Monthly Archives: Jan 2022

တောင်သာတွင် စစ်ကောင်စီတပ်၏ ဖမ်းဆီးရိုက်နှက် ညှင်းဆဲခံရသူ ပျောက်ဆုံးနေ

မန္တလေးတိုင်း၊ တောင်သာမြို့နယ်၌ စစ်အာဏာသိမ်းမှု ဆန့်ကျင်သည့် သပိတ်စစ်ကြောင်းတွင် ရှေ့ဆုံးမှ အလံကိုင်ခဲ့သူ ကိုသိန်းစိုး(ခ) သန်းစိုး အား ပုဒ်မ ၅၀၅(က) ဖြင့် ဝရမ်းထုတ်ခဲ့ပြီးနောက် စစ်ကောင်စီတပ်က ဖမ်းမိခဲ့ရာ အဝတ်များချွတ်၍ ရိုက်နှက် ညှင်းဆဲခံခဲ့ရပြီး အဆက် အ သွယ် မရတော့ကြောင်း ဒေသခံများထံမှ သိရသည်။

တောင်သာမြို့မ ရဲစခန်းက ဇွန်လတွင် ဖမ်းဝရမ်းထုတ်သဖြင့် ရှောင်တိမ်းနေသည့် ကိုသိန်းစိုး(ခ) သန်းစိုးသည် ပြီးခဲ့သည် လပိုင်းက နေရပ်သို့ ပြန်နေထိုင်ခဲ့ရာ ဒီဇင်ဘာလ ၂၆ ရက် ည ၁၁ နာရီတွင် တောင်သာမြို့နယ် ကျောင်တစ်လုံးဆည်လမ်း၌ ဖမ်းဆီးခံခဲ့ရခြင်း ဖြစ်ကြောင်း ၎င်းနှင့်နီးစပ်သူ ဒေသခံက မဇ္ဈိမကို ပြောသည်။

“အဲ့ဒီနေ့ည ၈ နာရီလောက်က ငါးမျှားပြီး အပြန် သူ့သူငယ်ချင်းနဲ့ အိမ်ပြန်တာ စစ်ကားနဲ့ တိုးတော့ နောက်ပြန်လှည့်တာ ဆိုင်ကယ်က ချိန်းကြိုးပြတ်တော့ အရှိန်နဲ့ သတိလစ်‌သွားတာ၊ သူ့သူငယ်ချင်းက သူ့ကို ထမ်းပြေးတာ တောထဲထမ်းပြီး ဆက်မပြေးနိုင်တော့ သူ့ကို ကျင်းထဲမှာ သစ် ကိုင်းအခက်တွေ ဖုံးအုပ်ပြီး ထားခဲ့တာ ည ၁၁ လောက်မှ မိသွားတယ်။

မြို့နယ်ဆေးရုံမှာ ထားပြီး ၂၇ ရက်ည မျက်နှာနဲ့ ကိုယ်မှာ ညိုမဲဒဏ်ရာတွေနဲ့၊ ဒီလိုအရမ်းအေးတဲ့ ရာသီမှာ လူမဆန်စွာ ကိုယ်တုံးလုံးချွတ်ပြီး ရိုက်နှက်တာမျိုး လုပ်နေတယ်။ နောက်ရက်တော့ ဘယ်ကိုခေါ်သွားမှန်း မသိရဘူး၊ သေလား ရှင်လားလဲ မသိရဘူး” ဟု ၎င်းကပြောသည်။

အသက် (၂၈) နှစ်အရွယ် ကိုသိန်းစိုး (ခ)သန်းစိုးသည် တောင်သာမြို့နယ် အမှတ်(၁) ရပ်ကွက်တွင် နေထိုင်၍ ဆိုင်ကယ် ရေဆေး ဆီလိုက် လုပ် ကိုင်သူ ဖြစ်သည်။ ၎င်းအား ဖမ်းမိပြီးနောက် စစ်ကောင်စီတပ်၏ ရန်ကိုကြောက်၍ မိခင်နှင့် အစ်မဖြစ်သူ ရှောင်တိမ်းနေရကြောင်း ဒေသခံများကဆို သည်။

