အရာတော်တွင် စစ်ကောင်စီက အကြောင်းမဲ့ဖမ်းဆီးသွားသော အပြစ်မဲ့ ပြည်သူ ၈ ဦးကို ပျူစောထီး ၆ ဦးနှင့် ပြန်လည်လဲလှယ်ကာ ကယ်တင်နိုင်ဟုဆို
စစ်ကိုင်းတိုင်း အရာတော်မြို့နယ်၊ မင်းရွာကြီးအနီးတွင် အပြစ်မဲ့ရွာသား ၈ ဦးကို အကြမ်းဖက်စစ်ကောင်စီက အကြောင်းမဲ့ ဖမ်းဆီးသွားပြီး ပြည်သူ့ကာကွယ်ရေးတပ်ဖွဲ့ဝင်များက ဖမ်းဆီးထားသော ပျူစောထီး ၆ ဦးနှင့် ပြန်လဲလှည်ကာ ရွာသားများကို ကယ်ထုတ်နိုင်ခဲ့ကြောင်း ဒေသသတင်းရင်းမြစ်များထံမှ သိရှိရသည်။
အရာတော်မြို့နယ်၊ မင်းရွာကြီးအနီး ကောက်လှိုင်းစည်းများတင်ဆောင်နေသည့် ရွာသားရှစ်ဦးကို ယမန် နေ့တွင် စစ်ကောင်စီတပ်ဖွဲ့က ဖမ်းဆီးသွားရာ ဒေသခံကာကွယ်ရေး မဟာမိတ်တပ်ပေါင်းစုက ဖမ်းဆီးထားသည့် ပျူစောထီး ၆ ဦးနှင့်လဲလှယ်ကာ ယနေ့ ဒီဇင်ဘာလ ၁၉ ရက်တွင် ပြန်လည်ကယ်တင်နိုင်ခဲ့ကြောင်း သိရှိရသည်။
“သူတို့(အကြမ်းဖက်စစ်တပ်)က ပါးရိုက်တယ်၊ ဖိနပ်နဲ့ကန်တယ်၊ အဲ့နားက စီးပွားဖြစ် စိုက်ထားတဲ့ ဒန့်သလွန် ခင်းရှိတယ်ဗျ၊ တစ်ယောက်ကို ၁၅ပင်ခုတ်ခိုင်းတယ်၊ အခင်းပိုင်ရှင်က စခစစ်ကြောင်းထိုးလာတယ် သတင်းပေး လို့ဆိုတဲ့စွပ်စွဲချက်နဲ့ ဖျက်ဆီးခိုင်းတယ်၊ လက်ပြန်ကြိုးတုပ်ပြီး ကန်နီတောဘက်ကို ခြေလျင်လျှောက်ခိုင်းပြီး ဖမ်းသွားတာပါ”ဟု ဖမ်းဆီးခံရသူ တစ်ဦးက ဒေသသတင်းရင်းမြစ်သို့ ပြောဆိုသည်။
ရွာသားများဖမ်းဆီးခံရသည့်အတွက် ပြည်သူ့ကာကွယ်ရေးမဟာမိတ်တပ်ပေါင်းစုများက ငွေတွင်းရွာသို့ စစ်တပ် ထွက်ခွာချိန်၌ ဝင်ရောက်စီး နင်းခဲ့ပြီး ပျူစောထီးဒလန် အမျိုးသားငါးဦးနှင့် အမျိုးသမီး တစ်တစ်ဦးကို ပြန်လည်ဖမ်းဆီးခဲ့ကြောင်း၊ ငွေတွင်းရွာတွင် စစ်ကောင်စီတပ်နှင့် ပြည်သူ့ကာကွယ်ရေးမဟာမိတ်တပ်ဖွဲ့ကြား နာရီဝက်ကြာ တိုက်ပွဲဖြစ်ပွားခဲ့ကြောင်း၊ ပြည်သူ့ကာကွယ်ရေးတပ်ဖွဲ့ဖမ်းဆီးခဲ့သူများတွင် ပျူစောထီးခေါင်းဆောင်၏ ညီဖြစ်သူ ပါသောကြောင့် နှစ်ဘက်ဖမ်းဆီးထားသူများလဲလှယ်ရန် ကြိုးစားခဲ့ကြပြီး ဒီဇင်ဘာ ၁၉ရက် နံနက်ပိုင်းတွင် ညှိ နှိုင်းမှု အဆင်ပြေ၍ လဲလှယ်ခဲ့ကြောင်း စစ်ကိုင်းတိုင်းသတင်းမှန်ပြန်ကြားရေးက ရေးသားဖော်ပြသည်။ khit thit
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 