Monthly Archives: Apr 2022

ရတနာသိင်္ခမြစ်ကူးတံတားရှိ စစ်ကောင်စီတပ်လုံခြုံရေးဂိတ်တိုက်ခိုက်ခံရ၊ ၅ ဦးထက်မနည်းထိခိုက်ဒဏ်ရာရ

စစ်ကိုင်းတိုင်းနှင့် မန္တလေးတိုင်းကို ဆက်သွယ်ထားသည့် ရတနာသိင်္ခမြစ်ကူးတံတားရှိ စစ်ကောင်စီတပ် လုံခြုံရေး ဂိတ်ကို ယနေ့ ဧပြီလ ၁၃ ရက်နေ့ သင်္ကြန်အကြိုနေ့ နံနက်ပိုင်းက ဝင်ရောက်တိုက်ခိုက်ခဲ့ကြောင်း စဉ့်ကူးမြို့နယ် ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောသည်။

စစ်ကောင်စီတပ်ဖွဲ့ဝင်အင်အား ၂၀ ခန့်ဖြင့် တပ်စွဲထားသည့် စဉ့်ကူးမြို့နယ်ဘက်အခြမ်းရှိ ရတနာ့သိင်္ခတံတား လုံခြုံရေးဂိတ်ကို စဉ့်ကူးပြည်သူ့ကာကွယ်ရေးတပ်ဖွဲ့က သေနတ်များ၊ M9 ဗုံးသီးလောင်ချာများဖြင့် ပစ်ခတ်တိုက် ခိုက်ခဲ့ခြင်း ဖြစ်သည်။

“ဒီနေ့ မနက် ၄ နာရီမှာ ဝင်ရောက်တိုက်ခိုက်ခဲ့တာပါ။ အဲဒီဂိတ်မှာက စစ်ကောင်စီနဲ့ ရဲ စုစုပေါင်း အင်အား ၂၀ လောက်အထိုင်ချထားတယ်။ ပစ်ခတ်တိုက်ခိုက်မှုက ၁၀ မိနစ်လောက်ကြာခဲ့ပါတယ်။ အထိအခိုက်ကတော့ အခု အချိန်အထိ ငါးယောက်လို့ သိထားပါတယ်။ တံတားက ပိတ်ထားတဲ့အတွက် သေဆုံးထိခိုက်စာရင်း အတိအကျကို တော့ စုံစမ်းနေဆဲပါ” ဟု စဉ့်ကူးပြည်သူ့ကာကွယ်ရေးတပ်ဖွဲ့ တာဝန်ရှိသူက ပြေ ာသည်။

တိုက်ခိုက်မှုဖြစ်စဉ်အတွင်း ကာကွယ်ရေးတပ်ဖွဲ့ ဦးတည်ပစ်ခတ်သည့် စစ်ကောင်စီလုံခြုံရေးဂိတ်မှ ပြန်လည် ပစ်ခတ်နိုင်ခဲ့ခြင်းမရှိခဲ့ဘဲ တံတားတဖက်ခြမ်း စစ်ကိုင်းတိုင်း ကျောက်မြောင်းမြို့နယ်ဘက်ရှိ စစ်ကောင်စီတပ်မှ ပစ်ခတ်မှုများရှိခဲ့သော်လည်း ကာကွယ်ရေးတပ်ဖွဲ့ဝင်များ အထိ အခိုက်မရှိ ဆုတ်ခွာနိုင်ခဲ့ကြောင်း ၎င်းက ဆက်ပြော သည်။

“အရင်အာဏာမသိမ်းခင်ကတော့ အဲဒီတံတားမှာက တံတားလုံခြုံရေးနှင့် တံတားကြေးတောင်းတဲ့သူတွေပဲရှိ တယ်။ အာဏာသိမ်းပြီးနောက် ပိုင်း တော်တော်ကြာမှ စစ်တပ်အထိုင်လာချတာ ငါးလ၊ ခြောက်လဝန်းကျင်တော့ ရှိပြီ။ အင်မတန်ရှည်လျားတဲ့ တံတားတဖက်ခြမ်းကနေ တ ခြားတဖက်ကို ဆိုင်ကယ်တွန်းပြီး လမ်းလျှောက်ခိုင်းတာ တွေ မထင်ရင်မထင်သလို ဆဲဆိုရိုက်နှက်တာတွေရှိတာကြောင့် စဉ့်ကူးလူထုအနေနဲ့ အင်မတန်ရွံမုန်းတဲ့နေရာလို့ ပြောလို့ရပါတယ်။ တံတားပေါ်က မဖြတ်ချင်လို့ အောက်ကနေ မြစ်ကြောင်းအတိုင်း စက်လှေနဲ့ကူးတဲ့အခါမှာမျိုး မှာလည်း လိုက်လံဖမ်းဆီး ငွေညှစ်တာတွေရှိပါတယ်” ဟု ဒေသခံတစ်ဦးက ပြောသည်။