၎င်းအား ဖမ်းဆီးပြီးနောက် ဒီဇင်ဘာ၂၈ ရက်နေ့တွင် မြို့နယ် စစ်ကောင်စီက တောင်သာမြို့နယ် တစ်ခုလုံးအား အိမ်ထောင်စုဇယားနှင့် လူတိုက်စစ်၍ ဇယားထဲမရှိသူများကို သတ်မှတ်ရက်အတွင်း အမြန်ပြန်လာရန်နှင့် ပြန်မလာပါက မိသားစုဝင်များအား ဖမ်းဆီးခြင်း၊ နေအိမ်ကို ချိပ်ပိတ်ခြင်းများ ပြုလုပ်မည်ဟု ခြိမ်းခြောက်ကြောင်း ဒေသခံများ၏ အဆိုအရ သိရသည်။ mizzima

မြစ်ကြီးနား-ပူတာအို၊ ဆွမ်ဘရာဘွမ်- ပူတာအိုလမ်းပိုင်း ခရီးသွားများကို သတိပေးချက်ထုတ်ပြန်

ကချင်ပြည်နယ်အတွင်း မြစ်ကြီးနား-ပူတာအို၊ ဆွမ်ဘရာဘွမ်- ပူတာအို ကားလမ်းပိုင်းတွေကို ဇန်နဝါရီ ၅ ရက်နေ့ကစ ခရီးသွားပြည်သူတွေ  မသွားလာကြဖို့ ပူတာအိုခရိုင် ပြည်သူ့ကာကွယ်ရေးတပ်ဖွဲ့က ဇန်နဝါရီ ၂ ရက်မှာ အသိပေးထုတ်ပြန်ထားပါတယ်။

မြစ်ကြီးနား-ပူတာအို၊ ဆွမ်ဘရာဘွမ် နဲ့ ပူတာအို လမ်းပိုင်းတွေမှာ ဇန်နဝါရီ ၅ ရက်ကစပြီး ညနေ ၅ နာရီကနေ မနက် ၆ နာရီအထိ ခရီးသွားပြည် သူတွေကို သွားလာခွင့်မပြုဘူးလို့ ဆိုပါတယ်။

ဒါ့အပြင် ယာဉ်တွေမှာ စစ်နဲ့ပတ်သက်တဲ့ ပစွည်းတွေ သယ်ဆောင်တာနဲ့ မူးယစ်ဆေးဝါးသယ်ဆောင် ရောင်း၀ယ်ဖောက်ကားတာ လုံး၀မလုပ်ကြဖို့၊ ယာဉ်တန်းတွေ အမိုးဖ္ငင့်မောင်းဖို့နဲ့ ခရီးသည်ကားတွေ မှန်ချဖို့ အချက်တွေ အသိပေးချက်မှာ ဖော်ပြထားပါတယ်။

အသိပေးထုတ်ပြန်ချက်တွေကို ခရီးသွားပြည်သူတွေအနေနဲ့ လေးစားလိုက်နာပေးဖို့နဲ့ လိုက်နာမှု မရှိပါက ဖြစ်ပေါ်လာမယ့် ပြဿနာတွေကို လုံး၀ တာ၀န်ယူမှာမဟုတ်ဘူးလို့ ဖော်ပြထားပါတယ်။

ပူတာအိုခရိုင် ပြည်သူ့ကာကွယ်ရေး တပ်ဖွဲ့အနေနဲ့ ဒီဇင်ဘာ ၂၉ ရက်ညမှာ ဆွမ်ဘရာဘွမ်ကနေ ပူတာအိုဘက်ကို စစ်အင်အားဖြည့်ဖို့ စစ်ရေးလှုပ်ရှားလာတဲ့ စစ်ကောင်စီစစ်ကား ၂ စီးကို တိုက်ခိုက်ခဲ့ပြီး စစ်ကောင်စီဘက်က ၂၃ ဦး ကျဆုံးခဲ့တယ်လို့ ဆိုပါတယ်။

