သေတာ သေချာတယ်ဗျ။ နှစ်ယောက်ကတော့ ခန္ဓာကိုယ်တစ်စစီ ဖြစ်သွားတာ။ စောင့်ကြည့်တဲ့ ကင်းထောက်သမားဆို ဆက်မကြည့်ရဲတော့လို့ ထွက်ပြေးလာရတာ”ဟု ၎င်းက ပြောသည်။

တိုက်ခိုက်မှု အခြေအနေအသေးစိတ်ကို မသိရသော်လည်း PDF အဖွဲ့ဝင်များ အန္တရာယ်ကင်းစွာ ဆုတ်ခွာနိုင်ခဲ့ကြောင်း၊ ပေါက်ကွဲမှုဖြစ်ပွားချိန်တွင် စစ်သားများက ရမ်းသန်းပစ်ခတ်သဖြင့် တန့်ဆည်မြို့ပေါ်သို့ ဈေးလာဝယ်သည့် အင်တောလေး ကျေးရွာမှ အမျိုးသား တစ်ဦး၏ ပေါင်တွင် ကျည်ဆန်ထိမှန်ခဲ့ကြောင်း အထက်ပါ ပုဂ္ဂိုလ်က ဆက်ပြောသည်။

စစ်တပ်၏ ပစ်ခတ်မှုကြောင့် ဒဏ်ရာရခဲ့သည့် ကိစ္စနှင့် ပေါက်ကွဲမှုဖြစ်စဉ်တို့ကို သီးခြားအတည်ပြုနိုင်ခြင်း မရှိသေးသလို စစ်ကောင်စီထံ မေးမြန်းခွင့်မရသေးပေ။

“ဗုံးပေါက်ပြီးတော့  ရမ်းပစ်တာဗျ။ လုံခြုံရေးတွေ တင်းကျပ်ထားတယ်။ စျေးဆိုင်တွေလည်း အကုန်ပိတ်ခိုင်းထားတယ်။ ၄၅ မိနစ်အတွင်း အကုန်ပိတ်ပြီး ပြန်ရမယ်ပြောတာ”ဟု အမည်မဖော်လိုသည့် ဒေသခံတစ်ဦးက ပြောသည်။

ယနေ့တွင် တန့်ဆည်မြို့၌ စစ်ကောင်စီတပ်ဖွဲ့များက လမ်းများကို ပိတ်ဆို့ကာ လုံခြုံရေးတင်းကျပ်ထားကြောင်း၊ စစ်သားနှင့် ရဲများအပြင် အရပ်ဝတ်များက ဆိုင်ကယ်နှင့် မော်တော်ယာဉ်တို့ဖြင့် လှည့်လည်သွားလာနေကြောင်း ထိုသူက ဆက်ပြောသည်။

ဖေဖော်ဝါရီ ၁ အာဏာသိမ်းပြီးနောက်တွင် ငြိမ်းချမ်းစွာဆန္ဒပြသည့် နိုင်ငံအနှံ့ မြို့ရွာများအတွင်း တန့်ဆည်မြို့နယ်သည်လည်း အပါအဝင်ဖြစ်သည်။ သို့သော် ဧပြီ ၇ရက်တွင် လူထောင်ချီပါဝင်သည့် ဆန္ဒပြပွဲတစ်ခုကို စစ်တပ်က ပစ်ခတ်ဖြိုခွင်းပြီးနောက်တွင် လက်နက်ကိုင်ခုခံမှုများ တန့်ဆည်မြို့နယ်အတွင်း အားကောင်းလာသည်။

ခုခံမှုများကို စစ်ကောင်စီက ကျေးရွာများကို မီးရှို့၊ စစ်အင်အား အလုံးအရင်းပို့လွှတ်သည့် နည်းဖြင့် အကြမ်းပတမ်းဖြေရှင်းနေပြီး PDF အဖွဲ့များ၏ ခန့်မှန်းချက်အရ လက်ရှိတွင် တန့်ဆည်မြို့နယ်အတွင်း၌ စစ်သား ၅၀၀ ကျော် ဖြန့်ကြက်ထားကြောင်း သိရသည်။

