Monthly Archives: Dec 2021

ပုလဲ-ဂန့်ဂေါ လမ်း‌တွင် စစ်ကောင်စီယာဉ်တန်း ကို PPDF မိုင်းဆွဲတိုက်ခိုက်

စစ်ကိုင်းတိုင်း၊ ပုလဲမြို့နယ်မှ ထွက်ခွာလာသည့် စစ်ကောင်စီယာဉ်တန်းနှင့် ရှေ့ပြေးခြေလျင်တပ်ဖွဲ့အား ပုလဲ-ဂန့်ဂေါလမ်းတွင် မိုင်းလေးကြိမ် ဖောက်ခွဲတိုက်ခိုက်ခဲ့ကြောင်း ပုလဲပြည်သူ့ကာကွယ်ရေးတပ်(PPDF)ထံက သိရသည်။ ယမန်နေ့ ဒီဇင်ဘာလ ၁၅ ရက် နံနက်ပိုင်းတွင် ထိုစစ် ကြောင်းအား ကုက္ကိုကုန်းရွာ အနောက်ဘက်၊ လက်ပုကန်ရွာ အရှေ့ဘက်၊ လက်ပုကန်ရွာ အနောက်ဘက် နှင့် နှောကန်ရွာအရှေ့ဘက်တို့တွင် မိုင်းခွဲတိုက်ခိုက်ခဲ့ခြင်းဖြစ်သည်။

“အင်အားကတော့ တော်တော်များတယ်။ သူတို့က ကျွန်တော်တို့ရှိတဲ့ နေရာကိုသိထားတော့ လက်နက်ကြီးတွေနဲ့ အရင်ပစ်တာ ကျွန်တော်တို့ငုံ့ထားရတယ်။ အဲ့ဒီမှာ ပထမဆုံး ပေါ်လာတဲ့ကားနဲ့ ခြေလျင်လျောက်လာတဲ့ လူတွေကို မိုင်းဆွဲလိုက်တယ်။ ကားတစ်စီးတော့ ထိထိမိမိထိသွားတယ်”ဟု PPDFအဖွဲ့မှ ဗိုလ်နဂါးက မဇ္ဈိမကို ပြောသည်။ ထိုတိုက်ခိုက်မှုအား ဗိုလ်နဂါးဦးဆောင်သည့် PPDFတပ်ဖွဲ့မှ ရဲဘော်မောင်မောင်မြင့်တပ်ခွဲနှင့် ရဲဘော်မောင်ရွှေကြီး တပ်စိပ်တို့က တိုက်ခိုက်ခဲ့ခြင်းဖြစ်သည်။

ထိုတိုက်ခိုက်မှုအတွင်း စစ်ကောင်စီတပ်ဘက်က စစ်ကားအကြီး ငါးစီးထိခိုက်ကာ စစ်ကောင်စီတပ်သား ၂၅ ဦးခန့်သေဆုံးနိုင်ကြောင်း PPDF လူမှုကွန်ရက်စာမျက်နှာတွင် ထုတ်ပြန်ထားသည်။ “ကျွန်တော်တို့ မိုင်းလေးကြိမ်ဆွဲခဲ့တယ်။ လမ်းပိုင်းတစ်ခုထဲမှာပဲ။ ကားကတော့ စုတ်ပြတ်သွားတယ်။ နေရာနှစ်ခုမှာဆိုရင် တော်တော်ထိသွားတာ အနားကပ်တဲ့ လူတွေအကုန် စုတ်ပြတ်ကုန်တာ၊ သေတဲ့လူတွေကို ဒီကောင်တွေကတစ်ခါတည်း ပြန်မခေါ်သွားတော့ဘူး။ အာ့မှာပဲအလောင်းတွေကို မီးရှို့တယ်။ မြေမြှုပ်လိုက်တာလည်းရှိတယ်။ ပြန်တော့သွားမကြည့်ရသေးဘူး။ အဲ့နေရာတွေကို ဒီကောင်တွေက ရှေ့ဆက်မသွားရဲသေးတော့ အဲ့ဒီနေရာတွေမှာပဲ တပ်ဆွဲပြီးနေနေကြတာ”ဟု ဗိုလ်နဂါးက ပြောသည်။

စစ်ကောင်စီတပ်ဖွဲ့ဘက်မှလည်း မိုင်းထိပြီးနောက် လက်နက်ကြီး၊ လက်နက်ငယ်များဖြင့် ပစ်ခတ်မှုများ ပြုလုပ်ခဲ့သည်ဟု သိရသည်။ ထိုပစ် ခတ်မှုမှ လက်နက်ကြီးကျည် သုံးချက်ခန့် နွယ်လျောက်ရွာအတွင်းသို့ ကျရောက်ပေါက်ကွဲခဲ့ပြီး ထိခိုက်ပျက်စီးမှုများကို စုံစမ်းဆဲဖြစ်သည်။ ထိုတိုက်ခိုက်ခံရသည့် စစ်ကောင်စီစစ်ကြောင်းသည် ပုလဲ – ဂန့်ဂေါလမ်းအတိုင်း ချီတက်လာ၍ လမ်းတစ်လျှောက်ရှိ ကျေးရွာများဖြစ်သော မြကုန်း၊ ကုက္ကို၊ လက်ပုကန်၊ နွယ်လျောက်၊ ကြောင်သန်း နှင့်နှောကန်ရွာတို့မှ ဒေသခံ ဦးရေ ၁၀,၀၀၀ ခန့် ဘေးလွတ်ရာ တိမ်းရှောင်‌နေကြရသည်။

“ကျွန်တော်တို့လည်း သတင်းကြားကြားချင်း အဝတ်တစ်ထည် ကိုယ်တစ်ခုနဲ့ ပြေးကြရတာပေါ့။ ညဘက်ထိ မပြန်ရဲဘူးလေ။ လက်နက်ကြီးသံတွေလည်း ကြားတယ်။ ပစ်ခတ်သံတွေလည်း ကြားတော့ တောထဲမှာပဲ ပုန်းနေကြရတာ၊ ရာသီဥတုကလည်းအေးအေးနဲ့ ပါတဲ့ပုဆိုးခြုံပြီး ကွေးရတာပဲ” ဟု လက်ပုကန်ရွာသား အသက် ၄၀ ဝန်းကျင် အမျိုးသားတစ်ဦးက ပြောသည်။

