SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ခင်ဦးမြို့နယ်၊ အင်းပတ်ကျေးရွာအား စစ်ကောင်စီတပ်မှ မေလ ၂ ရက်နေ့တွင် အင်အား အလုံးအရင်းဖြင့် ဝင်ရောက် မီးရှို့ခဲ့ရာ အိမ်ခြေ ၃၀၀ ခန့် မီးလောင် ဆုံးရှုံးခဲ့သည့် အပြင် ပြည်သူ တစ်ဦးအား ပစ်သတ်ခဲ့ကြောင်း ခင်ဦး သတင်းမှန် ပြန်ကြားရေးမှ သိရသည်။

မေလ ၁ ရက်နေ့ ညနေ ၃ နာရီခန့်တွင် ရေဦးမြို့မှ စစ်ကား သုံးစီးဖြင့် အင်းပတ်ရွာ အတွင်းသို့ ဝင်ရောက်လာပြီး အမျိုးသား သုံးဦးအား ဖမ်း ဆီးကာ ရေဦးမြို့သို့ ပြန်ထွက်သွားကြောင်း မေလ ၂ ရက်နေ့ မနက် ၁၀ နာရီခန့်တွင် အဆိုပါ ဒေသခံ သုံးဦးအား ပြန်လည် ခေါ်ဆောင်လာကာ လွှတ်ပေးခဲ့ကြောင်း ဆိုသည်။

ယင်းနေ့တွင် အင်းပတ်ကျေးရွာ အနီး စစ်ကောင်စီတပ် အင်အား ၆၀ ခန့်နှင့် ပျူစောထီး အင်အား ၄၀ ခန့်မှာ ကာကွယ်ရေးတပ်ဖွဲ့များ၏ မိုင်းဆွဲ တိုက်ခိုက်မှု ခံခဲ့ရပြီးနောက် ကျေးရွာ အတွင်းသို့ ဝင်ရောက် မီးရှို့ ဖျက်ဆီးခဲ့ပြီး အသက် ၄၇ နှစ်အရွယ် ကိုနိုင်ဦး ဆိုသူအား ပစ်သတ်ခဲ့ကြောင်း သိရသည်။

“အရင် အခါတွေ သူတို့ရွာထဲ လာတုန်းကတော့ ဘာမှ ကြီးကြီးမားမား သိပ်မလုပ်သွားဘူး၊ ငါးကြိမ်မြောက်မှာ တုန်းကတော့ တော်တော် ဖျက် ဆီးသွားတယ်” ဟု ခင်ဦး သတင်းမှန် ပြန်ကြားရေး တာဝန်ရှိသူက ပြောသည်။

စစ်ကောင်စီတပ်နှင့် ပျူစောထီးများ တပ်စွဲထားသောကြောင့် ရွာသစ်ကုန်းကျေးရွာနေ ပြည်သူများ အင်းပတ်ကျေးရွာသို့ ပြောင်းရွှေ့ နေထိုင်လျက်ရှိရာ နှစ်ရွာပေါင်းလူဦးရေ ၃၀၀၀ ခန့်သည် ယခု နီးစပ်ရာ ကျေးရွာများသို့ တိမ်းရှောင် နေရကြောင်း သိရသည်။

အိမ်ခြေ ၅၇၅ အိမ်ခန့်ရှိသည့် အင်းပတ်ရွာ သည် ခင်ဦးမြို့ အနောက်ဘက် ၁၃ မိုင်ခန့်ဝေးကာ ရေဦးမြို့နှင့် သုံး မိုင်ခန့် ကွာဝေးကြောင်း ဒေသခံ အများစု တောင်ယာ လုပ်ကိုင်ကြောင်း သိရသည်။ mizzima

ယမန်နေ့ (မေ ၄) တွင် မန္တလေးတိုင်း၊ မတ္တရာမြို့နယ်အရှေ့ပိုင်း သဖန်းကိုင်းကျေးရွာအနီးရှိ ဒေသခံကာကွယ်ရေးစခန်းတစ်ခုကို စစ်ကောင်စီတပ်က အင်အားအသာဖြင့် ဝင်ရောက်စီးနင်းခဲ့ရာ တိုက်ပွဲဖြစ်ပြီး စစ်သားတချို့ သေဆုံးခဲ့သလို  တိုက်ပွဲဒေသအတွင်း ရှိနေသူများထဲမှ ၅ ဦး ဖမ်းဆီးခံရသည်ဟု သိရသည်။

