SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် မန္တလေးမြို့သို့ ဧပြီ ၁၂ ရက်တွင် ရောက်ရှိနေသည်ဟု သတင်းများ ထွက်ပေါ်နေ၍ မြို့ခံပြည်သူများကို စစ်ကောင်စီတပ်များက မြို့အနှံ့ ပိတ်ဆို့တားဆီးစစ်ဆေးမှုများ ပြုလုပ်နေကြောင်း သိရသည်။

“အကြောက်လွန်ပြီး တစ်မြို့လုံးကင်းပုန်းချထားတယ်။ လမ်းမကြီးတွေမှာ စစ်ကောင်စီတပ်က ၁၀ ယောက်တစ်ဖွဲ့စီလောက် စစ်ဝတ်စုံအပြည့်နဲ့ စစ်ဆေးရေးတွေ လုပ်တယ်။ အဓိက က မော်တော်ဆိုင်ကယ်တွေကို စစ်တယ်။ ကားဆိုလည်း တံခါးအကုန်ဖွင့်ပေးရတယ်။ အကြောက်လွန်ပြီး တစ်မြို့လုံးကို ပိတ်ဆို့ထားတယ်” ဟု မန္တလေးမြို့ခံတစ်ဦးက ပြောသည်။

စစ်ကောင်စီဥက္ကဋ္ဌသည် ဧပြီ ၁၃ ရက်၊ သင်္ကြန်အကြိုနေ့တွင် ကျင်းပမည့် မန္တလေးမြို့တော် ဗဟိုမဏ္ဍပ်ဖွင့်ပွဲ အခမ်းအနား တက်ရောက်ရန် မန္တလေးမြို့သို့ ရောက်ရှိနေသည်ဟု သတင်းများထွက်ပေါ်နေသလို ပြင်ဦးလွင်မြို့တွင် ရောက်ရှိနေသည်ဟုလည်း သတင်းများ ထွက်ပေါ်နေ သည်။

“ကျွန်တော်တို့ဆီမှာလည်း တစ်မြို့လုံး တစ်နေကုန်ပိတ်ဆို့စစ်ဆေးတယ်။ ကင်းပုန်းကနေရာ အနှံ့မှာရှိနေတယ်။ စစ်တပ်နဲ့အကျွမ်းတဝင်ရှိတဲ့ ဘုန်းကြီးကျောင်းနှစ်ကျောင်းမှာ စစ်အုပ်စု ခေါင်းဆောင်တွေ သင်္ကန်းဝတ်နေကြတယ်လို့လည်းကြားတယ်” ဟု ပြင်ဦးလွင်မြို့ခံ သတင်းရင်း မြစ်က ပြောသည်။

စစ်ကောင်စီဥက္ကဋ္ဌ သည် ပြီးခဲ့သည့် ဧပြီလ ၈ ရက်နှင့် ၉ ရက်နေ့များတွင် လားရှိုး ၊ သိန္နီစသည့်ရှမ်းပြည်မြောက်ပိုင်းမြို့များသို့သွားရောက်ခဲ့ပြီး ထိုမှတစ်ဆင့် မန္တလေးတိုင်းဒေသကြီး ပြင်ဦးလွင်မြို့နှင့် မန္တလေးမြို့များသို့ ရောက်ရှိနေသည်ဟု သတင်းထွက်ပေါ်နေခြင်းဖြစ်သည်။mizzima

ရခိုင်ပြည်နယ်တွင် စစ်ကောင်စီက အင်အားတိုးချကာ စစ်ရေးလှုပ်ရှားမှုများ ရှိနေသည့်နည်းတူ တိုက်ပွဲဝင်နိုင်ရေး အသင့်ရှိရန် ရက္ခိုင့်တပ်တော် (AA) စစ်ဦးစီးချုပ်က ၎င်း၏ တပ်ဖွဲ့ဝင်များကို သတိပေးလိုက်သည်။

ကချင်လွတ်လွတ်ရေးတပ်မတော် (KIA) ၏ လိုင်ဇာမြို့တော်တွင် ဧပြီ ၁၀ ရက်က ကျင်းပပြုလုပ်သော AA ထူထောင်ခြင်း ၁၃ နှစ်ပြည့်အခမ်းအနားတွင် စစ်ဦးစီးချုပ်ဖြစ်သူ ဗိုလ်ချုပ်ထွန်းမြတ်နိုင်က အထက်ပါအတိုင်း သတိပေးပြောဆိုခြင်းဖြစ်သည်။ 

“ရဲဘော်တို့ စစ်ရေးသတိကို မည်သည့်အခါမှ မပေါ့ဆကြနဲ့။ ဗဟိုက အမိန့်ပေးလာတာနဲ့ တိုက်ပွဲဝင်နိုင်ဖို့ အဆင်သင့်ရှိနေကြပါ” 

အာဏာမသိမ်းမီက ရခိုင်ပြည်နယ်မြောက်ပိုင်းနှင့် ချင်းပြည်နယ်တောင်ပိုင်းတွင် စစ်တပ်နှင့် တိုက်ပွဲများ အပြင်းအထန်ဆင်နွှဲခဲ့သော AA ကို ၂၀၀၉ ခုနှစ် ဧပြီလတွင် တပ်ဖွဲ့ဝင် ၂၆ ဦးဖြင့် စတင်ဖွဲ့စည်းခဲ့ခြင်းဖြစ်သည်။​

လူ ၂၆ ယောက်၊ သေနတ်တစ်လက်ဖြင့် စတင်ထူထောင်ခဲ့သော AA မှာ လက်ရှိတွင် တပ်ဖွဲ့ဝင်အင်အား ရှစ်သောင်းခန့်ရှိပြီဖြစ်ကြောင်း ၎င်းနှင့် မဟာမိတ်ဖြစ်သော မြန်မာအမျိုးသားဒီမိုကရက်တစ်မဟာမိတ်တပ် (MNDAA) တည်ထောင်သူ ဦးဖုန်ကြားရှင်၏ ဈာပနအခမ်းအနား တက်ရောက်စဉ် ဗိုလ်ချုပ်ထွန်းမြတ်နိုင်က ပြောဆိုသည်။​

ရခိုင်ပြည်နယ်မြောက်ပိုင်း ဘူးသီးတောင်မြို့နယ်တွင်လည်း AA ထူထောင်ခြင်း ၁၃ နှစ်ပြည့်အခမ်းအနား ကျင်းပခဲ့ကြောင်း သိရပြီး ပြီးခဲ့သည့်လများအတွင်း စစ်ကောင်စီနှင့် AA ကြား စစ်ရေးအရ ထိတွေ့တိုက်ပွဲများ ရှိခဲ့ပြီးနောက် နှစ်ဖက်အပြန်အလှန် စောင့်ကြည့်နေချိန်လည်းဖြစ်သည်။​