ထိုစစ်ကြောင်းသည် ယနေ့ ဒီဇင်ဘာလ ၁၆ ရက် နံနက် ၈ နာရီ ၄၅ မိနစ်တွင် သပြေကုန်းရွာ အနောက်ဘက်၌ ယာဉ်သုံးစီးပါ စစ်ကောင်စီ ခြေလျင်တပ်ကို မိုင်းဆွဲ တိုက်ခိုက်ခဲ့ကြောင်း ပုလဲ ပြည်သူ့ကာကွယ်ရေးတပ်ဖွဲ့ (PPDF) အဖွဲ့မှ ဗိုလ်နဂါးက ပြောသည်။ mizzima

မွန်ပြည်နယ်၊ လမိုင်းမြို့က စီးပွားရေးလုပ်ငန်းရှင် ၁ ဦး ဖမ်းဆီးခံရ

မွန်ပြည်နယ်၊ လမိုင်းမြို့က စီးပွားရေးလုပ်ငန်းရှင် ကိုမင်းသိန်းထွန်းဦး(ခ) ကိုစကစ်ကို ဒီဇင်ဘာ ၁၅ ရက် ည ၁၁ နာရီခွဲလောက်က  စစ်ကောင်စီတပ်က လာရောက် ဖမ်းဆီးသွားတယ်လို့ ဒေသခံတွေက ဒီဗွီဘီကို ပြောပါတယ်။

ကိုမင်းသိန်းထွန်းဦးကို စစ်ကောင်စီတပ် အင်အား ၂၀ လောက်နဲ့ လမိုင်းမြို့က နေအိမ်မှာ လာရောက် ဖမ်းဆီးခေါ်ဆောင်သွားတာဖြစ်ပြီး  ဘာကြောင့် လာရောက် ဖမ်းဆီးသွားလဲဆိုတာကိုတော့ မသိရသေးသလို လက်ရှိအချိန်ထိ မိသားစုနဲ့ အဆက်အသွယ် မရသေးပါဘူး။

စစ်ကောင်စီတပ်နဲ့ နီးစပ်သူတွေအဆိုအရ ကိုမင်းသိန်းထွန်းဦးကိုတော့ လမိုင်းမြို့၊ မော့ကနင်ကျေးရွာရှိ အမှတ် ၁၀၆ ခြေလျင်တပ်ရင်းမှာ ဖမ်း ဆီးထိန်းသိမ်းထားတယ်လို့ ဆိုပါတယ်။

ကိုမင်းသိန်းထွန်းဦးကို စစ်ကောင်စီတပ်က ဖမ်းဆီးတာဟာ  အမျိုးသားညီညွတ်ရေးအစိုးရ NUG ကို ထောက်ခံကြောင်း ဖေ့စ်ဘွတ်ခ်  ပရိုဖိုင်ပြောင်းတင်ထားတဲ့ကိစ္စနဲ့ သက်ဆိုင်နိုင်တယ်လို့  ဒေသခံက ခန့်မှန်း ပြောပါတယ်။

ကိုမင်းသိန်းထွန်းဦးဟာ လမိုင်းမြို့မှာ Honda Showroom အရောင်းပြခန်း ဖွင့်လှစ်ထားပြီး လူမှုအကျိုးပြု လုပ်ငန်းတွေကိုလည်း ဆောင် ရွက် နေသူ ဖြစ်ပါတယ်။ DVB

မိတ္ထီလာမြို့နယ်တွင် ပုဒ်မ ၁၄၄ အမိန့် သက် တမ်းတိုး ထုတ်ပြန်

မန္တလေးတိုင်း၊ မိတ္ထီလာမြို့နယ်တွင် ရာဇဝတ်ကျင့်ထုံး ဥပဒေပုဒ်မ ၁၄၄ ကို အာဏာသိမ်းစစ်ကောင်စီ လက်အောက်ခံ မြို့နယ်အထွေထွေ အုပ်ချုပ်ရေးဦးစီးဌာနက ဒီဇင်ဘာလ ၁၄ ရက် ရက်စွဲဖြင့် အမိန့်ထုတ်ပြန်ထားသည်။ ရုန်းရင်းဆန်ခတ်မှုများ ဖြစ်ပွားလာနိုင်သည်ဟု ယူဆရသည့်အတွက် အမိန့်ထုတ်ပြန်ခြင်းဖြစ်ပြီး ယနေ့ ဒီဇင်ဘာလ ၁၅ ရက်မှ လာမည့်နှစ် ဖေဖော်ဝါရီလ ၁၄ ရက်အထိ နှစ်လကြာ အမိန့် အတည်ဖြစ်ကြောင်း ထုတ်ပြန်ချက်တွင် ပါရှိသည်။

“ဒါကတော့ သူတို့အတွက် ကာကွယ်ဖို့ ထုတ်ထားတဲ့ ဥပဒေပဲ။ အဲ့ဒီလိုထုတ်နေပေမယ့်လည်း တကယ်တန်းမြေပြင်မှာ ထိရောက်မှုမရှိပါဘူး။ မိထ္တီလာမြို့မှာက စစ်တပ်အင်အားများပြီး မြို့အဝင်မြို့အထွက်ပတ်ပတ်လည်ဝိုင်းထားပေမယ့် ရရင် ရသလို စစ်ကောင်စီတပ်တွေကို တိုက် ခိုက်တာတွေ ရှိနေတုန်းပဲ” ဟု မြို့ခံတစ်ဦးက မဇ္ဈိမကို ပြောသည်။

ပုဒ်မ ၁၄၄ အရ မိတ္ထီလာမြို့နယ်အတွင်း စုဝေးခြင်း၊ ဟောပြောခြင်း၊ ယာဉ်တစ်မျိုးမျိုးကို အသုံးပြု၍ ဖြစ်စေ၊ လူကိုယ်တိုင်ဖြစ်စေ၊ စီတန်းလှည့်လည်ခြင်း၊ လှုံ့ဆော် ဆန္ဒပြခြင်း၊ ဖျက်ဆီးခြင်းနှင့် ရုန်းရင်းဆန်ခတ်မှုများကို မပြုလုပ်ရန် တားမြစ်ကြောင်း ပါရှိသည်။ မြို့နယ်အတွင်းရှိ လမ်းမကြီးများ၊ အများပြည်သူ သွားရာလမ်း၊ လမ်းသွယ်၊ လမ်းကြား၊ ဥယျာဉ်နှင့် အများပြည်သူဆိုင်နေရာများတွင် လူငါးဦးနှင့် ငါးဦးအထက် ပိုမစုရန်နှင့် ည ၁ဝ နာရီမှ မနက် ၄ နာရီအတွင်း ညမထွက်ရ အမိန့်ကိုလည်း ထုတ်ပြန်လိုက်ကြောင်း ဖော်ပြထားသည်။

