မန္တလေးမှာ ဆန္ဒပြသူနှစ်ဦး သေနတ်နဲ့ ခြိမ်း ခြောက်ဖမ်းဆီးခံရ
မန္တလေးမြို့မှာ စစ်အာဏာရှင်အလိုမရှိကြောင်း နေ့စဉ်နီးပါး ဆန္ဒပြနေတဲ့ အင်ဂျင်နီယာ သပိတ်စစ်ကြောင်းကို ၃၈ လမ်း၊ ၆၃ နဲ့ ၆၄ လမ်းတွေမှာ ဒီဇင်ဘာလ ၄ ရက် မနေ့ညနေက စစ်ကောင်စီရဲ့ လုံခြုံရေးတပ်ဖွဲ့ဝင်တွေက မိုးပေါ်ကိုသေနတ်နဲ့ ခြိမ်းခြောက်ပစ်ခတ်ပြီး ဖမ်းဆီးခဲ့ရာမှာ နှစ်ဦးဖမ်းဆီးခံလိုက်ရတယ်လို့ သပိတ်စစ်ကြောင်းမှာ ပါဝင်သူတွေက ပြောပါတယ်။
ဆန္ဒပြပွဲအပြီး လူစုခွဲချိန်မှာ အခုလိုဖမ်းဆီးခံလိုက်ရတာလို့ လုံခြုံရေးအရ အမည်မဖော်လိုတဲ့ သပိတ်စစ်ကြောင်းမှာ ပါဝင်သူတစ်ဦးက RFA ကို ပြောပါတယ်။“ အမျိုးသား တစ်ယောက်နဲ့ အမျိုးသမီး တစ်ယောက် ဖမ်းခံလိုက်ရတယ်။ ဆန္ဒပြပွဲပြီး လူစုခွဲချိန်မှာ အနားက ဆိုင်ထဲကနေ အရပ်ဝတ်တွေနဲ့ ထွက်လာပြီးတော့ ဖမ်းတာ။
အဲဒီနောက် သေနတ်တွေနဲ့ပစ်တယ်။ မိုးပေါ်ထောင်ပစ်တာဆိုတော့ လူတော့မထိကြဘူး။ အခုတော့ ဖမ်းခံရသူတွေ အခြေနေသိဖို့တော့ လိုက်စုံစမ်းနေကြပါတယ်”စစ်ကောင်စီတပ်ဖွဲ့ဝင်တွေက အခုလို ဖမ်းဆီးတာတွေ လုပ်နေပေမယ့် ဆန္ဒပြပွဲတွေကို ဆက်လက်လုပ်ဆောင်သွားမှာဖြစ်တယ်လို့ သူက ပြောပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ထုတ်ပြန်ချက်အရ စစ်တပ်က အာဏာသိမ်းလိုက်တဲ့ ဖေဖော်ဝါရီလ ၁ ရက်နေ့ကနေ ဒီဇင်ဘာလ ၄ ရက်နေ့အထိ ဖမ်းဆီးထိန်းသိမ်းခံထားရသူ ၈၃၈၅ ဦးရှိပါတယ်။ RFA
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 