SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ရန်ကုန်တိုင်း၊ လှည်းကူးမြို့တွင် ဧည့်စားရင်းစစ်မည်ဟု အကြောင်းပြပြောဆိုကာ စစ်ကောင်စီတပ်ဖွဲ့က အင်အားသုံး၍ လူငယ်များကို ဖမ်းဆီးခြင်းများပြုလုပ်နေကြောင်း မြို့ခံသတင်းအရင်းအမြစ်ထံမှ သိရသည်။ဇန်နဝါရီလ ၆ရက်နေ့မှ ၉ရက်နေ့အထိ မြို့နယ်အတွင်းရှိလူငယ် ကိုးဦးမှာ စစ်ကောင်စီတပ်ဖွဲ့၏ ညအချိန်ဧည့်စာရင်းစစ်မည်ဟုအကြောင်းပြပြောဆိုကာ ဖမ်းဆီးခြင်းခံလိုက်ရသည်။

လှည်းကူးမြို့နယ် ကျောင်းသားသမဂ္ဂအဖွဲ့နှင့် ဆက်စပ်မှုဖြင့် သံသယရှိ၍ မေးမြန်းစရာရှိသည်ဟုဆိုကာ ဖမ်းဆီးခေါ်ဆောင်ခြင်းနှင့် လူငယ်အချို့၏ အိမ်များကို ဧည့်စာရင်းစစ်မည်ဟုအကြောင်းပြကာ ဖမ်းဆီးခေါ်ဆောင်ခြင်းများ ပြုလုပ်သွားခြင်းဖြစ်သည်ဟု အနီးရှိသတင်းရင်းမြစ်က ပြောသည်။စစ်ကောင်စီတပ်၏ ဖမ်းဆီးခြင်း ခံရသူများမှာ လှည်းကူးမြို့နယ်၊ ရိပ်သာရပ်ကွက်​မှ ကိုချိုလေးအောင်နှင့် ၄င်း၏ ညီဖြစ်သူတို့အပြင် ကိုလွှမ်းဝေယံဟိန်း၊ မကြည်သာချို၊ ကိုဥက္ကာထွန်း၊ စျေးကြီးရပ်ကွက်မှ ကိုကိုဝင်း၊ အောင်သုခ ၅လမ်းမှ ကိုအောင်စည်သူ၊ ကိုဆင်မ၊ မြို့မရပ်ကွက်မှ ကိုရှိုင်းဘိုဘိုတို့ ဖြစ်ကြသည်။

၄င်းတို့အနက် မကြည်သာချို၊ ကိုချိုလေးအောင်နှင့် ညီဖြစ်သူတို့ကို စစ်ကောင်စီက မေးမြန်းမှုများအပြီးတွင် ပြန်လည်လွှတ်ပေးလိုက်သည်ဟု အထက်ပါသတင်းရင်းမြစ်များကပြောသည်။အသက် ၂၅နှစ်နှင့်အသက် ၂၀အရွယ်ရှိသူ ကိုချိုလေးအောင်၊၄င်း၏ညီဖြစ်သူနှင့် အသက် ၁၉နှစ်အရွယ် မကြည်သာချိုတို့ကိုဇန်နဝါရီလ ၆ရက်နေ့ညနှင့် ဇန်နဝါရီလ ၈ရက်နေ့ညတို့တွင် စစ်ကောင်စီတပ်က ဧည့်စာရင်းစစ်မည်ဟုဆိုကာ ၄င်းတို့ကို ဖမ်းဆီးခေါ်ဆောင်သွားခြင်း ဖြစ်သည်။

ဇန်နဝါရီလ ၇ရက်နေ့တွင် အသက် ၁၉နှစ်အရွယ် ကိုလွှမ်းဝေယံဟိန်းကို ကျောင်းသားသမဂ္ဂနှင့် ဆက်စပ်မှုသံသယရှိသည်ဟုဆိုကာ ဖမ်းဆီးထားသည်။ဇန်နဝါရီလ ၈ရက်နေ့တွင် အသက် ၂၀အရွယ်ရှိ ကိုဥက္ကာထွန်း ဆိုသူကိုလည်း ဧည့်စာရင်းစစ်မည်ဟုအကြောင်းပြချက်ဖြင့် စစ်ကောင်စီတပ်ဖွဲ့အင်အား ၃၀နီးပါးဖြင့် ခေါ်ဆောင်ဖမ်းသွားခဲ့သည်။

