SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ခင်ဦးမြို့နယ် ကံကြီးကုန်းရွာအနီးမှာ ​ဒေသခံပြည်သူ့ကာကွယ်ရေးတပ်နဲ့ စစ်ကောင်စီတပ်တို့ ဖေဖော်ဝါရီ ၁၇ ရက်နေ့ နေလယ် ၂ နာရီလောက်က တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

ခင်ဦး- ရေဦးကားလမ်း မြို့သစ်ရွာနဲ့ ကံကြီးကုန်းရွာကြား လယ်ကွင်းပြင်မှာ ဖြစ်ပွားခဲ့ကာ ပြည်သူ့ကာကွယ်ရေးတပ်ဘက်က ၁၂ ဦး ကျဆုံးပြီး ပျောက်ဆုံးနေသူတွေလည်း ရှိတယ်လို့ ဒေသခံပြည်သူကာကွယ်ရေးအဖွဲ့ဝင်တစ်ဦးက ပြောပါတယ်။

“အဓိကတော့ စစ်ကောင်စီတပ်တွေက အဲဒီတိုက်ပွဲဖြစ်ပွားရာအနီးက ကျေးရွာတစ်ရွာက ဒေသခံတွေရဲ့ ဆန်တွေ၊ ဆီတွေနဲ့ ပစ္စည်းတွေ ကားနဲ့လာတိုက်ယူနေတာကြောင့် ဒေသခံတွေက ရရာလက်နတ်နဲ့ခုခံတိုက်တယ်။ ပြောရရင်တော့ ဒေသခံပြည်သူ့ကာကွယ်ရေးတပ်ပေါ့။ အထက်က တာဝန်ရှိသူတွေအနေနဲ့လည်း ဒီတော်လှန်ရေးတိုက်ပွဲအောင်မြင်ချင်တယ်၊ ဒါမှမဟုတ် ဒေသခံပြည်သူ့ကာကွယ်ရေးတပ်ရဲ့ကလေးတွေ အ သက် ထပ်မဆုံးရှုံးရအောင် စစ် (-) တွေနဲ့ တူညီတဲ့ လက်နက်တွေ တပ်ဆင်ပေးပါ။ ကျနော်တို့အသက်တွေကို စတေးပြီး ရှေ့တန်းကနေ ရဲရဲ‌ တောက်ပွဲဝင်သွားမယ်လို့ ပြောချင်တယ်ဗျ။ ဒီနေ့တိုက်ပွဲမှာ လက်နက်ချင်း မတူပေမဲ့ ကလေးတွေရဲ့ ရဲရင့်တဲ့စိတ်ဓာတ်တွေနဲ့ တော်လှန်သွားကြ တာ။ လက်နက်ချင်းမတူတော့ ကျနော်တို့ဘက်ကနေ ၁၂ ဦး ကျဆုံးရတယ်။ ပျောက်ဆုံးနေတဲ့သူတွေလည်းရှိနေသေးတယ်။”

အမျိုးသားညီညွတ်ရေးအစိုးရ (NUG) အနေနဲ့ PDF တပ်ဖွဲ့ဝင်တွေကို လက်နက်အကောင်းစားမဟုတ်ပေမယ့် တူမီးထက်သာပြီး အော်တိုပစ်လို့ရတဲ့ သေနတ်တွေပြည့်စုံအောင် တပ်ဆင်ပေးဖို့လည်း ဒေသခံပြည်သူကာကွယ်ရေးအဖွဲ့ဝင်က တောင်းဆိုလိုက်ပါတယ်။

အခုဖြစ်ပွားခဲ့တဲ့နေရာမှာ စစ်ကောင်စီအင်အား ၁၀၀ ကျော်ရှိနိုင်တယ်လို့ ခန့်မှန်းပြီး ပြည်သူ့ကာကွယ်ရေးဘက်က စစ်ကောင်စီကို ပစ်ခတ်ခဲ့မယ်ဆိုပါက ကျေးရွာ နဲ့ ဒေသခံပြည်သူတွေ ထိခိုက်မှာစိုးတာကြောင့် ငဲ့ကွက်ခဲ့ရတယ်လို့ ဆိုပါတယ်။

