Monthly Archives: Jan 2022

CDF-ကန်ပက်လက် အမည်ခံ၍ လုပ်ငန်းရှင်များထံ ငွေကြေးတောင်းခံမှုများရှိနေ

ချင်းပြည်နယ်၊ ကန်ပက်လက် မြို့နယ်အတွင်းရှိ စီးပွားရေး လုပ်ငန်းရှင်များနှင့် ဟိုတယ် လုပ်ငန်းရှင်များကို CDF-ကန်ပက်လက် အမည်ဖြင့် ခြိမ်းခြောက်ကာ ငွေကြေး ကောက်ခံမှုများ ရှိနေကြောင်း လုပ်ငန်းရှင်တစ်ဦး ထံက သိရသည်။ ”ကျွန်တော်တို့ဆီကို ဖုန်းဆက်ပြီး ဆက်သွယ်လာတယ်။

သိန်း ၁၀၀ တောင် တောင်းတယ်။ တချို့ လုပ်ငန်းရှင်တွေဆီမှာ ဆိုရင် သိန်း ၁၀၀ အပြင် ဆန်အိတ်တွေကိုပါ တောင်းတယ်။ မပေးရင် အ သက် အန္တရာယ်တောင် ရှိတဲ့ပုံမျိုးတွေနဲ့ ခြိမ်းခြောက်စာတွေလည်း ပို့လာတယ် ”ဟု လုပ်ငန်းရှင် တစ်ဦးက ပြောသည်။

အဆိုပါ လုပ်ငန်းရှင်သည် ၎င်းထံသို့ ပေးပို့ထားသည့် ငွေကြေးတောင်းခံစာနှင့် ခြိမ်းခြောက်စာကို ယခု ဇန်နဝါရီ လဆန်းပိုင်းတွင် ရရှိထားခြင်း ဖြစ်ပြီး ကန်ပက် လက် မြို့နယ်အတွင်းရှိ ကန်ထရိုက်တာများ၊ ဟိုတယ် လုပ်ငန်းရှင်များနှင့် အခြား စီးပွားရေး လုပ်ငန်းရှင်များ ထံမှလည်း ငွေကျပ် သိန်းတစ်ရာနှင့် ဆန်အိတ် ၁၀၀ မှ ၃၀၀ ကြား အထိ တောင်းသည်ဟု ဆိုသည်။

ချင်းကာကွယ်ရေးတပ်ဖွဲ့ CDF-ကန်ပက်လက်ကို တရား ဝင် တပ်ရင်း ခုနစ်ခုဖြင့် ဖွဲ့စည်းထားရှိပြီး အဆိုပါ တရားဝင် တပ်ရင်း ခုနစ်ခုမှ လွဲ၍ အခြားသော CDF-ကန်ပက်လက် တပ်ရင်း အမည်ဖြင့် အလှူငွေ ကောက်ခံခြင်းများ ရှိပါက CDF-ကန်ပက်လက် ဌာနချုပ်နှင့် သက်ဆိုင်မှု မရှိကြောင်း နှင့် လက်ခံမည် မဟုတ်ကြောင်း CDF-ကန်ပက်လက်က ပြီးခဲ့သည့် ဇန်နဝါရီ ၁၆ ရက်နေ့တွင် ထုတ်ပြန်ထားသည်။ mizzima

ဖောင်းပြင်တွင် ရဲစခန်း ၂ ခုကို PDF က ဝင်တိုက်မီးရှို့ဖျက်ဆီးပြီး စခန်းမှူး အပါအဝင် ရဲ ၈ ဦး အရှင်ဖမ်းမိ၊ လက်နက် ၁၀ လက်နှင့် ခဲယမ်းများ သိမ်း ဆည်းရမိ

စစ်ကိုင်းတိုင်း၊ ဖောင်းပြင်မြို့နယ်မှာ ပြည်သူ့ကာကွယ်ရေးတပ်တွေက ဇန်နဝါရီ ၂၂ ရက် တစ်နေ့တည်း ရဲစခန်းနှစ်ခုကို ဝင်ရောက်စီး နင်းခဲ့ပြီး စခန်းတစ်ခုကို မီးရှို့ဖျက်ဆီးခဲ့သလို နောက်စခန်းတစ်ခုက စခန်းမှူးအပါအဝင် ရဲတပ်သား ၈ ယောက်၊ လက်နက် ၁၀ လက်နဲ့ ခဲယမ်းတွေ ဖမ်း ဆီးရမိတယ်လို့ NUG အစိုးရရဲ့ သတင်းပြန်ကြားရေး PVTV က ထုတ်ပြန်ပါတယ်။