တိုက်ခိုက်ခံခဲ့ရသည့် ရတနာသိင်္ဃတံတားသည် မန္တလေးတိုင်း စဉ့်ကူးမြို့နယ်နှင့် စစ်ကိုင်းတိုင်း ရွှေဘိုခရိုင်၊ ကျောက်မြောင်းမြို့နယ်ကို ဆက်သွယ်ထားသည့်တံတားဖြစ်ပြီး လုံခြုံရေးဂိတ် တိုက်ခိုက်ခံရပြီးနောက် စစ်ကောင်စီ တပ်က ဖြတ်သန်းခွင့်မပြုဘဲ ပိတ်ထားကြောင်း ဒေသခံများထံမှသိရသည်။mizzima

ပခုက္ကူတွင် စစ်ကောင်စီနှင့် ဒေသကာကွယ် ရေး မဟာမိတ်တပ်ဖွဲ့ နှစ်ရက်ဆက် တိုက်ပွဲဖြစ်

မကွေးတိုင်း ပခုက္ကူမြို့မှာ ဧပြီ ၁၂ ရက်နဲ့ ၁၃ ရက်နေ့တွေမှာ ဒေသကာကွယ်ရေး မဟာမိတ်တပ်ဖွဲ့တွေနဲ့ စစ်ကောင်စီတပ်တွေ တိုက်ပွဲဖြစ်ပွားပြီး စစ်ကောင်စီဘက်က ၃ ယောက်သေဆုံးကာ ၅ ယောက် ဒဏ်ရာရခဲ့တယ်လို့ PKU N PDF ပြန်ကြားရေးတာဝန်ခံက ပြောပါတယ်။

ပခုက္ကူမြို့ မြို့သစ်လမ်းပိုင်းမှာ ဒီနေ့မနက် ၂ နာရီလောက်က ကင်းပတ်နေတဲ့ စစ်ကောင်စီ တပ်သားတွေနဲ့ ပျူစောထီးတွေကို ညီနောင်မဟာ မိတ်တပ်ဖွဲ့တွေက MA4 နဲ့ ပစ်ခတ်တိုက်ခိုက်ခဲ့ရာ ၅ မိနစ်လောက် အပြန်အလှန် တိုက်ပွဲဖြစ်ပွားခ့တာလို့ ဆိုပါတယ်။

ဒါ့အပြင် ပခုက္ကူမြို့သစ် မြို့ရှောင် အာဆီယံလမ်းမှာ ယာယီစခန်းချထားတဲ့ စစ်ကောင်စီ တပ်သားတွေကိုလည်း မနေ့ ဧပြီ ၁၂ ရက် မနက် ၁၁ နာရီလောက်မှာ လက်လုပ်မိုင်းနဲ့ သွားရောက်ပစ်ခတ်ခဲ့ရာ စစ်ကောင်စီတပ်သား ၃ ယောက် ဒဏ်ရာရရှိခဲ့တယ်လို့လည်း ပြောပါတယ်။

ပခုက္ကူမြို့ ဒေသခံတယောက်က “မြို့ရှောင်လမ်းဘက်မှာ မနက်အစောပိုင်းက ပစ်ခတ်သံတွေ ကြားလိုက်ရတယ်ဗျ။ မနက်မိုးလင်းတဲ့ အချိန်မှာတော့ မြို့ရှောင်လမ်း အပါအဝင် လမ်းဆုံလမ်းခွတွေမှာ စစ်ကောင်စီ တပ်သားတွေနဲ့ ရဲတွေပေါင်းပြီး လမ်းသွားလမ်းလာတွေကို ပိတ်ဆို့ စစ်ဆေးနေတာ တွေ့ရတယ်” လို့ ပြောပါတယ်။

စက်မှုဇုန်လမ်းပိုင်းမှာလည်း မနေ့ မွန်းလွဲ ၁ နာရီခွဲလောက်မှာ CDM ဝန်ထမ်းတွေနဲ့ ပတ်သက်ပြီး သတင်းပေးပို့နေတဲ့ စစ်ကောင်စီသတင်းပေး ဒလန်ရဲ့နေအိမ်ကို လက်လုပ်မိုင်းနဲ့ ပစ်ခတ် သတိပေးခဲ့ပါတယ်။

အဲဒီတိုက်ခိုက်မှုတွေကို PKU N PDF၊ Southern YSO PDF နဲ့ King Cobra PDF ညီနောင်မဟာမိတ်တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး နှစ်ဖက်တိုက်ပွဲအတွင်း ဒေသကာကွယ်ရေး မဟာမိတ်တပ်ဖွဲ့တွေဘက်က ရဲဘော်တွေ အထိအခိုက် အကျအဆုံး မရှိခဲ့ဘူးလို့ PKU N PDF ပြန်ကြားရေးတာဝန်ခံက ဆိုပါတယ်။

နှစ်ဖက်တိုက်ပွဲတွေနဲ့ ပတ်သက်လို့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။DVB

ရန်ကုန်တိုင်းအစိုးရရုံး၊ ပြည်လမ်း-ပြည်သူ့ရင် ပြင်ရှေ့ ရှိ စစ်ကောင်စီ သင်္ကြန်မဏ္ဍပ်တွင် ရေ ပက်ခံကားမရှိ၍ လာသမျှ ကားအားလုံးကို သေနတ်ပြ ခြိမ်း ခြောက် ပိတ်ဆို့ပြီး မဏ္ဍပ်ရှေ့မှ ဖြတ်ခိုင်းနေ