ဒါကြောင့်မို့ နောက်နှောင် စစ်ကောင်စီတပ် စစ်ကြောင်းဝင်လာခဲ့ပါက ဘေးလွတ်ရာကို ပြည်သူတွေအနေနဲ့ လွတ်လွတ်ကင်းကင်းရှောင်ပေးကြဖို့ ဒေသပြည်သူ့ကာကွယ်ရေးတပ်ဖွဲ့တွေက မေတ္တာရပ်ခံထားတယ်လို့ သိရပါတယ်။ DVB

ရှမ်းပြည်နယ်နှင့်ကယားပြည်နယ် အစပ် မိုးဗြဲတိုက်ပွဲတွင် စစ်ကောင်စီဘက်မှ ၂၀ ဦးထက်မနည်းကျဆုံးသကဲ့သို့ ပြည်သူ့ကာကွယ်ရေးတပ်များဘက်မှလည်း အကျအဆုံးနှင့်ထိခိုက်ဒဏ်ရာရရှိမှု များပြားကြောင်း မိုးဗြဲပြည်သူ့ကာကွယ် ရေးတပ်-MBPDFက သတင်းထုတ်ပြန်သည်။

မိုးဗြဲဒေသတွင် အကြမ်းဖက်စစ်ကောင်စီတပ်နှင့် ကရင်နီပူးပေါင်းတပ်ဖွဲ့များကြား ယမန်နေ့တွင် တနေကုန်နီးပါး တိုက်ပွဲပြင်းထန်ခဲ့ကာ ညနေ ၆ နာရီဝန်းကျင် ကရင်နီပူးပေါင်းတပ်ဖွဲ့များ ဆုတ်ခွာနေစဉ် သံချပ်ကာ အမြှောက်ကားက ပစ်ခတ်မှုများ၊ လက်နက်ကြီး ပစ်ခတ်မှုများ၊ လေကြောင်းမှ ပစ်ခတ်မှုများကြောင့် ကရင်နီတပ်ဖွဲ့ဝင် ၂၀ ဦးထက်မနည်း ကျဆုံးခဲ့ရကြောင်း စစ်မြေပြင် သတင်းရင်းမြစ်များက ပြောသည်။

ဖေဖော်ဝါရီလ ၁၇ ရက်နေ့ နံနက်ပိုင်းမှ စတင်ပြီး မိုးဗြဲမြို့ပေါ်၊ ဟိုက်ကွီဆည်နှင့် ဝါရီဆူးဖလိုင်ရွာနားတွင် တစ်နေကုန်နီးပါး တိုက်ပွဲပြင်းထန်ခဲ့ရာ တိုက်ပွဲတွင် မိုးဗြဲ PDF၊ လွိုင်ကော် PDF၊ ဒီးမော့ဆို PDF၊ ဖယ်ခုံ PDF၊ KA ၊ KNDF၊ KGZ ၊ JPDF ၊ GZ-21 နှင့် အခြား မဟာမိတ်တပ်ပေါင်းစုများ ပူးပေါင်းပြီး အကြမ်းဖက်စစ်တပ်ကို ပြင်းပြင်းထန်ထန် ခုခံ တိုက်ခိုက်ခဲ့ကြောင်း၊ အထိနာခဲ့သော အကြမ်းဖက်စစ်တပ်သည် နေ့လယ် ၁ နာရီဝန်းကျင်တွင် သံချပ်ကာအမြှောက်ကား ၂ စီး၊ အကြမ်းဖက်စစ်သား ၁၀၀ ဝန်းကျင် စစ်ကူခေါ်ခဲ့ပြီးနောက် ထပ်မံ အထိနာခဲ့ကြောင်း မိုးဗြဲပြည်သူ့ကာကွယ်ရေးတပ်-MBPDFက ထုတ်ပြန်ထားသည်

စစ်ကောင်စီဘက်မှ ၂၀ ဦးထက်မနည်းသေဆုံးခဲပြီးနောက် လက်နက်ကြီး အဆမတန်အသုံးပြုခဲ့သည့်အပြင် ညနေ ၅နာရီ ဝန်းကျင်၌ လေ ယာဉ်(၂) စီးဖြင့် (၇) ကြိမ်ခန့် ပစ်ခတ်ခဲ့ပြီးနောက် ပြည်သူ့ရဲဘော်များလည်း ထိခိုက်၊ ကျဆုံးမှုများ ရှိခဲ့ကြောင်း၊ အကြမ်းဖက်စစ်တပ်ကို ရွံ့ရွံ့ချွန်ချွန် ခုခံတိုက်ခိုက်ခဲ့သည့် ပြည်သူရဲဘော်များတွင် မိုးဗြဲ PDF မှ ရဲဘော် (၇)ဦး ကျဆုံးခဲ့ပြီး (၆) ဦး ဒဏ်ရာ ရရှိခဲ့ကြောင်း သတင်းထုတ် ပြန်သည်။