လက်နက်ကိုင်ခုခံသူများကို စစ်ကောင်စီက အကြမ်းဖက်သမားများဟု သတ်မှတ်ထားသည်။ ရှို့မီးများမှာ ခုခံသူတို့၏လက်ချက်ဖြစ်ကြောင်း စစ်ကောင်စီက တုံ့ပြန်လေ့ရှိသည်။

စစ်ကောင်စီ၏ စစ်ရေးလှုပ်ရှားမှုများကြောင့် တန့်ဆည်မြို့နယ်အတွင်းရှိ ကျေးရွာ ၁၁ ရွာမှ ဒေသခံ ၅၀၀၀ ကျော် အိုးအိမ်စွန့်ခွာ ထွက်ပြေးနေရသည်ဟု အကူအညီပေးနေသူနှင့် ဒေသခံအချို့က အတည်ပြုထားသည်။ myanmar now

တောင်သာမြို့နယ်တွင် လူနေအိမ် ၃ လုံးကို စစ်ကောင်စီတပ် မီးရှိူ့ဖျက်ဆီး၊ နေအိမ်အတွင်းရှိ ပစ္စည်းများကို ယူဆောင်သွား

မန္တလေးတိုင်း၊ တောင်သာမြို့နယ် ၊ လှည်းကူးမအုပ်စု ၊ ရတနာပုံကျေးရွာတွင် လက်မှုပညာ ပရဟိတသင်တန်းဆရာ ဦးဇော်မင်း၏ နေအိမ် အ ပါအဝင် အိမ်သုံးလုံးကို စစ်ကောင်စီတပ်ဖွဲ့က စစ်ကားငါးစီး၊ အင်အား ၁၀၀ နီးပါးဖြင့် နို၀င်ဘာလ ၂၃ ရက် နံနက် ၅ နာရီ မိနစ် ၃၀ တွင် မီးရှို့ဖျက်ဆီးသွားကြောင်း ဒေသခံများထံမှ သိရသည်။

အသက် ၅၀ ကျော်အရွယ် ဦးဇော်မင်းသည် ပန်းရန်လက်မှုပညာကို အခမဲ့သင်ပေးနေသူဖြစ်ပြီး စစ်ကောင်စီတပ်က အိမ်တွင်းရှိ ပရိဘောဂနှင့်တန်ဖိုးကြီး ပစ္စည်းများအားလုံးကိုလည်း ဖောက်ထွင်းသယ်ဆောင်သွားကြောင်း သိရသည်။ ထို့အပြင် ရွာအတွင်းရှိ နေအိမ်တစ်အိမ်မှ ကျပ်သိန်း ၅၀ တန်ဖိုးရှိ ရွှေထည်ပစ္စည်းများကိုပါ စစ်ကောင်စီတပ်က ယူဆောင်သွားကြောင်း ဦးဇော်မင်းက မဇ္ဈိမကိုပြောသည်။

“အဲ့ဒီနေ့က မနက် ၅ နာရီ ထမင်းထချက်နေတာ စစ်ကောင်စီခန့် ရာအိမ်မှူးရဲ့ လူတစ်ယောက်က စစ်သားတွေ ခင်ဗျားအိမ်ကိုလာနေပြီ ပြေးတော့ဆိုပြီး ဖုန်းဆက်လို့ ကျွန်တော်တို့ သားအဖနှစ်ယောက်ရယ် သင်တန်းသား သုံးယောက်ရယ် ထပြေးတာ။ ကျွန်တော့်အိမ်က တိုက်အိမ်ဆိုတော့ ကြက်သွန်ဂိုထောင်ပဲ မီးထဲပါသွားတယ်။ ဆိုင်ကယ် ခြောက်စီး ပျက်စီးတယ်။ ဘေးကအိမ် နှစ်အိမ်ကတော့ ဝါးနဲ့ဆိုတော့ ပြာကျသွားတယ် ။ သက်သက်မဲ့ လာရှို့တာပါ။

ကျွန်တော်ပြန်ကြားတာတော့ ဒလန်တစ်ယောက်က အိမ်မှာ PDF တွေရှိတယ်ဆိုပြီးတိုင်တာ။ ကျွန်တော်က မြို့ပေါ်တက်အလုပ်လုပ်မယ့် က လေးတွေကို အုတ်၊ သံရိုက်တာတွေ အခမဲ့ သင်ပေးတဲ့အလုပ်ပဲလုပ်တာကို စစ်ကောင်စီက ဘာဦးနှောက်မှမရှိဘူး။ သတင်းပေးတာနဲ့ တန်းလာရှို့တော့တာပဲ”ဟု ၎င်းကပြောသည်။