ယခုအခါတွင် မိတ္ထီလာမြို့နယ် နယ်နိမိတ်အတွင်း လူ့အချို့မှာ အများပြည်သူတို့၏ လုံခြုံရေးနှင့် တရားဥပဒေ စိုးမိုးရေးကို ထိခိုက် ပျက်ပြားစေရန် ပြုမူဆောင်ရွက်နေကြောင်း တွေ့ရသည့်အတွက် ပုဒ်မ ၁၄၄ အမိန့် ထုတ်ပြန်ရခြင်းဖြစ်ကြောင်း စစ်ကောင်စီဘက်က အကြောင်းပြထားသည်။

“ပြည်သူတွေရဲ့ လုံခြုံရေးလို့ အကြောင်းပြပေမယ့် သူတို့ကိုယ်တိုင်ပဲ အဲ့ဒီလိုလုပ်နေတာ။ ကြားထဲမှာလည်း ဆိုင်ကယ် နှစ်ယောက်မစီးရဆိုပြီး အမိန့်ထုတ်တယ်။ ဒီဇင်ဘာလ ၈ ရက်တုန်းက အမှတ် (၂) ကျောင်းရှေ့မှာ ဆိုင်ကယ်ယောက်ျားလေးနှစ်ယောက်စီးလို့ဆိုပြီး ပစ်သတ်လိုက်သေးတယ်” ဟု မိထ္တီလာမြို့ခံတစ်ဦးက ပြောသည်။

စသ်ကောင်စီက ပုဒ်မ ၁၄၄ အမိန့်ကို ဖေဖော်ဝါရီလ အာဏာသိမ်းပြီးနောက်ပိုင်း တစ်နိုင်ငံလုံးက မြို့နယ်အသီးသီးတွင်ထုတ်ပြန်ခဲ့ပြီး သက် တမ်း အကြိမ်ကြိမ်တိုးခဲ့ခြင်းလည်းဖြစ်သည်။ mizzima

စစ်ကောင်စီတပ်က ပစ်ခတ်သော လက်နက် ကြီးကျည်များ ထိုင်းနိုင်ငံအတွင်းရှိ ကျရောက်ပြီး စစ်ရှောင်သက်ကြီးရွယ်အိုတစ်ဦး ဒဏ်ရာရ၊ ထိုင်းဘက်ခြမ်းသို့ စစ်တပ်လက်နက်ကြီးကျည်များ ဆက်တိုက်ကျ

ကရင်ပြည်နယ်တွင် တိုက်ပွဲများဖြစ်ပွားနေစဉ် စစ်ကောင်စီတပ်က ပစ်ခတ်လိုက်သော လက်နက်ကြီးကျည်များ ထိုင်းနိုင်ငံအတွင်းသို့ ကျရောက်ပြီး စစ်ဘေးရှောင် ကရင်တိုင်းရင်းသား သက်ကြီးရွယ်အို အမျိုးသားတစ်ဦး ဒဏ်ရာရရှိကြောင်း ထိုင်းရောက် စစ်ဘေးရှောင်များကို ကူညီပေးနေသူ AAC အဖွဲ့ မှ ဦးရဲမင်းက ပြောသည်။

“အခု ထိုင်းထဲမှာ မြန်မာဘက်က စစ်ရှောင် ၁၀၀၀ ကျော်လောက်ရောက်နေပြီ။ ကျနော်တို့ AAC က ရိက္ခာတွေ ကူညီပေးနေပါတယ်။ အဲဒါ စစ်ရှောင်စခန်းနားကို စစ်တပ်က ပစ်လိုက်တဲ့ လက်နက်ကြီးကျည်ကျတယ်။ သက်ကြီးရွယ်အို အမျိုးသားတစ်ဦး ဒဏ်ရာရပါတယ်။ အခုက စစ် တပ်က အတော်ကြီးကို ရမ်း ကား ပစ်ခတ် နေတာပါ” ဟု ဦးရဲမင်းက ပြောသည်။

ထိုင်း-မြန်မာနယ်စပ် မဲဆောက်မှ မြန်မာတချို့၏ အဆိုအရ စစ်တပ်ဘက်က ပစ်ခတ်လိုက်သော လက်နက်ကြီးကျည်များသည် မဲဆောက်နယ် စပ် ကားလမ်းဘေး အနီးသို့ ကျရောက်ပြီး မြက်ရိုင်းများ မီးလောင်နေကြောင်း၊ မီးခိုးလုံးများလည်း မြင်ရသည်ဟု ပြောဆိုကြသည်။khit thit

ပုလဲမြို့နယ် သပြေကုန်းရွာအနီး စစ်ကောင်စီယာဉ်တန်း မိုင်းဆွဲခံရ

စစ်ကိုင်းတိုင်း၊ ပုလဲမြို့နယ် သပြေကုန်းရွာ အနောက်ဘက်၌ ယာဉ်သုံးစီးပါ စစ်ကောင်စီ ခြေလျင်တပ်ကို ယနေ့ ဒီဇင်ဘာလ ၁၆ ရက် နံနက် ၈ နာရီ ၄၅ မိနစ်တွင် မိုင်းဆွဲ တိုက်ခိုက်ခဲ့ကြောင်း ပုလဲ ပြည်သူ့ကာကွယ်ရေးတပ်ဖွဲ့ (PPDF) အဖွဲ့မှ ဗိုလ်နဂါးက ပြောသည်။ ပဒေသာမိုင်း အကြီး လေးလုံး၊ တစ်ဖက်ပွင့် စိန်ပြောင်း လေးလုံးတို့ဖြင့် တိုက်ခိုက်ခဲ့သည်ဟု ၎င်းက ဆိုသည်။

“အခုထောင်တဲ့ဟာ အရင်ထက် တစ်ဆခွဲလောက် ကြီးတယ်။ တော်တော်လည်း ပြင်းတယ်။ အကြီးစားတွေ။ ရှစ်ယောက်လောက် ကားပေါ်က လွင့်သွားပြီး အောက်မှာ မလှုပ်တော့ဘူး။ ကားပေါ်မှာလည်း ဒဏ်ရာရသွားတဲ့ လူတွေ ရှိတယ်။ အသံလည်း တော်တော် ကျယ်တယ် “ဟု ဗိုလ်နဂါးက ပြောသည်။