ရှေ့တန်းစစ်မြေပြင် ကယ်ဆယ်ရေး ဆရာဝန်တစ်ဦး ကျဆုံးခဲ့ပြီး မိုးဗြဲ PDF ကယ်ဆယ်ရေးကား(၁) စီးလည်း ပျက်စီးဆုံးရှုံးခဲ့ကြောင်း၊ အခြား မဟာမိတ်တပ်ဖွဲ့အချို့မှ ပြည်သူ့ရဲဘော်များလည်း ထိခိုက်ကျဆုံးမှုများ ရှိခဲ့ကြောင်း သတင်းထုတ်ပြန်ထားသည်။

လွိုင်ကော် PDF ၏ ထုတ်ပြန်ချက်တွင်လည်း စစ်တပ်ဘက်မှ ကျဆုံးမှု အလွန်များပြားသကဲ့သို့ ပြည်သူ့ ကာကွယ်ရေးတပ်မှ ရဲဘော်များလည်း ကျဆုံးမှုများ ရှိခဲ့ကြောင်း၊ ယနေ့ နံနက်ခင်း အချိန်တွင်လည်း ဝါရီဆူးဖလ်ိုင်ရွာတွင် တိုက်ပွဲများ ပြင်းထန်စွာ ဖြစ်ပွားဆဲဖြစ်ကြောင်း သတင်းထုတ်ပြန်သည်။

KGZ ကလည်း ၎င်းတို့ တပ်သားများအသင့်အနေထားဖြင့် ဖေဖော်ဝါရီလ ၁၇ ရက်နေ့ မိုးဗြဲတိုက်ပွဲတွင် ဝင်ရောက်တိုက်ခိုက်ရာတွင် စစ်ကောင် စီတပ်သား ၁၁ သေဆုံးပြီး ၅ ဦးခန့်ဒါဏ်ရာရရှိခဲ့သဖြင့် စစ်ကောင်စီဘက်က လက်နက်ကြီးအလွန်ကျွံသုံးလာကြောင်း၊ (KGZ) တပ်သားများပြန် လည်ဆုတ်ခွါခဲ့ရာတွင် လက်နက်ကြီးထိမှန်သူနှစ်ဦးရှိပြီးဆေးခန်းရှိရာသို့ပို့ဆောင်ခဲ့ကြောင်း ထုတ်ပြန်ထားသည်။

ရှမ်း-ကရင်နီအစပ် ပြည်နယ်ခြားမျဉ်းပေါ်ရှိ ဝါရီဆူးပလိုင်ကျေးရွာကို ယနေ့ ဖေဖေါ်ဝါရီလ ၁၈ ရက်နံနက်ပိုင်းတွင် အကြမ်းဖက်စစ်ကောင်စီတပ်များ ဝင်ရောက်ကာ နေအိမ်များကို မီးတင်ရှို့နေကြောင်း၊ ယနေ့နံနက် ၁၀ နာရီကျော်တွင် စစ်ကောင်စီတပ်နှင့် ကရင်နီပူးပေါင်းတပ်ဖွဲ့ကြား ပစ်ခတ်မှုများ စတင်ဖြစ်ပွားနေကြောင်း သိရှိရသည်။

အဆိုပါ ဝါရီဆူးပလိုင်ကျေးရွာသည် မိုးဗြဲ-နန်းမယ်ခုံ ကားလမ်းပေါ်တွင်တည်ရှိပြီး မိုးဗြဲမြို့ တောင်ဘက် ၂ မိုင်ခန့်အကွာတွင် တည်ရှိသည်။

ဝါရီဆူးပလိုင်ကျေးရွာတွင် အိမ်ခြေ ၂၀၀ ကျော်ရှိကြောင်း၊ ကျေးရွာအတွင်းရှိ အိမ်များသည် ပူးကပ်ဆောက်လုပ်ထားခြင်းကြောင့် နေအိမ်မည်မျှ မီးလောင်ပျက်စီးနေသည်ကို ခန့်မှန်း၍ မရသေးကြောင်း ဒေသခံတစ်ဦးက ပြောသည်။