အဆိုပါကျေးရွာနှင့် ခြောက်မိုင်အကွာရှိ ပဲခင်းကျော်ရွာက နေအိမ်တစ်အိမ်တွင် ၎င်း၏ အိမ်တွင်းပစ္စည်းများ အတင်အချလုပ်နေသည်ကို တွေ့ရှိကြောင်းဒေသခံတစ်ဦးက လှမ်းအကြောင်းကြားသည်ဟု ဦးဇော်မင်းက ပြောသည်။

အဆိုပါကျေးရွာတွင် အိမ်ခြေ ၁၁၆ အိမ်ရှိပြီး ကျေးရွာအနီးရှိ တောတွင်း၌လည်း ကင်းပုန်းများချထားသည့်အတွက် ဒေသခံများ ထွက်ပြေးတိမ်းရှောင်နေရကြောင်း‌‌ ဒေသခံအချို့ထံမှ သိရသည်။ mizzima

နိပွန်ဖောင်ဒေးရှင်းဥက္ကဋ္ဌ ဆာဆာကာဝါကို ဂျ ပန်ရောက် မြန်မာများဆန္ဒပြ

အာဏာသိမ်းစစ်ခေါင်းဆောင်နဲ့သွားရောက်တွေ့ဆုံခဲ့တဲ့ နိပွန်ဖောင်ဒေးရှင်း ဥက္ကဋ္ဌ မစ္စတာ ဆာဆာကာဝါကို တိုကျိုမြို့၊ ချီအိုဒမှာရှိတဲ့ သူ့ရဲ့ရုံးရှေ့မှာ ဂျပန်နိုင်ငံရောက်မြန်မာတွေနဲ့  မြန်မာ့အရေးစိတ်ဝင်စားတဲ့ ဂျပန်နိုင်ငံသားတွေက စုပေါင်းပြီး  နိုဝင်ဘာ၂၅ ရက်က ဆန္ဒပြခဲ့ကြပါတယ်။

မစ္စတာ ဆာဆာကာဝါဟာ ဂျပန်အစိုးရနဲ့ နိုင်ငံတကာက အသိအမှတ်မပြုတဲ့ကြားက နိုဝင်ဘာလ ၁၂ ရက်မှာ မြန်မာနိုင်ငံကို သွားရောက်ကာ နေပြည်တော်မှာ အာဏာသိမ်းစစ် ခေါင်းဆောင်မင်းအောင်လှိုင်နဲ့ တွေ့ဆုံခဲ့တာဟာ ပွင့်လင်းရိုးသားမှုမရှိလို့ အခုလို လာရောက်ဆန္ဒပြတာလို့ ဦးဆောင်သူတဦးဖြစ်တဲ့ ကိုသန့်ဇော်ထက်က ပြောပါတယ်။

ဆန္ဒပြသူတွေက မစ္စတာ ဆာဆာကာဝါနဲ့တွေ့ခွင့်တောင်းရာမှာ မြန်မာပြည်အတူသွားခဲ့တဲ့ ရုံးတာဝန်ခံပုဂ္ဂိုလ်တဦးနဲ့ တွေ့ဆုံပြောဆိုခွင့်ရပြီး မြန်မာပြည်ခရီးစဉ်အကြောင်းကို မြန်မာ့အရေးလှုပ်ရှားနေတဲ့ ဂျပန်လွှတ်တော်အမတ်တွေ၊ ဂျပန်နိုင်ငံခြားရေးဝန်ကြီးဌာန တာဝန်ရှိသူတွေရှေ့မှာ ပွင့်ပွင့်လင်းလင်း ရှင်းပြဖို့တောင်းဆိုခဲ့တယ်လို့ ဆန္ဒပြရာမှာ ပါဝင်တဲ့  မသိရီသစ္စာက ပြောပါတယ်။

