SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ဘုတလင်မြို့နယ်၊ ငပယင်းကျေးရွာကို  စစ်ကောင်စီတပ်က မတ်လ ၁၉ ရက် ဒီနေ့မနက်အစောပိုင်း ၄ နာရီကျော်လောက်က  ဝင်ရောက်ပစ်ခတ်ခဲ့လို့  စိတ်ကျန်းမာရေးမကောင်းသူ ၁ ဦး သေဆုံးသွားပါတယ်။

“သေတဲ့သူက ငပြားလို့ခေါ်တယ်ဗျ။ အသက်က ၂၈ နှစ်ဝန်းကျင်လောက်ရှိလိမ့်မယ်။ ဘယ်လိုပစ်သတ်သွားတာလဲဆိုတော့ ဘယ်ဘက်ရင်အုံကနေတေ့ပြီး ညာဘက်ချိုင်းအောက်ကနေ ကျည်ထွက်သွားတယ်။ ပြောရရင်တော့ သေတဲ့သူက အရက်ကြောင်နေတဲ့သူပါ။ သူအရက်သောက်သွားရင်း စစ်ခွေးတွေနဲ့တွေ့ပြီး အသတ်ခံလိုက်ရတယ်”လို့ ဒေသခံရွာသားတစ်ဦးက ပြောပါတယ်။ 

ဒါ့ပြင် ရွာမှာရပ်ထားတဲ့  မော်တော်ဆိုင်ကယ်သုံးစီးကိုလည်း စစ်ကောင်စီတပ်က မီးရှို့ ဖျက်ဆီး သွားတယ်လို့  ရွာသားတွေက ပြောပါတယ်။ 

အဲဒီစစ်သားတွေဟာ နမခတပ်‌ရင်းကလာတဲ့ တပ်သားတွေဖြစ်ကြပြီး  ကားနှစ်စီးနဲ့ ငပယင်းကျေးရွာကို လာရောက်ပစ်ခတ်တာလို့ သိရပါတယ်။

မတ်လ ၁၈ ရက် မနက်ကတော့  ဘုတလင်မြို့ပေါ် အထက်တန်းကျောင်းမှာ တပ်စွဲထားတဲ့ စစ်ကောင်စီတပ်ကို  ဒေသခံပြည်သူ့ကာကွယ်ရေးတပ် PDF က ဝင်ရောက်ပစ်ခတ်ခဲ့ပါတယ်။ DVB

ပုလဲမြို့နယ် အင်မထီးရွာရှိ အကြမ်းဖက်စစ်ကောင်စီတပ်နှင့် ပျူစောထီးတပ်ဖွဲ့ကို မတ်လ ၁၈ ရက်နေ့ ညနေပိုင်းတွင် ပြည်သူ့တော်လှန်ရေးတပ်မတော် PRA နှင့် မဟာမိတ်တပ်ဖွဲ့များက ဝင်ရောက်တိုက်ခိုက်ရာ စစ်သား ၄ ဦးနှင့် ပျူစောထီး ၁၄ ဦး သေဆုံးကြောင်း PRA က သတင်းထုတ်ပြန်သည်။

အဆိုပါ အင်မထီးကျေးရွာတွင် အကြမ်းဖက်စစ်ကောင်စီတပ်သား ၂၀ ဦးနှင့် ပျူစောထီး ၆၀ ဦး ခန့်ရှိကြောင်း ပျူစောထီးသင်တန်းပေးနေကြောင်း၊ ယင်းအဖွဲ့သည် ကိုင်းတွင်းရွာကို မီးရှို့ဖျက်ဆီးပြီး ကျွဲ၊ နွားများနှင့် အသုံးအဆောင်များကို ခိုးယူသွားကြောင်း၊ PRA တပ်ခွဲများ၊ ကျားသစ်နက်တပ်ဖွဲ့၊ PPDG၊ MVRF၊ ဒေါင်းနက်နယ်စည်းမခြားတပ်ဖွဲ့၊ မီးနက်ပြောက်ကျားတပ်ဖွဲ့တို့က ပူးပေါင်းတိုက်ခိုက်ခဲ့ကြောင်း PRA က ဆိုသည်။

၄ နာရီကျော်ကြာ တိုက်ပွဲဖြစ်ပြီး PRA တပ်ခွဲ ၂၃ နှင့် တပ်ခွဲ ၃၀ မှ ရဲဘော် ၂ ဦး၊ မဟာမိတ်အဖွဲ့မှ ရဲဘော် ၁ ဦး အနည်းငယ်ဒဏ်ရာပြင်းထန်ကြောင်း သိရှိရသည်။ khit thit

စစ်ကိုင်းတိုင်း၊ ကန့်ဘလူမြို့နယ်ထဲက ဘောရွာကို  မတ်လ ၁၉ ရက် ဒီနေ့ မနက် စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာကြောင့် ၅ နှစ်အရွယ်ကလေးငယ်နဲ့  အမျိုးသမီး တယောက်သေဆုံးသွားကာ ၃ ယောက် ဒဏ်ရာရသွားတယ်လို့  ဒေသခံရွာသားတွေထံက သိရပါတယ်။

မျက်မြင်တွေခဲ့တဲ့ ရွာသားတဦးက “မနက်ခင်းအသံ အကျယ်ကြီးကြားလိုက်တယ်။ အသံကြားတဲ့ဆီသွားကြည့်လိုက်တော့ ရွာဦးကျောင်းအနီးက အုတ်ဖုတ်လုပ်ငန်း လုပ်ကိုင်တဲ့ နေအိမ်ကို လက်နက်ကြီးကျည်ကျခဲ့တာ။ အုတ်ဖုတ်တဲ့အိမ်က ငါးနှစ်အရွယ်ကလေးနဲ့ အသက် ၃၀ အရွယ်အလုပ်သမား အမျိုးသမီးတစ်ဦး သေဆုံးတာတွေ့ခဲ့တယ်။ နောက်ထပ်ထိခိုက်ဒဏ်ရာရတဲ့သူတွေလည်းတွေ့ခဲ့တယ်”လို့  ပြောပါတယ်။

အခုလို ကျေးရွာတွေကို အကြမ်းဖက်ပစ်ခတ်ခဲ့တဲ့  စစ်ကောင်စီတပ်ဟာ ရွှေဘိုမြို့နယ်ဘက်ကနေ ဝင်ရောက်ခဲ့တဲ့ စစ်တပ်ဖြစ်တယ်လို့လည်းသိရပါတယ်။