ရန်ကုန်တိုင်းအစိုးရုံး၊ ပြည်လမ်း-ပြည်သူ့ရင်ပြင်ရှေ့ရှိ စစ်ကောင်စီ၏ ရေပက်သင်္ကြန်မဏ္ဍပ်တွင် ရေပက်ခံကားနှင့် ရေပက်ခံမည့်သူမရှိ၍ လမ်း တွင် ဖြတ် သန်းသမျှ ကားအားလုံးကို သေနတ်ပြ ခြိမ်းခြောက် ရပ်တန့်လမ်းပိတ်ဆို့ပြီး သင်္ကြန်မဏ္ဍပ်ရှေ့ ရေပက်ခံပြီးမှ ဖြတ်သန်းခိုင်းနေကြောင်း ရန်ကုန်မြို့ခံများက ပြောသည်။

“ကားတွေက ရေပက်ခံကားလည်းမဟုတ်ဘူး။ သူ့ဟာသူ လမ်းပေါ်သွားနေတာကို ကားလမ်းကို ပိတ်လိုက်တယ်။ ပြီးတော့ သူတို့ မဏ္ဍပ်အောက်ကနေ ရေပက်ခံခိုင်းတယ်။ ကားတွေ ရေပက်ခံကားလည်းမဟုတ်ဘူး။ အိမ်စီးကားတွေ။ ကားတွေအားလုံးကတော့ မှန်တွေ တင်ထားတယ်။ ဘယ်သူမှလည်း ရေပက်မခံဘူး။ ကားရေဆေးခံရသလိုဖြစ်နေတာပေါ့။ ကားက တစ်စီးချင်း ဖြတ်ခိုင်းနေတာ။ အတော်ဆိုးတယ်။ အခြားကားတွေ ရန်ကုန်-ပြည်လမ်း ပြည်သူ့ရင်ပြင်ရှေ့ကို ရှောင်မောင်းပါ” ဟု ရန်ကုန်မြို့ခံ တစ်ဦးက ပြောသည်။

“ရန်ကုန်-ပြည်လမ်း အလုံလမ်းပွိင့်မှ မြေနီကုန်းသို့ ပြည်လမ်း အတိုင်းသွားခြင်းရှောင်ပါ။လမ်းတစ်ကြောပဲဖွင့်ထားပြီး ကားအကုန် ခွေးသင်္ချိုင်းမဏ္ဍပ်ထဲ မဝင်မနေရ စနစ်လုပ်ပြီး အတင်းအကျပ် သေနတ်ပြ ဝင်ခိုင်းနေပါတယ်” ဟု ရန်ကုန်ကင်းထောက်အဖွဲ့က သတိပေးချက် လူမှုကွန် ရက်တွင် ထုတ်ပြန်ထားသည်။

ရန်ကုန်မြို့တွင် ရေပက်ခံမည့်သူ မရှိ၊ ရေပက်ကစားသူ မရှိချိန်တွင် စစ်ကောင် စီက ၎င်း၏ သင်္ကြန်မဏ္ဍပ်များတွင် စည်ကားသယောင် ဟန်ပြလုပ်နိုင်ရေး အောက်တန်းကျသော နည်းလမ်းမျိုးစုံ အသုံးပြုနေသည်ဟု တက္ကစီသမားတချို့က သုံးသပ်ပြောဆိုသည်။khit thit

ပုံအဟောင်းများသုံးကာ ရန်ကုန်နှင့် မန္တလေးသင်္ကြန် စည်ကားနေကြောင်း ဖြန့်ဝေမှုရှိနေ

ပြီးခဲ့သည့် ၂၀၁၇ ခုနစ်က ကျင်းပပြုလုပ်ခဲ့သည့် သင်္ကြန်ဓာတ်ပုံများအပါအဝင် ပုံအဟောင်းအချိူ့ကို အသုံးပြုပြီး သင်္ကြန်အကြိုနေ့တွင် ရန်ကုန်နှင့်မန္တလေးမြို့တော်ဝန်တို့ မဏ္ဍပ်စည်ကားနေကြောင်း ဖြန့်ဝေ မှုများရှိနေသည်ကို တွေ့ရသည်။

“ဟစ်တိုင်-အွန်လိုင်းသတင်းဌာန”အမည်ရှိ ဖေ့ဘုတ်စ်ပေ့ချ်တစ်ခုမှ ” မန္တလေးမြို့တော်ဝန်မဏ္ဍပ်ဖွင့်ပွဲ အား စည်ကားသိုက်မြိုက်စွာကျင်းပ”ဟု ဆိုကာ လက်ရှိကာလဓာတ်ပုံများသဖွယ် အသုံးပြုဖြန့်ဝေမှု ပြုလုပ်ထားသည်။

အဆိုပါပိုစ့်ကို Like ပြုလုပ်သူပေါင်း “၁,၇၀၀ ကျော်”ရှိပြီး ပြန်လည်မျှဝေသူ “၃၆၀ကျော်” ရှိနေပြီ ဖြစ်သည်။ အလားတူ ရန်ကုန်မြို့တော်ဝန်သင်္ကြန်မဏ္ဍပ်ဖွင့်ပွဲပုံမှာ လိုက်ခ်ပြုလုပ်သူ ၃,၉၀၀ ကျော်နှင့် ပြန်လည်မျှဝေသူ ၁,၅၀၀ ကျော် ရှိနေပြီဖြစ်သည်။