ဖောင်းပြင်မြို့နယ်၊ မိုင်းချောင်းရဲစခန်းကို ဇန်နဝါရီ ၂၂ ရက်မွန်းလွဲ ၃ နာရီအချိန်က ဖောင်းပြင် PDF အဖွဲ့ အင်အား ၂၃ ယောက်နဲ့ ဖောင်းပြင်မြို့ နယ် ပကဖ ၂၀ ဦးတို့က ဝင်ရောက်တိုက်ခိုက်ခဲ့ကြောင်း၊ တိုက်ပွဲကြာမြင့်ချိန် ၁ နာရီအတွင်းပြီးဆုံးခဲ့ပြီး ရဲတပ်သား ၈ ဦး ထွက်ပြေးသွားပြီး ၂ ဦးကိုဖမ်းဆီးရမိခဲ့ကြောင်း၊ရဲစခန်းအတွင်းက G3 ၃ လက်သိမ်းဆည်းရမိခဲ့ပြီး ရဲစခန်းကို မီးရှို့ဖျက်ဆီးခဲ့ကြောင်း၊ အဲဒီတိုက်ပွဲမှာတော့ ဖောင်းပြင် PDF နဲ့ ဖောင်းပြင်မြို့နယ် ပကဖတို့ဘက်က ထိခိုက်ဒဏ်ရာရမှု မရှိခဲ့ကြောင်း သိရှိရပါတယ်။

အဆိုပါတစ်ရက်တည်းမှာပဲ ဖောင်းပြင်မြို့နယ်၊ ရေအောက်တောင်း ရဲစခန်းကို ဖောင်းပြင် PDF အင်အား ၃၀ နဲ့ ဖောင်းပြင်မြို့နယ် ပကဖ ၅ ဦး စုစုပေါင်း ၃၅ ဦးတို့က ဝင်ရောက်တိုက်ခိုက်ခဲ့ပါတယ်။ တိုက်ပွဲကြာမြင့်ချိန်က တစ်နာရီနဲ့မိနစ်၂၀ ခန့်လောက်ဖြစ်ပြီး တော့ ရဲတပ်သား ၂ ဦးထွက်ပြေးခဲ့ပြီး စခန်းမှူးအပါအဝင် ရဲတပ်သား ၆ ဦးဖမ်းဆီးရမိခဲ့တယ်လို့ သိရပါတယ်။ ဒါအပြင် ရဲခစန်းအတွင်းက G3 ၅လက်၊ စတင်း(အူဇီ) ၂ လက်၊ ကျည်မျိုးစုံ၊ လက်ပတော့ ၁ လုံး၊ ဆိုင်ကယ် ၂ စီးတို့ကို သိမ်းဆည်း ရမိခဲ့ပြီး ဖောင်းပြင် PDF တပ်ရင်းက တစ်ဦး ဒဏ်ရာကို မစိုးရရတဲ့ အခြေအနေနဲ့ ရရှိခဲ့တယ်လို့ သိရပါတယ်။ khit thit