စစ်ကောင်စီတပ်တွေက လက်နက်ကြီးနဲ့ပစ်ခတ်ပြီးနောက် ကျေးရွာအတွင်းစစ်ကြောင်းထိုး လာတဲ့အတွက် ရွာသားတွေဟာ သေဆုံးသူရဲ့ အ လောင်းကို အုတ်ပုံတွေကြားထဲမှာ ဒီတိုင်းပစ်ထားခဲ့ ရပါတယ်။

ဘောကျေးရွာဟာ အိမ်ခြေ ၁၀၀ ကျော်လောက်ရှိတဲ့ ကျေးရွာဖြစ်ပြီး လက်ရှိမှာတော့ ရွာအတွင်းရှိတဲ့သူတွေအားလုံး နေရပ်စွန့်ခွာ စစ်ဘေးရှောင်နေကြရပါတယ်။  DVB

မြန်မာနိုင်ငံမှာ စစ်တပ် အာဏာ သိမ်းပြီးနောက် အကျဥ်းထောင်တွင်း လူ့အခွင့်အရေး ချိုးဖောက်မှု တွေ တစ်ကျော့ပြန် ပြင်းထန် လာပါတယ်။

စစ်တပ်က လက်သပ် မွေးထားတဲ့ ရာဇဝတ်မှု နှစ်ကြီး သမားတွေနဲ့ စစ်တပ် လက်အောက်ခံ အကျဥ်းထောင် ဝန်ထမ်းတွေဟာ နိုင်ငံရေး လှုပ်ရှားမှုကြောင့် မတရား အကျဥ်းချ ခံထားရတဲ့ ပြည်သူတွေကို အကျဥ်းထောင် အတွင်း အနိုင်ကျင့် နှိပ်စက်မှုတွေ လုပ်နေကြပါတယ်။

အဆိုးဆုံးကတော့ လိင် အကြမ်းဖက်မှုတွေကို အတားအဆီးမရှိ လုပ်ချင်သလို ဆိုးရွားစွာ ထင်တိုင်း လုပ်ဆောင် နေကြတာ ဖြစ်ပါတယ်။

စစ်အာဏာရှင် ဆန့်ကျင်ရေး လှုပ်ရှားမှုတွေကြောင့် ဖမ်းဆီးခံရသူတွေ စစ်ကြောရေးစခန်းမှာ လိင်အကြမ်းဖက် ခံနေရတာတွေ ၊ အကျဥ်းထောင်တွင်း ဆေးကုသခွင့် မရတဲ့ ဆိုးရွားတဲ့ လူ့အခွင့်အရေး ချိုးဖောက်မှုတွေကို မန္တလေး အိုးဘိုထောင်အတွင်း အကျဉ်းကျနေတဲ့ နိုင်ငံရေး အကျဉ်းသား အချို့ နဲ့ မစ္ဇျိမ သတင်းဌာနက အဆက်အသွယ် ရရှိခဲ့လို့ သိရှိ ခဲ့ရပါတယ်။

သူတို့တွေ ဆီက သိရတဲ့ အချက်အလက်တွေအရ စစ်ကြောရေး စခန်းမှာ လိင် အကြမ်းဖက်မှုတွေ၊ အကျဥ်းထောင်အတွင်း ကျန်းမာရေး စောင့်ရှောက်မှု မရရှိတာတွေ၊ နိုင်ငံရေး အကျဥ်းသားတွေကို ရာဇဝတ်မှု နှစ်ကြီး အကျဥ်းသမားတွေက နှိပ်စက်တာတွေ ၊ ထောင်ဝန်ထမ်းတွေက ဝင်ရောက် ရိုက်နှက်တာတွေ မျိုးစုံ ပါရှိပါတယ်။

ပြီးခဲ့တဲ့ ၂၀၂၁ ခုနှစ် ဇူလိုင်လအတွင်းက စစ်ကောင်စီရဲ့ဖမ်းဆီး ထိန်းသိမ်းခြင်း ခံခဲ့ရသူ မန္တလေးက ကျောင်းသား တစ်ဦးဟာ စစ်ကြောရေးမှာ စအိုအတွင်း ဝါးလုံး ထိုးသွင်း နှိက်စက် ခံခဲ့ရသလို တခြားသော လိင်ပိုင်းဆိုင်ရာ နှိပ်စက်မှုများစွာ ခံထားရပြီး ဆေးကုသခွင့် မရရှိခဲ့ပါဘူး။ အကျဥ်းထောင်ကို ရောက်လာချိန်မှာတော့ သူဟာ ဝမ်းသွားမရတဲ့ ပြဿနာ၊ စအို အတွင်းထဲက နာကျင်ကိုက်ခဲတာ၊ အပြင်းအထန် ဗိုက်အောင့်တာတွေ ခံစား နေရတယ်လို့ သိရပါတယ်။

သူနဲ့အတူအကျဥ်းထောင်ကိုသိပ်မကွာဘဲရောက်လာသူအမျိုးသားသုံးဦးဟာလည်း အလားတူ လိင်အကြမ်းဖက်မှုခံခဲ့ရသေးတယ်လို့ဆိုပါတယ်။

မန္တလေးနန်းတွင်း စစ်ကြောရေး စခန်းဟာ အမျိုးသားတွေကို သာမက အမျိုးသမီးငယ်တွေ ကိုပါ လိင် အကြမ်းဖက်တာတွေ လုပ်ဆောင် နေပါတယ်။

စစ်ကြောရေး အတွင်း သုံးလနီးပါး ကျော်ဖြတ်ခဲ့ရသူ နိုင်ငံရေး အကျဥ်းသားတစ်ဦး က စစ်ကြောရေးဟာ အမျိုးသမီးတွေရဲ့ မချိမဆန့် အော်ဟစ်သံတွေ နဲ့ စစ်ကောင်စီ တပ်သားတွေရဲ့ အော်ရယ်သံတွေ ဆူညံနေပြီး ငရဲခန်း တစ်ခုထက် ဆိုးနေတယ်လို့ ဆိုပါတယ်။

ကျွန်တော်တို့ ဘာမှ လုပ်မပေးနိုင်ဘူး။ ခဏလေး နားရတဲ့ အချိန်လေးမှာတောင် ဒီအသံတွေ ကြားနေရတယ်။ ငရဲထက် ဆိုးတယ် “လို့ ပြီးခဲ့တဲ့ ဖေဖော်ဝါရီလ ပြောခဲ့ပါတယ်။

