SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မြန်မာပြည်သူတွေအနေနဲ့ ယူကရိန်းနိုင်ငံရဲ့ အခြေအနေကို အတော်လေးကို စိတ်ဝင်စားနေမယ်ဆိုတာ ကျွန်တော် နားလည်ပါတယ်။ ရုရှားတွေရဲ့ ရန်လိုမှုကို ယူကရိန်းနိုင်ငံသားတွေရဲ့ တုံ့ပြန်မူဟာ မြန်မာနိုင်ငံသားတွေ စစ်အာဏာသိမ်းမှုကို ဆန့်ကျင်သလိုပဲ သူရဲကောင်းတွေလို ရဲရင့်ကြပါတယ်။

ဒါပေမဲ့ ဆုံးဖြတ်ချက် မြန်မြန်ချပြီး ပုံစံတူလိုက်လုပ်ရင် မှားပါလိမ့်မယ်။ လက်ရှိ ယူကရိန်းက စစ်ပွဲဟာ ကမ္ဘာလုံးဆိုင်ရာ ပထဝီနိုင်ငံရေးကို အပြောင်းအလဲဖြစ်စေပြီး နိုင်ငံတကာရဲ့ နိုင်ငံရေးကိုလည်း သိသိသာသာ အကျိုးသက်ရောက်စေပါတယ်။ မြန်မာပြည်အပေါ် ဒီလိုအကျိုးသက်ရောက်မှုကတော့ မရိုးရှင်းပါဘူး၊ အကောင်အထည်ဖော်ဖို့လည်း အချိန်ယူရပါလိမ့်မယ်။ အမေရိကန်၊ ယူကေနဲ့ ဥရောပနိုင်ငံအဖွဲ့၀င်တွေဟာ ရုရှားရဲ့ ယူကရိန်းအပေါ် ရန်စမှုကို ပူတင် ထင်ထားတာထက် ပိုပြင်းထန် ပိုမြန်ပြီး တော်တော်လေးကို ပြတ်ပြတ်သားသား တုံ့ပြန်တယ်ဆိုတာ မှန်ပါတယ်။

ဒါပေမဲ့ အမေရိကန်၊ အင်္ဂလန်နဲ့ နဲ့ EU တို့ဟာ ရုရှားတို့ ၂၀၀၈ ခုနှစ်မှာ ဂျော်ဂျီယာဒေသကို ဝင်တဲ့အခါမှာရယ်၊ ၂၀၁၄ ခုနှစ် Crimea ကို သိမ်းပြီးတော့ ယူကရိန်းအရှေ့ဘက်မှာရှိတဲ့ Donetsk နဲ့ Luhansk ဒေသတွေကို သူ့စစ်သည်တွေ ပို့ပြီး ခွဲထွက်ရေးသမားတွေကို လှုံ့ဆော်ခဲ့တဲ့ကိစ္စမှာ တုံ့ပြန်မှုတော်တော်လေးကို ပျော့ပျောင်းခဲ့တာပါ။

ပြီးတော့ ဆီရီယားစစ်ပွဲမှာလည်း သမ္မတအာဆတ်ကို ရှရှားက ကူညီခဲ့ရာမှာလည်း တုံ့ပြန်မှု အားနည်းခဲ့ပါတယ်။ အမေရိကန်နဲ့ ဥရောပနိုင်ငံတွေဟာ အရေးယူပိတ်ဆို့မှုအမျိုးမျိုး ချမှတ်သလို ဘဲလာရုစ်နိုင်ငံ ဒီမိုကရေစီလိုလားသူတွေကို  သံတမန်နည်းအရ ထောက်ပံ့ခဲ့ပါတယ်။ ဒါပေမဲ့ အနောက်နိုင်ငံတွေရဲ့ ပံ့ပိုးမှုတွေဟာ ပူတင်ကနေ ဘဲလာရုစ်အာဏာရှင် Lukashenka ကို အကူအညီတွေ ပုံအောပြီး ချက်ချင်းပေးခဲ့တာနဲ့စာရင် အရမ်းကို ပျော့ညံ့လွန်းပါတယ်။

အနောက်နိုင်ငံတွေရဲ့ ဒီလိုတုံ့ပြန်မှုဟာ ဆယ်စုနှစ်တစ်ခုကြာအောင် ပျော့ပျော့‌ပျောင်းပျောင်းဖြစ်ခဲ့တဲ့အတွက် အာဏာရှင် ပူတင်ဟာ ယုံကြည်မှုနဲ့အတူ ရန်လိုမှုတွေ တဖြည်းဖြည်းတိုးလာတာကို သဘောပေါက်ရပါလိမ့်မယ်။ ဒါဆိုရင် အခု အနောက်နိုင်ငံတွေရဲ့ ရှရှားအပေါ် တုံ့ပြန်မှု ဘာလို့ ပြတ်သား ပြင်းထန်ရသလဲဆိုတာ နားလည်ပါလိမ့်မယ်။