ထိုနေ့မှာပင်အသက် ၂၀အရွယ် အောင်သုခ ၅လမ်းနေ ကိုအောင်စည်သူနှင့် ကိုကိုဝင်းကိုလည်း ဖမ်းဆီးသွားခဲ့ခြင်းဖြစ်ပြီး လက်ရှိအချိန်ထိ အဖမ်းခံထားရဆဲဖြစ်သည်။ မည်သည့်သံသယနှင့် ဖမ်းထားကြောင်း မသိရသေးပေ။ဖမ်းဆီးခံထားသူရအချို့သည် မိသားစုဝင်များနှင့်အဆက်အ သွယ်ရရှိသော်လည်း အချို့မှာမူ အဆက်သွယ်မရရှိသေးဘဲ မည်သည့်နေရာတွင်ရှိနေသည်ကိုပင် မသိရှိရသေး၍ စိုးရိမ်နေရကြောင်း အဖမ်းခံထားရသူများ၏ မိသားစုဝင်အချို့ကပြောသည်။ mizzima

အကြမ်းဖက်စစ်ကောင်စီ စကခ ၈ လက်အောက်ခံ တပ်ရင်းမှ တပ်စွဲထားသော ပိန္နဲတောစခန်းမှ ဇန်နဝါရီလ ၈ ရက်နေ့ ည ၇ နာရီတွင် ပစ်ခတ်သော လက်နက်ကြီးကျည်ထိမှန်ပြီး ဘားအံမြို့နယ်၊ အီဟယ်ရွာလေး ကျေးရွာရှိ မြေးအဖွား ၂ ဦး ဒဏ်ရာရသွားကြောင်း ကရင်အမျိုးသားအ စည်းအရုံး KNU က သတင်းထုတ်ပြန်သည်။

စစ်ကောင်စီမှ ပစ်ခတ်သော ၈၁ မမ လက်နက်ကြီးကျည်သည် အဆိုပါ မြေးအဖွားနေထိုင်သော နေအိမ်ခြေရင်းတွင် ကျရောက်ပေါက်ကွဲပြီး အသက် ၈၈ နှစ်အရွယ်အဖွားတွင် ဝမ်းဗိုက်ကျည်ထိမှန်ပြီး အသက် ၇ နှစ်အရွယ်မြေးဖြစ်သူ၏ လယ်ပင်းနှင့် ကျောတွင် ကျည်စစင် ဒဏ်ရာရခဲ့ခြင်းဖြစ်သည်။

လက်ရှိတွင် အကြမ်းဖက်စစ်ကောင်စီနှင့် ကရင်အမျိုးသားအစည်းအရုံးကြား တိုက်ပွဲများ ပြင်းထန်နေပြီး စစ်ကောင်စီပစ်ခတ်သော လက်နက် ကြီး ထိမှန်ကာ KNU တပ်မဟာ ၅၊ တပ်မဟာ ၆၊ တပ်မဟာ ၁ တွင် ဒေသခံပြည်သူများ သေဆုံးမှုရှိသလို အများအပြား ဒဏ်ရာရခဲ့သည်။ khit thit

လတ်တလော တိုက်ပွဲတွေ ပြင်းထန်နေတဲ့ ကယား(ကရင်နီ)ပြည်နယ်မှာ သိန်းနဲ့ချီတဲ့ စစ်ဘေးရှောင်ပြည်သူတွေအတွက် အကူအညီတွေ အရေးတကြီးလိုအပ်နေပြီး အမျိုးသားညီညွတ်ရေးအစိုးရ (NUG) က စားနပ်ရိက္ခာ၊ အရေးပေါ်အသုံးအဆောင်ပစ္စည်း၊ ငွေသားအပါအဝင် ကျပ်သိန်း ၅၀၀ ကျော် ထောက်ပံ့ထားတယ်လို့ သိရပါတယ်။