ရခိုင်ပြည်နယ်မြောက်ပိုင်း ဘူးသီးတောင်၊ မောင်တော၊ ရသေ့တောင်၊ ပုဏ္ဏားကျွန်း၊ ကျောက်တော်နှင့် တောင်ပိုင်းရှိ ကျောက်ဖြူ၊ ရမ်းဗြဲ၊ တောင်ကုတ်မြို့နယ်တို့တွင် စစ်ကောင်စီ၏ စစ်ရေးလှုပ်ရှားမှုများ တွေ့လာရကြောင်း ဒေသခံများထံမှ သိရသည်။​

မောင်တောမြို့နယ်မြောက်ပိုင်းတွင် စစ်ကောင်စီက နတ်မြစ်ဘက်မှ ပြုံးမချောင်းအတိုင်း စစ်ရေယာဉ်ဖြင့် လှည့်လည်ကာ အင်အားတိုးချနေကြောင်း ဘူးသီးတောင်မြို့နယ်မှ ဒေသခံ ကျေးရွာသားတစ်ဦးက Myanmar Now ကို ပြောသည်။​

“သူတို့ (စစ်တပ်) လှုပ်ရှားမှုက အရင်နဲ့ အခု မတူဘူး၊ ကွာတယ်။ ကွာတယ်ဆိုတာက မနေ့က တစ်နေ့တည်း ၃၀ တက်လိုက်၊ ၄၀ တက်လိုက်၊ ၅၀ တက်လိုက် အဲဒီလို အသုတ်လိုက်ဝင်လာတာတွေကို သာယာကုန်း၊ သင်္ဘောလကျေးရွာတွေမှာ တွေ့ရတယ်” ဟု အမည်မဖော်လိုသူ ထိုကျေးရွာသားက ပြောသည်။

တပ်ဖွဲ့ဝင်များ အဆင်သင့်ရှိရန် AA စစ်ဦးစီးချုပ်က ထုတ်ဖော်ပြောဆိုသည့်နည်းတူ စစ်ကောင်စီဘက်မှ ရှေ့ဆက်တိုးလာပါက တိုက်ပွဲဖြစ်နိုင်ခြေရှိသည်ဟုလည်း ၎င်းက ဆိုသည်။

ဘူးသီးတောင်နှင့် ဆက်လျက်ရှိ မောင်တောမြို့နယ်တွင် ပြီးခဲ့သည့် ဖေဖော်ဝါရီလအတွင်း AA နှင့် စစ်ကောင်စီတို့ တိုက်ပွဲဖြစ်ပွားခဲ့သည်။ သာယာကုန်းကျေးရွာမှာ ထိုစဉ်က တိုက်ပွဲဖြစ်ပွားရာနေရာနှင့် နှစ်မိုင်ခန့်သာဝေးပြီး သင်္ဘောလကျေးရွာမှာ မိုင်ဝက်ခန့်သာ ဝေးသည်ဟု သိရသည်။ 

အာဏာသိမ်းပြီးနောက် ရခိုင်ပြည်နယ်တွင် ၎င်း၏အာဏာစက်တည်ထောင်ရန် AA က ကြိုးပမ်းခဲ့ရာ လတ်တလောတွင် စစ်ကောင်စီက ဟန့်တားနှောက်ယှက်မှုများ ပြုလုပ်လာသည်။ 

ရခိုင်ပြည်နယ်အတွင်း ၎င်းတို့ လုပ်ဆောင်နေသော တရားစီရင်ရေးနှင့် အုပ်ချုပ်ရေးပိုင်းကို စစ်ကောင်စီဘက်က အနှောင့်အယှက်ပေးနေကြောင်း ယခုလဆန်းပိုင်းက ပြုလုပ်သော သတင်းစာရှင်းလင်းပွဲတွင် AA ပြောရေးဆိုခွင့်ရှိသူ ခိုင်သုခက ထုတ်ဖော်ပြောဆိုသည်။

ရခိုင်ပြည်နယ်တောင်ပိုင်းရှိ ကျောက်ဖြူ၊ ရမ်းဗြဲနှင့် တောင်ကုတ်မြိုနယ်တို့တွင် ရက္ခိုင်အမျိုးသားအဖွဲ့ချုပ် (ULA) ၏ တရားရေးဌာနကို စစ်ကောင်စီစစ်ကြောင်းက ဝင်ရောက်ရှာဖွေမှုများပြုလုပ်ခဲ့ပြီး ULA ၏ နယ်မြေခံတရားရုံးတစ်ချို့ကို ပိတ်ထားခဲ့ရသည်ဟု ၎င်းက ဆိုသည်။

“ULA တရားရေးဌာနမှာ အမှုတိုင်ထားတဲ့ အမှုသည်များကို ခေါ်ယူပြီး သူတို့ (စစ်တပ်) တရားရုံးမှာ တိုင်ရမယ်။ ULA တရားရုံးမှာ တိုင်ရင် ဥပဒေအရ ရေးယူမယ်ဆိုပြီးတော့ ပြည်သူများကို ခြိမ်းခြောက်နေတာ တွေရှိနေပါတယ်” ဟု ခိုင်သုခက ဆိုသည်။

ရခိုင်ပြည်နယ်မြောက်ပိုင်းတွင် အမှုအခင်းများ ပေါ်ပေါက်ပါက AA ထံ မတိုင်ကြားဘဲ ၎င်းတို့ကိုသာ တိုင်ကြားရန် ကျေးရွာအုပ်ချုပ်ရေးမှူးများကို စစ်ကောင်စီက ခေါ်ယူသတိပေးမှုများရှိနေသည်ဟု ဘူးသီးတောင်မြို့နယ်မှ ဒေသခံတစ်ဦးက ပြောသည်။​

“မြို့နယ်ထွေအုပ်က သူတို့ ခန့်ထားတဲ့ အုပ်ချုပ်ရေးမှူးတွေကို AA ဆီမှာ မတိုင်ကြနဲ့၊ သူတို့က အစိုးရမဟုတ်ဘူး။ ငါတို့က အစိုးရ အဲဒီလိုမျိုး။ စစ်တပ်ကတော့ ရသေ့တောင်တောင်ပိုင်းဘက်တွေမှာ အင်အား ၇၀၊ ၁၀၀ ဝန်းကျင်အထိ စစ်ရေးလှုပ်ရှားတာတွေရှိတယ်” ဟု ထိုဒေသခံက ဆက်ပြောသည်။

ထို့ပြင် စစ်တွေမြို့နယ် အောင်တိုင်ကျေးရွာအုပ်စုမှ ရိုဟင်ဂျာ(မွတ်စလင်) ရာအိမ်မှူးအချို့ကို AA နှင့် ဆက်စပ်သည်ဟူသော သံသယဖြင့် စစ်ကောင်စီက ဧပြီ ၉ ရက်တွင် ဖမ်းဆီးသွားသည်ဟု ဒေသခံသတင်းဌာနအချို့က ရေးသားသည်။