ထိခိုက်သော ကားများကို စစ်ကောင်စီက သံကြိုးဖြင့် ဆွဲကာ ပြန်ယူသွားသည်ကို တွေ့မြင် ခဲ့ကြောင်း ၎င်းက ဆိုသည်။ ဒီဇင်ဘာလ ၁၅ ရက်ကလည်း ပုလဲမြို့နယ် ပုလဲ-ဂန့်ဂေါလမ်းပိုင်း ကုက္ကိုကုန်းရွာ အနောက်ဘက်၌ ယာဉ် ၅၄ စီးပါ စစ်ကောင်စီ ခြေလျင်တပ်ကို ဒေသခံ ပြောက် ကျားတပ်ဖွဲ့က လေးကြိမ်တိုင် မိုင်းဆွဲ တိုက်ခိုက်ခဲ့ရာ စစ်သား ၂၅ ဦး သေဆုံးကြောင်း PPDF က ထုတ်ပြန် ထားသည်။ mizzima

ရခိုင်ပြည်နယ်တွင် စစ်တပ်က လက်နက်ငယ် စမ်းသပ်ပစ်ခတ်နေသဖြင့် ဒေသခံများ စိုးရိမ်နေ

ရခိုင်ပြည်နယ်၊ ကျောက်တော်မြို့နယ်မှာ ဒီဇင်ဘာ ၁၆ ရက် ဒီကနေ့ မနက်ပိုင်းက စစ်ကောင်စီတပ်က လက်နက်ငယ်တွေ စတင်လေ့ကျင့်ပစ် ခတ်နေတဲ့အတွက် တိုက်ပွဲတွေဖြစ်မှာကို ဒေသခံတွေ စိုးရိမ်နေကြပါတယ်။ 

နှစ်ဖက်တိုက်ပွဲ အချိန်မရွေးဖြစ်ပွားနိုင်တဲ့ အနေအထားကို ရောက်ရှိနေတာကြောင့် စစ်ရေးသတိကြီးစွာနဲ့ အထူးသတိထားစောင့်ကြည့်နေပြီး ပြည်သူတွေလည်း  စစ်ရေးသတိရှိကြဖို့ ရက္ခိုင့်တပ်တော် (အေအေ)ရဲ့ သတိပေးချက်ထွက်ပေါ်လာပြီးနောက် အခုလို စစ်ကောင်စီတပ်တွေက လက်နက်ငယ်စမ်းသပ် ပစ်ခတ်နေတာ ဖြစ်ပါတယ်။

“ဒီနေ့မနက် ၈ နာရီကစပြီး ပစ်ခတ်သံတွေကြားနေရတယ်။ ရွာနဲ့တော့ ဝေးတယ်။ နီးတဲ့ရွာတွေကတော့ စိုးရိမ်နေကြတယ်”လို့ ညောင်ပင်လှကျေးရွာသားတယောက်က ဒီဗွီဘီကို ပြောပါတယ်။

ကျောက်တော်မြို့နယ်၊ အမှတ် (၉) စစ်ဆင်ရေးကွပ်ကဲမှုဌာနချုပ်က ဒီဇင်ဘာ ၁၆ ရက်နဲ့ ၁၇ ရက်မှာ  လက်နက်ငယ်လေ့ကျင့်ပစ်ခတ်မယ့်အကြောင်း  နီးစပ်ရာကျေးရွာ ၁၃ ရွာမှ  ကျေးရွာအုပ်စုတာဝန်ခံတွေကို အသိပေးအကြောင်းကြားထားတယ်လို့လည်း သိရှိရပါတယ်။

လမ်းမတော်ကျေးရွာအုပ်တာဝန်ခံက  “ဒီနေ့မနက် ၈ နာရီကတည်းက လက်နက်ငယ်တွေ စမ်းသတ်ပစ်ခတ်နေကြတယ်။ ကျနော်တို့ ကျေးရွာအုပ်စုက ရွာသူရွာသားတွေကိုတော့ ဒီနေ့နဲ့ မနက်ဖြန် တောတောင်တွေကို မသွားဖို့ အကြောင်းကြား အသိပေထားတယ်။”လို့ ပြော ပါတယ်။

စစ်ကောင်စီတပ်နဲ့ အေအေတို့အကြား တိုက်ပွဲတွေရပ်ထားတဲ့ကာလဖြစ်ပေမဲ့ လက်နက်တွေ အခုလို လေ့ကျင့်ပစ်ခတ်တာကြောင့်  ဒေသခံရွာသူရွာသားတွေ  စိုးရိမ်နေကြတာလည်း ဖြစ်ပါတယ်။

စမ်းသပ်ပစ်ခတ်မှုတွေလုပ်နေတဲ့ ခေါင်းတုတ်​ကျေးရွာမှ ဒေသခံတစ်ဦးက” ကျနော်တို့ ကျေးရွာနဲ့ဆို အနီးဆုံးပါ။ နှစ်ဖက်တပ်အချင်းချင်း နား လည်မှုယုံကြည်မှုရထားကြတယ်ဆိုပေမယ့် အခုလို လက်နက်တွေ စမ်းသပ်ပစ်ခတ်တယ် ဆိုပေမယ့် နှစ်ဖက်ပြန်ပြီးတိုက်ပွဲဖြစ်ကြမလားဆိုတာ ရွာသူရွားသားတွေက စိုးရိမ်ကြတာတော့ရှိတယ်။”လို့ပြောပါတယ်။

လက်နက်ငယ်တွေ စမ်းသတ်ပစ်ခတ်မယ့် အမှတ် (၉) စစ်ဆင်ရေးကွပ်ကဲမှုဌာနချုပ်နဲ့ အနီးတစ်ဝိုက်ရှိကျေးရွာ ၁၃ ရွာမှာ ပြီးခဲ့တဲ့ တိုက်ပွဲကာ လအတွင်းနေရပ်စွန့်ခွာရတာ မရှိခဲ့တဲ့ ကျေးရွာတွေ ဖြစ်ပါတယ်။

အဲ့ဒီကျေးရွာတွေကတော့ ညောင်ပင်လှ၊ လမ်းမတော်၊ ခေါင်းတုတ်၊ နဂရ၊ ရုပ်သား၊ စံကားတောင်၊ ဝကင်း၊ ဝင်စု၊ နိဒင်း၊ပီစိပိုက်သည်(ရခိုင်)၊ ပီစိပိုက်သည်(မွတ်ဆလင်)၊ မြင်းကြပ်၊ ပီထု ကျေးရွာတို့ ဖြစ်ပါတယ်။

စစ်အာဏာသိမ်းပြီးနောက် ဖေဖော်ဝါရီ ၁၉ ရက်ကလည်း တိုက်ပွဲဝင်ရန်အသင့်ရှိစေဖို့ မာန်အောင်ကျွန်းစခန်း၊ ကျွန်းသာယာစခန်း၊ နံ့သာကျွန်းစခန်းနဲ့ မေယုကျွန်းစခန်းတို့မှာ အမြောက်လက်နက်တွေ လေ့ကျင့်ပစ်ခတ်ခဲ့ပါတယ်။

