SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ကယားပြည်နယ်၊ လွိုင်ကော်မြို့နယ်၊ လွိုင်လင်လေးမြို့အရှေ့ခြမ်းမှာ ဒီဇင်ဘာ ၁၆  ရက် ဒီကနေ့ မနက် ၉ နာရီလောက်က   နားကွယ်ရွာနဲ့ ရေကန်ရွာအနီး စစ်ကောင်စီတပ်နဲ့ ကရင်နီပူးပေါင်းတပ်တို့အကြား  တိုက်ပွဲဖြစ်ပွားခဲ့ပါတယ်။

တိုက်ပွဲပြင်းထန်ခဲ့ပြီး စစ်ကောင်စီတပ်သားတွေ လယ်ကွင်းထဲ ပိတ်မိနေခဲ့လို့  ခမရ ၅၃၀ တပ်ကနေ လက်နက်ကြီးတွေနဲ့ လှမ်းပြီးပစ်ပြီး စစ် ကူ ပေးခဲ့တယ်လို့ ကရင်နီတပ်မတော်ကပြောပါတယ်။

ဒီတိုက်ပွဲအတွင်း ကရင်နီတပ်မတော်(KA) ဗိုလ်အဆင့်ရှိသူတယောက် ပြင်းထန်စွာ ဒဏ်ရာရရှိခဲ့ပြီး ညနေပိုင်းမှာ သေဆုံးသွားခဲ့တယ်လို့ က ရင်နီတပ်သားတွေထံက သိရပါတယ်။

အဆိုပါဒေသကို မနေ့တုန်းက  စစ်ကောင်စီတပ်တွေ စစ်ကြောင်းထိုးလာတဲ့အတွက် အနီးအနားကျေးရွာက ရွာသားတွေကတော့ ထွက်ပြေးတိမ်းရှောင်ခဲ့ကြရပါတယ်။

အလားတူ ဒီးမော့ဆိုမြို့နယ် ၆ မိုင်ကျေးရွာအုပ်စု ဝမ်လထွား ကျေးရွာမှာလည်း စစ်ကောင်စီတပ်က လက်နက်ကြီး လက်နက်ငယ်တွေနဲ စတင်ပစ်ခတ် ထိုးဖောက်ဝင်ရောက်ကာ KNDF တပ်ရင်း ၉ နဲ့ ရင်ဆိုင်တိုက်ပွဲဖြစ်ပွားခဲ့ပါတယ်။

တိုက်ပွဲ မိနစ် ၂၀ ခန့်ကြာဖြစ်ပွားခဲ့ပြီးနောက် စစ်ကောင်စီဘက်က  ၄ ယောက်ထက် မနည်း သေဆုံးခဲ့ပြီး KNDF ရဲဘော်နှစ်ယောက် ထိခိုက်ဒဏ်ရာရရှိခဲ့ကာ တယောက်  ဒဏ်ရာ ပြင်းထန်ကြောင်း KNDF B-09  ပြောခွင့်ရသူက ပြောပါတယ်။ 

“ တိုက်ပွဲက မနက် ၁၀ နာရီလောက်မှာဖြစ်တာ။ ထိခိုက်သေဆုံးတာက စစ်ကောင်စီဘက်က ၄ ယောက်ထက်မနည်းကျပြီးမှ ၅ ဦးထက်နည်း ဒဏ်ရာရတယ်။ ဒါက တိကျမှုနဲ့ မျက်မြင်ကိုယ်တွေ့နဲ့ကိုပြောတာပေါ့နော်။ ကျနော်တို့ လူကလည်း ၂ ယောက်ထိတယ်လေ။ တယောက်က မစိုးရိမ်ရဘူးဆိုပေမယ့် ခြေထောက် နှစ်ဖက်လုံးထိတာပေါ့နော်။ နောက်တဦးကလည်း တော်တော်လေးထိသွားတယ်။ ဒဏ်ရာပြင်းထန်တယ်ပေါ့နော်။”

ဒီးမော့ဆိုမြို့နယ် သဲတောင်ဘက်မှာလည်း ဒီကနေ့ မနက်ပိုင်းက စစ်ကောင်စီတပ်နဲ့ ကရင်နီပူးပေါင်းတပ်တို့ အကြား တိုက်ပွဲဖြစ်ပွားခဲ့ပြီး နှစ်ဖက် ထိခိုက်ကျဆုံးမှု မသိရသေးပါဘူး။ DVB

အကြမ်းဖက်စစ်ခေါင်းဆောင် မင်းအောင်လှိုင်က စစ်တပ်နှင့် ပြည်သူများကို မီဒီယာက သွေးခွဲနေသည်ဟု မိတ္တီလာတွင် ပြုလုပ်သည့် စစ်တပ် (လေ) ၇၄ နှစ်မြောက် အခမ်းအနားတွင် ပြောဆိုပြီးနောက် Khit Thit ခေတ်သစ်မီဒီယာ၏ လူမှုကွန်ရက်စာမျက်နှာကို ၀ိုင်းဝန်း Report ထုရန် နေပြည်တော်စစ်ရုံးက ညွှန်ကြားလိုက်ကြောင်း သိရှိရသည်။