၎င်းကိုယ်တိုင်လည်း စစ်ကြောရေးမှာ အမျိုးသား အင်္ဂါကို ခြေထောက်နဲ့ အကန်ခံရတာ၊ စအိုအနီး ဆေးလိပ်မီးနဲ့ အတို့ ခံရတာတွေအထိ လိင်အကြမ်းဖက် ခံခဲ့ရပါတယ်။

အဲဒါအပြင် စစ်ကြောရေးကနေ အိုးဘို အကျဥ်းထောင် ရောက်လာသူ အသက် ၂၀ ကျော် အရွယ် ဗကသ ကျောင်းသူ အမျိုးသမီးငယ်ဟာ စစ်ကြောရေးမှာ လိင်အကြမ်းဖက် ခံခဲ့ရလို့ ဒဏ်ရာတွေ ရခဲ့ပြီး အကျဥ်းထောင် ရောက်တော့လည်း ဆေးကုသခွင့် မပေးဘဲ တိုက်ပိတ် ခံထားရတယ်လို့ သိရပါတယ်။

အိုးဘိုထောင် အတွင်းက အမျိုးသမီး အဆောင်တည့်တည့်မှာလည်း CCTV တပ်ပြီး အမျိုးသမီးတွေ အဝတ်လဲချိန်၊ ရေချိုးချိန်နဲ့ အိပ်ချိန်တွေကို ဓာတ်ပုံ ခိုးရိုက်တာတွေ ရှိတယ်လို့လည်း အကျဥ်းထောင် အတွင်းက ရတဲ့ သတင်းတွေအရ သိရပါတယ်။

“အကျဥ်းထောင်ထဲက လူ့အခွင့်အရေး ချိုးဖောက်မှုတွေဟာ အမှန်တကယ် ဖြစ်နေတာပါ။ ထွက်မလာနိုင်တဲ့ သတင်းတွေ ရှိနေပြီး တကယ်လက်တွေ့မှာ ဒီထက်မက ရှိနေနိုင်ပါတယ်။ အရှက်ကြောင့် ထု​တ်မပြောကြတဲ့ အကြမ်းဖက်မှုတွေလည်း အများကြီး ရှိနေမှာပါ ” လို့ အမျိုး သမီး အခွင့်အရေး လှုပ်ရှားသူ တစ်ဦးက ဆိုပါတယ်။

ရှစ်လေးလုံး အထိမ်းအမှတ် အနေနဲ့ ၂၀၂၁ ခုနှစ် သြဂုတ်လ ၈ ရက်နေ့ ညပိုင်းက အကျဥ်းထောင် အတွင်း ဆန္ဒပြ ကြွေးကြော်သံများ အော်ခဲ့ကြသူတွေကိုလည်း အကျဥ်းဦးစီးဌာန ဝန်ထမ်းတွေက အကျဥ်းထောင် အတွင်း ဝင်ရောက် ရိုက်နှက်ခဲ့ပြီး လူဦးရေ ၄၀ ကို တိုက်ပိတ် ခဲ့တယ်လို့ သိရ ပါတယ်။

နိုင်ငံရေး အကျဥ်းသမားတွေကို ရာဇဝတ် အကျဥ်းသားတွေနဲ့ အတူ ပေါင်းထားတာကြောင့် နှစ်ရှည်ထောင်ကျ ရာဇဝတ်အကျဉ်းသားတွေက နိုင်ငံရေး အကျဥ်းသားတွေ ဆီကနေ ငွေကြေး တောင်းခံတာတွေပါ ရှိတယ်လို့လည်း ထောင်တွင်း အဆက်အသွယ်တွေ က ပြောပါတယ်။

“ငွေမပေးရင် ရိုက်နှက်တာတွေ လုပ်ပါတယ်။ ပြီးတော့ အလုပ် မပါဘဲ ထောင်ကျလာတဲ့ သူတွေ ရှိတယ်။ အဲလို လူတွေကို အလုပ်ကြမ်းတွေ ခိုင်းပြီး အလုပ် မလုပ်ချင်ရင် ငွေပေး ဆိုတာမျိုးတွေ အထိ ခိုင်းတယ်။ မပေးနိုင်လို့ ရိုက်နှက် ခံရတာတွေလည်း ရှိတယ် “လို့ ဆိုပါတယ်။

အကျဥ်းထောင်အတွင်း အဆောင်တွေမှာ အကျဥ်းသားတွေ ပြည့်နှက်နေပြီး အိပ်မရတာတွေ၊ နေရာ မဆံ့တာတွေလည်း ဖြစ်နေပြီး ဒီလို အ ခြေအနေကို အကျဥ်းဦးစီး ဌာနက ဘာမှ လုပ်မပေးဘူးလို့ ဆိုပါတယ်။ အိုးဘိုထောင်ရဲ့ လက်ရှိ အကြီးအကဲဟာ

အာဏာသိမ်းပြီး နှစ်ယောက်မြောက် ပြောင်းလဲတာ ဖြစ်ပြီး ဖိနှိပ်မှုတွေ ပိုလုပ်တယ်လို့ သိရပါတယ်။

“အကျဥ်းထောင်ထဲမှာ မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်တောင် ဆေးကုသခွင့် ကောင်းကောင်း မရဘူး။ ဝန်ကြီးတွေ နေတဲ့ နိုင်ငံရေးသမား ထားတဲ့ အဆောင်နဲ့ ဦးဝင်းထိန်နဲ့ပဲ ဆရာဝန်က လာကြည့်ပေးတာ။ ကျန်တဲ့ အကျဥ်းထောင်တွေကို လာကြည့် မပေးတဲ့အပြင် ဆူငေါက်နေတာ။ လိုအပ်တဲ့ ဆေးတွေလည်း ပြင်ကပဲ မှာရတာ” လို့ နိုင်ငံရး အကျဥ်းသားတစ်ဦးက ပြောပါတယ်။