ပူတင်ဟာ ရပ်မနေဘဲ အနောက်နိုင်ငံတွေရဲ့ လုံခြုံရေးအဆောက်အုံတွေနဲ့ ဥရောပနိုင်ငံတွေရဲ့ ငြိမ်းချမ်းရေးကို တိတိကျကျ ခြိမ်းခြောက်လာနိုင်တယ်ဆိုတာ သူတို့ ပိုပိုပြီး သိလာပါတယ်။ 

ပူတင်ရဲ့ ရှရှားဟာ ဥရောပနိုင်ငံတွေရဲ့ လုံခြုံရေးကို အန္တရာယ်ဖြစ်စေပြီး တိုက်ရိုက်ခြိမ်းခြောက်နေတယ်လို့ အနောက်အုပ်စုက ယူဆတဲ့ အ ချက် ကြောင့်လည်း အနောက်နိုင်ငံတွေက ယူကရိန်းကို အခုလို ကူညီနေတာဖြစ်ပါတယ်။ ယူကရိန်းဟာ ဒီမိုကရေစီနိုင်ငံဖြစ်ပြီး အကျင့်ပျက်ခြစားမှု တိုက်ဖျက်ရေးနဲ့ တခြားပြုပြင်ပြောင်းလဲရေးတွေ လုပ်တာကို အနောက်နိုင်ငံတွေက အသိအမှတ်ပြုပါတယ်။ ဒါကြောင့်မို့လို့လည်း ယူကရိန်းအစိုးရနဲ့ လူမှုအဖွဲ့အစည်းတွေကို ဒီမိုကရေစီနဲ့ ပြုပြင်ပြောင်းလဲရေးတွေအတွက် ကူညီနေတာ ဖြစ်ပါတယ်။ ဒါပေမဲ့ ယူကရိန်းရဲ့ ဒီမိုကရေစီကို ကာကွယ်ဖို့ အနောက်အုပ်စုက စစ်ရေးအကူအညီပေးတာ မဟုတ်ပါဘူး။ ယူကရိန်းအပေါ် ရုရှားရဲ့ရန်စမှုက ဥရောပနိုင်ငံတွေရဲ့ လုံခြုံ ရေးအဆောက်အအုံကို တိုက်ရိုက်ထိခိုက်နေတယ်လို့ သူတို့ ခံစားရပါတယ်။ ဒါကြောင့် အနောက်နိုင်ငံတွေက အရေးယူပိတ်ဆို့မှုတွေ ပြင်း ပြင်းထန်ထန်လုပ်ပြီး ယူကရိန်းကို စစ်ရေးအရအကူအညီပေးနေတာ ဖြစ်ပါတယ်။

မြန်မာနိုင်ငံနဲ့ မတူတာ အဲဒါတွေပဲဗျ။ မြန်မာနိုင်ငံမှာ ဒီမိုကရေစီနဲ့ ဆန့်ကျင်ပြီး အာဏာသိမ်းခဲ့တဲ့ မင်းအောင်လှိုင်ရယ်၊ အခုဖြစ်နေတဲ့ မြန်မာပြည်သူလူထုနဲ့ တိုက်နေတဲ့ စစ်တပ်နဲ့ စစ်ပွဲတွေရယ်ဟာ အနောက်နိုင်ငံတွေရဲ့ မူဝါဒရေးဆွဲသူတွေရဲ့အမြင်ကတော့ တော်တော်လေး မကောင်းပါဘူး။ ဒါပေမဲ့ မြန်မာနိုင်ငံဟာ အနောက်နိုင်ငံတွေကို အခြေခံလုံခြုံရေးအကျိုးစီးပွားနဲ့ ပတ်သက်ပြီး တိုက်ခိုက်တာ တိုက်ရိုက်ခြိမ်းခြောက်ခံရနိုင်တာ မရှိပါဘူး။

ဒါဟာ ယူကရိန်းနဲ့ မြန်မာနိုင်ငံ မတူညီတဲ့ ကြီးမားတဲ့ကွာခြားချက် တစ်ချက်ပါ။ ယူကရိန်းကိစ္စမှာတော့ အနောက်နိုင်ငံတွေဟာ တိုက်ရိုက်ခြိမ်း ခြောက်ခံရတာကြောင့် အနောက်နိုင်ငံတွေက ပြတ်ပြတ်သားသား ထိထိရောက်ရောက်နဲ့ ညီညီညွတ်ညွတ်နဲ့ တုံ့ပြန်ကြတာပါ။ မြန်မာနိုင်ငံက တော့ ဒီလိုအနောက်နိုင်ငံတွေရဲ့ လုံခြုံရေးအကျိုးစီးပွားအတွက် အလေးထားရတာမျိုး မရှိပါဘူး။