အင်အား ၂၀၀ ခန့်ရှိ စစ်ကောင်စီတပ်က သဖန်းကိုင်းကျေးရွာနှင့် ဖာလုံအနည်းငယ်သာဝေးသည့်နေရာတွင်ရှိသော တော်လှန်ရေးတပ်ဖွဲ့စခန်းတစ်ခုကို စစ်ကြောင်းထိုး တိုက်ခိုက်လာခြင်းဖြစ်သည်ဟု ဒေသခံကာကွယ်ရေးအဖွဲ့ဖြစ်သည့် နဂါးညီနောင်အဖွဲ့ တာဝန်ရှိသူတစ်ဦးက ယနေ့ Myanmar Now ကို ပြောသည်။

“မနေ့က တိုက်ပွဲကတော့ ၁၅ မိနစ်လောက် ကြာတယ်။ လက်နက်ကြီး လက်နက်ငယ်အစုံနဲ့ ပူးပေါင်းအဖွဲ့တွေ ဝိုင်းကြပေမဲ့ လက်နက်၊ လူ အင်အားက မမျှတော့ ပြန်ဆုတ်လိုက်ရတယ်၊ ဒီနေ့လည်း ကျွန်တော်တို့ ရတဲ့နည်းနဲ့ ပြန်ချနေသေးတယ်၊ မိုင်းတစ်ခါဆွဲထားတယ်” ဟု ၎င်းက ဆိုသည်။

နဂါးညီနောင်၊ Mongoose Squadron, ဇာမဏီ၊ နှင့် မတ္တရာ PDF တို့က ပါဝင်တိုက်ခိုက်ခဲ့ကြသည့် ယမန်နေ့ တိုက်ပွဲတွင် စစ်တပ်ဘက်မှ စစ်သား ၁၂ ဦးခန့် သေဆုံးပြီး ၈ ဦးခန့် ဒဏ်ရာရရှိခဲ့ကြသည်ဟု PDF ဘက်မှ ပြောသည်။ 

၅ ဦး ဖမ်းဆီးခံရမှု နောက်ဆက်တွဲအခြေအနေကို မသိရသေးပေ။ 

ယနေ့ နံနက်တွင်မူ အနီးရှိ သဖန်းကိုင်းရွာအတွင်း ဝင်လာသည့် စစ်ကောင်စီတပ်က ဒေသခံတချို့ကို ဖမ်းဆီးရိုက်နှက်စစ်ဆေးနေသောကြောင့် ရွာခံအများစုမှာ ထွက်ပြေးနေရကြောင်း PDF ထံမှ သိရသည်။

စစ်ကြောင်းထိုးနေသည့် စစ်ကောင်စီတပ်ကို တော်လှန်ရေးတပ်ဖွဲ့များက ယနေ့ မွန်းလွဲနှစ်နာရီခန့်တွင် တစ်ကြိမ် မိုင်းဆွဲတိုက်ခိုက်ခဲ့ပြီး စစ်ကောင်စီတပ်ဘက်မှ ထိခိုက်မှုအခြေအနေကို မသိရသေးကြောင်း ဆိုသည်။

စစ်ကောင်စီတပ်သည် မတ္တရာမြို့နယ်အရှေ့ပိုင်းကျေးရွာများသို့ မကြာခဏ စစ်ကြောင်းထိုး နယ်မြေရှင်းလင်းမှုများ လုပ်ဆောင်လေ့ရှိပြီး တော်လှန်ရေးတပ်ဖွဲ့များကလည်း ပြောက်ကျားစနစ်ဖြင့် တိုက်ခိုက်ခြင်း၊ မိုင်းထောင်ခြင်းများ လုပ်ဆောင်နေမြဲဖြစ်သည်။

ပြီးခဲ့သည့် ရက်ပိုင်းကလည်း မန္တလေးမြို့မြောက်ဘက် မိုင် ၂၀ ခန့်အကွာ  မန္တလေး-မတ္တရာ ကားလမ်းဘေး ရဲကင်းစခန်းတစ်ခုကို မတ္တရာ PDF က ဝင်ရောက်ပစ်ခတ် တိုက်ခိုက်ခဲ့သေးသည်။ myanmar now