ထိုသို့ တင်းမာနေမှုများကြောင့် ရခိုင်ပြည်နယ်တွင် တစ်ကျော့ပြန်တိုက်ပွဲဖြစ်လာနိုင်ကြောင်း ဒေသခံများ ယူဆနေသည်။​

”AA က လူတွေ သတိပေးတာရှိတယ်။ ဆယ်တန်းစာမေးပွဲပြီးလို့ သင်္ကြန်လွန်ရင် တိုက်ပွဲဖြစ်ဖို့ဘက်များတယ်။ ပြည်သူတွေရဲ့ စားဝတ်နေ‌‌‌ရေးအတွက် ဆန်တွေ၊ မီးသွေးတွေ ကြိုပြင်ထားကြဆိုပြီး ပြောတာရှိတယ်” ဟု ဘူးသီးတောင်မြို့နယ်မှ အခြားဒေသခံ အမျိုးသားတစ်ဦးက ပြီးခဲ့သည့်လအတွင်း ပြောသည်။ 

စစ်ကောင်စီ၏ လှုပ်ရှားမှုများအပေါ် အထူးသတိထားစောင့်ကြည့်နေပြီး စစ်ရေးအရ ထိပ်တိုက်တွေ့လာနိုင်သည်ဟု AA ပြောခွင့်ရပုဂ္ဂိုလ်က သတင်းစာရှင်းလင်းပွဲတွင် ထည့်သွင်းပြောဆိုခဲ့သည်။​myanmar now

စစ်ကိုင်းတိုင်း၊ ယင်းမာပင်မြို့နယ် ဘန့်ဘွေးကျေးရွာအုပ်စုမှ ကံစုရွာနှင့် ညောင်ငုတ်တိုရွာများရှိ ပြည်သူများ၏နေအိမ်များကို ယနေ့ ဧပြီလ ၁၂ ရက် နံနက် ၁၀ နာရီခွဲတွင် စစ်ကောင်စီတပ်က စတင် မီးရှို့ခဲ့ကြောင်း သိရသည်။

မီးရှို့မှုကြောင့် ကံစုရွာရှိ အိမ်ခြေ ၄၀ ခန့်နှင့် ညောင်ငုတ်တို တောပြင်ရွာမှ အိမ်ခုနှစ်လုံး မီးလောင်ပြာကျ သွားကြောင်း ဒေသခံတစ်ဦးက ပြော သည်။

“ဘန့်ဘွေးမှာတပ်စွဲထားတဲ့ စခ(စစ်ကောင်စီတပ်)တွေဗျ။ မနက် ၁၀ နာရီလောက်မှာ ညောင်ငုတ်တို တောပြင်ကိုရောက်ပြီး မီးစရှို့တယ်။ ညောင်ငုတ်တို တောပြင်ကတော့ အိမ်ခြေခုနှစ်လုံးလောက် ပါသွား တယ်။ ညောင်ငုတ်တိုတောပြင်ကိုမီးရှို့ပြီး ကံစုရွာဘက်ကိုထွက်သွားတယ်။ မကြာပါဘူး ကံစုရွာအထက် က မီးခိုးတွေ အူတက်လာတာကို တွေ့ရတယ်။ ကံစုရွာကတော့ အိမ်ခြေ ၄၀ လောက်ပါသွားတယ်” ဟု ဖြစ်စဉ်ကို ၎င်းကရှင်းပြသည်။

ယမန်နေ့ကလည်း ဘန့်ဘွေးကျေးရွာအုပ်စု ရေသောက်ကန်တောပြင်ရွာရှိ ပြည်သူများ၏နေအိမ်များကို စစ်ကောင်စီတပ်ကမီးရှို့ခဲ့ကြောင်း၊ မီးရှို့ခံရသည့်ရွာသုံးရွာမှ စစ်ဘေးရှောင်များ သောက်ရေ၊ သုံးရေနှင့် စားဝတ်နေရေး အခက်အခဲများ ရှိနေကြောင်း ဒေသခံက ပြောသည်။mizzima

ကရင်ပြည်နယ်၊ ဘားအံမြို့ ပြည်သူ့ဆေးရုံကြီးမှာ ဒဏ်ရာရ စစ်ကောင်စီတပ်ဖွဲ့ဝင်တွေ အများအပြား ဆေးကုသမှုခံယူနေရတယ်လို့  ဆေးရုံအသိုင်းအဝိုင်းကနေ သိရပါတယ်။

ကရင်အမျိုးသားအစည်းအရုံး ကေအန်ယူနယ်မြေမှာ အခုသီတင်းပတ်တွေအတွင်း စစ်ကောင်စီတပ်တွေနဲ့ KNLA ပူးပေါင်းတပ်တွေ တိုက်ပွဲတွေ ခပ်စိပ်စိပ်ဖြစ်ပွားနေရာမှာ စစ်ကောင်စီတပ်ဖွဲ့ဝင်တွေ သေဆုံးသူနဲ့ဒဏ်ရာရသူတွေများနေတာဖြစ်ပါတယ်။ 

တောင်ကလေးကျေးရွာမှာအခြေစိုက်တဲ့ အမှတ် ၁၀ စစ်မြေပြင်ဆေးတပ်ရင်း (ခုတင် ၁၀၀) ဆေးရုံမှာ ဒဏ်ရာရ စစ်ကောင်စီတပ်သားတွေ ဆေးကုသမှုခံယူဖို့ ခုတင်မဆံ့တော့တဲ့အတွက်  ဘားအံပြည်သူ့ဆေးရုံကြီးမှာပါ ပြောင်းရွှေ့ ဆေးကုသခံယူနေရတာပါ။

ဘားအံပြည်သူ့ဆေးရုံကြီး၊ ကျန်းမာရေးဝန်ထမ်းတစ်ဦးက “တောင်ကလေးစစ်ဆေးရုံက ဆေးကုသဖို့ နေရာမလုံလောက်တဲ့အတွက်လည်း ဖြစ်နိုင်သလို သူနာပြုအခက်အခဲလည်းရှိပုံရတယ်။ ဒါကြောင့် ဆေးရုံမှာ  ပြောင်းရွှေ့ပြီး ဒဏ်ရာရသူတွေကို ဆေးကုသပေးနေရတယ်။ ဒဏ်ရာရတဲ့သူတွေက နေတိုင်းရှိတယ်”လို့ ပြောပါတယ်။

ကေအန်ယူ တပ်မဟာ ၁ ၊ တပ်မဟာ ၅ နဲ့ တပ်မဟာ ၆ နယ်မြေတွေမှာ စစ်ကောင်စီတပ်တွေက  နယ်မြေကျူးကျော်ဝင်ရောက်လာပြီးနောက်   စစ်ရေးလှုပ်ရှားနေတဲ့အတွက် စစ်ကောင်စီတပ်တွေနဲ့ KNDO ၊ KNLA ပူးပေါင်းတပ်တွေနဲ့ နေ့စဉ်တိုက်ပွဲတွေဖြစ်ပွားနေသလို စစ်ကောင်စီက မြေပြင်လက်နက်ကြီးနဲ့ လေကြောင်းကနေ ဗုံးကြဲတိုက်ခိုက်မှုတွေကြောင့် တိုက်ပွဲတွေက ပိုမိုပြင်းထန်လာပါတယ်။