Report ထုရာတွင် တစ်ပြိုင်နက်တည်း လုပ်ဆောင်ကြမည်ဖြစ်ပြီး ဒီဇင်ဘာလ ၁၇ ရက်နေ့ မွန်းလွဲ ၁ နာရီတွင် ပြိုင်တူ တစ်ပြိုင်နက်တည်း Report တင်မည်ဖြစ်ကြောင်း၊ ယင်းနောက် အမြဲမပြတ် Report ထုကြရန် ညွှန်ကြားထားကြောင်း သိရှိရသည်။ အကြမ်းဖက်စစ်ခေါင်းဆောင် မင်းအောင်လှိုင်က ယမန်နေ့က စစ်တပ်ဂုဏ်သိက္ခာကျဆင်းစေရန်၊ စစ်တပ်နှင့် ပြည်သူသွေးကွဲ စေရန် လူမှုကွန်ရက်များ၊ ပြည်ဖျက်မီဒီယာများမှတစ်ဆင့် မဟုတ်မမှန်သတင်းများနှင့် ဝါဒဖြန့်လျက်ရှိကြောင်း၊ တပ်မတော်သားများနှင့် မိသားစုဝင်များအနေနှင့်လည်း လက်ရှိဖြစ်ပေါ်နေသည့် နိုင်ငံရေးအခြေအနေမှန်များကို သိရှိအောင်လေ့လာသွားကြရန် နှင့် စစ်သတင်းနှင့် စာရွက်စာတမ်းလုံခြုံရေး၊ စစ်ပစ္စည်း လုံခြုံရေး၊ စစ်မှုထမ်းလုံခြုံရေး၊ စစ်ဆင်မှုနှင့် လေ့ကျင့်ခြင်းလုံခြုံရေးဆိုသည့် လုံ(၄)လုံကို အထူးသတိပြုဆောင်ရွက် ရန်လိုကြောင်း ထုတ်ဖော်ပြောဆိုခဲ့သည်။

ခေတ်သစ်မီဒီယာက စစ်တပ်က ကျူးလွန်သော ကင်းမကျေးရွာမီးလောင်မှု၊ ဆားလင်းကြီးမှ ပြည်သူ ၁၁ ဦးမီးရှို့သတ်ခံရမှု ၊ ကြည့်မြင်တိုင်တွင် ပြည်သူများကို စစ်ကားဖြင့် တိုက်သတ်မှု စသည့် စစ်ရာဇဝတ်မှုများကို စဉ်ဆက် မပြတ် ထုတ်ဖော်လျက်ရှိပြီး အကြမ်းဖက် စစ်ကောင်စီက ယင်းသတင်းများ မဟုတ် မှန်ဟုဆိုကာ ခေတ်သစ်မီဒီယာကိုလည်း ပြည်ဖျက် မီဒီယာဟု သုံးနှုန်း ညွှန်းဆို လျက်ရှိသည်။ အကြမ်းဖက် အာ ဏာသိမ်းစစ်ကောင်စီသည် ခေတ်သစ်မီဒီယာ၏ သတင်းဌာန လုပ်ပိုင်ခွင့် လိုင်စင်ကို မတ်လ ၈ ရက်နေ့တွင် ရုပ်သိမ်းခဲ့သည်။ khit thit

အဘွားကမ် ကတော့ အသက် (၁၀၁)နှစ် အရွယ်ရှိနေပါပြီ။နိုဝင်ဘာ ၂၆ရက် ဆောင်း မနက်ခင်းမှာ အဘွားကမ် တယောက် စစ်ရှောင်စခန်းတစ်ခုရဲ့ ဇရပ်ရှေ့မှာ ထိုင်ပြီး သျှမ်းပြည်ဆောင်းဒဏ်ကို အံတုနေပါတယ်။အဘွားကမ် နေထိုင်တဲ့ ကျောက်မဲမြို့နယ် လွယ်ကုန်ကျေးရွာ အနီးမှာ သျှမ်းပြည်ပြန်လည် ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) နဲ့ မြောက်ပိုင်းမဟာမိတ် တပ်ပေါင်းစု ဖြစ်တဲ့ (SSPP /SSA၊ TNLA)တပ်တို့ တိုက်ပွဲဖြစ်ပွားမှုကြောင့် ထွက်ပြေးတိမ်းရှောင်လာ ခဲ့ရတာဖြစ်ပါတယ်။“ အဲဒီနေ့က အသံ အရမ်းကျယ်တယ်လေ၊ အ ဖွားရဲ့ အိမ်နားမှာ လက်နက်ကြီး ကျတာပေါ့၊ အဖွားအိမ်တော့ မထိဘူး” လို့ အဘွားကမ်က တိုက်ပွဲ ဖြစ်ပွားတဲ့ရက် အကြောင်းကို ပြန်ပြောပြနေတာဖြစ်ပါတယ်။

တိုက်ပွဲဖြစ်ပွားတဲ့ရက်မှာ ကျေးရွာအနီးဝန်းကျင် လက်နက်ကြီး ကျခဲ့ပေမယ့် (၁၀)ပေ ပတ်လည်ရှိ ဝါးနဲ့ ဆောက်လုပ်တဲ့ အဘွားကမ် အိမ်ပေါ်လက်နက်ကြီးမကျတာ အလွန်ကံကောင်းကြောင်း သူက ပြောပါတယ်။အဲဒီလို စစ်ရှောင်ထွက်ပြေးလာတဲ့သူတွေထဲမှာ လက်နက်ထိမှန်ဒဏ် ရာရထားပြီး လမ်းမလျှောက်နိုင်တဲ့ သက်ကြီး အမျိုးသား (၂)ဦးနဲ့ ကိုယ်ဝန်သည် (၂)ဦးအပြင် အသက် (၁၀၁)နှစ် ရှိနေပြီဖြစ်တဲ့ အဖွားကမ်လည်း ပါဝင်ပါတယ်။ပန်စလော့ကျေးရွာကလည်း တိုက်ပွဲဖြစ်ပွားတဲ့ တောင်နဲ့ နီးနေရာဖြစ်ပြီး၊ စားနပ်ရိက္ခာပို့ဆောင်ဖို့အတွက် လမ်းပန်း ဆက်သွယ်ရေးခက်ခဲပါတယ်။