၁၉၈၈ ခုနှစ် စစ်အာဏာ သိမ်းပြီးတဲ့ နောက်မှာ စစ်တပ် ဆန့်ကျင်သူတွေကို စစ်ကြောရေးမှာ ရိုက်နှက် နှိပ်စက်ခဲ့ပြီး အဲဒီဒဏ်ရာတွေနဲ့ပဲ သေ ဆုံးသွားကြသူတွေ ရှိခဲ့ပါတယ်။ အကျဥ်းထောင် အတွင်း တိုက်ပိတ်ပြီး ရိုက်နှက် နှိပ်စက်မှုတွေကြောင့် ဦးနှောက် မူမမှန်တော့တဲ့ သူတွေလည်း အများအပြား ရှိခဲ့ပါတယ်။

“နှိပ်စက်ခဲ့တယ်လေ။ မှတ်ချက်ပေးစရာ မရှိအောင် ယုတ်မာခဲ့ကြတယ်။ ဒီခေတ်လို သတင်း မီဒီယာ အားမကောင်းတော့ လူမသိ သူမသိ သေသွားရ၊ ပေးဆပ် သွားရတာတွေ အများကြီးပဲ။ ဒီခေတ်တောင် အထဲက သတင်းတွေ ကျွန်တော်တို့ တိတိကျကျ မသိရဘူးလေ” လို့ ၈၈ မျိုး ဆက် ကျောင်းသား တစ်ဦး က ပြောပါတယ်။

အခုလို နှိပ်စက်မှုတွေဟာ မန္တလေး အိုးဘိုထောင် တစ်ခုထဲမှာပဲ ဖြစ်နေတာ မဟုတ်ဘဲ အင်းစိန် အကျဥ်းထောင်နဲ့ မုံရွာ အကျဥ်းထောင်တွေမှာလည်း လိင် အကြမ်းဖက် ခံရတာ၊ ဆေးကုသခွင့် မရတာ၊ အကြမ်းဖက် ငွေတောင်းခြင်း ခံရတာ၊ အကျဥ်းဦးစီးက လက်သပ် မွေးထားတဲ့ ရာဇ ဝတ်သားတွေက နှိပ်စက်တာ စတဲ့ အခြေအနေတွေ ရှိနေတယ်လို့ အကျဥ်းထောင် အတွင်းက ပေးပို့လာတဲ့ သတင်းတွေ အရ သိရပါတယ်။

ယခုမတ်လ၁၅ရက်နေ့မှာတင် ကလေးအကျဥ်းထောင်ကိုဆူပူတယ်ဆိုတဲ့စွပ်စွဲချက်နဲ့ သေနတ်နဲ့ပစ်သတ်ခဲ့တာကြောင့် အကျဥ်းသား ခြောက် ဦးနဲ့အချုပ်သားတစ်ဦးသေဆုံးခဲ့ပါသေးတယ်။ mizzima

မွန်ပြည်နယ်၊ ရေးမြို့နယ် NLD ပါတီ ဥက္ကဋ္ဌ ဦးကျော်မိုးအေးရဲ့ နေအိမ်ကို စစ်ကောင်စီက  မတ် ၁၈ ရက်နေ့မှာ ချိတ်ပိတ်လိုက်ပြီးတဲ့ သူ့ရဲ့ ညီဖြစ်သူနဲ့ တူဖြစ်သူအပါအဝင် ဆွေမျိုးတော်စပ်သူတွေကိုပါ ဖမ်းဆီးသွားတယ်လို့ မြို့ခံတွေက ပြောပါတယ်။

ဦးကျော်မိုးအေးရဲ့ညီဖြစ်သူ ကိုဇော်မိုးအေးနဲ့ သားဖြစ်သူ တက္ကသိုလ်ကျောင်းသားတဦးဟာ အရင်က ဖမ်းဆီးခံခဲ့ရဖူးပြီး လွတ်ငြိမ်းခွင့်မှာ ပြန်လည်လွတ်မြောက်လာပြီးမှ အခု ထပ်မံ ဖမ်းဆီးလိုက်ရတာလို့ ဆွေမျိုး တော်စပ်သူက ပြောပါတယ်။

ဦးကျော်မိုးအေးဟာ PDF နဲ့ ပတ်သက်ဆက်နွှယ်တယ်လို့   စစ်ကောင်စီက  စွပ်စွဲပြီး အကြမ်းဖက်တိုက်ဖျက်ရေးဥပဒေနဲ့  လာရောက် ချိတ်ပိတ်လိုက်တာပါ။

စစ်ကောင်စီက ဦးကျော်မိုးအေးရဲ့ နေအိမ်တွေကို ချိတ်လိုက်ပိတ်နေတာ အခုအိမ်နဲ့ပါဆိုရင်  နေအိမ် ၂ လုံးရှိသွားပြီဖြစ်ပါတယ်။ ဦးကျော်မိုးအေးကတော့  စစ်ကောင်စီ ဖမ်းဝရမ်းထုတ်ခံရပြီးတဲ့နောက် မိသားစုလိုက်ထွက်ပြေးတိမ်းရှောင်နေရပါတယ်။

စစ်ကောင်စီက အန်အယ်လ်ဒီပါတီဝင်တွေရဲ့ အမာခံနေအိမ်တွေ၊  ပါတီ လွှတ်တော်အမတ်တွေရဲ့ နေအိမ်တွေအပါအဝင် မွန်ပြည်နယ်အတွင်းမှာ လူနေအိမ်  ၁ ဒါဇင် လောက် ချိတ်ပိတ်ခံထားပြီး ဖမ်းဆီးခံထားရသူတွေနဲ့ ထွက်ပြေးတိမ်းရှောင်နေရသူတွေလည်း အများအပြားရှိနေပါတယ်။  DVB

ရှမ်းပြည်နယ်မြောက်ပိုင်း၊ သီပေါမြို့နယ်၊ စောင်ကြဲရွာအနီးမှာ စစ်ကောင်စီတပ်ကပစ်ခတ်လို့  PDF ရဲဘော် ၅ ဦး သေဆုံးခဲ့ပြီး ခေါင်းဆောင် အ ပါအဝင် ၇ ဦး ထိခိုက်ဒဏ်ရာရခဲ့တယ်လို့ ရှမ်းပြည်နယ်ပြည်သူ့ကာကွယ်ရေးတပ်ဖွဲ့က မတ် ၁၈ ရက်မှာ ထုတ်ပြန်ပါတယ်။