ဒါ့အပြင်  သြဂုတ် ၂၁ ရက်မှ ၂၃ ရက်အထိ စစ်ကောင်စီရေတပ်က ရခိုင်ပင်လယ်ပြင်မှာ ၃ ရက် ကြာ လက်နက်ကြီး ပစ်ခတ်စမ်းသပ် စစ်ရေးလေ့ကျင့်ခဲ့ပါတယ်။ DVB

NLD ပါတီဝင်ကို လာရောက်ဖမ်းဆီးရာ မတွေ့၍ ၎င်း၏အစ်ကိုဖြစ်သူကို ဖမ်းဆီးသွား

ရန်ကုန်တောင်ပိုင်းခရိုင်၊ ကော့မှူးမြို့နယ် မဆယ်ဆိပ်ကျေးရွာတွင် စစ်ကောင်စီတပ်က NLD ပါတီဝင် တစ်ဦးအား လာရောက်ဖမ်းဆီးရာ မတွေ့ရှိသောကြောင့် ၎င်း၏ အစ်ကို ဖြစ်သူကို ဖမ်းဆီးသွားကြောင်း ဒေသခံများထံမှ သိရသည်။မဆယ်ဆိပ်ကျေးရွာကို ဒီဇင်ဘာလ ၁၄ ရက် ညပိုင်းတွင် စစ်ကောင်စီတပ်က စစ်ကားအသေး သုံးစီးဖြင့် လာရောက်ကာ ထိုသို့ ဖမ်းဆီးသွားခြင်းဖြစ်ကြောင်း သိရသည်။

“ ည ၁၁နာရီ ၂၀မိနစ်လောက်မှာ ရွာထဲကို စစ်ကားအသေး သုံးစီးနဲ့ စစ်ကောင်စီတပ်ဖွဲ့ဝင်တွေ ရောက်လာတယ်။ ရွာထဲက NLD ပါတီဝင် ဆိုတဲ့ ကိုမောင်မောင်ဆိုသူကို လာရှာတာ။ သူ့ကိုမတွေ့တော့ အစ်ကို ဖြစ်သူ ကိုဇော်မင်းထွန်းကို ဖမ်းသွားတယ်” ဟု ဒေသခံတစ်ဦးက ပြောသည်။

လက်ရှိအချိန်တွင် စစ်ကောင်စီတပ်က ကိုဇော်မင်းထွန်းအား မည်သည့်နေရာသို့ ဖမ်းဆီးခေါ်ဆောင်သွားသည်ကို မသိရသေးကြောင်း ၎င်းဒေ သခံက ဆက်ပြောသည်။“လာဖမ်းတဲ့သူက ရှောင်နေရတာကြာပြီ။ ဒလန်တွေသတင်းပေးလို့ လာရှာတာပါ။ အဲ့ဒီရွာက ကြံခိုင်ရေး ထောက်ခံသူတွေများတယ်။ စစ်သားအဝင်အတွက်လည်း ရှိတော့ မလိုတဲ့လူကို လက်တို့လိုက်ရင် ဖမ်းတော့တာပဲ”ဟု ကော့မှူးဒေသခံတစ်ဦးက ပြော သည်။

စစ်ကောင်စီက လာရောက်ရှာဖွေဖမ်းဆီးသည့် NLD ပါတီဝင်ဖြစ်သူ ကိုမောင်မောင်သည် လက်ရှိအချိန်တွင် ရွာမှ ထွက်ပြေးတိမ်းရှောင်နေကြောင်းလည်း သိရသည်။ထို့အပြင် ဒီဇင်ဘာလ ၁၅ ရက် နံနက်ပိုင်းကလည်း ကော့မှူးမြို့နယ် ကျိုက်ထော်ကျေးရွာသား သုံးဦးကို စစ်ကောင်စီတပ်က ဖမ်းဆီးခေါ်ဆောင်သွားကြောင်း ဒေသခံများထံမှ သိရသည်။ mizzima

မင်းအောင်လှိုင်နှင့်စစ်ခေါင်းဆောင်များကို တ ရားစွဲဆိုထားသည့် လူမျိုးတုန်းသတ်ဖြတ်မှုကို အာဂျင်တီးနား တရားရုံးက မြန်မာစံတော်ချိန် ဒီဇင်ဘာလ ၁၇ နံနက် ၀၀ နာရီ ၃၀ မိနစ်တွင် စစ်ဆေးမည်၊ မင်းအောင်လှိုင်နှင့် စစ်ခေါင်း ဆောင်များကို ဖမ်းဆီးနိုင်ရန် မျှော်လင့်

ရခိုင်ပြည်နယ်မှ ရိုဟင်ဂျာများအပေါ် လူမျိုးတုန်းသတ်ဖြတ်မှုအတွက် မင်းအောင်လှိုင်နှင့်စစ်ခေါင်းဆောင်များကို အာဂျင်တီးနားတရားရုံးတွင် မြန်မာစံတော်ချိန် ဒီဇင်ဘာလ ၁၇ ရက်နေ့ နံနက် ၀၀ နာရီ ၃၀ မိနစ်အချိန်တွင် စတင်စစ်ဆေးမည်ဖြစ်ကြောင်း ဗြိတိန်အခြေစိုက် မြန်မာရိုဟင်ဂျာအဖွဲ့က သတင်းထုတ်ပြန်သည်။

ရိုဟင်ဂျာလူမျိုးတုံးသတ်ဖြတ်မှု သမိုင်းဝင်တရားဝင်တရားစွဲဆိုမှု စတင်သည့်နေ့ အင်ဂျင်တီးနားစံတော်ချိန် ဒီဇင်ဘာ ၁၆ ရက် ကြာသပတေး နေ့ညနေ ၃ နာရီတွင် အာဂျင်တီးနားတရားရုံးတွင် မြန်မာရိုဟင်ဂျာအဖွဲ့ UK ဥက္ကဋ္ဌ ဦးထွန်းခင်က သက်သေထွက်ဆိုမည်ဖြစ်ကြောင်း သိရှိရသည်။