မဇ္ဈိမအနေဖြင့် google image, tineye အစရှိသည့် တို့ဖြင့် အချက်အလက်စစ်ဆေးကြည့်ရာ ရန်ကုန် မြို့တော်ဝန်မဏ္ဍပ်ရှေ့မှပုံများသည် ပြီးခဲ့သည့် ၂၀၁၇ ခုနစ်ကပုံများဖြစ်သည်ကိုတွေ့ရပြီး မန္တလေး မြို့တော်ဝန်မဏ္ဍပ်ဖွင့်ပွဲ အခမ်းအနားမှ ဓာတ်ပုံများတွင်လည်း ပြီးခဲ့သည့် ၂၀၁၇ ခုနစ်က ကျင်းပပြုလုပ်ခဲ့ သည့် မန္တလေးသင်္ကြန်မှ ဓာတ်ပုံ လေးပုံ ပါဝင်နေသည်ကိုတွေ့ရသည်။

ကျန်ရှိနေသည့်ဓာတ်ပုံများသည် သတင်းမီဒီယာဌာနများဖြစ်သည့် Eleven Media, The Irrawaddy တို့မှ တင်ထားသည့် ဓာတ်ပုံများပါဝင်သော်လည်း မည်သည့်ခုနစ်က ဓာတ်ပုံများဆိုသည်ကို အတည်မပြု နိုင်သေးပေ။

ထို့အပြင် မန္တလေးသင်္ကြန်မဏ္ဍပ်ကိုနောက်ခံထားပြီး အစီစဉ်တင်ဆက်နေသည့် အမျိုးသမီးနှစ်ဦးကို ဝင်ရောက်ဟန့်တားသည့် ဗီဒီယိုဖိုင်ကိုအသုံး၍ လှောင်ပြောင်သည့်သဘောဖြင့် မြန်မာ့အားကစားဆိုသည့် ပေ့ချ်မှလည်း ဖြန့်ဝေထားသည်။ ထိုဖိုင်ကို ကြည့်ရှုသူ ၄၅,၀၀၀ ကျော်ရှိနေပြီဖြစ်သည်။

အဆိုပါဗီဒီယိုဖိုင်ထဲတွင်ပါရှိသည့် မဏ္ဍပ်နောက်ခံတွင် ၂၀၁၆ ဟု ရေးသားထားသည်ကို အထင်အရှား တွေ့မြင်နိုင်သည်။

ထို့ကြောင့်လက်ရှိပျံ့နှံ့နေသည့် ဟစ်တိုင် – အွန်လိုင်းသတင်းဌာနမှတင်ထားသည့် မန်းလေး၊ ရန်ကုန် မြို့တော်ဝန်မဏ္ဍပ်မှပုံများနှင့် အမျိုးသမီးနှစ်ဦး အစီစဉ်တင်ဆက်သည့်ဗီဒီယိုဖိုင်များမှာ ယခင်က ပုံ အဟောင်း၊ ဗီဒီယိုအဟောင်းများကိုအသုံးပြုပြီး ယခုဖြစ်နေသယောင်ဖော်ပြထားသည့် သတင်းမှားများ သာဖြစ်သည်။

အာဏာသိမ်း စစ်ကောင်စီလက်အောက်ပြုလုပ်သည့် ယခုနှစ်သင်္ကြန်ကို စည်ကားစေရန် စစ်ကောင်စီမှ ဖိအားသုံး၍ အမျိုးမျိုးဖန်တီးနေပြီး တော်လှန်ရေးအဖွဲ့များ၊ ပြည်သူ့ကာကွယ်ရေးတပ်ဖွဲများမှလည်း ပါဝင် ဆင်နွဲခြင်းမရှိရန် မေတ္တာရပ်ခံမှုများ ရှိခဲ့သည်။

မဇ္ဈိမ၏ သတင်းဖတ်ရှုသည့် ပရိသတ်များအနေဖြင့် သတင်းတုဟု သံသယရှိသည့် အချက်အလက်များ၊ သတင်း ဆောင်းပါးများ၊ သတင်းမှားများကို ယခုလင့် https://bit.ly/3x5qnf5 သို့ ဝင်ရောက်ဖြည့်စွက် ရေးသားပေးပို့ မေးမြန်းနိုင်ပါသည်။mizzima

ပြည်မြို့ သင်္ကြန်ပွဲတော် ရေကစားသူမရှိ တိတ် ဆိတ်ခြောက်ကပ်နေ

ပဲခူးတိုင်း၊ ပြည်မြို့မှာ ဧပြီ ၁၃ ရက် သင်္ကြန်ပွဲတော် အကြိုနေ့က ဒေသခံပြည်သူတွေက ရေကစားကြတာမရှိဘဲ  အသံတိတ်သပိတ်လှုပ်ရှားမှု  Silence Day နေ့ကလို ခြောက်ကပ်နေလို့ မြို့ခံတွေက ပြောပါတယ်။