စောင်ကြဲရွာအနီးမှာ ရှမ်းပြည်နယ်ပြည်သူ့ကာကွယ်ရေးတပ်ဖွဲ့က အရေးပေါ်လိုအပ်နေတဲ့ လက်နက်ခဲယမ်းနဲ့ တခြားရိက္ခာပစ္စည်းတွေ သယ်ယူပို့ဆောင်နေစဥ်မှာ ဒလန်သတင်းပေးမှုကြောင့်  စစ်ကောင်စီတပ်က ဝင်ရောက်စီးနင်းပစ်ခတ်ခဲ့တာလို့ ဆိုပါတယ်။

ရှမ်းပြည်နယ် ပြည်သူ့ကာကွယ်ရေးတပ်ဖွဲ့ဝင် တဦးက “စစ်သား အင်အား ၅၀ နဲ့ စီးနင်းပစ်ခတ်တာကြောင့် ရှမ်းပြည်နယ်ပြည်သူ့ကာကွယ်ရေးတပ်ဖွဲ့က ရဲဘော် ၃ ဦးနဲ့ မဟာမိတ်ညီနောင်တပ်ဖွဲ့မှ ရဲဘော် ၂ ဦး ကျတယ်”လို့ပြောပါတယ်။

ရဲဘော် ၇ ဦး ထိခိုက်ဒဏ်ရာရရှိထားတဲ့အပြင် ဆေးဝါးအကူညီတွေ အရေးပေါ်လိုအပ်နေတာကြောင့် မိဘပြည်သူတွေရဲ့ ကူညီထောက်ပံ့မှုတွေ လိုအပ်နေတယ်လို့ သိရပါတယ်။ DVB

ဆိုရှယ်မီဒီယာ ပလက်ဖောင်းတစ်ခုဖြစ်သည့် ဖေ့စ်ဘုတ်တွင် အပြောများနေသည့် ငွေတုရောင်းဝယ်မှု၊ ပြည်သူများအကြား ပြန့်နှံ့မှုများ၊ ဗဟိုဘဏ်၏ ပြောဆိုချက်များအပြင် စစ်ကောင်စီ၏ ဝါဒဖြန့်ချန်နယ်များမှ စတင်ဖြန့်ဝေခဲ့သည့် ငွေစက္ကူအတု နှင့် ပတ်သက်သည့် သတင်းတုများအကြောင်းကို မဇ္ဈိမ မှ ရှာဖွေ စုဆောင်းတင်ပြ လိုက်ပါသည်။

ငွေအတု ရောင်းသည့် ပေ့ချ်များနှင့် ဆက်စပ်မှုများ

ငွေအတုရောင်းသည် ဟု ၎င်းတို့ကိုယ်တိုင်ကြေငြာထားသည့် ဖေ့ဘုတ်စာမျက်နှာများသည် ၂၀၂၁ ခုနှစ် နိုဝင်ဘာလ မှစတင်ကာ ပြန့်နှံ့ခဲ့သည်။ ထိုနောက်တွင် ထိုင်းထီဖြစ်သည့် 2D 3D ပေ့ချ်များ၊ ငွေချေးလုပ်ငန်းများ၊ လူပုဂ္ဂိုလ်အမည်များဖြစ်သည့် ဦးတိုင်းကျော်၊ ဒေါ်မိုးမိုးခိုင် စသည့်အမည်များ၊ ဦးသိမ်းဖြိုး ငွေချေးလုပ်ငန်းရှင် စသည့်အမည်များဖြင့် စတင်အသုံးပြုခဲ့ပြီး ယခုနှစ် ၂၀၂၂ ဖေဖော်ဝါရီနှင့် မတ်လအရောက်တွင် ငွေစက္ကူအတုရောင်းဝယ်ရေးဟု အသီးအသီး အမည်ပြောင်းလဲကာ ဆက်လက်အသုံးပြုနေသော ပေ့ချ်များ အများအပြား ရှိနေသည်။

ပေ့ချ်များတွင် ငွေအတုရောင်းဝယ်ရေးအတွက် ဆက်သွယ်ရန် ဖုန်းနံပါတ်များ ရေးသားထားသည့် ပေ့ချ်များရှိသကဲ့သို့ အချို့ပေ့ချ်များကိုမူ ဖေ့ဘုတ်မက်စင်ဂျာ မှ ဆက်သွယ်ရန်အတွက် ရေးသားထားသည်။ ၎င်းတို့အသုံးပြုသည့် ငွေစက္ကူထုတ် ပုံများ ၊ ပါကင်ထုတ်ပုံများ တွင် အချို့မှာ တူညီနေသည်ကိုတွေ့ရသည်။

ထိုပေ့ချ်များ၏ ဖုန်းနံပါတ်များထဲမှ ခြောက်ခုကို မဇ္ဈိမ မှဆက်သွယ်မေးမြန်းခဲ့ရာတွင် နှစ်ခုကိုသာ ဆက်သွယ်နိုင်ခဲ့ပြီး ကျန်နံပါတ်များကို ဆက်သွယ်မရခဲ့ပါ။ ငွေတုဖြန့်ဝေရေးအကြောင်း မေးမြန်းရာတွင် ငွေအစစ် ၃ သောင်းလျှင် ငွေအတု တစ်သိန်းရမည် ဖြစ်ပြီး ကားဂိတ်မှ ပို့ပေးမည် ဖြစ်ကြောင်း မည်သည့်လမ်းကြောင်းမှ ငွေအတုဝင်ရောက်သည်ကိုမူ မဖြေဆိုနိုင်ကြောင်း ငြင်းဆန်ခဲ့သည်။

အဆိုပါ ငွေအတုရောင်းဝယ်ရေးကို ဆက်သွယ်၍ ဝယ်ယူရန် ကြိုးပမ်းရာတွင် အနည်းဆုံး ၃ သောင်းမှ စတင်ဝယ်ယူရနိုင်ပြီး ဝယ်ယူသည့်ငွေ၏ ၁၀ ဆပြန်လည်ရနိုင်မည်ဟု ပြန်လည်ကမ်းလှမ်းမှုများ ရှိလို ငွေအစစ် ၃ သောင်းခွဲလျှင် ငွေတု ၃ သိန်းရမည် ဟုပြောဆိုမှုများလည်းရှိသည်။ သို့သော် ၎င်းတို့ ပေးပို့သည့် ဖုန်းနံပါတ်ဖြင့် Wave မှတစ်ဆင့် ငွေလွဲရောက်မှသာ ပစ္စည်းပေးပို့မည်ဟု ပြန်လည်ဖြေကြားခဲ့ကြောင်း ဝယ်ယူရန် ကြိုးပမ်းခဲ့သည့် သူတစ်ဦးထံမှ သိရသည်။