နိုဝင်ဘာလတွင် အာဂျင်တီးနားတရားစီရင်ရေးဌာနသည် ရိုဟင်ဂျာလူမျိုးတုံးသတ်ဖြတ်မှုနှင့်ပတ်သက်၍ မြန်မာစစ်တပ်အား တရားရုံးတွင် အမှုဖွင့်လှစ်ရန် ဆုံးဖြတ်ခဲ့ပြီး အချို့သောရာဇ၀တ်မှုများသည် အလွန်ကြောက်မက်ဖွယ်ကောင်းသော ရာဇ၀တ်မှုများဖြစ်၍ လူသားမျိုးနွယ်အပေါ် ကျူးလွန်မှုဖြစ်သည့်အတွက် Universal Jurisdictionအရ စစ်ခေါင်းဆောင်များကို မည်သည့်နေရာတွင်မဆို စွဲချက်တင်နိုင်ကြောင်း ဆုံးဖြတ်ပြီး အမှုကို လက်ခံခဲ့ခြင်းဖြစ်သည်။

မင်းအောင်လှိုင်နှင့်စစ်ခေါင်းဆောင်များကို စွဲဆိုထားသောအမှုကို အာဂျင်တီးနား ပြည်ထောင်စု တရားရုံးရှေ့တွင် အာဂျင်တီးနားဒေသစံတော် ချိန် မွန်းလွဲ ၃ နာရီတွင် တရားရေးဆိုင်ရာ စုံစမ်းစစ်ဆေးမှုများ တရားဝင် စတင်မည်ဖြစ်ကြောင်း သိရှိရသည်။ “ဒီအချိန်ဟာ တစ်ကမ္ဘာလုံးက ရိုဟင်ဂျာတွေအတွက် အထင်ကရ အခိုက်အတန့်ပါပဲ။ အာဂျင်တီးနားတရားရုံးမှာ လူမျိုးတုံးသတ်ဖြတ်မှုနဲ့ပတ်သက်ပြီး တရားဝင်စုံစမ်းစစ် ဆေးမှု စတင်တာကိုမြင်ရဖို့က တရားမျှတမှုရရှိရေး ကြိုးပမ်းမှုကို သက်သေပြရုံသာမကဘဲ တရားမျှတမှုလည်း ဖြစ်နိုင်မယ်လို့ မျှော်လင့်ပါတယ်” ဟု ဦးထွန်းခင်က ပြောသည်။

“အမှုကို လက်ခံပြီး ရက်သတ္တပတ်အနည်းငယ်အကြာမှာပဲ ကျွန်တော် ထွက်ဆိုရမယ့်အချက်က ဒီအမှုဟာ မြန်မြန်ဆန်ဆန်နဲ့ ရည်ရွယ်ချက်ရှိရှိနဲ့ ရှေ့ကို ဆက်သွားနေတယ်ဆိုတာ ပြသနေပါတယ်။ စစ်တပ်ရဲ့ ကြောက်မက်ဖွယ်ရာ ရာဇ၀တ်မှုများကို တာဝန်ခံမှု ရှိစေရန် ကူညီဆောင်ရွက်ပေးတဲ့ အာဂျင်တီးနား တရားရေးမဏ္ဍိုင်ရဲ့ ကျင့်ဝတ်ဆိုင်ရာ ဦးဆောင်မှုနှင့် ရဲစွမ်းသတ္တိက ချီးကျူးဂုဏ်ပြုရပါ့မယ်”ဟု ၎င်းက ဆက်ပြော သည်။

ဦးထွန်းခင်၏ ထွက်ဆိုချက်သည် ရိုဟင်ဂျာလူမျိုးများ၏ ကြေကွဲဖွယ် ကျူးလွန်ခံရမှုအခြေအနေများကို ပုံစံအမျိုးမျိုးဖြင့် ထင်ဟပ်စေမည်ဟု သိရှိရသည်။ ၁၉၇၈ ခုနှစ်တွင် ရခိုင်ပြည်နယ်ရှိ ရိုဟင်ဂျာများအပေါ် မြန်မာစစ်တပ်၏ ရက်စက်ကြမ်းကြုတ်သော နဂါးမင်းစစ်ဆင်ရေး စစ် ဆင် ရေးအပြီးတွင် ဦးထွန်းခင်၏မိဘများသည် လူပေါင်း ၂၀၀,၀၀၀ ခန့် ဘင်္ဂလားဒေ့ရှ်နိုင်ငံသို့ အတင်းအကျပ် ပြန်ပို့ခံခဲ့ရသူများထဲတွင် ပါဝင်ခဲ့သည်။မြန်မာနိုင်ငံရှိ ရိုဟင်ဂျာများအပေါ် ကာလရှည်ကြာ ဖိနှိပ်ခွဲခြားဆက်ဆံသည့် မူဝါဒများကို ရောင်ပြန်ဟပ်ကာ ရိုဟင်ဂျာလူမျိုးဖြစ်သော ကြောင့် တက္ကသိုလ်မတက်နိုင်ဘဲ ၁၉၉၀ ပြည့်လွန်နှစ်များတွင် ရခိုင်ပြည်နယ်မှ ထွက်ပြေးရန် တွန်းအားပေးခံခဲ့ရမှုကို ဦးထွန်းခင်ကိုယ်တိုင် ခံ စားခဲ့ရသည်။

အဆိုပါ သက်သေခံချက်သည် ၂၀၁၇ ခုနှစ်တွင် စစ်တပ်က ရိုဟင်ဂျာထောင် ပေါင်းများစွာကို သတ်ဖြတ်ခဲ့ပြီး ၈ သိန်းခန့် ဘင်္ဂလားဒေ့ရှ်နိုင်ငံသို့ ထွက်ပြေးစေခဲ့မှုများ၊ လိင်ပိုင်းဆိုင်ရာ အကြမ်းဖက်မှုများ ကျယ်ကျယ်ပြန့်ပြန့် ဖြစ်ပွားမှုများနှင့် စစ်တပ်၏လက်ရှိကျူးလွန်နေသော ရာဇ၀တ်မှုများကိုလည်း ထုတ်ဖော်ထင်ဟတ်နိုင်စေမည်ဖြစ်ကြောင်း သိရှိရသည်။

ဩဂုတ်လတွင် အာဂျင်တီးနားရှိ BROUK ၏အမှုနှင့်ပတ်သက်သည့် သီးခြားတရားရုံးကြားနာမှုတစ်ခုတွင် ယင်းအကြမ်းဖက်မှု၏သားကောင်ဖြစ်ခဲ့ရသည့် ရိုဟင်ဂျာအမျိုးသမီးခြောက်ဦးသည် ဘင်္ဂလားဒေ့ရှ်နိုင်ငံရှိ ဒုက္ခသည်စခန်းများမှ သက်သေထွက်ဆိုခဲ့ပြီးဖြစ်သည်။