ယမန်နေ့ ဖေဖေါ်ဝါရီလ ၁၇ ရက်နေ့တွင် အကြမ်းဖက်စစ်ကောင်စီပစ်ခတ်သော လက်နက်ကြီးကျည် ဝါရီဆူးပလိုင်ကျေးရွာအတွင်းသို့ ကျရောက်ပေါက်ကွဲပြီး နေအိမ် ၁ လုံး မီးလောင်ပျက်စီးကာ ဒေသခံ ၁ ဦး အသက်ဆုံးရှုံးခဲ့သည်။

အဆိုပါ တိုက်ပွဲအတွင်း အကြမ်းဖက်စစ်ကောင်စီဘက်မှလည်း သံချပ်ကာအမြှောက်ကား ၂ စီးပျက်စီးသွားကြောင်း၊ စစ်သားသေဆုံးမှု များ ပြားကြောင်း အရေအတွက်ကို အတည်မပြုနိုင်သေးကြောင်း ကရင်နီပူးပေါင်းတပ်ဖွဲ့ထံမှ သိရှိရသည်။khit thit

စစ်ကိုင်းတိုင်းဒေသကြီး၊ ခန္တီးမြို့နယ်၊ နန်းစီပွန်မှာ ဖေဖော်ဝါရီ ၁၇ ရက်က မြေစာပုံပြိုကျပြီး အမျိုးသမီး ၂ ယောက် သေဆုံးသွားတယ်လို့ ဒေသခံတွေထံက သိရပါတယ်။

“နေ့လယ် ၁၂ နာရီလောက်မှာ ရေမဆေးကျောက်ရှာနေတဲ့ မြေစာပုံက ပြိုကျပြီး မိန်းကလေး ၂ ဦးသေဆုံးသွားတာ”လို့ နန်းစီပွန်ဒေသခံတစ်ဦးက ပြောပါတယ် 

မြေစာပုံပြိုကျပြီး သေဆုံးသွားသူ နှစ်ယောက်ဟာ  ဖောင်းပြင်မြို့နယ်က မခင်ခင်မော်နဲ့ ခန္တီးမြို့နယ် နောက်ပဲရွာက  ဒေါ်အေးရီတို့ဖြစ်တယ်လို့ သိရပါတယ်။ DVB

ရခိုင်ပြည်နယ်၊ သံတွဲမြို့တွင် အကြမ်းဖက်ဥပဒေပုဒ်မများဖြင့် စစ်တပ်က မတရားစွပ်စွဲ ဖမ်းဆီးထားသော မငြိမ်းအိဖြိုးကျော် ၏ ၂ နှစ်အရွယ် သမီးငယ် မရွှေရည်ဝင်းမှာ သံတွဲအကျဉ်းထောင်တွင် ယမန်နေ့ညပိုင်းအချိန် ကွယ်လွန်သွားကြောင်း မိသားစုနှင့်ဒေသခံများထံမှ သိရှိရသည်။

လွန်ခဲ့သည့် သုံးလကျော်ခန့် သံတွဲမြို့တွင် စစ်တပ်က အကြမ်းဖက်ဥပဒေပုဒ်မများဖြင့် အမျိုးသမီး ၃ ဦးကို ဖမ်းဆီးခဲ့ပြီး မငြိမ်းအိဖြိုးကျော်လည်း အပါအဝင် ဖြစ်ကြောင်း၊ ဖမ်းဆီးခံရသော မငြိမ်းအိဖြိုးကျော်တွင် ၂ နှစ်ကျော်အရွယ် သမီးလေးတစ်ယောက်ပါရှိခဲ့ပြီး အဆိုပါ ကလေးငယ်လည်း မိခင်နှင့်အတူ သံတွဲအကျဉ်းထောင်အတွင်း အတူရှိနေစဉ် ယခုကဲ့သို့ သေဆုံးသွားခြင်းဖြစ်ကြောင်း သိရှိရသည်။

သေဆုံးသူ ကလေးငယ် မရွှေရည်ဝင်းသည် ယမန်နေ့ ည ၁၁ နာရီအချိန်တွင် သေဆုံးခဲ့ခြင်းဖြစ်ပြီး ယနေ့ နံနက် ပိုင်းတွင် မိသားစုဝင်များကို အကြောင်းကြားလာကြောင်း သိရှိရသည်။