ဒါ့အပြင် စစ်ရှောင်တွေအတွက်လည်း လုံခြုံမှုမရှိတဲ့အတွက် ကျောက်မဲမြို့နဲ့နီးတဲ့ မန်ခါဘုန်းကြီးကျောင်း စစ်ရှောင်စခန်းကို ထပ်ပြီးပြောင်း ရွှေ့ခဲ့ရပါတယ်။“အဘွားကအဆင့်ဆင့် လာရတယ်။ လမ်းလျှောက် ရတယ်။ ကားနဲ့ လည်းစီးရတယ် ။ အိမ်ကနေ ထွက်လာတာ ပိုက်ဆံ (၅၀) တန် တစ်ရွက်ပဲ ပါတယ်၊ အဝတ်လည်း အပိုမပါဘူး၊ ဘာမှမပါလာဘူး၊ အဲ့တုန်းက အရမ်းလည်း ချမ်းတယ်၊ မိုးကရွာတယ်လေ” ဆိုပြီး စစ်ရှောင်လာစဉ် ကြုံတွေ့ခဲ့တဲ့ အဖြစ်အပျက်ကို အဘွားကမ် က မျက်ရည်ဝဲကာ ပြန်ပြောပြပါတယ်။

အသက် (၁၀၁) နှစ် အဘွားကမ် တယောက် ဟာ ဂျပန် နဲ့ ကိုလိုနီခေတ် ကို တွေ့ကြုံ ဖြတ်သန်းခဲ့ရသူတစ်ဦး ဖြစ်ခဲ့ပေမယ့် ယခုလို ရာချီ လူအုပ်နဲ့ ထွက်ပြေးတိမ်းရှောင်ရတာ အဆင့်ဆင့် ထွက်ပြေးရတာကိုတော့ တကြိမ်မှ မကြုံခဲ့ဖူးပေ။“အဖွားမှတ်မိသလောက်ဆိုရင် အင်္ဂလိပ်ခေတ်တုန်းက ဘာမှ မဖြစ်ခဲ့ဘူး၊ ဂျပန်တွေလာတော့ စပြီး ရှောင်ပုန်းရတယ်၊ အဲ့တုန်းကလည်း ဒီလို လူအများကြီးနဲ့ ပြေးရတာမဟုတ်ဘူး၊ တောထဲ၊ ခြံထဲ၊ တောင်ယာထဲမှာ သွားနေတာ၊ ဒီလို လူအများကြီးနဲ့ ထွက်ပြေးရတာ ခု ပထမဆုံးပဲ” လို့ အဖွားကမ်က လေသံတိုးညှင်းစွာဖြင့် ပြောပြပါတယ်။

“အဘွားက သေနတ်ပဲ ဆိုရင်တော့ အဲ့လောက်ထိ ကြောက်မှာမဟုတ်ဘူး၊ သေနတ်ပြောင်းဝက ကိုယ့်ဘက်လှည့်နေမှ၊ ကိုယ့်နဲ့ တည့်နေမှ ကြောက်မှာလေ၊ ခုက အဲ့လိုမှမဟုတ်တာ၊ လက်နက်ကြီးတွေရော ပစ်နေတာ” ဆိုပြီး လက်နက်ကြီးသံကြောင့် အထိတ်တလန့်ဖြစ်ခဲ့ရပုံကို အဘွားကမ်က ပြန်ပြောပြပါတယ်။ဒါ့အပြင် မန်ခါစစ်ရှောင် ရောက်တော့ အသက် တရာကျော်ရှိတဲ့ အဘွားဟာ စစ်ပြေးဒဏ် သာမက ကိုဗစ်ဘေးဒဏ်ပါ ထပ်ကြုံရပါတယ်။

“အဘွားက အရမ်းကံကောင်းတယ်၊ ကိုဗစ်ပိုးကူးစက်ခံရသေးတယ်လေ၊ ကျန်းမာရေးဆိုးဆိုးရွားရွားမဖြစ်ခဲ့ဘူး၊ ခုတော့ ပျောက်သွားပြီ” လို့ စစ်ဘေးရှောင်ကူညီပေးတဲ့ အမျိုးသမီး တစ်ဦးကပြောပါတယ်။အဖွားကမ် အပါအဝင် လွယ်ကုန်ဒေသခံတွေ မန်ခါစစ်ဘေးရှောင်စခန်းမှာ (၃) လပြည့်တဲ့အထိ အေးချမ်းတဲ့အအေးဒဏ် စိတ်ကျဉ်းကျပ်မှုတွေနဲ့ နေထိုင်ခဲ့ရပါတယ်။လက်ရှိမှာတော့ လွယ်ကုန်၊ ပန်စလော့နဲ့ အနီးနားကျေး ရွာဘက်တွေမှာလည်း တိုက်ပွဲသံ ငြိမ်နေတဲ့အတွက် နိုဝင်ဘာလနှောင်းပိုင်းမှာ အဘွားကမ်တယောက် နေရပ်ပြန်သွားခဲ့ပါပြီ။ဒါပေမယ့် အဘွားကမ်တယောက် ရွာထဲမှာ တိုက်ပွဲပြန်ဖြစ်မှာ ကို စိုးရိမ်ထိတ်လန့်မှုနဲ့ ရွာသားတွေတောင်ယာသွားရင် မိုင်းနင်းမိမှာကိုတော့ ရင်တထိတ်ထိတ်ဖြစ်နေပါတယ်။