စစ်ကောင်စီက အာဏာသိမ်းပြီး‌နောက်ပိုင်းမှာ ကချင်ဒေသ နေရာအနှံ့အပြားမှာ တိုက်ပွဲတွေ ပြင်းထန်နေပြီး ပူတာအိုခရိုင်မှာလည်း စစ်ကောင်စီနဲ့ KIA၊ ပူတာအို PDF တို့ အကြား တိုက်ပွဲမကြာခဏဖြစ်နေပါတယ်။ DVB

သင်္ကန်းကျွန်း ဇဝနလျှပ်စစ်ရုံးအတွင်း ဗုံးပေါက်ကွဲ

ရန်ကုန်တိုင်းဒေသကြီး သင်္ကန်းကျွန်းမြို့နယ်ဇ ဝနလျှပ်စစ်ရုံးအတွင်း ဗုံးပေါက်ကွဲမှု ဇန်နဝါရီ ၂ရက် နံနက် ၇နာရီခန့်က ဖြစ်ပွားခဲ့ကြောင်း ဒေ သခံများထံမှ သိရသည်။အဆိုပါ ဖောက်ခွဲမှုကို Area-21 Network အတွင်းရှိ မြို့ပြပြောက်ကြား အဖွဲ့ ဖြစ်သည့် Myanmar Defense Force – Yangonက ပြုလုပ်ခဲ့ကြောင်း ၎င်းတို့၏ Area-21လူမှုကွန်ရက်မှ ထုတ်ပြန်ထားသည်။

ယင်းထုတ်ပြန်ချက်တွင် အကြမ်းဖက်စစ်ကောင်စီအဖွဲ့ဝင် တစ်ဦးထိခိုက်ကျဆုံးနိုင်ပြီးအခြားသော ပျက်စီးမှုများ ရှိနိုင်ကြောင်း ရေးသားထားသည်ကိုလည်း တွေ့ရသည်။ ဒေသခံများ၏ ပြောဆိုချက်အရ လူထိခိုက်မှုမရှိကြောင်း သိရသည်။“ ရုံးပိတ်ရက်လည်းဖြစ် လူတွေမရှိတဲ့အချိန်လည်းဖြစ်တော့ လူထိတာမရှိတာ”ဟု အဆိုပါအနီးအနားနေထိုင်သည့်ဒေသခံတစ်ဦးက ဆိုသည်။

မီတာလာဆောင်သော ပြည်သူများ ထိခိုက်မှုကို ရှောင်ကျဉ်လိုသောကြောင့် ရုံးပိတ်ရက်ကို ရွေးချယ်ဆောင်ရွက်ခဲ့ခြင်းဖြစ်သည်ဟုလည်း Area-21ကထုတ်ပြန်သည်။သို့သော် “ အကြမ်းဖက် စစ်ကောင်စီအား ဝင်ငွေရှာဖွေပေးနေသော ဝန်ထမ်းများ နှင့် ကျည်ဆံဖိုး အခွန် ဆောင်နေသော ပြည်သူများ ထိခိုက်မှု့နှင့် အသက်အန္တရာယ်ကို လုံးဝအာမခံမည် မဟုတ်ပါ”ဟု သတိပေးထားသည်။

ပေါက်ကွဲမှုဖြစ်ပွားခဲ့သည် ဇဝနလျှပ်စစ်ရုံး အတွင်းအရှေ့ဘက်မျက်နှာစာတွင် အစောင့် စစ်သားများရှိနေပြီး အတားအဆီးအနေဖြင့် ကြိုးများသဲအိတ်များဖြင့် ကာထားသည်ကိုလည်းတွေ့ရသည်။ ထို့အပြင် လျှပ်စစ်ရုံးမျက်နှာချင်းဆိုင်တွင် သင်္ကန်းကျွန်းရဲစခန်းရှိပြီး ရဲစခန်းဘေးဘက်တွင် လေးထောင့်ကန်လမ်းမကြီးပေါ်တွင် ရဲတန်းလျားရှိသည်ကိုတွေ့ရသည်။ mizzima