အာဏာသိမ်း စစ်ကောင်စီ ဘက်တော်သား ကချင်ဒီမိုကရေစီသစ်တပ်မတော် (NDA-K) ပြည်သူ့စစ်ခေါင်းဆောင် ဦးဇခုန်တိန့်ယိန်း၏ မြစ်ကြီးနားမြို့ရှိ နေအိမ်တစ်အိမ်ကို ၄၀ မမ ဗုံးသီးဖြင့်ပစ်ခတ်ခံခဲ့ရသော်လည်း လူထိခိုက်သေဆုံးခြင်းမရှိဟု အမည်မဖော်လို သည့် ဦးဇခုန်တိန့်ယိန်း၏တပ်ဖွဲ့ဝင်များက ငြင်း ဆိုသည်။

မြစ်ကြီးနားမြို့၊ မြေမြင့် ရပ်ကွက်အတွင်းရှိ NDA-K ပြည်သူ့စစ်ခေါင်းဆောင် ဦးဇခုန်တိန့်ယိန်း၏ နေအိမ်ကို မြစ်ကြီးနားမြို့ မြို့ပြပြောက် ကျားတပ်ဖွဲ့က မေလ ၆ ရက်နေ့ ည ၁ဝ နာရီ ၃၀ မိနစ်ခန့်တွင် ၄ဝ မမ ဗုံးပစ် လောင်ချာဖြင့် ပစ်ခတ်တိုက်ခိုက်ခဲ့ခြင်းဖြစ်သည်။

ထိုသို့ ပစ်ခတ်တိုက်ခိုက်ရာတွင် လူသူနေထိုင်ခြင်းမရှိသည့် နေအိမ်ကိုသာ ပစ်ခတ်ခဲ့ခြင်းဖြစ်၍ လူထိခိုက်သေဆုံးခြင်းမရှိဟု ဦးဇခုန်တိန့်ယိန်း၏ တပ်ဖွဲ့ဝင် တစ်ဦးက ဆိုသည်။

“အခုဗုံးပစ်ခံရတဲ့အိမ်က ကျွန်တော်တို့ဥက္ကဋ္ဌကြီး မြစ်ကြီးနားမြို့ကိုလာရင်တောင် တစ်ခါတစ်ရံမှနေတဲ့ အိမ်ဟုတ်တယ်။ အခုကအဲ့ဒီမှာဘယ်သူ့မှလည်းမနေဘူး။ နောက်ပြီး သတင်းတွေမှာ တက်နေသလိုလည်းမဟုတ်ဘူး။ ဆရာတို့သတင်းသမားတွေ ပိုသိမှာ ပေါ့။ ကျွန်တော်တို့ဥက္ကဋ္ဌ ကြီးကလည်း ဒီမှာမှမရှိတာ” ဟု အမည်မဖော်လိုသည့် ဦးဇခုန်တိန့်ယိန်း၏ တပ်ဖွဲ့ဝင်တစ်ဦးကပြောသည်။

လက်ရှိတွင် မြစ်ကြီးနားမြို့ရှိ ဦးဇခုန်တိန့်ယိန်း ပိုင်ဆိုင်သည့် မြို့သစ်ကြီးနှင့် မြေမြင့် ရပ်ကွက်ရှိ ကချင်အထူးဒေသဆက်ဆံရေးရုံးများကို နိုင် ငံရေး ပါတီတစ်ခုဖြစ်သည့် ဒီမိုကရေစီပါတီသစ် (ကချင်ပြည်နယ်)၏ ရုံးခွဲအနေဖြင့် ဖွင့်လှစ်ထားကြောင်း သိရသည်။

ဒီမိုကရေစီပါတီသစ် (ကချင်ပြည်နယ်)၏ ပါတီဥက္ကဋ္ဌ ဦးဇခုန်တိန်ဆောင်သည် လက်ရှိတွင် ကချင်ပြည်နယ်စီမံ အုပ်ချုပ်ရေးကောင်စီအဖွဲ့ဝင်ပြည်နယ် သယံဇာတ ဝန်ကြီးအဖြစ် တာဝန်ယူနေပြီး ဝန်ကြီးများအိမ်ရာတွင် နေထိုင်နေလျက်ရှိသည်။

စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ပြီးခဲ့သည့် ဧပြီ ၁၇ ရက်နေ့က NDA-K ပြည်သူ့စစ်ခေါင်းဆောင် ဦးဇခုန်တိန့်ယိန်းအား ဝဏ္ဏကျော်ထင်ဘွဲ့ကို ပေးအပ် ချီးမြှင့်ထားသည်။ mizzima

