ပရဟိတဆရာဝန် သေဆုံးခဲ့သည့် ဗုံးခွဲမှု ပြင်း ထန်စွာ ရှုတ်ချကြောင်း ကျောက်ဆည် PDF ထုတ်ပြန်
မန္တလေးတိုင်း၊ ကျောက်ဆည်မြို့ပေါ် ဗုံးပေါက်ကွဲမှု ဖြစ်စဉ်တွင် ပရဟိတ ဆရာဝန် အပါအဝင် အပြစ်မဲ့ပြည်သူ သုံးဦး သေဆုံးခဲ့ရမှုနှင့် ပတ် သက်၍ Kyaukse People Defense Force (KPDF) က ပြင်းထန်စွာ ရှုတ်ချကြောင်း ယနေ့ ဇန်နဝါရီလ ၂ ရက်တွင် သတင်းထုတ်ပြန်သည်။
ပရဟိတဆရာဝန် ဒေါက်တာလှိုင်းဇော်ညွန့် အပါအဝင် အပြစ်မဲ့ ပြည်သူ ၃ ဦးသည် ကျောက်ဆည်မြို့ ဈေးတန်းရပ်၊ မြို့မဈေးတောင်ဘက် ဒေါ်သိုက်ကြီးကွေ့အနီး၊ စိုပြေ ဓာတ်မြေသြဇာဆိုင်နှင့် မျက်နှာချင်းဆိုင်ရှိ ထမင်းဆိုင်အနီး ဒီဇင်ဘာ ၃၁ ရက် ဗုံးပေါက်ကွဲမှု ဖြစ်စဉ်တွင် ဒဏ်ရာ ပြင်းထန်စွာရရှိပြီး သေဆုံးခဲ့သည်။
ထိုပေါက်ကွဲမှု ဖြစ်စဉ်နှင့် ပတ်သက်၍ ဒေသခံများကြား ဝေဖန်မှု မြင့်တက်လျက်ရှိရာ၊ ဒေသခံ ပြည်သူ့ ကာကွယ်ရေး အဖွဲ့ ဖြစ်သည့် KPDF က ၎င်းတို့ လုပ်ဆောင်ခြင်း မဟုတ်ကြောင်း သတင်းထုတ်ပြန်သည်။ဖောက်ခွဲမှုကို ပြည်သူ့ကာကွယ်ရေးတပ်ဖွဲ့များ လုပ်ဆောင်သယောင် ပြည်သူများကြားတွင် ဝါဒဖြန့် ဖော်ပြမှုများ ရှိနေသည့် အတွက် KPDF က ထုတ်ပြန်ခြင်း ဖြစ်သည်။ ပြည်သူ့ကာကွယ်ရေး တပ်ဖွဲ့များသည် ပြည်သူ ထိခိုက်နိုင်သည့် တိုက်ခိုက်မှုများ လုပ်ဆောင်မည် မဟုတ်ကြောင်း၊ ယခု ဗုံးခွဲမှုကို ကျောက်ဆည် ကိုယ်စားပြု ပြည်သူ့ကာကွယ်ရေးတပ်ဖွဲ့များက လုပ်ဆောင်ခြင်း မဟုတ်ကြောင်း ထုတ်ပြန်ချက်က ဆိုသည်။
“ပေါက်ကွဲမှု ဖြစ်တဲ့နေရာက စစ်သားတွေ ရှိတဲ့နေရာ စစ်သားတွေ သွားလာတတ်တဲ့ နေရာလည်း မဟုတ်ဘူး၊ ဒေါက်တာ့အိမ်နား တမင်ရည် ရွယ်ချက်ရှိရှိနဲ့ ဖောက်ခွဲသွားတာပါ၊ ပရဟိတ ဆရာဝန်တစ်ယောက် သူရဲကောင်း တစ်ယောက်လို ကျဆုံးသွားတာပါ” ဟု မြို့ခံတစ်ဦးက သုံး သပ်သည်။
ဒေါက်တာလှိုင်းဇော်ညွန့်သည် ၈၈ ငြိမ်းချမ်းရေးနှင့် ပွင့်လင်းလူ့အဖွဲ့အစည်း (ကျောက်ဆည်) တွင် ပါဝင်သူလည်း ဖြစ်သည်။မြို့မိ မြို့ဖ ဒေသခံ တစ်ဦးကလည်း “ဒေါက်တာလှိုင်းက ပြည်သူနဲ့ နီးစပ်တဲ့ ပရဟိတ ဆရာဝန်ပါ၊ သူ့ကို သတ်ချင်လောက်အောင် မုန်းတီးတဲ့လူဆိုတာ ပျူစောထီးနဲ့ စကစ (စစ်ကောင်စီ) တွေလောက်ပဲရှိမယ်၊ တစ်မြို့လုံးလည်း အခု အရမ်းဝမ်းနည်းနေကြတယ်၊ နှမြောတာပေါ့ဗျာ” ဟုပြောသည်။mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 