ဒုတိယအနေနဲ့ အနောက်နိုင်ငံတွေဟာ မြန်မာနိုင်ငံက  ခုခံကာကွယ်ရေးစစ်အတွက် ပြတ်ပြတ်သားသား ထောက်ပံ့ပေးတာမျိုး နှောင့်နှေးနေပါတယ်။ ဘာလိုလဲဆိုတော့ မြန်မာ့အိမ်နီးချင်းနိုင်ငံတွေနဲ့ ဒေသတွင်းက အရေးပါသူတွေဟာ အဲ့လို ထောက်ပံ့တာမျိုးကို ဆန့်ကျင်နေလို့ပါပဲ။ စစ်အာဏာရှင် ဆန့်ကျင်ရေးလှုပ်ရှားမှုကို စလုပ်တော့မယ်ဆိုရင် တရုတ်နိုင်ငံကို စစ်အာဏာရှင်အတွက် ပွင့်ပွင့်လင်းလင်း ပြည့်ပြည့်၀၀ ရပ်တည်ခွင့်ပေးလိုက်သလိုဖြစ်မှာကို အနောက်နိုင်ငံတွေက စိုးရိမ်ကြပါတယ်။

အမေရိကန်ဟာ မြန်မာနိုင်ငံကို တရုတ်နဲ့ အနောက်နိုင်ငံတွေအတွက် ကြားခံစစ်မြေပြင် ဖြစ်သွားမှာ မလိုလားပါဘူး။ ကြားခံစစ်မြေပြင်ဟာ မြန်မာပြည်သူတွေအတွက် မကောင်းပါဘူး၊ ပြီးတော့ တရုတ်ကျောထောက်နောက်ခံပေးထားတဲ့ စစ်အာဏာရှင်ဟာ အနောက်နိုင်ငံတွေ ကျောထောက်နောက်ခံပေးထားတဲ့ ခုခံကာကွယ်ရေးလှုပ်ရှားတွေမှုကို သေချာပေါက် နိုင်သွားမယ်လို့ အမေရိကန် မူ၀ါဒရေးဆွဲသူတွေနဲ့ လုံခြုံရေးနည်းဗျူဟာ ပညာရှင်များက ‌သတိထားမိပါတယ်။ တရုတ်ဟာ မြန်မာနိုင်ငံနဲ့ အရမ်းနီးပါတယ်၊ ပြီးတော့ တရုတ်ဟာ အင်အားကြီးပြီး မြန်မာနိုင်ငံမှာ သူ့အကျိုးစီးပွားဟာ အမေရိကန်၊ အင်္ဂလန်တို့ထက် ပိုမို များပြားပါတယ်။ ဥရောပနိုင်ငံတွေရဲ့ အကျိုးစီးပွားကတော့ မြန်မာနိုင်ငံမှာ လုံး၀မရှိတာကြောင့် ဘယ်လိုစွန့်စားမှုမျိုးမှ မလုပ်ပါဘူး။

နောက်ဆုံးကတော့ ဥရောပ လူမှုအဖွဲ့အစည်းကြီးတွေဟာ ယူကရိန်းအပေါ် ပြင်းပြတဲ့ စာနာနားလည်မှုနဲ့ စည်းလုံးညီညွတ်မှုကို ပေးပါတယ်။ ရုရှားဟာ ဥရောပသမိုင်းမှာ ထင်ရှားပါတယ်။ ဥရောပနိုင်ငံတွေအပေါ်  ဆိုဗီယက် ရုရှားဆိုတဲ့ လွှမ်းမိုးမှုအရိပ်ကလည်း ရှိနေပါသေးတယ်။ ဥရောပသမဂ္ဂ အဖွဲ့၀င်နိုင်ငံတွေဖြစ်တဲ့ ဘောလ်တစ်ပြည်နယ်များ (လစ်သူနီယား၊ အက်စတိုးနီယား၊ လက်တ်ဗီယား) ဥရောပအလယ်ပိုင်းနဲ့ ဥရောပအရှေ့ပိုင်းပြည်နယ် (ပိုလန်၊ ချက်စ်ကိုစလိုဗကီယား၊ ဟန်ဂေရီ၊ ရိုမေနီယား၊ ဘူဂေးရီယား) အားလုံးဟာ ရုရှားစစ်တပ် သိမ်းပိုက်တာခံပြီး ဆိုဗီယက်ပြည်ထောင်စု (ဘောတ်တစ်ပြည်နယ်များ) ရဲ့ အစိတ်အပိုင်း ဖြစ်ခဲ့ပြီး ဝါဆော အဖွဲ့၀င်တွေအဖြစ် ဆယ်စုနှစ်များစွာ သွတ်သွင်းခံရပါ။

အဲ့ဒါကြောင့် ဥရောပသားများဟာ မော်စကိုရဲ့  ရန်လိုတဲ့မူဝါဒတိုင်းကို အကဲဆတ်ပါတယ်။ ကျယ်ပြောတဲ့ အစုအဖွဲ့ လူမှုအသိုင်းအဝိုင်းဟာ ယူကရိန်းနဲ့ စည်းလုံးညီညွတ်မှု အပြည့်ရှိနေတာကို တွေ့နေတာကြောင့် အနောက်နိုင်ငံအစိုးရတွေက တုန့်ပြန်မှု ပြင်းထန် မာကျောလို့ ရပါတယ်။ မြန်မာနိုင်ငံအနေနဲ့က အတော်အလှမ်း‌ဝေးနေပါသေးတယ်။ “တစ်စုံတစ်ရာ ပြီးမြောက်ဖို့ရာအတွက်” အဲ့ဒီလို ကျယ်ပြောတဲ့ လူမှုအစုအဖွဲ့ အသိုင်ဝိုင်းတွေ မရှိသေးပါဘူး။