“သူ့အမေအဖမ်းခံရတော့ ကလေးကို အိမ်မှာ အဖေနဲ့ထားသေးတယ်။ ဒါပေမဲ့ ကလေးက အမေဆီပဲသွားချင် နေတော့ သူစိတ်ချမ်းသာအောင် သူ့အမေဆီပို့ထားရင်းက အခုလိုဖြစ်သွားတာ” ဟု မိသားစုဝင်တစ်ဦးက ပြောသည်။

ကွယ်လွန်သူ ကလေးငယ် မရွှေရည်ဝင်းသည် မွေးရာပါ စအိုမပါသည့် ကျန်း မာရေးအခြေအနေကြောင့် ခွဲစိတ်မှု ပြုလုပ် ထားရသည့် ကလေးငယ်တစ်ဦးဖြစ်ပြီး အကျဉ်ထောင်အတွင်း အနေဆင်းရဲ၊ အစားဆင်းရဲခြင်းနှင့် ရာသီဥတု ချမ်းအေးသည့်ဒဏ်ကြောင့် ယခုကဲ့သို့ သေဆုံးသွားရခြင်းဖြစ်ကြောင်း သိရှိရသည်။

“ကလေးက ညဘက်ဆို မအိပ်နိုင်လို့ ငိုတယ်။ အဲဒါ ငိုရမလားဆိုပြီး ထောင်ဝန်ထမ်းတွေက သူ့အမေကို ဆဲတာ၊ ဆူတာလုပ်တယ်။ ကလေးကို သီချင်းဆိုသိပ်ပြန်တော့လည်း ထောင်ထဲမှာ သီချင်းမဆိုရဘူးဆိုပြီး တားမြစ်တယ်။ အခုကလေးကို ဆေးရုံမှာ ရင်ခွဲကြည့်တော့ လည်ချောင်းမှာ ချွဲတွေပိတ်နေတာလို့ ဆရာဝန်ကပြောတယ်” ဟု မိသားစုနှင့်နီးစပ်သူတစ်ဦးက ပြောသည်။

မငြိမ်းအိဖြိုးကျော်အပါအဝင် အဖမ်းခံထားရသူအမျိုးသမီးသုံးဦးကို အပတ်စဉ် ကြာသာပတေးနေ့တိုင်း သံတွဲခရိုင် တရားရုံးတွင် ရုံးထုတ်လေ့ရှိသည်။

“လာမယ့်ရုံးချိန်းကို သွားတောင် မသွားချင်တော့ဘူး။ ရင်ထဲမကောင်းဘူး။ ဘယ် လိုမျက်နှာနဲ့ သူ့အမေကို ကြည့်ရမှာလဲ။ ကျမ သူ့အရှေ့မှာ ငိုမိလိမ့်မယ်” ဟု သေဆုံးသူ မရွှေရည်ဝင်း၏ အဖွားက ပြောဆိုသည်။

ကွယ်လွန်သူ မရွှေရည်ဝင်းကို ငပလီမြို့၊ မဇင်ကျေးရွာတွင် ယနေ့ သဂြိုလ်မည်ဖြစ်ကြောင်း သိရှိရသည်။ khit thit

ပဲခူးတိုင်း၊ နတ်တလင်းမြို့နယ်မှာ ဖေဖော်ဝါရီ ၁၇ ရက် ညနေပိုင်းက စစ်ကောင်စီတပ်သားတွေ မိုင်းဆွဲတိုက်ခိုက်ခံရပြီး ၅ ယောက်သေဆုံးခဲ့တယ်လို့ နတ်တလင်း PDF တပ်ဖွဲ့တစ်ခုဖြစ်တဲ့ Phoenix DF တပ်ဖွဲ့ကနေ သိရပါတယ်။

နတ်တလင်းမြို့နယ် ရေကြည်ရွာကနေ သရက်မြောင်ရွာကိုသွားတဲ့ စစ်ကောင်စီစစ်ကြောင်းကို ဒီကနေ့ ဖေဖော်ဝါရီလ ၁၇ ရက် ညနေ ၄ နာရီခွဲလောက်မှာ နတ်တလင်း PDF က မိုင်းဆွဲတိုက်ခိုက်ခဲ့လို့ စစ်ကောင်စီတပ်သာ ၅ ယောက်သေဆုံးခဲ့တယ်လို့ နတ်တလင်းPDF ရဲ့ ပြန်ကြားရေးတာဝန်ခံကပြောပါတယ်။

