စစ်ကောင်စီအပေါ် နည်းလမ်းမျိုးစုံသုံးပြီး တိုးမြှင့်ဖိအားပေးမည်ဟု အမေရိကန်သံတမန် ပြော
မြန်မာအာဏာသိမ်းစစ်ကောင်စီဘက်က မြန်မာပြည်သူများအပေါ် အကြမ်းဖက်သည့် လုပ်ရပ်များနှင့်ဖမ်းဆီးထိန်းသိမ်းမှု လုပ်ရပ်များကို ရပ်တန့်စေရေးအတွက် စစ်ကောင်စီအပေါ် ဖိအားပေးရာတွင် ဒဏ်ခတ်ပိတ်ဆို့မှုများ တိုးမြင့်လုပ်ဆောင်ခြင်း အပါအဝင် ရွေးချယ်နိုင်သည့် နည်းလမ်းမှန်သမျှကို အသုံးပြုသွားမည် ဖြစ်ကြောင်း အမေရိကန် အဆင့်မြင့်သံတမန်တစ်ဦးက ဒီဇင်ဘာ ၂ ရက်တွင် ပြောကြားခဲ့သည်။
“ရွေးချယ်နိုင်တဲ့ နည်းလမ်းအားလုံးကို အသုံးပြုသွားမှာ ဖြစ်ပါတယ်၊ လက်မခံနိုင်တဲ့ အာဏာသိမ်းမှု၊ မြန်မာပြည်သူတွေအပေါ် လုပ်ဆောင်ထားခဲ့တဲ့ အကြမ်းဖက်မှု တို့နဲ့ပတ်သက်လို့ ကျွန်တော်တို့အနေနဲ့ တုံ့ပြန် လုပ်ဆောင်နိုင်တာမှန်သမျှ လုပ်ဖို့နဲ့ အပြောင်းအလဲဖြစ်စေအောင် လုပ်ဖို့က ကျွန်တော်တို့ရဲ့ တာဝန်ဖြစ်ပါတယ်၊ ဒါက အမေရိကန်အတွက်တင်မကဘဲ နိုင်ငံတကာအသိုင်းအဝိုင်းရဲ့ တာဝန်ဖြစ်ပါတယ်” ဟု အမေရိကန်နိုင်ငံခြားရေးဝန်ကြီးဌာန၏ အရှေ့အာရှနှင့် ပစိဖိတ်ရေးရာ လက်ထောက်ဝန်ကြီး မစ္စတာ ဒန်နီယယ် ကရစ်တန်ဘရင့်ခ်က ပြောသည်။
မစ္စတာ ကရစ်တန်ဘရင့်ခ်က အရှေ့တောင်အာရှသို့ ၎င်း၏လေးရက်တာခရီးစဉ်အတွင်း စင်္ကာပူသို့ ရောက်ရှိနေစဉ် မီဒီယာနှင့် အွန်လိုင်းတွေ့ ဆုံ ပွဲတစ်ခုတွင် ပြောကြားသွားခဲ့ခြင်းဖြစ်သည်။
၎င်းသည် ကွာလာလမ်ပူနှင့် ဂျကာတာသို့ သွားရောက်ထားခဲ့ပြီး ဖြစ်ပြီး ဘန်ကောက်သို့လည်း ဆက်လက်သွားရောက်မည်ဖြစ်သည်။
“ကျွန်တော် လာရောက်တွေ့ဆုံတဲ့ ဒီပါတနာတွေနဲ့ အရှေ့တောင်အာရှဒေသအပေါ် အမေရိကန်ရဲ့ ကတိကဝတ်ပေး နှစ်မြှုပ်ထားမှုရဲ့ စွမ်းအားကို အခိုင်အမာ ပြသဖို့ ကျွန်တော် ဒီကို ရောက်နေတာဖြစ်ပါတယ်၊ ပြီးတော့ အင်ဒို-ပစိဖိတ်မှာ အာဆီယံရဲ့ ဗဟိုကျမှုနဲ့ အာဆီယံရဲ့ အလားအလာအပေါ် ကျွန်တော်တို့ဘက်က အခိုင်အမာ ထောက်ခံကြောင်းကို ရှင်းရှင်းလင်းလင်းဖြစ်စေဖို့ ဒီခရီးစဉ် လာရောက်တာဖြစ်ပါတယ်” ဟု ၎င်းက ပြောသွားခဲ့သည်။
“မြန်မာအာဏာသိမ်းစစ်အုပ်စု ဖိနှိပ်မှုတွေ လုပ်ဆောင်နိုင်အောင် ခွင့်ပြုပေးထားခဲ့တဲ့ ဘဏ္ဍာရေးလမ်းကြောင်းတွေကို ဖြတ်တောက်ပိတ်ဆို့ဖို့၊ စစ်အုပ်စုအပေါ် ဖိအားတွေ တိုးမြှင့်ပေးဖို့အတွက် ကျွန်တော်တို့ လုပ်ဆောင်နိုင်တဲ့ နောက်ထပ်လုပ်ဆောင်ချက်တွေကို ဆက်လက် ချင့်တွက်သွားမှာဖြစ်ပါတယ်” ဟု ၎င်းက ပြောသွားခဲ့သည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 