စစ်ကောင်စီက ပူတင်ကို ထောက်ခံနေချိန်မှာ NUG ဟာ ယူကရိန်းကို ထောက်ခံကြောင်းထုတ်ပြောတာဟာ သင့်လျော်တယ်လို့ ကျွန်တော်ထင်ပါတယ်။ မြန်မာနိုင်ငံက ဆန္ဒပြလှုပ်ရှားမှုတွေ၊ တက်ကြွလှုပ်ရှားသူတွေနဲ့ နိုင်ငံသားတွေဟာ ယူကရိန်းကို ထောက်ခံကြောင်း ပြသတာဟာလည်း အလွန်ကောင်းပါတယ်။ ဒါပေမယ့် ယူကရိန်းအပေါ် ရုရှားရဲ့ ရန်စမှုကို အနောက်အုပ်စုရဲ့ ပြတ်သားတဲ့ တုံ့ပြန်မှုမျိုးကနေ မြန်မာအရေးဘက်ကို အနောက်အုပ်စု မြန်မြန်နဲ့ သိသိသာသာ အာရုံကျလာလိမ့်လို့ ထင်မြင်တာဟာ တကယ်တော့ လက်တွေ့မကျပါဘူး။

NUG ကို အနောက်အုပ်စုက အသိအမှတ်ပြုဖို့နဲ့ တစ်ယောက်ယောက်က အလွယ်တကူသယ်ဆောင်နိုင်တဲ့  လေယာဉ်ပစ်ပခုံးထမ်းလောင်ချာ ဒါဇင်ပေါင်းများစွာနဲ့  တင့်ကားဖျက်ဒုံးလက်နက်  ရာပေါင်းများစွာ ပံ့ပိုးပေးတာ ကျွန်တော် မြင်ချင်ပါတယ်။ အဲဒါတွေကမှ အရပ်သား မြောက်မြားစွာကို အကြမ်းဖက်နေတဲ့ တပ်မတော်ရဲ့ စွမ်းအားကို ဖြိုချပြီး စစ်ကောင်စီ ပြုတ်ဖို့ နီးစပ်လာမှာလို့ ကျွန်တော်ယုံကြည်ပါတယ်။ ဒါပေမဲ့ ဒါတွေဖြစ်လာဖို့ အများကြီးလုပ်ရဦးမှာပါ။

အရေးကြီးဆုံးက NUG နဲ့ NUCC ရဲ့ နောက်မှာ အခုထက်ပိုပြီး နိုင်ငံရေးအရ အများကြီးစည်းလုံးဖို့၊ အခြားလက်နက်ကိုင် အဖွဲ့တွေနဲ့ တက်တက်ကြွကြွ စစ်ရေးပူးပေါင်းဆောင်ရွက်မှုရှိဖို့ လိုပါတယ်။ မှတ်ထားဖို့ကတော့ နိုင်ငံတကာက ၂၀ ရာခိုင်နှုန်းလောက်ပဲ မြန်မာနိုင်ငံရဲ့ နောက်ဆုံးရလဒ်အပေါ် လွှမ်းမိုးနိုင်ပြီး ပြည်တွင်းဆုံးဖြတ်ချက်ကသာ ၈၀ ရာခိုင်နှုန်း လွှမ်းမိုးနိုင်တယ်လို့ ကျွန်တော် ယုံကြည်ပါတယ်။ အိမ်နီးချင်းနိုင်ငံတွေ၊ ဒေသတွင်းနဲ့ နိုင်ငံတကာက မြန်မာ့အရေးမှာ ၀င်မပါချင်ကြပါဘူး။ ရှုပ်ထွေးတယ်လို့ မြင်ကြပါတယ်။ ဒါကြောင့် အရင်လို လုပ်နေကျအတိုင်းပဲ မြန်မာ့အရေး ထည့်သွင်းဆွေးနွေးတယ်ဆိုတာလောက်ပဲ ဆက်လုပ်ချင်ကြတာပါ။

ယူကရိန်းက သူတို့ရဲ့ ခုခံကာကွယ်တဲ့ စစ်ပွဲမှာ နိုင်ငံခြားသားတွေကို ပါ၀င်တိုက်ခိုက်ပေးဖို့ ဖိတ်ခေါ်တာတော့ အမှန်ပါပဲ။ ပြီးတော့ အနောက်နိုင်ငံတွေကလည်း သူတို့နိုင်ငံသားတွေကို ယူကရိန်းကာကွယ်စစ်မှာ ပါ၀င်ပေးဖို့ တရား၀င် ခွင့်ပြုပေးတယ်ဆိုတာလည်း မှန်ပါတယ်။ ဒါပေမဲ့ ဒီအချက်ကို အရမ်းအရေးပါတယ်လို့ ယူဆရင် မှားပါလိမ့်မယ်။ 