ပြည်မြို့က စစ်ကောင်စီဗဟိုမဏ္ဍပ်မှာတော့ ဝန်ထမ်းမိသားစု၊ တပ်မိသားစု၊ စစ်ကောင်စီခန့်အုပ်ချုပ်ရေးမှူးမိသားစုတချို့လာရောက်ခဲ့ပြီး ယိမ်း အကနဲ့ ဖျော်ဖြေခဲ့ပေမဲ့  စင်အောက်မှာ ကြည့်ရှုသူပရိသတ်မရှိဘဲ သင်္ကြန်ပွဲတော်ကို လုံခြုံရေးတင်းကျပ်  ဖွင့်လှစ်ခဲ့ပါတယ်။ 

စစ်ကောင်စီအာဘော် MRTV ရုပ်သံ နေ့လယ် သတင်းမှာတော့   မဏ္ဍပ်ပေါ်ကိုသာ ရိုက်ပြထားတဲ့ ဓာတ်ပုံ ၄ ပုံပြသပြီး သင်္ကြန်စည်ကားနေဟန် လိမ်ညာပြသွားတယ်လို့ ဒေသခံတွေက ပြောပါတယ်

“သူတို့က အရင်  အန်အယ်လ်ဒီအစိုးရခေတ်က ပြုလုပ်ခဲ့တဲ့ပုံစံမျိုး ကမ်းနားလမ်းတလျှောက်ကို လမ်းလျှောက်သင်္ကြန်လုပ်ဖို့ စီစဉ်ထားတာ၊ အခုက Silence Day ကျနေတာပဲ။ ခါတိုင်းရက်ကမှ ကားတို့ ဆိုင်ကယ်တို့ လူတို့သွားကြသေးတာ ဒီနေ့ကတော့ လူသွားလူလာတောင်မရှိဘူး”

ပြည်မြို့ ကမ်းနားလမ်း  လမ်းလျှောက်သင်္ကြန်မှာလည်း ရေပိုက်တွေ အဆင့်သင့်လုပ်ထားတာ ပေမဲ့ လမ်းလျှောက်မယ့်သူ မရှိဘူးလို့  ဒေသခံ တယောက်က ပြောပါတယ်။

အမှတ် (၃) ရဲစခန်းရှေ့မှာတော့ ရဲတွေက အရပ်ဝတ်နဲ့ သောက်စားမူးယစ်ပြီး အချင်းချင်း ရေပက်နေကြသလို ဗဟိုမီးသတ်ရှေ့မှာလည်း ဒီနေ့မနက်က  မီးသတ်တွေအချင်းချင်း ရေပက်နေကြပါတယ်။

စစ်ကောင်စီကတော့ ဧပြီလ ၁၂ ရက် ညနေကတည်းက လမ်းလျှောက်သင်္ကြန် လုံခြုံရေးအတွက်ဆိုပြီး ကြံ့ခိုင်ရေးပါတီရုံးထဲမှာ စစ်ကောင်စီတပ်သားတွေ အယောက် ၃၀ ကျော် ၄၀ လောက်  လောက်ချထားပါတယ်။ DVB

သင်္ကြန်အကြိုနေ့ ၊ ဘီးလင်းရှိ စစ်ကောင်စီတပ်စခန်းကို KNLA ပူးပေါင်းတပ် ဝင်ရောက်တိုက်ခိုက်၊ စစ်သား ၃ ဦးသေဆုံးပြီး ၅ ဦး ဒဏ် ရာရ

ကရင်အမျိုးသားအစည်းအရုံး KNU တပ်မဟာ ၁ နယ်မြေ၊ ဘီးလင်းမြို့နယ်၊ လေးကေကျေးရွာတွင် စခန်းချတပ်စွဲထားသော အကြမ်းဖက်စစ်ကောင်စီစခန်းကို KNLA၊ KNDO၊ Black Warriors Force (PDF) ပူးပေါင်းတပ်ဖွဲ့က ယနေ့ ဧပြီလ ၁၃ ရက် နံနက် ၆ နာရီ ၁၀ မိနစ်တွင် ပစ် ခတ်တိုက်ခိုက်ရာ စစ်သား ၃ ဦး သေဆုံးပြီး ၅ ဦး ဒဏ်ရာရကြောင်း သတင်းရရှိသည်။

KNLA ပူးပေါင်းအဖွဲ့က RPG၊ ၇၉ မမ အပါအဝင် လက်နက်ငယ်များဖြင့် လေးကေကျေးရွာရှိ စစ်ကောင်စီစခန်းကို အနီးကပ်ဝင်ရောက်ပြီး အ လစ် ပစ်ခတ်တိုက်ခိုက်ခြင်းဖြစ်ကြောင်း Black Warriors Force က သတင်းထုတ်ပြန်ထား သည်။

အထိနာသော စစ်ကောင်စီတပ်ဖွဲ့သည် လက်နက်ကြီး၊ လက်နက်ငယ်များဖြင့် ပြန်လည်ပစ်ခတ်သဖြင့် KNLA ပူးပေါင်းတပ်ဖွဲ့မှ ထိခိုက်ဒဏ်ရာရမှုမရှိဘဲ ပြန် လည်ဆုတ်ခွာခဲ့ကြောင်း သိရှိရသည်။

တိုက်ပွဲဖြစ်ပွားပြီးနောက် စစ်ကောင်စီတပ်ဖွဲ့ဝင်များသည် လေးကေကျေးရွာအတွင်းသို့ ဝင်ရောက်ကာ ရှာဖွေစစ်ဆေးခြင်းများ ပြုလုပ်ခဲ့ကြောင်း လည်း သ တင်းရရှိသည်။khit thit