တန့်ဆည်မြို့နယ်က ကာပေါင်းကျရွာသို့ စစ်ကောင်စီတပ်က (၁၀) ကြိမ်မြောက်ဝင်ရောက်ကာ နေအိမ်များကို မီးရှို့နေ

စစ်ကိုင်းတိုင်း၊ တန့်ဆည်မြို့နယ်၊ ကာပေါင်းကျကျေးရွာတွင် တပ်စွဲကာ နေအိမ်များကို မီးတင်ရှို့နေသော စစ်ကောင်စီတပ်ဖွဲ့ ဇန်နဝါရီလ ၂ ရက် ယနေ့ မွန်းတည့်ချိန်တွင် တန့်ဆည် PDF တပ်ရင်း ၇ K.P.K နှင့် T.S.R အဖွဲ့တို့က မိုင်း ၃ လုံးခွဲ တိုက်ခိုက်ခဲ့ပြီး စစ်ကောင်စီတပ်သား ၇ ဦးသေ ဆုံးကြောင်းနှင့် စစ်သားအလောင်းများအား ရွာအတွင်း၌ပင် မီးပုံရှို့နေကြောင်း K.P.K အဖွဲ့ထံမှ သိရှိရသည်။

“အဝေးထိန်း မိုင်း ၃ လုံးခွဲတာ ၇ ယောက် သေတယ်၊ ကာပေါင်းကျ အရှေ့ပိုင်း ရွာလယ်မှာ ၁ လုံး၊ အရှေ့ပိုင်းနဲ့ အနောက်ပိုင်းကြား ကျောင်းမကျောင်းနားမှာ ၂ လုံး ခွဲပြီး တိုက်ခိုက်တာ၊ လဲသွားတဲ့ကောင်တွေက သေနတ်တောင် ပြန်မပစ်နိုင်ဘူး၊ သေတဲ့စစ်သားတွေကို ရွာထဲမှာပဲ သူတို့က မီးပုံရှို့လိုက်တယ်” ဟု တန့်ဆည် PDF တပ်ရင်း ၇ တပ်ဖွဲ့ဝင်တစ်ဦးက ရန်ကုန်ခေတ်သစ်သတင်းဌာနသို့ အတည်ပြုပြောဆိုသည်။

ယခုတိုက်ခိုက်မှုသည် ကျဆုံးရဲဘော် ကိုမျိုးချစ်ဆန်းအတွက် သွေးကြေးဆပ်ခြင်းဖြစ်ကြောင်း တန့်ဆည် PDF တပ်ရင်း ၇ ထံမှ သိရှိရသည်။ကာပေါင်းကျရွာအတွင်း တပ်စွဲထားသော အကြမ်းဖက်စစ်ကောင်စီက မီးရှို့ဖျက်ဆီးမှုကြောင့် ဆန်စက် ၁ လုံးအပါအဝင် နေအိမ် ၁၅ လုံးခန့် မီးလောင်ပျက်စီးထားပြီဖြစ်ကြောင်း တန့်ဆည် PDF တပ်ရင်း ၇ က ပြောသည်။ khit thit

ကြံကြိတ်ရာသီဖြစ်သော်လည်း ပြည်တွင်းသ ကြား စျေးကောင်းရနေ

ပုံမှန်ကြံကြိတ်ရာသီတွေမှာ  ပြည်တွင်းသကြားစျေး ကျဆင်းတတ်ပေမဲ့ အခုရာသီမှာတော့ ပြည်တွင်း သကြား စျေးကောင်းရရှိနေပါတယ်။