နတ်တလင်းမြို့နယ် ရေကြည်ရွာ၌ စခန်းချနေသည့် စစ်ကောင်စီတပ် တိုက်ခိုက်ခံရ

ပဲခူးတိုင်း၊ သာယာ၀တီခရိုင် နတ်တလင်းမြို့နယ် ရေကြည်ကျေးရွာ၌ စခန်းချနေသည့် စစ်ကောင်စီ တပ်ကို ဇန်နဝါရီလ ၂၁ ရက်နေ့ ညပိုင်းတွင် တိုက်ခိုက်ခဲ့ကြောင်း နတ်တလင်း ပြည်သူ့ ကာကွယ်ရေး တပ်ဖွဲ့ (Phoenix-D-F) တာဝန်ရှိသူ တစ်ဦးက ပြောသည်။ “ရွာတွေကို PDF ရှိတယ်ဆိုပြီး သူတို့က ဖမ်းဆီး စစ်ဆေးတာတွေရှိတယ်။ စစ်ကြောင်းတွေ ထိုးလာတယ်။ ရွာမှာရှိတဲ့ ကျွဲ၊ နွားတွေကို ပစ်ခတ်စားသောက်တယ်။ အဲ့ဒီလို လုပ်နေလို့ ကျွန်တော်တို့ အဖွဲ့က သူတို့ စခန်းချနေတဲ့ နေရာကို ညပိုင်း သွားရောက် ပစ်ခတ်ခဲ့တာပါ။ ရှော့တိုက်ဒုံး၊ လက်လုပ်သေနတ်၊ မောင်းပြန်တွေနဲ့ တိုက်ခိုက်ခဲ့တာပါ။

ထိခိုက်ဒဏ်ရာ သေဆုံးကိုတော့ မသိသေးပါဘူး ” ဟု ၎င်းက ပြောသည်။ တိုက်ပွဲဖြစ်ပွားအပြီး စစ်ကောင်စီတပ်က ၎င်းတို့စခန်းချရာ ရေ ကြည်ကျေးရွာမှ ဆုတ်ခွာ ထွက်ပြေးသွားသည်ဟု ဆိုသည်။ “သူတို့က စစ်ကြောင်းထိုးလာပြီး သူတို့ဝင်သွားတဲ့ ကျေးရွာတွေကို နှိပ်စက်တယ်။ ရေကြည်၊ ရေနောက်ကျေးရွာက အိမ်တွေကို ပြီးခဲ့တဲ့နှစ် ၁၁ လပိုင်း ၁၂ လပိုင်းမှာ ဖျတ်ဆီးတာတွေ လုပ်တယ်ဗျ။ တစ်နေ့က ဆိုရင် အမျိုးသ မီး တစ်ယောက်ဆီက ပိုက်ဆံ နှစ်သိန်းကျော်ကို အတင်း ယူသွားတယ်။ အခုလည်း ကျေးရွာက ကြက်၊ နွားတွေလည်း ကုန်သလောက် ဖြစ်နေပြီ။ သူတို့ ပစ်ခတ်စားနေကြတာ” ဟု ဒေသခံတစ်ဦးက ပြောသည်။

စစ်တပ်သည် ပဲခူးရိုးမထဲ၌ ပြည်သူ့ကာကွယ်ရေးတပ်စခန်း ရှိသည်ဆိုသည့် အကြောင်းပြချက်ဖြင့် တောနင်း ရှာဖွေနေပြီး အပြစ်မဲ့ ပြည်သူ များ၏ နေအိမ်များကို ဖျက်ဆီးခြင်း၊ ပစ္စည်းများကို ယူဆောင်ခြင်း၊ ဖမ်းဆီးစစ်ဆေး ငွေကြေးတောင်းယူခြင်းများ ပြုလုပ်လျက် ရှိသည်။ mizzima

DKBA ဗိုလ်စောစလုံးစခန်းကို စစ်ကောင်စီတပ်မှ မီးရှို့ဖျက်ဆီး

မြ၀တီခရိုင်၊ ဖလူးလေးကျေးရွာရှိ DKBA ဗိုလ်စောစလုံး စခန်းကို ယနေ့ ဇန်နဝါရီလ ၂၃ ရက် နံနက်ပိုင်းတွင် စစ်ကောင်စီတပ်က မီးရှို့ ဖျက်ဆီးသွားကြောင်း မျက်မြင်တွေ့ရှိသူ ဒေသခံများက ပြောသည်။