အရေးကြီးတဲ့တစ်ချက်က ယူကရိန်းနိုင်ငံသားတွေဟာ အချုပ်အခြာအာဏာပိုင်ဖို့အတွက် သူတို့နိုင်ငံအရှေ့ပိုင်းမှာ ရုရှားနဲ့စစ်တိုက်နေတာ ၈နှစ်လောက်ရှိပါပြီ။ ၂၀၁၄ မှာ ရုရှားဟာ Crimea, Donetsk နဲ့ Luhansk ကို သိမ်းယူပြီးတဲ့နောက် ယူကရိန်းဟာ ရုရှားနဲ့ နည်းနည်း ပြင်းထန်တဲ့ ခုခံကာကွယ်စစ် ဖြစ်နေတာပါ။ ဆိုလိုတာက သူတို့မှာ စစ်သင်တန်း၊ ရှေ့တန်းစစ်မြေပြင် အတွေ့အကြုံနဲ့ သူတို့နိုင်ငံကို ကာကွယ်ဖို့ အရမ်းစိတ်အားထက်သန် နေကြတာပါ။

နောက်တစ်ခုက ယူကရိန်းအဖွဲ့အစည်းတွေဟာ ရုရှားရဲ့ ရန်စမှုကို ခံရပြီးတဲ့နောက် လုံး၀ကို ညီညွတ်သွားပါတယ်။ ယူကရိန်းစစ်တပ်နဲ့ အရံတပ်တင်မကပဲ အမျိုးသားရော အမျိုးသမီးတွေပါ ပါ၀င်ကြတဲ့ သာမန်အရပ်သားတွေကလည်း နယ်မြေကာကွယ်ရေး အဖွဲ့တွေမှာ စေတနာ့၀န်ထမ်းအနေနဲ့ ပါ၀င်ကြပါတယ်။

နိုင်ငံခြားမှာ အလုပ်လုပ်နေတဲ့ ယူကရိန်းတွေလည်း အများကြီး ရှိကြပါတယ်။ ပြီးခဲ့တဲ့ ၇ ရက်အတွင်း လူပေါင်း ၆၆,၀၀၀ လောက်ဟာ ကာကွယ်ရေးတပ်မှာ ပါ၀င်ဖို့ ကို့ယ်နိုင်ငံကို ပြန်လာကြပါတယ်။ အမျိုးသမီးနဲ့ ကလေး တစ်သန်းကျော်လောက်ဟာ ဥရောပနိုင်ငံတွေကို လုံခြုံရေးအတွက် ထွက်ခွာချိန်မှာ ယူကရိန်းအမျိုးသား ထောင်သောင်းများစွာကတော့ တိုက်ခိုက်ဖို့ပြန်လာကြပါတယ်။

သူတို့နိုင်ငံကို ကာကွယ်ဖို့ တိုက်ခိုက်ချင်တဲ့ ယူကရိန်းတွေရဲ့ စိတ်ဆန္ဒကသာ အရေးကြီးဆုံးပါ။ ပူတင်နဲ့ ရုရှားတွေ ယူကရိန်းကို သိမ်းပိုက်လို့မရအောင် အဆုံးစွန်သောအန္တရာယ်တွေကို ရင်ဆိုင်ဖို့နဲ့ လိုအပ်ရင် အသက်ကိုတောင် စွန့်လွှတ်ဖို့ အဆင်သင့်ဖြစ်နေပါတယ်။ ပူတင်က ယူကရိန်းဆိုတာ နိုင်ငံအနေနဲ့မရှိဘူး၊ ပြည်နယ်တစ်ခု အနေနဲ့လည်း ရပ်တည်ခွင့် မရှိဘူးလို့ ကြေညာထားပါတယ်။ ယူကရိန်းတွေက သူတို့နိုင်ငံဆိုတာ သက်သေပြဖို့နဲ့ လွတ်လပ်တဲ့ ပြည်နယ်ဖြစ်တယ်ဆိုတာ သက်သေပြဖို့ တိုက်ခိုက်ဖို့ အဆင်သင့်ပါပဲ။