နှစ်ဖက်တိုက်ပွဲအတွင်းမှာ စစ်ကောင်စီဘက်က ပြန်လည်ပစ်ခတ်ပေမဲ့ PDF ရဲဘော်တွေ အထိခိုက်အကျဆုံးမရှိဘဲ ဆုတ်ခွာနိုင်ခဲ့တယ်လို့ ဆိုပါတယ်။

တိုက်ပွဲ ဖြစ်ပွားတဲ့နေရာမှာ စစ်ကောင်စီတပ်သား အလောင်း ၃ လောင်းကို ဆွဲယူသွားကြပြီး အလောင်း ၂ လောင်း ကျန်နေခဲ့တယ်လို့ သိရပါတယ်။

ရေကြည်ရွာမှာ တပ်စွဲထားတဲ့ စစ်ကောင်စီတပ်သားတွေကို ဇန်နဝါရီလ ၂၂ ရက်ကလည်း နတ်တလင်းPDF က ရှော့တိုက်ပြောင်းနဲ့ တိုက်ခိုက်လို့ စစ်ကောင်စီဘက်က ထိခိုက်သေဆုံးသူ ရှိနိုင်တယ်လို့ သိရပါတယ်။

နှစ်ဖက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။ DVB

မြန်မာနိုင်ငံမှာ တရက်တည်း ကိုဗစ်-၁၉ အတည်ပြုလူနာသစ် ၂,၆၉၂ ယောက်နဲ့ ကူး စက်ခံရသူပေါင်း ၅၅၆,၂၅၆ ယောက်ရှိခဲ့ပြီလို့ စစ်ကောင်စီကျန်းမာရေးဝန်ကြီးဌာနက ဖေဖော်ဝါရီ ၁၇ ရက်ညပိုင်းမှာ ထုတ်ပြန်ပါတယ်။

ဒါဟာ ပြီးခဲ့တဲ့ သီတင်းပတ်တွေအတွင်း ရောဂါကူးစက်မှု ရာဂဏန်းသာ ရှိခဲ့ရာကနေ စံချိန်တင် ၁၀ ရက်ဆက်တိုက် ထောင်ချီတွေ့ရှိခဲ့တာဖြစ်ပြီး မနေ့က ကူးစက်မှုအသစ် ၂,၇၀၀ ကျော်ထဲမှာတော့ ရန်ကုန်တိုင်းဒေသကြီးက  ရောဂါကူးစက်ခံရသူပေါင်း ၉၈၅ ယောက်နဲ့ အမြင့်ဆုံးဖြစ်နေခဲ့တာပါ။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲ စမ်းသပ်ခန်းတွေ မပါဝင်ဘဲ စစ်အုပ်စုလက် အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု တိကျတဲ့ ပမာဏအတိုင်းအဆကို မသိနိုင်သေးပါဘူး။

ဝန်ကြီးဌာနထုတ်ပြန်ချက်ထဲမှာတော့ ပြီးခဲ့တဲ့ ၂၄ နာရီအတွင်း ဓာတ်ခွဲနမူနာ ၃၁,၈၂၄ ခုကို စစ်ဆေးခဲ့ရာမှာ ရောဂါကူးစက်မှုအသစ် ၂,၆၉၂ ယောက် တွေ့ရှိခဲ့တာမို့ ပိုးတွေ့နှုန်း ၈ ဒသမ ၄၆ ရာခိုင်နှုန်း  ရှိနေပါတယ်။

ရောဂါပြန်လည်ပျောက်ကင်းသက်သာလာလို့ ဆေးရုံက ဆင်းခွင့်ရသူအရေအတွက်ကတော့ ၇၁၂ ယောက် ရှိနေတယ်လို့ ဆိုပါတယ်။

ဒါ့အပြင် ကိုဗစ်-၁၉ ရောဂါကူးစက်ခံရပြီး ထပ်မံသေဆုံးသူ ၁ ယောက်ရှိတာမို့ စုစုပေါင်း သေဆုံးသူ အရေအတွက်ကတော့ ၁၉,၃၁၉ ယောက် ရှိလာခဲ့ပြီ ဖြစ်ပါတယ်။