ဒါ့အပြင် လိုအပ်ချက်အရ ညှိနှိုင်းဆွေးနွေးပြီး စဉ်ဆက်မပြတ် ဆက်လက်ထောက်ပံ့ပေး နိုင်ရေးအတွက် ကရင်နီပြည်နယ်အတိုင်ပင်ခံကောင်စီ (KSCC)၊ Coordination Team for Emergency Relief (CTER)၊ ကယား(ကရင်နီ) ပြည်နယ်လွှတ်တော်ကိုယ်စားပြုကော်မတီအဖွဲ့တွေ စတဲ့သက်ဆိုင်ရာမိတ်ဖတ်အဖွဲ့တွေ၊ နယ်မြေခံ ကူညီပံ့ပိုးသူတွေနဲ့လည်း ချိတ်ဆက် ဆောင်ရွက်နေတယ်လို့ ဆိုပါတယ်။

ကယားပြည်နယ်အတွင်းမှာ စစ်ကောင်စီတပ်တွေနဲ့ ကယားပြည်နယ် အခြေပြုလက်နက် ကိုင်တပ်ဖွဲ့တွေဖြစ်တဲ့ KDF၊ KNDF၊ GZ-21 Loikaw တပ်ဖွဲ့တို့အကြား လွိုင်ကော်မြို့ ပေါ်အထိ တိုက်ပွဲတွေပြင်းထန်လာနေတာပါ။

လွိုင်ကော်မြို့ မိုင်းလုံး၊ ပန်ကန်းနဲ့ ရွာတန်းရှည်ရပ်ကွက်တွေမှာ တိုက်ပွဲတွေ ဖြစ်ပွားနေပြီး လက်နက်ကြီးကျည် ရပ်ကွက်ထဲ ကျရောက်ပေါက်ကွဲတာကြောင့် ဒေသခံပြည်သူတွေ ထိခိုက်သေဆုံးမှုတွေလည်း ရှိနေပါတယ်။

လူဦးရေ သုံးသိန်းဝန်းကျင်သာရှိတဲ့ ကယားပြည်နယ်မှာ လက်ရှိလူဦးရေ ၁ သိန်းခွဲကျော်က စစ်ဘေးရှောင်နေကြရသလို လက်ရှိ လွိုင်ကော်မြို့ပေါ်ရပ်ကွက်တချို့ကပါ စစ် ရှောင်နေရတဲ့အတွက် ကယားပြည်နယ်မှာ ဘေးကင်းလုံခြုံတဲ့နေရာ မရှိတော့တဲ့ အနေအထားနဲ့ ရင်ဆိုင်နေပါတယ်။

ကယားပြည်နယ် တပြည်နယ်လုံးအတိုင်းအတာနဲ့ တိုက်ပွဲတွေ ဖြစ်ပွားနေတဲ့အတွက် လုံခြုံတဲ့နေရာ မရှိတော့တဲ့ အနေအထားမှာ နိုင်ငံတကာအနေနဲ့ Save Zone တခု သတ်မှတ်ပြီး လူသားချင်းစာနာမှုအကူအညီတွေပေးဖို့လည်း ကေအန်ပီပီအထွေထွေအတွင်းရေးမှူး ၂ ဦးအောင်ဆန်းမြင့်က ပြောထားပါတယ်။

၂၀၂၂ ခု ဇန်နဝါရီ ၁ ရက်မှ ဒီကနေ့အထိ ဒီးမော့ဆိုနဲ့ လွိုင်ကော်မြို့နယ်တွေမှာ ရက်ဆက် တိုက်ပွဲတွေ ပြင်းထန်နေပြီး ရပ်ကွက်နေပြည်သူတွေ ထွက်ပြေးတိမ်းရှောင်နေရတယ်လို့ စစ်ရှောင်တွေကို ကူညီပေးနေသူတွေက ပြောပါတယ်။ DVB