မန္တလေးတိုင်း၊ မတ္တရာမြို့နယ်အရှေ့ပိုင်းက ဒေသကာကွယ်ရေးစခန်းတခုကို  မေ ၄ ရက်မှာ စစ်ကောင်စီတပ်က တိုက်ခိုက်စီးနင်းခဲ့ပြီးနောက် ဖမ်းဆီးခံရသူ ၆ ယောက်ကို သတ်ဖြတ် မီးရှို့ထားခဲ့တဲ့ မီးကြွင်း အရိုးစုတွေကို  မေ ၆ ရက်မှာ  ဒေသခံတွေက တွေ့ရှိခဲ့ပါတယ်။

စစ်ကောင်စီတပ်ဖွဲ့ဝင် အင်အား၂၀၀ လောက်ဟာ  မေ ၄ ရက် မနက် ၇ နာရီလောက်က  ကားလေး ၆ စီး၊ ကားကြီး ၆ စီးနဲ့ လာရောက်ခဲ့ပြီး မြောင်းသစ်ကျေးရွာတောင်ဘက် အင်းရွာအကြားက ဒေသကာကွယ်ရေးစခန်းကို စီးနင်းခဲ့တာကြောင့် နှစ်ဖက် တိုက်ပွဲ ဖြစ်ပွားခဲ့သလို စခန်းမှာ တွေ့ရှိသူ ၆ ယောက်ကို ဖမ်းဆီးသွားခဲ့တာလို့ ဒေသခံတွေက ပြောပါတယ်။ 

ဒါ့အပြင် လက်လုပ်သေနတ်‌ ၃ လက် ၊G 22 မောင်းပြန် သေနတ် ၂ လက် ၊ကျည်ဘောက် ၆ ခု၊ လက်လုပ်မိုင်းတွေ၊ ဆိုင်ကယ် ၁၀ စီးလောက်နဲ့  မီးစက်တွေကို သိမ်းဆည်းသွားတယ်လို့ သိရပါတယ်။

ဖမ်းမိသူတွေကို စစ်မေးခဲ့ပြီး‌တဲ့နောက် တခြားစခန်းတစ်ခုကိုလည်း သွားရောက်စီးနင်းခဲ့ကာ  စခန်းကနေ ဆိုင်ကယ်  ၅ စီးနဲ့ ပစ္စည်းတွေကို သိမ်းဆည်းသွားတယ်လို့လည်း သိရပါတယ်။

အဲဒီနောက် မေ ၅ ရက်မှာ  ဖမ်းဆီးထားသူ ၆ ဦးကို သတ်ဖြတ်မီးရှို့ခဲ့တာဖြစ်ပြီး အသတ် ခံခဲ့ရသူတွေဟာ အသက် ၂၅ နှစ်ကနေ အသက် ၃၀ ကျော် အရွယ်ရှိ အမျိုးသား ၄ ယောက်နဲ့ အသက် ၄၀ ကျော် အရွယ်အမျိုးသမီးတယောက်နဲ့  အသက် ၂၀ ဝန်းကျင်ခန့် အမျိုးသမီး တယောက်တို့ ဖြစ်ပါတယ်။  အဆိုပါ အမျိုးသမီးနှစ်ယောက်ဟာ   သားအမိတော်စပ်တယ်လို့ ဒေသခံတွေက ပြောပါတယ်။

စစ်ကောင်စီတပ်တွေဟာ မေလ ၅ ရက်  ည ၇ နာရီလောက်မှာ သဖန်းကိုင်းကျေးရွာအတွင်း ဝင်ရောက်ခဲ့ပြီး  အမျိုးသမီး ၂ ယောက်ကို ဖမ်း ဆီးကာ ဝါးချွန်တွေနဲ့ထိုးတာ၊ ဦးခေါင်းနဲ့ ကိုယ်လုံးတွေကို ပြင်းပြန်ထန်ထန် ရိုက်နှက် စစ်ဆေးတာတွေပြုလုပ်ခဲ့တယ်လို့ သိရပါတယ်။ 

ဒါ့အပြင် ကျေးရွာအတွင်းရှိ နေအိမ် ၄ လုံးကို  စစ်ဆေးရှာဖွေခဲ့ပြီး  နေအိမ် ၁ လုံးကို လည်း မီးရှို့ခဲ့ပါတယ်။

မတ္တရာနယ်ခံတစ်ဦးက “ဒီက တောသူတောင်သားတွေက အိမ်တစ်လုံးဖြစ်အတွက် နှစ်ပေါင်း နှစ်ဆယ်လောက်စုဆောင်းပြီးတော့ ချွေးနည်းစာလေးတွေနဲ့ အိမ်ဆောက်ရတာ ဆိုတော့လေ၊ အပြစ်ရှိရင် အပြစ်ရှိတဲ့သူပဲ ဖမ်းသင့်တာပေါ့။ အပြစ်မရှိတဲ့လူတွေလည်း ဖမ်းတာကတော့ မကောင်းဘူးလို့ ယူဆပါတယ်”လို့ ပြောပါတယ်။