ပြီးခဲ့တဲ့ ၂၀၂၁ ခုနှစ်၊ ဒီဇင်ဘာ ၂၈ ရက်တုန်းကတော့ ယူအေအီးနိုင်ငံ၊ ဒူဘိုင်းမြို့ကနေ ကယ်ဆယ်ရေး လေယာဉ်နဲ့ ပြန်လည်ဝင်ရောက်လာသူ မြန်မာနိုင်ငံသား ၄ ယောက်မှာ အိုမီခရွန်ရောဂါပိုး တွေ့ရှိရကြောင်း ကနဦး ထုတ်ပြန်ထားခဲ့တာပါ။

လတ်တလောမှာတော့ မြန်မာနိုင်ငံမှာ SARS-CoV-2 Variant Omicron (အိုမီခရွန်) ရောဂါ ပိုးတွေ့လူနာအယောက် ၃၅၀ နီးပါး ရှိလာခဲ့ပြီဖြစ်တယ်လို့ စစ်ကောင်စီ ကျန်းမာရေးဝန်ကြီးဌာနက ထုတ်ပြန်ပါတယ်။ DVB

ပဲခူးတိုင်း၊ ရေကြည်ရွာမှ သရက်မြောင်ရွာဘက်သို့ ထွက်ခွာလာသော အကြမ်းဖက်စစ်ကောင်စီတပ်ဖွဲ့ကို ဖေဖေါ်ဝါရီလ ၁၇ ရက် ယမန်နေ့ ညနေ ၄ နာရီခွဲတွင် Phoenix DF (နတ်တလင်း PDF) က မိုင်းဆွဲတိုက်ခိုက်ရာ စစ်သား ၅ ဦး သေဆုံးသွားကြောင်း သတင်းရရှိသည်။

မိုင်းဆွဲတိုက်ခိုက်ခံရသည့် နေရာတွင် စစ်သားအလောင်း ၂ လောင်း ကျန်ရစ်ခဲ့ပြီး အခြား ၃ လောင်းကို စစ်ကောင်စီတပ်မှ ပြန်လည် သယ်ယူသွားကြောင်း Phoenix DF (နတ်တလင်း PDF) က သတင်းထုတ်ပြန်သည်။ khit thit

ကချင်ပြည်နယ် မိုးမောက်မြို့နယ်မှာ ဖေဖော်ဝါရီ ၁၇ ရက်နေ့ မွန်းတည့် ၁၂ နာရီ ဝန်းကျင်လောက်မှာ ကချင်လွတ်မြောက်ရေးတပ်မတော် (ကေအိုင်အေ) တပ်သားတွေနဲ့ စစ်ကောင်စီတပ်တွေ တိုက်ပွဲဖြစ်ပွားတာကြောင့် ရပ်ကွက်တချို့က ပြည်သူတွေ ရွှေ့ပြောင်းနေထိုင် နေရပါတယ်။

ရွှေ့ပြောင်းနေထိုင်နေရတဲ့ ရပ်ကွက်တွေက မိုးမောက်မြို့ ခါနန်ရပ်ကွက် အထက်ပိုင်းနဲ့ ဝဝမ်ကွမ်ဘန်ရွာက ပြည်သူတွေဖြစ်တယ်လို့ ဒေသခံတွေထံက သိရပါတယ်။

“နေ့လယ်လောက် စစ်တပ်(စကစ) တက်လာတယ်။ ခါနန်ရွာထိပ်ဘက်ရောက်တော့ သေနတ်တွေပစ်တယ်။ အကြီးကော အသေးကော အသံစုံနေတာပဲ။ ကြောက်လွန်းလို့ ခေါင်းတောင် မဖော်နိုင်ဘူး။ ဝဝမ်ရွာက တစ်ရွာလုံးနီးပါရှောင်ကုန်ပြီး ခါနန်က လူတွေကော ရှောင်နေကြတယ်” လို့ ဒေသခံ ပြည်သူတစ်ဦးက ပြောပါတယ်။

တိမ်းရှောင်နေရတဲ့ ပြည်သူတွေဟာ မိုးမောက်မြို့ မြို့ပေါ်ရပ်ကွက်က အသိဆွေမျိုးတွေနဲ့ ဘုရားကျောင်းတွေမှာ ခိုလှုံနေကြတယ်လို့ သိရပါတယ်။