“ အဘွားကတော့ တိုက်ပွဲပြန်ဖြစ်မှာကို အကြောက်ဆုံးပဲ။ ထင်းခွေသွားမယ်၊ လက်ဖက်ခူးသွားမယ်ဆိုလည်း သူတို့တွေ(လက်နက်ကိုင်တပ်) မိုင်းထောင်ထားမှာကို အရမ်းကြောက်တယ်။ မိုင်းထိတဲ့သူလည်း ရှိခဲ့တယ်လေ၊ ဒဏ်ရာရတာတွေရော ရှိတယ်” လို့ အဘွားကမ်တယောက် ပူပင်သောကတွေနဲ့ ပြောလာပါတယ်။အဘွားကမ်တယောက် နေအိမ်ပြန်ပြီး နေထိုင်နေပေမယ့် သူမရဲစိတ်မှာတော့ သောက အပူမီးတွေကောင်းမွန်စွာ မအိပ်စက်နိုင်သေးပေ။

“တကယ်လို့ တိုက်ပွဲထပ်ဖြစ်ရင် ပြေးရဦးမယ် ဆိုရင် အဘွားကတော့ မပြေးတော့ဘူး၊ ဒီတိုင်းပဲ နေတော့မယ်၊ အသက်လည်း ကြီးနေပြီ၊ နေပါ စေတော့” လို့ စိတ်သောကအပြည့်နဲ့ သူက ဆိုလိုက်ပြန်ပါတယ်။ mizzima

မကွေးတိုင်း၊ မြိုင်မြို့နယ်အနောက်မြောက်ခြမ်း၊ ငါးမြောင်းကျေးရွာကို စစ်ကောင်စီတပ်က ဒီနေ့ ဒီဇင်ဘာ ၁၆ ရက်နေ့ မနက် ၁၀ နာရီလောက်က  မီးရှို့ခဲ့တာကြောင့် အိမ်ခြေ ၃၀ လောက် လောင်ကျွမ်းသွားတယ်လို့ ဒေသခံတွေဆီက သိရပါတယ်။

အခုငါးမြောင်းရွာကို မီးရှို့နေတဲ့ စစ်တပ်ဟာ ဂန့်ဂေါနယ်ဘက်က ထွက်လာတဲ့ ကပစတပ်က စစ်သားတွေဖြစ်တယ်လို့ သိရပါတယ်။

“ကျနော်တို့ရွာ အနောက်ခြမ်းကနေ ဒီကောင်တွေ ဒီနေ့မနက်ခင်း ၁၀ နာရီလောက်က စမီးရှို့တာဗျ။ အခုအချိန်အထိ လောင်နေတုန်းပဲ။ ခန့်မှန်း ခြေ ၃၀ လောက် အကုန်လောင်သွားပြီ။ ဒေသခံတွေကတော့ ရွာအပြင်ကနေ လှမ်းကြည့်နေရတယ်ပေါ့ဗျာ။ ရွာက ကလေးတွေက အရဲစွန့် မီးငြှိမ်းသတ်ဖို့ လုပ်နေကြတယ်” လို့ ဒေသခံရွာသားတစ်ဦးက ပြောပါတယ်။

စစ်ကောင်စီတပ်က ငါးမြောင်းကျေးရွာ မြိုင်မြို့နယ်နဲ့ ပုလဲမြို့နယ်အဆက်မှာတည်ရှိကာ အိမ်ခြေ ၂၃၀ ရှိတယ်လို့လည်း သိရပါတယ်။

အခုလို ငါးမြောင်းရွာကို မီးရှို့တဲ့ စစ်တပ်ဟာ  ပြီးခဲ့တဲ့ ဒီဇင်ဘာ ၁၅ ရက်နေ့က ငါးမြောင်းကျေးရွာအနီး ဒေသခံပြည်သူ့ကာကွယ်ရေးတပ်တွေက မိုင်းဆွဲတိုက်ခိုက်လို့ အကျအဆုံးအများအပြားရှိနေပြီး ဒဏ်ရာရရှိသူတွေလည်း ရှိနေတယ်လို့ သိရပါတယ်။ DVB

နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်အား စစ်ဆေးရန် ကျန်ရှိနေသည့် သဘာဝဘေး အမှု တစ်မှုကို မန္တလေးတိုင်းဝန်ကြီးချုပ် ဒေါက်တာဇော်မြင့်မောင်က တရားလိုပြ သက်သေ အဖြစ် Video Conferencing ဖြင့် ထွက်ဆိုမည်ဖြစ်ကြောင်း သိရသည်။ ဒီဇင်ဘာလ ၂၀ ရက် ရုံးချိန်းတွင် ထွက်ဆိုသွားမည် ဖြစ်သည်ဟု ဒေါက်တာဇော်မြင့်မောင်အမှုကို လိုက်ပါ ဆောင်ရွက်နေသည့် ရှေ့နေအဖွဲ့ဝင် တစ်ဦးက ပြော သည်။