တိုက်ပွဲမှာ ဒဏ်ရာရရှိတဲ့ စစ်ကောင်စီတပ်ဖွဲ့ဝင်တွေကို သွားရောက်တင်ဆောင်ရာမှာ ဘားအံလူမှုကူညီရေးအသင်းကကားတွေကို အကူအညီတောင်းခံပြီး သွားရောက် တင်ဆောင်ရတာတွေရှိတယ်လို့ ဆရာဝန်တစ်ဦးက ပြောပါတယ်။

ဧပြီ ၁၀ ရက်နေ့လယ်က  မြဝတီမြို့တောင်ဘက် လေးကေ့ကော်မြို့သစ်မှာ စစ်ကောင်စီတပ်နဲ့ KNLA ပူးပေါင်းတပ်တို့ ဖြစ်ပွားနေတဲ့ တိုက်ပွဲအတွင်း စစ်ကောင်စီလေတပ်က MiG -29 တိုက်လေယာဉ် ၂ စီးနဲ့ တိုက်ပွဲဖြစ်ပွားနေရာကို လာရောက်ဗုံးကြဲခဲ့တာမှာ  စစ်ကောင်စီတပ်ဖွဲ့ဝင်တွေကို မှားယွင်းပြီး ဗုံးကြဲတိုက်ခိုက်ခဲ့ပါတယ်။

စစ်ကောင်စီလေတပ်က မှားယွင်းဗုံးကြဲခဲ့တဲ့အတွက် တပ်မ ၄၄ လက်အောက်ခံ  အမှတ် ၂၀၇ တပ်ရင်းစစ်ကြောင်းက တပ်ဖွဲ့ဝင် ၄၀ ကျော်သေဆုံးခဲ့သလို တိုက်ပွဲအတွင်း သေဆုံး၊ ဒဏ်ရာရရှိသူ အများအပြားရှိခဲ့ပါတယ် DVB

လက်နက်ကြီး၊ လက်နက်ငယ်များဖြင့် နှစ်ဖက်ပစ်ခတ်သံများ ဆူညံနေသည့်အချိန် အားမလို၊ အားမရ စိတ်ဖြင့် ကတုတ်ကျင်းထဲက အပေါ်ကိုတက်ပစ်လိုက်သော ရဲဘော်မော်ကွန်းသစ်၏ နံဘေးကို ၁၂၀ မမ လက်နက်ကြီးတစ်လုံး ကျရောက် ပေါက်ကွဲခဲ့သည်။

ထိုအချိန်တွင် ရဲဘော်မော်ကွန်းသစ်၏ ခန္ဓာကိုယ်အစိတ်အပိုင်းများကို လက်နက်ကြီးအစထိမှန်ပြီး ရုတ် တရက် ထိုးလဲကျသွားခဲ့သည်။

ယင်းနောက် တိုက်ပွဲများဖြစ်ပွားနေချိန် မိနစ်ပိုင်းအကြာမှာပဲ နောက်ထပ် ရဲဘော်အောင်မင်းခန့်သည် လည်း ဦးခေါင်းကို စနိုက်ပါထိမှန်ပြီး ကျဆုံးသွားသည်။

ထိုအဖြစ်အပျက်ကို ၎င်းတို့နှင့်အတူ တိုက်ပွဲဝင်နေသူ ရဲဘော်တစ်ဦးက မဇ္ဈိမကို ပြန်ပြောင်းပြောပြခြင်း ဖြစ်သည်။

ကရင်အမျိုးသား လွတ်မြောက်ရေးတပ်မတော် (KNLA) ထိန်းချုပ်နယ်မြေ(ကော်သူးလေ)၊ တပ်မဟာ (၆) လေးကေ့ကော်မြို့သစ်အနီးတွင် ဧပြီလ ၁၀ ရက်နေ့ နံနက် ၃ နာရီခန့်ကစတင်ပြီး KNLA ၊ ပြည်သူ့ ကာကွယ်ရေးပူးပေါင်းတပ်နှင့် အာဏာသိမ်း စစ်ကောင်စီတပ်တို့အကြားဖြစ်ပွားသောတိုက်ပွဲတွင် ၎င်းတို့ နှစ်ဦး ကျဆုံးခဲ့ခြင်းဖြစ်သည်။

လေးကေ့ကော်မြို့သစ်၏ အရှေ့တောင်ဘက်ရှိ ဇီးရိုးကုန်းပေါ်(စစ်ရေးအခေါ်အဝေါ်)တွင် ရဲဘော် မော် ကွန်းသစ်နှင့် ရဲဘော်အောင်မင်းခန့်တို့ပါဝင်သည့် လင်းယုန်စစ်ကြောင်းမှ ပြည်သူ့ကာကွယ်ရေးတပ်ဖွဲ့ဝင် များသည် မေတ္တာလင်းမြိုင်ဘက်နှင့် အမြောက်ကုန်းဘက်က ကျူးကျော်တက်လာသော အာဏာသိမ်း စစ်ကောင်စီတပ်ဖွဲ့ ဝင်များကို ခုခံတိုက်ခိုက်နေကြသည်။

လင်းယုန်စစ်ကြောင်းသည် လေးကေ့ကော်အခြေပြုလှုပ်ရှားနေသည့် Cobra စစ်ကြောင်းများအနက် တစ်ခုဖြစ်သည်။

“ မနက် ၃ နာရီလောက်မှာ တိုက်ပွဲအပြင်းအထန်ဖြစ်တယ်။ မေတ္တာလင်းမြိုင်၊ BGF ကုန်းနဲ့ အမြောက် ကုန်းကနေ ကျွန်တော်တို့ဘက်ကို စစ်ကောင်စီဘက်က စစ်ကြောင်းဝိုင်းထိုးတာပေါ့” ဟု မြေပြင်တိုက် ပွဲဝင်နေသည့် Cobra စစ်ကြောင်းက ရဲဘော်တစ်ဦးက ပြောသည်။

ရဲဘော်မော်ကွန်းသစ်နှင့် ရဲဘော်အောင်မင်းခန့်တို့ရှိနေသည့် ဇီးရိုးကုန်းနှင့် ကိုက် ၁၀၀၀ ဝန်းကျင်တွင် စစ်ကောင်စီတပ်က လက်နက်ကြီများဖြင့် အထိုင်နေရာယူထားသော အမြောက်ကုန်းတည်ရှိပြီး ယင်း အမြောက်ကုန်းက လက်နက်ကြီးများဖြင့် ဆက်တိုက်ပစ်ခတ်နေသည်။