ချင်းပြည်နယ်၊ မတူပီမြို့နယ် လှံလှောနှင့် ကီလှုန်းကြားတွင် စစ်ကောင်စီတပ်ဖွဲ့က လမ်းပြအဖြစ် ဖမ်းဆီး ခေါ်ဆောင်သွားသူ ဒေသခံ ၁၀ဦး သတ်ဖြတ်ခံခဲ့ရကြောင်း သိရသည်။ “အဖမ်းခံရတဲ့ ရွာသားတွေကို သတ်လိုက်ပြီလို့ မြေပြင်မှာရှိတဲ့ ယုံကြည်ရတဲ့ သတင်းအရင်းမြစ် တွေဆီက သိရပါတယ်” မတူပီမြို့ခံ တစ်ဦးက ပြောသည်။

ဖမ်းဆီးခံရသူ ၁၀ဦးအနက် သုံးဦး၏ ရုပ်အလောင်းအား တွေ့ရှိခဲ့ပြီး ကျန်သူများလည်း အသတ်ခံရကြောင်း လုံလောက်သော အထောက်အ ထားများ တွေ့ရှိထားသော်လည်း ယနေ့ ဇန်နဝါရီ ၉ ရက်အထိ စစ်ရေး အခြေအနေအရ အလောင်း ရရှိခြင်း မရှိသေးကြောင်း ဆိုသည်။ မတူပီမြို့ပေါ် အခြေစိုက် စစ်ကောင်စီ ခမရ (၁၄၀) အထိုင်တပ်ရင်းမှ အင်အား ၂၀၀ ဝန်းကျင်ရှိ စစ်ကြောင်းသည် မတူပီ-ဟားခါး လမ်းမအတိုင်း ဇန်နဝါရီ ၅ ရက်မှ စတင် စစ်ကြောင်း ထိုးလာကာ ဇန်နဝါရီ ၆ ရက် နံနက်အစောပိုင်းတွင် တောတွင်း၌ စစ်ရှောင်နေသည့် ဒေသခံ ကိုးဦးကို ဖမ်းဆီးပြီး လမ်းပြစေခဲ့ခြင်း ဖြစ်သည်။

“အခု အသတ်ခံရတဲ့ထဲမှာ အသက် (၁၃) နှစ်အရွယ် လာနန်း ပါတယ်။ စစ်တပ်က အခု ကားလမ်းအတိုင်း မသွားတော့ပဲ တောလမ်း ဖြတ် လမ်း ကို သွားတဲ့အခါမှာ ရွာမှာတွေ့တဲ့ ကလေးတွေကို ဖမ်းခေါ်တော့တာပဲ။ ကလေးတွေကလည်း ကြောက်လို့ လိုက်ပို့ကြတယ်။ ပြီးတော့ ကလေး လူကြီးပါမကျန် သတ်ပစ်ခဲ့ကြတယ်”ဟု မြေပြင်ရှိ သတင်းအရင်းအမြစ် တစ်ဦးက ပြောသည်။ အသတ်ခံရသည်ဟု ယုံကြည်ရသူ များမှာ ဆလိုင်းသွီဒင်း (Salai Tui Dim)၊ ဆလိုင်း ဗန်ထူး (Salai Van Htoo)၊ ဆလိုင်း စတီဗင် (Salai Steven)၊ ဆလိုင်း လားရင်းလ် (Salai La Ring)၊ ဆလိုင်း လာနန်း (Salai La Nang)၊ ဆလိုင်းတင်စန်း (Salai Tin San)၊ ဆလိုင်း ဖူးပါးဆာလိ (Salai Phupa Sali)၊ ဆလိုင်းလျန်ငိုင် (Salai Lian Ngai)၊ ယေဇအောင် (Salai Ze Caet Aung) ဆလိုင်းထတ်လုံး (Salia Thak Lung) တို့ဖြစ်ကြောင်း သိရသည်။

