လက်နက်မဲ့ အရပ်သားများအပေါ် စစ်တပ်၏ အင်အားအလွန်အကျွံသုံး ဖြိုခွင်းမှု ရပ်တန့်ရေး ကုလ တောင်းဆို
မြန်မာတွင် အာဏာသိမ်းမှုကို ဆန့်ကျင်သည့် ဆန္ဒပြသူများကို စစ်ကောင်စီလက်အောက်ခံ လုံခြုံရေးတပ်ဖွဲ့များက ကားဖြင့် အတင်းဝင်ဆောင့်တိုက် ဖမ်းဆီးဖြိုခွင်းခဲ့မှုကြောင့် ဆန္ဒပြသူငါးဦး သေဆုံးခဲ့ကြောင်း မျက်မြင်တွေ့ရှိသူများနှင့် ပြည်တွင်းမီဒီယာသတင်းဌာနများ၏ ဖော်ပြမှုများ ထွက်ပေါ်ခဲ့ပြီးနောက် လက်နက်မဲ့ အရပ်သားများအပေါ် အင်အားအလွန်အကျွံ အသုံးပြုသည့် မည်သူမဆို ၎င်းတို့လုပ်ရပ်အတွက် တာ ဝန်ခံရစေရေးအတွက် ကုလသမဂ္ဂက တောင်းဆိုလိုက်သည်။
ဆိုရှယ်မီဒီယာပေါ် တက်လာခဲ့သည့် ဓာတ်ပုံ၊ ဗီဒီယိုများအရ ရန်ကုန်တွင် ဒီဇင်ဘာ ၅ ရက်က စစ်အာဏာသိမ်းမှုဆန့်ကျင်သည့် ဆန္ဒပြသူအုပ်စုတစ်စုကို အရှိန်တင်မောင်းလာသည့် စစ်ကားတစ်စီးက အတင်းဝင်တိုက်ပစ်ခဲ့သည်ကို တွေ့မြင်ရပြီး ယင်းနောက် လမ်းပေါ်တွင် လဲကျနေသူ များကို တွေ့ခဲ့ရသည်။ လူဒါဇင်နှင့်ချီ ဒဏ်ရာများ ရရှိခဲ့သည်ဟု မျက်မြင်တွေ့ရှိသူများက ရိုက်တာကို ပြောသည်။
“လက်နက်မဲ့ အရပ်သားပြည်သူတွေအပေါ် အင်အားအလွန်အကျွံ သုံးမှု၊ မမျှတတဲ့ အင်အား အသုံးပြုမှုတို့အတွက် တာဝန်ရှိသူတွေ တာဝန်ခံရမှု ရှိအောင် လုပ်ရပါလိမ့်မယ်” ဟု မြန်မာနိုင်ငံရှိ ကုလသမဂ္ဂရုံးမှ ဌာနေညှိနှိုင်းရေးမှူး မစ္စတာ ရာမန်နေသန် ဘလာခရစ်ရှ်နန်က ထုတ်ပြန်ပြောဆိုသည်။
ယမန်နေ့က စစ်အာဏာသိမ်းမှုကို ဆန့်ကျင်ဆန္ဒပြသည့် ဆန္ဒပြသူအုပ်စုတစ်စု စတင်ချီတက်ပြီး မိနစ်ပိုင်းအတွင်း အဆိုပါ ဖြိုခွင်းခံရမှုဖြစ်စဉ် ဖြစ်ပွားခြင်းဖြစ်ကြောင်း Myanmar Now သတင်းဌာနက ဖော်ပြသည်။ ယင်းဖြစ်စဉ်တွင် လူငါးဦးထက်မနည်း သေဆုံးပြီး ၁၅ ဦးဖမ်းဆီးခံခဲ့ရသည်ဟု ယင်းက ဖော်ပြသည်။
သို့သော် စစ်ကောင်စီ ထိန်းချုပ်သည့် Global New Light of Myanmar သတင်းစာက လုံခြုံရေးတပ်ဖွဲ့ဝင်များသည် တရားမဝင်သော ဆူပူဆန္ဒပြမှုတစ်ခုကို လူစုခွဲခဲ့ခြင်းဖြစ်ကြောင်းနှင့် ဆန္ဒပြသူရှစ်ဦးကို ဖမ်းဆီးခဲ့ကြောင်း ဖော်ပြခဲ့သည်။ သုံးဦး ဒဏ်ရာရကြောင်း ယင်းက ဖော်ပြခဲ့သော်လည်း သေဆုံးမှု နှင့်ပတ်သက်ပြီး ဖော်ပြထားခြင်း မရှိပေ။ ဖမ်းဆီးခံထားရသူများသည် ဥပဒေအရ အရေးယူမှုကို ရင်ဆိုင်ရမည်ဟု ယင်းက ဖော်ပြထားသည်။
အမေရိကန်သံရုံး၏ ထုတ်ပြန်ချက်တစ်စောင်တွင် လုံခြုံရေးတပ်ဖွဲ့များက ငြိမ်းချမ်းစွာ ဆန္ဒပြသူအချို့ကို သေနတ်ဖြင့် ပစ်ခတ်၊ ကားဖြင့် ဝင်တိုက်၊ သတ်ဖြတ်ခဲ့သည် ဆိုသည့် သတင်းများကြောင့် ထိတ်လန့်တုန်လှုပ်ရကြောင်း ထုတ်ဖော်ထားသည်။
မြန်မာနိုင်ငံတွင် ဖေဖေါ်ဝါရီလက နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည် ဦးဆောင်သော ရွေးကောက်ခံ အစိုးရတစ်ရပ်ကို ဖြုတ်ချပြီး စစ်တပ်က အာဏာသိမ်းပြီးနောက်ပိုင်း စစ်အုပ်စုလက်အောက်ခံ တပ်ဖွဲ့များ၏ လက်ချက်ကြောင့် အပြစ်မဲ့ ပြည်သူ ၁,၃၀၀ ကျော် သေဆုံးခဲ့သော်လည်း စစ်အာဏာသိမ်းမှုဆန့်ကျင်ရေး ဆန္ဒပြမှုများမှာ ရပ်တန့်သွားခဲ့ခြင်း မရှိဘဲ ဆက်လက်ဖြစ်ပေါ်နေသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 