“ဒါက ရိုဟင်ဂျာလူမျိုးတုံးသတ်ဖြတ်မှု အဓိက တာဝန်ရှိသူတွေကို တရားရုံးမှာ ချုပ်နှောင်ထားတဲ့ ဖမ်းဆီး နိုင်မယ်လို့ ကျွန်တော်တို့ မျှော်လင့်ထားပါတယ်။ စစ်တပ် ထိပ်ပိုင်းခေါင်းဆောင်ပိုင်း ဒီရာဇ၀တ်မှုကျူးလွန်သူတွေကို ဖော်ထုတ်ဖို့ အာရုံစိုက်သွားမှာပါ။ ရိုဟင်ဂျာတွေ သူတို့မိ သားစုတွေအပေါ် လက်တုံ့ပြန်မှာကို မကြောက်ဘဲ သတ္တိရှိရှိ သက်သေထွက်ဆိုနိုင်စေဖို့အတွက် အကာအ ကွယ်ကိုလည်း ကြိုးပမ်းသွားမှာပါ” ဟု ဦးထွန်းခင်က ပြောသည်။ khit thit

တောင်ကုတ်လူငယ်ကွန်ရက်ဥက္ကဋ္ဌကို PDF အား ထောက်ပံ့သည်ဟုစွပ်စွဲပြီး စစ်တပ်ကဖမ်းဆီး

ရခိုင်ပြည်နယ် တောင်ကုတ်မြို့မှာ တောင်ကုတ်လူငယ်ကွန်ရက်ဥက္ကဋ္ဌ ကိုမင်းကိုဦးကို PDF အားထောက်ပံ့တယ်ဆိုပြိး စွပ်စွဲကာ အရပ်ဝတ် စစ်ကောင်စီတပ်သားတချို့ ဒီဇင်ဘာလ ၁၄ ရက်နေ့ မနက်က နေအိမ်ကိုလာရောက်ပြီး ဖမ်းဆီးခေါ်ဆောင်သွားခဲ့တယ်လို့ ဖခင်ဖြစ်သူ ဦးခင်မောင်စိန်က ပြောပါတယ်။

“ကျ​နော့်သားကို ဖမ်းလာတဲ့အချိန်ကတော့ မနက် ၉ နာရီလောက်မှာပါ။ ဖမ်းဆီးဖို့လာတဲ့ သူတွေကလည်း အရပ်ဝတ်တွေနဲ့လာကြတာ။ သူတို့ပြောတာကတော့ စခန်းမှူးက စကား ၁ ခွန်း၊ ၂ ခွန်းလောက်ပြောချင်လို့ ခေါ်ဖို့လွှတ်လိုက်လို့လာတယ်ဆိုပြီး ပြောတယ်။ ကျနော်ကလည်း စ ကား ပြောချင်လို့ခေါ်ဖို့ လွှတ်လိုက်တဲ့သူတွေကလည်း လူ ခြောက်ယောက်ခုနှစ် ယောက်ရှိတယ်ဆိုတော့ သံသယဖြစ်မိလို့ သားကိုဖမ်းဖို့လာတာ နဲ့ တူတယ်ဆိုပြီးတော့ ကျနော့်သားကိုပြောတော့ သူကမဟုတ်တာ ဘာမှ လုပ်ထားတာမရှိဘူးဆိုပြီး ပြောတယ်။ ကျနော့်သားကို ဖမ်းသွားတုန်းက သူကိုင်နေတဲ့ ဖုန်းနဲ့ ကွန်ပျူတာကိုလည်း သိမ်းသွားခဲ့တယ်။ ကျနော့်သားကို ရန်ကုန်မှာတော်လှန်ရေးလုပ်နေတဲ့ အဖွဲ့အစည်းတွေကို ထောက်ပံ့တယ်လို့ စွပ်စွဲတာ၊ ပြီးတော့ ပုဒ်မ ၅၀ (ည) နဲ့ ဖမ်းတယ်” လို့ ပြောပါတယ်။

ကိုမင်းကိုဦးဟာ တောင်ကုတ်မြို့နယ် အပါအဝင် တခြားမြို့နယ်တွေက လူငယ်တွေကို အခမဲ့ ပညာသင်ကြားပေးနေသူ ၁ ဦးဖြစ်ကာ ကိုဗစ်ကာလအတွင်း တောင်ကုတ်မြို့နယ်အတွင်းက စားဝတ်နေရေးအခက်အခဲရှိသူတွေကို အလှူခံပြီး ထောက်ပံ့မှုတွေ လုပ်ဆောင်ပေးနေတဲ့ ပရဟိတ လူငယ် ၁ ဦးဖြစ်သလို သူဟာ ဘယ်အဖွဲ့အစည်းကိုမှ ထောက်ပံ့မှုမရှိတာကြောင့် မတရားစွပ်စွဲဖမ်းဆီးခံရတာလို့ ဦးခင်မောင်စိန်က ဆိုပါတယ်။

ရခိုင်ပြည်နယ်မှာ PDF နဲ့ ဆက်စပ်တယ်ဆိုပြီး စစ်ကောင်စီက သံသယနဲ့ဖမ်းဆီးထားသူ ၉ ဦးထိရှိလာပြီး သံတွဲမြို့နယ်က အမျိုးသမီး ၃ ဦး၊ အ မျိုးသား ၂ ဦး၊ မြောက်ဦးမြို့နယ်က အမျိုးသား ၁ ဦး၊ ကျောက်ဖြူမြို့နယ်က အမျိုးသမီး ၁ ဦးနဲ့ တောင်ကုတ်မြို့နယ်က အမျိုးသမီး ၁ ဦး၊ အ မျိုးသား ၁ ဦးတို့ကို ဖမ်းဆီးတရားဆွဲဆိုထားတာပါ။ DVB

အကျဉ်းထောင်များအတွင်း ဝင်ရောက်လေ့ လာရန် တောင်းဆိုမှု ထောင်အာဏာပိုင်များ ခွင့်မပြုဟု ICRC ပြော

မြန်မာနိုင်ငံ အကျဉ်းထောင်များအတွင်းရှိ အကျဉ်းသားများအား လူသားချင်း စာနာထောက်ထားမှုဆိုင်ရာ အကူအညီများ ပေးအပ်နိုင်ရေးနှင့် အကျဉ်းထောင်များအတွင်း ဝင်ရောက် လေ့လာခွင့်ရရှိရန် အကြိမ်ကြိမ် တောင်းဆိုထားသော်လည်း ထောင်အာဏာပိုင်များက ခွင့်မပြုကြောင်း အပြည်ပြည်ဆိုင်ရာ ကြက်ခြေနီ ကော်မတီ (ICRC) ကပြောသည်။မြန်မာနိုင်ငံရှိ အကျဉ်းထောင်များအတွင်း သွားရောက် လေ့လာခွင့် ကြိုးပမ်းနေမှုများနှင့် ပတ်သက်၍ ICRC ၏ ဒီဇင်ဘာလ ၁၄ ရက်နေ့ ထုတ်ပြန်ချက်တွင် ထိုသို့ထည့်သွင်း ပြောဆိုထားခြင်း ဖြစ်သည်။