စခန်းအတွင်းမှ မော်တော်ကား၊ ဆိုင်ကယ်၊ ရိက္ခာများနှင့် တန်ဖိုးရှိ ပစ္စည်းများကို စစ်ကောင်စီ တပ်က ဇန်နဝါရီ ၂၂ ရက်တွင် သင်္ကန်းညီနောင်မြို့သို့ သယ်ဆောင်သွားပြီးနောက် ယနေ့တွင် စခန်းအား မီးရှို့ဖျက်ဆီးခဲ့ခြင်း ဖြစ် ကြောင်း ယင်းဒေသရှိ စစ်အာဏာရှင် တော်လှန်ရေး ရဲဘော်တစ်ဦးက ပြောသည်။ ဗိုလ်စလုံး စခန်းကို စစ်ကောင်စီ တပ်များက ဇန်နဝါရီလ ၁၄ ရက်နေ့တွင် စစ်ရဟတ်ယာဉ် နှစ်စီးနှင့်အတူ လက်နက်ကြီးများဖြင့် ပစ်ခတ်ကာ သိမ်းယူခဲ့ခြင်း ဖြစ်သည်။

မြဝတီခရိုင် လေးကေ့ကော်ဒေသကို စစ်ကောင်စီတပ်က ၂၀၂၁ ဒီဇင်ဘာ ၁၅ ရက်နေ့တွင် ကျူးကျော် ထိုးစစ်ဆင်ရာမှ ကရင်အမျိုးသားလွတ် မြောက်ရေးတပ်မတော် (KNLA) ၊ ဒီမိုကရေစီ အကျိုးပြု ကရင်တပ်မတော် (DKBA)၊ ပြည်သူ့ကာကွယ်ရေးတပ် (PDF) များနှင့် တိုက်ပွဲများ စတင်ခဲ့သည်။ ဗိုလ်စလုံးစခန်းသည် အဆိုပါ တိုက်ပွဲများကြောင့် တိမ်းရှောင်လာသည့် စစ်ဘေးရှောင်များကိုလည်း ကူညီပေးနေသည့် စခန်းတစ်ခုဖြစ်ပြီး ထိုင်း-မြန်မာ နယ်စပ် သောင်းရင်းမြစ်ဘေး၌ တည်ရှိသည်။ mizzima

ကသာမြို့နယ်၊ နောင်ချိုဒေသတွင် KIA နှင့် စစ်ကောင်စီကြား တိုက်ပွဲဖြစ်ပွား

ကချင်လွတ်လပ်ရေးတပ်မတော် KIA တပ်မဟာ ၈ လှုပ်ရှားနယ်မြေ စစ်ကိုင်းတိုင်း၊ ကသာမြို့နယ်အတွင်း ယနေ့ နံနက်တွင် စစ်ကောင်စီတပ်နှင့် KIA ကြား တိုက်ပွဲဖြစ်ပွားခဲ့ကြောင်း သတင်းရရှိသည်။ကသာမြို့နယ်၊ နောင်ချိုဒေသရှိ ကချင်လွတ်လပ်ရေးတပ်မတော် KIA တပ်ဖွဲ့များ နေရာသို့ အကြမ်းဖက်စစ်ကောင်စီ တပ်မ ၉၉ မှ အင်အား ၁၀၀ ခန့်ရှိသော စစ်ကြောင်း ထိုးလာသည့်အတွက် နာရီဝက်ခန့် တိုက်ပွဲဖြစ်ပွားကြောင်း ကချင်သတင်းရင်းမြစ်များထံမှ သိရှိရသည်။

အဆိုပါတိုက်ပွဲတွင် နှစ်ဖက်ထိခိုက်ကျဆုံးမှုစာရင်းနှင့် ပတ်သက်၍ ကနဦး မသိရှိရသေးပေ။ယမန်နေ့ ဇန်နဝါရီလ ၂၂ ရက်နံနက်တွင်လည်း ကသာမြို့နယ်၊ နတ်လှိုင်ရွာအနီးတွင် အကြမ်းဖက်စစ်ကောင်စီတပ်နှင့် ABSDF၊ ကသာ PDF ပူးပေါင်းတပ်ဖွဲ့ကြား ၂ နာရီကျော်ကြာ တိုက်ပွဲဖြစ်ပွားခဲ့ပြီး စစ်ကောင်စီဘက်မှ ၇ ဦး ကျဆုံးခဲ့ကြောင်း ကသာမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားသည်။

စစ်ကိုင်းတိုင်းအထက်ပိုင်းနှင့် ကချင်ပြည်နယ်အစပ်တွင် အကြမ်းဖက်စစ်ကောင်စီတပ်နှင့် KIA၊ PDF၊ ABSDF တပ်ဖွဲ့များကြား ရက်ဆက် တိုက်ပွဲများ ဖြစ်ပွားနေသည်။ khit thit