ပြီးတော့ အဲ့ဒါတွေဟာ လက်နက်နဲ့ တိုက်ဖို့ အဆင်သင့်ဖြစ်နေတယ် ပြောတာ မဟုတ်ပါဘူး။ ယူကရိန်းဟာ လက်နက်အင်အားတစ်ခုတည်းနဲ့ သူတို့ကိုယ်သူတို့ ကာကွယ်နေတာ မဟုတ်ပါဘူး။ စေတနာ့၀န်ထမ်း သိန်းပေါင်းများစွာဟာ ဗုံးကြဲခံရတဲ့မြို့က ထွက်ပြေးလာတဲ့သူတွေကို လူသားချင်းဆိုင်ရာ အကူအညီပေးဖို့နဲ့ အခြားလိုအပ်တဲ့ အသုံး၀င်တဲ့ တာ၀န်တွေကို မလစ်ဟင်းရအောင် စီမံကြပါတယ်။ အရည်အချင်းရှိပြီး တီထွင်ကြံဆမှုကောင်းတဲ့ ယူကရိန်းတွေဟာ ၀ါဒဖြန့်ချိရေးနဲ့ စိတ်ဓာတ်စစ်ဆင်ရေး စစ်ပွဲတွေလည်း ပါ၀င်ပြီး အဲ့ဒီ စစ်ပွဲတွေကလည်း အောင်မြင်လုနီးပါး ဖြစ်နေပါပြီ။

ယူကရိန်း ခုခံကာကွယ်ရေးမှာ နိုင်ငံခြားသားစေတနာ၀န်ထမ်းတွေဟာ အရေးပါတဲ့အချက်လို့ ယုံကြည်ရင် မှားပါတယ်။ မကြာသေးမီက ယူကရိန်းကို အနောက်နိုင်ငံတွေက ပို့လိုက်တဲ့ လက်နက်တွေကို ကျွမ်းကျင်စွာ ကိုင်တွယ်အသုံးချနိုင်တဲ့ စစ်ရေးအတွေ့အကြုံရှိသူ နိုင်ငံခြားသား စေတနာ့ဝန်ထမ်းအနည်းငယ်တော့ ရှိပါတယ်။ ဒါပေမဲ့ ယူကရိန်းစစ်ပွဲမှာ နိုင်ငံခြားသားစေတနာ့ဝန်ထမ်းတွေကပဲ တိုက်ခိုက်ပြီး စစ်ပွဲကို ဆုံးဖြတ်ပေးမှာ မဟုတ်ပါဘူး၊ ယူကရိန်းတွေပဲ ဆုံးဖြတ်ပေးမှာဖြစ်ပါတယ်။

 ယူကရိန်းတို့ရဲ့ ခုခံကာကွယ်မှုက သူရဲကောင်းတွေလို ရဲရင့်ပြီး သူတို့နိုင်ငံကို ကာကွယ်ဖို့ အောင်မြင်ကောင်း အောင်မြင်ပါမယ်။ ဒါပေမဲ့ တန်ကြေး ကြီးပါတယ်။  ယူကရိန်းကနေ ဒုက္ခသည် တစ်သိန်းခွဲလောက် ထွက်လာပြီး အဲ့ဒီထက်လည်း ပိုများပါမယ်။ လူသားတွေ မြန်မြန်သေကြေနေကြတာ ဖြစ်ပါတယ်။ မြို့ရွာတွေ မရေတွက်နိုင်လောက်အောင် ဆိုးဆိုးရွားရွား ဖျက်ဆီးခံရပြီး ထပ်ပြီးလည်း ဖျက်ခံရဖို့ ရှိပါတယ်။ ပြီးတော့   နျူကလီးယားလက်နက်ကို ပူတင် ထုတ်မသုံးဘူးလို့လည်း မပြောနိုင်ပါဘူး။

ယူကရိန်းကို တိုက်ခိုက်သိမ်းပိုက်မယ့် ပူတင်ရဲ့ အင်အားကို သိသိသာသာ လျော့နည်းသွားအောင် အနောက်အုပ်စုက လုပ်နိုင်မယ်ဆိုရင်၊ အနောက်နိုင်ငံကုမ္ပဏီတွေ ရုရှားကနေ ထွက်သွားတာနဲ့ ရင်းနှီးမြှုပ်နှံမှုတွေ မလုပ်တော့တဲ့အခါမှာ ရုရှားစီးပွားရေး ယုတ်လျော့ပြီး ဆန္ဒပြမှုတွေ ရုရှားမှာဖြစ်လာရင်၊ သိမ်းပိုက်ချင်တဲ့ ရုရှားစစ်တပ်ကြောင့် သိသိသာသာဆုံးရှုံးသွားတဲ့ အရာတွေကို ယူကရိန်းတို့ စီမံခန့်ခွဲနိုင်တယ်ဆိုရင် မင်းအောင်လှိုင်နဲ့ စစ်ကောင်စီအပါအ၀င် တစ်ကမ္ဘာလုံးက စစ်အာဏာရှင်တွေ အားနည်းသွားပါလိမ့်မယ်။

ပူတင်နဲ့ ရုရှားကို   ရန်လိုတဲ့အာဏာရှင် အစိုးရတွေက ထောက်ခံပေးနေတာ ၁၀ နှစ် ၁၅နှစ်လောက် ရှိပါပြီ။ ရုရှားက အဲ့လို ထပ်လုပ်လို့မရတော့ပါဘူး။ နိုင်ငံပေါင်းများစွာက  အရပ်သားတွေ ရက်စက်စွာ ဖိနှိပ်ခံရချိန် ပူတင်က အာဏာရှင်တွေကို ထောက်ပံ့ပေးထားပေမဲ့ ဒီမိုကရေစီ ဖော်ဆောင်ရေးက ရှင်သန်လာဦးမှာပါ။