နီပွန်ဖောင်ဒေးရှင်းဟာ မြန်မာစစ်တပ်ကို နှစ်စဉ် ဂျပန်ကာကွယ်ရေးတပ်မတော်မှာ ခေါ်ယူသင်ကြား ပေးနေတဲ့ အစီအစဉ်ကို ဆက်လက်ဆောင်ရွက်နေတဲ့အတွက်   နီပွန်ဖောင်ဒေးရှင်းအနေနဲ့ အကြမ်းဖက်စစ်တပ်ကို  တာဝန်ခံမှု တာဝန်ယူမှုရှိရမယ်လို့လည်း ကိုသန့်ဇော်ထက်က  ပြောပါတယ်။

စစ်အာဏာသိမ်းပြီးနောက် မြန်မာနိုင်ငံကိုသွားရောက်ခဲ့တဲ့ ပထမဆုံးခရီးစဉ်မှာ မစ္စတာ ဆာဆာကာဝါဟာ ဖမ်းဆီးထိန်းသိမ်းခံထားရတဲ့ နိုင် ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့တော့  တွေ့ဆုံခွင့်မရခဲ့ပါဘူး။ DVB

တပ်တွင်း စစ်သည်အချင်းချင်း၏ အမျိုးသမီးများကို မုဒိမ်းမှုနှင့် လူမှု​ရေး ​ဖောက်ပြန်မှု ဖော် ပြတဲ့ အတွင်း​ရေးစာတစ်စောင် ထွက်ပေါ်၊ ဗိုလ်မှူးအဆင့်ထိ အရေးယူထား

အကြမ်းဖက်စစ်ကောင်စီတပ်တွင်းက မုဒိမ်းမှုနဲ့ ဖောက်ပြန်မှု ၅မှုအကြောင်းပါဝင်ပြီး အခုလို မုဒိမ်းမှုတွေ ထပ်မဖြစ်စေဖို့ တပ်ရင်း တပ်ဖွဲ့တွေဆီ ညွှန်ကြားတဲ့စာတစ်စောင် လူမှုကွန်ရက်မှာ ပျံ့နှံ့ပေါက်ကြားလာတာကို ဖတ်ရှုရပါတယ်။

ပထမဆုံးအနေနဲ့ အမှတ်(၇) စစ်တပ်တန်းမြင့်လေ့ ကျင့်ရေးကျောင်းက တပ်ကြပ်ကြီး ဇော်မျိုးက တစ်တပ်တည်းနေ တပ်ကြပ်တစ်ယောက်ရဲ့ ဇနီးကို လိင်ကိစ္စအတွက် စည်းရုံးပြောဆိုခဲ့လို့ စစ်စည်းကမ်းအရ အရေးယူထားတာကို ဖော်ပြထားပါတယ်။အဲဒီစာမှာ အမြင့်ဆုံးရာထူးအနေနဲ့ ဗိုလ်မှူးအဆင့်ထိပါဝင်ပြီး သူဟာ အမှတ် ၁၄၂ ခြေလျင်တပ်ရင်းက ဗိုလ်မှူးတင်ကိုထက်ဆိုသူဖြစ်ပြီး ဒုတပ်ကြပ်ရဲ့ ဇနီးနဲ့ လူမှုရေးဖောက်ပြန်တာကြောင့် အရေးယူထားတယ်ဆိုတာ ဖော်ပြထားပါတယ်။

ဖြစ်ရပ် ၅ခုကို ပြောဆိုပြီး ဒီလိုဖြစ်တာဟာ ရဲဘော် ရဲဘက်စိတ်ကင်းမဲ့တာ၊ ကျင့်ဝတ်မဲ့တာကြောင့် ဖြစ်ပွားတယ်လို့ ဆိုထားပြီး တပ်ရင်း တပ် ဖွဲ့တွေထဲမှာ အဲဒီလိုဖြစ်စဉ်တွေ ထပ်မဖြစ်ဖို့ဆိုပြီး ညွန်ကြားထားတာကို ဖတ်ရှုရပါတယ်။အကြမ်းဖက်စစ်ကောင်စီတပ်တွင်းက ပေါက်ကြားလာတယ်ဆိုတဲ့ ယခုစာနဲ့ မုဒိမ်းမှုနဲ့ ကျင့်ဝတ်မဲ့ ဖောက်ပြန်မှုတွေနဲ့ပတ်သက်ပြီး သီးခြားအတည်ပြုနိုင်ခြင်းမရှိပါဘူး။ khit thit