မတ္တရာအရှေ့ပိုင်းနယ်မှာ မွှေနှောက်နေတဲ့ စစ်ကောင်စီတပ်တွေဟာ မေ ၆ ရက်မှာ  ပြန်သွားခဲ့ပြီးနောက် စစ်ယာဉ်တန်းကို ဒဟတ္တောကျေးရွာအနီး မိုင်းဆွဲတိုက်ခိုက်ခံခဲ့ရတာကြောင့် ပြန်လည် ပစ်ခတ်ခဲ့တဲ့အတွက် သပြေခြံအတွင်းမှာရှိတဲ့ အမျိုးသမီးကြီးတယောက်  ကျည်သင့် သေ ဆုံးခဲ့တယ်လို့  မတ္တရာ နယ်ခံတွေကပြောပါတယ်။

မေလ ၄ ရက်က  စစ်ကောင်စီတပ်တွေရဲ့ ဝင်ရောက်စီးနင်းမှုမှာ ဒေသခံကာကွယ်ရေးတပ်ဖွဲ့တွေနဲ့ တိုက်ပွဲဖြစ်ပြီး စစ်ကောင်စီဘက်က ၁၁ ဦး ကျဆုံးကာ ၅ ဦးဒဏ်ရာရ ခဲ့တယ်လို့လည်း သိရပါတယ်။ DVB

ဗဟိုဘဏ်၏ညွှန်ကြားချက်မလိုက်နာ၍ဟုဆိုကာ၂၀၂၁ ခုနှစ်တွင် လုပ်ငန်းစတင်ဆောင်ရွကိသည့် ကုမ္ပဏီ ၃၄၆ ခုကို ပို့ကုန် သွင်းကုန်လုပ်ငန်းရှင် မှတ်ပုံတင်လက်မှတ် ပိတ်သိမ်းခဲ့ကြောင်း စစ်ကောင်စီလက်အောက်ခံ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနကထုတ်ပြန်သည်။

၂၀၂၁ ခုနှစ် နိုဝင်ဘာ ၁၀ ရက်နေ့ရက်စွဲဖြင့်ထုတ်ပြန်ခဲ့သည့် ဗဟိုဘဏ်၏ အမိန့်ကြော်ငြာစာတွင် ပို့ကုန် ရငွေကို ပို့ကုန်တင်ပို့သည့်နေ့မှ သုံးလအတွင်း နိုင်ငံအတွင်းရှိဘဏ်ငွေစာရင်းသို့ နိုင်ငံခြားသုံးငွေဖြင့် မပျက်မကွက် ထည့်သွင်းရန် ကြေညာထားသည်။

ထို့သို့ဆောင်ရွက်ရာတွင် အာရှနိုင်ငံများသို့တင်ပို့သည့် ပို့ကုန်များအတွက် ပို့ကုန်ရငွေကို ပို့ကုန်တင်ပို့ သည့်နေ့မှ ၄၅ ရက်အတွင်း၊ အခြားနိုင်ငံများသို့ တင်ပို့သည့်ပို့ကုန်များအတွက် ပို့ကုန်ရငွေကို ပို့ကုန် တင်ပို့ သည့် နေ့မှ ရက် ၉၀ အတွင်း ဘဏ်ငွေစာရင်းသို့ ထည့်သွင်းရန် သတ်မှတ်ထားသည်။

ပို့ကုန်တင်ပို့သူများသည် အဆိုပါ ဥပဒေ၊ စည်းမျဥ်းနှင့် စည်းမျဥ်း ပြင်ဆင်ချက်တို့အား လိုက်နာရန် ပျက် ကွက်လျက်ရှိသည်ဟု စစ်ကောက်စီလက်အောက်ခံဗဟိုဘဏ်က ယခုနှစ် ဧပြီလ ၂၇ ရက်နေ့တွင်ထုတ် ပြန်ပြောဆိုထားသည်။

ထိုသို့ပျက်ကွက်ပါက အရေးယူမည်ဖြစ်ကြောင်း စစ်ကောင်စီ၏ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနနှင့် ဗဟိုဘဏ်တို့က ဖိအားပေးထုတ်ပြန်ထားသည်။