ဒါပေမဲ့ ပြည့်ပြည့်၀၀ ဖွံ့ဖြိုးဖို့အတွက် ကမ္ဘာလုံးဆိုင်ရာ အပြောင်းအလဲကတော့ နှေးကွေးပြီး မြန်မာနိုင်ငံအပေါ်  အကျိုးသက်ရောက်မှုလည်း နှေးကွေးပါလိမ့်မယ်။ ယူကရိန်းစစ်ပွဲနဲ့ အနောက်အုပ်စုရဲ့ တုံ့ပြန်မှုဟာ အစပဲရှိသေးတယ်ဆိုတာ မမေ့ပါနဲ့။ ဘယ်လောက်ကြာမယ်၊ နောက်ဆုံး ဘယ်လိုဖြစ်မယ်ဆိုတာနဲ့ နောက်ဆက်တွဲ ဘာတွေဖြစ်လာမလဲဆိုတာ မသိသေးပါဘူး။

အကြီးမားဆုံးသင်ခန်းစာကတော့ ယူကရိန်းနိုင်ငံသားများဟာ အမျိုးသားရေးလက္ခဏာနဲ့ ပတ်သက်တဲ့အယူအဆ၊ လွတ်လပ်ရေးနဲ့ လွတ်လပ်မှုဆိုင်ရာ အယူအဆတွေမှာ အပြည့်အဝ စည်းလုံးညီညွတ်ကြပါတယ်။ 

မြန်မာနိုင်ငံမှာတော့ ဖယ်ဒရယ်ဒီမိုကရေစီဆိုတဲ့ အယူအဆနောက်မှာ ညီညွတ်ကြပြီး ဖိနှိပ်တဲ့ စစ်အာဏာရှင်ရဲ့ အောက်ကနေ တိုင်ပြည်နဲ့ လူမျိုး ထာဝရလွတ်မြောက်လိုတဲ့ ရဲ့ရင်တဲ့ နိုင်ငံသားတွေရယ်၊ နိုင်ငံရေးအရ လက်နက်ကိုင်တဲ့အဖွဲ့နဲ့ သက်ဆိုင်သူတွေ အများအပြားရှိပါတယ်။ သို့သော် အခြား ခြံစည်းရိုးခွထိုင်နေသူတွေလည်း ရှိပါတယ်။ တချို့တွေက အခုအရေးအခင်းကို သူတို့ကိုယ်ကျိုးအတွက် အသုံးချနေပါတယ်။ စစ်အစိုးရနဲ့လည်း မပေါင်းဘူး၊ ဘယ်သူနဲ့မှလည်း မပေါင်းဘူး၊ ဖယ်ဒရယ်အရေးနဲ့ ပတ်သက်ပြီးတော့တောင် ဝင်မပါချင်ကြပါဘူး။ ငြိမ်းချမ်းရေးလည်း မရစေချင်၊ စစ်လည်းမဖြစ်ချင်ပဲ သူတို့ မှောင်ခိုစီးပွားရေးအတွက် အကျိုးရှိမဲ့ အကောင်းဆုံးအချိန်ကိုပဲ သဘောကျတဲ့ သူတွေလည်းရှိပါတယ်။ ဒါကတော့ ယူကရိန်းနဲ့ မြန်မာကို ယှဉ်ပြီး ကျွန်တော်ရတဲ့ သင်ခန်းစာပါ။

ဒီအချိန်မှာ ယူကရိန်းအစိုးရရတဲ့ အောင်မြင်မှုနဲ့ NUG ရတဲ့ အောင်မြင်မှုချင်း နှိုင်းယှဉ်ပြောတာဟာ မမျှတဘူးခင်ဗျ။ ပထမဆုံးအနေနဲ့ကတော့ ယူကရိန်းအစိုးရနဲ့ NUG တို့ဟာ မတူညီတဲ့ ပထဝီနိုင်ငံရေးမှာ ဆောင်ရွက်ရတာဖြစ်ပါတယ်။ ဥရောပအိမ်နီးချင်းနိုင်ငံတွေက ယူကရိန်းအစိုးရကို ထိထိရောက်ရောက် အကူအညီပေးဖို့ အသင့်ဖြစ်နေပါတယ်။ မြန်မာ့အိမ်နီးနားချင်းဖြစ်တဲ့ ထိုင်း၊ တရုတ်နဲ့ အိန္ဒိယတို့ဟာ မြို့တွေ ရွာတွေ ဗုံးကြဲခံရ မီးရှို့ခံရလို့ ဖြစ်လာတဲ့ ဒုက္ခသည်တွေကိုတောင် လူသားချင်းစာနာထောက်ထားမှုဆိုင်ရာ အကူအညီပေးဖို့ လမ်းဖွင့်ပေးဖို့ အဆင်သင့်ဖြစ်မနေတာကို တွေ့ရပါတယ်။