နှစ်စဥ် ဒီဇင်ဘာ၊ ဇန်န၀ါရီနဲ့ ဖေဖော်၀ါရီလတွေက ကြံကြိတ်တဲ့ ရာသီတွေ ဖြစ်တဲ့အတွက် စျေးကွက်ကို သကြားအသစ်၀င်ရင် စျေးနှုန်းကျလေ့ရှိပါတယ်။

အခုအခါမှာ ဗီယက်နာမ်နိုင်ငံက မြန်မာ့သကြားကို ၀ယ်ယူမှုရှိနေတာ၊ ပြည်ပသကြားစျေးနဲ့ဒေါ်လာစျေး မြင့်နေတာကြောင့် ပြည်တွင်းကို သ ကြားတင်သွင်းမှု နည်းလာတာ၊ သကြားတင်သွင်းရာမှာ ကန့်သတ်ချက်တွေ များလာတာ စတဲ့အချက်တွေကြောင့် ပြည်တွင်းသကြားစျေးက ကျဆင်းမသွားဘဲ စျေးဆက်မာနေတယ်လို့ သကြားလုပ်ငန်းရှင်တွေက  ပြောပါတယ်။

လုပ်ငန်းရှင် တစ်ဦးက “ပြည်တွင်းသုံးစွဲမှုနည်းနည်းလျော့သွားတော့ သကြားစျေးကို ကျမယ်ထင်ထားတာ။  ဒါပေမဲ့ ပြည်တွင်း သကြားစျေးက ပုံမှန် ဒီအချိန်အေးနေကျဆိုပေမဲ့ ဒီနှစ်ပုံမှန်အတိုင်းပဲ စျေးက ဆက်မာနေတယ်” လို့ ပြောပါတယ်။

ပြည်ပသကြားစျေးမြင့်တက်နေပြီး တင်သွင်းမှုနည်းလာတာကြောင့် လက်ရှိမှာ ပြည်တွင်းက သကြား ကုန်ကြမ်းသုံးစွဲတဲ့ လုပ်ငန်းအချို့က ပြည်တွင်းသကြားကိုသာ  ၀ယ်ယူအသုံးပြုလာကြတယ်လို့ သိရပါတယ်။

ပြီးခဲ့တဲ့နှစ်မှာ ပြည်တွင်းသကြားစျေး တစ်ပိသာကို ကျပ် ၉၀၀ ၀န်းကျင်သာရှိခဲ့ပြီး အခုနှစ်မှာ သကြားစျေး တစ်ပိသာကို ၁၈၀၀ ကျပ် ၀န်းကျင်ထိစျေးရရှိနေပါတယ်။ 

သကြားစက်တွေကလည်း အခုနှစ်မှာ ကြံတစ်တန်ကို စက်ရုံအရောက်ကျပ် ၅၅၀၀၀ ကနေ ကျပ်၆၀ဝ၀ဝ ကျော်အထိ ပေးကာ ၀ယ်ယူခဲ့ကြပြီး၊ ဒီစျေးကတောင်သူ တွက်ခြေကိုက်တဲ့ စျေးနှုန်းဖြစ်ပါတယ်။

အရည်အသွေးနဲ့ ထုတ်လုပ်မှုစရိတ်မြင့်တဲ့အတွက် ပြည်တွင်းသကြားစက်တွေက လုံလောက်အောင် မထုတ်လုပ်နိုင်တဲ့ လုပ်ငန်းသုံးသကြား (Refined Sugar) တွေကို ပြည်တွင်းက လုပ်ငန်းတွေရဲ့ လိုအပ်ချက်အရ ပြည်ပကနေ စိစစ်ပြီး တင်သွင်းခွင့်ပြုထားတာပါ။

လုပ်ငန်းသုံး သကြားတင်သွင်းရာမှာ မြန်မာနိုင်ငံရင်းနှီးမြှုပ်နှံမှုကော်မရှင်(MIC)ရဲ့ ခွင့်ပြုချက် ရယူ တင်သွင်းရမယ်လို့ မကြာသေးခင်က ကော်မရှင်က သတ်မှတ်လိုက်ပါတယ်။