အင်းစိန် အကျဉ်းထောင်အတွင်း ဒီဇင်ဘာလ ၁၀ ရက်နေ့က စစ်အာဏာရှင် ဆန့်ကျင်ရေး အသံတိတ်သပိတ် (Silent Strike) ဆင်နွှဲမှုကြောင့် နိုင်ငံရေး အကျဉ်းသားများ ပြင်းပြင်းထန်ထန် ရိုက်နှက်ခံခဲ့ရကာ လူ ၁၀၀ နီးပါး တိုက်ပိတ်ခံရပြီးနောက် အကျဉ်းထောင်အတွင်း ဝင်ရောက်ခွင့် မရသည့် အခြေအနေအပေါ် ICRC က ထုတ်ပြန်လိုက်ခြင်း ဖြစ်သည်။အကျဉ်းထောင်အတွင်း ICRC ဝင်ရောက်ခွင့် ပိတ်ပင်ထားမှုသည် အ ကျဉ်း သားများ၏ အခွင့်အရေးကို များစွာ ဆုံးရှုံးစေကြောင်း နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) တာဝန်ရှိသူတစ်ဦးက မဇ္ဈိမကို ပြောသည်။

“အခုလို ICRC အနေနဲ့ အကျဉ်းထောင်တွေကို ဝင်ရောက်လေ့လာခွင့် ပိတ်ပင်ထားတဲ့အတွက် အကျဉ်းသား တွေရဲ့ အခွင့်အရေးတွေ အများကြီး ဆုံးရှုံးရမှာ ဖြစ်ပါတယ်။ လက်ရှိ စစ်အုပ်စုကတော့ နိုင်ငံရေး အကျဉ်းသား များအား ဖိနှိပ်ရေး ယန္တရားအဖြစ် အသုံးချနေတာ ဖြစ်တဲ့အတွက် ICRC အပါအဝင် မည်သည့် အဖွဲ့အစည်းကိုမှ ဝင်ခွင့်ပြုမှာ မဟုတ်ပါဘူး” ဟု AAPP တာဝန်ရှိသူက သုံးသပ်ပြောသည်။မြန်မာနိုင်ငံတွင် COVID -19 ကပ်ရောဂါ ကူးစက်မှု စတင်ဖြစ်ပွားခဲ့သည့် ၂၀၂၀ ခုနှစ် မတ်လမှ စတင်ကာ ICRC အနေဖြင့် အကျဉ်းထောင်များအတွင်း သွားရောက်လေ့လာမှုနှင့် လူသားချင်း စာနာထောက်ထားမှုဆိုင်ရာ အကူအညီပေးရေး လုပ်ငန်းစဉ်များကို ထောင်အာဏာပိုင်များ၏ တောင်း ဆိုချက်အရ ရပ်ဆိုင်းခဲ့ရခြင်း ဖြစ်သည်။

ယင်းနောက်ပိုင်းမှစ၍ အကျဉ်းသားများအား လူသားချင်း စာနာထောက်ထားမှု အကူအညီ ပြန်ပေးနိုင်ရန် အတွက် ထောင်အာဏာပိုင်များနှင့် အဆင့်ဆင့် ဆွေးနွေးညှိနှိုင်း နေသော်လည်း အကျဉ်းထောင်အတွင်း ICRC ဝင်ရောက်ခွင့်ကို ထောင်အာဏာပိုင်များက ပိတ်ပင်ထားဆဲ ဖြစ် သည်။

ထောင်တွင်း CVID -19 ရောဂါပိုး ကူးစက်မှု မြင့်မားခြင်းနှင့် ရောဂါကာကွယ် စောင့်ရှောက်မှု အားနည်းခြင်းကြောင့် ကျန်းမာရေး စောင့် ရှောက် မှု အပြည့်အဝပေးရန် ပြီးခဲ့သည့် ဇူလိုင်လ ၂၃ ရက်နေ့ကလည်း အင်းစိန်ထောင်တွင်း ဆန္ဒပြတောင်းဆိုမှု ပေါ်ပေါက်ခဲ့သေးသည်။ အကျဉ်းထောင်တွင်း ဝင်ရောက်ခွင့် မရသည့်အတွက် ထောင်အာဏာပိုင်များမှ တစ်ဆင့် သတင်းအချက်အလက်များ၊ ပစ္စည်း ထောက်ပံ့မှုများ၊ တစ်ကိုယ်ရေ သန့်ရှင်းမှုဆိုင်ရာ ပစ္စည်းများ၊ ပါးစပ်နှင့် နှာခေါင်းစည်းများ၊ ဆေးပစ္စည်း ကိရိယာများကို ပံ့ပိုးပေးနေကြောင်း ICRC က ဆို သည်။

ဒီဇင်ဘာလ ၁၀ ရက်နေ့ ထောင်တွင်းအသံတိတ် သပိတ်တွင်ပါဝင်၍ ရိုက်နှက်ခံထားရသော နိုင်ငံရေး အကျဉ်းသားများသည်လည်း လက်ရှိအချိန်အထိ ဆေးဝါးကုသခွင့် မရရှိသေးသည့်အတွက် ဆေးဝါးကုသခွင့် ရရှိရန် လိုအပ်ကြောင်းနှင့် အကျဉ်းသား အခွင့်အရေး အပြည့်အဝရရှိရန် လိုအပ်ကြောင်း နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) တာဝန်ရှိသူများက ပြောဆိုထားသည်။

အပြည်ပြည်ဆိုင်ရာ ကြက်ခြေနီကော်မတီ (ICRC) သည် အကျဉ်းထောင် ပြုပြင်ပြောင်းလဲရေးအတွက် အရေးပါသည့် နိုင်ငံတကာ အဖွဲ့အ စည်းဖြစ်ပြီး အကျဉ်းသားများ ရပိုင်ခွင့်နှင့် နိုင်ငံတကာ စံချိန်စံနှုန်းများနှင့် ကိုက်ညီစေရန်အတွက် သက်ဆိုင်ရာ အာဏာပိုင်များကို ဖိအားပေး တိုက်တွန်းနေသည့် အဖွဲ့အစည်း တစ်ခုလည်း ဖြစ်သည်။ mizzima

« Older Entries Recent Entries »