ဆိုတော့ဗျာ … သမ္မတ ဇလန်းစကီးနဲ့ NUG ကို နှိုင်းယှဉ်မဲ့အစား ယူကရိန်းရဲ့ ဥရောပအိမ်နီးချင်းနိုင်ငံတွေရဲ့ ညီညွတ်မှုနဲ့ ယုတ်မာပြီး ကြောင်သူတော် ကြွက်သူခိုးလိုလုပ်နေတဲ့ မြန်မာ့အိမ်နီးချင်းနိုင်ငံတွေ ညီညွတ်မှု မရှိတာကိုပဲ နှိုင်းယှဉ်သင့်ပါတယ်။

ယူကရိန်းအစိုးရက  တိုင်းပြည်ရဲ့ နယ်မြေအတော်များများကို ထိန်းချုပ်နိုင်ပြီး ပြည်သူလူထုအားလုံးနီးပါးကိုလည်း လွှမ်းမိုးထားနိုင်ပါတယ်။ အဲဒါက ကိုယ်ပိုင်စစ်တပ်နဲ့ နိုင်ငံတော်ကို အုပ်ချုပ်နေတာပါ။ ပြည်ပရန်သူတွေ တိုက်ခိုက်တာခံရပေမဲ့ နိုင်ငံတစ်ခုအနေနဲ့ ရှိနေတုန်းပါ။ NUG မှာ အဲဒါတွေ လုံးဝမရှိပါဘူး။ ခုခံစစ်က အများကြီး အောင်မြင်မှုတွေ ရပါတယ်။ အဲဒါက NUG က လုပ်ဆောင်ပေးလို့ မဟုတ်ပါဘူး။ လူတော်တော်များများက ကိုယ်စီဆောင်ရွက်ကြလို့ ဖြစ်ပါတယ်။ သို့သော် NUG က ဆောင်ရွက်တာတွေ ရှိခဲ့သလို NUG ဟာ အရေးပါတဲ့ အခန်းကဏ္ဍမှာ ရှိတုန်းပါပဲ။

NUG ကို ယုံကြည်မှုလျော့မဲ့အစား ယူကရိန်းတို့ရဲ့ သူရဲကောင်းစိတ်ဓာတ်ကို ယူပြီး မြန်မာပြည်သူတွေဟာလည်း ယူကရိန်းသူရဲကောင်းတွေလိုပဲ အထင်ကြီးလေးစားစရာကောင်းတာကို နားလည်သဘောပေါက်ရမှာပါ။ မင်းအောင်လှိုင်နဲ့ စစ်ကောင်စီကို ဆန့်ကျင်တဲ့ ဘုံတိုက်ပွဲမှာ မတူညီတဲ့ အင်အားစုတွေ၊ နိုင်ငံရေးလက်နက်ကိုင်တွေနဲ့ အရပ်သားတွေ စုစည်းပြီး လူမှုစီးပွားညီညွတ်မျှတတဲ့ အနာဂတ်ဖယ်ဒရယ်မြန်မာနိုင်ငံကို တည်ဆောက်ကြပါ။

ယူကရိန်းနိုင်ငံသားတွေဟာ သူတို့တိုင်းပြည်ကို ကာကွယ်ဖို့နဲ့ လွတ်မြောက်ဖို့ အပြင်းအထန် တော်လှန်နေရဦးမှာပါ။ မြန်မာနိုင်ငံသားတွေလည်း အာဏာရှင်ကို အောင်နိုင်ဖို့နဲ့ စစ်တပ်အောက်က လွတ်မြောက်ပြီး ဖယ်ဒရယ်ဒီမိုကရေစီတိုင်းပြည်တည်ဆောက်ဖို့ အပြင်းအထန် တော်လှန်နေရဦးမှာပါပဲ။ နှစ်နိုင်ငံစလုံး အောင်မြင်နိုင်ပါတယ်၊ အောင်မြင်လိမ့်မယ်လို့လည်း ကျွန်တော်ယုံကြည်ပါတယ်ဗျာ။

(ချက်သမ္မတနိုင်ငံ Prague Civil Society Centre ၏ အကြီးတန်းအကြံပေး Igor Blazevic သည် မြန်မာ့အရေးတက်ကြွလှုပ်ရှားသူများအတွက် သင်တန်းအစီအစဉ်တစ်ခုဖြစ်သော ထိုင်းနိုင်ငံအခြေစိုက် ပညာ့ရှေ့ဆောင်အဖွဲ့၏ ဒါရိုက်တာလည်း ဖြစ်သည်။ Myanmar Now က ဆက်သွယ်မေးမြန်းအပြီး သူပြန်လည်ပေးပို့လာသော အဖြေများကို ဘာသာပြန်ကာ စုစည်း ဖော်ပြထားခြင်း ဖြစ်ပါသည်) myanmar now