“ဒေါက်တာဇော်မြင့်မောင် သက်သေထွက်ဆိုဖို့ ရှိတယ် ဆိုပေမယ့် Video Conferencing နဲ့ စစ်ဆေးမှာပါ။ လူကိုယ်တိုင်သွားလို့ မရပါဘူး။ တရားရုံးက သက်သေ အမည်စာရင်း လက်ခံ လိုက်တာက တစ်ပိုင်း၊ အဲ့ဒီသက်သေတွေကို နေပြည်တော်သွားပြီး စစ်ခံရမယ်၊ မစစ်ခံရမယ် ဆိုတာက တစ်ပိုင်းပါ။ တရားရုံးက သက်သေပြသခွင့်ကို ခွင့်ပြုလိုက်တာပါ။ ပြသတဲ့ သက်သေကို ဘယ်လိုပုံစံနဲ့ စစ်မလဲ ဆိုတာ လူရုံးထုတ်လား၊ VC နဲ့လားပေါ့။ အခု ၂၀ ရက်နေ့မှာ VC စစ်ဆေးဖို့ ဖြစ်နေတာ ” ဟု ၎င်းက ပြောသည်။

ဒေါက်တာဇော်မြင့်မောင် ရင်ဆိုင်နေရသည့် အဂတိအမှု ငါးမှုကို ပြီးခဲ့သည့် ဒီဇင်ဘာလ ၁၀ ရက်တွင် အိုဘိုးအကျဉ်းထောင် အထူးတရားရုံး၌ ရုံးထုတ် စစ်ဆေးခဲ့သည်။ယင်းနေ့ ရုံးချိန်းတွင် စွဲဆိုထားသော အဂတိ အမှုများအတွက် တရားလိုပြ သက်သေ နှစ်ဦးစီ စစ်ဆေး ကြားနာခဲ့ပြီး အပတ်စဉ် သောကြာနေ့တိုင်း စစ်ဆေးရန် တရားရုံးက ဆုံးဖြတ်ချက်ချမှတ်ခဲ့သည်။ထို့အပြင် ဒေါက်တာဇော်မြင့်မောင်အား မဲသမာမှု ပြု လုပ်သည်ဟု ဆိုကာ စွဲဆိုထားသော ရာဇသတ်ကြီး ပုဒ်မ ၁၇၁ အမှုနှင့် ၁၃၀ (က) အမှု နှစ်မှုကိုလည်း ဒီဇင်ဘာလ ၁၂ ရက်နေ့တွင် အိုးဘိုထောင်အတွင်းရှိ အောင်မြေသာစံ မြို့နယ် အထူးတရားခွင်နှင့် အမရပူရမြို့နယ် အထူးတရားခွင်များ၌ ကြားနာ စစ်ဆေးခဲ့ကြသည်။

ယင်းအမှုနှစ်မှု အတွက် ရုံးချိန်းကို ဒီဇင်ဘာလ ၂၂ ရက်သို့ ထပ်မံ ချိန်းဆိုလိုက်သည်။ ယင်းသို့ ချိန်းဆိုလိုက်ခြင်းသည် ဒီဇင်ဘာ ၂၀ ရက်၌ ဒေါ်အောင်ဆန်းစုကြည် အမှုအတွက် တရားလိုပြ သက်သေ ထွက်ဆိုရန် တိုက်ဆိုင်နေသောကြောင့် ဖြစ်နိုင်သည်ဟု ရှေ့နေအဖွဲ့ဝင် တစ်ဦးက ဆို သည်။မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်သည် အမှု ခုနစ်မှု ရင်ဆိုင်ရန် ကျန်ရှိနေပြီး နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အမှု ၁၀ မှု ဆက်လက် ရင်ဆိုင်ရန် ကျန်ရှိနေသေးသည်။

ဒေါ်အောင်ဆန်းစုကြည်ကို စွဲဆိုထားသည့် ပို့ကုန်၊သွင်းကုန်ပုဒ်မ (၈) အမှု နှင့် ဆက်သွယ်ရေး ဥပဒေ ပုဒ်မ ၆၇ အမှုတို့အတွက် ဒီဇင်ဘာလ ၂၀ ရက်တွင် အပြီးသတ် အမိန့်ချမှတ်သွားမည် ဖြစ်သည်။ mizzima

ကရင်ပြည်နယ်တွင် စစ်ကောင်စီတပ်များ၏ ကျူးကျော်လာမှုကြောင့် တိုက်ပွဲများဖြစ်ပွားလျက်ရှိပြီး ထိုင်းနိုင်ငံဘက်သို့ မြန်မာစစ်ဘေးရှောင် ၁၀၀၀ ကျော် ထွက်ပြေးတိမ်းရှောင်နေရကာ ထိုင်းစစ်တပ်က ကာကွယ်စောင့်ရှောက်ထားကြောင်း၊ စစ်ဘေးရှောင်များကို ကူညီကြရန် AAC မဟာမိတ်အဖွဲ့မှ ဦးရဲမင်းက ပြောဆိုသည်။

“လေးကေ့ကော်တိုက်ပွဲများကြောင့် စစ်ရှောင်များ ထိုင်းနိုင်ငံဘက်ခြမ်းတွင် လူပေါင်း ၁၀၀၀ ကျော်ခိုလှုံ။ ထိုင်း ဘက်က ယာယီလက်ခံပေးထားပါတယ်။ ယနေ့ လက်ရှိ စားသောက်ရေးအတွက် မဲဆောက် မြို့နယ် ဥက္ကဌမှ တာဝန်ပေးထားသော မဲဆောက်မှ တာဝန်ရှိသူများဖြင့် လက်တွဲ၍ AAC အဖွဲ့မှ အသင့် စားအကြော် အလှော်များ ရိက္ခာများ ပေးပို့ထားပါတယ်။ အရေးပေါ် အနေအထား ဖြစ်တာမို့ ထိုင်းရောက်မြန်မာများ အမြန်ဆုံးဝိုင်းကူပေးကြစေချင်ပါတယ်။

