SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ကရင်ပြည်နယ်၊ မြဝတီမြို့တွင် ငွေစက္ကူအတု ပြုလုပ် သုံးစွဲသူ အမျိုးသားသုံးဦးကို မြဝတီမြို့နယ်ရဲစခန်းမှ ဖမ်းဆီးအရေးယူထားကြောင်း ယင်းမြို့ခံများထံမှ သိရသည်။ ၎င်းတို့သည် မြ၀တီမြို့ အမှတ်(၄)ရပ်ကွက် မေတ္တာလမ်းမကြီးနှင့် အေးသာယာလမ်းထောင့်ရှိ စားသောက်ဆိုင်၌ ဇန်နဝါရီလ ၁၀ ရက် ညနေပိုင်းကငွေစက္ကူအတုများဖြင့် လာရောက် ၀ယ်ယူစားသောက်နေစဉ် ဆိုင်ရှင်က မြဝတီမြို့နယ် ရဲစခန်းသို့ အ ကြောင်း ကြားရာမှ ယင်းကဲ့သို့ ဖမ်းဆီးခံရသည်ဟု မြို့ခံတစ်ဦးက ပြောသည်။

ထို့အပြင် ယင်းနေ့ ညနေ ၄ နာရီခန့်က စားသောက်ဆိုင်ရှေ့၌ မြဝတီမြို့နေ ဇော်လွင်(ခ)အော်ကြီးဆိုသူကို လွယ်ထားသည့်အိတ်အတွင်း စစ် ဆေးရာ ပလတ်စတစ်ဖြင့်ထုတ်ထားသည့် ကျပ် ၁၀,၀၀၀ တန် ငွေစက္ကူအတု ၁,၄၉၆ ရွက်နှင့်အတူ ထပ်မံဖမ်းဆီးရမိခဲ့သည်ဟု ရဲတပ်ဖွဲ့မှထုတ်ပြန်ထားသည်။

ထို့နောက် ကွင်းဆက်ဖော်ထုတ်ချက်အရ ဇော်လွင် (ခ) အော်ကြီးနေထိုင်သည့် အောင်ဒီပါလမ်းရှိနေအိမ်တန်းလျား၏ အခန်း (၁၂) အား ဝင်ရောက်ရှာဖွေရာ ကျပ် ၁၀,၀၀၀ တန် ငွေစက္ကူအတု ၁၅၀ ရွက်နှင့် မပိုင်းဖြတ်ရသေးသည့် ကျပ် ၁၀,၀၀၀ တန် ငွေစက္ကူအတု ၁၀၀ ရွက်နှင့် ငွေစက္ကူအတုပြုလုပ်ရာတွင် အသုံးပြုသည့် ဆက်စပ်ပစ္စည်းများကိုပါ သိမ်းဆည်းရမိခဲ့ကြောင်း ဒေသခံများထံမှ သိရသည်။

ဖမ်းဆီးရမိသူများ၏ ထွက်ဆိုချက်အရ ငွေစက္ကူအတုများ ပြုလုပ်ရာတွင် ဇော်လွင်(ခ)အော်ကြီး အသက် ၂၆ နှစ် နှင့် အတူ ပူးပေါင်းပါဝင်သည့် အောင်ဒီပါလမ်း နေအိမ်တန်းလျား အခန်း (၁၃) နေ အောင်မြင့်သန်း အသက် ၃၃ နှစ်နှင့် ထွန်းမြင့်သန်း အသက် ၃၅ နှစ်တို့ သုံးဦးကို ဖမ်းဆီးအရေးယူထားသည်ဟု သိရသည်။ ဖမ်းဆီးရမိသူ သုံးဦးအား မြဝတီမြို့မရဲစခန်းက (ပ)၁၅/၂၀၂၂၊ ဗဟိုဘဏ် ဥပဒေပုဒ်မ-၁၀၅/၁၀၆/ ၁၀၇ အရ အမှုဖွင့်အရေးယူထားသည်။ mizzima