ဒေသကာကွယ်ရေးတပ်ဖွဲ့ဝင်များက ဇီးရိုးကုန်းရှေ့တန်းစစ်မျက်နှာပြင်တွင် ကျူးကျော်လာသော စစ်ကောင်စီတပ်ဖွဲ့ဝင်များကို ခုခံပစ်ခတ်နေရင်း ယင်းနေ့ နံနက် ၇ နာရီခွဲဝန်းကျင်တွင် ရဲဘော် မော်ကွန်းသစ်နှင့် ရဲဘော်အောင်မင်းခန့်တို့ နှစ်ဦးသည် ရှေ့ဆင့်နောက်ဆင့်ပင် ကျဆုံးခဲ့ခြင်း ဖြစ်သည်။

“အဲဒီနေ့မနက်မှာ အဲညီလေးနှစ်ယောက်ကို ရှေ့က စစ်ပန်းတဲ့ ရဲဘော်နဲ့ သူတို့နဲ့ နေရာချင်းလဲလိုက်တာ ပေါ့ဗျာ။ ရှေ့မှာသူတို့တိုက်နေရင်းနဲ့ပဲ ညီလေးမော်ကွန်းသစ်က ကတုတ်ကျင်းထဲမှာ။ ဟိုဘက်ကတက် လာတဲ့ ရန်သူတွေကို ထပြီးတော့ တက်ပစ်လိုက်တာ။ ဘေးကရဲဘော်တွေက မတက်ပစ်နဲ့ဦးဆိုပြီးတော့ ဆွဲလိုက်တယ်။ သူတက်ပစ်တဲ့အချိန်မှာပဲ ဟိုဘက်ကပစ်တဲ့ ၁၂၀ မမ ထိသွားတယ်” ဟု ရှေ့တန်း ရဲဘော်က မော် ကွန်းသစ် ကျဆုံးခဲ့ပုံကို ပြောပြသည်။

“ ရဲဘော်အောင်မင်းခန့်လေးကတော့ ပွဲထဲမှာဖြစ်နေရင်းနဲ့ပဲ၊ ဟိုဘက်ပစ်၊ ဒီဘက်ပစ်တဲ့အချိန် ဟိုဘက်က စနိုက်ပါနဲ့ပစ်လိုက်တာ မိသွားတယ်” ဟု ၎င်းက ဆက်ပြောသည်။

၎င်းတို့နှစ်ဦး အသက်ကို အချိန်မီကယ်နိုင်ရန် ရှေ့တန်းကနေ ဆေးခန်းရှိသည့်နေရာသို့ သယ်ဆောင်ခဲ့ သော်လည်း လမ်းခုလတ်တွင်ပင် ကျဆုံးသွားခြင်းဖြစ်သည်ဟု ရှေ့တန်းဆေးတပ်ဖွဲ့ဝင် တစ်ဦးက ပြောပြ သည်။

၎င်းတို့၏ ရုပ်အလောင်းများကို ကော်သူးလေနယ်မြေတွင် ယင်းနေ့ နေ့လည်ပိုင်းက တိုက်ပွဲများအကြား သင်္ဂြိုဟ်ပေးခဲ့ကြရသည်။

ယင်းနေ့ ဧပြီလ ၁၀ ရက်နေ့တွင် နယ်မြေခံ KNLA ၊ Cobra ပူးပေါင်း စစ်ကြောင်းနှင့် အာဏာသိမ်း စစ်ကောင်စီတပ်တို့အကြား တစ်ရက်လုံးတိုက်ပွဲပြင်းထန်ခဲ့ပြီး CDM စစ်သားအရာရှိများကပင် KNLA ဘက်မှစစ်ကူဝင်ရောက် တိုက်ပေးခဲ့သည်။

ထိုတိုက်ပွဲတွင် စစ်ကောင်စီတပ်ဖွဲ့ဘက်ကလည်း အကျအဆုံးများခဲ့ပြီး စစ်ကောင်စီတပ်ဖွဲ့ဝင် သုံးပွင့်နှင့် ဗိုလ်ကြီးအဆင့် အရာရှိတစ်ဦးကို KNLA တပ်ဖွဲ့က အရှင်ဖမ်းမိခဲ့သည်။ ယင်းနောက် စစ်ကောင်စီဘက်က လေယာဉ်ဖြင့် (၂၂) ကြိမ်တိတိ လာရောက်ဗုံးကြဲတိုက်ခိုက်မှုများ ပြု လုပ်ခဲ့ကြောင်း မြေပြင်တိုက်ပွဲဝင်နေ သူများကဆိုသည်။

ယင်းနေ့တိုက်ပွဲတွင် နယ်မြေခံ KNLA နှင့် Cobra စစ်ကြောင်းဘက်ကမှု နောက်ထပ်အသေးစား ဒဏ်ရာ ရသူ ရဲဘော်လေးဦးရှိခဲ့ကြောင်း သိရသည်။

တိုက်ပွဲမဖြစ်ပွားမီ ဧပြီလ ၉ ရက်နေ့ ညပိုင်းတွင် ထိုတောင်ကုန်းပေါ်သို့ စစ်ကောင်စီ၏ တရုတ်နိုင်ငံထုတ် မောင်းသူမဲ့ ကင်းထောက်ဒရုန်းငယ်တစ်စီး လာရောက်ပျံဝဲမှုများ ရှိခဲ့သည်။

ကျဆုံးသွားသော ရဲဘော်မော်ကွန်းသစ်နှင့် ရဲဘော်အောင်မင်းခန့်တို့ နှစ်ဦးစလုံးသည် ဆယ်ကျော်သက် အရွယ် တက္ကသိုလ်ကျောင်းသား ခေတ်ပ ညာတတ် လူငယ်၊ လူရွယ်များ ဖြစ်ကြသည်။

အသက် (၁၈) နှစ်အရွယ် ရဲဘော်မော်ကွန်းသစ်သည် ရခိုင်ပြည်နယ်၊ ကျောက်ဖြူဇာတိ၊ ရခိုင်လူငယ်ဖြစ် ပြီး ရန်ကုန်အဝေးသင်တက္ကသိုလ်တွင် တက်ရောက်နေသော ကျောင်းသားတစ်ဦးဖြစ်သည်။ စစ်တပ်က အာဏာသိမ်းပြီးနောက် CDM ပြုလုပ်ကာ စစ်အာဏာရှင်ဆန့်ကျင်ရေး ဆန္ဒပြပွဲများတွင် တက်ကြွစွာ ပါဝင်ခဲ့သည်။

စစ်တပ်က ငြိမ်းချမ်းစွာဆန္ဒပြသူများကို အကြမ်းဖက်ဖြိုခွင်း၊ ဖမ်းဆီးမှုများ ပြုလုပ်လာချိန် အောက်တို ဘာလတွင် KNU လွတ်မြောက်နယ် မြေသို့ရောက်ရှိလာပြီး အခြေခံစစ်ပညာကို နှစ်လကြာသင်ယူပြီး နောက် Cobra စစ်ကြောင်းလက်အောက်ခံ၊ လင်းယုန်စစ်ကြောင်းတွင် တာဝန်ကျခဲ့သည်။