အဲဒီလိုသတ်မှတ်လိုက်တာဟာ မလိုအပ်ဘဲ သကြားတင်သွင်းမှုကို လျှော့ချနိုင်ဖို့နဲ့၊ ပြည်တွင်းထွက်တဲ့ သကြားကို ဦးတည်သုံးစွဲလာအောင် ရည်ရွယ်တာလို့ ကုန်သည်လုပ်ငန်းရှင်တွေက သုံးသပ်ကြပါတယ်။

မြန်မာနိုင်ငံက လုပ်ငန်းသုံးအတွက် သကြားတွေကို ထိုင်းနဲ့အိန္ဒိယနိုင်ငံတို့က တင်သွင်းနေပါတယ်။ ဒါပေမဲ့ ထိုင်းနယ်စပ်ကနေ ပြည်တွင်းကို တရားမ၀င်မှောင်ခို ၀င်ရောက်လာတဲ့ သကြားတွေကြောင့် ပြည်တွင်း သကြား ထုတ်လုပ်တဲ့လုပ်ငန်းတွေနဲ့ ကြံစိုက်တောင်သူတွေအပေါ် ထိ ခိုက်နစ်နာမှုတွေ ရှိခဲ့ပါတယ်။ DVB

ကျွန်းစုမြို့နယ်တွင် မူးယစ်ဆေးဝါးလက်ဝယ် ဖမ်းဆီးရမိသော်လည်း ပိုင်ရှင်မဲ့အဖြစ်ပြုလုပ်

တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ် ကံမော်ကျေးရွာအုပ်စုရှိ မြေနီတောင်ကျေးရွာတွင် ယမန်နေ့ ဇန်နဝါရီလ ၁ ရက်နေ့က မူးယစ်ဆေးဝါးများ ရောင်းဝယ် ပြုလုပ်နေသည်ဟု သတင်း ထွက်နေသည့် နေအိမ်အား စစ်ကောင်စီ တပ်ဖွဲ့ဝင်များမှ ဝင်ရောက် ဖမ်းဆီးရာ လက်ဝယ် ဖမ်းဆီးရမိခဲ့ကြောင်း ယင်းကျေးရွာနေ ဒေသခံများထံမှ သိရသည်။

မြေနီတောင်ကျေးရွာရှိ အမျိုးသမီးတစ်ဦး၏ နေအိမ်ကို စစ်ဘက်ဆိုင်ရာလုံခြုံရေးတပ်ဖွဲ့(စရဖ)မှ လှမျိုးချစ် ဆိုသူတို့ အဖွဲ့က ဝင်ရောက်ရှာဖွေ စစ်ဆေးစဥ် ၎င်းနေအိမ် အတွင်း WY စာတန်းပါ စိတ်ကြွရူးသွပ်ဆေးပြား ၁၂,၀၀၀ ပြားကို ဖမ်းဆီး ရမိသော်လည်း ငွေကြေးယူပြီး ပိုင်ရှင်မဲ့ အ ဖြစ် ပြုလုပ်ပေးခဲ့သည်ဟု ဒေသခံများ ထံမှ သိရသည်။

မြေနီတောင်ကျေးရွာနေ ဒေသခံ တစ်ဦးက” နေအိမ်ထဲကို သူတို့ ဝင်ဝိုင်း ဖမ်းတဲ့ အခါမှာ မူးယစ်ဆေးဝါးတွေ လက်ဝယ် ဖမ်းဆီး ရမိပါတယ် ။ ဒါပေမဲ့ စရဖက ငွေတောင်းပြီး ပိုင်ရှင်မဲ့ အဖြစ် သက်သေ ဖျောက်လိုက်တယ်”ဟု ပြောသည်။ လက်ရှိတွင် လက်ဝယ် ဖမ်းဆီးရမိသူ အမျိုးသ မီးကို ဖမ်းဆီး အရေးယူ ထားခြင်း မရှိသည့် အပြင် ကျေးရွာ အုပ်ချုပ်ရေးမှူးများကိုပါ နုတ်ပိတ်ခိုင်း ထားသည့် သတင်းများထွက်နေကြောင်း ဒေသခံက ပြောသည်။ mizzima