ပို့ကုန်တင်ပို့သည့်ကုမ္ပဏီများအနေဖြင့် ပို့ကုန်ရငွေများကို ဗဟိုဘဏ်ကထုတ်ပြန်ထားသောကာလ အတွင်း ဝင်ရောက်ခြင်းမရှိပါက လုပ်ငန်းရှင်မှတ်ပုံတင်လက်မှတ် ပိတ်သိမ်းသည်အထိ အရေးယူမည်ဟု မေလ ၇ ရက်နေ့က ထုတ်ပြန်ခဲ့သည်။

ဗဟိုဘဏ်၏ညွှန်ကြားချက်များ လိုက်နာရန်ပျက်ကွက်သည့် ကုမ္ပဏီစုစုပေါင်း ၁၇၇ ခုကို ပို့ကုန်သွင်းကုန် လုပ်ငန်းရှင်မှတ်ပုံတင်လက်မှတ် ပိတ်သိမ်းခဲ့ကြောင်း ဧပြီ ၂၇ ရက်နေ့တွင် ထုတ်ပြန်ခဲ့သေးသည်။ အဆိုပါ ကုမ္ပဏီများတွင် ၂၀၁၆ မှ ၂၀၁၈ ခုနှစ်အထိ ပို့ကုန်လုပ်ငန်း ဆောင် ရွက်ခဲ့သော ကုမ္ပဏီများ ပါဝင်သည်။ mizzima

မိုင်းလားအဖွဲ့လို့ လူသိများတဲ့ ရှမ်းပြည်နယ် အရှေ့ပိုင်း အထူးဒေသ (၄) အမျိုးသားဒီမိုကရေစီမဟာမိတ်တပ်မတော် (NDAA) လက်နက်ကိုင်အဖွဲ့ဟာ အာဏာသိမ်း စစ်ခေါင်းဆောင်ဖိတ်ခေါ်တဲ့ ငြိမ်းချမ်းရေးဆွေးနွေးပွဲတက်ရောက်မယ်လို့ NDAA ပြောရေးဆိုခွင့်ရှိသူ  အတွင်းရေးမှူး ဦးကြည်မြင့်က ဒီဗွီဘီကို ပြောပါတယ်။

နိုင်ငံရေးဆွေးနွေးပွဲက နိုင်ငံရေးပြဿနာတွေကို ဖြေရှင်းဖို့အတွက်နည်းလမ်းဖြစ်လို့ ဒုဥက္ကဋ္ဌ  ဦးဆောင်ပြီး ဆွေးနွေးပွဲတက်ဖို့ဆုံးဖြတ်ခဲ့တာဖြစ်ပြီး ‘ဝ’ ဦးဆောင်တဲ့ ပြည်ထောင်စုနိုင်ငံရေး ဆွေးနွေး ညှိနှိုင်းရေး အမြဲတမ်းကော်မတီ FPNCC အဖွဲ့ဝင်အနေနဲ့  တက်တာမဟုတ်ဘူးလို့လည်း ဆိုပါတယ်။

“ကျနော်တို့က နိုင်ငံရေးဆွေးနွေးပွဲဆိုတာ နိုင်ငံရေးပြဿနာတွေ ဖြေရှင်းနိုင်တဲ့နည်းနာပဲဖြစ်တယ်။ ဒါကြောင့်  ကျနော်တို့ နိုင်ငံရေးဆွေးနွေးပွဲ တက်မယ်ဆိုတာ ပြောထားတာပါ။  ကျနော်တို့ကတော့ ကျနော်တို့ လူကြီးတဦးတော့ တက်ပါမယ်။ ဒုတိယ ဥက္ကဋ္ဌ အဆင့်တဦး တက်မှာပါ။”

မိုင်းလားအဖွဲ့အနေနဲ့  ကိုယ်ပိုင်အုပ်ချုပ်ခွင့်နဲ့  အထူးဒေသ ၄ မှာ နေထိုင်နေတဲ့ပြည်သူတွေ ဖွံ့ဖြိုးတိုးတက်ရေးရဖို့ အဓိကထားဆွေးနွေးသွားမယ်လို့လည်း  ဦးကြည်မြင့်က ပြောပါတယ်။ 