စစ်ကောင်စီတပ်သားတွေက ကချင်လွတ်မြောက်ရေးတပ်မတော် (ကေအိုင်အေ) တပ်သားတွေ ရောက်ရှိနေတဲ့ မိုးမောက်မြို့အထက်ပိုင်းကို အင်အားအများအပြားနဲ့ စစ်ကြောင်းထိုး တက်လာတာကြောင့် တိုက်ပွဲဖြစ်ပွားတာလို့ သိရပါတယ်။

“ပထမပစ်တာက သူတို့ (စကစ) ကေအိုင်အေ နဲ့တွေ့ပြီး ဖြစ်တာလည်း မဟုတ်ဘူး။ လူနေရပ်ကွက်ပဲရှိသေးတယ် ရမ်းပစ်တာပေါ့၊ ရမ်းပစ်ပြီး တက်သွားတာ။ လူမရှိတဲ့နေရာ ရောက်တော့ ကေအိုင်အေက စောင့်ပြီးတိုက်တာထင်တယ်၊ မိနစ်နှစ်ဆယ်လောက်ပစ်ကြတာ” လို့ ဒေသခံတစ်ဦးက ပြောပါတယ်။

စစ်ကောင်စီတပ်သားတွေက ရမ်းသန်း ပစ်ခတ်တာကြောင့် ပြည်သူတစ်ဦး ဦးခေါင်းထိမှန်ဒဏ်ရာပြင်းထန်သလို ပြည်သူတွေရဲ့ နေအိမ်တွေ ပျက်စီးထိခိုက်တာတွေရှိတယ်လို့ သိရပါတယ်။

ဒီနောက် စစ်ကောင်စီတပ်သားတစ်ချို့က နောက်ပြန်လှည့်ဆုတ်သွားပေမဲ့ အများစုက မြို့အထွက် ပတ်ဝန်းကျင်တွေမှာ ရှိနေသေးတာကြောင့် အချိန်မရွေးတိုက်ပွဲဖြစ်လာနိုင်တဲ့ အခြေအနေရှိတယ်လို့ ဒေသခံတွေကပြောပါတယ်။

မိုးမောက်မြို့မှာ လွန်ခဲ့တဲ့ လပိုင်းကလည်း စစ်ကောင်စီတပ်သားတွေက ကေအိုင်အေတပ်ရှိတဲ့ မိုးမောက်မြို့ အထက်ပိုင်းကို စစ်ကြောင်းထိုးဖို့ လမ်းသွားလမ်းလာ ပြည်သူ ၂၀ ကျော်ကို စစ်ကြောင်းရှေ့ဒိုင်းကာအဖြစ်ခေါ်ဆောင်သွားတယ်လို့ ဒေသခံတွေက ပြောပါတယ်။ DVB

မြိတ်မြို့၌ COVID-19 ရောဂါ ကာကွယ် ဆေးထိုးပြီးကြောင်း လက်မှတ် အတု ပြုလုပ်ထားသူများကို စစ်ဆေး တွေ့ရှိပါက အရေးယူမည် ဖြစ် ကြောင်း စစ်ကောင်စီ လက်အောက်ခံ မြို့နယ် COVID-19 ထိန်းချုပ်ရေးနှင့် အရေးပေါ် တုံ့ပြန်ရေး ကော်မတီက ထုတ်ပြန်သည်။

“အစောပိုင်းမှာ ဆိုရင် နှာခေါင်းစည်း မတတ်သူတွေ ဆေးလက်မှတ် မပါသူတွေကို ဒဏ်ငွေ ရိုက်တာမျိုး ရှိတယ်။ အခုလည်း ဆေးလက်မှတ် အတုလုပ်သူတွေ တွေ့ရှိရင် ဖမ်းဆီး အရေးယူမယ်လို့လည်း ကြားနေရတယ်”ဟု မြိတ်မြို့ခံ တစ်ဦးက ပြောသည်။

မြိတ်မြို့နယ် အတွင်း COVID-19 ရောဂါ တွေ့ရှိသူ ယမန်နေ့ အထိ ၂၁၀ ဦး ရှိခဲ့သည်။ တနင်္သာရီတိုင်း အတွင်း၌ မြို့နယ် အလိုက် COVID-19 ရောဂါ ကူးစက်သူ ၆၇၁ ဦး ရှိကြောင်း တနင်္သာရီတိုင်း ကုသရေးနှင့် ပြည်သူ့ ကျန်းမာရေး ဦးစီးဌာန၏ နေ့စဉ် ထုတ်ပြန်ချက်တွင် ဖော်ပြထား သည်။mizzima