စစ်ရေးအတွက် ကူညီနေရသလို စစ်ဘေး ရှောင်များကိုလည်း ပစ်ထားလို့မရပါဘူး။ စစ်ရှောင်များ စားသောက်ရေးအတွက်စားနပ်ရိက္ခာနှင့် အနွေးထည်၊စောင်၊ခြင် ထောင် အဝတ် အထည်လှူချင်သူများနှင့် လက်ရှိစုဆောင်းထားသူများ အနေဖြင့် AAC ရုံးခန်းနှင့် AAC ဂေဟာသို့ ဆက်သွယ်ပေးပို့ လှူဒါန်းနိုင်ပါတယ်” ဟု ဦးရဲမင်းက ပြောသည်။

ထိုင်းနိုင်ငံထဲတွင် စစ်ဘေးရှောင် ၁၀၀၀ ကျော်ရှိနေပြီး လေးကေ့ကော်အနီး အနားတွင် စစ်ဘေးရှောင် ၃၀၀၀ ကျော်ရှိနေကြောင်း ဒေသကူညီရေးအဖွဲ့များထံမှ သိရှိရသည်။ khit thit

သရုပ်ဆောင်ရဲတိုက်ဟာ ဦးနှောက်ကျုံ့တဲ့ ဝေဒနာခံစားရတာကြောင့် တရားခွင်မှာ မေ့လဲသွားတာဖြစ်ပြီး အင်းစိန်ထောင်ဆေးရုံမှာ ဆက်လက်ကုသမှုခံယူနေရတယ်လို့ သူ့ရဲ့ရှေ့နေက ပြောပါတယ်။

လသာရဲစခန်းကစွဲဆိုထားတဲ့ ၅၀၅(က)အမှုအတွက် ရုပ်ရှင်သရုပ်ဆောင်ရဲတိုက်ဟာ ဒီဇင်ဘာ ၁၅ ရက်နေ့က အင်းစိန်ထောင်တွင်း အထူးတရားရုံး တရားခွင်မှာ အမှုရင်ဆိုင်နေတုန်း ရုတ်တရက်မေ့လဲသွားခဲ့တာပါ။ 

တရားခွင်ကိုရောက်လာချိန်မှာ သရုပ်ဆောင်ရဲတိုက်ဟာ ကိုယ်ပူချိန်မြင့်မားပြီး ဖျားနာကာ မေ့လဲခဲ့တာဖြစ်ပြီး တရားခွင်မှာ အမှုရင်ဆိုင်ဖို့ရောက်နေတဲ့ ဖမ်ဆီးခံ အထူးကုဆရာဝန်ကြီး ဒေါက်တာမော်မော်ဦးနဲ့ အင်းစိန်ထောင်ဆရာဝန်တွေက ဝိုင်းဝန်းကုသပေးပေမယ့် သတိပြန်မလည်လာတဲ့အတွက် အင်းစိန်ဆေးရုံကို ပို့ဆောင်ခဲ့ရပါတယ်။ 

သူ့ရဲ့ရှေ့နေ ဦးခင်မောင်မြင့်က “သတိလည်လာပြီးနောက်မှာ အင်းစိန်ဆေးရုံကြီးကနေမှ မြောက်ဥက္ကလာပဆေးရုံကြီးမှာ သွားပြီးတော့ ဦးခေါင်းနဲ့ခန္ဓာကိုယ်အစိတ်အပိုင်းတွေကို ဓာတ်မှန်ရိုက်ပါတယ်။ ဓာတ်မှန်ရိုက်တဲ့အခါမှာ ထူးထူးခြားခြားအကြောင်းအရာမရှိဘူး။ ဦးနှောက်ကျုံ့သွားတယ်လို့ပြောပါတယ်။ ကျုံ့သွားလို့ မူးလဲသွားတယ်လို့ ပြောပါတယ်။ မျက်မြင်အခြေအနေအရ ဖျားနေတာကလွဲလို့ ထူးထူးခြားခြားအခြေအနေမရှိတဲ့အတွက် ညနေ ၄ နာရီမှာ အင်းစိန်ထောင်ဆေးရုံမှာပြန်တင်ပြီး ကုသထားတယ်လို့သိရပါတယ်။ ဒီနောက်ပိုင်းကတော့ သူနဲ့လူချင်းမတွေ့ရတော့ လက်ရှိအခြေအနေကို မပြောနိုင်ဘူးပေါ့လေ” လို့ ပြောပါတယ်။

ကိုဗစ်တတိယလှိုင်းအပြီး အင်းစိန်ထောင် Lock Down ပြန်ဖြေပြီးနောက်ပိုင်း စက်တင်ဘာ ၂၉ ရက်နေ့မှာ သရုပ်ဆောင်ရဲတိုက်ရဲ့ အမှုတွေကို ထောင်တွင်းတရားရုံးက ပြန်လည်စစ်ဆေးခဲ့တာဖြစ်ပါတယ်။ 