ထို့ပြင် “ငွေစက္ကူဖြန်ဖြူးရောင်းဝယ်ရေး” ဟူသည့်ပေ့ချ်မှ ဆက်သွယ်ရန်ဖော်ပြထားသည့် ဖုန်းနံပါတ်သည် “မြစိမ်းရောင်အသေးစားချေးငွေလုပ်ငန်း” ဟူသည့် ပေ့ချ်မှ ဖော်ပြထားသည့် ဖုန်းနံပါတ်နှင့် တူညီနေသည်ကိုလည်းတွေ့ရသည်။ ထိုပေ့ချ်တွင်မူ နှစ်ကျပ်တိုးဖြင့် နှစ်သိန်း မှစ၍ သိန်း ၁၀၀ အထိ ငွေချေးသည်။ ငွေချေးသွားခဲ့သည်ဆိုသောပုဂ္ဂိုလ်၏ မှတ်ပုံတင်နှင့် အိမ်ထောင်စုဇယား ကိုပါ တွဲလျက်ဖော်ပြထားသည်။ အလားတူ အချက်အလက်များကိုအသုံးပြု၍ အခြားငွေချေးလုပ်ငန်းအမည်နှင့် ပေ့ချ်များဖြစ်သည့် “ရွှေအိမ်သူ အကြီးစားချေးငွေ ဌာနရုံး”၊ “Online Myanmar ချေးငွေလုပ်ငန်းဝန်ဆောင်မှု”၊ “မြန်မာနိုင်ငံတော်မှဦးစီးသော မြစိမ်းရောင်ငွေချေးလုပ်ငန်း”၊ “အောင်သမာဓိချေးငွေလုပ် ငန်း”၊ “မြရတနာ ချေးငွေလုပ်ငန်း” စသည့်ပေ့ချ်များကလည်း ချေးငွေများပေးလိုက်ပြီဖြစ်ကြောင်း ရေးသားဖော်ပြထားပြန်သည်။

သို့သော်ဖော်ပြပါ ငွေချေးလုပ်ငန်း ပေ့ချ်များကို မဇ္ဈိမ မှ ဆက်သွယ်မေးမြန်းခဲ့ရာတွင် ငွေချေးရန်အတွက် မှတ်ပုံတင်၊ အမည်၊ နေရပ်လိပ်စာ၊ အိမ်ထောင်စုဇယား စသည့် ကိုယ်ရေးအချက်အလက်များကို တောင်းယူပြီး ဝန်ဆောင်ခအနေဖြင့် ၁၀ သိန်းချေးလျှင် ငါးသောင်းကုန်ကျမည်ဖြစ်ကြောင်း နှင့် ဝန်ဆောင်ခကြိုတင်လွှဲမှသာ ချေးငွေပေးမည်ဟု ပြောကြားကြသည်။

ပြည်သူများကြား ပြန့်နှံ့နေသည့် ငွေစက္ကူအတုများ

ထိုသို့ ငွေစက္ကူအတု ရောင်းဝယ်မှုများ ကျယ်ပြန့်ခဲ့ပြီးနောက် ဇန်နဝါရီ ၂၁ ရက်နေ့တွင် “Khin Thuzar” ဟူသည့် ဖေ့ဘုတ်အကောင့်မှ ၎င်းဆိုင်မှ အလုပ်သမား အလိမ်ခံလိုက်ရသည်ဟု ရေးသားကာ ၅၀၀၀ ကျပ်တန် အတုနှင့် အစစ်ကို ယှဉ်တွဲဖော်ပြပြီး ခြားနားချက်များကို ဖော်ပြထား သည်။ နောက်တွင် လက်သန့်ဆေးရည်ဖြင့် ငွေစက္ကူ နှစ်ရွက်ပေါ် ဖျန်းပြီးသည့်နောက် ငွေစက္ကူအတုတွင် ဆေးရောင်များ ကျွတ်လာသည့် ဗီဒီ ယိုဖိုင်ကိုလည်း ထည့်သွင်းဖော်ပြထားသည်။ အဆိုပါ အကြောင်းအရာကို ပြန်လည်မျှဝေသူ သုံးသောင်းခြောက်ထောင်ကျော် ရှိခဲ့ပြီး ပြန် လည် ကူးယူတင်ပြသူများ အများအပြားရှိခဲ့သည်။ ထိုအကောင့်ပိုင်ရှင်ကို မဇ္ဈိမ မှ မေးမြန်းရန် ဆက်သွယ်ခဲ့သော်လည်း အကြောင်းပြန်ကြားခြင်းမရှိခဲ့ပါ။

ဘဏ်အကောင့်မှ ငွေများကို ပြင်ပငွေဖြင့် ရာခိုင်နှုန်းပေး လဲလှယ်ရာတွင် ငွေစက္ကူတစ်သောင်းတန်များ

ကြားညပ်ပါလာသူ ပြည်သူ တစ်ဦး၏ ဖြစ်စဉ်အား ဆက်သွယ်မေးမြန်းခဲ့ရာ “ငွေသွားလွှဲရမယ့်ဆီ သွားလွှဲတော့မှ ငွေရေစက်နဲ့ရေမှ အတုဆိုပြီးတော့ပေါ်တာ၊ တစ်ရွက်ချင်းစီကြည့်ရင် သိသာတယ်၊ တစ်အုပ်ချင်းစီမှာ ၄-၅ ရွက် ညှပ်ထည့်လိုက်တော့ မသိလိုက်တာ၊ ပုံမှန်ပိုက်ဆံထက်ထူတယ်၊ စက္ကူသား၊ A4 လိုမျိုးပေါ့၊ စက္ကူသားတွေကို ပရင့်ထုတ်ထားတော့ နည်းနည်းလေးထူတယ်။ ငွေကြိုးတော့မပါဘူး။” ဟု ၎င်းမှ ပြန်လည်ဖြေကြားခဲ့သည်။

လှိုင်သာယာမြို့နယ်တွင်နေထိုင်သော ကုန်စုံဆိုင်ပိုင်ရှင် တစ်ဦး၏ ပြောဆိုချက်အရ သူမ၏ ဆိုင်တွင် လာရောက်ဝယ်ယူသော ဈေးဝယ်ထံမှ ၅၀၀၀ တန်အတု ရရှိခြင်းဖြစ်ပြီး သာမာန်ထက် ထူနေသော ပိုက်ဆံသားဖြစ်နေခြင်းကြောင့် ပြန်လည်လဲလှယ်ခိုင်းခဲ့ကြောင်း သိရသည်။