“ဆွေးနွေးတာတော့ အဓိက ကျနော်တို့ဒေသမှာ ဖွံ့ဖြိုးတိုးတက်ရေးနဲ့ ကိုယ်ပိုင်အုပ်ချုပ်ခွင့်၊ နိုင်ငံတော်ရဲ့ ကူညီမှုရနိုင်အောင် အဲဒီဘက်မှာပဲ ကြိုးစားပြီးတော့ ဆွေးနွေးမှာပါ။ ကျနော်တို့ကတော့ ဘယ်လိုပဲဖြစ်ဖြစ် အခွင့်အရေးနည်းနည်းလေးရရင်လည်း ကျနော်တို့ ပါဝင်ရမှာပဲ။ ဒါဆွေးနွေးပွဲဆိုလည်း အခွင့်အရေးတခုပဲလို့။ တခြားမှာ ဘယ်လောက်ကြီး တခြားလူတွေနဲ့  သူတို့နဲ့ ပဋိပက္ခ ပြင်းထန်ပြင်းထန် ကျနော်တို့လည်း ကြားမှာ ကွဲလွဲမှု ဘယ်လောက်ရှိရှိ ဆွေးနွေးနိုင်တဲ့ နေရာရှိရင် လက်နက်နဲ့ မသုံးဘဲနဲ့ ဆွေးနွေးလို့ ပြေလည်နိုင်မယ့် ကိစ္စရှိရင် ကျနော်တို့ ကြိုး စားမှာပါ။ ပြည်တွင်းမှာတော့ သွေးထွက်သံယိုမှုက သိပ်များလွန်းနေတယ်။ ပြည်သူလူထုက တအားနစ်နာနေတယ်။”

ရှမ်းပြည်အရှေ့ပိုင်း အထူးဒေသ ၄ က အမျိုးသား ဒီမိုကရက်တစ် မဟာမိတ်တပ်မတော် NDAA  မိုင်းလားအဖွဲ့ဟာ မြောက်ပိုင်းတိုင်းရင်းသားလက်နက်ကိုင်အဖွဲ့တွေ စုပေါင်းဖွဲ့စည်းထားတဲ့ ပြည်ထောင်စုနိုင်ငံရေးဆွေးနွေးညှိနှိုင်းရေး အမြဲတမ်းကော်မတီ FPNCC ရဲ့ အဖွဲ့ဝင်ဖြစ်ပါတယ်။

ရှမ်းပြည်နယ်အရှေ့ပိုင်းမှာရှိတဲ့ အထူးဒေသ ၄ မိုင်းလားဒေသ ဧရိယာဟာ မြို့နယ် ၃ မြို့နယ်နဲ့ ဖွဲ့စည်းထားတာဖြစ်ပြီး လူဦးရေ ၃ သိန်းကျော်ရှိတဲ့ ကိုယ်ပိုင်အုပ်ချုပ်ခွင့်ရ အထူးဒေသဖြစ်ပါတယ်။  DVB

စစ်ကောင်စီတပ်၏ မီးရှို့ဖျက်ဆီးမှုကြောင့် နေအိမ်များမီးလောင်ကာ စစ်ဘေးရှောင်နေရသည့် မင်းကင်း မြို့နယ်ရှိ ပြည်သူများအတွက် Myanmar Defence Force (MDF) မှ ယာယီအဆောက်အဦးများ ဆောက် လုပ်ပေးခဲ့သည်။

စစ်ကောင်စီ၏ ခလရ (၈၇) တပ်နှင့် ပျူစောထီးများက ပြီးခဲ့သည့် ဧပြီလ ၂၅ ရက်နေ့တွင် မင်းကင်းမြို့နယ် သံပေါက်ကျေးရွာကို အင်အား (၁၅၀) ခန့်ဖြင့် မီးရှို့ဖျက်ဆီးခဲ့ပြီး ဧပြီလ ၂၆ ရက်နေ့တွင်လည်း ဇင်ကလဲ့ ကျေးရွာကို ထပ်မံမီးရှို့ဖျက်ဆီးခဲ့ပြီး ကျေးရွာနှစ်ရွာရှိ အိမ်ခြေပေါင်းများစွာ မီးလောင်ပျက်စီးခဲ့သည်။

မီးရှို့ဖျက်ဆီးမှုကြောင့် ကျေးရွာနှစ်ရွာမှ ဒေသခံထောင်ချီ စစ်ဘေးတိမ်းရှောင်နေရကာ အိုးမဲ့အိမ်မဲ့ ဖြစ်ခဲ့ရ သည့် ပြည်သူများအတွက် MDF က ထောက်ပံ့ကူညီလှူဒါန်းခဲ့ခြင်း ဖြစ်သည်။