ပုလောတွင် စစ်တပ်ထောင်သည့် မိုင်းထိ၍ ကိုယ်ဝန်သည် မိခင်နှင့် ကလေးငယ် သေဆုံး

မြိတ်ခရိုင်၊ ပုလောမြို့နယ် ပဝတ်ဖျား ကျေးရွာ၌ စစ်တပ် ထောင်ထားသည့် ခြေနင်းမိုင်း ထိ၍ ကိုယ်ဝန်သည် မိခင်နှင့် ၎င်း၏သား အသက် ခြောက်နှစ် အရွယ် ကလေးငယ်တို့ သေဆုံးခဲ့ကြောင်း ပြည်သူ့ ကာကွယ်ရေး တပ်ဖွဲ့ (ပုလော)( PPDF)ထံက သိရသည်။ ယနေ့ ဇန်နဝါရီလ ၂၃ ရက် ညနေ ၅ နာရီခွဲတွင် မိုင်းပေါက်ကွဲခဲ့ခြင်းဖြစ်ပြီး အဆိုပါမိုင်းသည် စစ်ကောင်စီက ထောင်ထားခဲ့သည့် မိုင်း ဖြစ်သည်ဟု PPDF က ထုတ် ပြန်သည်။

“ဖြစ်တာက ဒီကနေ့ ညနေပိုင်းမှာပါ။ မိုင်းနင်းမိတဲ့ အချိန်မှာ မိခင်က မိုင်းထိ ပွဲချင်းပြီး ဆုံးသွားပါတယ်။ ကလေးကတော့ မိုးချုပ်ခါမှ ထပ်ဆုံးသွားတယ်” ဟု PPDF တာဝန်ရှိသူက ပြောသည်။ အဆိုပါ ခြေနင်းမိုင်းသည် ပြည်သူ့ ကာကွယ်ရေးတပ် (PDF) များနှင့် စစ်ကောင်စီ အဖွဲ့တို့ တိုက်ပွဲ ဖြစ်ပွားခဲ့စဉ် စစ်ကောင်စီက နေအိမ် အရှေ့၌ ထောင်ထားခဲ့သည့်မိုင်း ဖြစ်သည်ဟု ဆိုသည်။ mizzima

မြန်မာနိုင်ငံအရေး ပြင်သစ်နိုင်ငံက ပိုမို သိရှိလာစေရန် #AvecToiMyanmar (မြန်မာနှင့်အတူ) စစ်အာဏာရှင် တော်လှန်ရေး ကမ်ပိန်းလှုပ်ရှားမှု ပြုလုပ်မည်

မြန်မာနိုင်ငံတွင် အကြမ်းဖက် စစ်အာဏာရှင် ဆန့်ကျင်ရေး လှုပ်ရှားမှုများကို ပြင်သစ်နိုင်ငံသားများနှင့် သတင်းမီဒီယာများ ပိုမို အာရုံစိုက်ပါစေရန် ရည်ရွယ်ပြီး #AvecToiMyanmar (မြန်မာနှင့်အတူ) စစ်အာဏာရှင် တော်လှန်ရေး ကမ်ပိန်းလှုပ်ရှားမှု ပြုလုပ်မည်သွားမည်ဖြစ်ကြောင်း မြန်မာနိုင်ငံအရေး တက်ကြွလှုပ်ရှားနေသော ပြစ်သစ်နိုင်ငံရောက် မြန်မာနိုင်ငံသားများထံမှ သိရသည်။

အဆိုပါ ကမ်ပိန်းလှုပ်ရှားမှုကို ပြင်သစ်ရောက် မြန်မာများအဖွဲ့ CBF ( La communauté Birmane de France)၊ Info Birmanie၊ Raise three fingersနှင့် CRID (Centre de Recherche et d’Information pour le Développement)တို့ပူးပေါင်းကာ မြန်မာပြည်တွင် နေထိုခဲ့ဖူးသော ပြင်သစ်နိုင်ငံသူ Johanna Chardonnieras တို့က ဦးဆောင်ကာ ပြုလုပ်ခဲ့ခြင်းဖြစ်ကြောင်း သိရသည်။