လက်ရှိအချိန်အထိ တရားလိုပြသက်သေတွေကို စစ်ဆေးတဲ့အခြေအနေမှာပဲ ရှိသေးပြီး နောက်ရုံးချိန်းတွေကို ဆက်စစ်ဆေးဖို့ကတော့ ရဲတိုက်ရဲ့ ကျန်းမာရေးအခြေအနေအပေါ်မူတည်တယ်လို့ ရှေ့နေဦးခင်မောင်မြင့်ကပြောပါတယ်။

“အမှုဆက်စစ်ဖို့ကတော့ သူ့ကျန်းမာရေးအခြေအနေပေါ်မူတည်မှာဗျ။ လာမယ့် ၂၃ ရက်နေ့မှာ မရမ်းကုန်းမှာ စွဲထားတဲ့ မူးယစ် ၁၆ (ဂ) ကို စစ်ဖို့ချိန်းထားတာရှိတယ်။ အဲ့ဒီမှာ အခြေအနေစောင့်ကြည့်ရမှာပေါ့။ ၅၀၅ က ၂၂ ရက်နေ့၊ မူးယစ်က ၂၃ ရက်နေ့ ပြန်ချိန်းထားပါတယ်။”

သရုပ်ဆောင်ရဲတိုက်ကို လသာရဲစခန်းက ၅၀၅(က)၊ မရမ်းကုန်းရဲစခန်းက မူးယစ်ပုဒ်မ ၁၆ (ဂ) တို့နဲ့ တရားစွဲထားတာဖြစ်ပါတယ်။ မေလ ၄ရက်နေ့မှာ သရုပ်ဆောင် ရဲတိုက်ကို ပုဒ်မတပ်အမှုစတင်စွဲဆိုခဲ့ပြီး Facebook နဲ့ မီဒီယာတွေပေါ်ကအချက်အလက်တွေကို ရဲစခန်းတွေက သက်သေအဖြစ်အသုံးပြုတရားစွဲခဲ့တာဖြစ်ပါတယ်။  

သရုပ်ဆောင်ရဲတိုက်ကို ဧပြီ ၃ ရက်နေ့က မရမ်းကုန်းမြို့နယ် သမိုင်းလမ်းဆုံမှာ စတင်ဖမ်းဆီးခဲ့တာဖြစ်ပြီး အချိန် ၈ လကျော် အင်းစိန်ထောင်ထဲမှာ ထိန်းသိမ်းခံထားရပါတယ်။ DVB

NLD အစိုးရ လက်ထက်က စစ်တပ်နှင့် အစိုးရကို ဆန့်ကျင်ကြောင်း ဆန္ဒပြ၍ ထောင်ဒဏ် နှစ်နှစ်နှင့် ခြောက်လ အမိန့်ချမှတ် ခံထားရသော ရ ခိုင်တက္ကသိုလ် ကျောင်းသားလေးဦးကို ဒီဇင်ဘာလ ၁၆ ရက် ကြာသပတေးနေ့ တွင် ရခိုင်ပြည်နယ် တရားလွှတ်တော်က ထောင်ဒဏ် တစ်နှစ်လျော့ပေါ့ပေးရန် အပြီးသတ် ပြင်ဆင်မိန့် ချမှတ်လိုက်ကြောင်း ကျောင်းသားများ၏ ရှေ့နေ ဦးကျော်ညွှန့်မောင်က မဇ္ဈိမကို ပြောသည်။

ရက္ခိုင်ပြည် ကျောင်းသားသမဂ္ဂမှ ပြန်ကြားရေး တာဝန်ခံ ကိုကျော်နိုင်ဌေး၊ တွဲဖက်ပြန်ကြားရေး တာဝန်ခံ ကိုဦးသန်းနိုင်၊ ရက္ခိုင်ပြည် ကျောင်းသားများသမဂ္ဂ (ဒဂုံတက္ကသိုလ်) မှ ကိုကောင်းထွန်းနှင့် ကျောက်ဖြူ ပညာရေး ကောလိပ်မှ ကိုမြတ်စိုးဝင်း တို့ကို စစ်တွေမြို့နယ် တရားရုံးက ပြီးခဲ့သည့် စက်တင်ဘာလ ၁၆ ရက်နေ့က ထောင်ဒဏ် နှစ်နှစ်ခွဲ အမိန့်ချမှတ်ခဲ့ခြင်း ဖြစ်သည်။၎င်းတို့လေးဦးကို နိုင်ငံတော် အ ကြည်ညိုပျက်စေမှု ပုဒ်မ ၅၀၅ (ခ) အတွက် ထောင်ဒဏ် နှစ်နှစ်နှင့် သဘာဝ ဘေးအန္တရာယ်ဆိုင်ရာ စီမံခန့်ခွဲမှု ပုဒ်မ (၂၉) ဖြင့် ထောင်ဒဏ် ခြောက်လ အမိန့်ချမှတ်ခဲ့ခြင်း ဖြစ်သည်။