မြဝတီမြို့နယ် သင်္ကန်းညီနောင်စခန်းကုန်း ကင်းစခန်းကို KNLA ပူးပေါင်းတပ်မှ တိုက် ခိုက်သိမ်းယူ

မြဝတီမြို့နယ် သင်္ကန်းညီနောင်ရှိစခန်းကုန်း ကင်းစခန်းတစ်ခုကို ဧပြီလ ၁၂ ရက်နေ့ နံနက် ၇ နာရီဝန်ကျင်က KNLA ပူးပေါင်းတပ်(ကျားသစ်နက်စစ်ကြောင်း)မှ ဝင်ရောက်တိုက်ခိုက်သိမ်းယူနိုင်ခဲ့ကြောင်း သိရသည်။

ကင်းစခန်းတွင် ခလရ(၂၇၅)တပ်မှ လုံခြုံရေးယူထားပြီး တိုက်ပွဲဖြစ်ပွားသည့်နေ့တွင် လူအင်အား အနည်းငယ်သာ ရှိနေကြောင်း PDFရဲဘော်တဦးမှဆိုသည်။

“ ကင်းစခန်း လူကတော့ ၁၀ ယောက်ဝန်ကျင်လောက်ပါပဲ။ လူများလို့ သွားတိုက်တဲ့နေ့ကြမှ သူတို့လူတွေက ကော့ကရိတ်ဘက်ကို သွားကြတယ်လို့ပြောတယ်။ လက်နက်အချို့ရလိုက်တယ်။ တစ်ယောက် စနိုက်ပါထိသွား တယ်။ အလောင်းမရလို့ အတည်မပြုနိုင်သေးဘူး။ ကျနော်တို့ဘက်က အထိအခိုက်မရှိပါဘူး။ တိုက်ပွဲမှာ သူတို့က အသေခံပစ်တာမျိုးတော့မရှိဘူး။ အကုန်ထွက်ပြေးသွားတာ။ သူတို့ကင်းစခန်းကို သိမ်းလို့နဲ့တူတယ် လက်နက်ကြီး တွေနဲ့အဆက်မပြတ်ထုနေတယ်” ဟု KNLA ပူးပေါင်းတပ် (ကျားသစ်နက်စစ်ကြောင်း)မှ တပ်ဖွဲ့ဝင် ကိုမျိုးမြင့်ကျော် မှ ပြောသည်။

တိုက်ပွဲဖြစ်ပွားချိန် တစ်နာရီဝန်ကျင်ကြာမြင့်ခဲ့ပြီး KNLA ပူးပေါင်းတပ်မှ ပစ္စတိုတလက်၊ MA-1 သုံးလက်၊ ၆၀ မမ ကွန်မန်ဒိုတစ်လက်နှင့် ၆၀ မမ ဗုံးသီး ၂၀ လုံးကို သိမ်းဆည်းရမိခဲ့သည်။ ကင်းစခန်းအသိမ်းခံရပြီးသည့်နောက် စစ်ကောင်စီဘက်မှ လက်နက်ကြီးဖြင့် ဆက်တိုက်ပစ်ခတ်ခဲ့ခြင်းကြောင့် ကွင်းကလေးရွာကိုထိမှန်ခဲ့ပြီး နေအိမ် တစ်လုံးပြိုကျကာ လူထိခိုက်မှုမရှိခဲ့ကြောင်းသိရသည်။mizzima

ကလေးမြို့နယ်တွင် စစ်ကောင်စီတပ်နှင့် PDF တိုက်ပွဲဖြစ်၊ နေအိမ် ၈ လုံး မီးရှို့ဖျက်ဆီးခံရ

စစ်ကိုင်းတိုင်း ကလေးမြို့နယ် အောင်မင်္ဂလာကျေးရွာအနီးမှာ ဧပြီ ၁၂ ရက်က ညနေပိုင်းက စစ်ကောင်စီတပ်တွေနဲ့ ကလေး PDF တပ်ဖွဲ့ဝင်တွေ တိုက်ပွဲဖြစ်ပွားခဲ့ပြီး စစ်ကောင်စီတပ်က အောင်မင်္ဂလာကျေးရွာက နေအိမ် ၈ လုံးကို မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။

“တိုက်ပွဲတွေကြောင့်ရော ရွာထဲကို လက်နက်ကြီးတွေနဲ့ လှမ်းထုနေတာကြောင့်ရော ရွာမှာမနေရဲတာကြောင့် တိမ်းရှောင်နေကြရတာ။ အခုတော့ အိမ်ကိုပါ မီးရှို့ထားခဲ့တာဆိုတော့ နေအိမ်ပြန်ဖို့ ဆိုတာကတော့ မဖြစ်နိုင်တော့ဘူး။ စိတ်ဓာတ်တွေလည်း ကျနေပါပြီ” လို့ မီးရှို့ခံရတဲ့ မိသားစုဝင်တဦးက ဒီဗွီဘီကို ပြောပါတယ်။