ကျောက်တော် ဝါးတောင်စစ်ဘေးရှောင်စခန်းတွင် နေအိမ်အချို့ပြုပြင်ရန် လိုအပ်နေ

ရခိုင်ပြည်နယ်၊ ကျောက်တော်မြို့နယ်ရှိ ဝါးတောင်စစ်ဘေးရှောင်စခန်းမှာ ဒုက္ခ သည်နေအိမ်တချို့ ပြုပြင်ဖို့ လိုအပ်နေပါတယ်။

စစ်ဘေးရှောင်တစ်ဦးဖြစ်သူ မလှဦးက “ကျမတို့ ဒီမှာရောက်နေတာ သုံးနှစ်ကျော်နေပါပြီ။ ရောက်ကတည်းက တာပေါ်လိပ်တွေနဲ့ဖြစ်သလိုနေလာတာပါ။ ခုက တချို့နေအိမ်တွေက ပြုပြင်ဖို့လိုအပ်နေပါပြီ” လို့ ပြောပါတယ်။

ရက္ခိုင့်တပ်တော် (AA) နဲ့ စစ်တပ်အကြား ၂၀၁၈ ခုနှစ်၊ ဒီဇင်ဘာလက စတင်ဖြစ်ပွားခဲ့တဲ့ တိုက်ပွဲကြောင့် ကျောက်တော်မြို့နယ်အတွင်းကနေ ခမောင်း၊ ပြိန်းချောင်း၊ ဂင်ပိ၊ တဲဝ၊ လေကွေ့၊ င/စရိုင်းကိုင်း၊ ပညာဝ၊ ရှင်းမဝန်တောင်း စတဲ့ ကျေးရွာတွေက  စစ်ဘေးရှောင်တွေ အဲဒီစခန်းမှာ နေထိုင်နေကြတာပါ။

“ခုကနေရပ်ပြန်လို့လည်း မရသေးဘူး။ အကူအညီတွေကလည်း အရင်လိုမရောက်တော့ တအားဒုက္ခရောက်ရပါတယ်။ ဒီအနီးအနားမှာက လုပ်ကိုင်စားသောက်တာတွေကလည်း အဆင်မပြေပါဘူး” လို့ စစ်ဘေးရှောင်တစ်ဦးက ပြောပါတယ်။

အဲဒီစစ်ဘေးရှောင်စခန်းမှာ ဒုက္ခသည် တစ်ထောင်ကျော်ရှိပြီး သုံးနှစ်ကျော်ကြာလာတာကြောင့် နေအိမ်များပြုပြင်ဖို့ လိုအပ်နေတာလို့ စစ်ဘေးရှောင်တချို့က ပြောပါတယ်။

ရခိုင်မှာ ရက္ခိုင့်တပ်တော် (AA) နဲ့ အာဏာသိမ်းစစ်ကောင်စီတပ်တို့ အကြား တိုက်ပွဲတွေ ရပ်တန့်နေပေမယ့် စစ်ဘေးရှောင်အများစုမှာ နေရပ်မပြန်နိုင်ကြသေးဘဲ ဒုက္ခသည်စခန်းများမှာ အခက်အခဲပေါင်းစုံနဲ့ နေထိုင်နေကြရတာပါ။

ဂျပန်အစိုးရရဲ့ အထူးကိုယ်စားလှယ်ဆာဆာကာဝါခရီးစဥ်အတွင်း ရခိုင်ရှိ IDPs နဲ့ စစ်ဘေးရှောင်တွေအတွက် အမေရိကန်ဒေါ်လာ ၈.၅ သန်းလှူဒါန်းခဲ့ရာ စစ်ကောင်စီခန့် ပြည်ထောင်စုဝန်ကြီးတွေရဲ့ ရခိုင်ခရီးစဥ်အတွင်း စစ်ဘေးရှောင်များနေရပ်ပြန်ဖို့ ဖိအားပေးပြောဆိုတာတွေ ရှိခဲ့ပါတယ်။ DVB