အသတ်ခံရသော သူများတွင် ပါဝင်သည့် ဆလိုင်းသွီးဒင်းသည် ဒေသအခြေစိုက် ခေါ်နူးထုန် သတင်းဌာနတွင် အယ်ဒီတာအဖြစ် တာဝန်ထမ်းဆောင်ခဲ့သူ ဖြစ်သည်။ မတူပီ – ဟာခါးလမ်း တစ်လျှောက် ယမန်နေ့အထိ တိုက်ပွဲများ ဆက်လက်ဖြစ်ပွားနေပြီး ကီလှုန်း၊ ကစဲ၊ ဘွေထီယားရွာ ဒေသခံများ စစ်ဘေးရှောင် နေရကြောင်း ပြောသည်။

လက်ရှိတွင် ငလိုင်နှင့် လုံလှော်ရွာအား ချင်းကာကွယ်ရေးတပ်များ ထိန်းချုပ်ထားပြီး စစ်ကောင်စီတပ် ထယ်ဘွေ့ စစ်စခန်းအား ချင်းကာကွယ် ရေးတပ်ဖွဲ့များက ဝိုင်းဝန်း ပိတ်ဆို့ထားကြောင်း ဆိုသည်။ မတူပီမြို့နယ် အတွင်းသို့ စစ်ကောင်စီတပ်များ အင်အားဖြည့်တင်းရန် မင်းတပ်ဘက်မှ စစ်ကားအစီး ၉၀ ခန့် ထွက်ခွာလာကြောင်း ဒေသတွင်း သတင်းရင်းမြစ်များထံမှ သိရသည်။ mizzima

စစ်ကိုင်းတိုင်း ယင်းမာပင်မြို့နယ်အတွင်းရှိ အကြမ်းဖက် စစ်ကောင်စီ စစ်ကား အစီး ၅ဝကျော်ပါ ယာဉ်တန်းကို ဒေသခံပြည်သူ့ ကာကွယ်ရေးတပ်ဖွဲ့များက ဇန်နဝါရီလ ၈ရက်နှင့် ၉ရက်နေ့တို့တွင် လမ်းတလျှောက် မိုင်းဆွဲတိုက်ခိုက်ခံရပြီး စစ်သား ၂ဝ ဦးထက်မနည်းသေဆုံးကာ စစ် တပ်က ကျေးစာကျရွာ နှင့် အုံတုံပင်ကျေးရွာတို့ကို မီးရှို့ဖျက်ဆီးခဲ့ကြောင်း မုံရွာ-အမြင့်လမ်း သတင်းမှန်ပြန်ကြားရေးအဖွဲ့က တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ဇန်နဝါရီလ ၈ရက်နေ့တွင် ယင်းမာပင်ဘက်မှ ထွက်လာသည့် အကြမ်းဖက် စစ်ကောင်စီ စစ်ကား အစီး ၅ဝကျော်ပါ ယာဉ်တန်းကို ဖိုဝင်တောင်လမ်းဆုံ အရှေ့ဘက် အင်ကြင်းတောင်လမ်းခွဲတွင် ချင်းတွင်းရိုးမ မဟာမိတ်တပ်ပေါင်းစု အဖွဲ့ဝင် ဆားလင်းPDFမှ မိုင်းဆွဲ တိုက်ခိုက်ခဲ့ရာ စစ်ကား ၄ စီးထိပြီး စစ်သား ၁၅ဦးခဲ့ကြောင်း သိရသည်။

အဆိုပါ ကားတန်းသည် တည်ပင်ကန်၌ ညအိပ်ပြီး ဇန်နဝါရီလ ၉ရက်နေ့တွင် ယင်းကားတန်း ပြန်လည်ထွက်ခွာလာစဉ် ၁၆ကုတင်နားအရောက်တွင် ဆားလင်း PDFမှ မိုင်းဆွဲ တိုက်ခိုက်ခဲ့ပြီး ကား၃စီးထိမှန်ခဲ့ကာ သေဆုံးမှု အရေအတွက်းမသိရှိသေးဘဲ ထို စစ်ကောင်စီ ယာဉ်တန်းမှာ ပြန်လည်ထွက်ခွာလာပြီး ဒုံးတောရွာရောက် ယမားတံတားအဝင်၌ မိုင်းထောင်ထားတာသည်ကို သွားရောက်ဖြုတ်ယူသည့် စစ်သား ၃ဦးကို မိုင်းကွင်းထဲ အရောက်တွင် မိုင်းဆွဲလိုက်ခြင်းကြောင့် စစ်သား ၃ဦးထပ်မံသေဆုံးခဲ့ကြောင်း မုံရွာ-အမြင့်လမ်း သတင်းမှန်ပြန်ကြားရေးအဖွဲ့က တာဝန်ရှိသူ တစ်ဦးကပြောဆိုသည်။