ကြံသာကျေးရွာမှာ တပ်စွဲနေတဲ့ စစ်ကောင်စီတပ်ဟာ အောင်မင်္ဂလာကျေးရွာဘက်ကို မကြာခဏ လက်နက်ကြီးတွေနဲ့ လှမ်းပစ်တာကြောင့် ဒေသခံတွေ ထိခိုက်ဒဏ်ရာရပြီး နေအိမ်တချို့လည်း ပျက်စီးဆုံးရှုံးနေတယ်လို့ ဆိုပါတယ်။ စစ်ကောင်စီတပ်တွေဟာ ဧပြီ ၁၀ ရက်‌ကလည်း အောင်မင်္ဂလာကျေးရွာက နေအိမ် ၁ လုံးကို မီးရှို့ဖျက်ဆီးခဲ့ပါသေးတယ်။

ဒါကြောင့် ဒေသခံတွေဟာ ကျေးရွာတွင်းမှာ ‌မနေရဲတော့ဘဲ ကျေးရွာအနီးက တောတိုက်တွေနဲ့ မင်းလှရွာ စာသင်ကျောင်းက စစ်ရှောင်စခန်းတွေဆီမှာ နေထိုင်နေကြရပြီး စစ်ဘေးရှောင်ရတာ အချိန်ကာလ ကြာမြင့်လာတာနဲ့အမျှ အခက်အခဲတွေ ဖြစ်ပေါ်ကာ အကူအညီတွေလည်း လိုအပ်နေပါတယ်။

အလားတူ နတ်ချောင်းကျေးရွာ စာသင်ကျောင်းအနီးမှာ စစ်ကောင်စီတပ်တွေရဲ့‌ ခြေလျင်စစ်ကြောင်းကို RKDF၊ PDF (Kalay) နဲ့ န.ခ (သူရိန်) ပူးပေါင်းတပ်ဖွဲ့က အနီးကပ် ပစ်ခတ်တိုက်ခိုက်ခဲ့ကြတယ်လို့ RKDF က ဆိုပါတယ်။

အဲဒီတိုက်ပွဲမှာ စစ်ကောင်စီက လက်နက်ကြီးတွေနဲ့ အချက် ၂၀ လောက် ရမ်းသန်းပစ်ခတ်ခဲ့ပြီး ကျေးရွာတွင်းကနေ ဆုတ်ခွာသွားခဲ့ကြတယ်လို့ RKDF က ထုတ်ပြန်ပါတယ်။

အဆိုပါတိုက်ပွဲမှာ စစ်ကောင်စီတပ်တွေရဲ့ ထိခိုက်ကျဆုံးမှု စာရင်းကို အတည်မပြုနိုင်သေးဘဲ ပူး‌‌ပေါင်းတပ်ဖွဲ့ဘက်မှ အထိအခိုက်မရှိဘူးလို့ ဆိုပါတယ်။

စစ်ကောင်စီတပ်သားတွေဟာ ကလေးမြို့နယ်တွင်း ကျေးရွာတွေကို စစ်ကြောင်းထိုး ဝင်ရောက်နေပြီး နတ်ချောင်းကျေးရွာအတွင်းက နေအိမ် ၁၀၀ ကျော် မီးရှို့ဖျက်ဆီးသွားကြသလို အောင်ချမ်းသာရွာ၊ ချောင်းခွရွာက လူနေအိမ်တွေကိုလည်း မီးရှို့ဖျက်ဆီးခဲ့ကြပါသေးတယ်။

ကလေးမြို့နယ်တွင်းမှာ တိုက်ပွဲတွေ မကြာခဏ ဖြစ်ပွားနေပြီး စစ်ရေးတင်းမာနေတာကြောင့် ပြည်သူလူထုအနေနဲ့ ကလေး-ဂန့်ဂေါ လမ်း ကြောင်း ကို အသုံးမပြုကြဖို့ကိုလည်း ကလေး PDF က မေတ္တာရပ်ခံထားပါတယ်။DVB

ပေါက်မြို့နယ် သက္ကယ်ကျင်း ကျေးရွာကို စစ် တပ်က မီးရှို့ခဲ့ပြီး ပြည်သူပိုင် နေအိမ် ၅ဝကျော် မီးလောင်ပြာကျ

မကွေးတိုင်း၊ ပေါက်မြို့နယ် အနောက်တောင်ပိုင်းရှိ သက္ကယ်ကျင်းကျေးရွာကို အကြမ်းဖက် စစ်တပ်က ယနေ့ ဧပြီလ ၁၃ ရက်နေ့ နံနက် ၉ နာရီ ၂ဝ မိနစ်ခန့် တွင် မီးရှို့ဖျက်ဆီးခဲ့ပြီး ပြည်သူပိုင် နေအိမ် ၅ဝကျော် မီးလောင် ပြာကျ ခဲ့ကြောင်း ဒေသခံပြည်သူများက ရန်ကုန် ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ်သည် ကျေးရွာအတွင်း ရွာလမ်းမကြီးရှိ နေအိမ်များ၊ ရွာအရှေ့ခြမ်းနှင့် မြောက်ခြမ်းရှိ ပြည်သူပိုင် နေအိမ်များကို မီးရှို့ ဖျက်ဆီး ခဲ့ခြင်းဖြစ်ပြီး ဒေသခံပြည်သူများက ကျေးရွာအတွင်းသို့ ဝင်ရောက် မီးငြိမ်း သတ်ရန် ကြိုစားခဲ့သော်လည်း စစ်တပ် စစ်ကြောင်းများ ထပ်မံ ရောက်ရှိ လာမည်ကို စိုးရိမ်သောကြောင့် မီးငြိမ်းသတ်မှု မပြီးဆုံးခင် ပြန်လည် ထွက်ခွာခဲ့ရကြောင်း သိရသည်။