သန်လျင်တွင် လူကြမ်းသရုပ်ဆောင် ကိုတင်ကို ကို စစ်တပ်က သေနတ်ဖြင့်ပစ်ခတ် ဖမ်းဆီး၊ လက်ချောင်းများပြတ်တောက်ပြီး ခြေထောက်ကျည်ဖောက်ဝင် ဒဏ်ရာကို ဆေးကုသခွင့်မပေးဘဲ ဆက်ရိုက်နှက်နေ၍ အသက်အန္တရာယ်စိုးရိမ်နေရ

ရန်ကုန်တိုင်း၊ သန်လျင်မြို့နယ်တွင် လူကြမ်းသရုပ်ဆောင် ကိုတင်ကို စစ်တပ်က ယနေ့ နံနက်ပိုင်း သေ နတ်ဖြင့်ပစ်ခတ် ဖမ်းဆီးပြီး ဒဏ်ရာကို ဆေးကုသခွင့်မပေး၍ အသက်အန္တရာယ်စိုးရိမ်နေရကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုသည်။

သန်လျင်မြို့နယ်၊ဘုရားကုန်အုပ်စု ကျောက်ရေတွင်းကွက်သစ်ရပ်၊ရုံးလမ်းဘဝလွတ်မြောက်ရေးလမ်းဆုံ၊ ရပ်ကွက်ရုံးတွင် စစ်ကောင်စီတပ်များက လူကြမ်းသရုပ်ဆောင်ကိုတင်ကို ယနေ့ နံနက် ၆နာရီခွဲအချိန်တွင် ရပ်ကွက်ရုံးအ ရှေ့ လမ်းမပေါ်၌ သေနတ်ဖြင့် ပစ်ခတ်ကြောင်း၊ ပစ် ခတ်မှုကြောင့် ကိုတင်ကို၏ လက်ချောင်းများပြတ်တောက်ခြင်း၊ခြေထောက်တွင် ကျည်ဆန်ဖောက်ဝင်ဒဏ် ရာများဖြင့် မတရားဖမ်းဆီးခံခဲ့ရကြောင်း သိရှိရသည်။

လက်ရှိတွင် ကိုတင်ကိုကို နံနက်၆နာရီခွဲမှ ယခုအချိန်ထိ လူသားချင်းစာနာမူအရ လုံလောက်သောဆေးကုသမူမပေးဘဲ ရပ်ကွက်ရုံးဘေးရှိ စာ ကြည့်တိုက်တွင် ဖမ်းဆီးချုပ်နှောင်ကာ မတရားရိုက်နှက်စစ်ဆေးနေကြောင်း ဒေသခံများထံမှ သိရှိရသည်။

“သူ့အခြေအနေက သွေးထွက်များနေတာရယ် ဆက်ရိုက်နေတာကြောင့် အ သက် အန္တရာယ်စိုးရိမ်ရပါတယ်” ဟု မိတ်ဆွေတစ်ဦးက ရန်ကုန်ခေတ်သစ်သို့ ပြောဆိုသည်။ ကိုတင်ကို(လူကြမ်းသရုပ်ဆောင်)၏အဖေဖြစ်သူနှင့်ယောက်ဖဖြစ်သူကိုလည်း စစ်တပ်က နေအိမ်မှ လာရောက်ဖမ်းဆီးသွားပြီးယခုအချိန်ထိမည်သည့်နေရာတွင်ဖမ်းဆီးချုပ်နှောင်ထားသည်ကို မသိရှိရသေးဟု ဒေသခံကဆိုသည်။khit thit

« Older Entries Recent Entries »