ယင်းနောက် အမှုကို စစ်တွေခရိုင် တရားရုံးသို့ အယူခံတက်ခဲ့ရာ ပယ်ချခံခဲ့ရပြီး ပြည်နယ်တရားလွှတ်တော်သို့ ဆက်လက်အယူခံတက်ခဲ့ရာ တရားလွှတ်တော်က အမှုကို လက်ခံပြီးနောက် ပြစ်ဒဏ် တစ်နှစ် လျော့ပေါ့ ကျခံစေရန် ယနေ့ဒီဇင်ဘာလ ၁၆ ရက်တွင် အပြီးသတ်အမိန့် ချလိုက်ခြင်း ဖြစ်သည်။“မူလက ထောင်ဒဏ် နှစ်နှစ်ခွဲ ချမှတ်ထားတယ်။ အဲဒါကို ရခိုင်ပြည်နယ် တရားလွှတ်တော်က ၅၀၅ (ခ) နဲ့ ဘေးစီမံ (၂၉) ကို တစ်ပေါင်းတည်း ကျခံစေရန် အမိန့်ချလိုက်တယ်။ တစ်ပေါင်းတည်းဆိုတော့ နှစ်နှစ်ခွဲမှာ နှစ်နှစ် ဖြစ်သွားတာပေါ့ဗျာ။ ပြီးတော့တစ်ခါ ၅၀၅ (ခ) ကို နှစ်နှစ်ချထားတာ ခြောက်လ ပြစ်ဒဏ် လျှော့လိုက်တယ်။ ဆိုတော့ မူလက ချထားတာ နှစ်နှစ်ခွဲအစား တစ်နှစ်ခွဲ ဖြစ်သွားပါတယ်။

ထောင်ဒဏ် တစ်နှစ် လျှော့သွားတာပေါ့” ဟု ရှေ့နေဦးကျော်ညွှန့်မောင်က ရှင်းပြသည်။အကျဉ်းထောင်အတွင်း ချုပ်ရက် ခံစားခွင့်များကို နှုတ်လိုက်ပါက အဆိုပါ ကျောင်းသားလေးဦးသည် လာမည့် ၂၀၂၂ ခုနှစ် မတ်လနှောင်းပိုင်းတွင် လွပ်မြောက်လာခြေ ရှိကြောင်းလည်း ရှေ့နေက ပြောသည်။အဆိုပါ ကျောင်းသားလေးဦးသည် NLD အစိုးရလက်ထက် ၂၀၂၀ ခုနှစ် အောက်တိုဘာလ ၁၉ ရက်နေ့က စစ်တွေမြို့ပေါ်၌ ကိုလိုနီ အ စိုးရ အလိုမရှိ၊ ဖက်ဆစ်စစ်တပ် အလိုမရှိ၊ No Bloody Government၊ No Murder Army၊ Burmese Government Get Out၊ Burmese Army Get Out စသည့် ဗီနိုင်းများ ကိုင်ဆောင်ပြီး စစ်တပ်နှင့် အစိုးရ ဆန့်ကျင်ရေး ဆန္ဒပြမှုကြောင့် အောက်တိုဘာလ ၁၉ ရက်နေ့တွင် ဖမ်းဆီးတရားစွဲဆို ခံခဲ့ရခြင်း ဖြစ်သည်။

၎င်းတို့သည် စစ်တွေအကျဉ်းထောင်တွင် အကျဉ်းကျခံနေရပြီး ကျောင်းသားလေးဦးလုံး ကျန်းမာရေး ကောင်းမွန်သည်ကို တွေ့ရကြောင်း ရှေ့ နေက ပြောသည်။ mizzima

မကွေးတိုင်း မြိုင်မြို့နယ် ငါးမြောင်းကျေးရွာကို ယနေ့ ဒီဇင်ဘာလ ၁၆ ရက်နေ့ နံနက်ပိုင်းက အကြမ်းဖက် စစ်ကောင်စီ တပ်ဖွဲ့များ ဝင်ရောက်စီးနင်းခဲ့ပြီး ပြည်သူ နေအိမ် ၂ဝကျော်ကို ဝင်ရောက် မီးရှို့ဖျက်ဆီးခဲ့ကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

” ဒီနေ့ နံနက်ပိုင်းလောက်က စစ်သားတွေ ရွာထဲကို ဝင်လာ တစ်ရွာလုံးနီးပါး ထွက်ပြေး တိမ်းရှောင်နေရတယ်။ ရွာထဲမှာ ရှိတဲ့ အိမ်ခြေ ၂ဝကျော် လောက်ကို မီးရှို့ဖျက်ဆီးသွားတယ်။ ဒေသခံပြည်သူတွေ မီးဝိုင်းငြိမ်းလို့ မီးတော့ ငြိမ်းသွားပြီး ပျက်စီးဆုံးရှုံးမှု တန်ဖိုးတော့ မသိရသေးဘူး။ ရွာမှာ လူဦးရေ ၁ထောင် လောက်တော့ နေထိုင်တယ်။ အခုတော့ အကုန်လုံးနီးပါး ထွက်ပြေး တိမ်းရှောင်နေရတယ် ” ဟု ဒေသခံပြည်သူ တစ်ဦးကပြောဆိုသည်။

အဆိုပါ အကြမ်းဖက် စစ်ကောင်စီ တပ်ဖွဲ့များသည် ကျေးရွာအတွင်းရှိ ပြည်သူပိုင် နေအိမ်များကို ဝင်ရောက် မွှေနှောက်မှုများ လုပ်ဆောင်ခဲ့ပြီး မွန်းလွဲပိုင်းတွင် ကျေးရွာအတွင်းမှ ပြန်လည် ထွက်ခွာသွားကာ ယင်း စစ်ကောင်စီ စစ်ကြောင်းနှင့် မုံရွာ-ဂန့်ဂေါ လမ်းပိုင်းတွင် ဒေသခံပြည်သူ့ ကာကွယ်ရေး တပ်ဖွဲ့များကြား တိုက်ပွဲဖြစ်ပွားလျက်ရှိကြောင်း သိရသည်။ khit thit