” သက္ကယ်ကျင်းကျေးရွာကို စစ်တပ်က ဒီနေ့ နံနက်ပိုင်းလောက်က မီးရှို့ သွားတာ ပြည်သူပိုင် နေအိမ် ၅ဝ ကျော်လောက် မီးထဲပါသွားတယ်။ မီးတောင် ပြီးအောင် မငြိမ်းသတ်ခဲ့ရဘူး။ စစ်ကြောင်းတွေ ထပ်ရောက် လာမယ်လို့ သတင်းကြားလို့ ပြန်ထွက်ခဲ့ရတယ်” ဟု ဒေသခံ ပြည်သူ တစ်ဦးက ပြောဆိုသည်။

ထို့ပြင် အကြမ်းဖက် စစ်တပ်သည် ယနေ့ ဧပြီလ ၁၃ ရက်နေ့တွင် သက္ကယ်ကျင်း ကျေးရွာအပြင် ကိုင်းမရွာ၊ လက်ပံလှရွာနှင့် တစူးရွာ များကိုလည်း မီးရှို့ဖျက်ဆီးခဲ့ကြောင်း သိရသည်။khit thit

ခရမ်းမြို့နှင့် ကဝမြို့ကြားရှိ ဇွဲတွန်စစ်ဆေးရေးဂိတ် တိုက်ခိုက်ခံရပြီး စစ်သားအနည်းဆုံး ၁၀ ဦးသေဆုံးဟု ပဲခူး PDF ထုတ်ပြန်

သကြ်န်အ​ကြိုနေ့ ဧပြီ ၁၃ ရက် နံနက် ၁၁ နာရီ မိနစ် ၄၀တွင် ပဲခူးခရိုင် PDF တပ်ရင်း(၁)၊ တပ်ခွဲ(၂) ကဝ- KPDF နှင့် PDF- Kayan တို့ပူးပေါင်းပြီး စခရမ်းမြို့နှင့်ကဝမြို့နယ်ကြား ဇွဲတွန် စစ်ဆင်ရေးဂိတ်ကို ဝင်ရောက်တိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြထားသည်။

မိနစ် ၄၀ ခန့် အပြန်အလှန် ပစ်ခတ်မှုများဖြစ်ပွားခဲ့ပြီး စစ်ကောင်စီအဖွဲ့ဝင် ၁၀ ဦးသေဆုံးခဲ့သည်ဟု ကနဦးသိရှိရပြီး ထိခိုက်ဒဏ်ရာရရှိသူများရှိကြောင်း၊ ပဲခူး PDF ဘက်မှထိခိုက်မှုတစုံတရာမရှိခဲ့ကြောင်း ထုတိပြန်ချက်ကဆိုသည်။

ထို့ပြင် ပဲခူးခရိုင် PDF တပ်ရင်း(၁) တပ်ခွဲ (၁)မှလည်း ဧပြီ ၁၃ ရက်နံနက် ၂ နာရီခန့် တွင် ညောင်လေးပင်မြို့နယ် ကြိုးကြာကွင်းနှင့်လက်ပံပုကြား တွင် ကင်းပတ်နေသော စစ်ကောင်စီ ယာဥ်တန်းအားလက်ပစ်ဗုံးဖြင့် တိုက်ခိုက်ခဲ့ကာစစ်ကောင်စီအဖွဲ့ဝင်အချို့ထိခိုက်ဒဏ်ရာရှိခဲ့သည်ဟု ပဲခူး PDF ကထုတ်ပြန်သည်။

ဧပြီ ၁၂ရက် ည ၉ နာရီ မိနစ် ၅၀ခန့်ကလည်း ပြည်ခရိုင် တပ်ရင်း(၁) တပ်ခွဲ(၂)မှ ပေါင်းတည်မြို့ ဘွဲ့ပင်ကန်ရပ်ကွက် ဒလံမြင့်ဆန်းအိမ် ခြံဝန်းနှင့် ည ၁၁:၀၀ ခန့် အချိန်တွင်ဗဟိုမဏ္ဍပ်အနီး သတိပေးသည့်အနေဖြင့် ဗုံးခွဲတိုက်ခိုက်ခဲ့သည်ဟု ပဲခူး PDF ကဆိုသည်။

ပဲခူးတိုင်း PDF တပ်ရင်းတပ်ဖွဲ့များက စစ်ကောင်စီအား နည်းလမ်းပေါင်းစုံဖြင့် ယခုထက်ပိုမိုကာ အရှိန်ဟုတ်မြှင့်တိုက်ခိုက်သွားမည်ဖြစ် ကြောင်း အသိပေးလိုက်သည်ဟု ပဲခူးPDF ၏ ထုတ်ပြန်ချက်တွင် ဖော်ပြထားသည်။mizzima

« Older Entries