ထို့ပြင် လှိုင်သာယာမီးခွက်ဈေးတွင် ရေသန့်ရောင်းနေသူ တစ်ဦးထံမှ တစ်သောင်းတန် အတု ကြုံတွေ့ခဲ့ရပုံကို မေးမြန်းခဲ့ရာ “ကြိုးမပါဘူး၊ မိတ္တူပုံစံမျိုးဖြစ်တယ်။ နှစ်ရွက်ပေးတာ နံပါတ်တွေလည်းတူတူပဲ၊ အသားက အစစ်တွေနဲ့ မတူဘူး ပြောင်ချောချောဖြစ်နေတာ၊ နောက်တစ်ခေါက်မသုံးနဲ့ အန္တရာယ်ရှိနိုင်တယ်လို့ ပြောပြီး ပြန်ပေးလိုက်တယ်။ နှစ်ခေါက် သုံးခေါက်လောက် ကြုံဖူးတယ်” ဟု ပြန်လည်ဖြေကြားခဲ့သည်။

ဗဟိုဘဏ်မှ ရှင်းလင်းချက်

ထို့သို့ မြန်မာငွေစက္ကူအတု ပြန့်နှံ့မှုသတင်းနှင့် ပတ်သက်၍ မတ်လ ၁၆ ရက်နေ့တွင် VOA Burmese News မှ ဗဟိုဘဏ် ဒုတိယ ဥက္ကဋ္ဌ ဦးဝင်းသော်နှင့် ဆက်သွယ်မေးမြန်းခဲ့ပြီး ၎င်းမှ ထိုပြန့်နှံ့မှုမှာ မဟုတ်မှန်ကြောင်း ငြင်းဆိုခဲ့သည်။ ၎င်းမှ “ဗဟိုဘဏ်ပုံကိုလည်း အသုံပြုထားပြီး ဗဟိုဘဏ်က ကြေညာတယ်ဆိုတဲ့ သဘောဖြစ်လို့ Website ကနေ page က ကြေညာနေတဲ့သူကို သက်ဆိုင်ရာ ပြည်ထဲရေးဝန်ကြီးဌာန ကနေ တစ်ဆင့် ကျနော်တို့ ရှာဖွေဖော်ထုတ်အရေးယူမှာဖြစ်ပါတယ်။” ဟုဆက်လက် ဖြေကြားခဲ့သည်။

စစ်ကောင်စီ ဝါဒဖြန့်ချန်နယ်များမှ ဖြန့်ဝေမှုများ

ထိုသတင်းဖော်ပြခဲ့သည့်နေ့တွင် တယ်လီဂရမ်တွင် စစ်ကောင်စီ၏ ဝါဒဖြန့်ချန်နယ် တစ်ခုဖြစ်သည့် သတင်းစောင့်ဖတ်သူ (Subscribers) တစ်သောင်း နှစ်ထောင်ရှိသည့် “မှိုင်းဝေ” ဟူသည့် ချန်နယ်မှ “NUG အကြမ်းဖက်များမှ ငွေစက္ကူအတုများ ထုတ်လုပ်ခြင်းဆောင်ရွက်နေ” ဟု စ တင် ရေးသားဖြန့်ဝေထားသည်။

အဆိုပါ ချန်နယ်သည် ၂၀၂၂ ခုနှစ် ဒီဇင်ဘာလ ၃ ရက်နေ့မှ စတင်ဖန်တီးထားခြင်းဖြစ်ပြီး ထိုချန်နယ်တွင် NLD, CRPH, NUG များကို အပြစ် တင် ရှုတ်ချခြင်း၊ သရော်လှောင်ပြောင်ခြင်းများအပြင်၊ စစ်ကောင်စီ စစ်သားများကို ထောက်ခံသည့် အရေးအသားများ၊ အစွန်းရောက် အ မျိုးသားရေး သမားများ၏ လှုပ်ရှားမှုများကို ဖြန့်ဝေနေသည်။

ထိုချန်နယ်မှ “NLD ပါတီမှ တောခိုပြီး ဒုက္ခရောက်နေသည့် PDF များအား ထောက်ပံ့ရန် ငွေကြေးလုံးလောက်မှုမရှိသည့်အပြင် အလှုငွေများကောက်ခံရရှိမှုနည်းပါလာသည့်အတွက် ငွေစက္ကူအတုများထုတ်ပြီး မြန်မာ့ငွေကြေးအားဖျက်ဆီးနေ အဆိုပါ ငွေကြေးအတုထုတ်လုပ်သည့်နေရာဟာ KNLA တပ်မဟာ (၅) ဧရိယာအတွင်းမှာရှိနေပြီး ငွေစက္ကူအတုများ ဆက်တိုက်ထုတ်လုပ်နေကြောင်း” ဟုရေးသားဖော်ပြထား သည်။

အလားတူဖော်ပြချက်များကို တယ်လီဂရမ်၏ “တပ်ကြပ်ကြီးဖိုးစည်”၊ “Ba Nyunt”၊ “Linn Nay” ၊ “Ko Khant (#kk)” တို့တွင်လည်း ထပ် ဆင့်ဖော်ပြကြသည်။ ဖေ့ဘုတ်တွင်လည်း “ကိုမျိုး၊ သစ္စာရှင်၊ ဘုရင့်နောင်၊ မင်းစစ်ခ” စသည့် အကောင့်များက အစောဆုံးဖြန့်ဝေကြပြီး ပြန် လည်ဖြန့်ဝေသူနှင့် ကူးယူဖော်ပြသူများ အများအပြားရှိခဲ့သည်။

သတင်းတုပြန့်နှံ့မှုနှင့်ပတ်သက်၍ တပ်မဟာ( ၅ )မှ တာဝန်ရှိသူနှင့် ဆက်သွယ်မေးမြန်းချက်