ရဲဘော်မော်ကွန်းသစ် သင်တန်းဆင်းကာ တာဝန်ကျပြီး ရက်ပိုင်းအကြာ ဒီဇင်ဘာလ ၁၅ ရက်နေ့တွင် စစ်ကောင်စီတပ်ဖွဲ့၏ ကျူးကျော်ဝင်ရောက်လာမှုကြောင့် လေးကေ့ကော်တိုက်ပွဲ စတင်ခဲ့သည်။

ထိုတိုက်ပွဲတွင်ပင် သင်တန်းဆင်းပြီးကာစ ရဲမော်ကွန်းသစ်သည် တက်တက်ကြွကြွဖြင့် တာဝန်ကျေပွန်စွာ တိုက်ပွဲဝင် ခဲ့သူဖြစ်ကြောင်း ၎င်းနှင့်နီးစပ်သူ ရဲဘော်တစ်ဦးက ပြောသည်။

“ရဲဘော်မော်ကွန်းသစ်က တကယ့်ကို နုနုဖတ်ဖတ်၊ အသားရည်ဆိုရင် မိန်းမချော ချောတဲ့ပုံစံမျိုးထဲမှာပါ တယ်။ ဒီကလေးက တော်တော်အချစ်ခံရတယ်။ တိုင်းရင်းသားလူမျိုးလေးဆိုတော့ စကားဝဲဝဲလေးနဲ့ လူတကာရဲ့ အချစ်ခံရတယ်။ ကူညီတတ်တယ်။ တော်တော်သံယောဇဉ်ရှိတယ်။ လူကြီးတွေရဲ့ အချစ်ကို လည်း ခံရတယ်။ ပေးအပ်တဲ့တာဝန်ကိုလည်း အမြဲတမ်းကျေပွန်တယ်” ဟု နီးစပ်သူ ရဲဘော်က ပြောပြ သည်။

နောက်ထပ်ရဲဘော်တစ်ဦးဖြစ်သူ ရဲဘော်အောင်မင်းခန့်သည်လည်း အသက် (၂၀) ဝန်းကျင်အရွယ်ဖြစ်ပြီး ရန်ကုန်အဝေးသင်တက္ကသိုလ်တွင် တက်ရောက်ပညာသင်ကြားနေသော ကျောင်းသားတစ်ဦးဖြစ်သည်။

၎င်းသည်လည်း Cobra စစ်ကြောင်းကို စက်တင်ဘာလလောက်တွင် ရောက်လာခဲ့ပြီး နှစ်လကြာ စစ်ပညာ သင်ယူပြီးနောက် ရှေ့တန်းစစ်မြေ ပြင်တွင် တိုက်ပွဲအတွေ့အကြုံရှိသူဖြစ်လာသည်။

ရဲဘော်မော်ကွန်းသစ်နှင့် ရဲဘော်အောင်မင်းခန့်တို့ နှစ်ဦးသည် ကျောင်းသားဘဝကတည်းက သိကျွမ်းခဲ့ သည့် သူငယ်ချင်းများ မဟုတ်သော် လည်း စစ်သင်တန်းဆင်းပြီးနောက် ရှေ့တန်းစစ်မြေပြင်ရောက်သည့် အချိန်တွင် တစ်ယောက်နှင့်တစ်ယောက် ရင်းရင်းနှီးနှီး ဆက်ဆံရေးရှိသည့် သူငယ်ချင်းများ ဖြစ်ကြသည် ဟု ရဲဘော်များက ပြောပြသည်။

ဧပြီလ ၁၀ ရက်နေ့ နံနက် ၇ နာရီခွဲတွင်မူ ၎င်းတို့နှစ်ဦးလုံးသည် စစ်အာဏာရှင်လက်ထက် ကော်သူလေး နယ်မြေတွင် အသက်ပေးသွားခဲ့ရသော အနာဂတ်လင်းလက်ကြယ်များအဖြစ် မိတ်ဆွေရဲဘော်များက အမှတ်ရနေကြသည်။

စစ်တပ်အာဏာသိမ်းပြီးနောက် လက်နက်ခဲယမ်းလိုအပ်ချက်များစွာဖြင့် စစ်အာဏာရှင်ကို ရရာလက်နက် စွဲကိုင်တော်လှန်ရင်း ထိုသို့အသက်ပေး သွားခဲ့ရသော နောက်ထပ် ပညာတတ်လူငယ်၊ လူရွယ်များစွာ လည်း ရှိနေသေးသည်။

“ငယ်ငယ်ရွယ်ရွယ်နဲ့ စာသင်ရမယ့်အချိန်မှာ တိုင်းပြည်အတွက် အသက်ငယ်ငယ်နဲ့ အများအကြီးပေးဆပ် နေရတယ်။ ကြယ်ကလေးတွေ ဒီလိုကြွေနေတဲ့အချိန်မှာ နေနိုင်တဲ့လူတွေက နေနိုင်သေးကြသေးတယ်။ သူတို့လို စိတ်ဓာတ်မျိုးတွေရှိစေချင်တယ်” ဟု Cobra စစ်ကြောင်းမှာ တာ ဝန်ထမ်းဆောင်နေသူ ရဲဘော် တစ်ဦးက ပြောကြားခဲ့သည်။mizzima

မန္တလေးတိုင်း၊ မတ္တရာမြို့နယ်၊ ကင်းကျေးရွာမှာ မီးရှို့ခံထားရတဲ့ ရုပ်အလောင်းနှစ်လောင်းကို ဧပြီ ၁၂ရက်နေ့က ထပ်မံတွေ့ရှိခဲ့ရတယ်လို့ ဒေ သခံတွေက ပြောပါတယ်။

ဧပြီလ ၁၁ ရက်နေ့ကလည်း ကင်းကျေးရွာသားနှစ်ဦးရဲ့ ရုပ်အလောင်းနှစ်ခုကို တွေ့ရှိခဲ့ရပြီး ဒီ မနက် အစောပိုင်းမှာ ရုပ်အလောင်းနှစ်လောင်းကို ထပ်မံတွေ့ရှိခဲ့တာလို့ ဆိုပါတယ်။

ဒီကနေ့ တွေ့တဲ့ ရုပ်အလောင်းတွေကိုတော့ ဘယ်သူဘယ်ဝါဆိုတာ အတည်မပြုနိုင်သေးဘူးလို့ ပကဖ(မတ္တရာ)ရဲ့ တာဝန်ရှိသူက ပြောပါတယ်။

“မီးရှို့ခံရတဲ့ အိမ်ရှင် မိသားစုတွေ မဟုတ်ဘူး။ မဟုတ်ဘူးဆိုတော့ စကစကပဲ ဖမ်းဆီးပြီးတော့ သတ်ပြီးမှ မီးရှို့လိုက်တာလား၊ ဒါမှ မဟုတ်ဘူးဆိုရင် ဖမ်းထားတဲ့လူတွေကို အရှင်လတ်လတ်ပဲ မီးရှို့သလားဆိုတာတော့ ကျနော်တို့ မသိရသေးဘူး” လို့ ပြောပါတယ်။