ထိုသို့ အကြမ်းဖက် စစ်ကောင်စီ တပ်ဖွဲ့များ ဆက်တိုက် မိုင်းဆွဲတိုက်ခိုက်ခံရပြီးနောက် အုံတုံပင်ကျေးရွာနှင့် ကျေးစာကျရွာရှိ ပြည်သူပိုင်း နေ အိမ်များကို စစ်တပ်က ဝင်ရောက် မီးရှို့ဖျက်ဆီးခဲ့ကြောင်း ဒေသခံပြည်သူများ ပြောဆိုချက်အရ သိရသည်။ khit thit

ရန်ကုန်တိုင်း၊ လှိုင်သာယာမြို့နယ်၊ ရွှေလင်ဗန်း (၂၃) ရပ်ကွက် အုပ်ချုပ်ရေးမှူး ဦးမြင့်လှိုင် (ခေါ်) ကုလား ဆိုသူသည် ဇန်နဝါရီလ ၈ ရက် ည ၇ နာရီ ၃၀ မိနစ်ခန့်တွင် သေနတ်ဖြင့် ပစ်ခတ်ခံခဲ့ရကြောင်း သိရသည်။“သေနတ် နှစ်လက်နဲ့ ဝင်ပစ်တယ်။ တစ်လက်က ရှစ်တောင့်လောက် ပစ်လိုက်တယ်၊ နောက်တစ်လက်က ၁၁ တောင့်လောက်ပစ်တယ်၊ သူတို့က အိမ်မှာ အမြဲလုံခြုံရေးယူထားတဲ့ လူတွေရှိတယ်။ ပျူစောထီး သင်တန်းဆင်းတွေလို့လည်း သိရတယ်။ ဝင်ပစ်တော့ ထိခိုက်မှုကိုတော့ သေချာ မသိရသေးဘူး၊ စုံစမ်းနေတုန်းဘဲ ရှိသေးတယ်” ဟု Spring Revolution Flames SRF အဖွဲ့ တာဝန်ရှိသူက ပြောသည်။

အဆိုပါ ပစ်ခတ်မှုကို GOD Of Death၊ Free Tiger Ranger အဖွဲ့နှင့် Spring Revolution Flames SRF အဖွဲ့တို့ ပူးပေါင်း လုပ်ဆောင်ခဲ့ခြင်း ဖြစ်သည်။”ကျွန်တော် ထပ်ပြောချင်တာက အုပ်ချုပ်ရေးမှူးတွေ အခုချိန်မှာ ဖြစ်နေတာတွေကို အကြောင်းပြပြီး ထွက်ကြပါလို့။ တစ်ချို့ဆိုရင် အတင်းအကျပ်ခိုင်းလို့ လုပ်ရတာတို့ ပြောတာတွေကြားတယ်။ အခုချိန်က ထွက်ဖို့ အချိန်ကောင်း၊ မထွက်ရင်တော့ ကျွန်တော်တို့က ရှင်းရမှာပဲ၊

နောက်တစ်ခုက ကျွန်တော်တို့ Mission တွေလုပ်ရင် မြင်လိုက်တဲ့ လူတွေရှိတယ်။ အဲ့အချိန်ကျရင် မသိသလို နေပေးပြီး အဲ့နေရာကနေ ထွက်သွားပေးပါ၊ အားပေးပါပေါ့။ ကျွန်တော်တို့က ပြည်သူတွေထိအောင် ဘယ်တော့မှ မလုပ်ပါဘူး၊ အမြဲ စောင့်ကြည့်နေတာပါ” ဟု ၎င်းကပြော သည်။ဇန်နဝါရီလ ၆ ရက်နေ့ကလည်း လှိုင်သာယာမြို့နယ်၊ ရုံးရှေ့မှတ်တိုင်အနီး ယာဉ်ထိန်းရုံးဘေး တပ်စွဲထားသော စစ်ကောင်စီ တပ်သားများအား ဝင်ရောက် ပစ်ခတ်ခဲ့ရာ စစ်သားနှစ်ဦး သေဆုံးခဲ့သည်။ mizzima