ရမည်းသင်းမြို့ မြန်မာရှေ့ဆောင်ဘဏ် ဓားပြတိုက်ခံရ

ရမည်းသင်းမြို့ရှိ မြန်မာရှေ့ဆောင်ဘဏ်သည် ယနေ့ နိုဝင်ဘာလ ၂၆ ရက် မွန်းလွဲပိုင်းတွင် ဓားပြ တိုက်ခံရကြောင်း မြို့ခံများက ပြောသည်။ “ကျွန်တော်လည်း မြို့ထဲဘက်ရောက်နေတော့ ဓားပြ တိုက်ခံရတယ် ဆိုတဲ့ သတင်းကြားလို့ အဲဒီဘဏ်နဲ့ နီးနေလို့ လှမ်းကြည့်တာ။ စစ်သားနဲ့ ရဲတွေ ရောက်နေပြီ။ အချို့ စစ်သားနဲ့ ရဲတွေလည်း မြို့ထဲကို လူဖြန့်ပြီး ထွက်သွားတာကို တွေ့လိုက်တယ်။ အထက (၁) ကျောင်းဘက်မှာလည်း သေနတ် ဖောက်သံတွေကြားရတယ် ” ဟု ရမည်းသင်း ဒေသခံတစ်ဦးက မဇ္ဈိမကို ပြောသည်။

နိုဝင်ဘာလ ၂၆ ရက် နေ့လယ် ၁ နာရီ မိနစ် ၂၀ ဝန်းကျင်တွင် အမည်မသိ သေနတ်သမား နှစ်ဦးက ဓားပြ တိုက်သွားခြင်းကြောင့် ငွေကျပ် သိန်း ၁,၂၀၀ ဝန်းကျင် ပါသွားသည်ဟုလည်း အဆိုပါ ဘဏ်ဝန်ထမ်းက RFA သတင်း ဌာနကို ဖြေကြားထားသည်။

“အခြားသူတွေတော့ သိန်းတစ်ထောင်ကျော် ပါသွားတယ် ပြောတယ်။ ဆိုင်ကယ်နဲ့ လူနှစ်ယောက်လာတာလို့ ပြောတယ်ဗျ။ သေနတ်ပါလား၊ မပါလားတော့ မသိရဘူး။ သူ များ တွေကတော့ သေနတ်ပါတယ် ပြောနေကြတယ် ” ဟု ရမည်းသင်းမြို့ရှိ ဘဏ်အသိုင်းအဝိုင်းနှင့် နီးစပ်သူ တစ်ဦးက ပြောသည်။

ရမည်းသင်းမြို့ မြန်မာရှေ့ဆောင်ဘဏ်သည် ရန်ကုန်-မန္တလေး လမ်းမဘေး ရမည်းသင်းမြို့လယ် နာရီစင် အနောက်ဘက်တွင် တည်ရှိပြီး အနီးရှိ မြန်မာ့စီးပွားရေးဘဏ်တွင်မူ စစ်ကောင်စီတပ်ဖွဲ့ များ တပ်စွဲထားကြောင်း ဒေသခံများကပြောသည်။ ဘဏ်ဓားပြ တိုက်ခံရအပြီး စစ်ကောင် စီ တပ်ဖွဲ့ဝင်များသည် ဘဏ် အနီးတစ်ဝိုက် နှင့် မြို့အတွင်းတွင် ဆိုင်ကယ်၊ ကားများဖြင့် စစ်ဆေးမှုများ လုပ်ဆောင်လျက်ရှိကာ မြို့အဝင် မြို့အ ထွက်များတွင်လည်း ဖုန်းများကို စစ်ဆေးနေသည်ဟု ဒေသခံများက ဆိုသည်။ mizzima

မုံရွာတွင် စစ်ကျွန်မခံ “ဘူး” ငြင်းဆန် အမျိုး သားနေ့ အဓိဋ္ဌာန် ဖက်ဆစ် စစ်ကောင်စီ တော် လှန်ရေး လက်ပံတောင်းတောင် ပြည်သူများ ချီတက် ဆန္ဒပြ

khit thit

« Older Entries