“အဝတ်အထည်၊ ဆန်၊ ဆီ၊ ဆား ကြက်သွန်တွေ လှူထားတယ်။ ထပ်ပြီး ဝယ်ယူထားတာက အိုးခွက်တွေနဲ့ မိုးကာတွေပါလှူတာ နှစ်ကြိမ်မြောက် ရှိပါပြီ။ စစ်ဘေးရှောင်တွေနေထိုင်ဖို့ ယာယီအဆောက်အဦးတွေ လည်း ဆောက်လုပ်ပေးခဲ့ပါတယ်။ စားနပ်ရိက္ခာတွေတော့ မလောက်ငသေးဘူးပေါ့။ အခုက ပန်းဆက် တောင်ဖြူက ပျူစောထီးတွေကြောင့် အနီးအနားရွာတွေက လွတ်ရာရှောင်နေကြတဲ့ စစ်ဘေးရှောင်တွေ လည်းရှိနေတယ် ” ဟု Myanmar Defence Force (MDF) တာဝန်ရှိသူက ပြောသည်။

စေတနာရှင်ပြည်သူလူထုက ထောက်ပံ့ပေးသည့် ထောက်ပံ့ငွေများဖြင့် ဆန်နှင့် ရိက္ခာအခြောက်အခြမ်း များ၊ အိုးခွက် အဝတ်အထည်များနှင့် မိုးကာများကို ဝယ်ယူပြီး ပြည်သူများကိုယ်စား ကာကွယ်ရေးတပ်ဖွဲ့ ကလှူဒါန်းခဲ့ခြင်း ဖြစ်သည်။

စစ်ကောင်စီတပ်က စစ်ကိုင်းတိုင်းအတွင်း အင်တာနက်ဖြတ်တောက်ထားကာ အင်အားအလုံးအရင်းဖြင့် ဝင်ရောက်ပြီး ကျေးရွာများကို မီးရှို့ဖျက်ဆီးခြင်း၊ ဒေသခံပြည်သူများအား ဖမ်းဆီးနှိပ်စက်သတ်ဖြတ်ခြင်း များကို ပျူစောထီးများနှင့် ပူးပေါင်းကာ လုပ်ဆောင်လျက်ရှိသည်။

ဒေသခံကာကွယ်ရေးတပ်ဖွဲ့များက စစ်ကောင်စီတပ်ကို ပြန်လည်ခုခံတိုက်ခိုက်မှုကြောင့် ထိတွေ့တိုက်ပွဲ များ မကြာခဏဖြစ်ပွားလျက်ရှိပြီး ကာကွယ်ရေးတပ်ဖွဲ့အားကောင်းသည့်နေရာများတွင် စစ်ကောင်စီ ထုတ်ကုန်များ သယ်ယူခြင်း ရှိ၊ မရှိ အပါအဝင် နယ်မြေစိုးမိုးရေးနှင့် နယ် မြေရှင်းလင်းရေး လုပ်ငန်းများကို အရှိန်အဟုန်မြှင့်ကာ လုပ်ဆောင်လျက်ရှိသည်။ mizzima

မန္တလေးမြို့၊ အောင်မြေသာစံမြို့နယ်၊ ကျုံးအရှေ့ဘက် ၆၆ လမ်းနဲ့ ၁၅ လမ်းမှာ ဧပြီ ၇ ရက် မနက် ၈ နာရီဝန်းကျင်က  မပေါက်ကွဲသေးတဲ့ ရှော့တိုက်ဒုံး ၂  လုံးတွေ့ရှိခဲ့တယ်လို့  ရဲတပ်ဖွဲ့နဲ့ နီးစပ်သူထံက သိရပါတယ်။

ရှော့တိုက်ဒုံးတွေဟာ  စစ်တပ်ရှိရာ နန်းတွင်းဘက်ကို ချိန်ရွယ်ထားတာဖြစ်ပြီး စစစ (စသုံးလုံး) တပ်ဖွဲ့ဝင်တဦးက တွေ့ရှိခဲ့တာဖြစ်တယ်လို့ ဆိုပါတယ်။

တွေ့ရှိထားတဲ့ ရှော့တိုက်ဒုံးတွေကို သက်ဆိုင်ရာက လာရောက်ရှင်းလင်းသွားပြီဖြစ်ပြီး ၆၆ လမ်း နဲ့ ၁၂ လမ်းထောင့်မှာလည်း စစ်ကောင်စီတပ်တွေက လုံခြုံရေးတင်းကျပ် ပိတ်ဆို့ရှာဖွေ စစ်ဆေးနေပါတယ်။ DVB