SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကောင်စီက ထုတ်ပြန်သည့် မန္တလေး PDF ၃၃ ဦး ဖမ်းမိသည့်စာရင်းတွင် အဖမ်းမခံရသူများလည်း ပါဝင်နေကြောင်း မန္တလေးအခြေစိုက် ပြည်သူ့ကာကွယ်ရေးတပ်ဖွဲ့များက ဆိုသည်။

“သူတို့သတ်မှတ်ရက်အတွင်း ဖမ်းဆီးစာရင်း ၃၃ ဦးဆိုတာ မဟုတ်ပါဘူး၊ တကယ်က ၁၀ ယောက်ကျော်ပဲ ပါသွားတာပါ၊ ကျန်တာက အရင်နှစ်လကျော်လောက်က မိတာရယ် မမိသေးတဲ့သူတွေကို ရောထည့်ထားတာပါ” ဟု မန္တလေးအခြေစိုက် ပြည်သူ့ကာကွယ်ရေးတပ်ဖွဲ့တစ်ခုမှ ပြော ရေးဆိုခွင့်ရှိသူက မဇ္ဈိမသို့ပြောသည်။

မန္တလေးမြို့က PDF ၃၃ ဦးအား ဖောက်ခွဲရေး လက်နက်ပစ္စည်းများနှင့်အတူ ဖမ်းဆီးရမိကြောင်း စစ်ကောင်စီက ဒီဇင်ဘာ ၁ ရက်နေ့ ရက်စွဲဖြင့် သတင်းထုတ်ပြန်ခဲ့ပြီး အကြမ်းဖက် ဖောက်ခွဲရေးနှင့် လုပ်ကြံသတ်ဖြတ်မှုများ ကျူးလွန်ခဲ့သော တရားခံများစာရင်းဟု ဖော်ပြခဲ့သည်။“အရင်ဖမ်းထားတာတွေနဲ့ရောပြီး ၃၃ ယောက် လက်နက်တွေနဲ့အတူ ဖမ်းမိတယ်လို့ ကြေညာသွားတယ် ဆိုတာက စစ်ကောင်စီရဲ့ မရိုးသားတဲ့လုပ်ရပ်ပဲ၊ အရင်တုန်းက ဖမ်းထားတာတွေကို သတင်းမထုတ်ပြန်သေးဘဲ အခုမှ အစုလိုက်အပြုံလိုက် ဖမ်းမိတဲ့ပုံစံမျိုး လီဆယ်တာပါ၊ သူတို့ထုတ်ပြန်တဲ့ စာရင်းထဲမှာ အဖမ်းမခံရသေးတဲ့ တော်လှန်ရေးသမားတွေပါနေတာ ကျွန်တော်တို့ အချင်းချင်းပဲသိတယ်” ဟုလည်း ၎င်းကဆိုသည်။

စစ်ကောင်စီက ထုတ်ပြန်သည့် သတင်းတွင် NLD ပါတီမှ ပြည်သူ့လွှတ်တော် ကိုယ်စားလှယ် ဦးကျော်စိုးလင်း၏ ဓာတ်ပုံအားလည်း ဖော်ပြထားကာ ဦးဆောင်သူအဖြစ် လုပ်ကြံဖန်တီးထားခြင်းသည် မရိုးသားသည့် လုပ်ရပ်သာဖြစ်ကြောင်း ဒေသကာကွယ်ရေးတပ်ဖွဲ့များက သုံးသပ်သည်။ယင်းကိစ္စနှင့် ပတ်သက်၍ ဦးကျော်စိုးလင်းက ၎င်း၏တရားဝင် ဖေ့စ်ဘွတ်စာမျက်နှာတွင် “ပြည်သူတွေတိုက်နေတာ ပြည်သူ့တော်လှန် ရေးပါ၊ အဖမ်းခံရသူအားလုံး ကျွန်တော်နဲ့ အချိတ်အဆက်လုံးဝမရှိပါ” ဟု ဖြေရှင်းထားသည်။ mizzima