ကယားပြည်နယ်အတွင်း ထိုးစစ်ဆင်နေတဲ့ စစ်ကောင်စီတပ်စစ်ကြောင်းတွေကို ခုခံကာကွယ်ရင်း ပြည်သူ့အတွက် အသက်ပေးလှူသွားကြတဲ့ သူရဲကောင်း PDF ရဲဘော်တွေကို ဂုဏ်ပြုတဲ့အနေနဲ့ ဒီးမော့ဆို-ပြည်သူ့ကာကွယ်ရေးတပ် (DMO- PDF) ဖွဲ့ဝင်တွေက ဇန်နဝါရီ ၇ ရက်က စုပေါင်းဆုတောင်းပွဲ ပြုလုပ်ခဲ့ပါတယ်။

“ကျနော်တို့ PDF ရဲဘော်တွေဟာ ပြည်သူလူထုတွေရဲ့ အသက်နဲ့ အိုးအိမ်တွေကို သူတို့ရဲ့ အသက်တွေ ပေးပြီးကာကွယ်သွားကြတာ အားလုံးအသိပဲဖြစ်တယ်။ အကြမ်းဖက်စစ်တပ်က စစ်ကြောင်းမထိုးရင်တောင် အထိုင်စခန်းကနေ ပြည်သူတွေနေထိုင်တဲ့ ရပ်ရွာထဲကို လက်နက်ကြီးနဲ့ ပစ်ခတ်တယ်။ ရွာထဲဝင်ပြီး လူနေအိမ်တွေကို မီးရှို့ဖျက်ဆီးတယ်။ ပစ္စည်းတွေ ယူတယ်။ တိုက်ပွဲဖြစ်ရင် လူနေအိမ်တွေပေါ် ဗုံးကြဲတယ်။ စစ်တပ်ရဲ့ အကြမ်းဖက်မှုတွေကို ကျနော်တို့ PDF ရဲဘော်တွေက ခုခံကာကွယ်ပေးရင် သူရဲကောင်းဆန်စွာ ကျဆုံးသွားတဲ့ ရဲဘော်တွေကို ဂုဏ်ပြုဆုတောင်းပေးရတာဖြစ်တယ်” လို့ DMO- PDF တပ်ဖွဲ့ဝင်တွေကဆိုပါတယ်။

အခုနှစ်ဇန်နဝါရီလအတွင်း လွိုင်ကော်နဲ့ ဒီးမော့ဆိုတိုက်ပွဲတွေအတွင်း PDF ရဲဘော် ၅ ဦး၊ KNDF ၂ ဦး ပြည်သူ့အတွက်အသက်ပေးလှူခဲ့ပါတယ်။ စစ်ကောင်စီဘက်ကလည်း အရာရှိ၊ စစ်သည်အများအပြား ထိခိုက်ဒဏ်ရာရသေဆုံးတာတွေ ရှိခဲ့ပါတယ်။

ကယားပြည်နယ်အတွင်း တိုက်ပွဲတွေမှာ စစ်ကောင်စီတပ်က ရဟတ်ယာဉ်တွေသုံး တိုက်ခိုက်နေတာကြောင့် ဒေသခံပြည်သူတွေလည်း သေ ဆုံးဒဏ်ရာရတာတွေရှိပြီး သောင်းချီ ထွက်ပြေးတိမ်းရှောင်နေရပါတယ်။ DVB