ကင်းကျေးရွာက နေအိမ်ငါးလုံးကို ဧပြီ ၈ ရက်နေ့က စစ်ကောင်စီတပ်တွေက မီးရှို့ဖျက်ဆီးခဲ့ပြီးတဲ့နောက် အဆိုပါ မီးလောင်ပြင်တွေကြားထဲကနေ အပုပ်နံ့တွေ ထွက်လာတာကြောင့် ‌ရှာဖွေချိန်မှာ ရုပ်အလောင်း ၂ လောင်း မနေ့က တွေ့ရှိခဲ့ရတာပါ။

လတ်တလောမှာတော့ ကင်းကျေးရွာမှာ နေထိုင်သူ မရှိသလောက်နီးနီး စွန့်ခွာသွားကြပြီလို့ သိရပါတယ်။ ကင်းကျေးရွာဟာ အိမ်ခြေ ၁၀၀၀ ကျော်ရှိပြီး လူဦးရေ လေးထောင်ကျော် နေထိုင်တယ်လို့ သိရပါတယ်။

ကင်းကျေးရွာမှာ တော်လှန်ရေးကာလအတွင်း စစ်ကောင်စီတပ်တွေရဲ့ ဖမ်းဆီးသတ်ဖြတ်ခံရတာ သံဃာတော် ၁ ပါး နဲ့ ပြည်သူ ၆ ဦး ရှိပြီဖြစ်ပြီး မတ္တရာ တမြို့နယ်လုံးမှာ စစ်တပ်ရဲ့ သတ်ဖြတ်ခံရသူအယောက်  ၂၀ ကျော် ရှိလာပြီလို့ သိရပါတယ်။DVB

ကြံခင်းမြို့ ပြည်သူ့ကာကွယ်ရေးတပ်ဖွဲ့ဝင် ကိုခင်သန်း(ခေါ်)ထက်ဝေယံလင်းသည် ဧပြီ ၁၁ ရက်နေ့ ည ၇ နာရီခန့်က ဧရာဝတီတိုင်း တစ်နေရာ၌ လက်လုပ်မိုင်း စမ်းသပ်ပြုလုပ်ရာ မတော်တဆ ပေါက်ကွဲ၍ ကျဆုံးခဲ့ကြောင်း ရိုးမဧရာဝတီ PDF အဖွဲ့က သိရသည်။

ကျဆုံးသူ ကိုခင်သန်း(ခေါ်)ထက်ဝေယံလင်း အသက် (၂၅) နှစ်သည် စစ်ကောင်စီ အာဏာသိမ်း ပြီးနောက် ကြံခင်းမြို့နယ် အတွင်းပြုလုပ်သည့် ဆန္ဒပြပွဲများတွင် တက်ကြွစွာပါဝင်ခဲ့သည်။ စစ်ကောင်စီတပ်များနှင့် ရဲများက လိုက်လံဖမ်းဆီးခဲ့သည့်အတွက် တိမ်းရှောင်နေရာက ရိုးမဧရာဝတီ PDF တပ်ဖွဲ့ဝင် တစ်ဦး ဖြစ်လာခဲ့သည်။

“မနေ့က ညပိုင်းမှာ မိုင်းဆင်နေရင်း မတော်တဆပေါက်ကွဲပြီးကျဆုံးခဲ့တာပါ။ ကျွန်တော်တို့ ရိုးမဧရာဝတီ တပ်ဖွဲ့အတွက် အစားထိုးမရတဲ့ ဆုံးရှုံးမှုတစ်ခုပါပဲ။ စစ်မှန်တဲ့ ဖက်ဒရယ် ပြည်ထောင်စု တည်ဆောက်ရေးအတွက် အမှန်တရားဘက်က ရဲရဲဝံ့ဝံ့ရပ်တည်ခဲ့တဲ့ သူ့အတွက်ကျွန်တော်တို့ အမြဲလေးစား ဂုဏ်ယူနေမှာပါ” ဟု ရိုးမဧရာဝတီ PDF တပ်ဖွဲ့ဝင်တစ်ဦးက ပြောသည်။

ရဲဘော်ခင်သန်းသည် ကြံခင်းမြို့နယ်အတွင်းရှိ စစ်အုပ်စုနှင့်ပတ်သက်သည်များကို ရိုးမဧရာဝတီ PDF တပ်ဖွဲ့ဝင်တစ်ဦးအနေဖြင့် ဖောက်ခွဲတိုက်ခိုက်မှုများ လုပ်ဆောင်ခဲ့ပြီး ၎င်း၏ ဇနီးဖြစ်သူမှာ CDM ကျောင်းဆရာမတစ်ဦးဖြစ်ကြောင်း ရိုးမဧရာဝတီ PDF အဖွဲ့ထံက သိရသည်။

” ကိုခင်သန်းက တော်လှန်ရေးသမားတစ်ယောက်ဖြစ်သလို သူ့မိန်းမကလည်း CDM ကျောင်းဆရာမတစ်ယောက်ပါ။သူတို့မှာ သုံးနှစ်အရွယ် သမီးလေးတစ်ယောက်ရှိတယ်။ ကိုခင်သန်းရဲ့မိန်းမက CDM လုပ်ထားတာမို့ ဝင်ငွေမရှိတာကြာပြီ။ ငွေရေးကြေးရေး အခြေအနေကြောင့် သမီးလေးကိုထားခဲ့ပြီးစင်္ကာပူမှာ အလုပ်သွားလုပ်နေတဲ့အချိန်မှာ ကိုခင်သန်းကျဆုံးသွားတာပါ။ မိသားစုနဲ့ထပ်တူ ကြေကွဲဝမ်းနည်းရပါတယ်”ဟု ရိုးမဧရာဝတီ PDF တပ်ဖွဲ့ဝင်ကပြောပြသည်။

ရိုးမဧရာဝတီ PDF သည်ကျဆုံးသူ ရဲဘော်ခင်သန်း အတွက် ဝမ်းနည်းကြောင်း သဝဏ်လွှာကို ဧပြီလ ၁၂ ရက်နေ့ မနက်ပိုင်းတွင် ထုတ်ပြန်ခဲ့ပြီး ၎င်း၏ရုပ်အလောင်းကို ဧပြီလ ၁၂ ရက်နေ့ ၊ နေ့လယ် ၁၂ နာရီ မိနစ်၃၀ တွင် ဧရာဝတီတိုင်းအတွင်း တစ်နေရာ၌ မြေမြုပ် သင်္ဂြိုဟ်ခဲ့သည်။mizzima