ယင်းကမ်ပိန်း လှုပ်ရှားမှုကို Social Mediaပေါ်တွင် trending ဖြစ်ရန် #AvecToiMyanmar ဆိုသည့် hashtagနှင့် မြန်မာပြည် အကြောင်းတင်တိုင်း ထည့်သွင်းရေးသားခြင်း သို့မဟုတ် လက်သုံးချောင်း ထောင်ထားသည့် ဆဲလ်ဖီပုံတင်လျှင် ထည့်သွင်းရေးသားခြင်းများ ပြုလုပ်နိုင်ကြောင်း သိရသည်။ khit thit

ပေါက်မြို့နယ်ရှိ ကြက်ဆူအိုင်ရေနံကျင်းများကို စစ်တပ် မီးရှို့

မကွေးတိုင်း၊ ပေါက်မြို့နယ်မြောက်ပိုင်းရှိ ကြက်ဆူအိုင် ရေနံကျင်း (ဒေသအခေါ် ဆီခြံ )များအား စစ်ကောင်စီ တပ်သား အင်အား ၁၀၀ ခန့်ဖြင့် ယနေ့ ဇန်နဝါရီလ ၂၃ ရက်နေ့ နံနက် ၁၀နာရီခန့်တွင် လာရောက် မီးရှို့ ဖျက်ဆီးသွားကြောင်း ဒေသကာကွယ်ရေးအဖွဲ့ တစ်ဖွဲ့ဖြစ်သည့် GOD OF MYAING အဖွဲ့ တာဝန်ရှိသူက ပြောသည်။

“ဆီခြံမှန်သမျှ အကုန်ရှို့မယ်လို့ သိထားပါတယ်ဗျ။ ပိုက်ဆံပေးလည်း မရဘူး။ ပိုက်ဆံ မယူဘူး။ မီးပဲရှို့မယ်လို့ သိရပါတယ်။ PDF တွေကိုထောက်ပံ့နေတာက ဆီခြံလို့ စွပ်စွဲပြီး လုပ်တာပါဗျ”ဟု ၎င်းက ပြောသည်။ယနေ့ ညနေ ၅နာရီအချိန် ထပ်မံရရှိသည့် သတင်းအရင် မီးရှို့ခံရသည့် ရေနံကျင်းအရေအတွက်မှာ ၁၀ ကန်ခန့် ရှိနိုင်ကြောင်း သိရသည်။

“ဆီကန်အရေအတွက်က များမယ်ဗျ၊ ခြံကလေးခြံဆိုတော့ အနည်းဆုံးတော့ ၁၀ ကန်လောက်တော့ရှိမယ်ဗျ” ဟု GOD OF MYAING အဖွဲ့ တာဝန်ရှိသူက မဇ္ဈိမကို ပြောသည်။မကွေးတိုင်းအတွင်း မြိုင်မြို့နယ်တွင်လည်း ဇန်နဝါရီ ၁၄ ‌ရက်နေ့က စတင်ကာ စစ်ကောင်စီ တပ်များ စစ် ကြောင်းထိုးပြီး ပြည်သူပိုင် ရေနံမှော်များ၊ ရေနံကျင်းများကို မီးရှို့ဖျက်ဆီးမှုများ ပြုလုပ် ခဲ့သေးသည်။ မြိုင်မြို့နယ်ရှိ ပြည်သူ့ နေအိမ်များကို မီးရှို့ ဖျက်စီးခဲ့သည့် စစ်ကောင်စီ စစ်ကြောင်း ပေါက်မြို့နယ်သို့ ရောက်ရှိစဉ် ဇန်နဝါရီလ ၂၂ ရက်နေ့တွင် ဒေသပြောက်ကျား တပ်များက အ လစ်အငိုက် တိုက်ခိုက် ခဲ့သေးသည်။ mizzima

“ ကရင်နီပြည်နဲ့အတူ တော်လှန်ကြ ဖက်ဆစ်ခွေးတွေကို မောင်းထုတ်ကြ ”စာတန်းနှင့် ဖက်ဆစ် စသ်တပ်ဆန့်ကျင်ရေး လက်ပံတောင်းတောင်ဒေသ ချီတက်

khit thit

« Older Entries