စစ်ကိုင်းတိုင်း ယင်းမာပင်မြို့နယ် ယမားချောင်း တံတားအောက်ဘက်မှ ခြေလျင်ဆင်းလာသော အကြမ်းဖက် စစ်ကောင်စီ တပ်ဖွဲ့များက ယနေ့ ဇန်နဝါရီလ ၉ရက်နေ့ နေ့လည် ၁၂နာရီခန့်တွင် ကျေးစာကျရွာအတွင်းသို့ သေနတ်များ ပစ်ဖောက်ကာ ဝင်ရောက်ခဲ့ပြီး ပြည်သူပိုင် နေ အိမ်များကို မီးရှို့ဖျက်ဆီးခဲ့ပြီးနောက် လက်နက်ကြီးများဖြင့် ပစ်ခတ်ခဲ့သောကြောင့် ပြည်သူပိုင် နေအိမ် ၆လုံး ပျက်စီးကာ ရွာလုံးကျွတ် ထွက် ပြေးနေရကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

” ကျေးစာကျရွာက အပြစ်မဲ့ပြည်သူ နေအိမ်၅လုံးကို အကြမ်းဖက် စစ်ကောင်စီတပ်ဖွဲ့က မီးရှို့ဖျက်စီးသွားတယ်။ မီးရှို့ဖျက်ဆီးပြီးတော့ အပြန်မှာ သူတို့ စစ်ယာဉ်တန်း မိုင်းထိတယ်။ မိုင်းထိတော့ လက်နက်ကြီးနဲ့ ရမ်းပစ်တာ ရွာထဲကို ထပ်ကျပြီးတော့ နေအိမ် ၁လုံး ပျက်စီးသွားတယ်” ဟု ဒေသခံပြည်သူ တစ်ဦးကပြောဆိုသည်။

လက်ရှိချိန်တွင် ကျေးရွာ၌ နေထိုင်သော ပြည်သူများသည် ဘေးလွတ်ရာသို့ ထွက်ပြေးတိမ်းရှောင်နေရပြီး ဒေသခံပြည်သူ တချို့သာ ကျေးရွာအတွင်းသို့ ပြန်လည်ရောက်နေပြီး ပြည်သူများ ဖမ်းဆီးခံရမှုနှင့် ထိခိုက်ဒဏ်ရာရမှု အခြေအနေကို မသိရှိရသေေးကြောင်း ဒေသခံပြည်သူ တစ် ဦးကပြောဆိုသည်။ khit thit

ရန်ကုန်တိုင်း၊ လှိုင်မြို့နယ်၊ အေးရိပ်မွန် ၄ လမ်းထိပ်ရှိ လဝကရုံးအနီးနှင့် မရမ်းကုန်းမြို့နယ်ရှိ ရထားသံလမ်းတို့အား ဇန်နဝါရီလ ၈ရက် ညနေ ၆နာရီ ၄၅မိနစ် အချိန်နှင့် ၇နာရီ၂၂ မိနစ်အချိန်တို့တွင် ဖောက်ခွဲဖျက်ဆီးခဲ့ကြောင်း ပြောက်ကျားတပ်ဖွဲ့က ပြောသည်။

“တစ်ခုက အဆောက်အအုံထိခိုက်တယ်။ တစ်ခုက ရထားသံလမ်းဂျွုင်းဆက် ပျက်စီးတယ်။ လူထိခိုက်မှုတော့ မရှိပါဘူး။ စစ်ကောင်စီ အသုံး ပြုနေတဲ့ လမ်းကြောင်းမို့ပါ။ ရထားသံလမ်းကိုဖောက်ခွဲတာက ဘာအတွက် အသုံးပြုတယ် အတိအကျ မပြောနိုင်ပေမဲ့ သူတို့အတွက် အသုံး ဝင်နေတဲ့ လမ်းပိုင်းမို့လို့ပါ”ဟု ဖောက်ခွဲမှုနှစ်ခုကို လုပ်ဆောင်ခဲ့သည့် Burma Phoenix Organization – BPO အဖွဲ့ကပြောသည်။ ဒီဇင်ဘာ လ ၂၀ရက်ကလည်း လှိုင်မြို့နယ်ရှိ အုတ်ကျင်း တပ်မတော်ချည်မျှင်နှင့် အထည်စက်ရုံအတွင်းတွင် ပေါက်ကွဲမှုတစ်ခုဖြစ်ခဲ့သေးသည်။ mizzima