ဧရာဝတီတိုင်း၊ ပုသိမ်မြို့တွင် စစ်ကောင်စီလက်အောက်ခံ လက်နက်ကိုင်အဖွဲ့များက လိုက်လံဖမ်းဆီးနေ သည့်အတွက် ရှောင်တိမ်းနေကြသူ များ၏ မိသားစုဝင်များကို ဧပြီလ ၉ ရက် နှင့် ၁၀ ရက်နေ့များတွင် လိုက်လံဖမ်းဆီးခဲ့ကြောင်း ဒေသခံများထံမှသိရသည်။

ပုသိမ်မြို့တစ်ဖက်ကမ်း အမှတ်(၁၀) ရပ်ကွက်ရှိ ဦးသန်းမြင့်၏ဇနီးနှင့် သမီးအပါအဝင် နိုင်ငံရေးတက်ကြွ လှုပ်ရှားသူများ၏မိသားစုဝင်များကို စစ်ကောင်စီတပ်များနှင့်ရဲများက ဖမ်းဆီးသွားခြင်းဖြစ်ကြောင်း ဒေသခံ တစ်ဦးကပြောသည်။

” (၁၀)ရပ်ကွက်က ဦးသန်းမြင့်ရဲ့ မိန်းမနဲ့ သူ့သမီးအပါအဝင် ခုနစ်ယောက်ကို သူတို့(စစ်ကောင်စီတပ်များ) ဖမ်းချင်တဲ့လူတွေကိုမတွေ့လို့ဆိုပြီး မဆီမဆိုင်ဖမ်းသွားတာပါ။ ပုသိမ်(၆)ရပ်ကွက် ကုသိနာရုံအတွင်း လမ်းက ဦးဝင်းမြင့်ကိုလည်း သူ့သားကိုမတွေ့လို့ဆိုပြီး ဖမ်းသွားတယ်။ ပုသိမ်မြို့ပေါ်က တခြားရပ်ကွက် တွေမှာ လည်း အဲဒီလိုဖမ်းနေတာတွေရှိတယ်” ဟု ဒေသခံတစ်ဦးကပြောသည်။

ထိုသို့လိုက်လံဖမ်းဆီးနေမှုများအပေါ် ဦးသန်းမြင့်က “ကျွန်တော် အိမ်မပြန်ဖြစ်တာ တော်တော်ကြာပြီဗျ။ ပြောရရင် မိန်းမနဲ့သိပ်အဆင်မပြေလို့ အာဏာမသိမ်းခင်ကတည်းက အိမ်ကထွက်လာတာ။ အခုတော့ ရှောင်နေတာပေါ့။ အဲဒါကို မဆီမဆိုင် သူတို့ဖမ်းချင်တဲ့ လူကိုမမိတိုင်း မိ သားစုတွေကို မတရားလိုက်ဖမ်း နေကြတာပါ”ဟုဆိုသည်။

လက်ရှိတွင် စစ်ကောင်စီတပ်များနှင့် ရဲများက ပုသိမ်တံတားဟောင်း၊ တံတားအသစ်နှင့် ပုသိမ်မြို့နေရာ အနံ့အပြားတွင် ကင်းပုန်းများဖြင့်နေ ရာ ယူထားကြောင်း၊ ထပ်မံဖမ်းဆီးမှုများရှိလာနိုင်သဖြင့် သတိထား နေထိုင်သင့်ကြောင်း နိုင်ငံရေးတက်ကြွလှုပ်ရှားသူတစ်ဦးကပြောသည်။mizzima

မကွေးတိုင်း ပေါက်နှင့် ဆိပ်ဖြူ မြို့နယ်အတွင်းရှိ ကျေးရွာ ၁ဝရွာကို အကြမ်းဖက် စစ်တပ်က ဧပြီလ ၇ရက်နေ့မှ စတင်ကာ မီးရှို့ဖျက်ဆီးခဲ့ပြီး ဒေသခံပြည်သူ ၃ဦးကို သတ်ဖြတ်ကာ ယနေ့ ဧပြီလ ၁၂ ရက်နေ့တွင်လည်း တံစူးရွာကို ဆက်လက် မီးရှို့ဖျက်ဆီးနေကြောင်း ဒေသခံပြည်သူ များ ထံမှ သိရသည်။

အကြမ်းဖက် စစ်တပ်သည် ဧပြီလ ၇ရက်နေ့မှ ၁၁ ရက်နေ့ထိ ပေါက်မြို့နယ် အတွင်းမှ ရေကျော်ရွာ၊ ဒိန်းကွင်းရွာ၊ တောင်ဘက်ရွာ၊ တောင်ချိုရွာ၊ အင်းငယ် ဒေါင့်ရွာ၊ ဘို့မယ်ရွာနှင့် ကျောက်အိုးကုန်းရွာ ဆိပ်ဖြူမြို့နယ် အတွင်းမှ လယ်သာဝရွာ၊ရှားလှရွာနှင့် မြစ်ဖျားရွာတို့ကို အကြမ်း ဖက် စစ်တပ်က မီးရှို့ ဖျက်ဆီး ခဲ့ခြင်း ဖြစ်ကြောင်း သိရသည်။

အဆိုပါ အကြမ်းဖက် စစ်တပ်သည် ဆိပ်ဖြူမြို့နယ် ရှားလှရွာမှ အသက် ၈ဝအရွယ် ဒေါ်ခင်သန်းကို ၎င်းနေအိမ်နှင့်အတူ မီးရှို့သတ်ဖြတ်ခဲ့ပြီး ရှားလှ ကျးရွာမှ ပြန်လည် ထွက်ခွာသွားစဉ်တွင် ရွာအဝင်အထွက် လမ်းပိုင်း၌ မိုင်းများ ထောင်ထားခဲ့ကာ ကျေးရွာတွင်းသို့ ပြန်လည် ဝင်ရောက်လာသည့် ဦးမင်းဦး မိုင်းနင်းမိကာ ပွဲချင်းပြီးသေဆုံးခဲ့ကြောင်း သိရသည်။

ထို့ပြင် မြစ်ဖျားရွာတွင်လည်း အကြမ်းဖက် စစ်တပ်က ဒေသခံပြည်သူများ တစ်ဦးကို ပစ်သတ်ခဲ့ပြီး အမည်မ သိရသေးကာ စစ်တပ် ပစ်သတ်ခဲ့သော ပြည်သူဦးရေကို အတည်မပြုနိုင်သေးကြောင်း နယ်မြေခံ သတင်း ရင်းမြစ် ဖြစ်သည့် Pauk Alliance Groupမှ တာဝန်ရှိသူ တစ်ဦးကပြောဆိုသည်။

အလားတူ အကြမ်းဖက် စစ်တပ်သည့် ယနေ့ ဧပြီလ ၁၂ ရက်နေ့တွင် ပေါက်မြို့နယ် တံစူးရွာကို ထပ်မံ မီးရှို့ဖျက်ဆီးနေပြီး ပျက်စီးဆုံးရှုံ့မှု အ ခြေအနေ မသိရသေးကာ ဒေသခံပြည်သူများလည်း ဘေးလွတ်ရာသို့ ထွက်ပြေးတိမ်းရှောင်နေရကြောင်း သိရသည်။khit thit