တပ်မဟာ( ၅ )ပြောခွင့်ရရှိသူ ပဒိုမင်းမင်းထံ ထိုသို့ငွေကြေးအတု ထုတ်လုပ်နေခြင်း ရှိ/မရှိ နှင့် တပ်မဟာ ၅ နယ်မြေတွင်း ငွေကြေးသုံးစွဲမှုအကြောင်း မေးမြန်းခဲ့ရာ ထိုသို့ “ မရှိပါဘူး၊ ပြည်နယ်ထဲမှာ ရှိတဲ့ ပြည်သူလူထုနဲ့ ရောင်းဝယ်ရေးတွေအတွက် ထိုင်းဘတ်ငွေကို အသုံးပြုတာများတယ်။ ကုန်စည်စီးဆင်းမှု၊ ရောင်းဝယ်မှု၊ ရုံးလည်ပတ်မှုကအစ ထိုင်းဘတ်ငွေကို ၇၀ ရာခိုင်နှုန်း ကျော်လောက်အသုံးပြုပါတယ်။ စစ်ကောင်စီဘက်က သူနဲ့တိုက်ခိုက်နေတဲ့ ရန်သူတပ်ကိုတော့ အမျိုးမျိုးစွပ်စွဲချက်တော့ လုပ်မှာပဲ ဒီအပေါ်မှာ အထူးတလည်ပြောစရာ မရှိပါဘူး။” ဟု ပြန်လည်ဖြေကြားခဲ့သည်။ mizzima

ကချင်ပြည်နယ်၊ ဟိုပင်မြို့နယ်၊ နန့်ရင်းကျေးရွာအနီးမှာ မတ် ၁၉ ရက်မနက်က စစ်ကောင်စီတပ်နဲ့  ကေအိုင်အေ PDF ပူးပေါင်းအဖွဲ့တွေ  တိုက်ပွဲဖြစ်ပွားခဲ့ပါတယ်။

ဟိုပင်မြို့အရှေ့ နန့်ရင်းချောင်းအနီးမှာ စစ်ကြောင်းထိုးလာတဲ့  စစ်ကောင်စီ တပ်သား ၂၀၀ နီးပါးနဲ့ KIA နဲ့ PDF ပူးပေါင်းအဖွဲ့တို့ တိုက်ပွဲပြင်း ထန်ခဲ့တာလို့ ဒေသခံတွေကပြောပါတယ်။

“မနက် ၇ နာရီလောက်က  တိန့်လုံပါဘက် စစ်ကြောင်းထိုးလာတုန်း  ကေအိုင်အေနဲ့ PDFက မိုင်းဆွဲတိုက်ခိုက်ခဲ့ပြီး တိုက်ပွဲဖြစ်တာပဲ။ လက် နက်ကြီးတွေနဲ့လည်းပစ်တယ်။ စစ်တပ်ဘက်က အကျအဆုံးများနိုင်တယ်။ တိတိကျကျတော့ မသိရသေးဘူး”လို့ ဒေသခံတစ်ဦးက ပြောပါတယ်။

တိုက်ပွဲဖြစ်ပွားနေချိန်မှာ  စစ်ကောင်စီတပ် ခလရ ၄၀ တပ်ရင်းကနေ  လက်နက်ကြီးတွေနဲ့ ပစ်ကူပေးခဲ့တဲ့အတွက် လက်နက်ကြီးကျည်တွေ ကျေးရွာအတွင်းကျရောက်ပေါက်ကွဲလို့ နန့်ရင်းကျေးရွာနဲ့ ပတ်ဝန်းကျင်က ပြည်သူတွေ ဘေးလွတ်ရာ ထွက်ပြေးနေကြရပါတယ်။

နန့်ရင်းကျေးရွာဟာ ဟိုပင်မြို့နဲ့  ၂ မိုင်လောက်သာဝေးပြီး   လက်နက်ကြီး ပစ်ခတ်သံတွေ ကြားနေရတဲ့အတွက် ဟိုပင်မြို့ပေါ်က ဈေးဆိုင်တချို့ ပိတ်ထားကြောင်းသိရပါတယ်။

ကချင်ပြည်နယ်၊ မြစ်ကြီးနားမြို့အဝင်   မရမ်းကျေးရွာ ၂၁ မိုင် စစ်ဆေးရေး စုပေါင်းဂိတ်မှာလည်း ဒီနေ့ စစ်ကောင်စီတပ်နဲ့  ကေအိုင်အေ PDF ပူးပေါင်းတပ်ဖွဲ့တွေ အပြင်းအထန် တိုက်ပွဲဖြစ်ပွားခဲ့ပါတယ်။ DVB

ကရင်အမျိုးသားအစည်းအရုံး KNU၊ တပ်မဟာ ၆၊ ဒူးပလာယာခရိုင်၊ ကော့ကရိတ်မြို့နယ်အတွင်းရှိ စစ်ကောင်စီ လက်အောက်ခံ အရပ်ဖက်ဌာနဆိုင်ရာအသီးသီးမှ ဝန်ထမ်းများ နေထိုင်ရာဒေသသို့ ထွက်ခွာကြရန်နှင့် မြို့ခံ ဝန်ထမ်းများအနေဖြင့် စစ်ကောင်စီလက်အောက်တွင် တာဝန်ထမ်းဆောင်နေခြင်းမှ နုတ်ထွက်ကြရန် KNU တပ်မဟာ ၆ က အသိပေးထုတ်ပြန်လိုက်သည်။

အဆိုပါ အသိပေးထုတ်ပြန်ချက်ကို မတ်လ ၁၇ ရက် ရက်စွဲဖြင့် ထုတ်ပြန်ထားခြင်းဖြစ်ပြီး လိုက်နာမှုမရှိဘဲ ပျက်ကွက်လျှင် ဖြစ်လာမည့် အ ကျိုးဆက်ကို တာဝန်ယူမည်မဟုတ်ဟု KNU က ဆိုသည်။

ဒူးပလာယာခရိုင်၊ ကော့ကရိတ်မြို့နယ်အတွင်းရှိ အကြမ်းဖက်စစ်ကောင်စီ၏ အုပ်ချုပ်ရေးယန္တရား ရပ်တန့်သွားစေရန်အတွက် KNU ကော့ကရိတ်မြို့နယ် အမြဲတမ်းကော်မတီများနှင့် KNLA တပ်ရင်း ၁၈၊ တပ်ရင်း ၂၇၊ တပ်ရင်း ၁၀၃၊ တပ်ရင်း ၂၀၁၊ KNDO လုံခြုံရေးတပ်ရင်းနှင့် တပ်မ ဟာ စစ်ကြောင်းခေါင်းဆောifများ ညှိနှိုင်းသဘောတူညီချက်အရ ထုတ်ပြန်ခြင်းဖြစ်သည်ဟု သိရှိရသည်။khit thit